نوارس مقيدة

البارت الأضافي

هلو بنات بصراحه جان عدنه انه وبدوشه هواي حجي بخصوص سولاف لأن اغلبجن كالن ما حبينها لأن ازوجت محمد
بس هاي البنية اختصرت علينه الطريق وحجت كل الي ردنه نحجي...

مشكورة على مداخلتج حبي واتمنى منكم تقرون تعليقها
لآن اختصرت كل الكلام

وهذا البارت الأضافي الي وعدناكم بي وان شاء الله فترة قصيرة ونبدي بالجزء الثاني من #حرام_مباح

#نوارس_مقيدة

#نسرين_الأسدي

___

شلت فستان عرسي من الوسط ومشيت بخطوات بسيطة لأتجاه الدرج وكفت على بداية الدرج وشفت الكل متجمع جوا النسوان وهوا يمهم..

اختفه الكل من الوجود ماصرت اشوف غير عيونه الصفر الحلوه الي تلمع والحب يشع منها .. نضراته الاعشقهن يتأملني بيهن .. وصوت دكات گلبي لينبض بحب..

نزلت بخطوات قليلة ووصل لمسامعي صوت اليسا وهيه تغني اغنيتي المفضلة
" عبالي حبيبي "

كلماتها براسي وعيوني على محبوبي كدامي .. ابتسملي من صرت كدامه واخذ جف ايدي وباسه وكال بحب وعيونه بعيوني : احبج سباحتي..

سولاف :
فزيت من صفنتي على كف بوجهي التفتت بعصبيه وشفته حسن
صاير كلش ادبسزز ومعنده حترام
عطت بي : هاي ليش تضربني حسن.. اني شكتلك مو كتلك تبطل هاي الشغله

ضحك وكال : بس يمه انه شفتج مادلي وين لايحه وما تثمعيني.. كلت لازم الجعج

لزمت اذنه وعطت بي : لك عيب لتعيدها مرة الخ اني امك انته متعرف الأدب.. شوف منتظر ومرتضى شكد حلوين ليش متتعلم منهم

زم شفايفه وكال : انه اثف.. بث لا تكولين منتظل وملتضى احثن مني..

سولاف : لعد صيروا مثلهم حته مكول هيج

حسين : بث ماما انه عاقل بث حثن وكيح

سولاف : اني مطالبه شي منكم غير تصيرون مؤدبين وتحترمون الي اكبر منكم ماشي..

حسن وحسين بصوت واحد : ماشي

تنهدت وكتلهم : يلا روحو لغرفتكم ولا ترحون لعلي خطيه تعبان من المدرسة خلو نايم

______

زمرد

شلت هدوم رهوفه مالات المدرسه وخليت الغده وكتلها : تعاي اكلي يمه

كعدت وكالت بتعب : افف اليوم تعبيت كلش

زمرد : اسم الله عليج من التعب حبيبتي

رهف : بعد روحي اعبج .. ماما تدلين شصار اليوم؟

زمرد : ابتسمت متعودة كلما ترجع من المدرسة لزوم تسولفيلي كلشي صار وياها : لا ماما كملي ..

رهف : جفعر كتله ولد وياه بثف وهاي نردسه راحت طلقة لروضي كلتله واده مثح الكاع بالولد وثحاه للمدير ودلاله لو انته جبير جا موتك بس ماثتقوي علا الاصغر مني..

زمرد : هذا اخوج مايتوب من العرك شنو وانه اكول بدل وطفر بره

رهف : عوفي روضي وعلڪه دوم يعالك بس انا حبيت من شفته يدافع عن جعفوري

زمرد : اي حبيبتي هوا يحبه ليش مايدافعله واخيه وياه بالمدرسة

رهف : اي هيج شي حلو

خليتها تكمل اكلها .. علاوي هسه صف اول.. ورهف وجعفر وادم صف ثاني.. ونرجسة صف ثالث.. وروضي صف اول متوسط.. ومنتضر ثالث متوسط..

سيف بنه بصف بيتنه وعزلو لأن صلوات الجهال كبرو ويحتاجون مكان .. محد رضه عن عزلتهم بس كال سيف احنه هنا يمكم مو بعيد .. وعذراء دوم يمنه ومن يلتحق سيف تكضيها يمنه كد الحاجه تروح لبيتهم..وبليل تنام يم الحجية وعمتي.

عزلنه غرفة منتضر وروضي سوه وعلاوي وخوانه هم سوا بس باب غرفتهم على غرفة اهلهم مايأمنون .. وجعفوري مرات ينام يم رسل ومرات يم عمتي ..

جنان تزوجت محمود من سنة تقريبا من كملت كلية وهسه هيه حامل ..

هبة تقدمولها هواي بس بعدهم ماشايفيلها الشخص المناسب .. وسمعت من عمتي صديق سيف محاجي محمد علمودها ماعرف بعد شنو الرد الهم..

