الثأر الخامـس والعشرون
ثارهم وبنت الفقير
بقلمي_ترانيم هادي ♥️🕊️.
لاتنسون تصوتون عالبارت حلويني
.
وتعاليقكم بين الفقرات لاتنسوها
.
ومتابعه للحساب ♥️🕊️,
taranim_09
_ومانحس غير صوت الطلق وكأن صار علينه هجوم
اريد استوعب الصار للحظات من الرعب ابد موطبيعيه
طكيتها ركضه ورى ضرار اريد الحك على خطواته الطابق الثالث حسيته سوا خطوتين
نزلت جوا عمتي لازمه الولد ماتخليهم يطلعون
بديعه... يايمه وين رايحين
ضرار... يمهه وخري شتردينا نختل مثل الحريم
همه عافوها وطلعو ضلينا بالبيت مانعرف شكو وشصاير ومنو السوا هيچي
ميس... سيرين تعالي
سيرين... وين
ميس... اشش امشي
سيرين... صعدت فوك وصعدت وراها صعدنا عالسطح جان السياج عالي وممبين شي من برى جبنى طابوك وصعدنا عليه
رفعت راسي واشوفهم كلهم مغطين الشارع بس همه الشرار والغضب يتطاير من عيونهم
ضرار واكف بنص الشارع وبصفه اخوته اربعتهم
وولد عمامه واكفين يمه وبيت خوالي
عاينت اجى رضوان بيده سلاحين لزم سلاح والثاني نطا لضرار
اعاينلهم هيبتهم ووكفتهم كافيه انو تخوف اكبر واحد تعجبت عليهم وشلون واحد واكف بص الثاني وبس همه تارسين الشارع بطوله والشرار اليتناثر منهم
سيرين... ميس كولها متجمعه ومبين من جمعتهم مايصير خير
ميس... جا ياهو الندك وي بيت حطام هالتشوفيهم ذياب وتارسه الشارع اذا ماطلعو الرمى علينه منا لباجر مايصير خير وشوفي
سيرين... عفيه خوفتيني شيسوون مثلا
ميس... العادانه نجيبه نعلكه تعلك ههههههه
سيرين... بس شوفيهم شكد هيبه
ميس... احنه الهيبه من الله توراثناها من الجدود
سيرين... اوي كاافي
ميس... هههههه تعالي اشوفج
مشت من الجهه الثانيه صعدنا على الاغراض المخلينهن
ميس... شوفي هذيج الكيعان النا وشايفه هذاك السياج
سيرين... ياسياج مجاي اشوفه بعيد كلش
ميس... ولج عايني زين
سيرين... اي شبيه
ميس... هالسياج هوه اليفصل بينا وبين صوب الحجي وهب
سيرين... جدي
ميس... اي واذا احد بينا اتخطى هالسياج تصير موزين كبل جانت المشاكل كليوم كابه بيناتنا وبين ولدكم وخلو هالسياج حتى يفصل بين صوبنا وصوب جدج
سيرين... وانتي شعرفج
ميس... ضرار يحجيلي ومرات من اروح وياه للكيعان يسولفلي شوي
سيرين... زين هوه شحاجيلج
ميس... شوفي من كبل هوه جان يعتبر جابر الي هوه ابوج مثل ابوه الثاني بس من بعد ماصارت المشاكل كلشي تغير والكره طش بيناتهم حتى جدي وجدج من بعد ماجانو كلها تحجي بصداقتهم تخاربو
سيرين... وين الكاع الي بسببها صارت كل هالمشاكل
ميس... عايني ليغاد شايفه هذاك السياج اليمه سعف صايره بطرفنا وبطرف هذاك الصوب
سيرين... اريد اشوف اهل ابوي
ميس... ماعتقد عبن جدج طرد ابوج من الديره ومامسموحله يدخللها والاعرفنه من سنين محد شايفه ولاسامعه ضرار كال نهد من طلعتي انتي وياه من الديره جان يجي مرات بس من درى الحجي ماراضي ومانعه حتى من عتبه الدار يخطيها
سيرين... وضرار شعرفه بكل هذا !!!
