لمن شفتو خوفه ساي خلتني أنزل من السرير ، لمن وصلني هبطت عديل و بقيت اسأل نفسي يا ربي انا عملت شنو؟!!!
قال لي بنبره حاده دا منو دا؟
_ لا و كمان حاكيه ليهو قصة حياتك و كل يوم بتشاركيهو تفاصيل يومك؟
_ بتعرفيهو من وين عشان تتكلمي معاهو 24 ساعه! دا نفسو الإتصل عليك و قلتي انو الرقم غلط صح؟
_ كذبتي علي مش! أصلاً إنتِ الكذب دا ما جديد عليك
جا علي بإندفاع و خطف التلفون مني و قال لي تاني بعينك ما بتشوفيه ، قلت ليهو آني سويت شنو ؟
قال لي بنهره : شنو الما سويتيهو إنتِ؟
قلت ليهو بري ما عارفه سويت شنو ؟
عاين لي بضيق و رفع أصبعو علي و قال لي من اليوم دا ماف حاجه اسمها تلفون ، كل مره بتصدميني فيك ، كل مره بتخليني اسأل نفسي معقوله البت البريئه و العفويه دي تعمل كدا!؟!!
كل يوم بتسقطي من نظري و بعملتك دي أكدتي ليك إنك ما شافعه لأنو ماف شافعه بتتراسل مع واحد غريب و تعملو صاحبها ، عقلك طلع وسخان و طلعتي ما هينه و للمره التانيه صدمتيني فيك ، لكن الغلط غلطي أنا الجبت ليك التلفون ، عاين لي جوه عيوني و شال التلفون و طلع من غرفتي
زعلت شديد لسببين الأول انو زعلو مني اتضاعف و التاني انو شال مني التلفون ، قعدت في غرفتي و ما طلعت منها خالص لمن زمن العشا جا ما نزلت ليهم تحت ، حردت الأكل عديل ، شويه كدا شيرين جات و قالت لي السيد وليد قال ليك تعالي العشا ، قلت ليها ما عايزا ، طلعت و قفلت الباب ، بعد مسافه باب الغرفه إنفتح ، وليد جا داخل و معاهو أكل ، قعد جنبي بس أبيت أعاين ليهو ، قال لي بطنك ما ليها علاقه بـ زعلك ، ما رديت عليهو ، إتنهد و قال لي انا عملت كدا لمصلحتك لأنو الكنتِ بتعملي فيهو دا غلط و الولد البتتكلمي معاهو دا في احتمال كبير يكون واحد تافهه و حيوان ساي عايز يستغلك و هو كذلك ، انتِ ما عارفه الأولاد الزيو ديل ممكن يجروا لـ وين ، و بعدين إنتِ ليه بتتكلم مع زول ما بتعرفيهو لا و كمان بتحكي ليهو قصة حياتك بالبساطه دي؟ لا و كمان مدياهو رقمك و ماخدين راحتكم في الواتس و دا نفسو الإتصل عليك قبل كدا صح!؟ يعني انا حاسس انو لو قال ليك رسلي لي صورك كنتِ حـ ترسليها ليهو و حـ تنفذي ليهو أي طلب بطلبو منك!
قلت ليهو يعني فوقها شنو كان رسلت ليهو صورتي؟
قال لي شفتي؟ عشان غبائك دا انا شلت منك التلفون ، لمصلحتك ما حـ أرجع ليك التلفون دا إلا لمن اتأكد إنك بقيتي زوله واعيه و عارفه تتصرفي كيف و عارفه الصح من الغلط ، هسي أكلي و أنسي الحصل ، قلت ليهو بزعل ما عايزا ، شال لقمه و بالغصب دخلها لي جوه خشمها ، لمن لقيت الأكل طاعم و سمح ما رفضت لقمتو التانيه و أصلاً انا كنت جعانه ، بعد اللقمه التالته قال لي بعد دا أكلي براك ، وقف على حيلو و كان حيمشي بس انا مسكتو من يدو و قلت ليهو وليييد انت لهسي زعلان مني؟
إتلفت علي و قال لي العملتيهو ما هين و المزعلني شديد انو التصرفات دي بدرت من وحده انا كنت خاتي ليها صوره بريئه و عفويه تقومي تصدميني فيك؟
قلت ليهو لأنك لو عرست هنادي ما حتشتغل بي تاني زي ما عملت بعد ما خطبتها بقيت بتكرهني ، قال لي ايواااا يعني دا السبب! رجع قعد جنبي و قال لي لو كدا إطمني يا ستي انا ما حـ اتغير عليك مش لو خطبت حتى لو عرست و بقيت أب إنتِ حتكون أولى أولوياتي ، قلت ليهو كضاب إنت بقيت تشاكلني و ما بتتكلم معاي ، قال لي كنت فاهمه حاجه غلط بس هسي وضحت لكن ما عايز تصرفات زي دي تتكرر تاني ماشي؟
هزيت ليهو راسي و مديت ليهو يدي و قلت ليهو صافيه؟ إبتسم و مد لي يدو و قال لي صافيه 💜
إرتحت شديد بعد اليوم دا ، أخيراً زعل وليد مني كلو راح ، قال لي بعد دا حـ أمشي ، قلت ليهو لا خليك شويه! !