_____

عذراء : يماا نرجسة تعاي اتغدي رح يبرد

نرجسة : اذا مااجه بابا مااجي

ادم : تعاي رح اكله كله

نرجسة : سبع عافيات

عذراء : كعدت على الكرسي وانه تعبانه خليت ايدي على ضهري وجريت نفس : يما مابيه حيل دلعج تعاي

نرجسة : ما مااا انا زعلانه

ادم : انتي وتيحه

نرجسة : على روحي

ياربي هاي البنيه رح تجلطني لسانه اطول منها ودلوعه وسيف منطيها على مايها..

عذراء : ما جوعانه ولج كومي اتغدي راح اروح للبيت الجبير ماخذج وياي ..

نرجسة : مايبعد عني اروح لوحدي

ادم : يما عوفيها تولي حكيرا نرجسة

عذراء : بس انت العاقل يحبيبي كمل اكلك علمود نروح وتراجع دروسك وخلي هاي خل ترسب ويزعل منها بابا

نرجسة : اصلااا شاطره انا .. انطيني تلفونج اخابر بابا

عذراء : تعي اكلي هوا طالع ماراح يجاوب

نرجسة : يجاوب نطيني

اجت كعدت على الطاولة وسحبت التلفون وخابرت .. فتحت سبيكر وشوي وجاوب : ها حبيبي

نرجسة : هاي انا بابا

سيف : يابعد ابوج وعشيرته رجعتو من المدرسه

ادم : بابا عبيبي نرجسه ضوجت ماما ماتاكل

نرجسة : جذاب بس انا اريد اكل وياك

.سيف : عمري انتي حبيبي اكلي ودرسي وروحو يم بيبي وانا بس ارجع نطلع كلنه سوه نتعشه بره

نرجسة : كول وعد

سيف : وعد .. يلا لضوجين ماما واخيج

نرجسة : لا حبيبي رح اكل لا تتأخر نعبك احنا

سيف : وانا اموت عليكم نبضات سيف انتم..

عذراء : حبيبي لا تنسه لوصيتك عليهن

سيف : ها عمري ..شسمه

عذراء : نسيتهن؟

سيف : هذا ابن الكلب ايهم نساني

عذراء : راح ادزلك رسالة على الواتساب خوش

سيف : خوش عمري يلا رايح..

سداه وكمت على كيفي لملمت الماعين وجبت قماصل الجهال وعبايتي .. الحمدلله بهاي السنة حياتنه كلش مستقرة وحلوه .. حياتي بين جهالي وسيف وحبه واهتمامه وخوفه وحنيته .. تبينلي رب العالمين شلون عوض صبري وعوضني عن كلشي.. صح الشي الصار وياي غلط وحرام بس اكيد صار بجهل وبدون قصد وربي غفور رحيم ..

بيتنه الصغير وطابق واحد عبارة عن غرفتين وحده بصف الثانية وصالة ومطبخ .. على كدنة واغلب وقتنه بالبيت الجبير.. بس الحمدلله حياتي مستقره وسعيدة وبالماضي ابد ماجنت متوقعه رح تستقر حياتي هيج..

خليت ايدي على بطني هسه انه بشهر الثامن من حملي بجهالي .. اي انه حامل بتوؤم وقبل اسبوع يلا عرفتهم بالسنوار وبنيه وولد طلعو .. كلت ان شاءلله هاي الخاتمة .. كالتلي الدكتورة احتمال جبير عملية .. خليناها وره رب العالمين..

اهتمام سيف بفترت حملي كلش حلو احتار شيسويلي وشيخليلي بده مايقصر وياي لو بكد ذره ويريد يعوضني عن كلشي ..لبست الجهال ومشينه .. قفلت الباب ومشينه للبيت الجبير..

لاكينه بثينة وامجد وابنهم يركض جدامهم تسالمنه ودخلنة وامجد راح.. لاكتنه سولاف وهيه تمشي وره حسن وتصيح عليه

: حسنن ماماااا تعال

حسن : مااا مااا

سولاف : ولك ماما مطر وجو بارد والله تتمرض تعال

اجه علي وكال : حسسسن تعال ولكك

دخلنة للصالة واجت زمرد وجايبه جاي ورهوفة وراها شايلة سلة الكعك..

كعدت وكصيبتها طخت بالكاع بعد كلبي شعرها يخبل الله يخليها طول وثخن طالعه على عماتها عمتي تكول كلنه علينه شعر ..وزمرد مداريته ..

مو نفس نرجسة الشعر حد من رڰبتها بس يطول شوية كضاه سيف وكصاه .. دوم يحب شعرها كصير بس يطول شوي جابتله المقص واجتله...

الحجية : لا كصيتو شعر الفرخه اكصكص ايديكم بعد يومين تتحجب ماينلف شعرها

عذراء : جا حجية بيدي غير سيف مايرضه

نرجسة : بيبي انا احبه هيج وبابا هم يحبه

الحجية : شخربج غير لبابا هذا

ادم : انا حلو احسن منها

ام محمد : يهو يلحكك ادومي حبيبي انته احسن من لكل

علي : ها بيبي شو تحجيله الحجي لتحجي الي مايصير الي تحجي الي ماينحجي لغيري

نرجسة : صرت تحجي صيني شنو

جعفر : بطتنه بطت بطن بطتكم

ام محمد : ولك ابو لسان يهو يكدرلك انته

علي : جاا اكو واحد ماعنده لسان

طبو مرتضى ومنتضر ثنينهم كالو : السلام عليكم وكعدو..

