『قٌصص ﺑٱرۅد』

⍅ الغلط ما يتصلح بغلط ثاني ⍆

ألسلام عليكم متابعيني الغوالي
اشلونكم انشالله كلكم زينين
جبتلكم قصة جديدة اليوم
اتمنى تعجبكم ولا تنسون التصويت والتعليق ❤️

عنوان القصة الغـلط ما يتصلح بغـلط ثاني

┄❈❥

اشتغلت بالحراسات عن طريق واحد من معارفنه الحراسة مالتي ببيت بس هو مذخر مال ادوية چبير بوحدة من مناطق بغداد ، المذخر موقعة صاير بنص منطقة سكنية بس هم اكو عمارة لو عمارتين بصف المذخر ، العمارة اللطش بالمذخر بيها قيصرية صغيرة و جوه اكو محلات اربعة ثنين منهم مكاملات و ثنين منهم خلصانات و مفتحيهم .

الاول محل صالون نسائي و الثاني محل ملابس نسائية احنى بالحراسة مالتنا مچنى نگعد بداخل البيت الي مسويه مذخر لان ابو المذخر مگعد عائلة خطية ماعدهم امكانية يستأجرون بيت و فوگاها ماعدهم رجال مرية و بنات ثنين و طبعا هالشي يدري ابو المذخر و صدفة عرف بي (اقصد على وگفتنا بره) ..

فد يوم اجه بليل و شافنا برة و گلناله عمي احنى شغلنا حراسة و اذا تنباگ من مذخرك سرنجة (يعني ابره) احنى محاسبين بيها بس يرحم حليب اهلك لا تحاسبنه وين نوگف لو وين نخلص واجبنا .. لح علينه بالسؤال و گلناله هيچ السالفة وهذولة خطية من نطب جوه ينحصرون بالغرفتين الي گاعدين بيها (لان هو منطيهم غرفتين وحمام) و خطية همه يحبون يگعدون بالحديقة

الحاصل .. الرجال قدر وضعنا و گال خلص وين متريدون توگفون اوگفو بس ديربالكم من لا ينباگ شي و ديربالكم لا الناس تشتكي من وگفتكم لان هاي منطقة سكنية ..

گلناله لا عمي من الناحيتين ارتاح ، وگفتنه چانت متأثر على الساكنين بالمنطقة ابد لان احنى محترمين نفسنه كلش و منريد شي من رب العالمين غير الرزق .. و شي ثاني ثنيناتنا الواگفين برگبتنا عوائل يعني لا نگول مزعطة و نباع ع الرايحة والجاية و لا نگول جايين نلهي نفسنا بهل الشغلة و ممحتاجيها ..

المهم ..
فد يوم مثل كل يوم گاعدين اني وصاحبي بره عدنا كراسي نخليها ع الحايط و نگعد نسولف جتي سيارة طبگت و نزل منها واحد ، الواحد من نزل من السيارة فتح الصندوگ و طلع شغلة و سده ..  و عاف سيارته مشتغلة و باب السيارة مفتوح و فات للقيصرية .. نزل و ما سلم علينه و گبل فات ..

احنى عادي شفناه و عبالنا رجل ام الصالون اخوها ، ابنها ، لان بس الصالون چان مفتح بساعتها .

مطول نص دقيقة چان يصير صياح ركضنه نباوع لگينا ام الصالون بس مگلوب لونها احمر هدومها و شعرها كله احمر طبعا اني متأكد ياهو الي يشوف الحاله من بعيد عباله دم بس من تقربنا شفنا الجامة مال الصالون والباب و حتى التبريد مال صالون كله احمر و من الريحة عرفنا هذا صبغ ..

المهم ام الصالون مچلبه بي و تگله عوفني خلص وهو هم صار احمر من ايدها لان مچلبه بهدومه مفتهمنه شنو السالفة و جرينا و حاولنه نطلعه بره القيصرية ..

اشو هذا گام يشمر علينه و يغلط و غلطه كله على اهلنا و على شرفنا ، طبعا من كمية الغلط الي غلطها علينه ما اتوقع اي واحد يسمع هالغلط ويسكت بحيث باوعت على صاحبي الي وياي وگلتله انعل ابو الشغل ها ؟
گالي انعل ابو الشغل خلي نبطل بس هذا يغلط على امي وامك ..

