كان مبارك يخطط يجيب شيخ يقرا فالبيت ويجلس لين تجي وعد ويقرا عليها عشان كذا راضي
طلعت وعد تخف خطواتها مستعجله بتشوف وش صاير
_______________________.
وفي السوق
هالمره طلع خلف وهو مافكر يجلسس ويفطر كفايه على اللي شافه واللي سمعه امس واللي هز صورة ابوه في عينه جلس مع جده وهو يدور حل يطلع حوريه من البيت قبل يصير شي اعظم واكبر
ابو ناصر : ماكإن هالمقبل علينا ضاري!؟ لف خلف : الا هو ضاري
دخل ضاري مبتسم :سلام عليكم
الكل : عليكم السلام
خلف : حياك اجلس
ضاري جلس بهدوء ولف يناظر ابو ناصر ببتسامه وضحك خلف : انطق ياضاري
ابتسم ابو ناصر: سم ياولدي
ضاري : سم الله عدوك لكن ياعمي انا جيت بقولك ان ان شاء الله بكره بجيب الشيخ ونجي نملك اذا الوقت يناسبكم
ابتسم ابو ناصر: حياك الله ياولدي والله يتمم على خير
ابتسم ضاري ووقف خلف وهو يخبط على كتفه: حياك الله ياعمي
ضحك ضاري وهو يتلفت: ويييينه عقاب؟؟ خلف : مداوم احمد ربك لا يسمعني ويذبحني ويذبحك
ضحك ضاري : اصبر علي بس
ابو ناصر : يا ضاري ياولدي ترا الملكه عندنا عايليه
ضاري: ابشر يا عمي
ابو ناصر: اجل انا بترخص واخليكم
خلف : فمان الله وانتبه لنفسك ياجدي
ابو ناصر: زين
طلع ولف ضاري ببتسامه: بعيداً على فرحتي وش علتك انت اشوفك ضايق صدرك
خلف: وش اقول وش اخلي
ضاري : قل قل اللي تقوله قبل يجي احد
خلف : بقولك بس تحكم في اعصابك لاني مقدر اقول الا لك ودامني بقولك ما يحتاج اخذ وعد انك تحفظ السر
ضاري : افا يا خليف سرك في بير
خلف : اول شي طال عمرك تخيل ان جابر خطب وحده من خواتي
ضاري بتدقيق: جابر ماغيره ولد النوخذه !؟
خلف :ايييه
ضاري : وش جاب جابر لكم !؟ غريبه اصلا خطبته
خلف: مدري عنه كل للي قالوه انه يبي من السعوديه وان امه شافت ان اختي مناسبه على قولهم
ضاري : طيب انت وش موترك بالسالفه
ناظره خلف بهدوء وقال: لان ابوي ٩٠٪ ماهو راضي
ضاري: واذا مارضى الزواج قسمه ونصيب واذا شايل هم جابر عشانه خويك تراه بيتفهم
خلف : لا ياحبيبي السالفه اصعبب
ضاري :وشو؟
خلف تردد كثير بس ماله الا ضاري وقال: اذا رفض ابوي او ماصار نصيب هاذي كارثه لان البنت اللي ابيها اخت جابر
لف ضاري بكل قوته ومن اثرها طاح من الكرسي ووقف وهو يعدل شماغه بصدمه : وشوووو وشوووو وشوووو
مسكه خلف يجلسه: اقصر صوتك الناس تناظر .
ضاري: انهبلت انت خبل ياقوووووة وجهك يا خلف
خلف: ياخي فضحتنا اسكت وبعدين ما سويت شي والبنت مابيني وبينها شي من بعيد اعرفها ومره وحده بس شفتها بالبقاله بس
ضاري : وانت الحين وش تخطط عليه!؟ خلف: ما اخطط على شي بس عندي قنبله الحين لها حليييين مالهم ثالث! يا ان اختي توافق على جابر وتمشي امورنا ويصير فرصتي كبيره اني اتزوجها يا انهم يرفضون وتقبع السالفه في راسي واكل هوا
ضاري : والله انت سالفتك صعبه
خلف : لو ما جابر دخل هالدخله كان ممكن اضبط اموري لكن الحين انا على طرف هوايه
ضاري : وخلنا نقول تزوج جابر اختك !؟ اهلك بيرضون يزوجونك وحده من غير ديرتك
خلف : ياخي انا زواجي امره سهل جدي معي عمي محمد كثير بصفي لو عارض ابوي
ضاري : انا راسي عورني صراحه ماني مستوعب هالمخاطره
خلف : وش اسوي عاد هذا اللي صار
ضاري : ماعندك حل الا تنتظر رد اهلك عليهم
خلف : اييه وغير هذا بروح الكويت اسأل عن جابر
ضاري : ليه مايكفي تسأل هنا
خلف : لا اكيد بسأل جماعته وديرته وناسه ومهما كان ودي اوثق هالزواج هذا مايعني اني ارمي اختي على جي الله عشان بس اتزوج اللي ابيها
ضاري : وللله انك كفو ! ومتى بتروح
خلف : نخلص منك ونروح وتراك بتخاويني انت وعقاب ونادر
ضاري : الله يعين دامنا بناخذ عقاب
ضحك خلف : لازم تسوون هدنه لاني ما اتحمل اي ضغط زياده
ضاري : ايه زين يجيب الله مطر هدنه!؟؟ انا وعقاب ! معصي
خلف : قم قم خلني اخلص شغلي
ضاري: يلا
طلع ضاري مصدوم لكن من كل قلبه يدعي ان الله يكملها مع خلف
_______________________.
وفي بيت ابو خلف
صباحهم كان شيييين نظراً لوجود حوريه اللي طلعت مع ابو خلف بعد ما نادوهم للمره المليون والكل صاد ماله نفس يفطر معها
وفي ظرف ثواني فضت السفره وهي للحين جالسه مرت من جنبها ندى بطرف عين وعدت بكرهه
ودق الباب وركض سالم يفتح وابتسم بفرح: وعععععد
ابتسمت وعد وهي تنزل تسلم عليه: هلا سلوووم
سالم: اشتقنا لك
وعد : وانا اكثر
دخلت وعد لكن سكتت اول ماشافت السفره ماعليها الا ابوها وحوريه عرفتها على طول وقفت تناظر بنظره ناريه فهمها ابو خلف ووقف يتدارك الوضع يعرف ان وعد ما رح تتقبل السالفه وبتسوي كارثه: وعد حياك وينه مبارك
وعد بغضب: راح مبارك والظاهر انك رحت قبله يبه
ابو خلف : وشو!
وعد حاولت تكتم غضبها لكن واضح ناظرت حوريه بحده ولفت: من هاذي!؟ ابو خلف : جايه تدورين مشاكل .
الكل طلع على صوت وعد اللي قالت: ابد والله المشاكل هي اللي جت بيتنا
ابو خلف :وعد
وعد : وشوله تزوجت يبه!؟ وش كان ناقصك
ابو خلف : مو شغلك
وعد: الا شغلي !؟ كيف تزوج ماتقول لاحد ولا قدرت امي وعمتي صبروا كل هالسنين معك اخو شي مالهم حشمه
ابو خلف : وعععععععد لو ما قصرتي صوتك والله ليصير شي ماشفتيه
سكتت وعد وهي في نفسها تتحلف وصدت وهي تدور على امها واتجهت لهم وهي تسلم عليهم وقهرها واضح
ودخلوها جوى وهي مقهوره
ام خلف : وعد اذكري الله يايمه لا تزعلين ابوك
وعد : انتم شلون راضين وساكتين اذا هذا منظرها وشكلها
ندى: هذا رحمه بجنب اللي امس
ام خلف : خلاص يا بنات
ام وعد : فكونا منهم ترا ضغطي ماهو ناقص
وعد : وخلف وينه عن هالمهزله
حنان: خلف مشغول بسالفه ثانيه
وعد : وش صااااير بعد
ضحكت ندى: هالمره خير لا تخافين بس مدري ابوي بيخليه خير او شر
حنان: اماني انخطبت
لفت وعد بذهول : اماني
ندى بضحك: وتخيلي بس من !
وعد : اصدموني بعد
ندى : الچويتي اللي ازعجتنا فيه هي ومضاوي
صرخت اماني بضحك: واماني انخطبت بعد من ضاري صديق خلف
جلست وعد بذهول: انا ماغبت عنكم الا ايام وكل ذا صار
ام خلف : مقدر ومكتوب
ام وعد : الله يستر من الجاي
حنان : غيبي يومين ويتزوجون كلهم
وعد: عطوني التفاصيل
ندى: مافيه تفاصيل الا كل شي في لحظه حتى زواج ابوي
وعد : خلوووا هالزواج الله لا يخليني اذا خليته يمشي وانا متاكده ان وراه بلوه بس اصبروا
وجدان جت بضيق ووقفت
حنان: وش فيك!؟ وجدان: شينة الحلايا هاذي بشيل السفره وانظف وهي رافضه تقوم
وقفت وعد : انا اسنعها
طلعت وعد وووقفت وهي تكتف : انتي هيي جايه من مجاعه ولا وشو!؟ ساعه على السفره
لفت حوريه ببتسامه بارده: اقول قصري صوتك ازعجتيني وهذا بيت زوجي اجلس بالمكان اللي يعجبني والوقت اللي يعجبني
ندى: عشتوووا
وعد ضحكت باستهزاء: عاد كلٍ ينبلع منه هاللقب الا انتي لكن بقولك لا تعودين عليها كثير لانه ايام وتذلفين من هالبيت مثل مادخلتيه
حوريه : والله!؟ جلست وعد قدامها بحده وقالت: انصحك تاخذين كلامي بعين الاعتبار واعرفي تلعبين مع مين زين وسألي عني ويوصلك الخبر
