"وأد القلوب "
بقلمي: وردة الخُـــزام
هو انه بيدي ؟ شلحگت ؟
الناس ماتدري شعشت
ما لحگت افهم تره "مو كلشي ردته يريدك!
الغلطة مني
تعلمت ماعيش وحدي وهالضعت
لو مرة وحده بهالعمر
متعلم اقوى وعالصبر
چا ما بچيت من اسمع حچاية بعد مافيدك
عمريش هذا البس ضعف؟
عمريش هذا الينحسب
من حضن امي لأيدك!
★★★★★★★★★★★
بـــــــارت 1️⃣4️⃣
گاعدين واندگت الباب كام عمر يفتحها، شوي وماانسمع غير بس صياح عمر وهوسه صارت بالباب ،تونا كمنا نشوف شكو ودخل عمر اعصاب ويرجف
-يابه گوم يردوك
عمار: شنو هالصياح ولك، ومنو يريدني؟
عمر: خوالي يابة خوالي، اني دخلتهم لأستقبال بس من هسه اگلك اذا فتحوا موضوع ناز ادخل اطردهم والله!
هذا خالي الصگط جنت ناوي اخلي سنونه ترس حلگه بس بخته بالناس الي جايبهم وياه
راح بابا لأستقبال وعمر اخذ مي الهم وراح .. شوي وطلع كال سون چاي
سوينا واخذه .. نص سَـآعــهْْ وطلعوا.. اجه عمر سالناه شكو؟
عمر: ام رجلج، اهوو استغفر الله مو صخامج طليقج العار، امه مريضه وعلى فراش الموت وطالبه تشوفج
ضلت ماما تساله، شبيها ومن شوكت مريضه .. عاط
- وموتتتهم شعلينا بيهااااا، گتلهم ناز لا تروح ولا توصل
انسحبت الغرفتي واتذكر كل سوالفها وياي وشلون جانت تشيش ابنها حتى يضربني .. معقولة الانسان هالگد ضعيف؟!!
يظلم ويطغي ويبطش وعلى لحظة يصير طريح الفراش!
لو كل انسان بينا يفكر بهالشكل مجان كدر يظلم ولا يأذي احد .. وجان عاش كل حياتة مثل النسمة الهادئة تنعش الروح وهي بقمة الصمت.
رفضنا اروح الولد واني هم .. وره شكم يوم هم رجعوا يتوسلون وهاي امنيتها الاخيره ومتتأخر دقايق وترجع بس تشوفها ،هم رفضنا، من اذكر حَــيآتـي يمهم والمعاناة الي عشتها روحي تختنك .. ضلوا 7 مرات يجون ويتوسلون البابا والولد .. كال بابا
- بابا هسه قابل شراح يسوولج؟ عمر يروح وياج بس شوفيها ورجعي متتأخرون دقايق .. خطيه على فراش الموت وهاي امنيتها الاخيره!
ضل يلح عليه الا ان قبلت اروح، اخذني عمر ورحنا .. بس وصلنا شارعهم روحي كلها انقبضت وجسمي كام يرجف تذكرت ذيج الليلة المشؤومه. اباوع للشارع واتذكر وقتها شنو الخوف الي عشته ماتوقعت اوصل اهلي سالمه ..
نزلنا، عمر دك الباب وهو يتأفاف كوة عليه جاي وياي هو اصلا الروحه كلها رافضها بس بعد بابا ضل يلح علينا..
فتحتنا الباب سوسن حضنتني وتبجي ،واني بالي كله مو يمها، روحي تعلكت بأبني الي شايلته كبران وصاير مدنفش يجننن،
نزلت دموعي بس شفته، مديت ايدي اخذته يروووحي كبران؟ يروح امك
حضنته الي واشهك من البجي، من شافني ابجي خاف مني كام يصرخ ويشمر روحه على سوسن يريد يروحلها ..
يابه شنو الوجع الحسيت بي ساعتها، ابني ميعرفني ولا يجيني ورابي عد غيري!
عـمري مراح اسامحهم عمررري حرموني من ابني، حسره عليه ابوسه اشمه.
