الطالبه والضابط

البارت 40

نبدأ بذكر الله : بِسْمِ اللَّـهِ الرَّحْمَـٰنِ الرَّحِيمِ

روايــــــة :- الطالبه والضابط

بقــلمـي :- الكاتبه توته

مرات احس روحي انطفت
من تشتغل حنيتي
واشتاگ ودموعي مطر
ومناشغ ودخان تارس ريتي

كاظم شاكر.

.➛ ✿✿ ✿✿ ✿✿ ✿✿ ➛.

فتحت الباب وجانت الصدمه نارين گاعده بزاويه الغرفه وضامه رجليها علئ جسمها وترجف رحت اركض عليها سحبتها علئ حضني

_حبيبتي نارين شبيج يروحي شنوو صار ليش هيج حالتج

رفعت عيونهاا عليه حمررر ومنفخات ضاهر شابعه بجي دفعتني بقووه ماعرَفتّ شنوو من قوه عدها رجعتني ليورا انصدمت من تصرفها

حجت بنبره موو صوتها لا مستحيل تكون نفسها حبيبتي نارين جان صوتها خشن حيل وعيونها فاتحتهن علئ وسعهن .

نارين : اطلع براااا ماريد اشوفك روووووح مناااا روووح اطلع

_نارين شبيج

نارين : كتلك اطلع براااا رووووح ماريدك روووح

بقيت صافن احس عقلي وكف عن التفكير شبيها ليش هيج تصرف شنوو هل كلام كلشي تخربط عندي رجعت عليها سحبتها علئ حضني ابوس براسها واحاول اهديها وهيه دفع بيه منزعجه

_اششش اهدي انتِ تعبانه خليني اخذج للدكتور يشوفج ماشي يلا حبيبتي كومي وياي خلينه نروح

نانروح: انتَ منو ؟

_شنووو انتَ منوو شبيج نارين حبيبتي هذا اني ضرغام زوجج حبيبج شنوو نستيني شبيج باوعيلي نارين

نارين : ضرغام !!

هزيت راسي الهاا صارت تباوعلي بنظرات غريبه تگلبت عيونها وصارن بيض اغمه عليها وهيه بحضني.

تخبلت ماضل عقل براسي شنوو هذا شديصير بيها صرت اضرب علئ خدها واحاجيها مترد عليه

_نااااارين حاجيني بوووويه ناااارين افتحي عيونج حبيبتي لاتعذبيني بيج حاجيني نااارين

صارت متتحرك شبه الميته شلتها بسرعه ونزلت بيها خليتها بالسياره واخذتها للمستشفئ

طول الطريق ماتحركت اباوع عليها واحس روحي احترگ

ياربي دخيلك شبيها شصار وياها

وصلت بسرعه للمستشفئ نزلت شلتها ودخلتها اخذوها مني للطوارئ بقيت منتظر خبر عنها اتصلت علئ امي.

_الوو

ام ضرغام : هاا يمه ضرغام شلونكم

_موزين يمه موزين كلش

ام ضرغام : ياستار شبيك يييمه شصاير خوفتني بيك شيء

_نارين يمه

ام ضرغام : شبيها !!!

_مادري متخربطه وحالتها موو طبيعيه ابدد جبتها هسه للمستشفئ فاقده شبهه الميته

ام ضرغام : صخام بوجهي شجاها من اجيتونه جنهاا ورده شصار فهمني

_اني هم دايخ مَآعِرَفتّ شبيها وليش هيج حالتها تعاي يمهاا يمه

ام ضرغام : هسه راح اگول لبوك يجيبني عليكم لاتخاف عليها انشاءلله مابيها شي حبيبي .

سديت منهاا شويه وطلعت الدكتوره من غرفتها رحت بسرعه عليها اشوف شنوو وضعها

_هاا دكتوره بشري شلون حالتها

دكتوره : مابيها شي كل فحوصاتها سليمه بس هابط عدها الضغط ومتخربطه هيج

_شلون مابيها شيء تخربطت وفقدت بين اديه وماتتحرك وخايفه حيل

دكتوره: هاذي تقاريرها تكدر تتاكد منهم.