وقفت وهي تقول : وجدان شيلي كل شي ونظفي الزباله اللي بالحوش كلها
ام وعد : يلا يلا خالتي ام ناصر تعزم للقهوه
ام خلف : يلا
طلعوا كلهم وتركوا حوريه بقهرها ونظفت وجدان الاغراض بسرعه وطلعت
وحوريه واقفه بحقد واتجهت لغرفتها بقهر وهي تناظر المرايه
وتناظر بطنها اللي بدا يبان ويضمن مستقبلها
_______________________.
في بيت الجد قايد
دخلت وعد وفزوا كلهم بفرح وركضت مضاوي تحضنها وسحر وهيا ووشهد وعهد واقفه بهدوء
سلمت عليها وعد بنفس الجمود وابعدت وراحت لام ناصر تسلم عليها
مضاوي : قبل كل شي بشري شفتي شينة الحلايا
وعد : شفتها عساها ما تشوف الخير
مضاوي : شدي حيلك فيها
وعد : ماعليك ادبرها
وابتسمت وهي تناظر مضاوي : هااااه وش سمعنا
ضحكت مضاوي بمزح : كفيييل جديد شييل
الكل :هههههههههههههههههههههههههههههههههههههههههههههههههههههههه
وعد : ماشاء الله عاد حظك حلو ضاري يمدحه خلف
مضاوي وهي تتذكر اللي قاله خلف وعقاب وان ضاري لقيط: ان شاء الله قد المدح
وقفت اماني وهي تضحك: مضاووي ابشرك الخيانه صارت صدق تخيلي الچويتي يخطب اماني
صرخووا كل البنات جمله وحده وفزت اماني بخوف وهي تخبى ورا وعد
وشهقت مضاوي ووقفت وهي تضرب صدرها: افااا يالخاااينه اعترفي وش مسويه اعترفي
اماني: ماسويت شي والله وبعدين انتي اللي خنتي وسحبتي عليهم
سحر: اي والله انتي خنتي
مضاوي بضحك : متاكده انك ساحرته يالمجرمه ولا وش عرفه انك انتي من بد البنات كلهم ودك بچويتي
ضحككت أماني: والله مدري لكن شكل الحاره لها اذان
ضحكت حنان: لا والله نداء روحي شكله
مضاوي بضحك: يالمشعوذه
اماني :هههههههههههههههههههههههههههههههههههههههههههههههههههههههه
وعد : والله حظك ماشاء الله
ندى: الله يرزقنا
ابتدت الطقطقه على اماني اللي ٩٠٪ تحس انها موافقه
_______________________.
وفي بيت نادر
اللي هالمره جلس قدام المرايه بالساعات يراقب نفسه وهو يحاول يقنع نفسه و يهدي من اندفاع مشاعره اتجاه شوق وهالاندفاع مخيييف بالنسبه له
وقف وقرر انه يطلع ولا يناظر عيونها ولا يشوف ابتسامتها اقل شي لين يقدر يتحكم في مشاعره اللي بتفضحه قريب وهو ماوده يخسر نظرة شوق الطيبه له
اخذ اغراضه وطلع سييييده متجاهل نداء شوق اللي وقفت مستغربه من روحته بدون ما يودعها
كان هذا غريب على نادر لكن توقعته مستعجل
ورجعت تكمل شغلها وهي تحاول تتجاهل ام نادر للي خفت مضايقتها لها
_______________________.
في السوق
في عز انشغال خلف اللي كان مندمج يفك ويركب رفع راسه اول ما حس ظل حجب عن عيونه الشمس وطرف عبايه رفع نظره بسرعه وشاف بنت متغطيه كلياً واقفه ومعها راديو
نزل نظره بسرعه وهو يعدل نظارته:سمي يا اختي
ابتسمت ليلى وهي تحاول تغير صوتها نزلت الراديو قدامه : الراديو اخترب
رفع راسه خلف بقوه اول ماعرف صوتها اللي ضرب بقلبه لكن ماهو متاكد اذا هي هي او لا ليلى ما تغطي عيونها
همست ليلى بهدوء: لا يوقف قلبك هاذي انا
مر طيف ابتسامه على خلف وهو يهمس : لا توقفين فوق راسي مثل السياف روحي شوي على جنب لاينتبهه لك احد
وخرت ليلى شوي وهي توقف على طرف وحبت تختبر خلف وقالت: ما ادري هو هذا طبع ولا هالايام صاير تخاف
لف خلف وابتسم وهو مايبي يبين انه يكلمها ومر من جنبها بسرعه ياخذ عدته وهمس: انا خايف عليك انتي يا بنت النوخذه واذا بتقيسين خوفي اذكري مواقف البقاله وتعرفين اذا اخاف او حريص عليك لكن انا بسببك ومن هالهداوة مرتبك
ابتسمت ليلى تحت غطاها وقالت تشتت الاحراج: أمي هنيه بالدكان اللي قريب جيت اعطيك هالردايو ما ادري شنو فيه مو واضي يشتغل
جلس خلف وهو مبتسم مايقدر يسيطر على ابتسامته ابداً : نشوف عديم الحظ هاللي مضيق صدرك وش علته
ابتسمت ليلى وهي تشد على يدها ولفت بسرعه اول ماقال خلف : بكره او بعده رايحين لديركم الكويت
ليلى : والله ! ليش شنو عندكم!؟ خلف : نسأل عن اخوك
ليلى ابتسمت: بتوافقوون !؟ خلف : لو هي علي انا موافق وقاضي لكن مهما كان السؤال واجب ان حصل نصيب او ما حصل
ليلى بهدوء : زين
خلف ببتسامه: لكن في كل الحالتين ماهي فارقه معي ، والموافقه وعدمها مارح تأثر علي
ليلى: شلون!؟ وقف خلف وقرب وهو يعطيها الراديو بعد ما صلحه ودخل فيه شريط اختاره عشان تسمعه ليلى بكل حب وهمس : لأني اول من وحد صفوفنا انا الأحق في نسبكم يا اهل الكويت وانا اللي من شهور اربي أحلام وعهود
ماني مخليها لنصيب غيري يكسرها وقصتنا سيّرتها على مانشتهي ماهي على مايشتهوّن وخذي كلامي وعد
اخذت ليلى الردايو ببتسامه ماتدري وش ترد عليه احرجها واربكها و وعده لها ريحها من مخاوفها طلعت بدون ماترد اول ما سمعت صوت ينادي خلف ورجعت لامها وهي تسمع خلف يرحب بماجد اللي جاء من بعيد مبتسم
ماجد: شخبارك خلف
خلف :حمدلله اخبارك انت
ماجد : اموري ماشيه ! مريت البيت ما احد فتح لي
خلف صد بهدوء: شكلهم عند جدي
ماجد: انا بعد قلت كذا
خلف : قهوه ولا شاهي !؟
ماجد : ولا شي اجلس بكلمك بموضوع
خلف : خير
ماجد اخذ فتره يجمع كلامه لكن قال : صراحه ياخلف انا جاي بشاورك بخطبه
انفجر خلف يضحك بكل قوته اول ما استوعب انه صاااار رسمياً الشخص الاول المقصود في مشاريع الخطب والزواجات
ماجد بهدوء: وش فيك!؟
خلف: معليش ياماجد لكن والله اني من تالي صاير خطابه الرايح يخطب مني ووالجاي يخطب
ماجد : من خطب بعد!؟
ضحك خلف : ابد ضاري خوي خاطب عمتي وجابر الكويتي خويي بعد خاطب اماني وابوي متزوج ويلا
ماجد :هااااه
خلف : اهلاً بك في عالم الصدمات
ماجد: كلهم على جنب ابوك وش قصته !
خلف : تزوج طال عمرك
ماجد : لا لا
خلف : هذا اللي صار
ماجد: لاحول وكيف عاد الامور
خلف : مثلك عارف ، لكن قلي موضوعك الحين
ابتسم ماجد بتوتر: اجل خذ هالصدمه بعد
خلف : سمعني
ماجد بهدوء: بخطب سحر بنت عمك
رفع خلف راسه بهدوء يناظر ماجد نظرات عجز يفسرها ماجد لكن كانت اغلبها صدمه :سحر!
ماجد : ايه
اعتدل خلف وهو مصدوم وقال: وش معنى سحر!!
ماجد : نشوف انها مناسبه لي
ما ينكر خلف انه تجمد من الصدمه لكن فرح ان مثل ماجد تقدم لسحر اللي طول الوقت وقلبه موجعه عليها وحاس بالذنب لكن اذا تزوجت ماجد متاكد انها بتكون سعيده
ماجد: فيك شي انا سمعت ان خطبكم تفركشت
خلف : ايه نعم حصل لكن تفاجأت والا انت ياماجد سعد عينها اللي بتاخذك
ابتسم ماجد براحه: تسلم لكن انا حبيت اكلمك انت لانك معني في هالموضوع كثير ويمكن تجي اعتراضات عشانك
خلف : لا لا لا اعتراضات ولا هم يحزنون تقدم واخطب وانا معك
ماجد: الله يسعدك ياخلف والله انك ابو قلبٍ كبير لكن انت ادرى بعقاب وابوك
خلف : ابوي اقدر اتصرف معه لكن عقاب بحاول وانت اعرف بعقاب
ماجد : اجل الله يعين
خلف : اجل قم خلنا نروح البيت ونتغدا ونعين خير وبعدين نتفاهم
ماجد: على بركة الله
طلعوا وخلف كل شوي يناظر ماجد يحس انه مذهول ومصدوم لكن اذا فكر بطريقه ايجابيه يشوف ان ماجد مليان بالفرص لسحر وسحر بتعيش كل احلامها معه لكن وييين وعقاب متسلط عليهم
