الكاتبة ( نون النعيمي ) ✨!
صُدفه شفناك ونسينا شلون چنه
كثر ما بيها أمان النظرة مِنك
چنه نتمنى مثل عَينك وطنّا ..
insta: non_alnuaimi
.................🤍................
بأحد القرى الصغيره "وفي البصره تحديداً "
سلمى : شوكت تكعد عاد راح يفوت الوكت عليك
إدريس : كمت والله كمت شلون متخلوووونن الواحد ينام شوكت اكبر واخلص منكم ( حچيت بهمس واني اكوم من الفراش )
سلمى : سمعتك سمعتك تكبر وتخلص اتلحك تخلص
إدريس : اهو خل اكوم احسلي لسويلي محاضره صباحيه
_كمت كلعاده غسلت وبدلت وكفت كدام المرايه امشط شعري صفنت شويه ع روحي ملامحي كلش جذابه وحلوه شعري اشكر عيوني زرق عبالك بحر , طبعاً بس اني بالعائله عيوني زرق طالع ع جدي وهذا الشي اللي يميزني ،كملت وطلعت
سلمى : لازم اهلهل هسه كملت مو ؟
إدريس : شبيج يمه
سلمى : يرادلك اربع ساعات كدام المرايه غير ، يلا تعال اكعد اتريك
إدريس : ماريد شبعان انتِ اكلي بالعافيه لان راح اتأخر
سلمى : ليش يمه متاكل تعال اسويلك لفه اخذه وياك
إدريس : شبعان والله شبعاان يوم
سلمى : اكلت بالحلم يعني شبعان
إدريس : اهو اروح احسلي اني يلا مع السلامه
_طلعت وعفت امي ادردم ورايه طبعاً اني طالب سادس ابتدائي مكضيه اسخت ومادرس مالي واهس .
_لبست حذائي وطلعت بس فتحت الباب شفت احمد صديقي واكف ينتظرني ، عفته وطلعت كبل
احمد : إدريس إدريس يمعود هووووبب وين انتظرني
إدريس : شبيك اصيح يمعود فضحتنه
_ اجه ركض خله ايديه ع چتفي وكمنه نتمشه للمدرسه
وكفنه ع الرصيف ننتظر السيارات توكف حتى نعبر
احمد : لك باع هاي الحلوة الي دتباع عليك
_ انداريت شفت بنيه كلش حلوة تطلع بعمري بس شعره اسود طويل شويه ويصير بطوله وهيه بيضه اتعجبت هاي اول مره اشوف ابنية حلوة هيج
_ دغني احمد بكتفي ، يمعود وين صفنت دمشي راح ننعلس من امه من وراك
_ سحبني احمد بس جانت نظراتي بعده علية بس بهل اثناء اجت مره مو كلش كبيرة ضلت تحچي بس مداعرف شنو الحچي ماشوف اله ضربته ع راسه وجرته من أيده وكامت تمشي
_ ضل بالي يمه اخاف صارله شي كلش لفتتني بهل يوم ف قررت كل يوم اجي اشوفه . ضلينه نمشي ونسولف اني واحمد الحد م وصلنه للمدرسه بس بالي جان يم هاي البنيه .