اخذه عمر من ايدي
- دجيبي شو جيبي خوفتي الطفل بالبجي مالتج
اخذه عمر يبوس بي ويلاعب بي، مابجه عد عمر كيف .. رغم هذا شي بيه ارتاح شوي من شفت سوسن شلون مهتمه بي وهو متعود عليها امنت عليه ..
طببتنا للأستقبال جان مازن گاعد وخالي مراد مموجود، تجاهتلهم حتى سلام ماسلمت ولا عمر سلم عليهم .. مجرد السلام عليكم.
گعدنا على جهة وهي مخلينها بجهة من الاستقبال، شوي واشرتلي
ام مازن: تعاي ناز يمي هنا
باوعت العمر يأشرلي روحي، گمت كعدت يمها، طلبت اتقرب منها حيل، خفت بداخلي، بس كلت شتسوي قابل والكل موجود!
تقربت يمها كُلش ،جرت ايدي تبوس بيها وتبجي وتردد سامحيني، سحبت ايدي منها
- استغفر الله ميصير عمه
- ناززز سامحيني خليني اموت مرتاحه، اني اذيتج هواي ادري بروحي
- طفرت دمعه من عيني، دنگت امسحها .. عذريني مااكدر اسامحج
- نازز، نازز سمعيني للآخر خلي احجي
سكتت وهي كوة يطلع الكلام منها..
- اني السبب بدمار حياتج ،من ليلة العرس سويتلكم سحر انتِ ومازن
ماخليتها تكمل صرخت بقهررر
-لج ااااانتِ شنو من ااااام؟ يعني انتقامج وحقدج وصلتج تدمرين حياة ابنج!!! ،لج ايام وليالي وهو حسره عليه النوم يجيني يگولي مخنوووك راح امووت ناز،تعبان ورغم كرهج وتوزي عليه واگعد ابجي على بجية، اني تكرهيني بله بس ابنج ابنج الي من لحمج ودمج شلون انطاج گلبج
- انانيتي عمتني، الكره غوش على عيوني، خفت لا تاخذي مني، من اشوفه شلون يحبج وطاير بيج خفت خفت ينساني ويصير بس الج
اباوع المازن مدنگ بحزن وخالو نفس ذيج العين القذره.. مسحت دموعي بثنين اديه وايديه يرجفن من العصبية
- مااسامحج ابددد ابني عمرة 15 يوم انحرمت منه بسببج وتردين اسامحج! ،لج ؏ـمري 14 سنه ومطلقة، وراح اكمل حَــيآتـي وهاللقب مرافقني وهسه جايه تطلبين السماح؟
وضعي تخربط حيل احجي وجسمي يرجف واديه اريد اسيطر على رجفتهن ماكو! ،كام عمر خايف، يمه كلاص مي غسل وجهي ويفرك بأيدي ويكولي
- كاافي حبيبتي كافي خلص متردين تسامحيها هذا هو .. شوفي حالتج راح تموتين!
گعدت على ركبي مابيه اتحرك وجسمي ماعاد يشيلني، سوسن ركضت جابتلي مي شربتني ،عمر يحاجيني حتى نطلع واني مابيه اتحرك بس اوكف اوكع
دنگ عليه شالني وهو ضعيف سوده عليه گوة گدرلي .. خلاني بالسيارة ويهدي بيه ويبوس براسي سَـآعــهْْ يفرك بأيدي، واني تهسترت ابجي واحجي عليهم ..
شدلي حزام الامان وشغل سيارته وعين عليه وعين ع الطريق، شوي هدأت وسكنت بقيت بس حاطه راسي ع الجامه ودموعي تنزل بهدوء ..
