"نيـران أبـو ذيبـة "
بقلـم ، نبـأ السـلطـان ""
الحلـقه الـ ٦
ماردت القدر يبعدني عنك يوم
ومـاردت السعــادة تعــوف بيبـــاني
ياليل ألاماااااان الماتمرّه غيوم
وياحظــرة حنين بحظنـه دفّــاني
ياأجمل قصيدة وبالوزن محكوم
وياأروع ندى اعلى أوراق بستاني
يانبع الكرم محتاجك بهاليوم
مو تدري بغيابك طاحت أركاني
ياأجمل حلم وسط الجفن مرسوم
رحت والصور ظلت فوك حيطاني
الك حنيت يابوية اعلى بختك كوم
عفتني ويتمتني وضــاع عنــواني
أفز من نومي وأسمع صوتك المهموم
وأفكدك وأرجع أغرك بأحزاني
صرت أنعاك وأبجي عليك من دموم
وآنه القلم صــــار اليــوم ينعــــاني
ردت أشريك بس اشبيدي ع المقسوم
يالفــركــاك هبّــط راسـي وأذانـي
بس انته أصبحت طير بجنااان يحوم
وهذا الذي مسّكن نوحي وأشجاني
((الشعر من ابو ذيبة ..غضب ))
.................. .
عثمان : الله يساعدك بعد عيني شد حيلك وابوك شايفلة مرة ههههههه
غضب : ههههه افا لا ما يتزوج على امي
عثمان : هههه. واثق
غضب :اكيد.
دخل علينا عمي أمير
أمير: السلام عليكم
الشيخ عثمان :وعليكم يابة ، حياك الله
الشيخ خيون :هلا خوية وين جنت من ردتك
أمير: اعذرني يا ابو غضب جان عندي شغل وتعطلت عليك السموحه منك
الشيخ خيون: لا خوية على راحتك بس ضل بالي
غضب : گاعد بسد الشيخ عثمان مد ايدة يفلس الي لحم
عثمان : اكل بوية اشو اشوفنك ضعفان شني سالفتك
غضب : بوية، الصگـر ياكل بمنكارة
الشيخ عثمان : هههه كفو والله اسمع وليدك يخيون
خيون : ترباتي ابن ابوه ، التفت على حسـن وكركان ،، وهذول ولدي السباع
الشيخ عثمان : يحفظهم الك الباري
خيون : ويحفظك ويخليك...خوية أمير نكمل العشى ورايدك بحجاية
أمير : ان شاء الله يخوية ..
خيـون : الشيخ عثمان وانته خوية أمير الوحيد الي واكف وياي من أخوتي وصرت سند فـ سلمان رجع من رجع يتوعد ويهدد
هالمرة يريد يسويها صدك ويريد يكتل ويهدد
الشيخ عثمان : هذا مثل جلب الماي لا هو يعض ولا هو عايش وشايف الدنيا مثل باقي الجلاب دينة ومعبوده الطلايب
خيون : المهم وصيتي هذا امير وهذا انت يعثمان اني عندي ابن مخبل ديروا بالكم تخلونه يتصرف تصرف يخسر المشيتين خليها تنحل بالبخت والقانون ما اريد اخسر ابني وشگلك كتل عم ابوه ونصير علج بحلوك الناس
امير : خيون بس شلون
خيون : هذا العندي اياكم وبالكم وحتى لو عرف سلمان هو الكتلني لا تخلونه يضيع عمرة عود تالي الله كريم وين تصفى خل تصفى
امير : زين ليش ما تنطيها اله الشخية ونفتك من كل شي
خيون : لا مو هيج الحجي هو طامع بحلالي وبالشيخة نگدر نسد حلكة بالشيخة ثاني شي اذا حاليا اني انطيتها اله عيبة بحقي وراح يكول للناس خيون تنازل عن الشيخة ما يكول اكراما لعمة عثمان وامير وليداتي وبيتي وحلالي ذمة برگبتكم خاف يصير عليه شي حلال اقسمة قسم عندك يا امير واسجلة باسمك وقسم عند غضب من يدخل السن القانوني اتصرفوا وياه بيهن
اميـر : عد عيناك خوية تصفى ان شاء الله وتنحل وتصير سوالف
خيـون : الله كريم
الشيخ عثمان :زين اكو حل بديل ليش ما نكعد ويا سلمان ونسد حلكة ببغشيش
خيون : ما محتاجة هو محتاج صيت يتخبل من يشوفني يتخبل من يشوف مضيفي مفتوح ومضيفة محد دايسة
كل همه يصيحوله الشيخ
يريد يكسر عيني بهالسالفة بس يخسى والله
............