_ دخلت للدرس متأخر چان بادي والمعلم موجود
اول مشافني المعلم اجه ع السريع عليه جرني من أذني اني واحمد ووكفنه يم السطله مال زباله
:- اذا ضليتو بهذا الاهمال راح اطلب ولي امركم
احمد : ستاذ والله اخذتنه النومه هاي اخر مره
_ كفخ احمد ع راسه كمت اضحك اني بصوت خافت ماحسيت غير انكفخت ع راسي اني هم
:- اريد اعرف من تكبرون شصيرون هم دكاتره
احمد : اي ستاذ دكتور اصير
:- دنجب ع هذا الكسل منظف بالمستشفى ميقبلوك
هاي اخر مره اسمحلكم اطبون للدرس متأخرين
إدريس : اي ستاذ هاي اخر مره
:- ضلو واكفين يم الزباله حته تعرفون مستواكم
_ انداريت ع احمد لكيته يباع عليه ومبتسم
لازمته الضحكه لان لو يرزل بينه منا الصبح متاكل عدنه عبالك بله احساس ضلينه واكفين وهوه يشرح ، دنكت اضرب برجلي لان وكفت وكامت توجعني ماحسيت غير ع كفخه اجتني براسي
:- هم كسل وهم تأخر وهم مسمعون كلام
:- ستاذ والله رجلي كامت توجعني
:- احسن حتى بعد متتأخرون ، او اذا اتحب ادك ع ابوك
_ بس سمعت كلمة ابوك كمت ابلع بريكي
:- لا استاذ بعد منتأخر هاي اخر مره والله
:- يلا كعدو ولو هوه خلص الدرس
_ جريت احمد من أيده ورحنه المكانه اخر رحله ، رحله العظماء انسميه احنه
همسلي احمد
:- بس ابوك يكدرلنه وحق الله
:- بس سمعت كلمة ابوك بطني كامت توجعني
:- لك حتى اني ، اليوم انروح نلعب طوبه
:- مو تونه صرنه طوبه ، افتح الكتاب لا ادفرك هسه
:- وره منكمل شبيك
:- لا عوفه ع باجر
:- ليش
:- رجلي توجعني
:- ديلا عوفه ع باجر
_ كملنه لدروس كله بدون منفوت ولا صف باخر درس طكني الجوع وبطني كامت اصيح ، طلعنه اني واحمد للحانوت عبالك طابينه بمعركة احُد
:- بربك شلون حنشتري
:- بابا عوفه يمي اني إدريس
_ انداريت ادور ع اثنين ولد اعرفهم بس لمحتهم صيفرت الهم حتى يشوفوني اول مشافوني اجو ركض
خليت ايدي ع كتف واحد من عدهم
والثاني عيوني عليه ، طلعت الف دينار انطيتهم اياه وكلتلهم يجيبون لفتين فلافل ويكثرون العمبه
:- اذا تتأخرون متجون للعبه مال طوبه باجر
_ لحظات وركضو طبو ابين الولد الواكفين مرت دقيقه تقريباً واجو بيدهم لفتين فلافل ويلهثون
:- هاا نجي هسه ؟
:- اي تجون ، كامويضحكون وراحو ، انداريت ع احمد وكتله شلوني هسه ؟
:- تخبل بس همه قشامر وكلام الله
:- اعرف ، خل ناكل هسه يكلك الاستاذ مجاي اليوم
:- ابو الرياضيات ميجي ؟ بحلم انتَ بابا
:- اني هم هيج كلت
كلمنه اللفات ودخلنه اول مدخلنه دخل ورانه المعلم ضل يشرح ويشرح واني اغفي وكلشي ممفتهم حدد النه امتحان شهري وطلع
اخذنه جنطنه وطلعنه للبيت مرينه ع نفس الطريق اللي شفت بي هاي البنيه الحلوة بس ماكو ، اني حظي واعرفه مستحيل اشوفه مرتين وبالاخص منطقتنه كلهن عجايز يعني نادراً ما انشوف بنيه حلوة .
......