زمرد : واخيرا شرفت مرتضى شمسوي بالمدرسة اليوم؟

نرجسة : سحل الولد عاشت ايده

مرتضى : ايدج العايشة نرجوسه

هبة : دككك غزل بعد عمتك

مرتضى : واكفتلي عضم بالبلعوم شمالج

هبة : غير اراقب قصص الحب التي تحدث من صغر

زمرد : لا تسكت روضي جاي اسئلك

مرتضى : يما ماسويت شي بس ذاك ابن جلب كاتل جعفر انا كضيته وسحلته للمدير ماكتلته لان مااستقوي على الاصغر مني

ام صادق : بعد حيلي ..جا احنه ليش مأمنين لان الفريخات يرحون ويردون وياكم

منتضر : اكيد لازم تأمنين حبابه لا تخافون عليهم .. بس ام علي ردي ابنج انه من يجي عمي اكله عليه

علي : هلا هلا كابله وبزه بعينه جدامي تشتكي لاهلي عليه ولك

منتضر : لان انته لسانك بطول النعال ماتحترم

علي : بكيفيي

سولاف : علاوي يما شبيك اسكت .. شبي عمه منتضر شسوه

ادم : وتييحح مايكعد تلساع وعارك

علي : انجب خايس

سولاف : علييي لسانك شهلألفاض ولك

علي : بكيفيييي

حسن وحسين : بتيفييييي هههههه

ام محمد : فدوات لهل ورد لعدنة تعالو يحبابه لا واحد يصيبكم بعين ..

الحجية : يهو كال كبل لا نموت ونشوف بزر بزرنه بين ايدينه ونلاعبهم ويملون علينه البيت

ام صادق : اي والله بس ربجن مايخلي واصبر تلڰه..

الحجية : ونعم بالله يمه..

نرجسة : صدك يما ماكتلج شصار هناك

عذراء : خير يمه؟

نرجسة : مره يم المدرسة سحبت ايد جعفر واحنه خفنه ومن اجو مرتضى ومنتضر مالحكو عليها

الحجية : شنهيي

ام صادق : رادت تبوكه شنو؟

منتضر : مادري انه على ما وصلت مالكيت واحد وجعفر يبجي اجه السايق ورجعنه

ام محمد : جا يمه ماحجيتو توكم يلا

منتضر : انا متاكد هاي هديوه

ام صادق : هاي البربوك ماناويه تعوفنه

رسل : بس همه ماشافو وجها يمكن مو هيه وهيه مو عرست وولت شتريد من جعفر

مرتضى : وهسه انتم خايفين من هديوه نعيله الم جهال المنطقة يكتلونها بالنعال...

رسل : اذا صدك هيه خنوصلها للزلم ونخليهم همه يتصرفون وياها جا تايها تريد تاخذ الفرخ هسه ذڪرته شني

الحجية : خلي ييون ونكلهم

مرتضى : شلون جان شكلها؟ مثل هاي الساحرة لتطلع بالتلفزيون؟

نرجسة : ايي خشمها طويل وبي حباية ومحدبه وعدها عصة وعيونها كبار .. لك بابا مره عاديه بس مبينه خبيثه

رسل : حبيبي جعفر شكالتلك من كضتك من ايدك؟

جعفر : رادت تسحبني وانه حفيت

علي : اي يهو شال الحجارة وشمرها عليها لو ناسين فضايلي عليكم؟

رهف : اي صدك ماما علاوي شمر عليها حجارة وموتني ضحك

ام صادق : عفيه بالسبع

ام محمد : نشمي يبعد حبابتك

علي : لا تمدحوني انغر ترا بعد مااجاوب

هبة : اهووو تحسسني جدامي أنشتاين

علي : أنشتاين تربه جوا ايدي

سولاف : علي ولسانه محد يرده بس يحبيبي سوالفه تخبل .. ضلينه نضحك واحنه متجمعين وحسن وحسين يلعبون واحد يفتر وره الثاني وكلساع واحد لبد وراي ..

ام محمد : يما لا تعورون اميمتكم اجعدو

ماسمعو وضلو يفترون .. وحسن اجه يركض وعثر بالسجادة وطاح وصارت طيحته على صفحتي كلش .. بس اني احس نفسي انكطع ..

كلها صاحت الله الله وكومن حسن واني بالكوه اجر نفسي احس البنيه صعدت على كلبي اختنكت كلش..

