مساء الورد والياسمين عليكم فراشاتي 🦋🖤
قريري العيون
بقلم زهراء علي
ممكن تعليق للفقرات وتصويت+متابعه
مشاهده ممتعه.
صغيرتي ماذا جرى
مالذي اخافك إلى هاذا الحد
وكأن ألون الأحمر يريد أن يبرز لونه وستوطنت خدييك
عينيكِ الناعسه أفاضت دمعاً حارقاً
لاتحزني ياوردتي
لأن اكتمل القمر الرابعة عشر من عمره
أبتسمي ياقمر الزمان
فأنتي لستي أول فتاه
ولا اخر فتاه يحدث لها هذا
...................
ورده
طلعت من الحمام امشي علئ كيف
ودخلت للغرفه والخوف يسري بجميع أنحاء جسمي
راحن النسوان وأمي اجت تصيح
ام ورده: ورده وريده وينج عدنه سعف وره لبيت روحي جيبيهن نحوكهن مكانيس
دخلت أمي وشافتني مكرفصه روحي يم النضده مال الفراش وابجي
ام ورده: شبيج ورده شجرالج
ورده نعگد لساني وماعرف شكول خايفه ومستحيه
ام ورده: ولج شبيج احجي
ورده بكل براءة
:يمه فدوه انا مدري شبيه وابجي
ام ورده: يمه اسم الله عليج شبيج بنيتي بعدج تخافين من الرجال لمات
هزيت راسي
لان الي صار وياي نساني حته الخوف الي جان ملازمني من مات الرجال
أم ورده: جا شبيج ولج گلبي روحتيه احجي ولج لاسودنيني بهاي المغربيه
حجيت بخجل واحرف الكلام گوه يطلع مني
وانا اشهگ بجي
ورده: يمه طلع دم مني
وجان كل فكري امي تعصب علي وتكتلني حجيت واني مدنگه
ضحكت امي
ام ورده: صلوات على محمد وآل محمدصرتي مره بعد لاتخافين يمه كل احنه هيج بس لاتحجين يم خواتج لو لواحد عيب
جنت مستحيه من امي وگصتي تصب عرگ
ومن الي صاير وياي هزيت راسي وكلت اي
علمتني امي عليهه وشسوي ورادت تطلع
بس دخل حازم للغرفه
حازم: الله يساعدكم
ام ورده: هلا ومرحبا وليدي
حازم وهوه يباوع على ورده
حازم: خير شبيهه ورده تبجي
ورده سمعت هيج دوروني متلگوني من الخجل
واحس الكل تعرف بألصار وياي لان جنت ميته خجل
أم ورده:لا ماكو شي يمه بس عود تحوك مكناسه ونجرح اصبعها
وتبجي مثل لجهال
حازم: سعفه بزتج وهيج وجهج أصفر وترجفين لوطاگتج طلقه شتسوين هههههه
ام ورده: يمه اسم الله برد شرك ولي روح شوف اخوانك جابو الغنم بعدهم
ورده
طلعت امي من الغرفه هيه وحازم وانا بقيت بالغرفه
ماطلعت ابد اجه الحلال من الگيعان والشمس غابت
والدنيا غوربت وانا مطالعه
امي ضلت تشتغل بلبيت وفاطمه. وماسه للحلال
ومصطفئ وحازم هم يعاونهن
اجت فاطمه
فاطمه: ها شعدج ورده صدك اصبعج مجروح ويوجعج
ورده: اي صدك
فاطمه: غير تنتبهين شجاج
أذن الاذأن وكمت حته اروح اتوضئ وصلي
رحت لتانكي مال الماي الي بل حوش وفتحت الحنفيه وتوضيت
اجت امي من يم مراح الحلال
وشايله طشت بيه شعير على راسه شافتني واجت يمي
ام ورده: شسوين
ورده: اريد اصلي
ام ورده: لا مايصير حرام يمه
ورده بذهول: ليش حرام
أم ورده: هذا شرع الله يمه مايصير
سكتت مارديت ورجعت للغرفه وانا ميته خجل من امي
