السلام عليكم
رواية طوفان رجل
الفصل الرابع
نورا ناصر
""لديّ شخصٌ كلما هزمتني الحياةُ ،
أذهبُ إليه ..
أسأله هل أستحقُ هذا !
فـ يُخبرني أني لا أستحقُ إلا أفضلَ شيءٍ ، بل أن الأفضلَ قليل عليّ ..
و أن الحياةَ تنعمُ بـ وجودي فيها ..
كل مرة أذهبُ مُحمَّلةً بالخيباتِ ، فـ أعودُ حاملةً النجومَ فـ يديّ ..
نستحقُ شخصًا واحدًا على الأقلُ يرفعُنا لنلمسَ السماءَ ،
فـ الوقتِ الذي يُقسمُ فيه البقيّةُ أننا لا نستحقُ السيرَ على الأرضِ."
اااه ياجدي
دره ؛
جان دوامي صباحي وجان اول يوم الي بالمدرسة
طفلة بعمر ست سنوات ، منعسة وكوة امشي
ورا جدي الي سابقني بخطوات
صحت جدي تعبت اوكف
التاف عليه كال تعاي بويه
ماعاش الي يتعبج انه اشيل عنج تعبج
اخذني من الارض وشالني على چتفه
جانت بيدي علاگة بيها مشطي وقراصاتي وزيت شعر
خاص بيه واني مجلبة بدشداشته
متمسكة بعزوتي وسندي
بعد ما بيبي شالت ايدها مني واني بعمر ست سنوات
جدي صار يوديني لجيرانه ، مرية اسمها ام سعد هي
تسبحني و تمشطني وتظفرلي شعري
لان جانت بيبي تسبحني وتضربني وجدي كم مرة شاف ظهري ازرگ من الضرب حجى عليها ورزلها
بعدها سحبت ايدها مني وماقبلت تسويلي اي شي
جان جدي هو يمشط شعري بس مايعرف يظفره يكول لبيبي اظفري تكله والله ولا اسوي خليها بكفشتها طبها مرض
بعدها صاح لأمل لان يدري هناء تكرهني مو بعيدة تخبث وتكص ظفيرتي
والمفاجأة حتى امل كالت اعذرني عمو مااكدر عمتي محذرتني وانت ماترضى بلاذيه الي تدري اذا داروا عليه هي وهناء شيسون بيه واني وفلاح لا حول ولا قوة
اكو مره بالدكان ام سعيد تبيع حلويات اتفق وياها تظفرلي شعري وكاللها حتى لو بفلوس
بس هي جانت ارحم منهم عليه ماقبلت ابد تاخذ فلس احمر من جدي وهي هم عدها بنيه ظلت تسوي تسريحات اشكال لشعري
اني مجان اكو اي مراة بحياتي لذلك من جنت اكعد يم ام سعد وتظفرلي شعري جان شعور مختلف جنت ادور حنان الام الي ماعشته بيها
............
من خليت المفاتيح ياريتني ما خليتها لو شامرتها بالبلوعة احسن ، بس هم كالوها سوي زين وذب بالشط لو ذابتهم بالبلوعة بس اني ردت اصير خيرة
ركضت وراي هنا البيت كله تريد تشخطني بالسجينة والله جانت طايرة وراي اني بعد كلت خلص هاي هيه نهايتي وصلت راح تذبحني واسلمها
خاصة وهي لزمتني من ملابسي وسحبتني واني اسحب بنفسي اريد اخلص نفسي منها
بس امل شافتها وظلت تصرخ وحتى جانت شايلة بنتها رسُل الزغيرة على ايدها واخترعت الطفلة من الصريخ وهم ظلت تبجي
على صوت امل وصريخها هنا ظلت تهدد الها تكوولها اصص سكتي والله ادچچ وياهه
نزلوا عمو حسن ووليد من فووك وليد ظل يتوسل لأمه وييصييح يمممه عووفي السچينة يمه عوووفيها
يحجي ويتقرب منها يريد ياخذهه منها
وهي مصرة تكتلني
عمو وليد شمر عليها دولكه ستيل بكل قووته وكعت على چتفها خلتها تتأذى و تنزل ايدها بس بقت لازمتها للسچينة بأيدها
ركض وليد اخذها منها
بعدها اجت بيبي تتمخطر هاي شنو شصاير
اصلا جذب هي تعرف شصاير وتدري بهناء تريد تموتني بس هي تكرهني
بعدها انهاريت وشصار بيه بقيت بمكاني منهارة اصرخ وابجي
اجت شوكة مصدومة تباوعلي اول مرة يصير بحالي هيج اول مرة انهار يمكن تعبت وخلصت طاقتي
ظليت ابجي على كل شي مر بيه احس گلبي ورم وروحي فرفحت
طفولتي الضايعة ، انوثتي المفقودة ، عشقي الغير مكتمل ، امي الي تركتني لحمة حمرة ، لو ابويه الي انعدم بالثمانينات بعد تهمة انتمائه لحزب محظور وعافني طفلة
ويمكن لوو باقي هم جان تزوج ومرته ظلمتني بالحالتين اني متعذبة ومتأذايه ...