اما ماجد رغم فرحته الا انه يحس انه حذر مع خلف مايدري للحين وش اتجاهات خلف
_______________________.
وفي بيت الجد قايد
كانوا الكل فيه وللكل تارك حوريه في بيت ابو خلف لحالها ولا احد قال لها ان الوجبه اليوم في بيت الجد
دخل ابو ناصر ومحمد وجلسوا بعد ما سلموا وجاء عزوز وفيصل وجلسوا وسالم وغيث
والكل منصت لسوالف الجد ووعد اللي اشتاقوا لها واللي تبشرهم انها مانستهم ودعت لهم في الحرم
عزوز: مادعيت لنا يا الوحش
لفت وعد بضحك: دعيت لك بالهدايه
فيصل: حيااكم الله في وعد نسخة جدتي ام ناصر
ضربته ام ناصر :وش فيني هاااه وش فيني
فيصل فز وهو يبوس راسها: مافيك الا الزين والملح والقبله
دق الباب وفزت شهد: هذا عقاب اكيد جاء
هيا: بشويشش
بدوا البنات يجمعون اغراضهم بيدخلون لكن دخل عقاب على طول وكانوا اصلا متغطين ودخلوا لكن وعد اللي كان الاخيره عارفها عقاب زييين وصد بكرهه وهو يقول : يالله مساء خير
ابو ناصر: وش فييييك مجمع شياطينك وجاي
عقاب : مافيني شي لكن بقولك بعد الغداء ابي اخذ اخواني ونروح لجدتي ام امي اتصلت فيني زعلانه والا تبي نجييييي لها اليوم
ام ناصر: وش بلاها
هيا: بعد وش بلاها المسكينه ماشافتهم من بعد العيد
ابو ناصر: يا عقاب يا ولدي لا تصير قاطع رحم هذولا اهل امك واجب كل شهر تروح لهم
عقاب : ياجدي ماني قاطع لكن مشغول
محمز: انتبه عاد وخلك فطين ورتب امورك
صد عقاب : عزوووز كلم البنات يجهزون مالي خلق انتظر
عزوز: طيب
وقف سالم وغيث يفتحون الباب اللي يدق وهالمره خلف وماجد وكالعاده وقفوا يرحبون فيه
وجلسوا وعقاب صاد بكرهه لكن قال ابو ناصر : جهزوا اموركم يا عيال بكره بيجي ضاري ويملك
عقاب :متى حددتوا
خلف : جاء ضاري اليوم المحل ورتب اموره
عقاب : يا سرعه ماشاء الله
ضحك خلف وهو يقول :وده يصير عمك بسرعه
عقاب : خليييف
محمد : زين الله يتمم لكن وش صار على جابر !؟ خلف : بكره بعد الملكه بنروح الكويت واشوف اموره وارجع
ماجد : وابوك وينه اليوم!؟ خلف : والله مدري وينه
فيصل: من شوي سمعت صوته بالبيت
محمد : غريبه ماجاء للغداء للحين
سالم : اناديه
خلف: لا انا اناديه
راح خلف اللي شايل هم اخوانه ومايبيهم يشوفون ابوهم بحاله مزريه دخل البيت ومثل ما توقع شافه جالس مع حوريه بالحوش وهي مغرقته بانواع الفواكه اللي عمر خلف ماشاف ابوه جايبها لهم
اعتدل ابو خلف يناظر خلف بفشله: وش تبي ورا تنحنح او تدق الباب
خلف : جاي بيتنا يبه !؟ احد يستاذن في بيته!؟ ابو خلف :وش عندك!؟ خلف : جدي يناديك للغداء
ابو خلف بعدم اهتمام: ما ابي روح انت روح
انسدت نفس خلف وصد بإشمئزاز : بروح لكن الحوش للعامه يبه واذا انت مراعي خصوصيتك غرفتك موجوده ماله داعي يشوفونك اخواني
وقف ابو خلف بغضب: وش مسوي انا ذنب
خلف : لا لكن عييييب
طلع وتركه وهو متفشششششل من تصرفات ابوه المراهقه ومقهور من نظرات حوريه
وقبل يدخل على الرجال سمع صوت احد يناديه ولف وتبخرت ضيقته كلها واسرع بخطواته لها: وععععد ياحبيبتي
قربت وعد وهي تحضنه بنفس الشوق : مابغيت تكي واسلم عليك
خلف :مادريت انك هنا والا اجي لك قبل اروح لاي مكان
وعد : وش فيك زعلان!؟ واضح على وجهك الضيق
لف خلف بضيق وهو يأشر على البيت : ومن غيرهم
وعد : ماعليك انا اوريك فيهم انت بس روق
خلف ابتسم: اكيييد بروق دامك موجود
غيث: خلللف تعال الغداء
وعد : روح روح شوي نكمل سوالف
خلف : يلا
_______________________.
وفي بيت النوخذه
كان الوضع هادي ومترقب كان جابر يعدد ويجمع الاماكن اللي ممكن يسألون عنه فيها ورفع راسه يقول :يبه تهقى يروحون الكويت
ابو نهيان: اكيد يايبه بيروحون الناس بيسألون عدل عن الرجال اللي بيعطونه بنتهم
ام نهيان: خلهم يروحون ماعندك شي تستحي منه
جابر: ايييه عادي بس توترت والله اخاف يصادفون احد من طرف عماتي
ابو نهيان: ماكو مشكله خل يصادفون
كانت ليلى ودها تساعد جابر ودها تقوله ان خلف بيروح للكويت واكيد بيسوون شي
ووقفت وهي تفكر في خطه كيف توصل لخلف انه مايثق بكلام عماته لكن لفت بكل قوتها اول ماقالت امها : واخزياه يا ابو نهيان لو تدري عن ابو خلف
لفو كلهم:شنو فيه
ام نهيان: والله الفريچ كله مالهم سيره الا هو وزواجه تزوج على حرييمه بهالعمر
شهقت ليلى برعب وهي تتذكر هالايام اللي راحت كلها اغلبها خلف فيها مهموم واكيد هذا السبب
ابو نهيان: واذا تزوج رجال متزوج على سنة الله ورسوله
جابر: يمه الله يهداچ خرعتينا
ام نهيان: يعني تشوفونه معه حق
ابو نهيان: اكيد مع حق الرجال ماسوى مصيبه
ليلى : شلون يبه حرام قهر حريمه وعياله حرررام
جابر: شعرفچ انهم انقهروا يمكن استانسوا
ليلى: محد يستانس على زوجة الابو
ابو نهيان: هدوا الناس بحالهم وزهبوا غدانا
ام نهيان: زين زين
ضحك جابر: اي يمه لا يتزوج عليچ ابوي
ضربه ابو نهيان وهو يضحك وراحت ام نهيان تحضر وليلى تشتغل وهي شايله هم خلف وخواته واكيد ضايقين
_______________________.
وفي بيت نادر
اللي رجع ولا يمديه يتفادى موقفه الصبح الا ركضت له شوق :نادر جيييت شلت همك من ساعه
نادر: ليش!
شوق: طلعت مستعجل وتاخرت وخفت
ابتسم نادر بضعف: ماعليه ياشوق هالايام اموري بالشغل ماهي تمام
شوق : لا ماعليك المهم انك بخير
نادر: بخير بخير
لف على صوت امه: نادر جيت يلا عشان نجهز الغدا لابوك
نادر: جهزوا جهزوا
دخل الغرفه وهو يشوف برود امه اللي ما اهتمت انه تاخر او غاب فتره لكن المهم تلحق رضا ابو نادر جهز الغداء وجات شوق مبتسمه: يلا الغداء صار جاهز
نادر : كأن مالي نفس
شوق :لا لا وشو مالك نفس شوف كيف وجهك تعبان ، اسمع تغدا وبعدين ارتاح على كيفك ما احد بيزعجك
نادر : زين زين
شوق : ايييه ترا انت بعد تقول كل شي الا انك تهمل نفسك وصحتك صح
نادر: تطبقين دروسي علي
شوق ضحكت: نتعلم منك
نادر: يلا
طلع وهو يتحاشى النظر في ابوه اللي كل مايشوفه يذكره انه يبي حفيد
_______________________.
الليل
في بيت الجد قايد عقاب بعد الغداء طلع مع اخوانه بسرعه وماعطى ماجد فرصه انه يفصح عن موضوعه عشان كذا قرر ماجد يأجل الموضوع شوي وقرر محمد يستضيفه في بيتهم لان بيت ابو خلف هالفتره متوتره اموره
وبيت الجد ركد وهدا بدون عيال نايف وصار الوقت بطيء بالقوه يمشي لكن مضاوي تحسه يطير وهي تدري ان بكره بتحون ملكتها على ضاري اللي رغم انها تعرف عنه كثييير لكن تحسه مجهوووول بالنسبه لها وشايله همه
لكن هيا كانت تعيش في عالم قناعاتها وبين كتبها وثقافتها اللي تسعى انها تنميها بنفسها مادامها محرومه من كل الوسائل اللي تنميها
_______________________.
وفي بيت ابو خلف
حوريه اللي من بعد ما الكل رجع وشافت نظرات وعد وخلف الغاضبه قررت انها ماتطلع من غرفتها
ورجع الكل يعيش وضعه العادي وفي السطح كالعاده هناك خلف ووعد اللي جالسين بهدوء وبينهم براد شاهي وراديو كالعاده ونار
وكان خلف مبتسم وهو يتأمل الراديو اللي كان عذر ليلى اذا بغت تجي الدكان
صحى على ضربة وعد على فخذه: وين وصلت وش هالابتسامه
خلف : قريب ماعليك
وعد : ادري انك قريب لكن وين بالضبط وبعدين تعال وش جاب جابر لاماني
خلف :علمي علمك كل اللي قالوه امه تشوفها مناسبه له
وعد بهدوء: يعني انتي وليلى مالكم يد فيها
لف خلف بهدوء: لا ياشيخه ماهي لدرجة اني اعرض اختي على احد
وعد : يمكن مو انت يمكن ليلى ضبطت الامور من عندها
لف خلف بشك: لا لا وش دخل ليلى ؟
وعد : انت ابخص
خلف : لا ماهقيت
وعد: وانت وش بتسوي بهالوضع واذا ابوي رفض
خلف : اذا ابوي رفض انا بروح وبخطب ليلى بنفسي مايحتاج يجي احد يوثق قراري
وعد بهدوء: خايفه عليك يا خلف من هاللي انت فيه اخاف يصير شي يضيعك ويضيع ليلى معك
خلف : وعد اذكري الله وش هالفال
وعد بسرعه قالت : اييييه وكيف الشغل معك
عرف خلف ان احد جاء وقال بهدوء: ابد مثل العاده
ندى : يووه مابغت تخلص المواعين
خلف : تعالي هنا عند النار تدفيك
ندى: جيتك
وعد: وين البنات !؟ ندى: راحوا ينادون مضاوي وهيا دامهم اليوم ماعندهم احد
جاء فيصل بهدوء: وعد مبارك تحت
لف خلف : مباااارك نسيت اسال عنه والله
وعد بضيق: ماعليك خلني اشوفه
خلف : خليني بنزل اسلم عليه
نزل خلف ووعد وسلم على مبارك اللي كان مستعجل وهو ينادي وعد: يلا بنروح
وعد لف تناظر خلف اللي راح وتركهم لحالهم ولف على مبارك:مبارك ابي انام هنا
مبارك: وشوووو ماقلتي بتجلسين لليل
وعد: ضايق صدري بجلس عندهم الليله بس
مبارك : ما تفقنا على كذا ياوعد
وعد : مبارك انت تقول كل شي يضيق صدري تمحيه وانا الحييين ضايق صدري مابي ارجع للبيت بجلس عند اهلي
مبارك اللي شك انها عارفه ان البيت فيه شيخ وضيقها ذا غير مبرر وكلامها الزعلان وخاف انه يصير له شي وبسهوله قال : زين زين لكن بكره الصباح بدري بتجين معي
وعد : طيب
مبارك: يلا فمان الله
وعد : مع السلامه كانت وعد مستغربه من رضوخ مبارك السريع وكان مرتبك واضح وراه شي لكن ماتدري وشو لكن زين وافق ورجعت وهي مبتسمه وشافتهم مجتمعين وممحشورين عن النار