اخذت الاوراق من ايد الدكتوره وبقيت اقرا بيهم مابيها شي لعد الي صار شنوو معناه ؟

ليش هيج حالتها اذا هيه مابيها شي تخربطت افكاري وماعرفت شلون اتصرف

_اكدر اشوفها

دكتوره : اكيد بس حاول متخليها تضوج لان بعدها حالتها ممستقره كلش لازمها راحه

هزيت راسب بأي عفت الدكتوره ورحت دخلت علئ نارين لگيتها كاعده وتعصر باديها صايرات حمر شافتني وبجت دمرتني بدموعها

رحت بسرعه عليها وحضنتها علئ صدري بستها من راسها بقوه

_شبيج يراحتي شبييج فهميني شجاج شصارر وياج ليش هيج تخوفيني عليج

نارين : ضرغام فدوه ساعدني راح امووت راح يخنكني شوفه هذاك واكف وراك شووفه

_منوو هوه غير افهم شبيج شنوو هل تصرفات

نارين : هذاك هذاك شوفه وراك

درت وجهي ماكوو شي شبيها نارين معقوله تخبلت !!

تتخيل اشياء مموجوده شصارر شنوو الوصلها لهل حاله هاي.

_اششش اهدي ماكوو شخص هناا اني يمج لاتخافين من شي اني هناا ماعوفج حبيبتي اهدي

نارين : لاتعوفني وياه يريد يخنكني يبعدني عنك

_مراح اسمح لشخص يبعدج عني انتِ حبيبتي وروحي ارفعي راسج خليني اشوف عيونج

دفنت راسها بصدري وهيه تبجي هزت راسها برفض ضميتها لصدري بقووه واني احاول اهديها شويه

_اهدي بويه اهدي كافي تبجين راح يوكف گلبج

نارين : بس طلعه فدوه والله اخاف منه يخوف شوف شكله شوفه شلوون يباوعلي خلي يرووح فدوة طلعه

_باوعيلي ارفعي راسج

هزت راسها برفض شلت راسها بصعوبه عني ركزت بعيونها المليانه دموع

_ماكوو أي شيء هنا لاتخافين اني وياج ماسمح الأي مخلوق يأذيج مستحيل انتِ روحي تعرفين شنوو رۅحـي اذا يصيرلج شيء اني اموت والله

صارت تباوعلي وهيه تشهك ودموعها تنزل شلالات علئ خدودها

نارين : ضرغاااام واكف وراك انتبهه انتبهه

سحبتني عليها بقوه وكفت صارت كدامي خلت ايدها عليه وصرخت

نارين : رووووح الله يخليك لأتاذي ضرغام عوووفه رووح منااا اطلع اطلللع

بقيت صافن من كلامها سحبتها علئ حضني واني احاول اهديها بكل طريقه بس ماكوو فائده

_اششش كافي كافي اهدي شبيج تخبلتي شنوو هل حجي شبيج

نارين : وخرر عني روووح اطلع منااااا عوووفني وخر عنيييي رووووح

صارت دفع بيه وهيه تصرخ وتبجي دخلت دكتوره تركض علئ صراخها شافت حالتها بقت صافنه

_سووووووي شيء شنو شغلكم هنااااا

طلعت تركض من الغرفه ماعرف شنوو راحت تجيب نارين مستمره تصرخ وتبجي دمرتني احس گلبي انمرد مرد عليها

شويه ودخلت الممرضات ولدكتوره حاولو يزموها ماخلتهم

_اششش اهدي حبيبتي اني يمج ماعوفج لاتخافين نارين باوعيلي بابا كولي يالله كولي يالله

نارين : لااااا عوووفني ضرررغام خليهم يطلعووون طلعهم خلي يعوووفوني

لزمتها عليه واشرت الهم حته يعوفوها تهدئ شويه ويضربوها ابره مهدئ

_تعاي بويه خلينه نكعد رتاحي شويه هسه اخليهم يطلعون كلهم

نارين : ماااريد مااااريد خلي يطلعووون روووحو ماريدكم روووحو

_اهدي شويه هسه راح يطلعون هسه بس اهدي كافي يلا رتاحي

دفنت راسها بصدري وهيه تشهك كلبها راح يوكف كدد مابجت وصرخت

كعدت علئ السرير وهيه بحضني لازمتني متقبل تعوفني اشرت للدكتوره تجي تضربها ابره

اجت بهدوئ لزمت ايدها وضربتها الابره بقت شويه وحسيت بيها غفت بحضني بعدتها عني شلتها وخليتها تتمدد علئ السرير