كومني وليد واشر لشوكة تاخذني تغسل وجهي دفعتها ورحت لغرفتي اهذي
اريد جدي اريد جدي
وهو جان معزوم بغير محافظة وظاله وحدي المفروض مااسوي مصيبة الا لمن جدي يكون موجود ...
دك عليه الباب وليد ماكمت فتحته ولا جاوبته
هو عباله بيه شي
كال دره راح افوت تره
ثنيت رجليه واني كاعدة وحضنت نفسي وخليت خدي على ركبي وجهي على ذاك الصوب
اجه وليد كرفص كدامي وايده على لحيته
كال دره كومي تعشي
كتله واني أبعد وجهي عنه روح وليد عوفني
رد واني شعليه يا عيني انت كلش زين تدرين اني وياج ضد امي لان امي باطل من راسها لاخمص رجليها باطل بلي دتسوي بيج
جاوبت بحرگة گلب وغصة ادري والله ادري وليد قابل ما اعرفك تگولي هالكلام بس اني مقهورة مقهووورة والمصيبة جدي مووو هنا
خله ايده چتفي كال بابتسامة اني موجود انت مو دائما تكوليلي انت تشبه جدي خلقا واخلاقا احسبيني جدج واذا تردين تكوليلي جدي هم اني قابل
ابتسمت ... كرصني من خدي وهو فرحان
كال والله جو حلو بره كومي خلي نتمشى
وعندي شون حب شمس من هذا الاسود الناعم الي تحبي جبته الچ مخصوص
تنهدت كتله وليد لا تتعب نفسك والله مقهورة ومخنوگة
كال اي كومي شمي هوا والله خوش هوا بالبستان والگمر طالع چبير شوي انت احلى منه
جاوبته بغرور شويه بس شويه كووم ماروح وياك
ضحك وسحبني كومي كوومي لاااشيلج ونزلج جووه
كمت ويا صدك جان اكو هوا بره وكمرة السما الگمر جبير طالع
ظل يسولف ع الكبلات الي بالكلية وعلى الاساتذة وع البنات المعجبات بي وظل يحمسني للكلية كال عوفي المشاكل والمغامرات وفكري بمستقبلج
ودراستج وطموحج تعلمي تتجاهلين هواي امور صدكي ترتاحين
كتله انت هم كول لامك خلي تفك مني اني اليوم لو ما انت وعمووحسن والله جان انذبحت وليد كل يوم انتوا العصر ماكو دااخيل بس لو انتوا ماكو تدري اني لهسه ارجف
كال افااا دره السبعة الي تنام نوم الضباع وتكعد كعدة السباع ماتخاف من بندقية تخاف من سجين
ردت اي ما اخاف من بندقية بيد عاقل بس اخاف من سچينة بيد مخبلة
ظل يضحك
فترينه بالبستان ورجعنه للبيت ...بيبي كاعدة بالصالة ظلت تفررر بيدها وكالت عشتوو
همس وليد يم اذني ميخالف دره
ماعجبني الوضع كلها حتى الميخالف مالة وليد
هم معجبتني شمسويه اني والله هم يعيلون بيه وبدون سبب كرههم الي
فرضا نكول امي تركتني ، نكول امي مختلفة عنهم وروسيه بس هي اذتني الي واذت ابويه مااذتهم ليش يكرهوني ويحقدون عليه
تمنيت اختفي اطير اهاجر تنشگ الأرض وتبلعني بس وجود جدي مصبرني خليت ورحت لغرفتي واني ساكتة بس احس جمر بنص بلعومي اريد احجي ابجي اصررخ ما اكدر...