لتمو أخواني بلغرفه الي نام بيهه ملتمين حازم ومصطفئ
ثنينهم مايصلون بس احنه البنات وامي وابوي امي صلت بغرفتهه هيه وابوي
والبنات صلن وانا رحت للهول سويت نفسي اصلي صار وكت العشاء
لتمو أخواني. وفاطمه جابت السفره امي مسويه تمن وماش وروبه ودهن حر
صبت امي عشا الابوي الي مياكل يمنا وحده بلدوانيه (الاستقبال) وأخذته اله
صبت فاطمه لخواني وتعشو نطتني عشا كتله ماريد ولا خليت بحلگي لگمه
خلص وكت العشا والبنات غسلن المواعين وكل شويه متعاركات على شغله
أختي ماسه الزغيره لسانهه طويل وتعارك على كلشي
فاطمه فطيره وفقيره
أجت امي
ام ورده: راسي بارد يوميه ورده تسوي الشغل كله بدون صوت اليوم عود انتن وكل شويه وتعاركتن
اجى وكت النوم وفرشت فاطمه الفراشات ودردم لان هاي أوامر أمي ودردم علي تكول اليوم مدللتهه
احنا. انام بغرفه البنات والولد بلديوانيه
وامي وابوي بغرفتهم
نفرش فراشاتنا صف واحد وانا بالوسط لان اخاف جبانه
مر الليل مرور الكرام منمت من الرعب الي بداخلي ومن الي اني بيه. وبطني تمغص بيه حته مرحت لحمام قبل النوم خفت اشوف الي شفته
جسمي كله كاش مني وانا كاشه من جسمي شعور مقرف اول مره احس بيه
احس رطوبه تضايقني بس معندي جرئه اروح اشوف شنو
وبقيت الصبح منمت متت من النعاس وراسي ضل يوجعني وكمت ابجي ماعرف شسوي اجت امي
ام ورده : شعجب كاعده يوميه يروح صوتي يله تكعدن
مرديت عليه رجعت لفراشي وابجي ولعبانه روحي من نفسي
ام ورده: هااا شعدج شبيج
ورده :مدري شبيه
ام ورده: كليلي شكو انا امج
خجلانه من امي وضليت ساكته محجيت
ام ورده: يا ولج شبيج
ورده :شو مدري شبيه ضايجه من نفسي وسكتت
افتهمت عليه امي وكلتلي كومي للحمام اسبحي وانا اجيبلج ملابس
رحت للحمام وانا لعبانه نفسي من روحي
ذبيت ملابسي وسبحت وامي دكت الباب ونطتني ملابسي
إني البس كيمونه لوفانيله وبجامه وفوكهن ثوب
جابتلي امي ملابس داخليه من عدهه وكالت البسيهن انا عمري مالابسه الملابس الداخليه البس بس شوراتات طوال
شعور موحلو حسيته لمن اخذت الملابس من امي
ليش من ملابس امي
هاي الملابس مال نسوان اكبار
وإني بعدني اشوف روحي بعدني زغيره مومال هيج لبس
صراحه جنت ماحب هاي الملابس
امي صاحت من وره الباب
ام ورده: لبسي ذن الملابس
سكتت محجيت
الاتك جان لونه بنفسجي وشطوله امي طويله وتارسه
وإنا كصيره جبرت نفسي ولبست الاتك دخلته براسي
ولبست تعلاكات مالته شو هاذا راح كبل نزل يم رجليه
طلع عريض وجبير عليه انا رتاحيت فرحت كلت همزين
لبست بس دشداشتي وجواهه بجامه وكلت اروح للغرفه
والبس شي جوه ثوبي
طلعت من الحمام ولكيت امي منتضره اباب الحمام
ام ورده: ها لبستيهن
ورده: كبار ماحبهن
ام ورده: شني تلعب روحج مني عود
ورده: لايمه والله موهيج بس انا ماحب هيج ملابس ماتدرين بيه مالبس هيج