مر وقت طويل والسيارة تمشي، بس مالي نفس حتى اسألة وين رايحين .. ورة فترة وگف السيارة وگال يلا نزلي
شلت راسي، وين احنه عمر؟ ليش مااخذتني لبيتنا
عمر: جبتج لأمام الكاظم هسه بس تزورين ترتاح نفسيتج ، يلا عمري شو نزلي؟ تگدرين لو هم اشيلج، تراا ماكدر مو تعلمتي ع الشيل
حجاهه وابتسم، ابتسمت اجامله ،بارعت الملابسي، لابسه بنطلون وقميص حد وحد وبدون حجاب
- بس عمر ملابسي شلون؟
- دنزلي هسه اشتريلج احرام صلاة
نزلنا وهو لآزم ايدي، اخذني اشترالي الاحرام، ولبسنياه واني هادئة وين متوديني ايده اروح... لبسني وابتسم يباوع بوجهي
- طلعتي جنج ملاك بهالاحرام، زادج جمال وبرز لون عيونج ،اوووي شوف البراءة، اليشوف وجهج هسه يصدك بالبيت صوتج يجوعر!
ابتسمت، يحجي الاووووي ويعوج بحلگة مثل البنات المايعات يقلد عليه يريد يضحكني عود..
دلاني منين ادخل وراح هو لتفتيش الرجال واني وي النسوان ... لزمت الشباك وصرت اصررخ بكل صوتي ودموعي تصب، احس الصرخه تطلع من اعماق گلبي .. النسوان بقت صافنه عليه لان اصرخ حيل عبالهن مو صاحيه لو مريضه ودا انوجع .. ميدرن الوجع البگلبي ميجي وياه وجع ..
بقيت ب 3 ساعات داخل الضريح لحد ماحسيت نفسي ارتاحيت وهدأت روحي ... عجييب شنو الراحة الي بداخل اضرحه اهل البيت!
يعني شگد بجيت وصرخت واني بالبيت ومن شردت .. بس مجان البجي يخفف من حزني .. هنا تحس جبال من الهم وتذوب عن صدرك، تطلع حر طليق من الهموم والاحزان تحس روحك فراشه من گدما خفيف ..
طلعت لگيت عمر عيونه طايره ويفتر بس شافني اجاني يركض
- خررررب لج وين صرتي؟ گلت صار بيج شي وگعتي وداستج النسوان!
-لا حبيبي مبيه شي بس فرغت كل الي بداخلي
- الله يلطف بحالج ويصبرج روحي انتِ
حط ايده على متني ويمشيني ويرجع يگول وكفتي كلبي تأخرتي حيل، سَـآعــهْْ اكول خاف طلعت وتيهت سَـآعــهْْ اكول خاف وگعت بصفحه ..
دنمشي وكتله:
- عمورتي؟
-باوعلي مضيك عينه يعرف هالنبرة شوراهه .. روح عمورتج
- جوعانة
ضحك بصوت عالي، تدلل حبيبتي انعل ابو الجوع
اخذني المطعم ونزل اشكال الاكل مشاوي مقبلات واكل دسم ..
- يلا اريدج هذا كله تاكلي هيج تنسفي نسسسف
شايفه روحج انتِ صايره بس عود اريدج ترجعين مدبدبه، هسه قزمة امنا بالله، بس قزمة ومعصعصه؟ لا بالله ضليتي برگابنه
ضحكت ودنگت اكل، شهيتي انفتحت اكلت اكل مصاير مال واحد شهر مماكل ... وهو بس يباوعلي مبتسم
شلت راسي من الاكل: عمر عادي كُل اسبوع تجيبني ازور؟
- صااار
رجعت اكل واحس براحة فضيييعة احس نشاط الكون كله بيه ..
كملت اكل وطلعنا من المطعم، انوب اخذني وكلني موطة، اخذني الواهس كتله اريد ملابس، ضحك وگال
- مو اگول هالنبرة وعمورتي ادري شوراهه، كسران ظهر وقطة معدلة
ضحكت استاهل حبيبي
اشتريت ملابس كووومة جنط احذيه مكياج اكسسوارات، صدك كسران ظهر هههههههه خليته يدفع 500 الف وهو الممنون.
رجعنا للبيت لكينا الوجوه مگلبه!
صاح عمر:
- شكوو ياساتر! ،وجوهكم بيها سبعتالاف لطامة
مهيمن: ام مازن ماتت
اثاري ورانه ب ربع سَـآعــهْْ ميته .. بريتها الذمة وهي وربها ..