مرت الايام ومشى الوقت .. ايام وروتين عاديه كولش ، چنت كاعده بعطله نهاية السنه مال السادس انتظر النتائج صاحت عليه بيبي ووينج تعااي انت وووينج
مادري عبالك تستنكف تگول أسمي .. واني هم غلست كلت خلي تكول اسمي يله أكوم
تالي صااحت درررره روحي جيبي خضره من الحديقه البره ...
كمت على حيلي مو مال اعاند بعد واني هم كولش احب الخضرة على الغده ...وهم مابيه حيل حجيهم
احنه عدنا حديقتين وحده داخل البيت والثانيه كباله يعني اعبر الفرع اخذت سله من المطبخ ورحت لميت كرفس وريحان ورشاد ...
واني على هالحال وجان اسمع احد يصيح باسمي دره هلوو دره شلوونج
عرفته من صوته ورجفة گلبي باوعت لمصطفى
من باوعتله كبل كلبي احسه وكع
كتله واني كوة مسيطرة على رجفة لساني هسه شجابك يامعود اني عايزه مصايب كافي الي صار
اجه كرفص مقابيلي بيني وبينه مشارة الزرع
ظل يباوعلي لابس دشداشة كريميه
خليت عيني بعينه ثواني ونزلتها اكطع بالخضرة
كال اسمعي دره امي وافقت عليج بس عدهه شرط
تكول خلي تبطل ياله نخطبها واني اقتنعت بكلام امي صراحة احسن بطلي واني مراح اخليج محتاجة لشي
ضحكت كتله لعد زين كتلي هالحجي وبعدين اني لا ابطل ولا يشرفني ارتبط برجال يمشي بكلام امه حتى لو قلبي يريده
كمت دااروح وسحبت سلة الخضرة وياي
شال دشداشته واجه يمي لزمني من ايدي
وكال وهو يشدد على احرف اسمي
دررره اسمعي الكلام والله متندميين والله
سحبت ايدي منه كتله مصطفى تووب مني ومن هاللحظه انساني واذا صدك تعزني استر عليه ولاتتقرب بعد
سد عليه طريقي وكف كدامي ... كال دره اني ادري تحبيني واني هم احبچ لا تضيعين هالحب خلي نرتبط وبعدين نتفاهم
كتله بعصبية حتى لو اني اقبل بيك جدي مايقبل واني امشي بشور جدي ومااكسر كلمته اذا مكايلتلك هالحجي اني كايلته لاختك لمياء فوك المية الف مرة وهاي هيه نقطة راس سطر انسى مصطفى انسى
وركضت وعفته واني امشي دموعي عشره عشره واحس گلبي هسه انذبح ...
بس دخلت صار وليد گبالي كال شبيج
باوعت لعيونه مقهورة
كتله تحسست من الخضره ....
لزمني من ايدي يباوعلي ممصدگ
كال خما شفتي احد بالزرع وضوجج بحجايه
كال هيج ورفع حاجبه
هزيت راسي بقووة وسديت عيوني حييل فرغتهن من الدمع
هو اجه يطلع يروح للزرع يدور ، لزمته من عكسه كتله تعال ووين رايح ؟ وكت غده
كال فووتي جووه دره هسه اجي اني
ظليت مچلبة بي ماريده يروح
لزمني حييل انت ليش متقبلين ارووح هاا
وليد عفية ادخل انت شبيك ترى اني رديته والله وماانطيته مجال وليد شبيك ؟؟
رد بعصبية ليش تچذبين دره
بلعت ريك وتنفست وكملت بچي هو عافني وراح للمكان الي چنت بي
ظليت كوومة ادعي كون ميتعاركون ...
بعدهه اجه وليد بس ملامحه ماتتفسر وجهه احمر وعيونه دم وميتحاچى ، باوعلي ودار وجهه
واني هم شفته هيج ما سألته وهو بهالحالة ..
للظهر اجا جدي بس شافني عرفني ضايجه من شي
ظل طول مااحنا نتغدى عينه عليه ، خو وليد ماضاگ الاكل ...
ماادري شلوون بيه اني وي مصطفى ...
من خلص الغدا جدي كال درتي جيبي جاي و تعاي للديوانيه ..