:: مستحيل حالتها موو طبيعيه ابدد مجاي افهم ليش هيج تخربط وضعها وصلت لهل حاله

_دكتوره تصرفي شوفي شبيها ليش هيج حالتها ليش تصرف هيج

دكتوره : راح اسويلها تخطيط لعقلها اخاف صاير عدها مرض نفسي او انهيارات عصبيه لازم نتاكد

_مرض نفسي ؟

دكتوره : اي مرض نفسي حالتها مو طبيعيه ابدد وتصرفاتها تدل انو هيه مو بعقلها هسه او ماره عليها صدمه ومخليتها بهل حاله.

_ياالله دخيلك الهي

طلعت الدكتوره درت وجهي عليها اشوفها شلون تشهك وهيه نايمه احس روحي دمرت

_اااخخ ياشلعان گلبي اااخخ شوكت نرتاح اني وياج

بستها من راسها بهدوء وعفتها وطلعت من الغرفه شويه وصل ابوي هوه وامي.

ابو ضرغام : خير بويه شبيها مرتك

_والله ماعرف شگول

ام ضرغام : ولك يمه احجي وكفت گلبي شبيها شصار وياها

_نارين متخبله مدري شصـاير بعقلها تصرخ وتحجي كلام ممفهوم ابد دكتوره سوت الها تحاليل تكول مابيها شي بس الي يشوف حالتها ينصدم كلش لان وضعهاا حيل تعباان

ام ضرغام : صخام الصخمني شجاها من اجيتونه كلشي مابيهاا

_لو تشوفينها ليوم مايضل عقل براسج

ام ضرغام : هسه هيه وينها

_انطوها ابره مهدئ ونامت شويه

ابو ضرغام : خلينه ناخذها لدكتور خاص خاف هذول مايعرفون شبيها وتدهور حالتها اكثرر

_خليها ترتاح شويه واخذها اكيد ماخليها علئ ابر المهدئ والدكتوره كالت راح تسويلها تخطيط لعقلها خاف بيها مرض نفسي او انهيارت عصبيه لازم نعرف شنوو المرض الي موصلها لهل حاله هااي.

ابو ضرغام : مرض نفسي

_حالتها تدل علئ هذا الشي لأن تصرفاتها مو طبيعيه ابدد

ام ضرغام : اسم الله انشاءلله مابيها شيء لاتفاولون علئ البنيه هسه ترجع كلشي مابيها يمكن تكون تعبانه حيل وتخربطة

_الله كريم انشاءالله

بقينه كاعدين بالممر منتظرين شويه وسمعت صراخ نارين طالع من الغرفه رحت اركض دخلت عليها لكيتها شالعه المغذي

من ايدها وايدها تصب دم تارسه الارضيه دم تصرخ وتبجي عبالك شايفه جني كدامها شعرها ملخته وجهه صايرر احمر

نارين : طلعوووو لااااا اطلع عوووفني الله يخليك ضرررغام ساااعدني خلي عوووفني

رحت اركض عليها طلعت منديل من جيبي لزمت ايدها حته يوكف الدم

_اششش اهدي نارين اهدي شبيج بويه باوعيلي يروحي ماكوو شيء باوعلي اني لاديرين وجهج

دخلو ابوي وامي بقو مصدومين من حالتها وشكلها

ام ضرغام : بسم الله الرحمان شبيج يمه نارين

نارين : ماريدكم اطلعووو عوووفوني ماريدكم وخرو عنيييي

صارت تبجي امي علئ حالتها ابوي خله ايده علئ راسه وطلع من الغرفه اني احس روحي انتهيت ماعرف شون اتصرف ترجف بين اديه مثل السعفه دموعها تكول شلال

_كاافي حبيبتي اهدي ماكوو شي تخافين منه اني هنا وياج ماخلي شخص ياذيج اهدي كافي بجي هسه الكل يطلع

نارين : شيطان انتَ شيطان عوووفني وخر عنييي

فتحت عيوني مصدوم من كلامها دفعتني حيل عنهاا وهيه تباوعلي بغضب صارت تردد كلمات غريبه عجيبه وكانو تحجي ويه شخص عيونها صارت تتكلب هاي ثاني مره تصير بيها تكلب عيونها ويصيرن بيض

اجت امي بسرعه سحبتها مني وصارت تقره عليها ايات وتنفخ بوجهه تخبلت نارين ودفعت امي بعيد عنها.