_______

سمر :

اني وايهم هاي الأيام صايرين مثل توم وجيري ابد منصافى ولا نكدر نكعد ثواني سوه الا تنتهي بعركة لدرجة ماما وعمو ضلو ينزعجون منه بس ماعرف ليش لا اني اطيقه ولا هو يطيقني

جاي اكلب بالأنستا واوافق على الطلبات وسمعته كال :
سمر.. هاي لج سمر مو داحجي وياج

سمر بنفرزة : شكو شتريد مدشوفني مشغوله

ايهم : لج يا مشغوله.. كومي جيبيلي مي يلا

نزلت الموبايل والتفتتله برفعة حاجب : شنووو دروح بابا انته اخدم نفسك شنو شايفني اني خدامة عندك

تقرب مني ضرب جبيني بخفة باصبعه : اي انتي خدامه عندي وحتجيبن المي قبلتي او لا مفهوم سموره

عطت بي : لك دروح اني ماشتغل عندك وكوم يلا شرب نفسك مي

تبادلنه النظرات بعصبية وواحد يريد يقتل اللخ

وسمعنه صوت ماما وعمو : ايهم، سمر.. شجاي تسوون؟

سمر : والنبي هو السبب يكلي انتي خدامة عندي يرضيكم هالشي

ايهم : كذابه اني مكلت هيج طلبت تجيبلي مي وبس وين الغلط

جواهر : ماما سمر شكو بيها اذا جبتيله ماي ترا هو مثل اخوج عادي يطلب منج شي

اسماعيل : لا جوهرتي سمورة مغلطانه.. ايهم بابه انته لازم تعتمد على نفسك شنو تتأمر عليها

ايهم : شكو بيها يا بابه يعني هي كاعدة كتلها طلبت منها مصار شي

اسماعيل : ميحقلك حبيبي وهي حره اذا تقبل او لا
اني مو كتلك خل ازوجك حته زوجتك تخدمك يا ابني ترى الزواج ضروري وانته مو صغير دخلت بالثلاثين

كام وكال : مادامك فتحت موضوع الزواج اني طالع بابه.. وها جوهرتي لا تنتضريني على العشى ح تعشى بره ويه اصدقائي

سمر : اي روح اصلآ العشى ح يصير احلى بدونك

ايهم : والنبي لو مو ابويه فتح موضوع الزواج جان ضليت هنا وكعدت على گلبج.. دروحي المغثه

سمر : روح انته يا كتلت الأزعاج

أخذت موبايلي وصعدت لغرفتي وهو طلع وسد الباب

جواهر :
لا ذول ابد مو صاحين.. شوف شلون يتعاركون جنهم جهال

اسماعيل : حبيبتي تركيهم خليهم هيج ولا كل واحد بيهم منطوي على نفسه وميفتحون اي مواضيع سوه بالنهاية همه يضلون بيت واحد وگلب واحد حته لو جانو يبينون العكس

جواهر : اسماعيل ؟

اسماعيل : عيونه كولي يروح الروح

جواهر : سالمه عيونك بعد گلبي.. بس ايهم محيرني ليش مايقبل يزوج وبس نفتح وياه الموضوع يغيره لو يطلع من البيت كله

ابتسم : ماعرف حياتي.. بس اني شاك هو خايف من الزواج.. وحته لو تزوج ما اعتقد حيفكر بالأطفال

جواهر: معقوله هيج يفكر.. بس ليش

حضن وجهي : لا تشغلين بالج يعمري هو لمن يحس محتاج يحجي حيكول.. يلا هسه جهزيلنه العشى اني كلش جعت
واذا ما اكلت احتمال اكلج انتي وبعد الخيار الج

جواهر : هههه.. اسماعيل ولا تجوز من سوالفك انته اعقل عيب كبرت..

اسماعيل : لج ليش هو الي عنده زوجه مثلج يكدر يصير عاقل لا حبيبي غلطانه

جواهر : يلا ابعد عني خليني اروح اشوف شغلي لا تلهيني بحجيك هذا

اسماعيل : هههه دقايق بس حبيبتي اذا ما كمل الأكل اطلب شي ثاني

جواهر : اي عود نشوف..

نزلت سمر تركض وكالت : ماما .. ماما.. سولاف متخربط وضعها كلش وماخذيها للدكتورة

____

سولاف :

رجعنه من الدكتورة واني بالكوة امشي والآلم بعده قوي رغم المسكنات
لزم محمد ايدي ومشاني للبيت بس الخطوة احسها بعشرة
ضغطت على ايده بقوة ودمعت عيوني الآلم يشبه آلم الطلوق بس الدكتورة كالت مو موعد ولادتج
: ااخ.. محمد حموت مداكدر..