ربُى : جنت واكفه ع الرصيف دانتظر مرت ابوية تجيني لمحت شخص واكف ع الرصيف المقابيلي يباوع عليه بتعجب وبصفه شخص يدغ بي ويجره صار عندي فضول اشوف ليش ديباع اني ودافكر جان تجي امي
الاء : يلا امشينه وين واكفه دتباعين ع الولد بعدج صغيره وادورين ولد شكد ادبسز تكبرين شسوين
ربُى : اني اسمعه والدموع تتجمع بعيوني ماشوف اله كفخه اجتني بس كلش اتأذي
الاء : امشي لج ادبسز يلا كدامي اله اكله الابوج اليوم
ربُى : مشيت واني الدموع بعيني واشوف البنات يباعن عليه ويتهامسن ووحده تضحك ويه الخ ويباعن عليه عبالك مسويه جريمه
اووف لو امي موجودة منو يكدر يحچي ويايه بهل طريقة لو يمسني بشي منو يكدر يشيل عينه عليه لو يطخني بشي
رجعت للبيت اول مدخلت ركضت فوك الغرفتي اخذت المخذه وضليت ابجي مقهوره ، مقهوره لان اني مو مثل اللي بعمري
شويه واجت دفرت الباب وخلت أيده ع خصره
وطكطك بعلجه وتحچي
الاء : هاي شنو عيني جرحتج بت ام الزلم
ربُى : عيب تحچين ع مره ميته هيج
الاء : اتعلميني العيب يلفكر اليوم اعلمج التربيه شلون اتصير
_ اقتربت من عندي جرتني من شعري وضلت تضرب بيه ع راسي بكل قوته عبالك اتريد تنتقم من عندي احس جسمي اتكسر حسيت بدماغي حيطلع من راسي لان اكثرية الضربات ع راسي
اني جوه أيده ابچي واترجاه تتركني لان حسيت خشمي كام يذب دم وضهري اتكسر اتكسر من الدفرات بالاخص اني ناعمه وهيه ثور شكبره
الاء : اتعلميني العيب يلكح** اليوم اوديج يم امج السا** اللي ماعرفت اتربيج وذبتج علية وراحت الخايسه
ربُى : عوفيني الله يخليج والله داتأذه
:- كانو مداحچي وياه تضربني وتفشر واني اشهك جوه أيده عافتني وطلعت وكالت كومي نظفي
ضليت نايمه بالكاع ابچي والوب من الوجع ماكو شي بجسمي ميوجعني ، شويه وكمت مسحت دموعي ولميت شعري وبديت انظف
امسح بالكاع ولازمه ضهري من الوجع اللي داحس بي ، توني كملت واندكت الباب اجه ابويه من الشغل
اول مطب للبيت صاح عليـه رحت ركض عليه حضنته وبادلني الحضن اتمنى بهاي اللحظه اسولفلك شديصير بيه واشوفك جسمي شلون ازرك من الضرب
ابويه كلش حنين عليه بشكل محد يتصوره
بس ميعرف مرته شسوي بيه واني ماكدر اكله لان خطيه ٢٤ ساعة يشتغل واشوفه يتعب
احمد : شنو بويه مبينه تعبانه وليش وجهج اصفر ؟
الاء : يمعود چانت دتلعب ويه الجهال ومكضيه ركض
احمد : شنو كل يوميه هل جهال؟
الاء : والله يا ابو ربُى شسويله عينه كويه وهم خطيه خل تتونس
:- صفنت عليـة شلون تكدر اتكذب بهل طريقه شلون كلبه ينطيه وتكذب وتمثل بحيث متخليك اشك بيه اصلاً ،لازم اجامل واطلعه صح لان راح تعذبني اذا راح ابويه وتضل تضرب بيه ف علمود نفسي لازم ماطلعه غلطانه لو كذابه
ربُى : بعد مالعب ويه البنات
احمد : ايي بويه كملي دراستج اريدج تنجحين اني مو اتكضيه لعب وطربكه كل يوم
ربُى : صار بابا
احمد : يمج امج الاء شتردين هيه اتفهمج علية واتدرسج وتخليج متحتاجين شي
الاء : بأي وقت حبيبتي قابل انتِ جايتني وماقابله اني
:- اخخ الله لو اكدر احچي اتخبل من اشوفه هيج تتمسكن كدام ابويه واللي يقهر اكثر اعرف بيه تحب ابويه بس ع مود افلوسه وابويه خطية مصدك بيه المسكين نوبات انقهر عليـه والله
:- رحت للمطبخ اشرب مي لان صار فتره احس اكو حرگه بصدري كلت الابويه كال عادي اتصير بس كلش جاي توجعني