لزمتها من ايدها وضربتها راجدي قوي علئ وجهه وكعتها علئ السرير من ضربتها خمدت ماكامت بعد خوفتني اكثرر عليها

شلتها جانت مثل المصدومه من تصرفي بس هدت وحته مابجت بعد تحسها تجمدت

_اسف حبيبتي اسف ينبضي ماريد أذيج بس اريدج ترجعين لوعيج باوعيلي نارين يروح ونفس ضرغام لاتخافين اني هنا والله ماعوفج هسه تصيرين زينه هسه نشوف دكتور زين وتتعالجين.

رفعت راسها تباوعلي بتركيز تحسها تعاتبني علئ الضربه خلت گلبي ينمرد مرد تمنيت اكدر اشيل هل مرض عنها واخلي بيه

_لاتباوعيلي هيج كافي راح امووت والله

بلعت ريكها وهيه تشهك همست بصوت تعبان كلش

نارين : طلعني مناا اختنكت راح اموت طلعني

سحبتها علئ حضني واني احس الدنيا كلها ظلمت بوجهي اجت وكفت يمي امي وكالت

ام ضرغام : يمه مرتك مسحوره

درت وجهي عليها بصدمه

_شنوو مسحوره ؟

ام ضرغام : تصرفاتها وحجيها وهلوستها كلها دل انوو هيه مسحوره اني شايفه هواي نسوان يصيرر هيج بيهم هاي موو غريبة الشغله علينا

نارين : انتِ منو شتردين مني روحي اطلعي برا ماريد اشوفج روووحي

_هاي امي شبيج نارين

ام ضرغام : عوفها يمه البنيه موو بوعيها الدكتور مراح يفيدها بشي خلينه ناخذها لسيد يقره عليها

_شيقره فهموني تراا راح اتخبل والله

ام ضرغام : تعال اني افهمك برا

جنت اريد اطلع ويه امي لزمت قمصي نارين بقوه غمضت عيونها حيل وهمست

نارين : لا لا لا متروح

_ماروح اني يمج اهدي

ام ضرغام : رايحه احجي ويه ابوك لآزٍمٍ ناخذها لسيد يقره عليها

هزيت راسها بـ أي عافتني وطلعت كعدت يمها علئ السرير رفعت راسها عن صدري مسحت خدودها من الدموع ورجعت شعرها وره اذنها

_لا تعذبين گلبي بيج والله اموت بدونج تعرفيني شكد متعلق بيج واحبج

نارين : انتَ ليش هيج شكلك يخوف ليش تريد تأذيني

_اني أذيج مستحيل لاتخافين مني حبيبتي نارين نسيتي شكد احبج اني ومستحيل اخليج تتعذبين اني راح اعالجج ارجعلج صحتج ترجعيلي.

نارين : يخنكني لاتعوفني وياه

_اضمج بگلبي ماخلي شخص يوصلج والله بس اهدي

نارين : تعبت ضرغام

حجت هيج ونزلن دموعها مسحت دمعتها بيدي وبستها

_اشش مراح اخلي شي يتعبج اني يمج اني هنا

نارين :  راح اموت اختنكت والله اختنكت طلعني الله يخليك

_هسه نطلع اني وياج ونرجع لبيتنه

نارين : لا لا مااااريد ماريد ارجع للبيت هوه خنكني هناك يموتني والله هناك اموت اني ماكدر مارووح ماروووح

_خلص مانرجع للبيت اخذج لبيت ابوج تشوفينه وترتاحين يمه ماشي

نارين : اي بابا اريده هوه راح يساعدني راح يبعد هل شيطان عني

_شيطان ؟

نارين : شوفه هذاك يشبه الشيطان عيونه نار وجهه اسود

_اشش كافي كافي اهدي ماكوو شي استغفري ربج كولي يالله حبيبتي اذكري الله اقري المعوذات يلا خلينه نقراهم سويه يلا

بقيت اقرا بالمعوذات وهيه تقرا وراي خلت راسها بحضني ضميتها لصدري بستها من راسها وبقيت امسح علئ راسها واقرا عليها ايات  شويه ودخل ابوي وامي للغرفه.