هالحچي اني مچلب بي وداجرة وهو يغلط عليه وعلى صاحبي وكل شوية يندار على ام الصالون هم يغلط و كله مثل مگلت (بالقلم العريض)

المهم دبغناه ، دبغنا صوت و صوره ، مخلينا لا چلاق لا بوكسي لا دفره لا عكس شبعناه طن كتل و سحلنا ذبينا يم السيارة ركب سيارته بس بالگوه و اصلا ما بي حيل يغلط علينه من كثر الكتل الي اكله و چان يرجع عالبك و ضرب العامود الي بالشارع و فتح الجامة گال راجعلكم و شحط سيارته وطار .

اني وصاحبي شاهد الله مخفنه من كلامه و اصلا احن مو من النوع الي يخاف غير بس على رزقه وهنا مربط الخيل ..

گعدنا يم الحايط وهدومنا صبغ وريحتنه صبغ و واحد يباع ع الثاني ، گلتله هسة وين نشتغل لان حي ع الصلاة وره هالهوسة راح ننطرد طردة اصليه ، گال يمعود عوفها على الله و بعده ممكمل حچايته   طلعت ام الصالون بس خطية كلها صبغ مثلنا ..

گالت هذا الي ميستحي طليقي لاحگني وين ما اروح و يعرف ماعندي احد يوگف بوجهه و اشتكيت عليه اكثر من مرة بس عنده معارف و مدبر حاله و لاحگني مو علمود يرجعني اله بس لاحگني علمود يضوجني و يطهگني بعيشتي ماعرف شيريد اصلا اني گاعده بالمحل داشتغل بنية باچر حنتها و سمعت صوت انطش ع الجامخانة ، فكيت الباب ع السريع لگيته شايل قوطية مال صبغ و كملها عليه لزمت ايده و ضربني و انتو جيتو بعد شفتو الي صار ، مشفتو انتو من اجه بالسيارة ؟

گلنالها شفناه و شفناه نزل شي من الصندوگ بس يابنت العالم شمعرفنا شراح يسوي عبالنا اخوچ لو رجلچ لو واحد جاي ياخذ الزبونه الي يمچ قابل نشتم ايدنا يرحم اهلچ

گالت حقكم والله واسفه و مسحوها بيه باوعت على هدومها و ضحكت گلتلها وين امسح هو بقى بيچ مكان ما بي صبغ ؟! ضحكت هيه بس الدمعة بعينها ..

و طگتها بچية گالت انتو اخوتي والله و كفيلكم الله ترى الصالون فتحته وره ما اتداينت من كل واحد اعرفة وكل الي ردته اعيش بكرامة و ما اطلب من احد شي و يسمعني حچاية ويگلي لعد ليش تطلگتي ..

گلنالها الله يكون بعونچ .. گالت والله العظيم الي شفته منه مشافه بشر ضرب واهانة و غلط كرهني بشي اسمه زواج و شي اسمه رجال و الحمدلله مصار عندي جهال منه .

گلنالها يابه خلص روحي لان اذا الناس تشوفنه هسة شتگول كلنا حمر انوب اخاف عبالهم دم .

تشكرت منه و راحت بعدين اجوي الناس اهل الزبونه الي يمها اخذوها واخذو الزبونه وراحو
الظاهر الزبونه انقهرت عليها بعد الي صار و سمعت حالتها و اخذتها رجعتها لبيتها ..

احنى بقينه گاعدين وخلصنه شغلنه و ثاني يوم الصبح من اجه ابو المذخر حچيناله كلشي ..

ابو المذخر هم رجال على باب الله و يخاف على رزقه يعني هذا طليقها اذا اجه و سواله مصيبة بالمذخر هم خطية .

گال انتو ولدي و وگفتكم هاي وگفة زلم بس بصراحة ما اگدر ابقيكم هنا بالشغل لان هذا اكيد راح يرجع وتكبر السالفة گلناله خلص عمي واحنى هم منريد اذيتك ..

گال عندي شغل الكم بس مو ثنينكم سوه تقبلون ؟
گلناله عادي ماكو مشكلة المهم شغل ..

و شغلني اني بمكان و صديقي شغلة بمكان ثاني اني اشتغلت بمجمع مال اطباء و صديقي شغلة سايق يم واحد ابو كهربائيات جملة ..