رحت صبيته وووديته ..
اشرلي اكعد بصفه .. ورحت كعدت بصفه
كال اي بويه شكو احجي بعيوونج حجي احجيلي
كمت ابجي وسلوفتله الي صار كله
اصلا اني مااكدر اكبت بعد واضم عليه شي يمه راحتي ومن اتخلص من هالمشاعر يمه ارتاح
جدي كال هابويه موكتلج ابن امه وماينطلع وراه
هو انه ادري بي دخل مرحلة اكتئاب وكام ماينزل وامه تجي تحجيلي وتشكي يمي وتكول خلي تنعدل وخليها تبطل
كتلها ابد ينسى يزوج دره اريدها تكمل عشمي بيها هاي امانة الغالي
صح بعد هاليوم انقهرت و كمت مااطلع من غرفتي وقطعت كولشي ، انقهرت وبجيت بس اخذ مني ايام تخلصت بيها من المشاعر السلبية وبعدها نهضت بنفسي
لان جدي ظل يجي لغرفتي ويهدأ بيه
وكالي عليمن مقهوره وتبجين يابويه الي مااوكف وياج باول عثره وانتي هسه عزيزه عدنه مايوكف بعد وياج من تكونين تحت جنحه
كومي ذبي همج وخليه على الله فكري بنفسج وبس محد ينفعج غير شهادتج حتى انه يجي يوم ومتوكل ومسلمها ...
حضنته وبسته وبجيت كتله دخيلك بداعتي عندك لاتكول هذا الحجي ...
كلامه چان دووه الي ...
وبهاي المرحله الي حسيت بيها اني بنيه ودخلت حياتي بفاصل جديد بديت ابحث عن اشياء بنفسي انميها واطورها مثل القراءة والروايات
و هوايه وجنت مدمنه بكتابات جبران خليل جبران جنت اسرح بعالمه وافسر كتاباته كانت كلها اشياء تلامس روحي والوحدة الي عايشه بيها
جنت حيل وحيده جدي انشغاله بالفصول والكعدات دائما ووياه وليد ومرات يظل ايام مسافر بغير محافظه
ثانيا توجهاتي اختلفت مهتمه بعالم الجمال والموضه والبس والرقص وعايش عالم لوحدي جانوا صديقاتي يجيبولي مجلات وعمو حسن وجنت كافيه خيري وشري لان من كبرت بدا الكلام يجرح وياثر
بديت اشوف بنات جيلي شنو اهمامهم صرت اشتري ذهب ولبست حجل نازك وتكمه واذا اشوف شي اكول لجدي وياخذني واختار على ذوقي
ظهرت فتره من الفترات راقصه اسمها نورا بوكتها كولش انشهرت صديقتي جابتلي كاسيت فديو واخذت الكاسيت بغرفتي واقفل الغرفه واظل اتمرن عليها يوميه
مرة اجا جدي لغرفتي كال شو ماكو وينج مختفية
كتله ها ملتهية اشوف رقص
كال بويه حرام
كتله جدي هسه راقصه كدام احد اشو لوحدي بالغرفه اونس نفسي ووماثره على احد
كام يهز بايده ومن ديطلع بسته بخده
وقفلت الباب...
وجنت اوصي عمو حسن على كاسيتات نورا
ظل يضحك كال والله مخبله انتي وماعندج شغلة وعملة من التفگة للرقص
ظليت اضحك
بعدها كمت اشوف نبيله عبيد بافلامها ركصها خبلني كمت اوصي صديقتي تجيبلي من اخوها عنده محل شرايط فديو واني كولش مستمتعه وهمه هم خلصانين مني ومن مشاكلي ولساني
بحيث ظلوا كلها تسال عليه لان مالي صوت ...
يجن بنات عمامي ساعات يجون يمي هم نلعب اخليهم مكياج واصبغ اظافرهم وحتى انطيهم من ملابسي يكيفن الا شوكه المخبله ساعه هيج وساعه هيج وساعه انقهر عليها لان هي تندفع بسرعه من يوزوها وساعات تتندم وتجي تعتذر وتبچي ..
قبل جانت للنتائج نستلمها من المدرسه مو مثل هسه بالنت رحت اني وجدي وعمو سلمان يسوق
كال جدي اذا طلعتي اكثر من ٩٠ وتكسرين خشم كل واحد كال ماطلع راح اذبح عجلين
كتله ان شاء الله اني جنت زينه لوما اخر امتحان صارت هوسه خطبة مصطفى خربطت بي ..