غضب :كعدنا نشرب الجاي وبعدها الكهوه وسالفه تجر سالفه ما حسينا بلوقت ، ضلوا ابوي وعمي والشيخ يحجون احنه التهينا ويا ولد الشيخ عثمان من ردينا للمضيف
اتقربت لابوي كتلة ..
_- بوية مو اشوف اتأخر الوقت ، يلا يابة نروح
خيـون : يبُا اذا تردون انتم روحوا ويا عمكم أمير اني اريد ابقه يم الشيخ عثمان
غضب : صـار ، يابة يلا عمي نروح، يلا شبيكم صافنين ما تكومون
حسن : منا الوادم ماكدر احجي
كركان : عود بلبيت نلعب عليك شناو
غضب :ابتسمت على كلامهم، طلعنا بسيارة احنه وعمي أمير سقت السيارة
هدوء بلسيارة ما تسمع صوت حتى من التفت عليهم عبـالي نايـمين طلعـوا صافنـين ، رجعت اسوق شوية وندسني كركان
حجه بصوت خاافـت ..
كركان:وللك غضييب على گولت حبوبتي قسمه، سمعت بلخبر الجديد..
رديت جسمي علية .وكتلة بذهول //
_-يا ساتر شصاير احجيي؟؟؟
_- ولك كالوا يا غضييب الفارة تلعب حديد احسن ،منك، هههههههه..
_- من كال هيج ضجت حيل منه كتلة//
_-انعل ابوك لابو منين ما طلعت حقـ..ير ولك ما تبطل سوالفك تعبانه والحسين عبالي اكو شي خطير
كركان : عليك الله شفكرت بية
حسـن : ولكم اني هم حسبالي ،كركان مسوي دكه ناقصه لو طافر على بنت وراح يحجي لغضب
غضب : جا غير اطكك راسه وافلشه
كركان: شني ما عندي غيرة ولكم اطفر على بنات الناس
حسـن : هاي سالفتك اكو واحد يسويها حتى انه انهبطت منك ياغبي يا حمار
امير : شبيكم . بوية؟متناكرين!..
غضب : عمي والله ماكو شي تعرف سوالف كركان بس عمي لو كايلين لابوي تعال ويانه خل نرجعله شتكول خلي يجي ما مرتاح لضلته هسة احس راح تگب سالفة
امير : افا عليك ذيب لا تخاف ماكو شي بوية هو تدري بي دوم يبات يم عثمان
غضب : الله كريم
رجعنا للبيت. راح عمي أمير لبيته تعبان واحنه دخلنه للبيت. لكيت امي كاعدة
حياة : هلا بعد امك شو طولتوا ابوك وين
غضب : بستها براسها ، ابوي يم عثمان يضل يطول او. اعتقد يبات
حياة : يبووو يهالريال شكو ضال والله خايفة
غضب : تدرين حتى اني كلبي حاس راح تصير سالفة
حياة : لا حول ولا قوة الا بالله العظيم الله كريم يمة
غضب : رحت لغرفتي ونمت بعد ما تطمنت على اخيواني وحنينتي اختي الصغيرة كبرانه وصايرة هلال
انفتح باب غرفتي انه مغمض عيوني
حسـن : شكو نايم هسه تدري اليوم نوم ما جايني
غضب : جاوبته وانه عيوني مغمضه بالي بغيـر مكان ،
_مادري احس نفسي تعبان
اجه كركان وكعد يمنا كال //
-_شبيك خويـه تعبك جسدي ، لو تعـب روحـي ؟؟
غضب : لا والله لا مريض ولا بية شي ، بس نفسيتي تعبانه
حسـن: حتى انه حاس بس ما اريد ازودها عليك قبل شوية كنا نحجي اني وكركان
كركان : انه رايح انام شباب
وانته غضب اقرة الي علمنه عليهن ابوي خوش يابة ان شاء الله ماكو شي ، تصبحون على خير خياي
حسـن: اجمعين
غضب : تلاكي يارب