ابو ضرغام : يلا خلينه ناخذها لسيد حمزه هوه راح يكدر يساعدها

_وهذا شنوو راح يسويلها ؟

ابو ضرغام : يقره عليها ايات وينطيها علاج

_ماشي

درت وجهي عليها اباوع عليها مغمضه عيونها ومتمسكه بيه حيل رفعت راسها عن صدري فتحت عيونها بهدوء تباوعلي شفتها ترجف وعيونها حمر من البچي مسحت خدودها من الدموع ورجعت شعرها ورا اذنها 

نارين : انتَ واحد شيطااااان اكرهك اطلع اطلع

_استغفرالله ياربي نارين حبيبتي هذا اني ماتعرفيني شنوو.

نارين : انتَ ليش تأذيني شتريد مني رووح

ام ضرغام : قِلَ أّعٌوِذّ بِربِ أّلَنِأَّّس مَلَګ أّلَنِأَّّس أّلَهِهِ أّلَنِأَّّس مَنِ شر الوسواس أّلَخَنِأَّّس أّلَذّيِّ يِّوََِّّسوَِّس فِّيِّ صٌدِوِر أّلَنِأَّّس مَنِ أّلَجِنِ وِأّلَنِأَّّس 

نارين : هشششش لاتقرررين لاتقرررين اطلعي براا اطلعيييي

_كافي اهدي خلينه نطلع مو تگولين اختنكت موو تردين ترتاحين يلا خلينه نطلع سويه 

نارين : ماتأذيني؟

_ماذيج شلوون أذيج وانتِ روحي يلا تعاي حبيبتي لاتخافين يعمري.

بقت تباوع علئ امي بحقد وكره لأن قرت عليها كامت وهيه مجلبه بقميصي

_عوفي القميص والزمي ايدي

هزت راسها برفض سحبتها علئ حضني طلعنه من الغرفه تلاكت ويانه دكتوره رفضت نخرجها بس اني كلتلها علئ مسؤليتي

صعدتها بالسياره وصعدت يمها سحبتها علئ حضني شويه هدت ومسحت دموعها صعدت امي بالصدر وابوي ساق السياره

شويه وحسيت بيها غفت شلت راسها عن حضني شفتها نايمه

_اووف ربي

ابو ضرغام : انشاءالله مابيها شيء هسه بس يقرا عليها السيد ترجع طبيعيه

_انشاءلله مثل متگول.

ام ضرغام : سوده عليه والله ماتستاهل الي يصير بيها عسها بحضه الي سوالها هيج

_منو معقوله يسويلها سحر ?

ام ضرغام : موو شرط شخص يسويلها يمكن انصابت بعين العالم عيونها ماترحم

_عين وهيج يصير بيهاا معقوله؟

ام ضرغام : ايي يمه هواي تصير تنصاب بعين ويصير بعقلها وتتخبل العالم عيونهاا ماتحرم ابد وتكتل الواحد مكانه

_اخخ ياربي واذا بقت علئ هاي الحاله شلون شسوي

ابو ضرغام : گول يالله بويه انشاءلله ترجع طبيعيه

وصلنه لبيت السيد ونارين بعدها نايمه خليت ايدي علئ شعرها همست الهاا بهدوئ

_حبيبتي نارين كومي بويه وصلنه

فتحت عيونها 3 مرات تفتح وتغمض بقت ترمش وهيه مركزه بعيوني بلعت ريكها وهمست بهدوئ

نارين : اني وين ؟

_كومي حبيبي

نارين : وين جايين احنه

_هذا دكتور راح ينطيج علاج تاخذينه وتصيرين زينه

نارين : ليش اني شبيه

_مو تگولين راسج يوجعج ودايخه جبتج الاحسن دكتور يكولون ينطي علاج قوي وراح يخليج تتحسنين

نارين : عمه عموو انتم هنا شجابكم

دارت وجهه امي عليها ابتسمت الهاا بهدوء وكالت

ام ضرغام : يمه تدرين بيه اني هم مريضه وعندي فقرات اجيت وياكم للدكتور يشوفني

نارين : هاا سوده عليه بعد لاتتحركين هواي موزين عليج.