قال لي طيب ، قعد اتونس معاي ، قلت ليهو إنت ساحر؟
ضحك و قال لي لا ليه؟
قلت ليهو كيف عرفت اني بتكلم مع طارق و قريت رسايلنا؟
قال لي يا ذكيه ، الفيس دا العملو ليك منو؟ أنا صح !و بما انو انا العملت ليك صفحتك فأكيد حـ أكون عارف كلمة السر بتاعتك ، قلت ليهو ما فهمت ، قال لي خليك منو و واصل أكل بقيتي ما بتهتمي بنفسك ، قلت ليهو من يومي ما بهتم بنفسي لكن إنت كنت بتهتم بي ، قال لي امممم يعني أنا أهملتك؟
هزيت ليهو راسي ، قال لي تمام آسف و من اليوم كل الإهتمام حيكون ليك ، قلت ليهو و هنادي! !
قال لي مالا هنادي؟
قلت ليهو برضها حـ تهتم بيها زيي؟ قال لي أكيد هي خطيبتي و قريباً حتبقى مرتي ، قلت ليهو و آني شنو؟
قال لي إنتِ وحده مشاغبه و كلامك كتير ، اتونس معاي مسافه و مشى ، تاني يوم لمن جا من الشغل لقى هنادي قاعده ، سلم عليها و جاني فوق قال لي كيف أمسيتي ، قلت ليهو كويسه ، قال لي الحمدلله لمن اتحرك و كان حيطلع قلت ليهو ماشي وين؟
قال لي ماشي أجهز نفسي لأنو بكرا راجياني سفره! قلت ليهو شنو؟ مسافر وين؟ و لشنو؟
قال لي اقعدي اقعدي ، مسافر كم يوم كدا و حـ أجي راجع ، أنا و طاقم التصوير حنمشي نزور ولاية النيل الأزرق ، حنمشي لكم قريه كدا و نعمل لقاء مع الناس هناك و نشوف مشاكلهم و نوصل صوتهم ، قلت ليهو توصل صوتهم كيف؟ يعني هم ما بتكلموا؟
ضحك و قال لي ايوه ، قال لي متذكره لمن انا و أيمن لقيناك جنب الغابه! ! قلت ليهو ايي ، قال لي كنا بنصور و بنعمل لقاءات مع الناس و كان معانا كم نفر كدا بس مشوا حته تانيه ، بعد مسافه قلت ليهو بدور أمشي معاك ، قال لي ماف طريقه ، ما حتقدر تتحملي مشقة الطريق و بعدين انا ما حـ اطول أسبوع بس و حـ أجي راجع .....
المهم اليوم البعديهو وليد طوالي سافر بس قبل ما يمشي حلفتو يرجع لي التلفون عشان اتصل عليهو ، مسح الفيس و الواتس و رقم طارق و أداني التلفون ، قال لي ما ألقى فيهو حاجه جاي ولا جاي و إلا والله ما أرجعو ليك تاني ، قلت ليهو حاضر ، المهم بعد ما سافر بساعتين طوالي اتصلت عليهو رد و قال لي المزعجه متين طلعت منكم أنا!
اتكلمت معاهو شويه لأنو قال سايق ، لمن قفلت و نزلت تحت عشان أفطر لقيت هنادي و ناديه قاعدين لمن شافوني ناديه قالت لي تعالي لمن مشيت ليها قالت لي امشي اعملي قهوه لي و لـ هنادي ، قلت ليها ما بعرف ، قالت لي شيرين بتوريك و بقت تنادي شيرين لغاية ما جاتها قالت ليها سوقيها المطبخ و علميها بعملوا القهوه كيف 😏
مشيت مع شيرين فوق بس طوالي دخلت غرفتي ، مالي و مالهم لا بعمل ليهم قهوه لا غيروا ، بعد ساعه كدا جعت شديد ، طلعت من غرفتي و مشيت المطبخ بس لقيتو مقفول! خليتو و نزلت للمطبخ التحت و برضو كان مقفول ، قلت الليله آكل شنو! !
