بقلم الكاتبة ( نون النعيمي ) ✨
سافر بروحك لحد اخر بچي
ولم فشلتك حطها بالجنطه متاع
وامشي عنهم وين ما عد الله گاع ..
.................🤍................
طبيت وسديت الباب واتفاجئ بأمي واكفه تبچي
ركضت عليه واني احچي ، يمه شبيج يمه منو يمج ليش تبچين
سلمى : يمه حركت القميص مال ابوك
_ بربج ع هاي كاعد تبچينن واذا يعني حركتي طبه مرض
سلمى : يمه متعرف شيسوي اذا عرف حركته واني اكويي
_ استغفر الله يا يمه طبه مرض خلي محترك كوليله إدريس حركه بس لتبچين يعني شسوين قابل احترك بعد
اباوعله شلون تحرك بدمه وتبچي عبالك مسويه جريمه عفته وصعدت فوك مدتت ع الچرابيه واني افكر شلون راح اخلص امي من الموضوع بدون عركه وضرب ربي شوكت اخلص من هل ظلم واخلص امي من الي هيه عايشتة
امي اكثر انسانه احسه تعبت بهاي الدنيا
تتحاسب ع شي هيه ماله ذنب بي
اتمنى شغله وحده بحياتي واعرفه مستحيله
اتمنى ارجع بالوقت وامنع زواج امي وابويه ، امنع امي من هل زواج الاكشر
اتمنى رب العالمين يعوضه بشي يليق بيه ع الاقل لان فعلاً تعبت من الضرب والغلط والإهانه ماكو عداله بالموضوع مو استحقاق امي هاي العيشه
شنو الفائده من هاي العيشه وهيه عايشه ع الهباطه وع المشاكل اتخاف من الصغيره والچبيره
ابويه معيشه برعب ، من فطنت للدنيا الحد هسه رغم اني بعدني طفل بعيون هواي عالم بس اعرف شنو اللي مرت بي امي اعرف شنو اللي اني اتعرضتله من ضرب وتعنيف
اتمنى يجي يوم اخذ حقه وحقي وياه اتمنى يجي يوم اشوفه مرتاحه وخلاصانه من هذا الضيم كله
.................🤍................
ربُى : داشر بالملابس ودافكر شلون انجح اني صف خامس ابتدائي ماكو احد يدرسني ولا احد يتابعني شلون ادرس يا ربي
_ ربُى ربُى تعايي نزلي ابوج اجه
اتنهدت وغصباً عليه لازم انزل اشوفه واسلم علي شمرت الهدوم من ايدي ورجعتهن للسله مال ملابس واني روحي مقبوضه احس اكو شي حيصير اتعوذت من الشيطان ونزلت
احمد : هلا بويه تعاي هين مشتاكلج انا
_ هلا بويه زينه اني انتَ شونك
احمد : زين بويه زين هاچ هاي الچ جبته ويايه الچ
_ مد ايده وانطاني علاكه بيه ككاو وبيه كلاده حرف " R "
_شكراً بابا تعبتك
تعبج راحه بنيتي
درت وجهي ع مرت ابويه اشوف الحقد يطاير من عينه داريد اكوم جان ابويه يكول عندي موضوع وياج ربُى لدكومين كلبي لعب لان حسيت عنده شي
احمد : بويه اني راح اخذ امج وروح البغداد وانتِ ابقيج اهنا يم اخوج علي
بس بابا ..