نمت واني موكل امري لله كلش مغتث
ما اعرف شوكت نمت غطيت بالنوم ما احس غير صوت قوي الباب الخارجي تفلش حتى حسيت انقلع من مكانـه ركضت من مكاني شفت شكو شصاير
طلعت لكيت عمي امير يدك بلباب كل قوته
طلعوا وراي حسن وكركان
حياة : يمةةة غضضببب اكعدوا وينكم
غضب : فتحت الباب وكلهم فزوا من الصياح
_-هاا عمي شبيك ولك
حجـه بصوت ممزوج بخوف برهبه ،، امير : ابـ ..ـوك ابوك كتله سليمان
غضب : من سمعت بية رديت ليورى ما صدكت كلامه كتلـة // ياهو الكالك. عمي منيلك هذا الخبر المشؤؤم
امير : والله يا بوية حالي من حالكم خابري الشيخ عثمان خابرني
ركض كركان وحسن الغرفهم عدلوا ملابسهم وغضـب صفنه تجيبة وصفنه تردة
جلبت حياة بـ كركان بصوت يلهث شبية ابووكم احجي يمه شكو. انهد حيلي
كركان : يمه وعلي اليوم نحرك الصوبين عليهم بس اصبري عليه انشوف الخبر شني
غضب : جريت سلاحي وحسن وكركان وياي
أمير : امشونه عمي اليوم انعل سلفه سلفاهم
غضب : بدموع. عممي فدوة اسرع ابوي ابوي راح يروح زين وين ما كالك وين كتلوه
امير : بصراخ يم الناظم ( الناظم هو مشروع ماء اشبه بالنهر لكن عميق يسمى بالناظم)
الطريق سواه عمي شمرة عصى 3 مرات ردنا نندعم
وصلنا للناظم ولكينا الهوسة
غضب : بوووية يا بوية وخروا ولكم...شهرت سلاحي بوجوهم كلهم
كركان : الله لا يوفقك دنيا واخره ولك سلمان الك..ـواد
حسـن : وين راح وين ضم راسه هلعار ميت على هلشيخه الگشرة
غضب : ما اكدر اطل النظر لأبوي ما اكدر ليش هيج شسوولك بوية بوية جونك الطلقات بوية حاجيني اكعد جا ياهو الي اني ذيبك لا تخليني وحيد
بوية هندامك انترس دم يبوي عكالك طاح شواربك تلطخن دم
عمامي مارضوا علينه ضلينه متعاركين ومصايح بينهم وسلمان ماكو شارد لاحس لا نفس ما شفناه
امير : ولك خيون خوية ياهو الي اكعد يخوي والله حقك ما يروح
شلناه للمستشفى على ابو بلكي الله يعيش لكن للأسف منين ما نديرة نلگي طلقة بي
غضب : انفجعت واغمى عليه ما اعرف شنو صار بعد ما كعدت الا واني اسمع صوت بجي وصريخ ركضت واني على ابو بلكي يضل عايش بعدني مصدوم من الخبر امنيتي يطلع جذب امنيتي ماكو شي
اباوع من بعيد وجدامي ثگلن ما بالي شي بس ابوي نسيت كل شي
غضب : هاا عمي هاا شكالوا ها يمة احجي شكال الدكتور
حياة : صخامم يمة تصخمتت يمة صرت يتيم يتموك الما يخافون الله ييمة تلطم وتخرط بخدودها
امير :غضب حضني وكام يبجي
اجت حبوبتي قسمة تلطم والمستشفى انگلب گلاب صدمتي اكبر من كل شي وتفكيري وعقلي كله وكف
قسمة : يمةة غضيب وتشم بيه يمة ببعد امسج منو واحطلة مسـﭻ (مسك) يمةة بعد ياهو يجي يحط راسة بحضني ويبجي يمة ياهو يحن عليه
يوم مرن ساعاته اشبه بالموت الحقيقي واني اشوف كتال ابوي يسوي روحه حزين ويبجي واني اعرف بداخلة هلاهل
غضب : عيوني تتجادح نار وخشمي طك دم