دخلت للمدرسه ارجف خايفة حييل
شافتني المعاونه كالت دره مبرووك معدلج ٩٤....
كمت اكمز من الفرح ماادري شصار بيه اخذت النتيجة وطلعت اركض مثل المخبله لجدي
واصيح جدي جدي الحك ...
هو انصدم خطية زين منه بقى واكف على طوله
كال بلهفة وحماس هااا بوويه بشري
كتله طلعت ٩٤
هو من الفرحة كام يبجي ....
و ويكول والله جنت مراهن عليج وياروحي
و اكول ماتكدر تطلع معدل وهاي المصايب فوك راسها سبااعية بوويه سباعيه
ظل يبوس بيه من عيوني ويبجي واني ابجي وياه وفرحتي بكبر الدنيا .....بعدهه اشتره بيبيسي لكل الادارة مالة المدرسة الي جايين
ورجعنا للبيت وكعدني يمه بالصدر
كال لعمو سلمان اذبج عجول اثنين اليوم
عمو سلمان يبارك النا ....
من وصلنه للبيت ظلن بيبي وهناء يعوجن بحلكهم
ومعاجبهن بس عمه امل طشت جوكليت ...
و اجو عمامي ووليد يباركولي
عمو حسن جانت فرحته مبينه على وجهه بوسني من راسي وكال اختاري هدية على ذوقج
كتله لا عمو والله فرحتك وياي هايه احلى هديه
ووليد نسى زعله واجه باسني من راسي كال سبعه والله عااشت ايددج
اما عمو حامد كال شتسوي بيها يله بطلوها هايه خوش مرحله وصلت بعد كافي
جدي كله انجب درره سوت الي ولاوحده بديرتنا مسويته من اكولهم ذيبه محد يصدك هسه تقدم كليه ومحد يفتح حلكه بعد
حامد كله والله ولاتقدم ولا اخليها تووصل وراسي يشمه الهوا
جدي رده : من تمشي حجايتك على هناء عود مشيها على دره ولك اني الي تعبت وربيت وسهرت ومحد اله حق بمصيرها غيري ...
وهو صدك جدي عاش وياي امتحانات السادس كلها
من العصر جان يحضرلي الفانوس والالة حتى خاف تطفى الكهرباء اكعد ادرس عليهم
حتى مرات حارة يكعد يهفي عليه ...
سوينه حفلة على كدنا وشوكه كامت تهوس الي الكلب مليان بفرح خل تسمع الشماته
ورافعة ايدها وتدبج برجلها ....
وجرتني للوسطة وكمنا نركص بالنص هي والبنات
وتهووس عين البارده كل الهلا بيها وعين الحاره الحمزه يطفيها ...
وليد اجه لزم ايدي وايد شوكه وظل يفتر ويانه
وكولش فرحان ...
عيني راحت على جدي اشوفه من سنين مافرحان هيج فرحة حمدت الله وشكرته ودعيت ربي يفرحه ويحفظه ويطول بعمره
باوعت لعمو فلاح وعمو حسن وجدي تلاثتهم يصفكون و شوكه تهز ركبه لامها ولبيبي وامها تغم بيها
امها تكولها مسودنه مخبله غمه حتى غمه
وهي تزيد ماتنقص و تهوس وتكول موش مسودنه فرحانه موش مسودنه فرحانه
كاموا كلهم يضحكون وهي كيفت اخذت تطش بالجوكليت
وبعدها كلمن راح بجهه واني مشيت ورا جدي
سألته جدي من وزعت دزيت لام سعد ؟
كال لعد شلون انساها يا بعد جدج انتي
كتله جدي العالم كلها درت مو ؟ ليش وزعت
كام يضحك كال جا شلون لازم نسمع الشماته ويضحك بصوت عالي ويبوس بيه
صفن بوجهي وكال انوب راح تصيرين بالكليه يابويه يابويه اجاني الضيم بويه رايحه للكليه اريدهم يكولون صدك ابو سلام ربه احسن من تربية الي عدهم اب وام خوش بوويه
كلتله ونعم منك جدي ابشر ولا تشيل هم تربيتك اني وخليت راسي على صدره فرحاانة ما واسعتني الدنيا كلها ....