صعدت الغرفتي ذبيت الغراض ودخلت للحمام سبحت ومديت سجادتي صليت، وگعدت اقرة قرآن .. جريتها گعدة ع السجادة قريت 5 اجزاء ماحسيت بالوقت لن الساعه ب 11
لميت سجادتي وبست القرآن ورجعته المكانه .. تمددت ونمت وداخلي مرتاح هادئ تعجبت على هالشعور الي اني بي ..
فزيت صوت ادم يبجي بأذني اسد اذاني ميروح الصوت .. كعدت مخنوكه جريت ملابسه شميتهن واستسلمت للبجي ..
استمر وضعي هيج لمدة سنة، يوم اصير زينه وعشرة انوح بيهن على ادم .. مازن معاند ويساومني لو ارجع لو ماينطيني ابني .. واني لو اموت ماارجع ماصدگت خلصت من كابوسهم .. لربما هسه تلوموني وتگولون اتحملي كُلشي علمود ابنج بس الحجي سهل غير عن الواقع، الي يعيش الي عشته مستحيل يجازف ويرجع لنفس الحفرة !
اتحملت بُعد ابني والم غيابه الي يكون مثل النار وتسعر بالصدر .. بس مااكدر اتحمل ارجع اعيش الي عشته ..
بيوم ب 10 من الليل گاعدين اني وعمر وحدنا بالاستقبال دنباوع فلم .. اندك الباب، حجيت مستغربه
- هاي منوو؟
شم ايده وجه وگفه وگال: والله ماادري
- دنجب وگوم افتح الباب
-متكومين انتِ
-لعد شگد عار، تگوم اختك تفتح الباب وانت كاعد!
- ديلا هسه على جمالج؟ اصلا الي تفتحيله الباب بدل مايتحرش بيج يخترع ويشرد
- اي عود ميخالف،بس گوم افتتتح
-يمه مخده شمرها عليه: گوووومي فتحي لا انعل والديج
گمت واني ادردم واغلط عليه، فتحت الباب صارن بوجهي مرة يطلع عمرها ب ال 30 ووياهه بنية اصغر مني تنشاف .. قبل لا احجي شي سألت المرة:
نازز مو؟؟
- اي
شو هاي بدون مفاهم جاتت عليه حضنتني جعصتني جعصص وتبجي واني بس ارمش بعيوني مفاهمة شي!
وخرت عني شوي وحجت:
- لج اني اختج نغم شنو نسيتيني نازز؟ !!
رجعت حضنتني وتبجي واني مصفنه بوجهها حتى لا بستها ولا بادلتها الحضن. كُل عمري جنت حاسبة ماعندي اخت غير رفل واخذها الموت مني ..
الا ما بيوم من بعد ماسمعت حجيهم هي وبابا بخصوص اختي وانهُ عندي اخت .. ف ضليت اتسائل عنها و لحيت على ماما جزعتها ،لحد ما سولفتلي عنها ..گالت مزوجها بابا وهي عمرها 12 سنة ومبطلها مدرستها وهي من ذاك الوقت كارهه بابا وحالفه متطب بيتهم بعد .. رايحه سنين وجايه سنين جايتهم مرة تبجي زوجها مسجون وعايفها حامل .. باقيه شكم يوم وراجعه، ومرة اني بالمدرسة وجايتهم بس راجعه بساعتها ..
من مزوجه هي اني بعدني عمري 3 مدري 4 سنوات ف مااذكرها ابدد ..
طلع عمر من شافني تأخرت هم ركضت عليه حضنته وتبجي بس عمر بسرعه عرفها، حجت وهي تمسح بدموعها:
- هاي بنتي شهد
اجت البنية حضنتني وتگولي صح مشايفتج بس ماما يوميه تحجيلي عنج اعرف كلشي عنج بس شكلج مااعرفه..
بقيت على وكفتي ومبتسمه بوجوهن مجاملة بالحقيقة مااكن الهن اي مشاعر حالهن حال اي شخص غريب توني شايفته ..
تزوجت وولدت وطلگت وهيه متدري عني ولا شايفتها .. من بعد ماسولفتلي ماما عنها شگد جنت اتمنى اشوفها واتعرف عليها دوم اسال نفسي يا ترى هي تذكرني؟هم تكول اشتاقلهم؟معقولة كل هالسنين مانست الي صار؟ كلبها ماحن على ماما، اخوانها اني!