مضاوي: وش عندك رجعتي!؟ وعد جلست ببتسامه: بنام هنا
هيا: اما عااد وانتي عروس بتنامين هنا
وعد : ايييه
ضحكت ندى: كفووو اختي
فيصل : اانا جالس اشوف ان القوامه في يدك اختي الحوش
وعد: فيصل من زمان ما كفختك
فيصل : خلاص استسلم
كلموا سوالفهم والكل مبسوط بوجود وعد
_______________________.
وفي احد القرى البعيد عن الخفجي
كان هناك عقاب واخوانه عند جدته ام حامد
ام حامد بعتب: يعني لوو ما ادوركم محد يذكرني
عقاب : ياجده تعذرنا منك واقبلي عذرنا
ام حامد : كلٍ اقبل عذره الا انت
سحر: ياجده والله عقاب مشغول
ام حامد : وش شاغله العيال ولا الحرمه
عزوز: احنا نكفيه عن عيال وحرمه مشغول فينا
ام حامد : اها بس ماقلت لي وش صار على زواج سحر من خلف كأن الناس راكدين
الكل صد وسكت واعتدل عقاب وهو يقول : ماصار نصيب يا جده
ام حامد : وشوووو خطبة سنييييين صارت مافيه نصيييبب !؟ عهد : سحرر ما تبيييييه مو غصب وخلف ماهو ملاك
في عز الكلام شهقوا كلهم اول ما ضرب الفنجان في ذراع عهد وطاح بحضنها ورفعت عيونها تناظر وشافت عقاب اللي وقف بغضب بعد ما حذفها بالفنجان : كم مره قلت وعدت وزدت عدلي لسانك ياعهد قبل اقصه لك والظاهر انك ما تفهميييين وتبيني امد يدي
ام حامد : وش فيييييك عليها هاه وليه تطقها وش سوت
عقاب بغضب وهو يقول : ادرى كيف اربي خواتي وقومي من قدامي قبل ادفنك هنا
وقفت عهد وراحت وهي تبكي بقهر والكل سكت وصار يناظر عقاب اللي يقلب مسبحته بيده بغضب
ام حامد : وش معناه هالكلام وشلون يعني تفكرشت الخطبه!؟ عقاب : البنت ما تبيه وهو بعد مايبي ماهو غصيبه
ام حامد : ولييه ما تكلموا من زمان توهم يتذكرون بعد هالعمر كله !؟ يوم قطع نصييبها من كل مكان وكلٍ عرف انها له
عقاب : ما احد قطع نصيب احد والنصيب بيجي اذا ربي كاتب لها نصيب وخلاص سكروا الموضوع
نزلت راسها سحر بضيق وهي ماصدقت تنسى عشان يرجعون يعيدون هالسالفه
ام حامد:وخلنا من سحر انت وشوله جالس للحين ما تزوجت ولا تنتظر بنات عمك اللي عايفينكم
عقاب : جدددده وش هالحكي
ام حامد : اسمعني يا عقاب امك وصتني عليكم وانا مخليتكم على راحتكم مابي ازعلكم لكن واضح ان جدك وجدتك مايعرفون كيف يمشون الامور
عقاب: جدي وجدتي ماهم مقصرين
ام حامد : اجل اسمع الكلام وافهمني دامك رجال وشايل نفسك وتقدر تفتح بييت وصلت هالعمر لازم تزوج وتكون نفسك الدنيا ماهي على كيفك
صد عقاب اللي ماكان يفكر بالزواج ابد ولا يفكر يطلع ويترك اخوانه : ماني متزوج لين ازوج اخواني
ام حامد : اها بس اخوانك ماهم ضايعين في بيت جدهم وانا موجوده لكن وجب عليك الزواج
تكتف عقاب: وزواجي صار همك ياجده!
ام حامد : اييييه صار همي وشغلي الشاغل والبنت اللي تناسبك موجوده
لف عقاب يناظر سحر وعزوز اللي يناظرونه
ولفت ام حامد: خلونا لحالنا
راحوا ولفت ام حامد على عقاب : اسمعني ياعقاب بنت خالك حامد الله يرحمه للحين موجوده وما تزوجت والبنت مافيه مثلها خلق وادب وعقل وثقل وجمال وانت تعرفها زيين وتعرف تربيتها
سكت عقاب فتره وقال: للله يخليها لامها
ام حامد : انا ادري مافي بالك احد وكل اللي تبيه بنت تحافظ على بيتك وعليك وترعاك وترعى اخوانك وجود طيبه ينتصلى على طوف ثوبها وفوق هذا تحب خواتك ويحبونها ولا تحصل احسن منها
عقاب : وليه تبيني انا بذات اتزوجها عيال خووالي كثير
ام حامد : كثيير لكن محد منهم مثلك وانا ادري محد بيحفظ بنيتي ويسعدها الا انت وانا ماعاد ابيها تعيش عند ناس غرب وابي اتطمن عليها وانت تدري انها وصية خالك الله يرحمه
سكت عقاب ولا رد ورجعت ام حامد تقول : انتم كلكم عينين براس وانا ماني متطمنه عليك الا معها وهي بعد وانا طالبتك ياعقاب تفكر زيين
وقف عقاب بهدوء : زين ياجده ارد لك خبر
طلع عقاب اول ما حس ان الموضوع بدا ياخذ بتفكيره حيز واذا فكر بعقله هو ماينتظر احد ولا في باله احد وعمره يمشي ولازم يتزوج وهذا اول مخرج بيحرره من انه يتزوج من بنات عمه وهو ماوده بالزواج منهم
_______________________.
في بيت ضاري
اللي كان يتعدل يبي ينام لكن وقفت عيونه على الاغراض المجهزه بالزاويه الصندوق اللي فيه الذهب والصندوق اللي فيه بعض الاقمشه اللي اخذتها امه هديه لمضاوي واهلها والشبكه وكل شي قدامه سرح يتأملها وهو اللي عمره ما توقع انه بيعيش هاللحظه وانه فعلاً بيتزوج كان يعتبر هالفكره سراب ومستحيل تحقق لكن بكره بيصير كل شي رسمي وبتصير مضاوي زوجته بموجب العقد
وهذا شي موتره ومربكه رغم حبه لخلف واهله اللي استقبلوه بطيبه وحب
سكر النور وتمدد وهو مبتسم ودايماً تعود ينام مبتسم لكن هالمره ابتسامته من قلبه من كللل قلبه
_______________________.
في بيت نادر
كان متخذ ابعد مكان عن شوق مايبي يهتز قلبه لاي تفصيل ملفت فيها لكن تفاجئ بشوق اللي جلست قدامه بهدوء وهو تشد على يدينها ومن دون إدراك قال بسرعه: شوق وش فيك صاير شي!؟ احد قالك شي
شوق : لا لا محد قال لي شي
نادر : اجل وش فيك
شوق بهدوء : مدري احسك زعلان مني !؟ مدري اذا سويت شي وانا مدري وزعلتك لكن والله مو قصدي
تجمد نادر اللي حس ان وجهه برد واطرافه بردت وتفشل
تقدم ببتسامه: افا يا شوق انا ازعلك منك معصي
شوق :اجل ليه احسك متضايق
نادر ببتسامه وضحك : مافيني شي يانديمتي لكن مشاكل الشغل حايستني شوي
شوق ابتسمت على اللقب اللي تعدوته من نادر : اجل الحمدلله لاني طول اليوم شايله هم ما ادري وش سويت
ضحك نادر: لا لا وش بتسوين يابنت الحلال الا كل زين انتي ملاك مايجي من وراه الا كل خير
ابتسمت شوق بامتنان : تسلم يانادر
ابعدت وهي تدخل بمحلها لكن نادر اللي نقد على نفسه وضاق وشلون يسمح لنفسه يدخل بهالتصرف مع شوق اللي للحين ماعرفت ترد على اي كلمه حلوه يقولها
اختفى كل شي من عقله وقلبه وقرر يكمل على النهج اللي وعد به شوق ووعد به نفسه ولا يستسلم لأي طاري