محمد : اسم الله عليج سباحتي لا تحجين هيج هسه تصيرين زينه الدكتوره كالت بس ترتاحين وتشربين العلاج يروح الوجع كله .. لا تتحركين

شالني ونيمني بغرفة بيبي واني اتلوى من الوجع ولمحت ماما وسمر جايات وضلن يسألن يردن يطمنن علي

صاح بيهم : يلا وين العلاج.. انطني الماي..
شربي حبيبتي.. استغفر الله العلي العظيم وعلي اذا صار بيج شي محد يخلصهم مني

الحجية : كول ياالله يمه ان شاء الله ماكو شي

ام محمد : يمه همه الوليدات الله يخليهم هم ما يكعدون وكح وحنه جم مره حجينه وكلنه لا تطكون امكم بس ما يفيد

محمد : وروح ابوي اليوم حالف اربيهم واطلع وكاحتهم من عيونهم... على الضيم الشفناه بالدكتوره
وينهم.. وين لبدتنهم

الحجيه : يمه انعل الشيطان يهال يبعد حبابتك شنسويلهم.. ميخالف وليداتك عوفهم

محمد : يمه رحمه لروح جدي طلعيهم اريد ابرد گلبي بيهم

ام محمد : يمه حكك انه شفت شصار بيك هناك بس هذا الكاتبه ربك

مسح وجه بعصبيه وكال : استغفر الله شلون اليوم اطلعنهم لو لا.. انه اروح ادورهم

الحجية : عوزها تطك الفروخ اسكت اسكت

ام صادق : مايدرون غابل متعمدين شمالك

محمد : لا ياخذونها للكبر اذا ماصحنه بيهم هسه

رسل : على كيفك ابو علي شنو من يمته تربي انته بلكتل .. وعوجت حلكها لو جا سويليفه هاي

طلع محمد وطلعن وراه

سمر :
ضل محمد يريد يصيح ع الجهال وبيبي وخالة ميخلونه .. سولاف خطية محاسه بشي من كد الوجع لحد ما بدى مفعول الدوه ونامت وبيبي وخاله مخلن احد محلفن محمد بي بس حته يهدى
آخر شي هدى وعاف السالفه بس مندري اذا صدك لو بس كدامنه هيج كال

بتنه بليلتها اني وماما عدهم والجهال خطية حته ما نزلو على العشه خايفين على امهم وخايفين من ابوهم
سولاف ضلت بغرفة بيبي ومحمد كال حيضل بالمضيف اليوم
رحنه اني وماما الهم حته نيمهم ونطمنهم وحنام يمهم

سولاف :

بعد كل ذاك الوجع الي شفت بي الموت الحمدلله لمن كعدت حسيته خف وضال بس قليل
اول ما فتحت عيوني والتفتت شفت بيبي وخالة كاعدت على جهة ومحمد بصفي

رفعت عيوني وكتله : محمد

التفتلي بسرعه لزم ايدي باسها وكال : يروح محمد سباحتي كعدتي حبيبتي.. شلونج هسه ان شاء الله احسن لج والله راحت روحي حسيت الوجع بيه مو بيج

سولاف : اني احسن هسه.. لتخاف

مرر انامله على وجنتي : شلون ما خاف هو انه غير ردت اموت من الخوف.. اوف ياربي .. الف الحمدلله

انتبهت خالة وبيبي وكالن : ها يمة شلونج هسه

سولاف : احسن

ام محمد : الف الحمدلله.. خل اروح اكل للبنيات يجهزلج عشي اكيد جوعانه يمه.. ياعلي

الحجية : الحمدلله يمه الف الحمدلله.. يلا خل يرتاح محمد هسه جان شايل الدنيا فوك راسه ..
ضلت تضحك علي واني ابتسمت بتعب

نزل طابع بوسه على جبيني : چا شلون.. غير روحي هي سباحة گلبي هاي..
والله العظيم لو الدكتوره كايله راح تخسرون الطفله ما جان خفت مثل خوفتي عليج

سولاف : اشش محمد لا سم الله عليها بنتي هاي اروحلها فدوه اني

ابتسم : ولج انه الي اروحلج فدوه شنو بنات شنو ولد اذا انتي ماكو والله حياتي كلها بعد ما ريدها

لمعت عيوني : هالكد تحبني محمد

: واكثر بعد يطوايف محمد

___

سيف :

كاعدين بالمضيف ومنتظرين جية حكمة لأن هو كال جاي النه اليوم
ومحمد ما طلع عالموده لأن كال يريد يخطب منه

محمد :شني سيف وين صار خطارك انه وراي شغل ما اكدر اتاني النهار كله

سيف : اصبر ابو علي يمكن مسافة الطريق ويجي والغايب عذره وياه مو هيج

صادق : والله انه الي اعرفه من يجي واحد يخطب لازم من وكت ويجي بنفس الموعد المنطيه

محمد : انه حدي بعد نص ساعه اجه خير على خير ما اجه اروح

سيف : هو كلي بس اخابرك اطلعلي يعني انه بالباب خل نتاني بعد شويه وهلبت يوصل

اتصل بيه وعرفته بالباب هسه.. طلعت استقبلته

سيف : ولك وين صرت كلش تآخرت علينه ومحمد راد يعوفك ويروح

حكمت : شسولفلك سويف ولك نلعب بيه طوبه مادري شمسوي بحياتي وهيج يصير بيه وهاي عود كلت لمي اندعيلي من طلعت
يعني اول ما طلعت بنجر التاير
رجعت سويته واجيت مرة ثانيه واشوفلك كدامي حادث سيارتين مگلوبات ومدمرات دمار صايرات طحين
وغير القاط الي انعل ابوه ورحت بدلته