احمد : بويه هذا شغل لازم امج تجي ويايه اني اشتاقله واريده يمي انتِ ماعليج شي كاعده يم اخوج
_ براحتك يابه حچيت واني الدموع بعيني عفتهم وصعدت فوك واني ابچي وكفت ع الدرج من سمعت علي كام يحچي
علي : بس بويه البنيه صغيره شلون تعوفه وحده محتاجه ام محتاجه اب ميصير
الاء : انتَ موجود تتكفل بيه شبيك ناقصك عرض طول
احمد : كافي بله نقاش هسه كومي لمي غراضج يومين وطالعين
ربُى : كاعده وحدي بالغرفه ابچي ابويه عافني وحيروح وامي راحت زين شلون حبقه وحدي مدرستي شلون اني شلون
شلون راح اعيش وحدي شلون راح اوصل واحقق احلامي اني مجرد طفله بعين الكل ، ليش محد يفكر بيه
الطفله الي لازم تعيش طفولته وتلعب مثل الجهال الي لازم اشوف حنيه من امه وابوه الي لازم تنام بحضن ابوه ويكون اله سند بس اني ابويه وين ملتهي ويه مرته وميعرفني اصلاً
كل تفكيري مدرستي ودراستي جنت اتمنى اصير دكتورة جان حلم امي هذا واني ورثته وانطيت وعد النفسي اني راح احققه
شلون هسه راح احققه وحدي شلون راح اكبر وحدي واعيش ، صحيح علي يمي بس اني كـ طفله محتاجه اب ، لان امي راحت بعد
واني افكر غفيت ، غفيت ع افكار اكبر من عمري بهواي .
.................🤍................
إدريس : فزيت ع صوت صياح
مددت رجلي وحچيت ، ربي شوكت راح اكعد كعده مثل الاوادم
كمت نزلت ليجوه اشوف ابويه لازم اميي من شعره ويغلط ،
_لجج حيوانننهه شلوننن تحركينن القميصص دابوك انييي فهمينييي شنوو هذا الثووووللل الييي انتِ بيييي خرببب لشتهه الابوججج يوميه هيج وكتتت
واكف ع الدرج ورجلي ترجف صحت بصياحح ، اني والله اني حركته مو هيه عوفه مو هيه
ماشوف اله ابويه حد امي واجاني ركض جرني من ايدي ونزلني الدرج ع السريع
_ لكككك ساقط عليمنننن طاااالع انتَ اليومم احركك جرنيي وطلعني للحديقه واني بس ابچي اشوف امي وراه تتوسل بي يعوفني وهوه يدفع بيه
اليوم اعلمك شلون تحرك قميص ابوك ، جرني وراه بقسوه وطلعني للحديقه مال بيت
_ عدنه مخزن بالحديقه مالتنه نخلي بي اشياء زايده او منحتاجه ، دخلني وسد الباب مخله امي تدخل
_اسمع امي دكله لك عوفه ليش شسوالك والله اني حركتهه ليش هيجج يا ظالممم حرامم عليكمم
اشوف ابويه نزع حزامه وهوه يكول ، اسطبرلييي اليوم اربيكك من جديد
ضربني ضربه ع رجلي حسيت رجلي انكسرت ويه كل ضربه ارفع راسي للسماء واشهك ، كل ضربه ضربني اياه هدت حيلي هد ضل يضرب يضرب بالنص ساعه هوه يضربني مخله مكان بجسمي مزوركه بالاخير تعب فتح الباب وطلع كانو مسوه شي بذاك اليوم كرهته كره مستحيل احد يكره بكدي تخبلت من عنده
سلمى : طلع ليث من المخزن والعرك يصب منه
لكك ليش هيججج هذااا ابنككك يا ظااالم حرام عليك الله لا يوفقكك
ليث : لج تسكتين لا ابلش بيج هسه وحق الخلقج
_ الله لا يوفقك دخلت ع إدريس واني اشوفه فاقد بالكاع وعيونه مركزهن ع السكف
كوم يمه كومم من حيلي ع حيلك ابني الله لا ينطي انشاء الله كسر بأيده
إدريس : كمت بالكوه من الكاع كافي يمه مابيه شي ترا متعلم مو جديده كافي سكتي
سلمى : اووووف يمه اووف الله لا ينطيي
ودتني امي للحمام بالكوه امشي لان مداحس بجسمي من الوجع غسلتلي وصعدتني بغرفتي
سلمى : يمه وليدي يجي يوم وترتاح بي الله راح يعوضك بالأحسن ان شاء الله حاول تنام وليدي
إدريس : الله كريم يمه
طلعت امي وسدت الباب وراه ، صفنت ع ايدي ليش هيج اني الله نطاني هيج اب جنت اتمنى اشوفه حنين عليه او فديوم مذكرني بشي حلو مثل الولد البقيه لو ساعدني بدراستي بس بالعكس ، ابويه انسان قاسي كلش ميحب احد انجبر يزوج امي وجابني انسان ماكو رحمه بكلبه ، يشتغل بالنجاره احاول بكل قوتي ماكون انسان مثل ابويه همجي اتمنى لو رحت مثل مراح اخويه حزام بهل اثناء وبهل تفكير
اجت ع بالي هاي البنية الحلوه الحد هسه ماعرف شنو اسمه ولا شفته بنفس المكان مرا ثانيه ابد قررت باجر اروح اشوف بيتهم بلكي اشوفه بس اخاف من هاي المره الي ضربته
مبينه مره مسمومه وشايفه روحه ، من ضربته ذكرتني بأبويه
بوحشيته وقساوته هم ماعدنه مانع يضربني كدام العالم لو يغلط عليه
الشخص اللي لازم اني احبه واحترمه مثل مكال رب العالمين هوه ابويه ، بس ماكدر ، ماكدر احبه واتقبله ابويه ع الضرب اللي يضربني اياه واني بعدني جاهل بعدني بطفولتي
هاي الطفوله اللي دائماً اسمع الكبار يحسدونه عليه ويتمنون يرجعون اله اني اكره واتمنى اكبر واطلع من هل مرحله بأسرع وقت ممكن لان هاي مو طفوله
هاي تعذيب بحد ذاته ، تعذيب الطفل مثلي .