ام ورده: ملابسج انا اغسلهن عوفيهن
تعالو دورني نبلعت من الفشله والمستحه من امي
ورده :لايمه فدوه انا اغسلهن كلشي مابيهن هنه
ام ورده: لا انا اغسلهن عوفيهن حته تبقين بفهاوتج وساعه يله تكملين ويجي واحد من خوانج يشوفج
رحت للغرفه ولتفيت ابطانيتي والنومه نومه
مرت سنه لاشي جديد نفس الايام والروتين حياتنه هادئه
الضهر ساعه 2:15
اجه ابوي يصيح من ديوانيه
ابو ورده: ام حازم وينج اجاكم خطار
طلعنا على صوت ابوي انا وامي
مره وياهه طفل تقريباً عمره ٣سنين هيج تقدمت امي عليهه
ام ورده: يمه هلا منين طالعه الشمس اليوك من خيه ام غيث
ام غيث: يابعد گلبي خيه مشتاقتلج ام حازم
وتاحضنن وسلمن وحده على ثانيه
وتقدمت انا على المره وسلمت عليهه بوستني المره ودخلتهه امي للغرفه وكعدن يسولفن وحده تسئل عن احوال الثانيه وامي طايره بيهه
رحت جبت دولكة ماي وگلاص ودخلت صبيت للمره ونطيتهه أخذته وهي انضارها عليه
أم غيث . هاي بتج جبيره
ام ورده: اي هاي ورده
أم غيث: ماشاء الله صايره گمر كبرتي يورده اخر مره شفتج بيهه جان عمرج 6سنوات
أم ورده: اي يا خيه غير انتي گطعتي هل گطعه من ذاك الوكت لمن جبتي غيث تزورينه للسيد بعد ماجيتي. هسه لازم كبر وصار زلمه
ضحكت ام غيث وكالت
ام غيث: اي كبر وصار زلمه وحته زواج هم راح نزوجه هل ادورله علئ مريه
ام ورده: صلوات على محمد بل خير خيه
لتفت امي وحجت.
ام ورده روحي صيحي ام حنان خل تجي كليلهه ام غيث عدنا خطار ليوم
هزيت راسي ورحت أصيح على مرت عمي
أم غيث تصير زوجت ابن خال ابو حازم (ابو ورده)
وجايه هيه ورجلهه للزياره ومرو على بيت ابو حازم
ابو غيث بلديوانيه. يم ابو حازم
جان ابو غيث يجيهم دوم هوه رجال على كد حاله من الحله
بس يجي يمهم وكت الحصاد وكت الزرع وكت الي تكون الكاع مزروعه خيار بصل طماطه بيتنجان يعاونهم
وينطونه القاسمه الله وهم ياخذ لأهله من هل خير من الگاع
لمله جم فلس وشترى محل وهوه عنده خبره بلحلاقه ورتب أموره وكام ميجي لبيت أبو حازم
ام غيث شافت حسن ورده وعجبتهه
وبدت تفكر تخطبهه لأابنها غيث
بقو يومين يم بيت ابو ورده وخلال ذني اليومين أم
غيث منزلت عينهه من ورده
جانت ورده تجيب حطب وتخلي بتنور الطين وتشعل التنور
وتخبز وحدهه وتطبخ وكل شغل البيت عليها أمها لان عدهم خطار على طول كاعده وي ام غيث لويطلعن
للبستان يفترن
ورده من بعد ماكبرت شويه كل شغل البيت طاح براسي
تنضيف مكان الحلال والحلال الي ينربط بلبيت هيه كله مسؤله عليه واطلع اجيب الحشيش والحطب. حته علئ الدجاح والبط
واطلع ارعئ الحلال مرات اذا إخواني بالمدرسه امي سلمتني البيت كله
جنت اتعب بس ماحجي واذا حجيت لوكلت ماسوي شغله أمي ترزلني وتكلي هاذا بيتج شنو نجيبلج شغاله
هناك بل بستان. ان غيث وام ورده
ام غيث: خيه بنيتج هم احد خاطبهه