وراها بأيام ... جنت بالمطبخ واكيد مصطفى مايفك مني ولايكعد جسر كولش وميخاف حتى عليه بهاي تصرفاته ميخاااف
واني على عالحالة هاي دخل يمي
سلم عليه تأفأفت ورديت السلام ... جان بيده مغلف
مداه الي كال هاي هدية نجاحج ... والف مبروك
كالها مبتسم
انصدمت بداخلي هذا شنو مايمل ابد شسالفته
بقيت مصفصفة حتى مااكدر امد ايدي واخذها جنت بحالة صراع بين قلبي وعقلي وصورة جدي گدامي وصوته يرن بأذاني لا تسمعين بقلبج
ودخلت هناء هو بسرعة طلع من الباب الثاني وهي بس شافته طلع ولكتها حجة واصلا حتى لو ماكو شي راح تتبلى وتسوي فلم ...واصلا اجتها من السما وتريدها من الله ع الله
جان كلامها مثل السجين العمية التذبح بيه
وبدا الكلام ياذيني لان جدي زرع بيه الشرف اهم من الاكل وكولش خوفني من السمعه وخاصة اني محد يجي الي يدافعلي وطبت هناء وشافته لمصطفى واني بين عليه بسرعة وجهي نار تچوي احسه ...
بس طلعت من المطبخ سمعتها تصييح يبوه لحكوا عاركم دره مصاحبة مصطفى ولكم شدولكم كرون
سمعوها عمو حسن ووليد واجوا يركضون
وماانطوها مجال وبسرعه ظلوا يسكتوها
بس هي ماتسكت وتصيح بالبيت والله بعيني شفتهم بالمطبخ خاتلين
لطمت على خدي كتلها جذااابة والله جذاااابة شنووو شفتيني بالله ترة انت هم عندج بنات
ظلت ماتسكت شكد حاول وليد يسكت بيها ماتسكتتت
عمو حسن ضربها بالفازة مالة الورد
وضلت تصيح زادت زاادت عبالك مخبلة رادت تستغلها فرصة وتخرب كل شي عليه
وليد كال صعدي لغرفتج رحت صعدت بقيت بيها جدي مجان موجود واديه على راسي ومفرفحة
كلشي يأذيني نارر تسري بجسمي اني مرراح اخلص مرااح اخلص الا انقلع من هذا البيت الااا يالله يمكن ارتاح لو ماارتاح
مر وقت وللظهر ولجية عمو حامد من شغله
لشويه كاعدة بغرفتي واجه عمو حامد كسر باب الغرفه عليه و جدي جان معزوم ع الغده منو يفزعلي
كسر الباب ودفرها وكعلي ضرب ودك على راسي وظهري ووجهي وهو ديضرب بيه ويغلط ويسب ويطعن
دخل عمو حسن وراه ولزم عمو حامد من ياخة الدشداشه وصرخ بوجهه بغضب وعصبية
كاله والله اذا لزمت اظفرها اطشر راسك واخلي الناس تحجي اخ كتل اخو ...
تلازموا اثنينهم تخالصوا واني صوتي اختفى ورااح اريد اتنفس مااكو و.
صرررخت على وليد اريده يجي يفكهم تخالصوا اثنينهم والسبب اني مدري هنا مدري مصطفى الي مايجوز مني ولا يتركني بحالي ...
نزل وليد يركض سحب عمو وفاككهم وكاله لعمو معليك واعتبر الموضوع منتهي اني اخصمها ...
وكله بكوم و دك ولطم شوكه بكوم ثاني عبالك العركة هايه هيجت جروحها
ظلن تصيح لا لا هو يحبني اني مو درره اني يحبني ويدزلي رسائل ...
محد حاجاها ابد عافوها لان يعرفوها طگه ونص
واني جنت ابجي ومن اشوفها تجيني ضحكة
ظلن تركض وراهم تكلهم كتلوني اني اني صاحبته شبيكم شبيككم موتوني موو دره صاحبته والله اني والله
اجتي امها غمتها وكالت الها شفايتلي يباوع عليج وعلواه الكاج بحضنه حتى نزوجكم غصب وافك منج ......