ام ضرغام : انشاءلله يلا يمه خلونه ندخل

نزلنه سويه من السياره دكينه الباب فتحه ولد شاب سلمنه ودخلنه للبيت كعدنه بالاستقبال اول مادخلنه نارين غمضت عيونها حيييل وخلت ايدها علئ خشمها من ريحت البخور كامت تريد تطلع لزمت ايدها وكعدتها يمي

نارين : عوووفني اختنكت اريد اطلع

_اكعدي شويه هسه نطلع سويه

نارين : وخررر ايدك اختنكت داكلك اريد اطلع

دخل السيد واجه قريب من نارين لزمها من راسها صارت تباوع علئ السيد بنظرات حقد صار يقرا عليها ايات فجأه نطقت وكالت

نارين : مراح تگدر تسوي شي تلبستها اخذت حريتها كلها ملكي

بقينه واحد صافن بوجهه الثاني اول مره بحياتي يصير هيج شي كدامي معقوله صدك مسوالها سحر

حمزه : الكل يطلع خلوها وحدها

_بس

اشرلي ابوي براسه انوو نعوف السيد يشوف شغله ماكدر اعوفها ولاكدر اخليها بهل حاله اريدها تتعالج كمت من مكاني لزمت ايدي وخلت اظافرها بيها شلعت الجلد كله

نارين : لا ضرغام لاتعوفني هنا

حمزه : عوفي ايده

سحب ايدي من ايدها واشرلي اطلع من المكان طلعنه اني وابوي بقت بس امي يمها طلعنه بالطرمه مال البيت بقيت اروح ورجع واني حاير شسوي شلون اتصرف

اسمعها تصرخ بصووت عالي ويه كل صرخه احس روحي تدمرر ضربت ايدي بالحايط بقووه

ابو ضرغام : انتَ مخبل شنوو هذا

_اااخ ماتحمل بويه راااح اموت والله ماتحمل اسمعها تصرخ شسوي هسه شلووون اتصرف

ابو ضرغام : لآزٍمٍ تكون قوي لاتضعفك مره

_مررررتي هاي مرررتي افتهمو امووت اذا يصيرلها شيء نارييين جزء من روووحي.

ابو ضرغام : ادري بيها مرتك وعزيزه عليك بس لازم تقوي نفسك وتساعدها موو تتخبل مثلها خليك واعي

هزيت راسي بأي واني اروح ورجع اسمعها تصرخ بأسمي وتصيح ضرغام ساعدني تعال خلصني منهم ماتحملت اكثرر رحت دخلت عليهم بسرعه

اجه ابوي وراي يركض وجانت الصدمه امي لازمه نارين وياها مره ثانيه ولسيد لآزٍمٍ بيده عصه يضرب بيها نارين

ناررر وشبت بضلوعي رحت بسرعه لزمت السيد من دشداشته وسحبته عليه

_انتَ شلووووون تجرء تضررربها شلوووون منووو سمحلك تسوووي هيييج

حمزه : بس بهاي الطريقه نگدر نطلع الجن منهاا.

ابو ضرغام : ضرغام عوفه تخبلت

دفعت السيد ورحت عليها سحبتها منهم وضميتها لصدري لزمت قميصي وهيه تشهك ودموعها تشكي حالها

نارين : طلعني مناا ضرغام راح يموتوني رااح اموت طلعني الله يخليك حبيبي لاتعوفني وياهم مالي غيرك لاتعووووفني

_اششش اهدي اني يمج ماعوفج بعد والله ماعوفج اهدي كافي يلا تعاي

حمزه : اذا تبقه علئ هل حاله راح تفقد عقلها خليني اكمل شغلي احسن

_مستحيل اخليك تمد ايدك عليها والله اكسرها

ابو ضرغام : بوويه مايصير هيج شلون راح تعالجها اذا انتَ رافض السيد يشوفها.