مشيت لـ ناديه في غرفتها و قلت ليها المطبخين مقفولات! قالت لي اعمل ليهم شنو يعني؟
قلت ليها أنا ما فطرت إنتوا فطرتوا؟ قالت لي لا و ما عايزين نعمل فطور اليوم! قلت ليها لكن كدا حنموت من الجوع!
ما ردت علي و بقت تمكيج في نفسها ، شويه كدا شالت شنطتها و قالت لي أطلعي من هنا ، طلعتني و قفلت غرفتها و مشت ، بقيت لافه في البيت و انا جعانه شويه كدا مشيت الجنينه حقتهم ، بس للأسف اتذكرت انو المنقه نزلوها كلها قبل أسبوع و الجوافه ما ولدت تاني ، ما عرفت اعمل شنو ، قلت هم عملوا كدا قصداً عشان يجوعوني ، طوالي إتصلت على وليد ، رد علي بعد مسافه و قال لي مع تلفوناتك الكتيره دي ما حـ أقدر اشتغل ، سكته ساي ، قال لي بهاظر معاك يا زوله اها كيفك ، قلت ليهو آني جعانه من قبيل ، قال لي تمام امشي أكلي! ولا عشان انا الكنت بأكلك !😂
قلت ليهو المطبخين مقفولات ، قال لي ليه مقفولات خلاص خلي زول يفتحهم ليك امشي لأمي ، قلت ليهو ماف زول حـ يفتحهم لي أمك ما اشتغلت بي شالت شنطتها و طلعت ، قال لي كيف يعني ما اشتغلت بيك! ! دقيقه هسي برجع ليك ، بعد ما قفل الخط قلت حـ يتصل على أمو عشان تفتح لي باب المطبخ ، بس الغريبه إنو ما رجع لي تاني!! بعد مسافه شيرين جات داخله و هي شايله معاها صحن ، قالت لي دا أكلك ، ختتو لي و وقفت بقت تشتغل في تلفونها ، قلت ليها فتحتي المطبخ؟ قالت لي ايي ، قلت ليها كنت حـ أموت من الجوع تعالي أكلي معاي ، قالت لي أكلت قبل شويه ، من دون ما إتردد قعدت آكل طوالي لحدي ما كلمت الصحن ، شيرين قالت لي خليهو بشيلو أنا و فعلاً شالتو و مشت ، رجعت اتصلت على وليد عشان اقول ليهو خلاص إني إتغديت بس ما رد علي ، لمن نزلت تحت لقيت ناديه قاعده ، قلت دي متين طلعت و جات ، مشيت عليها عشان أحضر و أول ما قعدت كدا قالت لي اقعدي على الأرض ما توسخي لي الكراسي ديل ، قلت ليها ما بوسخهم و صلحت قعدتي ، قالت لي انا قلة الأدب ما بتنفع معاي ، قلت ليك اقعدي تحت يعني تقعدي تحت ، سكته ساي ، طوالي قامت و جات جرتني من يدي و قعدتني في الأرض بالقوه ، لمن فكتني قمت و تاني مشيت قعدت في الكرسي ، المره دي غضبت غضب ما عادي لمن خفت منها ، ختت يدها على رقبتي و قالت لي في اللحظه دي ممكن اعمل فيك أي حاجه تخطر على بالي زي إني أخنقك و اقطع نفسك و أرتاح منك و فعلاً خنقتني ، بقيت اتصارع معاها و ارفسها بـ رجليني و هي كأنها ما بتحس ، بعد شويه فكتني و قالت لي دا درس بسيط تاني لو قليتي أدبك حتشوفي حاجه اسوأ من الخنق ، قلت ليها بكلم ليك وليد ، قالت لي أمشي كلمي وليد!
فعلاً مشيت غرفتي و اتصلت عليهو بس ما رد علي ، رسلت ليهو رساله محتواها : "أمك خنقتني " استلمها و يمكن قراها لكن ما رد علي ....
قعدت في غرفتي و بقيت منتظره منو مكالمه عشان اشكي ليهو لكن ما اتصل و لو أنا إتصلت ما برد ، قلت حـ اتصل على حبوبه و أكلمها لكن لمن لقيت الوقت متأخر قلت بتكون نامت لأنها بتنوم بدري ، قلت ما مشكله بكلمها بكرا ، ختيت التلفون جنبي و نمت ، الصباح لمن صحيت ما لقيت التلفون ، فتشت الغرفه كلها بس ما لقيتو! ! نزلت تحت و فتشتو و سألت الخدم بس كلهم قالوا ما عارفين! !