ام ورده: لا محد جاي عليهه
أم غيث: يابختي خيه انا شفتهه وعجبتني واريدهه الغيث
ام ورده بفرح: خيه وين نلكه احسن منكم وانا اكيف بس الشور يم ابوها
أم غيث: طبعاً خيه وان شاء الله ادللهه والله
واحنا ماعدنه شي بيتنه بل ولايه وابني هم يشتغل وي فيتر
وثابت بشغله وان شاء الله يدللهه
امي طارت من الفرح وجنها ملكت الدنيا من بعد من نخطبت وراح ازوج
من بعد هل يومين بيت أبو غيث رجعو للحله
ورده مكاعده دوم عدهم خطار وملتهين وياهم
وشغل البيت كله عليهه
ورده
كاعده. اغسل ملابس واجت امي كالت خلصي شغلج وتعاي عندي شغله وياج
گلبي نغزني كلت شعدهه امي مومن عادتهه تصيحني هيج اذا عدهه شغل تصيح صياح
بليل ابو ورده محاجي زوجته وكايللها بموضوع الخطبه مال ورده
لان ام غيث من شافت ورده
طرحت الموضوع على زوجها وكايلتله انو خوش بنيه وحلوه وعمرهه يناسب عمر غيث وشاطره أبو غيث
كايلهه هاهيه انتي ششوفين وراح احاجي ابوها وان شاء الله خير يارب
حاجيه واذا قبل بعد اسبوع نجي نخطب رسمي ان شاء الله
بليل ابوورده. وولده واخوه ابو حنان وابو غيث كاعدين بلدوانيه
يسولفون على الكيعان ولبيع والشراء
ابو ورده: شنو ابو غيث تردون تتوكلون باجر للحله
ابو غيث: اي والله خويه هم يله
بس اليه رجعه ثانيه هنا اذا وافقت على طلبي
ابو ورده :مية هلا بيك بكل وقت خويه كول شنو طلبك تدلل
ابو غيث: مايدلل عليك ضالم ونعم منك يخوي
إنا اريد اخطب بنتك الجبيرة لاابني غيث وأن شاء الله ماتردني
لو ادور الدنيا كلهه مالگي مثل نسبكم لان انتم ناس أجاويد وولد حموله
أبو ورده: خير ان شاء الله وتشرف بيك يخوي بس اخذ رئي الاهل وردلك خبر.
ابو حنان ماحجه شي لان ولده زغار وماعده ولد جبير حته ياخذله ورده
ابوي كايل لأمي وامي موافقه وابوي كذالك وحاسمين السالفه
أبوي ميهمه رأئي موافقه أو لا
................
كملت شغلي واجيت يم امي بلغرفه لكيتهه تصفط ملابس ابوي بل كنتور
ورده :هاا يمه
ام ورده: تعاي اكلج جربي يمي
ورده ستغريت شعدهه امي
ورده: هاا شنوه
ام ورده: ام غيث خطبتج لابنها
وبوج يكول هذا الاسبوع يجون عليج
من سمعت مدري شصار بيه لان زواج ممخليته براسي
وماعندي اي فكره عنه والموضوع صدمني والصدمه الاقوئ ابوي وامي موافقين حته بلا مايكلولي
ورده: ماقبل شنو بكيفكم توافقون بدون متكلولي
أم ورده: شنو ولج لسانج هذا اكصه تعاي بله خلي رئيج هوه اهم من رأئي ابوج
شوفي بيتهم بل ولايه وهناك عيشتهم جنه ماتكعدين من الصبح والحلال ولاسروح ولا اي شي
وبعدين ام غيث تكول حته تنور غاز عدهم واذا حبو يجيبون من الخباز والمطعم وراح ترتاحين وتعيشين
ملكه
ورده
نصدمت بأمي شلون تحجي
احنا صح على كد حالنه ونخبز بتنور الطين وماعدنا تنور غاز