داشرب مي ماحسيت غير ع دفره جايتني ع خاصرتي وكع الكلاص من أيدي لزمت خاصرتي واني اتوجع
الاء : سم وزهر اشربين ياقندرة امشي حضري ملابس الابوج لا اكسرج هسه والله واطلع قهر هذا الفكر ابوج بيج
ربُى : هسه احضر ماكو داعي تضربيني تره
الاء : اضربج واكسر راسج هم ومتحچين مو زين متحملتج بنت الفكر لعبتوه النفسي انتِ وابوج مو زين متحملتكم
ربُى : اذا فكر شكو ازوجتي ابويه هو انتِ غير ازوجتي ع مود افلوسه اطلكي وفضيه ماكو داعي تتحملين
_ رادت تهجم عليـة بس ابوية صاحه
ضلت تتوعدلي وعافتني وراحت لميت الكزيز من الكاع ورحت طلعت الابوبه ملابس ومددت ع فراشه وغمضت
شويه وصاحتني كمت ع السريع من الفراش
كالتلي اروح اجيب صمون
اخذت فلوس من عده وطلعت
رحت جبت صمون وتوجهت للبيت كصيت الكمع مال صمون وكمت اكل بي واني بطريقي للبيت
وصلت البيت قريب من بيتنه كاعدة بي مره عجوز وبنته ، شفت المره كاعدة بالباب اول مشافتني صاحتني اله
اشرتلي اوكف كباله
:- شلونج بيبي
:- هلا يبعد بيبيتج
:- محتاجه شي
:- اريد سلامتج يبعد عويناتي .. شسوين طالعه
:- اجيب صمون
:- ماتعرف هاي الحيه اجيب؟
:- لا
:- اذا تحتاجين شي تعاليلي بيبي لا تستحين
:- ماشي بيبي
:- هاي شبي وجهج هيج اصفر شنو مكاعد توكلج ؟
:- دخل اتسوي اكل بي خير هيه
:- الله لا ينطيه ان شاء الله
_ شفته اتباع ع ايدي ع مكان ازرك صاير من وره الضرب
اخذت ايدي وكامت تباوع عليه بقهر
:- هاي هيه ضربتج مو ؟
:- اي
:- الله يكسر ايده ان شاء الله ويعذبه اضعاف العذاب متخاف الله هيج تضرب بنية يتيمه
:- شسوي بيبي ميخالف
:- سوده عليه يبعد بيبيتج بعدج اصغيره وهلكد متحمله تكبرين شتتحملين اكثر
:- ميخالف
_ سلمت عليـة وركضت للبيت
اول مدخلت ابجهي للمطبخ خليت الصمون وصعدت ركض الغرفتي
اذكرت عندي واجب طلعت كتبي طشرتهن بالكاع وكعدت اكتب الواجب اللي انطتنه اياه المعلمه مال عربي
ماحسيت غير الباب اندفرت بكل قوه
شفته وكفت اتخصرت يم الباب
الاء : متنزلين تسممين ويه ابوج لو اله اتسويلي احجايه
ربُى : ماشتهي عندي واجب مامكملته
الاء : شطلع هل واجب انزلي ع السريع
ربُى : ماشتهي شبعانه
الاء : تره عندي عادي هسه اشكك الكتب فوك راسج وانزلج من شعرج سحل ع الاكل لان انتِ مو مال احترام
_ صفنت علية والله اسويه واشكك كتبي ماعده مانع ابد .. خليت كتبي ع صفحه وكمت ، نزلت هيه قبلي ونزلت وراه ع الاكل
عبالي مسويه اكل زين نفس المركه والتمن اللي مسويتهن قبل اربع ايام حاميته هسه صار ناكل بيه اربع ايام
احمد : شنو مو داخلي مصرف وين ديروح اذا كل يوم نفس الاكل ؟
الاء : كلت حرامات اسوي شي واذب هذا الاكل
احمد : والمصرف
الاء : هااا مو جبت صابون وقاصر
احمد : استغفر الله يا الله ، باجر اجي الكيج مسويه غير هذا الاكل ومراح اخلي مصروف دبري امرج
الاء : صار
_ صفنت عليه واني لازمتني الضحكه شكد ما هيه ادبسز وتغلط وتضرب وتحچي وره ابويه ، بس متكدر تفتح حلكه كدامه ترجف منه
مر اليوم كلش عادي بين غلط مرت ابوي ومشاكله وخزراته وكرهه المستمر واللي بين دعائي المستمر اللي اتمنى يخلصني من هذا كله ..
يتبـع ...
~~~~~~~~~~~~~~~~~
الكل بداية نهاية ...
هذا جان البارت الاول صح قصير بس اعوضكم بالبارت الثاني انشاء الله ♥️!

هذا حساب الانستا تابعوني لان انشر اشياء تخص الابطال 🫶🏻!
اليوزر ( non_alnuaimi )