_______________________.
ومن بكره
كان الاستنفار في بيت الجد قايد قايم والكل يستعد لجيت ضاري والكل يروح ويجي من قدام مضاوي اللي تعيش بركووود ما تعرف تفسره الا خوف من المصير المنتظر كان وده ان عقاب فيه وتركض وتقوله انهامن الخوف هونت ولا تبي ضاري وكان اكيييد بيساعدها لكن عقاب تأخر كثييير وكل ما تأخر يزيد ارتباكها
دخلت هيا وهي تناظرها بتعب: للحين متجمده هنا قومي ساعديني تعبت
مضاوي بتوتر : واللي يسلمك يا هيا نادي اي احد غيري انا ما احس بنفسي من التوتر تكفيييين
هيا : لا حول الله وهذا وقت عقاب يروح لجدته ويخلينا حايسين
راحت هيا تستنجد ببنات ابو خلف يساعدونا وكلهم برسم الخدمه وصلوا بما فيهم وعد اللي بالقوه صرفت مبارك الصبح وقالت فيه ملكه لازم تحضرها وبالقوه ليييين رضا
طلعت وعد وهي تدور على مضاوي وضحكت اول ماشافت حالها :مضاوي وش علتك جالسه هنا
فزت مضاوي : وعد ألحقيني مافي الا انتي تنقذيني
وعد : وش فيييك وش صاير بسم لله عليك
مضاوي: انا خايفه ومتردده وشكلي بهون
شهقت وعد: وشووو !؟ ليه وش صار وش السبب
مضاوي بهمس: تعرفين ان ضاري لقيط!؟؟ طارت عيون وعد ووقفت بذهول وهي وتناظرها: نعم!؟ ومن قالك هالحكي
مضاوي :هو قال لخلف وخلف قالي لكن انا احس اني اذا وافقت بوقف على طوف هواية ويمكن اطييح واضيع
وعد : لا لا يابنت وش هالحكيي اللي تقولينه تعوذي من ابليس وافكاره وبعدين مو انتي فكرتي واستخرتي ووافقتي خلاص لا تخلين الشيطان يلعب عليك
مضاوي : وافقت ومدري كيف وافقت ومدري وش اسوي
وعد : يامضاوي اعقلي وانتي بنفسك قلتي ان خلف كلمك عنه وخلف مستحيل يرضى لك بأي واحد وجدي بعد واكيد انهم سألوا عنه قبل يعطونه الموافقه ودامه صاحب خلف اكيد انه طيب ويستاهلك
مضاوي : حتى عقاب مارفضه ولا قال شي عنه الا اللي قاله خلف
صد وعد بكرهه من طاري عقاب : ماعلييييه يابنت الحلال هذا انتي قلتيها كلهم يمدحونه تعوذي من ابليس ولا تضيعين كل شي بلحظة توتر واجلسي استغفري وان شاء الله الموضوع بسيط
جلست مضاوي وهي للحين ماهي متاكده من قرارها ومتخوفه جداً
وطلعت وعد وهي فعلاً ماتدري وش تقول لمضاوي او كيف بتواسيها الوضع متوتر وهي ماهي فاهمه السالفه
_______________________.
وفي بيت ضاري
اللي من الصبح وانه ترتبه وتهندمه وتعطره وتغني له ( ضاري عسى عينه تقر ..ضاري عسى قلبه سعيد .. وليدي جعل فاله الهنا ..ضاري رضي الوالديين .. )
كان ضاري مبسووووط على صوتها اللي يبان في ذبذبات كبر السن وهي تغني له اخذ المبخره منها وهو يبخر عبايتها وطرحتها وهو يجاريها بنفس اللحن والاغنيه ويضحك ( يمه عسى أيامك دهر .. يمه عسى عمرك طويل .. وبشوفتك عيني تقر .. يا منوة القلب السعيييد )
ضحكت ام ضاري لكن اختلط صوتها بعبرتها وقربت وهي تحضن ضااااري بكل قوتها وانهلت دموعها وعجزت تتحمل هالمشاعر اللي عمرها ماحلمت بها
تعلق فيها ضاري وهو يحاول ما يتأثر لكن غصب عليه رقرقت دموعه بعينه
وابعدت ام ضاري وهي تمسح دموعها بطرحتها ودموع ضاري قبل تنزل : لا لا نبي نبكي ولا نتكدر اليوم فرح يوووم يكتب بالتاريخ
ضاري : على قولك يمه يلا ما ودنا نتأخر
ام ضاري : يلا يلا
طلعوا وهم شايلين اغراضهم وكل واحد يمرهم يبارك ويناظر الاغراض وكثرها باستغراب لكن يذكر لله ويكمل طريقه
_______________________.
وعند خلف
اللي كان يخف خطواته بالسوق يبي يجمع كل شي وصاه به جده ويرجع قبل يوصل ضاري لكن وقفه سعود وهو يقول :خلف خلف
خلف : لبيه يا سعود
طلع سعود كيس ملفوف بحرص : خذ هاذي لاختك وعد
قطب خلف حواجبه: من ارسلها!؟ سعود اللي مستعجل : ليلى ارسلتها على وعد ويلا بروح قبل تهون ماتعطيني حلاوه
ضحك خلف وهو يطلع من جيبه ريال: خذ هذا مني
سعود : يالله ياكريم
اخذه وركض لبيتهم ووقف خلف ببتسامه وهو يدخل بأي مكان منعزل وفتح الورقه وابتسم وهو يقرا ( اول شي .. مساك الله بالخير .. وثاني شي قبل تروح الكويت لازم اقولك هالكلام لاني ادري شنو بتواجهه بالكويت .. وانت اعرف .. لكن اذا قابلت هالاسامي ( وكتبت اسامي عيال عماتها ورجالهم وكل واحد ممكن يتضامن معهم ) وسألتهم لا تصدق حچيهم لانهم ما بيرضون ان جابر يتزوج وحده برا الديره وبذات بناتهم عشان چذيه بيهولون بالحچي فا لا تصدقهم ...
واذا تثق فيني ولو شوي أسال هالاسامي اللي بكتبهم لك لانهم يخافوون الله ويعرفون الحق .. وثالث شي .. قبل تروح الكويت تأكد انك اخذت وياك جاكيتك او شي يدفيك ترا برد الكويت مايرحم يا ولد القايد
والرابع والاخير.. نستودعك الله وترد بالسلامه واذا رديت لا تنسى تطمنا ..) انتهت رسالتها اللي ابتسم بسببها خلف من اول سطر لاخر نقطه
سكرها وهو كله ثقه تامه بليلى واكيد كل شي تقوله هو الصحيح
اخذ اغراضه ورجع للبيت مبسوط ومستانس ..
_______________________.
في بيت ام حامد
كانوا عيال ابو نايف يجهزون عشان يرجعون ويحضرون ملكة مضاوي وعقاب واقف بهدوء وهو ما نام الليل يفكر بكلام جدته وهو نوعاً ما مقتنع ولا عنده اعتراض
وقبل يطلعون التفت يسلم على ام حامد وقال: اجل ياجده تم وان شاء الله لا قضينا من مضاوي نبي نرجع انا وجدي وعمامي ونخطب جود
شهقوا البنات والتفت عقاب عليهم وسكتوا
وابتسمت ام حامد ؛الله يبارك فيك ويوسع صدرك يا حبيبي والله يتمم
عزوز: اخييراً احد اقنعه
عقاب : جالس على قلبك
ضحك عزوز: لا بس ابي اشوف عيال اخوي
عقاب ابتسم: امش امش
ام حامد : للله معكم يمه
الكل: فمان الله
طلعوا متجهين بيتهم جدهم وهم كل واحد وده يسأل عقاب لكن خايفين
لكن عقاب ماكان الموضوع مأثر عليه كثير كثر ماهو حاط بباله مسألة وعد
_______________________.
وفي بيت ابو خلف
جهزوا الكل واجتمعوا بالحوش وطلع ابو خلف وحوريه: وين على الله
ام خلف : نبي نروح ملكة مضاوي
ابوخلف:وشووو ملكة مضاوي!؟
ام وعد : ايييه ياحافظ وش بلاك مضيع الدنيا
ابو خلف :شلون يزوجونه بهالسرعه!؟ وعد : والله ما احد تزوج بسرعه الا انت يبه لكن مدري شفيك ناسي ان خطبة ضاري لها مده
خلف : ولو حضرت غدا جدي امس كان عرفت
ابو خلف: احترم نفسك انت وياها
خلف : زين
ابو خلف : ندى وين القهوه !؟؟
ام وعد بزعل : ماسوينا قهوه ومشغولين بنروح بيت عمي طالبنا نساعد الناس
وعد : البركه في العروس الجديده لازم تذوقك قهوتها عشان تقيمها اخاف انك اخذها على عماك يبه
ضحكت حوريه باستفزاز: لا ياحبيبتي قهوتي حافظها وعارفها زين
ابو خلف : بس بس
خلف : يلا نبي نلحق
طلع الكل ولا احد جلس عند ابو خلف اللي مايدري وين اختفت هيبته لكن بالنسبه لعياله من بعد اللي شافوه وسمعوه هاليوم صارت صورة ابوهم مهزوزه
_______________________.
وفي بيت نادر
كان نادر يجهز لان ضاري عزمه على الملكه وام ناصر عزمت وام ضاري عازمين شوق
انتهى وهو يتعطر والتفت: شوق يلا تاخرتي
طلعت شوق بسرعه وهو تدور على شي
ورفعت راسها اول ماحصلت طقم الذهب الكبييير ورفعته لنادر: نادر تسويه لي
ناظر نادر الطقم اللي كان كبيييير مره عليها : لازم تلبسينيها !؟
شوق: وش اسوي ماعندي الا هي وكلها كبيره
اخذها نادر بجيبه وهو يقول :اللبسي وتعالي بسرعه
شوق : ويييين
نادر: خلصي ياشوق يلا
ركضت تلبس وطلع نادر يوقف بالحوش وركضت له شوق بعد ماخلصت ووقفت جنبه : يلا ولفت ام نادر: وين رايحين!؟
نادر: معزومين على ملكة ضاري
ام نادر تخصرت: وشوق معك!؟ نادر: ايه
ام نادر: وضاري هذا مايدري ان عندك ام تنعزم معك
نادر رفع كتوفه بيأس : وش اقول يمه!؟ ام نادر: روح روح الله يعوضني تعبي فيك
طلع نادر بانزعاج وشوق تحاول تجاري خطواته السريعه لكن وقف نص الطريق وهو يمسك يدها وبدا يمشي بهدوء وابتسمت شوق له وبدت تركد نيران قلبه ووصل محل الذهب ووقف وهو يبيع الطقم واخذ بداله اشياء خفيفه تناسب شوق وتكون عليها احلى وانعم
ابتسمت شوق اللي تشوف نادر يراعيها حتى في اتفهه المجالات : مشكوور
نادر : لا تقولين لي هالكلمه ما احبها
ضحكت شوق : ابشر
لف نادر يناظر ودخل بفتحه مسكره ومحد يجي من قريب منها
شوق: وش تسوي !؟ نادر: بتروحين لناس من دون ما تلبسين ذهبك!