ولا يمنا خباز ولايمنا مطعم ولاشيء ولا نطب ولا نطلع وحته الزياره ابوي ميقبل ياخذنا ابوي طبعه صعب جداً ومايحب البت تطلع لهيج أماكن مثل زياره سوك أو تروح لگرايب او اخوال او شيء ثاني صعبه عنده
ورده: يمه. شنو هذا الحجي ذني مايهمني شلون تردين ازوج وانا ما موافقه
امي سوت فلك بيه شلون أرفض
وابوي منطي كلمه
جسمي كله يختض من الي صاار وصدمني كلام امي شلون تحجي ختنگت
خليت وطلعت وانا اصيح والله ماقبل شتردين تسوين سوي
رحت للغرفه ابجي وارجف يعني اهلي شلون يردون يزوجوني وانا بعدني زغيره ياربي ساعدني
اجت أمي وهيه تقنع بيه انو أوافق وبنات السلف كلهن ازغار وتزوجن وانا 14 وتزوجت انتي علئ راسج ريشه
ورده: مااتزوج مااريد شنو گوه
ام ورده: انا مالي علاقه عندج حجي واجهي ابوج وكليله بيه انا تعبت منج
إ
ضليت حابسه روحي بلغرفه ماطلعت أبد للعصر ابوي وده عليه
وسألني علئ ردي. سكتت واستحيت منه ابوي حجه وياي بكل هدوء
ابو ورده: بويه الولد خوش ولد اني شايفه وشغيل وبعدين كل البنات الي بعمرج تزوجن وبيت ابو غيث خوش ناس ونعم منهم وانا ابوج اعرف بمصلحتح
ومن هاذا الحجي الي يصبغ الواحد سكتت حرف واحد ماطلع مني
سلمت أمري الله وسكتت بس بداخلي ممقتنعه ابد
بليل اجن حنان ورقيه علينا وحنان سئلتني عن خبر الخطوبه صدك نصدمت هاي شعرفهه كالت ابوي كال الامي
وصحيح الخطبه بعد اسبوع
كمت ابجي وكتلهن انا مراضيه ابوي جبرني
.
حنان: شعدج مراضيه عريس وجاج للحلك وبعدين بطلي هاي العياره
حسيت كلامهه مال وحده حاقده تعجبت منها
كعدت بصفي رقيه وهيه تواسيني وتكلي ولج راح
تزوجين وتعوفيني يم منو بعد اكعد وسولف وضحك
بقن يمنه ساعه هيج بس حنان مادري شبيهه حجيهه نتر
مومن عوايدهه
ثاني يوم الصبح واجت اجت عمه ام حنان علينه وتسئل عن الخبر وامي سولفت الهه.
يوميه احاول اقنع امي تكول لبوي ورده ماتريد تزوج
بس امي ترفض وتكلي ماكتيله بنفسج لمن صاحج وكعد يسولف وياج. الليل ماانامه من التفكير
باجر يوم الجمعه يجون اهل غيث كعدنه من الصبح تنضيف وطبخ انا بهذا الاسبوح حالي حال الضيم
أبوي طالع من الصبح للسوك للولايه
حضرنا غدا واجب الضيافه على أكمل وجه. صارت ب11
واجو بيت ابو غيث ستقبلت امي ام غيث والرجال هناك
بلدوانيه فاطمه وماسه طبن سلمن وانا مارحت
اجت امي
ام ورده: ورده شعندج ماتجين تسلمين ولج فشلتيني اطلعي سلمي
ورده: ماروح والله وكمت ابجي وارجف
ام ورده: كومي طلعي لا وحگ علي يصيرلج موزين لاعبالج ساكتتلج هاي الايام احطج واربيج من جديد وابوج يفصم ضهرج فصم هاي من شوكت عدنه بنات تتعاير
ورده: ماطلع ماروح
ام ورده: بسيطه هسه منا ماگدر احجي
عافتني وطلعت
وره ١٢ صبينه غده وتغدو وانا حابسه روحي بالمطبخ ماطلعت ابد
امي من بعد معجزت مني لان ماادخل اسلم دزت على ابوي واجا رزلني. وكلي اذبحج تردين تفشليني انتي