شو اني يوم اذا مااشوف اخواني لو مااسمع صوتهم احس شي ناقصني والله! ،احسهم روحي من الدنيا، شلون گدرت هي كل هالسنين مشايفتهم!
دخلناهه لجوة، وماما وگفت بمكانها من الصدمة، حضنتها هي وضلن متحاضنات ويبجن .. انوب سلمت على بابا بس مو مثل سلامنا، لسه شايلة بكلبها عليه ..
وسط هاللحظات والبجي والمشاعر الجياشة تدنت يمي شهد شاورتني:
- اگولج شلون بله راح يگضوها هيج؟
- ضحكت: والله گولي لأمج اني روحي طالعة واجتي هي زودتها بس تبجي
ضحكنا وبقينا واگفين لحد ما خلصت فقرة المحاضن والمباوس والبجي ..
بقينا لل 4 گاعدين ماما تسالها على حياتها وهي تسولفلها مال 20 سنه .. وماما هم تحجيلها اخبارنا.
شوي وماما كالت
- يلا نازز گومي فرشيلهن بغرفتج خلي يرتاحن
كمت لغرفتي وشهد اجت وراي، فرشنا وساكتات، اني طبعي مااعرف اسكت واسولف هواي وبسرعه اخذ ع الواحد .. بس وي شهد ماادري شو حسيت روحي مااعرف شنو احجي ... شوي وحجت
شهد: شنو اصيحلج خالة لو بأسمج؟
ناز: خلخالة تخلخل عظامج وتكسرهن تكسرر، اگوم احط النعال بحلگج قوندره!
اباوع البنية ضلت صافنه بوجهي ومتفشله متعرف شتحجي، حتى اني انصدمت من روحي، اني هذا حجي وي اخواني كله هيج بس هي خطيه بعدهي مامتعوده واني نزلت عليها دوسه ونص.
ضحكت وگتلها: اعذريني حبيبتي بس منا وهيج تتعودين اني حجيي كله هيج وخوالج هم
ابتسمت وسكتت
رجعت كتلها: و شنو تصيحيلي، گوليلي ناز
شهد: زين مو عندي بعد 2خوال؟ وينهم
- واحد دايح بالشوارع وواحد مدري بيا ملهى تلگيه ..
اباوعلها مفتحه عيونها على وسعهن، خرررب راح تهج البنية، هسه عبالها خالتهه ترگص بالملهى يجوز.
اخذتها ونزلنا للمطبخ نحضر فواكه وحبشكلات، دنحضر ودگ تليفوني. باوعت مازن!
فتحت خط وانهديت بي ..
- اذا انت زلمة وابن ابوك جرب تتصل مرة ثانيةةة الا امحيك من الدنيا وادفنك مثل مادفنت الديج مالت بيبي، سديته بوجهه وشهد احسها شوي وتشرد من البيت هسه تگول وي روحها هاي امي وين جابتني؟ بس صافنه على تصرفاتي ..
على وگفتنا دخل مهيمن المطبخ، ماانتبه لشهد الواكفه
مهيمن : شكو لسه گاعدين منو عدنا؟
ناز: وين جنت
مهيمن: جنت بالملهى
هو گال هيج واني وگعت بالگاع من الضحك على شكل شهد الي فتحت عيونها، انوب خاف جانت عايزة اجه مهيمن كملها، صارت عبالك متواصين اني گتلها اتشاقه وهو اجه ااكد الي حجيته ..
-اي عيني، شهد هذا خالج ابو وجه الفاهي، ابو وجه الفاهي هاي بت اختك
اجت تباوسه وقطرة دم مابوجهه مصفوره وتباوع بوجوهنا ..
دخل سلم على نغم كملنا التحضير واخذناهن ورحنه للصالة بس وگفت بالباب صرخت بعمر:
- لك گووووووووووم حط الطبلات
نغم وشهد متفاجئات من نبرة صوتي واهلي يسولفون ولا منتبهين اصلا هاي العادي لا مو بس عادي اصلا كُلش عادي!