ميس... من كبل ولدنا وولدكم جانو حيل قريبين وماممكن مثل هيج عداوه تفاركهم
سيرين... شنو قصدج
ميس... بعدين تفهمين شنهي بس ضرار باختصار الطير من يحط عالحايط يدري بيه منين جاي وهوه عنده معارف وصداقات بهذاك الصوب
سيرين... هالضرار يخوف
ميس... لامايخوف بس ماتحزين تصرفاته وشنهي الباله هالتشوفي واكف بالشارع ومتأكده يعرف منو الدخل صوبنا واتجرأ يرمي علينه
سيرين... يعرف !!!!
ميس... الحجي هواي ومايخلص امشينا طولنا
سيرين... اي امشي
نزلنا جوى لكيت النسوان كلهن جايات شبسرعه اجن
شافني منهن ماهتمن ومنهن ماعجبهن وجودي عفتهن ورحت لغرفه عمتي جان كاعدات بيها اثنين نسوان كبار
سيرين... سلام عليكم
رحاب... هلا يمه تعالي خل احبنج
رحت يمها باستني وكعدتني بصفها
رحاب... شلونج يمه ضرار شلونه وياج
سيرين... الحمد لله
بديعه... يمه سيرينه خافن ماعرفتيها تصير مرت جدج حيان
سيرين... ممم هلا بيج
رحاب... باسمه شمالج خايبه ماسلمين
باسمه... تعالي ليه
سيرين... كمت كعدت بصفها سحبتني من راسي وباستني،
باسمه...بت دنانير كبرتي ولاجن الي جنتي هالكدج
سيرين... محد يضل على حاله انه امي مودنانير انه امي نهايه وماعندي ام غيرها
رحاب... يا يمه جا وامج دنانير شهل حجي بنيتي
سيرين... الام هي الي تربي وتعتني باطفالها ودير بالها عليهم مو الي تشمرهم ولاتسال عليهم متعرف ميتين او عايشين
باسمه... حقج جده حقج
رحاب... ياا صدك ماكتلج باسمه صير ضرتي عبن انه مرته الاولى لجدج بس لان ماخلف اخذ باسمه وصار عدها ذاكر ورسلان ودنانير
سيرين... يعني ثنينكم تصيرن نسوان الحجي حيان وجداتي
باسمه... چا ليش تكولين الحجي حيان هوه هم يصير جدج
سيرين... ماشفته بيوم مرلي لودرى شبيه ومن بعد ماعرفت هوه الشمرني على اهلي مبين وجودي ماعاجبه
رحاب... يايمه لاتحجين هيج راد يردج لامج بس بوكتها طلعتو من الديره ومادرينا وين صرتو
_دخلت رهف للغرفه لعابتها بيدها وشعرها مفتوح
رهف... امه امه ثينه اكه
سيرين... ياروح ماما تعالي ليه
اجت عليه شمرت نفسها بحظني وتحجي ابد مافهم على كلامها والاكثر كلمه ترددها سيرينه الوكحه
ضليت شوي كاعده يمهن وكمت جانن نصهن كاعدات بالاستقبال ونصهن بالصاله والبنات بالمطبخ يسوون جاي
رحت يمهن لان ماعرف وحده بيهن نسوان خوالي وزوجات عمام ضرار
مياده... خايبه وين جنتي
سيرين... بغرفه عمتي ليش
جنوب... صارن يدردمن عليج يكولن تتخوتل وذابه الشغل على البنيات
سيرين... عشتو والله اشوفن ياهي تفك حلكها
مالكه... هييي شبيجج
سيرين... هي بعينج احترمي نفسج واعرفي احجي
شمرت الستكان من ايدها ووكفت كدامي
مالكه... خايبه الفاهيه وهم الج عين وتحجين بت المجرم
سيرين... كلشي اتحمل بس هالكلمه ماممكن اتحملها وجايه تكولها بوجهي وتنتر بالحجي
لزمتها بقوه من حجابها وسحبتها والبنات يوخرن بيه
_بااااعي لجج مووشفتيهن ملتمات وصرتي مرره براسي لااا غلطانه ولسانج اكصه واخلي كدامج اذا جبتي سيره ابوي على لسانج الوصخ انه لخاطر عمتي وعزام محترمتج وكل هالمده مستخطيتج اذا جاوزتي حدودج مره ثانيه اخلي ضرار هوه اليصرف فااهمه يلله ولي لشغلج وسدي حلكج والااشوفج شي ميعجبج واشوفج بت المجرم شسوي