ضحكت شوق : وين اللبسه!؟ نادر: هنا ! لفي اشوف عشان اسويه لك بسرعه قبل يجي
لفت شوق وهي خايفه يجي احد وبسرعه لبسها نادر وابعد وهو يسوي لها الاسواره والخواتم وماقدر يتجاوز هالخطوه بدون ما يرفع يدها له ويبوسها وابعدها وهو مبتسم : تزهين الذهب مايزهاك يانديمتي
دق قلب شوق وارعبها بدقه اللي كل ما كان نادر قريب تحس انه يكسر ضلوعه مدت يدها لقلبها تهديه بخوف ماتبي نادر يسمع دقاته الفاضحه وسكتت كالعاده بخجل ماعرفت ترد ولا تقول شي ولا تدري وش هاللي يخربط احاسيسها وطلعوا متجهين بيت ابو ناصر وكلهم مبتسمين وكلهم قلوبهم تدق بشعور صعب صعب جداً يفهمونه
_______________________.
في بيت الجد قايد
الكل جاهزين ينتظرون جيت ضاري ومضاوي اللي بعد كلام وعد تحس انها هدت
وجهزت وجلست بغرفتها مانزلت واخيييراً الكل اجتمع ووصل ضاري وامه اللي استقبلهم عقاب وخلف ومحمد ونادر وفيصل وعزوز وطبعاً اجتمعوا العيال يسلمون على ام ضاري من بعيد وهي ترحب فيهم
ودخلت واستقبلوها الحريم بالزغاريط وابتسم ضاري لترحيب ابو ناصر فيه وحفواته
ووصل الشيخ وبدا يكتب الكتاب ووكل شي يمشي تمام لين وصلوا عند راي مضاوي اللي صار لازم يسمعه الشيخ
اخذ خلف الكتاب وهو يتحاشى ان عقاب ياخذه خايف من نظراته الهاديه اللي غالباً ما تطمن كانوا متوترين اغلبهم وينتظرون الكلمه الاخيره ودخل خلف وهو ينادي : وعد وعد
طلت وعد : هلا
خلف : شوفي الطريق لمضاوي
وعد : طيب لكن خلف انتبه تراها متوتره ومتضايقه واحتمال ترفض
اتسعت عيون خلف بذهول : وشو ترفض!؟ وش غير رايها وش حصل
وعد : مدري مدري لكن انت كلمها
اخذ خلف طريقه لها وهو يستعجل خطوته دخل الغرفه وفزت مضاوي تناظره بعيون مليانه خوف وقفت نظارتهم لبعض فتره واول ما انتبهت مضاوي لدفتر اللي بيد خلف قالت بصوت يرجف : لا ما ابيه
هنا بالضبط اختل اتزان خلف وضرب قلبه برعب وقهر وقال بصوت متحشرج: نعععم !وش قلتي وش قلتي
مضاوي بخوف : ما ابي
لا شعورياً صرخ خلف : مو انتي اللي وااااافقتي!؟ وش صار الحيييييين!؟ مضاوي :مدري ماني مرتاحه خايفه! مصييييري معه مجهوووول
انهبل خلف اول ما طرا له ملامح ضاري لو عرف وردة فعله!؟ وهل لعقاب يد في السالفه او لا ، اتجهه لها بغضب وهو يمسك ذراعها بقوه: ليييه الناس والدنيا على كيييييفك!؟ وييين هالكلام من قبل !؟ ليييه يوم الناس جت فرحانه وجابت لك الدنيا معها تبين تردينهم وتكسرييييينهم ليييييه!؟ من اللي قالك ترفضييين هاااه من اللي قالك ترفضين
دخلت وعد في هاللحظه وابعدت خلف بالقوه عنها: خللف وش فيييك انهبلت
ابعدها خلف بضيق : اكيييد انهبلت اكييد ولا هذا كلااام اخذه الناس لعبه في يديها وهي تدري ان وضع ضاري حساس ومايتحمل لعب عياال
وعد : اهدا انت اهدا وتعوذ من ابليس وبنفهم
لفت وعد لمضاوي اللي تدري ان خلف في هاللحظه وهو معصب ممكن يدفنها تحت الارض
تقدم خلف وهو يحاول يهدأ : بنننت مب انا بنفسي كلمتك مب انا علمتك لكل شي عن ضااااري وقلت لك لا تستعجلين قلت فكري ولا تردين الا متاكده لا نعشم الرجال على الفاضي!؟؟ وهاذي نهايتك
مضاوي : انا وافقت وانا ماني متاكده انشغلت في ابوك وزواجه
ضرب خلف صدره بقهر: وش دخلك بأبوي وزواج ابوووووووي اسمعيني زيييييين عاد هالدلع انسيه ودامك وافقتي بتحملين قرارك سمعتي ولا لا
وعد : ياخلف الله يهديك وش فيك اكيد ما انت جابرها
خلف : وش اللي ماني جابرها بتنجبر وتحمل غلطتها
مضاوي : خلللللف انا ابوي واخواني للحين فوق راسي
خلف : اسمعييييني زييين يا مضاوي والله والله لو ترفضين ان وجهي على وجهك حرام ليوم الدييييين سامعتني .
وعد: خلف خلف اطلع الله يخليك انا اتفاهم معها
طلع خلف بالقوه لكن قابله محمد : خليييف وش فيييك تأخرت الكل ينتظرك
اخذ خلف نفس متقطع : جالس اداري هالمصيبه
محمد بخوف : وش صاير!؟؟
خلف : اختك هالخبله هونت ماتبي ضاري
محمد: وشووو !؟ شلون هونت وهي وافقت بنفسها
خلف : تسألني انا ياعمي تسألني انا
محمد: اجلس اجلس لا تطيح علينا الحين انا بشوفها
دخل وترك خلف اللي ضرب اسداس باخماس وهو ماهو خايف على احد كثر ماهو خايف على ضاري وخايف من اللي جاي لو فعلاً مضاوي رفضت عجز عقله يتحمل خيبة الامل اللي بيحملونها ضاري وقهره
_______________________.
عند مضاوي
اللي اول ماشافت محمد دخل كانت تتمناه عقاب اللي اكيد بيناصرها ناظرته وشافت الغضب مرسوم بعييينه وواضح : وش هاللي يقوله خلف
وعد : ياعمي مضاوي بس مرتبكه
محمد: كلميني انتي !؟ مو جيتي وقلتي موافقه وش حصل الحين
مضاوي :محمد انا خايفه ماني عارفه مصيري معه كيف بيكون انا مدري كيف بعيش معه
محمد : وش فيه مصيرك رجال طيب ونشمي وكلٍ يتمناه وش عييبه هاااه وش عيبه
مضاوي بتردد: ماله اصل ولا فصل ولا ادري من وين هو جاي
غمض محمد بقهر من كلامها وقال: شوفي واسمعيني زييين هاللي تشوفينه ماله اصل وفصل يوووزن ديرتك كلها برجولته ولا يحتاج اصل وفصل عشان يصير رجال
وكلنا ندري أن اصل الرجال مروءته وغير هالحكي مابي اسمع والرجال تحت والدفتر بتوقعييينه وان سمعت لك صوت دفنتك بأرضك
وعد : عممي
محمد: بسسس يا وعد بس توقع وتخلصنا يلااا
خلف ومحمد والكل كانوا متاكدين من رجولة ضاري ومروءته وقوته ويدرون ما على مضاوي خوف وهي مع ضاري وعشان كذا مالهم حل في مثل هالموقف الا انها تجبر وصععععب عليهم ينزلون لضاري ويقولون مالك نصيب وهو اللي عيونه تنطق بالفرح
تحت غضب خلف ومحمد استسلمت مضاوي ووقعت وهي ماهي قادره حتى انها تبكي وتعترض والغلط عليها ما تكلمت يوم كان الخيار لها
اخذ محمد الدفتر وقال بغضب مكتوم : مبروك
وطلع وتركها وقربت وعد وهي تحضن مضاوي: يامضاوي الله يهديك لا تكبرين الموضوع انا ادري ان هالطريقه غلط لكن حرام اللي بتسوينه ليتك تشوفين امه تحت كيف من الفرحه تنطق عيونها وشلون ترقص وتغني وكأن الدنيا ماهي سايعتها من الفرح
مضاوي : الناس تفرح وانا اتنكد ليييه !؟؟ لييييه .
وعد بغضب: كللله منك ومن قلة التفكيييير اللي فييك وينك يوم سألوك وينك يوم الكل كان ينتظر رايك وين عقلك وتفكيرك حزتها ، اسمعيني زيييييين يا مضاوي اللي صار صار وجرى معاد في يدينا شي نسويه
وقفت مضاوي بغضب وضيق : مافي يدينا احنا لكن عقاب في يدينه
اتسعت عيون وعد بكرهه وضيق : انهبلتي انتي انجنيتي عقاب لا يدمرك يا مضاوي بحقده وهنجعيته عقاب كارهه الكل واكيد بيسوي لللي يسويه ويخرب هالزواج ونصيحه مني دام خلف وعمي محمد زعلانين عليه لهدرجه معاناته انه يستاهل وانه ابن حلال نصيحه لا تخلين عقاب يلعب في حياتك
وقفت مضاوي تناظر وعد بأسى وهي للان مقتنعه بفكرة ان عقاب يحب وعد : يا حسافه انك للحين تكرهينه وتشوفينه شيطان وهو
قبل تكمل قاطعتها وعد بغضب وهي مايهمها اللي بتقوله : لانه الشيطان بعينه وعلمه ونصيحه اعقلي وحطي عقلك براسك
طلعت وتركتها ووقفت مضاوي بحسره ماتدري وش تسوي بنفسها
_______________________.
في مجلس الرجال
الكل صار على نار والكل شال هم تأخير محمد وخلف ووقف عقاب ناوي يلحق يشوف وينهم بس دخلوا وهم ملامحهم هاديه لكن ملامح خلف باين عليها الغضب وباين الاختناق
اتجهه له بهمس وهو يقول: وش فيك صار شي!؟ ابعده خلف بهدوء غاضب : ابعد عني مب وقتك
عقاب : خليف وش فيك !؟
خلف مارد وكمل طريقه لضاري اللي وقف وهو مبتسم وعجز خلف يكمل ضيقته غصبٍ عليه ابتسم وكيف مايبتسم وقدامه ضاري اللي من يوم تعرف عليه ماشافه مكشر وضايق ابد رغم ظروفه الصعبه
تقدم له يحضنه وهو للحين محتفظ بمشاعر الفرح اللي تهدمت ولا بقى منها الا بقايا يحفظها لضاري : ياعساه سعيد ومبارك يا اخوي
ضاري : اللهم امين وعقبالك
بدو الكل يسلمون عليه ويباركون له وضاري مبسوط لكن ملاحظ انقلاب عقاب وخلف ومحمد الواضح