ضحك سيف وكال : ولك شسالفه امك مدعيه عليك لو داعيتلك اليوم

حكمت : وعلي لو مدعية عليه ولا هاي الدعوة الي لعبت بيه فلك

سيف : يلا امشي خل ندخل صدك جذب .. بس هسه شنو اهم شي كدام محمد صير محترم وعوف شقاك الماصخ خوش ترا يطردك لو مو جاي على عرفي والله اذا جفصت كدامه بحجايه يصير طردك بالعكال

حكمت : سويف رحمه لروح ابوك ولك انته جاي تهديني لو توترني اكثر ترا انه بالكوة واكف

سيف : يلا اشاقه وياك لا تتوتر ادخل

دخل وكال : السلام عليكم

محمد : وعليكم السلام والرحمة اهلآ وسهلآ حياك الله

كعد ودقايق جابوله الماي والكهوة وهو متوتر وكل ساع يمسح بوجهه

محمد : اي بويه كول تفضل شني طلبتك

تحمحم وكال : سلامتكم شيخ.. انه بس جنت جاي.. التفتلي ..سويف هو انه عليمن جاي...

ضربه سيف بخاصرته وكال : جاي تز...ب احم شبيك حكمت انته شني كتلي من خابرت

حكمت : هاا اي صدك.. اي.. والله شيخ ابو علي انه جاي اخطب منكم بنية عود.. بس اذا ما عدكم مو مشكلة انه اروح

سيف : هاي شبيك حكمة .. جاي تحسسني انته العروس وخجلان

حكمت : ليكابل اخوك يتحول نعجة مو العروس

محمد : ان شاء الله عدنه.. بس احجيلنه عنك اول

حكمة : مو هذا سويف يعرفني صايرله سنين وياي كله سيف شبيك ساكت

محمد : انه ادري سيف حاجيلي كلشي عنك بس اريد اسمع منك تعرف انه بناتي مدللات وعمرهن كله ما ضل شي بنفسهن ولا يوم واحد رفع ايده بوجهن اكيد من اريد انطي لواحد لازم هو كدها وتعيش وياه مثل ما جانت عايشة ابيت ابوها

حكمت: اكيد شيخنه.. وانه مستعد اجاوبك على كل اسألتك

سيف : اي جاوب بس مو تبعرها وتز... بنص السالفه

محمد : احجيلي انته شنو الشغلات المايعرفهن سيف عنك يعني حياتك ابيتكم .. صلاتك صيامك سوالفك المكسرة اريدك تحجيلي كلشي.. مو باجر تاخذ بتي وتجيلي تشتكي من شي ما ادري عنه.. ترا كلشي ولا بناتي خط احمر

حكمت : اكيد ابو علي..انه الحمدلله اصلي واصوم بس يعني اوكات افطر يوم يومين والصلاة مرات صلاة الصبح اعوفها.. يعني بس هيج والباقي لا كلشي تمام.. ها لا تباوعلي هيج كلت احجيها بصراحه

محمد : وبعد شعندك

حكمت : انه شرب ما اشرب الحمدلله بس مرة وحده وربي يشهد علي بعد ما عدتها وكله من سويف شفته يشرب وردت اجرب.. بس من شفته يلعب النفس بعد ولا دنيتله وحق هو علي.. مو سيف احجي

صادق : ادري المحامي سيف شنو

حكمت : اشش اسكت

محمد : حلو.. كلش زين.. غيرها.. بعد ما عندك منه منه

حكمت : مثل شنو ابو علي.. ما فهمتك والله

صادق : يقصد النسوان هم عندك سوالف تركض ورا النسوان لا .. وترى لا تستغرب احنه محمود عود منه وبينه وابو علي الله يخلي استلمه اكس مربع

محمد : ووين الغلط بهالشي اذا جنت رايد مصلحة بناتي يابو جعفر

صادق : لا ابد ماكو غلط ابو علي هذا حكك

حكمت : شوف شيخ انه ما اجذب عليك واكلك ما عندي نسوان بس مو هسه گبل والله وها ما عندي سوالف بالحرام كله بالحلال الله شاهد علي جنت اذا عجبتني وحده ازوجها متعة بس لأن ما جنت مكون روحي ومو من ذوق امي ما جنت ازوجهن زواج دائم

محمد : اي عفيه عليك مادامك حجيت كلشي وما ضميت عني انته كبرت بعيني.. وجم يوم واردلك الخبر ان شاء الله

حكمت : يعني اكو امل شيخ مو.. لو اروح وهاي هي

محمد : ان شاء الله خير

حكمت : انطيني ماي سويف نكطع كلبي

سيف : على كيفج حبيبتي هاي ساعات الطلوك الاخيرة ..

حكمت : شمالك اسكتتت بعدين مو رح اصير رجل عمتك

سيف : من وجعة ابوي رجل بت اخووي بت اخويي يل اثول

حكمت : اهوو والله متوتر .. يلا ان شاءلله باجر تجيكم الوالده .. بس ابو علي من هسه اكلك ياها امي رح تكابلك وتكعد ويمكن تطلعلك كل خياساتي لا تستغرب.. هذا سويف من يجينه تسولفله من جنت ابـ*ول على روحي وانه عمري 4 سنوات ..