ناهد... سيرين عووفيها مالنه خلك مشاكل بهالهوسه
مالكه... وخررري يالعار انه اعلمج شلون تمدين ايدج عليه
دفعتني بقوه نضربت رجلي بطرف السنك حسيت روحي شاغت من الالم اعاين لرجلي الدم ضل يتنافر وكان الاضفر نشال من مكانه
دانه... كسر يالهايشه خايبه كومي شوفي رجلج
سيرين... مابيه شي بس نضربت بالسنك
مياده... كومي بالله خل نشدها
كومتني مياده من ايدي جرت الكرسي وكعدتني راحت جابت طاسه مي ووياهن شاش ومعقم
ضلت تغسل برجلي من الدم خلصتها ولفتها
مياده... يله كومي خلصت
سيرين... شكرا
مياده... دكوومي خايبه وامشي يم عمتي عبن هالحيايه يسمعنج حجي ومايركدن بدون مشاكل
ردت اروح ودخلت مرت خالي مهجه ودنانير
مهجه... ولججج شلون تمدين ايدج على تاااج راسج يالصفره ترحيلها فدوه فوك ماملفينج ومخلين بت جابر المجرم بيتهم جايه طولين ايدج عليها
دنانير... كلشي اتوقع من بت جابر ويلااا ولي لاشوفيناا وجهج وخل اشوفنج جدامي يالفكر
سيرين... كلامهن احسه سجاجين ويطعن بكلبي اريد اجمع الاحرف وجاوبهن ماكدرت اذا حجيت الشهكه تبين بصوتي
الدمعه بطرف عيني صارت على صوتهن اجت عمتي والحجيه
سلافه... شمااالجن اصواتجن تلعلع
مهجه... مااكو شي حجيه بس الاحسن بت هالمجرم تحترم روحها وتعرف قدرها شني حتى لاتعلي نفسها على اسيادها
ضربتها سلافه بطرف العوجيه على معدتها بحيث لزمتها بألم
سلافه... خايبه ام الوصخ شلون تحجين وي مرت حفيدي هيج لونسيتي روحج بت الفلاح وبجال رسلان عليتي روحج
دنانير... شمالج حجيه فوك مامدت ايدها على مالكه وطولت لسانها جايه تدافعيلها
مالكه... اي حجيه وفوكاها تطول لسانها وياي ولوسمعين حجيها
سلافه... نجبن يالحيايه هيه مالكه لومامثلج وثنينجن نفس السم ماجان حاجتها
عاينين عليه يالعوبات وروح وليدي الاشوفنها محاجيه سينه لوذابتلها حجي امسحن بيها الكاع وطردها من بيتي يلللله امشن من جدامي ولاتتعايرن لابارك الله بيجن
بديعه... سيرين مرت ابني واحنه مامسوين عليها منيه وملفينها دامه بيت رجلها وعيالها فهذا البيت بيتها
هنه ماعجبهن الحجي عافنا وراحن
سلافه... خايبه يالغاكه لاضلين تفترين امشي جعدي
سيرين... هزيتلها راسي واني الدمعه بطارف عيني ماريد ابين ضعفني كدام احد
رحت لغرفه عمتي كعدت يمها وهنه يسولفن واستمع لسوالفهم ورهف يمي
لشووي وكلهم اجو البيت نكلب بصواتهم همه عود يحجون عبالك جاي يتعاركون
الجايات نسويها ونرد ليورى ضلينا نحضر بالعشى وانه اريد المح واحد بيهم ضرار ماكو لاهوه ولارضوان مدرين وين رايحين
___________________ في مكان اخر
زكريا... نزلت من سيارتي اتانيهم وهمه شوي واجى اعاينلهم جايين وكلواحد بيده سلاحه
زكريا... خير شصاير
رضوان... لك سـ*** سلم بالاول
زكريا... عليمن وانه كبل جم ساعه جنت يمكم
ضرار... وخر الجكاره من حلكه وشمرها،الرمي اليوم الصار يم بيتنا اهلك وراه
زكريا... چا انه موخابرتك وتأكدت محد من عدنا واصل لصوبكم
ضرار... الك**يد بالكامرات جانو ملثمين وبدراجات مابيهن رقم وراحو بتجاه صوبكم
زكريا... احد ابالك !!!!