_______________________.
وعند الحريم
الكل مبسوط ويغني ويرقص واولهم ام ضاري اللي كانت متجاهله وجع رجولها ومفاصلها وترقص بعكازتها وتصفق
كانت وعد في معمعه من الضيق والتفكير وهي زاد كلها لعقاب اللي وصلت فيه يخرب حياة مضاوي بنظرها لفت على صوت غيث اللي جاء يركض يقول ان ضاري ينادي امه بيمشون
وطلعت ام ضاري وهي تحلفهم يوصلون سلامها وتبريكاتها لمضاوي للي ما نزلت بعذر الحياء
وطلعت وهي حابه الكل والكل حابها
لفت ندى ببتسامه: يااااااابختها مضاوي بأم رجلها
سحر: اي والله ماشاء لله بلسسسسم بلسسسسم
ام خلف : الله يسعدها ويوسع صدرها ويفرحها بولدها
الكل : اميييين
اماني: امشوا امشوا لمضاوي
ركضوا لها ينادونها وضحكت حنان: ماعرفتك يا مضاوي وش هالخجل
صدت مضاوي بضيق: وش تبيني اسوي اركض لها واسلم عليها
عهد: لاااا بس المتوقع منك انك بعد ما تخطي خطوه وحده بس تكونين نزلتي وشيكتي على الوضع
ام ناصر: يا مضاوي تراها تسلم عليك وتبارك لك
ام وعد : ياليتك نزلتي لها مسكينه
مضاوي بحزن على ام ضاري: الله يسلمها
بدوا يفتشون الهدايا ويصارخون البنات ويضحكون كل ماشافوا شي حلو في الهدايا
_______________________.
وعند ضاري
كان بدون مبالغه يحس قلبه بيطيح من صدره كان من كثر ماهو يحس انه بيفضحه بدقاته كان حاط يده على صدره ماكان يدري وش هالشعور لكنه شبه متاكد انها فرحة الاستقرار وفرحة العايله الحقيقه
وقبل تنزل يده عن صدره كان ينتظر امه عن الباب ودخلوا كلهم المجلس عشان تقدر تطلع ام ضاري براحتها
لكن يد ضاري ارتفعت من صدره لأزارير ثوبه العلويه وفتحها اول ما اختنق من اللي سمعه ورا الباب وكان همس مرعب بالنسبه له
سمع صوت عقاب يقول بغضب: خليييف وش صار لك وش فيك تكلمني كذا !؟ وش بلاك منقلب حالك وشايش علي
التفت له خلف بغضب : اكيييد بشوش عليييك ! كيف تقدر تخلى عن نفسك لدرجة انك تخرب حياة مضاوي وتكون سبب في رفضها لضاري! كله عشانك تكرهه ما تحبه!؟ وش ذا الانانيه يا عقاااب
كل اللي كان متخيل لخلف هو ان عقاااب سبب رئيسي لرفض مضاوي
لكن الخبر نزل على عقال مثل الصفعه القويه ارتخى صوته بصدمه وقال : وشووو وش اقول انت وش رفضه ووش خربطته ! والدفتر اللي جبتوه موقع وش سالفته!؟ ومضاوي ماهي موافقه! شلون يعني
خلف :تسألني انا أسال نفسك
عقاب بغضب: لا انت سحرك هالضاري رسمي ! وش مصلحتي اخلي مضاوي ترفضه
خلف : ابد عشان اعز انسانه لك ما تكون على ذمة اكرهه شخص لك
عقاب : خليييف انجنيت انت وش تخربط ، خذني على قد عقلي وقلي وش السالفه
خلف : ابد طال عمرك عمتك المصووون بعد ما عشمنا الرجال وناديناه وكتبوا الكتاب وطلعت ابيها توقع وفجأه قالت انا ما ابيه وانا تسرعت وانا مصيري معه مجهول
انصعق عقاب اللي مهما كرهه ضاري مستحيييل يعيشه هالموقف ابد
وكمل خلف بغضب: والله ياعقاب لو ادري انك سبب في هالشي ولا قلت لها شي والله حزتها بتشوف زعلي كيف بيصير
عقاب : ياااامرييض انا مالي شغل ولا كلمتها ابد غير اني قلت لها اذا بتسألين عن شي اسألي خلف وغيرها ما تدخلت ولا فتحت فمي بحرف واحد وبعدين انا ايييه ما احب ضاري لكن انا مستحيييييل اسوي هالسوات مستحيل
ابعده خلف وهو يقول : الموضوع مشى ومضاوي بتكمل وتشوف قراراتها وتحملها وانا مستحيييل ادخل على ضاري واقوله عمتي الخبله ما انتبهت تفكر الا الحيييين وعشان كذا بتزوج ضاري
عقاب : نعم!!!! بتجبرها !؟
التفت له خلف بغضب: شووف لو اني اشك مجرد شك ان مضاوي بتكون تعيسه مع ضاري او يضايقها بكلمه وحده وينكد عليها كان قلت له توكل على الله بس ضااااري رجال بمعنى الكلمه وبيصون الامانه ومضاوي معه بأمان وبكره اذا تزوجته بتشوف ان قرارها غلط
قبل يعترض عقاب او يقول شي راح خلف وهو يقول: اذا ودك تروح معي تجهز موضوع مضاوي منتهي
في هاللحظه طلعت ام ضاري له ورجعته للدنيا اول ما ضمته وقالت: مبرووووك ياحبيب امك كانت كلمتها بسيطه لكن طلعت ضاري من اعماق الصدمه والاحباط وفي لحظة حس ان دااخله فررراااغ كبييير مايدري وش يسوي فيه كان وده يرمي كل شي معه ويرجع ويطلق مضاوي كان وده ينهي الموضوع كله قبل يبدأ وينهي نظرة الاجبار والشفقه وهو مايرضى يتزوج وحده غصبٍ عليها لكن مجرد ما ابعدته امه ومسكت ذراعه تستند عليه كان هذا بمثابة قيد قيد يدينه وقيده من اي تصرف وخضع مايدري وشوله خضع وطلع مع امه وشاف خلف جاي له مبتسم ويقول : مبروك ياخالتي الله يفرحك بضاري وتشوفين عياله وعيال عياله
ام ضاري اللي ابتسمت بحب : ياعله اميييين ياوليدي وياعله ربي يفرح اميمتك فييييك وتفرح بعمرك يا أميً
ولفت تناظر عقاب الواقف من الذهول بعيد ما قدر يقرب وهو مايدري وشو سبب رفض مضاوي لكن مسأله انها مجبره ! صعب يستوعبها وخصوصاً انه مايدري كيف يناصرها وهو من جدية خلف عرف ان المووضوع صعب صحى من دوامة التفكير على صوت ام ضاري تقول : عقبالك انت بعد يا عقاب وعسى عينك تقر وتفرح باللي تسر قلبك وخاطرك
رغم ان هالدعوات متكرره ويسمعها عقاب من الكل لكن في قلبه نقطة ضعف اتجاه ام ضاري مايدري ليه يحب هالانسانه مايدري كيف انها قادره تطمن قلبه بدعواتها الحلوه ابتسم لاشعورياً لها
وقبل يرد قال ضاري: يلا فمان الله
خلف : ضاري بتروح معنا !؟ ضاري اللي ماكان له نفس شي رد بسرعه وقال: لا والله تسهلوا
ما حب خلف يكثر لانه يحس انه متفشل من ضاري وخجلان ورغم انه ماعرف بالنسبه لخلف
اخذ ضاري امه وابعد وهو يسمعها تسولف له وتقوله انها ماشافت مضاوي واكييد ان مضاوي خجلانه
واكيد انها ماقدرت تطلع من الحياء
لكن كان ضاري ممكن يصدق هالكلام لو كان ماسمع خلف وعقاب لكن اول شي طرا بباله بعد هاللي صار " ان مضاوي ماطلعت متحاقرته ومستضعفته هو وامه "
وعلى الاساس بقى ساكت مايدري وش يرد ووش يقول
_______________________.
في بيت ابو خلف
وصل مبارك وينادي وعد تروح معه وطلعت وعد بسرعه لانها متضايقه من جو البيت ومن مضاوي واللي صار
ركبت بهدوء بدون صوت وجلست بصمت والتفت مبارك: وش بلاك ردي السلام ترا ماحنا يهود
لفت تناظره بضيق وقالت: سلام عليكم
مبارك : وعليكم السلام! خير وش فيك ضايق صدرك
وعد: ولا شي مصدعه بنام
كانت ردود وعد غاضبه غير العاده وكان هالوضع بالنسبه لوعد طبيعي لكن بالنسبه لمبارك توقع انا عرفت او حاسه انه امس جاب الشيخ يقرا عليها وعشان كذا ألتزم الصمت
وصلوا البيييت ووعد مضغوطه و تعبانه وبما انها مالها خلق مبارك والحرب معه قررت انها تاخذ لحافها وتنام بالمجلس
ادرك مبارك الوضع اللي في باله وقال بتردد: وشوله ما تنامين هنا ترا ماني ماكلك
وعد: مبارك يرحم اهلك راسي بينفجر ومخنوقه ومالي خلق هواش وصيحه ولو بجلس دقيقه هنا بيصير شي ما ترضى عاقبته عشان كذا ابعد احسن
طلعت ووقف مبارك مذهول وهو رسمياً صدق مسألة الجن واقتنع فيها وقرر يهجد فتره لين هي بنفسها تقتنع وتقضي
_______________________.
في بيت الجد
دخل عقاب وهو يشوف البيت قايم وقاعد والكل مبسوط باللي جابته ام ضاري لمضاوي التفت يدور مضاوي وما شافها
ولف على شهد: وين مضاوي!
شهد: راحت تنام هاللي ماعندها نظر
عقاب بغضب:الله اكبر صرنا ما نستحي
شهد تفشلت: وش قلت امزح
هيا:وش فيك عليها تمزح
ما رد عقاب اللي اخذ طريقه لغرفة مضاوي بيشوف وش صاير دق الباب ودخل وشافها جالسه واول ماشافته وقفت
دخل وهو يسكر الباب بهدوء وملامح الغضب على وجهه مرسومه
مضاوي عرفت انه عرف بس ما فهمت ملامحه قرب عقاب وهو يقول: وش هاللي صار وسمعته!
مضاوي : وش سمعت !؟ عقاب : رفضك لضاري !