_شغله يضربها ؟ شبيكم انتم تردون تموتوني شلوون ينطيكم گلبكم تخلونه يدك عليها بالعوده ولازمينها فوكاها.

حمزة : ابني مراح اذيها بس اخوف الجن واطلعه منهاا صدكني ماراح يصيرلها شيء اذا تحب مرتك وتريد الهاا الخير خلينه نكمل شغلنه اذا تبقه معاند راح تخسرها لان السحر البيها جداً قوي ومسوالها علئ نكاسه.

_شدتحجي ياسحر ياانكاسه منوو يسويلها تعرف شدحجي

حمزة : شغلتي هاي والبنيه مسحورة.

ابو ضرغام : يلا بابا تعال وياي خلي يكمل شغله

حرت شلوون تصرف اخليها بين اديه ماينطيني گلبي اخليهم يأذونها ولا ينطيني اعوفها تتعذب بهل حاله.

كمت ويه ابوي باوعتلي نارين وهيه تبچي صرخت بوجهي

نارين : حته انتَ تكرهني !! ليش تأذوني ليشش

بلعت ركي بغصه عفتها وطلعت اني وابوي من الغرفه طلعت من البيت كله رحت للسيارة دخلت بيها خليت راسي علئ الستيرن واني احس الدنيا ظلمت بعيني.

كلشي عندي سهل ألا هيه نقطة ضعف الي احس روحي اموت اذا يصيرلها شيء

مرت ربع ساعه دك ابوي شباك السياره علي نزلت الجام واني اباوعله

ابو ضرغام : يلا بويه تعال

_ها شصار

ابو ضرغام : فاقده تعال شيلها

_شنوو

نزلت من السيارة اركض دخلت للبيت جانت فاقده بحضن امي رحت عليها بسرعه شلتها لحضني

_شصاررر شسويت الهااا ليش ماتتحرك احجيي شسوووويت

ام ضرغام : لاتخاف يمه قرا عليها وتعبت ونامت هسه شويه وترتاح خلينه ناخذها.

حمزة : هاي الشرابات تنطوها الهاا كل يوم المغرب تخلونها تشرب منهم وهاي الاوراق تحركوونها بغرفة نومها وتشغلون هل شمعه باب الغرفه كل يوم جمعة.

هزت راسها امي بأي اخذت من ايده الاغراض شلتها وطلعت من البيت خليتها بالسيارة صعدت امي يمهاا سقت السيارة

ابو ضرغام : جيبهاا خليها يمنه امك داريها وتسويلها العلاج هناك تضل وحدها محد يبقه وياها.

_أي هوه هيج ماكدر اخليها وحدها بعد

ام ضرغام : لاتخاف عليها يمه انشاءالله يتحسن وضعهاا.

_والله ماتوقع وضعها حيل صعب

ابو ضرغام : ماكوو شيء صعب علئ رب العالمين خلي عندك ايمان قوي الله مايعوف عبادة.

_ونعم بالله

وصلت لبيت اهلي فتحت السياره وشلتها بحضني دخلتها للبيت انصدمو من حالتها خليتها علئ القنفه.

سحر : شكوو شصارر شبيها

ام ضرغام : تعبانه شويه

_سحر حضري غرفتج لنارين ابقي وية منار اريدها تبقه بيها

سحر : هاا أي عادي بس فهمونه شبيها.

_مسحورة

سحر : شنووو  ؟؟

_____________________________

يتبع البارت
.➛ ✿✿ ✿✿ ✿✿ ✿✿ ➛.

‏"طمئِن جناح قَلبِك المَكسور ، فله مِن اللهِ جَبرًا عَظيمًا"

.➛ ✿✿ ✿✿ ✿✿ ✿✿ ➛.

انطوني رأيكم بالبارت شنوو توقعاتكم للبارت الجاي لاتنسوو تصووويت + تعليق بين الفقرات

متابعه لحسابي فضلاً 🤍