وبعد لمداهر دخلت سلمت على المره
استقبلني وهيه تصلي على محمد وآل محمد
وإنا حته ممبدله ملابسي مال لبيت سلمت وطلعت بسرعه
وإمي يامن يذبحني ويجيب راسي الهه لان طلعت
وماكعدت يم المره
بقيت كاعده بالغرفه وفاطمه كل شويه واجتني تركض
بخبر تكول ابنهه جاي حته تتشاوفون
جسمي كله رجف من الخوف وجان ودي اموت واخلص ياربي ليش هيج يصير وياي
دخلت امي للغرفه وكامت تحجي عليه لان طلعت كبل ومبقيت كاعده يم ام غيث
ام ورده: ابوج دز حازم راح يجي الولد يشوفج تجهزن
ورده: شنو يمه فدوه ماروح فدوه يمه انا استحي
ام. ورده: شوفي ورده وحك العباس انا گوه متحمله سوالفج الي تفشل صيري ادميه وامشي بدلي ثوبج هذا
كمت اصرخ والطم لو اموت ماروح ماطلع
عصبت امي وحته ضربتني ضرب
مصاير وجابت ثوب جديد وشمرته اليه وبدلت وانا اشهگ
لبست حجابي وابوي اباب الغرفه وحاجه امي يله بتج
وينهه لبسيهه عبايه انا ماعدي حته عبايه من طلعت من المدرسه صار سنتين مانطلع لاي
مكان بس للگاع امي جابت عبايتهه ولبستهه اليه
شكبرهه علي تسحل اجه الولد وابوه للهول واسمعهم
سلمو وكعدوه
ام ورده: شوفي والله اذا فشلتينه ياويلج مني ماتلومين
الانفسج طلعنه انا وامي من الغرفه امي سلمت مساء الخير
ام ورده: شلونك خويه ابو غيث عساج بخير
ابو غيث الحمد لله خويه نعمه انتو شلونكم
ام ورده: شلونك خاله غيث
غيث: الحمدلله خاله شلونج انتي
كعدت امي وانا بدون سلام كعدت
أبوي موجود وعمي ابو حنان و زوجته وحازم تمنيت الگاع تنشك وتبلعني من الخجل كعدت وهمه كامو
يسولفون رسمي بل خطبه
ابو غيث : هلگد وهلگد مهرها وغيث يحطهه بعيونه وهيه بنيتنه بعد
ابو ورده: خويه اخذوهه بعباتهه لامهر ولاشي احنه اهل
ابو غيث :علئ بركة الله
وامي وامي غيث وعمه ان حنان يسولفن
رفعت عيني على غيث حته اشوفه باوعتله ونصدمت
هاي شنووو
سمين. حييييل يمكن من اصير يمه نصير دوده وفيل وكرشه شكده
وجهه متروس حب حته وجهه سمين يمه انا شفته هيج لوتخربط كل وضعي انا منا ماريد اتزوج ومنا هيج شخص يخوف وفوگاهه عود. مسوي نفسه ثگيل يباوعلي صفح ويخزر
ماكو هيج ٥دقايق وابوي أشر لأمي تاخذني
إنا ماصدكت كمت وانا دخلت للغرفه وكلبته مناحه على أمي
ورده: ماريد ازوج فدوه كلي لابوي فدوه يمه
ام ورده: ركضت عليه وضربتي على حلكي
كافي تردين ناس تسمع فشلتينا اسكتي
ضميت وجهي بالمخده واشهگ وابجي راحو بيت ابو غيث ماباتو عدهم شغل ومتفقين العرس بعد خمس اشهر يردون يبنون بيتهم
(ملاحضه عدنه ماكو خطبه گبل يقرون الفاتحه ويعقدون ويعرسون بس همه لان عدهم بنيان)
يتبع ......
ربي يحمي ويحفظ شبابنه
من كل سوء
والله يرحم الشهداء ويشافي الجرحئ
تأخرت عليكم بنات بسبب الوضع توتر وخطوره علئ اهاليتنه بس كلت منتضراتني خطيه
وان شاء الله مينقطع النت
في امان الله فراشات 🦋