مضاوي نزلت راسها بضيق: وش بيدي اسوي ماني مرتاحه
عقاب : وش استفدتي الحين!؟ غير انك انجبرتي وانتهى امرك وشوله ما قلتي من بدري وليييه ما تكلمتي يوم كان القرار بيدك
مضاوي : استعجلت وكنت لاهيه في ناصر وزواجه
عقاب: مضاااوي الدنيا ماهي لعبه وهاللي سويتيه شين
مضاوي : وش فرق ما كنت تكرهه وما تبيه
عقاب: ما احبه اييييه لكن هذا مايبرر فعلتك كل شي الا انك تكسرين رجال وضاري رغم التضاد بيني وبينه قلت لك انه كفو وانه رجال وسبعين نعم
مضاوي بيأس: يعني ما انت مسوي شي ما رح تحل هالسالفه
رفع عقاب كتفه بيأس: وش بيدي اسوي ! خلف بيموت من القهر كلمه زياده بتفجره وعمي محمد مثله
مضاوي : يعني!؟ عقاب : كل اللي اقدر اقوله يا مضاوي انه لو اني شاك مجرد شك في رجولة ضاري ماسكت لو يهجرني خلف ومايكلمني عمره كله كنت خاطرت عشانك بس ضاري رجال
هاذي كانت اخر كلمات عقاب اللي طلع وهو بدا تأنيب الضمييير ياكل قلبه ولا يدري وش بيسوي
_______________________.
وفي بيت ابو خلف
كانت حوريه تناظر الكل وهو كارهتهم لكن اتجهت للتليفون وهي تسحبه من القاعده واخذته باتجاه غرفتها لكن وقفها فيصل اللي دعس على سلك التليفون وانفصل لفت تناظره بقهر: خيييييييير !؟ فيصل : خييير انتي وش بلاك تصايحيين
ندى: اقصري صوتك بيتنا عمره ماطلع منه صوت عالي لا تجين انتي في اخر عمره وتطلعينه منه
حوريه: شوفوا عاد وخروا عني عشان ما اقول لابوكم وش سويتوا وحزتها تعرفون وش بيسوي
وجدان:يمممه بنمووت خايفيييييين مره ! اول شي ابوي ماااااانع التليفون يطلع لاي مكان وانه يكون بالصاله وتحت انظار الكل
اماني ببتسامه: ودامك عندك خلفيه عن وشو ممكن يسوي ابوي فالاحسن ترجعينه مكانه بدون شوشرره
فيصل : وابوي مايحب اللي مايسمع الكلام
ام خلف وام وعد كانوا جالسين ببتسامه وساكتين نوعاً ما مبسوطين
لفت حوريه بكرهه ونزلت التليفون :هييين هييين
دخلت وتركتهم وهي مقهوره ولف فيصل ببتسامه:كفوو خواتي
حنان: ياويلكم من ابوي
ندى: لايا حبيبتي لا ويلنا ولا شي والبادي اظلم
سكتوا على دخول خلف اللي للحين غاضب وزعلان والتفت لحنان وقبل ينطق كلمه فزت امه بخوف اول مالاحظت على وجهه علامات نوبة الربو وقبل توصل له لفت الدنيا فيه اول ما اختنق وجلس بكل حيله على ركبته وركض فيصل يمسكه والكل وقف بعيد خوف على خلف انهم يقطعون عنه الاكسجين وركضت وجدان تجيب ادويته والكل خايف ويسمي عليه وامه كالعاده رغم تكرر الموقف اللي المفروض تتعود عليه لكن مازالت كل ماطاح خلف تموت من الخوف وتنهار تبكي
كان خلف يحاول يجمع انفاسه لكن ماهو قادر المسموع من صوته هو صفيير اللي يطلع من صدره ويخنقه
ركضت وجدان تعطيهم البخاخ وركضت امه تحاول تلحقه فيه وبعد ٥ مره بدت تهدا النوبه وبدا خلف يرتخي شوي وترتخي اطرافه
مسحت ام خلف وجهه بقطرات مويه وهي تناديه: خلف امييي بسم لله عليك يا ولدي وش فيك ياحبيبي وش صار خلللف تسمعني ياحبيبي
مد خلف يده لها يطمنها انه بخير ويسمعها لكن يبي يرتاح شوي من الشعور الخانق اللي كل مره يرسم الموت بين عيونه
الكل طلع وصار حوله بما فيهم حوريه اللي طلعت مستغربه وانصدمت باللي شافته
وبعد عشر دقايق بدا خلف يتحسن ووقف بمساعدة فيصل
ام وعد: بسم لله عليك وش فيك
خلف بصوت تعبان: مافيني شي مافيني شي
ام خلف: من غثك الله يغثه وش فيك يمه قولي
خلف : مافيني شي يايمه لكن اماني جهزي اغراضي رايح للكويت
ام خلف شهقت: بترووح وانت تعبان
خلف : انا بخيير ومعي عقاب مارح يصير لي شي
ام وعد : ياخلف ياولدي خلها يوم ثاني انت توك صحيت من نوبه اخاف يجيك شي
خلف : لا لا ما فيني شي
فيصل: خلني اروح معك طيب
خلف : لااااا وين تروح وتخلي اهلك وخواتك
فيصل : ابوي فيه
خلف: ابوي هالايام وضعه ماهو تمام ومايصير نغيب كلنا
ندى: طيب كل شوي اتصل علينا وطمنا
خلف : ابشري ابشري
حنان: انا بجهز اغراضك واحط كل ادويتك
خلف: طيب
ام خلف : خلني اقرا عليك يمه الله يحفظك
استند خلف كالعاده على حضنها وهي تقرا عليه وهو من قهره من مضاوي وعليها مايدري وش يسوي بنفسه
_______________________.
وعند ضاري
اول ما وصل بيتهم شاف كل حريم الحاره ينتظرون امه يبون يباركون لها دخل امه وهو يرد لهم التباريك بضيق وطلع هايم على وجهه كان المغرب والدنيا مظلمه وقف عند المسجد اللي قالت له امه انها حصلته عنده استند عليه وجلس على احد جدرانه وهو ضايقه فيه الوسيعه مايدري وين يروح وقال يجلس عند هالمسجد يمكن اهله اللي رموه يرجعون ويدورونه ويحصلونه ويرحمونه من هالعذاب اللي اكل قلبه وانهاه وكيف يبي يعيش وهو عارف نظرة مضاوي له كيف بيتحمل كان وده يقوم ويروح بيتهم ويطلقها لكن عجز يخون ثقة خلف اللي حطها فيه وارغم عمته ومحمد بعد وحتى امه عجز يكسر فرحتها وفي داخله يقول ( وش الجديد يا ضاري!؟ جازت لك الحياه الحلوه والراحه ونسيت طعم الشقاء والكدر لكن مردك له وهاذي هي نهايتك مهما حاولت )
وقف ينفض الغبار عنه وينهي هالحزن اللي سيطر عليه لكن للحين مايدري وين بيروح
_______________________.
وفي بيت نادر
رجعوا بعد هالحفل البسيط وكانت شوق تسولف لنادر عن فرحة ام ضاري فيه وكيف انها ما جلست ابد ترقص وتغني وتزغرط
ابتسم نادر بحب وهو يقول : عسى الله لا يكسر فرحتهم وعساها يارب دايمه
شوق: اميين
اعتدل نادر اول ما تذكر انه بيروح مع خلف : شوق جهزي اغراضي شوي بيمر علي خلف وبروح معه
شوق اللي ضاق صدرها اول ماقال انه بيسافر وهاذي اووول مره يبعد عنها نادر وبان الضيق بوجهها وقالت: كم يوم بتجلسون
نادر اللي انتبه لضيقها لكن ماحب يعلق عشان قلبه ما يتعلق وحزتها مستحيل يروح : اذا قضينا من شغلنا
شوق: الله يردكم سالمين
نادر: امين
راحت تجهز الاغراض بهدوء وهي من جهه شايله هم ام نادر ومن جهه شايله هن روحت نادر عنها
ونفس الهم شايله نادر اللي خااايف من اهله اكثر من اي شي ثاني
_______________________.
في بيت مبارك
بعد ما تاكدت وعد ان مبارك نام اخذت التليفون تبي تتصل بأهلها وتتطمن لكن سبقها ماجد اللي دق ورفعت التليفون : الوو
ماجد : يا مرحبا
ابتسمت وعد بحب : هلا خالي وشلونك عساك بخييير
ماجد : بخير عساك بخيير انتي شلونك
وعد: حمدلله
ماجد: اجل عطيني البشاره
وعد : ابشر بها
ماجد بحب: قبلوك المعهد وان شاء الله هاليومين تبدين لكن هااااه لا تكنسلين هالمره لان بتطير الفرصه عليك مرره
فزت وعد بفرح: ووالله واللله يااااااااربي لك الحمد تبشر والله بأحلى بشاره
ابتسم ماجد : بشارتي انك تضبطين لي الموضوع اللي انتي تعرفينه
وعد هبطت فرحتها بس قالت: ابشر
ماجد : شكلك تعبانه وبتنامين
وعد : شوي
ماجد: زين يلا اخليك
سكرت وعد وهي محتاره في سالفة ماجد وسحر وكيف بيحلونها اذا عقاب مناقرها ومناقر ماجد معها كيف تبي تحلها
لفت على صوت مبارك اللي طل: مو على اساس تنامين
لفت وعد وصاار وقتها انها تثبت كلمتها وتدخل المعهد وتدرس وقفت بثقتها المعتاده واتجهت له وابتسمت ابتسامه عذبه وقالت : الا بس وصلني خبر فرحني
مبارك: والله وشو هالخبر
وعد بنفس الابتسامه اللي تعرف تأثيرها على مبارك قالت بصوت واثق : انقبلت بالمعهد وهاليومين ببدأ
مبارك:وشووو !
وعد: اللي سمعت ومو احنا اتفقنا!
مبارك: ايييه بس تونا متزووجين مايصير
ابتسمت وعد : يصير يا مبارك يصير
سكت بمبارك اول ما تبادر لمخه انه مايقدر يعارضها خوفاً من تكرار الحادثه اللي صارت له وثاني شي لان الفرج بالنسبه له قرييب
وعد : موافق اكيد
مبارك: زين زين على ما تبين بس اتفاقنا قايم
وعد : اكييد
ابعدت بسرعه وهي تحلم بهالمعهد وبالدراسه