حجه مهيمن: لج ناز ستوني ذكرتج بالشارع؟
- بيمن؟
- والله شفت ام زيون مفتحه بعدهي وتذكرتج
عفتهن ع الطبلة وگمزت عليه:
- گووم اخذني اريد اشتري
بابا عاط من يمه: وووووين متشوفون الوقت متأخر!
- غلست عن ابويه ورجعت على مهيمن: علييك الله مهيمن اخذني اريد اشتري
مد ايده
- هاج بوسي ايدي واخذج
- دنكت بسرعه ابوسها هو تفاجئ بسرعه نفذت، بستها وتفلت عليها
صاح بيه: مسحي تفلتج بسرررعه، مااخذج ترا والله!
لوما اريد اشتري جان مامسحتها والنبي، دنكت مسحتها
دا نطلع .. باوعت شهد تباوع النا صحتلها اجت تركض
الاسواق قريب علينه يعني نمشي مشي، دخلنه مابقينا شي يعتب علينا عبالك راح يصير حصار، رجعنا بالطريق فارغ الشارع محد بي .. نمشي براحتنا و مااحس غير صوت جلب التفتنا وجان يطلع النا جلب من ورة الشجرة هي طلعه وهي ركضه علينا.
مهيمن صاح ولجن رررركضن
صرررخت ييييييييمه وطگيتها ركضه، ومهيمن يركض ويانه الگبر للخايس عود الزلمة مالتنه، شهد عود هي الي شالت الحلويات ،كمنا نركض والحلويات تمطر تتناثر
نررررركض والجلب ورانه وصراخنا اني وشهد يجيب التايه، اجت سيارة من بعيد تمشي سريع، الجلب من شافها عافنه وراح، گعدنا بالشارع ميتين من الركض انوب بس ارتاحينا شوي تذكرن شكولنا واحنه نركض لمن نمنا بالشارع من الضحك.
طبك علينا هذا ابو السيارة الي شرد الجلب من شافها، فتح الجامة
- هَا محتاجين شي
مهيمن: لا خوية مشكور
اصر الا يوصلنا كاله مهيمن بيتنا قريب بقه يلح ..
اني وشهد ماكلنا باطل فتحنا الباب وصعدنا
مهيمن بقه صافن شلون صعدنا بدون منكوله عود هو صارله سَـآعــهْْ يبيع براس الرجال لا مشكور ولا ولا
گتله واني اضحك: تعال اصعد اصعد
اجه صعد وهو يخزر بينا واحنه نضحك على شكله، انوب كل شوي وذكرنا موقف الجلب ومهيمن شلون عافنا ويركض من شاف الجلب
مهيمن يباوع بالمرايه الي بالباب من يشوفنا نضحك كوة ضام ضحكته فشله من الولد ..
رغم بالي كله يم الموقف واضحك بس مافاتتني الولد مانزل عينه مني ابدد طول ماصعدنا هو عينه معلگه بيه .. مهيمن تشكر منه ونزلنا،
نزلت واني احجي بيني وبين نفسي الگبر هاي مفحم وكاتل روحك لو ابيض لعد شسويت!
طبينا للبيت كتله:
- هم حاسب روحك رجال عود؟ زلمة جيس جب انت تشرد من جلب
- دووولي هي مال مراجل، بله لو عضني الجلب وانجلبت شتسوالي!
طبينا للبيت نضحك لكيناهه كلها صاعده نايمه، مهيمن راح الغرفته واحنه صعدنه لغرفتي .. دخلنا لكيناهه بس متمدده بعدهي مغافيه
- لعد شو اجيتن ايد وره وايد گدام وين حلوياتجن؟
كعدنا سولفنالهه وضلت تضحك علينا .. صارت صنطه انوب شو استحي منها! ،والله ضليت بس كاعده ومدنكه يمها، انوب تفاجئت من روحي منين نزل عليه هالخجل!