شغلي بالمجمع مال اطباء هم حراسة و بديت بشغلي الجديد و الحمدلله چانت شغلة زينة  و الداير مدايري كلهم زينين و محترمين و بيوم من الايام جتني نفس البنية ام الصالون من شفتها عبالي صدفة جايه عدها مراجعة على طبيب
بس عرفت هيه جايه عليه بعد محچيت وياها ..

گالت انت و صديقك من وره راسي طلعتو من شغلتكم و فوگاها تفرقتو كل واحد بمكان گلتلها لا والله هاي ارزاق و نفس الي اخذه هنا چنت اخذه هناك و سألتها منين اندلتني گالت من شفتكم ماكو رحت على ابو المذخر سألته و خطية دلاني مكانك ، عندي شغلة الك كلش زينة و متحتاج بعد تشتغل يم احد .. گلتلها شنو ؟

- اني عندي كم فلس جوه ايدي اريد اخذ بالفلوس سيارة و انطيها لواحد ثقة يشتغل بيها و يخاف الله بيه و يقسم قسمة عدل الوارد الي يطلعه من شغل السيارة ..

- زين اني هم مجمع كم فلس و خلي ندخل ثنينه شراكة بسيارة لان انتي بلسانچ كلتي حتى متحتاج تشتغل يم احد و بهيج شي راح اصير شريك وياچ بالسيارة و ما اشتغل يم احد مو لو مو مو ؟
- خلص موو ..

و گدرنه اني وياها ناخذ سيارة كيا و بديت اشتغل بيها و بنفس الوقت ادور خطوط بس اكثر شي فادني بهل الموضوع علاقاتها النسائية لان هي صاحبة صالون يعني سالفة زفة لو حنة لو خطوبة رئساً تخابرني و تگلي اكو كروة بفلان مكان ..

و مشت الحال و وارد السيارة چان خير من الله .. و فد يوم خابرتني گالت اكو خط مال طالبات للجادرية يوميا تاخذهم وترجعهم گلتلها ماشي و اخذت البنات بالخط ..

طبعا البنات الي وياي كلهم من نفس منطقتها للأم الصالون و مرة عادي مثل كل مرة رايح ارجع البنات من الدوام وسيارتين حصروني بشارع فارغ نزلو ست شباب من السيارتين والله العظيم اني كل تفكيري همه سلابة و كلت خلص انطيهم السيارة و لا يكتلوني بس هذولة شبعوني كتل و عرفت بعدين همه اخوة طليقها و ولد عمه لان چان وياهم هو شبعوني كتل و خلوني ازوع دم  و عافوني وراحو ..

رجعت للبيت و اهلي عرفو و عمامي جوي للبيت و اصدقائي و حتى الجوارين .. گالو هسة نطلع للصالون و ناخذ عنوان طليقها و بباب بيتهم نكتله و طبعا اني اعرف گرايبي زين ..

هذولة مو مال كتل و بسط وهاي هي هذولة من گالو نكتله يعني يخلصون عليه و بعدين جيب الفصل و ودي الفصل ..

مقبلت اني اوديهم على ام الصالون لان عرفت السالفة راح تكبر و هي خطية ابد مقصرت وياي و المرية بس تريد تعيش لا اكثر ولا اقل ، و اذا اوديهم عليها راح تنفضح المريه شنو رجال جايب وياه كومة زلم و سيارات و سلاح و رايح على ام صالون !!!!

من گلتلهم ما اوديكم گالو معناها انت عندك شي وي المرية و تخاف نروح على طليقها و نعرف كلشي گلتلهم يعني لان مقبلت ادليكم گمتو تطعنون بشرف المرية و طلعتوني ابن حرام و عندي علاقة وياها ؟

گالو لعد شنو تفسيرك جوي عليك و كتلوك و شبعوك جلاليق و متريدنا نرجعلك حقك !

گلتلهم عمي اني حقي متنازل عنه و راح افض الشراكة وياها و خلص اني اعيش بحالي و اخذلي كيا وحدي و هاي هي .. گامو يغلطون عليه و زعلو مني كلهم وعافوني وراحو ..

اتصلت بيها و گلتلها على الي صار گامت تبچي و گالت والله ماعرف شسوي گلتلها عمي انتي حلچ الزواج و بس .

گامت تضحك وگالت انت بيا حال واني بيا حال گلتلها هو انتي بيا حال لو اني المورم حاليا هههههههههههه ..