ضرار... انه متأكد منو بس هينه اعرفن شلون اطيح حظه
زكريا... وشوكت تفض السالفه موجن طولت
رضوان... لحد هسه جاي ندور عليه وجن فص ملح وذاب
ضرار... شنهي الاخبار يمكم
زكريا... موزينه جم يوم وعمي راد وعبن حالته كلمالها تنتكس ابوي ضال يمه وباجر انه رايحلهم
ضرار... اصبر عليه وانه احلها
زكريا... لك سـ*** شصبر عليكم فوك مالبت لحد هسه ضاله يمك ماعرفن شني حالها وتكلي اصبر
ضرار... وجه الجوب جا هيه وين ضاله غير ابيتي ومرتي
زكريا... لاتضل تضـ*** بكيفك مامحسوب هالزواج دام بدون علم اهلها وشهود ماكو
ضرار... اكعد لك لاصير براسي شيخ وانت كلك خلك منـ*** دامها مرتي محد يفك حلكه
زكريا... اي بعدين نشوف يله ولي
ضرار... الله وياك وخابرني كبل لاتروح باجر
زكريا... انشالله
سيرين...
لليل يالله رجع ضرار هوه ورضوان ماحجو ايشي ولاجابو سيره عالصار
جانو كلهم كاعدين بالاستقبال حتى النسوان هالشي عدهم عادي ومولازم يتقيدون
ضليت بالمطبخ ورهف يمي واستمعلهم ماريد اسمعلي كلمه تغثني من وحده منهن واعرف وجودي بيناتهم مامرحب بيه
وكلامهن لحد هسه يرن بالي الدمعه بطرف عيني تلالي بس احد يكلي بز ابچي
سيرين... الشويب حتى ماسأل وكال وين راحت العوبه الجبتها ملتهي بيهم وعاايفني
رهف... ابه
سيرين... اي ابوج
ضرار... شبيه ابوها
عاينت وراي جان واكف ومكتف ايده اجى تقدم عليه سحبني عليه وباسني من كصتي
ضرار... ليش كاعده بوحدج
سيرين... احسن
ضرار... لاتعزلين روحج وامشي كعدي يمهم حالج من حالهم
سيرين... لا بالنسبه الهم انه غريبه وبنت مجرم كعدتي وياهم مراح تناسبهم
عكد حاجبه مستغرب كلامي نفخ بعصبيه وكأن عرف البيه ...
ضرار... احد محاجيج !!!