صادق : حبيت امك باجر اله اكابلها واكعد احب العجايز الفضيحة هههههههه

محمد : ان شاءلله خير .. اهلا وسهلا بيكم بأي وكت..

______

" عيون الناس تحسد كل حبيبين .. يردوني ابتعد عنك واعوفك "

عذراء : اباوع لنرجسة لفاتحه الكتب كدامها وجاي تكتب درسها وتدندن بلاغنية مثل كل يوم.. تموت على هاي الاغنية تكول بابا يحبها ويغنيها الي ههه واكلها اي الج .. تموت على سيف يمكن لا مو يمكن اكيد تحبه اكثر مني ههه كلش متعلقة بي ..

وتموت من الغيرة لا شافته يتشاقة وي رهف لو جهال محمد ..

وهوا متخبل عليها بالزايد يكول اموت وماازوجها من تكبر ابد..

ادم : بت الاودم وتت غنا درسي

نرجسة : اهووو لا تصير نفس علاوي غثيث

ادم : علاوي ثاحبي

عذراء : لا تتعاركون ماما كملو دروسكم يلا

نرجسة : ماما يمته يصيرون كيوني وكوثر؟

عذراء : هههه حبيبي شهر بعد ويجون لهاي الدنيا

ادم : يسسسس متحمسس

نرجسة : وانا هممم

خذيت التلفون وضليت اڰلب بالواتباد .. ضايفة قصص وجاي اقرة بيهن واراقب التعليقات على الرواية ..هههه تعلقيات تضحكني وتعليقات تخليني صافنة خو كمية الغلط على سيف لا تحصى .. والتعليقات اليدافعلي ويحبني بيهن اروحلهن فدوه شكد حبابات..

سمر وسولاف ماخذات حساب الكاتبة على الأنستا وسمر حته على الواتساب تتواصل وياها بس انه كتلهن بعدني اخاف لا انطي ولا اخذ .. واغلب احداثي سولفتهن الها من تلفونات البنات..

ماجنت متحمسة ابد وماعبالي رح تصعد قصتنه ونحصل معجبات ومنتقدات .. بس هسه كلش حابة البنات وتعليقاتهن من اقراهن واشوف حبهن ونصايححهن النه كلش افرح احسهن صاحباتنه من زمان مو عرفنه عن طريق رواية وبس..

ماانكر بعدني متخوفة من سيف لا يعرف .. ولو هوا مايكض تلفوني بس يكضو الجهال يمه وخاف صدفة يشوف الواتباد .. لا عرف يبووي ساعتها شيخلصني اول وحده رح تنذب براسها سولاف هههههه نوب يستلم الكاتبة اععع ههههههه يصير كتلنه عمل شعبي

دخل سيف وجايب وياه حلويات للجهال .. كعد يمنه وسئلته : ها شصار؟

سيف : محمد اقتنع بي وانا معاشرة خوش ولد بس بعد ماادري

عذراء : اي واكيد محمد يوثق بيك ومتاكد لو بي عيبة هطول ماتخلي يخطي ويتقدم لهبة

سيف : اي اكيد جا هبة بتنه شلون نذبها شلون ماجان..

خله ايده على شعري وكال : ليش لسه مبلل ولا مشطته بويه تتمرضين بارده لدنيا

عذراء : ستوني سبحت ..

سيف : تعي تعي تعودتي انا امشطلج صدك لو كالو لهس الجلب ولا تلهس مرتك

عذراء : هههههههه ترا على الجاهل

سيف : لا على المره .. كعدني كدامة وشغل الڣير ونشف شعري وبده يمشطة .. واخر شي لفاه وخلالي القراصة ..وكال : هسه صرتي حلوه

دزيتله بوسه بالهوه : شكرا حبيبي

نرجسة : نحن هنااا

عذراء : انجبي ام اللسان

سيف : تصدڪون انا ابد ماتوقعت تدخل بنية لگلبي غير عذرائي ابددد

عذراء : مو وڪت شقه حبيبي

سيف : لا وروح ابوي مو شقة

عذراء : تفاجئت يحجي بجدية .. بلعت ريگي وكتلة : شبيك شجاي تحجي

سيف : اي انا اريد اعترف دخلت لكلبي بنيه غيرج

عذراء : تشاقة

سيف : وروح ابوي مااتشاقة .. وانا اجيت اكلج هسه

عذراء بدموع : يهي

سيف بجدية : نرجستي..

زفرت ونرجسه ركضت لحضنه وهيه تضحك مكيفه على حجية ..

نرجسة : هيييي بابا حبيبي

عذراء : شلون شقة هذا

سيف : ههههه شدعوه عليج ردتي تبجين بطة

عذراء : اسكت هبطتني

كام ادم وحضني وباسني بخدي وكال : انا اعبج ماما يولون همه

عذراء : يبعد الماما واهلها وانا اموت عليك حبيبي

سيف : يلا كومو خنروح للبيت الجبير .. خلصتو كتابة؟

نرجسة وادم : اي

كامو راحو يلبسون احذيتهم.. وانا جاي البس شالي ع المراية واجه سيف من وراي وكال : ليش نازعه الوڰف حبيبي ..