گالت اني جربت حظي مرة و خلص بعد ما اجربه ابد ..
گلتلها عمي گولي يا الله مو كل اصابعچ سوه و اني مستعد اتزوجچ و نعيشها ع الحلوة والمرة وشاهد الله عليه لو ما شفتچ بنت اوادم و مرباية و ابد ماعندچ يمنه يسرى مچان حچيت هالحچي ترى محسوبچ عنده نظره بالبشر لان گظيت عمري كله اشتغل منا ومنا و شفت اشكال والوان ناس و اعرف الزين من الموزين بنظره ..

گالت والله ماعرف شگلك گلتلها بابا اني اذا ازوجچ محد يگدر يفتح حلگه و طليقچ لان يعرف انتي ماعندچ ظهر گاعد يسوي هالشي و بالمناسبة اني متأكد مليون بالمليون اكو احد منچ و بيچ گاعد يوصله كل الي دسوي و انتي ام صالون يعني سالفتچ تحچين وتسولفين وي كل النسوان العرف و المو عرف واكيد حاچية لمعارفچزعلى سالفة الكيا و عليه .. گالت اي و هالشي طبيعي قابل مسوين شي غلط ؟

گزلتلها لا بابا مو قصدي بس قصدي هو يعرف الي ديصير و راح يبقى هيچ يخبث هالمرة عدت سلامات و القبلها عدت سلامات بس منعرف هالمخبل شيسوي وخلي ببالچ شي وحق الله و كتبه ورسلة لو هسة تدليني وين بيتهم اخذ عمامي و كل معارفي ونطشر راسه بباب بيتهم بس اني ماريد مشاكل الي اريده اعيش وانرزق وهاي هي

گالت زين نرجع لموضوع الزواج انت اهلك و معارفك و حتى انته مقتنع بسالفة تتزوج مطلقة و ام صالون بعد !

گلتلها ليش شنو الغلط بهل الشي ؟
گالت يعني نظرة الناس مطلقة وانت اصلا ممتزوج و تعرف حچي جماعتنا العراقيين عالصالون النسائي ، گلتلها يمعوده تره هذا مثل مگلتي حچي مجرد حچي ، الناس تحچي بكلشي و تنسى كلشي ..

گالت والله ماعرف ومن گالت والله ماعرف عرفت هي قابلة بس تخجل تگول و تقدمتلها رسمي وطبعا بالبداية شوية صارت معارضة من اهلي بس من شرحتلهم وجهة نظري و حچيتلهم ع البنية و اخلاقها و وگفتها وياي گالو خلص هذا مستقبلك و تزوجنا و گعدنا بنفس منطقتنه و الصالون فتحته هنا بس مو هي تشتغل بي شغلت بنية معرفة بي بنية ظروفها تعبانة و هي گعدت بالبيت لان صار عندي بنية من عدها ..

واني بقيت اشتغل بالسيارة و الحمدلله والشكر ماشية الامور  و طليقها بعد ابد مشفت جهرته بس اخر شي سمعت هو هم تزوج و استقر ..

ع العموم الله يصلح حاله ولو بصراحة مرات اتمنى اشوفه مو علمود اكتله و اسوي مثل ميسوي هو،  بس اتمنه اشوفه علمود اشكره لان هو چان سبب زواجي بهل الحبابة ..
و بنفس الوقت اسأل نفسي سؤال ..
لو !!
لو مثلا اخذت عمامي و گرايبي لبيت طليقها وعالجت الغلط بالغلط و طبعا حي ع الصلاة چان كتلنا بباب بيتهم كتل موت .. چان شصار ؟
چان حلوها عشيرتي بفصل بس اني متأكد مراح تنتهي السالفة وهم واحد من عشيرته وره ما تهدي الامور و حتى لو تمر سنين مراح ينساني و راح يجي يكتلني  و عمامي هم مراح يسكتون و على هالرنه طحينج ناعم ..

بس احمد الله بذيچ اللحظات فكرت بهل المسكينة و مقبلت ادليهم المكان .. لان چان هسة لا اني متزوج و مستقر ولا هي مرتاحة و لا خلصانة هالسالفة ..
و اخيرا الحمدلله على كل حال ..

( الغلط ميتصلح بغلط ثاني)
انتهى
رأيكم؟