.................🤍................
ربُى : مرت يومين كلش عاديه ماكو اكشن بحياتنه اليوم ابويه ومرته يطلعون البغداد واني ابقه يم علي اخويه
احمد : ربُى تعاي بويه سلمي عليه راح اروح
نزلت واني دموعي بعيني توصل بالسلامه بابا بوسني وحضني
علي : اجيكم بالعطل ان شاء الله
ربُى : ماشي بابا
الاء : اني مالي حضن مالي بوسه بضحكه جانبيه
ربُى : بكلبي ( شكد حيه هل مره يا الله ) اكيد رحت حضنته جان تهمس بأذاني بعد مشوفينه يحلوه وباعت عليه وبتسمت
خنكتني العبره من كلامه ، اخاف لا صدك بعد ماشوفهم ، ماريد ابويه يروح ويعوفني هسه لو ياخذني وياه البغداد عادي اقبل بس ميقبل ياخذني
ودعو علي وبوسه وابويه يوصي بي علية وهوه يكله صار من عيوني ومن هذا الكلام
طلعو من البيت طبعاً الطريق طويل بين البصره وبغداد ان شاء الله يوصلون بالسلامه ، سد الباب علي
ربُى : علي اني حصعد انام بعدني نعسانه
علي : خوش اصعدي
_ صعدت الغرفتي واني ابچي دخلت بفراشي وغطيت راسي احس كلبي يوجعني ماعرف شنو هذا الشعور بالنسبة الطفله بس اكو شي يحركني بصدري ، ماريد ابويه يروح لان امي راحت عني وعافتني من صغري
بنفس الوقت احس احسن مرت ابويه راحت ع الاقل بعد مانضرب لو اتعامل بهل طريقه ع الاقل راح اكل مثل العالم واقره وماسمع شي بي سم من الصبح مراح اسمع احد يجيب طاري امي بعد
مسحت ادموعي ودعيتلهم يوصلون بالسلامه ، طلعت كتبي وضليت اقره الحد ما غفيت
بعد مرور فتره من الوقت
كعدت ع صوت اصياح نسوان وهوسه كلش اكو ضوضاء
نزلت ع كيف واني النوم بعده بعيني ممركزه شنو الي ديصير كل همي اصعد أكمل نومتي اباع ام ابويه وعماتي وهواي عالم موجودين وديبچون ونص دصيح و علي واكف ع صفحه ديبچي شافتني بيبيتي ، تعاي حبوبه تعاييي اويليييي وليدييييي
بيبي شكوو والله خوفتوني شبيكم تبچون
بيبي ابوج ......
يتبع..
شنو راح يكون مصير ربُى وعلي ؟ وشنو المتوقع الي صار الوالده ؟ وهل يا ترى إدريس راح يتعوض مثل م كالت امه ؟ ومنو حزام ؟
الهنا ويخلص نهاية البارت الثالث اتمنى يعجبكم اذا ماكو دعم ف مراح اكمل القصة .
الكاتبة ( نون النعيمي ) ✨!