صاحتلي هي:
نغم: تعاي ناز يمي سولفيلي ليش طلكتي؟
رحت يمها .. بديت اسولفلها وكل مااذكر معاناتي دموعي تصب ماكملت الا واني فاحطه بجي طلع الضحك كله من خشمي .. راويتها صور ادم
نغم: يشبهج يولي
-اي حجيتها بحسره
تجرأت شوي وسألتها: نغم ليش ما جنتي تسألين عليه؟ لو تدرين شگد احتاجيتج، خاصه من ماتت رفل وبقيت وحدي تمنيت تكونين موجوده يمي، باوعتلي وغوركت عيونها بالدموع
نغم:عمري مراح اسامح ابوي على الظلم الي ظلمنياه، لج 12 سنه وجبرني وزوجني! ،جنت كلش احب دراستي ومتفوقه، من كتله مااريد اتزوج، تدرين شنو گالي؟
لج يگولي ها عاشگتلج واحد، حتى اذبحج ينغم والله اذبحج على ايددددي
زوجني ابن اخته اكبر مني ب 20 سنه .. وصلت بيه انام بالكنتور مامتقبله فكرة الزواج بكبرها!!
زوجي ورة زواجي بفترة انسجن بتهمه باطلة 7 سنوات و تركني حامل. وتگوليلي ليش مااسامح ابوي؟!! ليش لسه شايله بكلبي عليه؟
لج شمرني شمرة حتى ماسئل عليه بـعد، طفلة وابتليت بطفلة هم، صارت عدي شهودة ابوها مسجون وعيالي حاربوني شوفوني الله حق، محاربه كفار، عمتي حتى المسواك تضمه عني، شهد ماتت جوع، اعتمدت على روحي وتعلمت الخياطة وكسرت ظهري بس في سبيل اعيش واعيِش بنتي.
وابوج هه يلعب بالفلوس لعب مافد يوم سأل عني لو كال خلي اسأل عن بنتي اشوفها عايشه ميته ابدد!
وترديني اسأل واخابر؟ تدرين لج قبل لا اتزوج اني الي ربيتج ماما موظفه واني الي اهتميت بيج.
جنتِ الوحيدة الي دوم افكر بيها، ياترى هسه ناز كبرت؟ تغير شكلها؟ لسه شگره ووكحه وعصبية؟
تحجي وتبجي، انكسرر كلبي عليها شايفه ضيم ،قارنتها بحياتي اني اشوه منها لربما اخواني دللوني، عشت بعز ماذقت الفقر ولا الحرمان .. ماادري بس من سمعت حياتها حسيت اني اهون منها ..
حضنتها، وسولفتلها على رفل وشلون ماتت وعلى زهراء،شسوت بيه ..
نغم: الي عشتي مو اقل مني سوده عليه .. كله من ابوج حملنا ضيم اكبر من عمرنا
مسحنا دموعنا كتلها: لعد شعجب اجيتي؟
نغم : اشتريت بيت هنا وباجر نروح سوه نغسله كالو متروك من زمان.
- صار تدللين
ابتسمت وكرصت خدودي .. نمنا الصبح ب 6 يمكن ..
گعدنا بالوحدة الظهر تغدينا وصلينا ورحنا للبيت مالتها .. دخلنا للبيت تفاجئنا ووووصخ بشكللل ومبين مهجووور من وقت طويل .. بي حديقه الرزع الي بيها كله ميت .
ناز: يلا نغم منين نبلش؟
نغم: ماادري ناز متخيلته بهاي القذارة ولا عبالي هيج مهجور!
بقينا حاطين ادينا على خصرنا وصافنين بالمنظر الكدامنا. طولت صفنتنا كتلها :
- يمعوده شنو قابل حنبقى هيج صافنين للصبح!،يلا خلي نبلش شو، باعي اني وشهد علينا الطابق الفوك
- تمام واني راح ابدي بالجوة
صعدنا اني وشهد فوك وبدينا تنظيف البيت وصخ لدرجة يعني يرادله قاطين نرجع يلا ينگعد بي ..
داانظف مندمجه وفجأة حسيت خيال مر من گدامي لو شهد مو كدامي جان كلت خيالها .. تعوذت من الشيطان ورجعت انظف، ربع سَـآعــهْْ ورجع الخيال خطف كدامي! ...
يتبع .... 😈