قلت معناها شالتو ناديه ، لمن مشيت سألتها ما ردت علي كأنها ما سامعاني ، سألتها كدا لمن فترت بس من دون رد ، في الآخر قلت ليها بعدين لمن وليد يجي دا كلو ما تنكريهو ، عاينت لي و إبتسمت ، المهم انا بعد ما شربت الشاي تاني ماف حاجه دخلت بطني ، فطور ما خلوني أفطر معاهم ، جهزوا سفرتهم و قفلوا المطبخ ، و لمن جيت أقعد معاهم لين قالت لأمها اكيد ما حـ تخلي القرف دي تقعد معانا! ! ناديه قالت ليها of course ، طوالي نادت شيرين و عملت ليها حركه كدا ، شيرين طوالي جرتني من يدي و مشت بي على غرفتي و انا بتصارع معاها ساي لكن ما قدرت عليها ، جرتني لحدي ما وصلتني غرفتي ، لزتني جوه و قفلت علي الباب ، بقيت اضرب في الباب و أنادي عليهم لمن ريقي نشف ، كانوا خاتين لي جك مويه بس و حابسني جوه الغرفه اليوم كلو 💔
قعدت في ركن من الأركان الغرفه و قعدت أبكي ، في سري كنت بنادي على وليد و أنا مقهوره ، بكيت في مكاني داك لمن نمت هناك ، لمن صحيت صحيت تعبانه و جعانه في نفس الوكت ، اتفاجأت لمن شفت باب الغرفه مفتوح ، طلعت طوالي و من هناك جريت على المطبخ بس للأسف لقيتو مقفول ، طوالي جريت غرفة الخدم و قلت ليهم تعالوا أفتحوا لي باب المطبخ ، زول فيهم رد علي ماف ، مشيت منهم و انا حاسه راسي لافي و جسمي دا منتهي عديل لمن وصلت السلم بقيت اشوف طشاش طشاش ، بالجلاله قدرت أنزل من السلم ، شفت ناديه و بناتها مشيت عليهم عشان أقول ليهم انا جعانه افتحوا لي المطبخ ، أول ما قربت منهم كدا حسيت الدنيا دي لفت بي و ما شفت حاجه تانيه.....
بحركه بطيئه فتحت عيوني ، لقيت نفسي في غرفتي ، فجأه شفت مره واقفه شمالي ، قالت لي كيفك كويسه ؟
هزيت ليها راسي بس ، شويه كدا شيرين جات داخله ، المره قالت ليها اتأخرتي ، مشت شالت منها صينيه صغيره كدا و جابتها لي ، قالت لي خلصي ديل و اشربي العصير دا ، قلت ليها إنتِ منو؟
قالت لي أنا دكتوره شيراز..... لا لا ما تخافي ما عندك شي ، بس عشان ما أكلتي شي حصلت لي الدوخه دي! .....قالت كلامها دا بنبره غريبه كدا و كانت بتعاين لي بإستغراب ، بعد ما طلعت بمسافه طويله ناديه و بناتها جوني داخلين ، ما عارفه ليه كانوا بعاينوا لي بالطريقه دي!!؟ ما قالوا لي حاجه عاينوا لي و مشوا!!؟
المهم بعد اليوم دا كلهم بقوا يكرهوني زياده و على طول بقفلوا علي باب الغرفه و يوم كامل بكون ما ماكله فيهو شي و المشكله انو ما معاي تلفون عشان أتصل على وليد ، قلت أول ما يجي حـ أوريهو أي حاجه هم عملوها لي حتى هنادي ذاتها كانت معاهم ، بعد الخمس أيام الوروني فيها الويل دي يوم ساي كدا جابوا لي الشاي و فطروني!! لا و كمان علا جات و فتحت دولابي قالت لي ألبسي الفستان دا لأنو ملابسك اللابساها دي وسخت! طبعاً هي الجابت لي الأكل و غشتني بكلمه كلمتين فرحتني بيهم قلت خلاص هي حتتعامل معاي معامله كويسه تاني ، دخلت استحميت و لبست الفستان الطلعتو لي ، لقتها جايبه معاها علبه قالت لي تعالي أمسحك دا مرطب ، مع اني ما كنت عارفه دا شنو لكن خليتها تمسحني ، بعدها رشت علي عطر و سرحت لي شعري بـ كريم ، بعد ما خلصنا قالت لي عندي مسلسل بتبدا زي المواعيد دي أرح أحضريها معاي ، قلت ليها كويس ، فعلاً مشيت معاها و قعدت أحضر....
يتبع......