ورى ما تفاككوا عمامي وليد لزمني من زندي ودخلني لغرفتي وظل يباوع بوجهي ويستغفر وميت من القهر
كتله واني طعم الدم بحلكي
شبيك قابل جديدة هاي عليه الكتلة اشو اني حيصير بيه عاهة من ورى ابوك وامك
تتذكر من تعاركوا مصطفى وعادل بالعرس وسمع تلاطيش حجي انو العركة من وراي واجه هنا وامك دفعته هم كسرني تكسر وكال اريد اذبحج سودتي وجهنا عار بسببج الزلم تتعارك
كعد ع الكرسي وخله اديه على وجهه وينفخ من العصبية
شبيدي درة شبيدي اكتلهم هو وامي وادخل جهنم
كتله لا. تكتلهم وليد اطلع وعوفني بوحدي
سحبني كال بقهر امشي للحمام غسلي
كتله ماريد عوفني ... كال صار وطلع ...
بقيت كاعدة ماعرف شنو اسوي هالحب صار جحيم عليه اني اعلمج هنا بسيطة اردلج الصاع صاعين بس ع البارد ...
بعدها اجت بيبي تتوسل بيه اصلا هي وقت العركة الحاضرة الغائبة ومن خلصت اجت تتوسل
لتحجين لجدج يطردهم ويسحلهم ، اني بعد ماخليهم يضربوج ...
بس وين وهو من اجه جدي وشاف اثار الضرب طرد هنا لأهلها وبسط عمو حامد
وورى فترة بيبي راح تبوس ادين ورجلين ورجعتهم وهم اصلا ماعدهم مكان يرحوله ...
اما مصطفى راح وليد تعارك وياه ويوم ثاني بكل عين صلفة وجسارة اجه خطب للمرة الالف وهم طرده جدي ...
مرت الايام وخابرتني صديقتي على التليفون الارضي كالت قدمتي انسيابيه؟
كتلها لا بعد عمو حسن يسويها الي
كالت اكولج دره ليش مانقدم على جامعة صدام للقانون (( جامعة النهرين حاليا)) صارلها كم سنه فاتحيها وبيها امتيازات هوايه حتى ايفادات للطلاب يدزونه وبيها التقديم خاص
فكرت وعجبتني الفكرة ، رحت لجدي
وكتله على الموضوع
كال بكيفج الهم انتي عاجبتج
من اجه عمو حسن وطرحت عليه الفكرة والموضوع كله
كال والله درة اني هم انصحج هاي فرصه ماتتعوض لان بيها هواي امتيازات قدمي
وفعلا حضرت نفسي اروح اقدم واتفقت ويا وليد ياخذني للكلية
لبست قميص ابيض ونيلي وبنفسجي مقفل وبنطرون جينز وحذاء جان اسمه بلدوزر بوكته كولش غالي
ومنزله كذله ورافعه شعري لفوك وكلي طاقة وحماس وحيويه
لكيت وليد مبدل ومبتسم وتريكنا وطلعنا وصلنا
لباب الكلية واني لازمه ايده خايفه من هذا العالم الواسع وابواب مجتمع بعيده كل البعد عن عالمي وعن طبيعة حياتي ...
همست يم اذن وليد : وليد اني خايفة
ظل يضحك وهمسلي كال لايسمعج جدي ليش خايفه
كتله مااعرف
كال عادي هذ االشعور ، بس انتي سباعيه خلي عالمج محدود ولاتختلطين زايد ان جان ولد ولابنات انتي تعرفين تخلين حدود للمقابل
اني استمع اله وبس اهز راسي
كال نفس الشي من رحتي بصف اول تذكرين هم لازمه ايدي وتكولين وليد خايفة رجعني لجدي خاف الجهال يكتلوني
ظليت اضحك
وليد ضخم وجسمه مرتب ومحافظ عليه اسمر بملامح ناعمة ولابس قميص نيلي وبنطرون جينز والبنات يباعون عليه
هوايه تعب و مشى كل المعاملة واني افتر وراه وكالوا اسبوعين تعالوا على النتيجه
و طبعا مالنا حق التقديم بالانسيابيه العاديه لحد ماتطلع نتيجه التقديم
وراها باسبوعين رجعنا الهم و لگيناهم رافضين قبولي بالجامعة ومكتوب على الفايل والدها ضد الدولة.......
يتبع...
الغلاف ابداع ام عبدو 😘