وخر ايدي ولبسنياه وباسني بركبتي وكال : ركبتك مو للكلايد لا حرام ..عدنه شفه تصير خوش كلاده

ابتسمت بخجل :صاير شاعري؟

حرك اصبعه على ركبتي : لا بس شفت هاي البيضه واجه ببالي هلشعر ..

صاحو نرجسة وادم يلا .. ولبست عبايتي وطلعنه

_________

زمرد

مشطت شعر رهف وضفرته وهيه تقره .. دخل منتضر وهوا يصيح : يمااااا يماا

زمرد : خير يمه شمالك

منتضر : شنهاااي الشفتة

زمرد : غير افتهم شبيڪ وشتريد لا تصيح

فتح تلفوني وخلاه بوجهي وشفته داخل ع الواتباد وع القصة مالتنه .. بلعت ريگي وكتلة : شنو برنامج قصص شبيك بعد مخبوص

منتضر : تعرفين شنو الاقصدة وانا متاكد ماكو غير سولاف هيه لكالت الجن لا ونوب حته مرت عمي سيف شبيجنن

زمرد : لا تصيح ماكو شي من لبالك وبعدين انته تحاسبني ولك ادبسزز

منتضر : لو عرفو عمامي رح يسكتون،؟

زمرد : وانته تدور وراي شنو مو شفت روحك طلت تره انا امك

منتضر : مادورت التلفون عايفته رهف جوا وشلته علمود لا ينكسر وفتحته شفتج داخله عليها وجذبني المشهد والاسم وعرفت

زمرد : ماكو شي ينخفي عنك شون عرفت

منتضر : جا يمه ششايفتني غبي بس قريتها عرفت لا وهم زمرد وصادق هذول يهمه فوكاها مسمية عمي محمد

زمرد : اي الاسماء والاماكن متغيرة تره محد رح يعرف

منتضر : وشلون انه عرفت؟

زمرد : الله يخليك ذكي انته وتدقق باصغر شي غيرك لا

طب صادق وكال : شبيك ولك ليش تصيح على امك

منتضر : ماكو شي يبا مخلية التلفون بيد رهف كتلها لا تنشر صور بالغلط

وخله وطلع ..استغفرلله منين عرف هذا ..
نزلت للمطبخ شفت عذراء عدنه وسولاف كاعدة وتاكل ..باوعت وراي وكتلهن : ولجن منتضر عرف بالقصة

سولاف : شلون شتحجين؟

عذراء : يمه كضاني مغص رح اجيب .. هلمرا سيف يدفني بالنجف وويجي اخخ رح اموت

سولاف : ولج خبلة اسكتي شبيج وهمين منتضر مراح يحجي غلسي عنه

عذراء : اخخ ولجن راح اجيب بطني اخخ سيف الحكني

سولاف : ثوول اكو واحد يجيب بالثامن انجبي واسكتي .. دخل منتضر وكال

: ها يما

سولاف : شو مسوي روحك زلمة وانته تراقب امك؟

منتضر : مامراقبها صدفة عرفت .. وانا متاكد انتي السبب

سولاف : لا تصير قليل آدب

زمرد : بالمختصر ضلت سولاف تتلاهد وي منتضر وكالتله لا يحجي وعمامه يخبصونه ومدري شنو .. هوا ماقتنع وكال مسحوها لان شايف التعليقات .. وبالكوه سكتناه ..وعذراء وجهها اصفر وخايفة هههه

مرت الايام وصارت ولادة سولاف وجابت بنتهم الصغيرة وسموها " زنوبه" ووراها بأسبوع اجه موعد عملية عذراء دخلت للعمليات واحنه لسانه يندعي الها بالسلامة ..

والف الحمدلله جابت تؤمها بسلامة " كيان - وكوثر "

ومحمد وافق على حكمت وصارت خطوبة هبة قبل شكم يوم

سولاف : واني والبنات حابين نشكر كل المتابعات الحلوات وتعليقاتهم الحلوه صح البعض ينفعل ويغلط ويتجاوز بس متقبلين كل ارائكم .. نحبكم #بطلات #نوراس_مقيدة

______

مواليد الابطال حسب طلبكم

محمد مواليد 83

وسيف مواليد 87

صادق مواليد 90

سولاف 98

زمرد 95

عذراء وهبة وجنان وبثينه وسمر 2000

منتضر 2008

روضي 2010

نرجسه 2015

ادم ورهف وجعفر 2016

علي 2017

____

وهلاو حبايب شتاقينالجن 🥺🤍🤍🤍🤍

وهذا البارت الاضافي مثل ماوعدناكم ..

وان شاءلله اذا صارت وياهم احداث تذكر انزللكم ..

هسه نريد من الكل ينطلق يضيف #حرام_مباح .. لان ايام ورح ننزل مشاهد من الجز۽ الثاني ان شاءلله ..

جانن وياڪم بنات حڪيم 🖤️.