اخذنا ابوي للنجف ندفنه خيون الجان ونس لكل ضايج خيون الجان صوته دافي من ينعى ويهوس
خيون الجانت هيبته تجبرك تحترمه راح يصير جوى التراب وسفة والف ياحيف
الدفان من شال التراب وخله على ابوي شلت التراب وشميته حيل
كتلة // بوية دمك ما يروح هدر الاخر يوم بعمري حرامات بووية حرااامات تناااام عليك الكاااع عميت عينيي ولا شايف هذا اليوم الاگشر ولك الله يحرككك كلبك مثل ما حرگت كلبي على ابوي
شكيت زيجي دشداشتي انشكت من طول لطول وناس تصبر بية اشاكف بأدية اريدهم يوخرون عني ،
وحسن وكركان ابد مو احسن من حالي ,
دفنناه ورجعنه تاذيت حيل وحيلي رگد واني اشوف اخيواني شلون يحضنوني ويبجون لو امي لو حبوبتي اندفن ودفن روحي وياه
رجعنا وتمت مراسيم العزاء واني يوم عن يوم روحي تتعب وترگد
امي انكسرت فرگته كسرت الكل الشيخ عثمان صابته جلطة
الهي اختبارك صعب واني لسة صغير تمت الفاتحة بعد تعب وسهر وراسي احسة ثكيل
راح ابوي وترك كل شي يخصه بيه واطباعة وهيبته وطوله وجسمة الخشن
رجعت للبيت
غضب : يمةة
طلعت امي مفزوعة وتصيح خيون اجه
هالموقف انحفر بگلبي واني اشوف امي كل ما احجي واصيح عبالها ابوي صوتي كلش شبيه لصوته حبوبتي تاذت وتمرضت
صار يوم السابع والناس انگلبت گلاب
بعد ما انتهى هذا اليوم المتعب والكل راح لبيته دخلت البيت وصورة ابوي بكل مكان مرسومه واني اسمع نواعي حبوبتي
قسمة : الوالدة امي ولا گال وين الوالدة امي.
كون على گلبي انامن واحطنة على گلبي يمة لا تمرون علية يا ربعة لا تمرون يمة لو ردتوا تنشدون بهداي لو ردتوا تنشدون
كعدنا والتمينا نبجي حوالين نواعي امي وحبوبتي حضنت حسن وابجي
حياة : شلوون اصدك الشيخ خيوون مات وعافني بناتنه لا شبعن دلال منه لا من لا ريحته ما صدك عاافني وررااح بوسط ذيابة
ايام الحزن صعبات وكبرني 20 سنة ليكدام والاكثر من هذا انه اشوف وليدي ووليداتي يحاولون يكابرون كدامي
صرت بغياب خيون غصن هش بسرعه ينكسر
صار حالي من بعده على اقل شي ابجي
النوم تقريبا اختفى من عيوني الا اتعب من البجي يلا انام
العالم تروح وتجي ومرت الايام والكل رجع لشغلة والتهى بحياته بس انه ضليت بين الذكريات والصور وملابسه لا ما ذبيهتن ولا انطيتهن كل الاشياء الجان يستخدمها موجوده وملابسه احضنها الكلبي وانام
غضب : كسـر ضهري ابوي بموته من عافني
الشيخ عثمان يومية يجي يطمئن علينا ويروح ويوصيني اصير ذيب وكفو ،،
والشيخ عثمان ما تركنه لحظه بوقت الي عمامي نسونه بية بس هو وعمي امير
يوم عن يوم الحقد يزداد بگلبي على اعمامي وسلمان
غضب : عمي عندي سالفة وياك
عثمان : كول بوية
غضب : سلمان كتال ابوي شمدريك هو
عثمان : اي هو اسمع وهذا عمك امير يدري احجي امير خو يدري بسالفه كلها
أمير :……
يتبــع..
نبـأ السـلطان ..☹️☹️