سيرين... انه كلي هيج لوردتها حجه حتى بس ابجي سحبني عليه بقوه وحظني ويهدي بيه
اجت ميس ومياده وهوه بعده حاظني
ضرار... ولج احجيي يااهو وياج
سيرين... محد وياي بس هيچي ضايجه
ضرار... وهوه كلمن يضوج يكعد يشهك بالبجي مثلج
مياده... خايبه شمالج ماتحجين مالكه ودنانير ومهجه هالحيايه التمن عليها وتعاركن وياها
ضرار... شمالهن مسويات وليه عليها
سيرين... كعدن ميس ومياده سولفله كلشي وبالحرف الواحد وهوه العصبيه نطت من عيونه
ضرار... هينه هالبرابيك انه اعلمهن شلون يتعالن عليها ويجاوزن
عاين عليه مسح دموعي بأيده وراح وميس راحت وراه
سحبتني مياده من ايدي ووكفنا باب الاستقبال نستمعلهم
مياده... شوفي شراح يسوي بهالبرابيك على كولته
سيرين... هههههه شيسويلهن
مياده... يهينهن باحترام
ضلينا واكفين واستمع لحجي ضرار
ضرار... عمي رسلان من رخصتك
رسلان... هلا بويه خير
ضرار... كل خير عمي انه راح اجيلك وانت احكم دام كلها كاعده وبوجود جدي
حطام... احجي شنهي الصاير
ضرار... كلها تدري سيرين مرتي وكلكم تدرون انه عاقد عليها سيد ومحكمه ومطيها كل حقوقها كزوجه من جبتها ابيتي وصارت جنه بالهبيت ومني وبيه من جبتها مومعناها لفيتها وخليتها يمي موهيج عمه
وجهه نظره على مهجه وهيه وجها انكلب قريقوز من التوتر
مهجه... ها اي يمه صح كلامك
ضرار... دامه كلامي صح انه ماريدن ادخل بيناتجن واعرفنها عركه نسوان بس زحمه عليج من تجين وتكليلها ضرار ملفي بت جابر المجرم وفوكاها مسويه روحج تاج راسها انه مرررتي اي شي يمسها يمسني وكلشي يصيبها يصيبني ماااجبتها حتى كلساعه تجي وحده وتسمعها حجي مايعجب
رسلان... ولج يامره هالحجي صدك !!!!
مالكه... يابه تراها هيه طولت لسانها ويايه خوما تريدلنا اعاينلها شلون تجاوز عليه
عزام... لاتررراددين الاكبر منج ومن يحجي وياج جاوبي
ضرار... بشنو جااوزت هااا ؟؟؟؟
مالكه... هاا
ضرار... انه اعرفنها ماتفك حلكها اذا ماحد يمسها بحجايه ومرتي من تجي وتجاوز عليج تعالي ليه وانه اعرفن شلون اصرف وياها موتسون وليه عليها وواكعاتلها بنص البيت تجاوزن عليها
عزام... خويه اعذرني وهالشي ماراح يتكرر
ضرار... مابيناتنا هالحجي خويه مرتك وانت تصرف وياها بس ردت احجي هالحجي جدام الكل سيرين مرررتي اذا بيوم حجت حجايه موزينه لوجااوزت وي واحد بيكم انه موجود واحاسبها ماحد اله حق ويحاسبها بدالي
رسلان... ونعم منها ومن تربايتها ودامها بتنا اعرفن مايطلع منها شي موزين
دنانير... يله خويه ماصار شي سالفه وفضت ليش نكبرها
ذاكر... الاحسن تسكتين لوبيج خير ماجان صرتي عدو لبتج
هيه عوجت حلكها معاجبها الحجي سمعت صوت ضرار يصيحني ردت اطفر للغرفه ومياده لزمتني
مياده... يالعوبه وين راكضه
سيرين... عفيه عوفيني وليش صاحني
مياده... خايبه دمشي مابيج خير
راحت شالت رهف واجت سحبتني من ايدي بس دخلنا كلها توجهت انتظارهم عليه من المستحه حسيت حيغمى عليه راحت مياده كعدت
كام خالو رسلان اجى يمي باسني من كصتي ووخر
رسلان... مسحيها بوجهي بويه ولاتتكدرين من هالنسوان
سيرين... خالو ولايهمك ماصار شي
رضوان... خيتي تعالي يمي لاضلين واكفه
سيرين... ردت اروح اكعد وسحبني ضرار
ضرار... وشسوي جايه يمك اكعد ومالك شغل بيها
رضوان... والله حلوه هاي اختي واريدن اكعدن يمها
ضرار... موانه طرطور جدامك
سحبني وكعدني بصفه وهمه رجعو يسولفون تعجبت عليهم ليش مافتحو الموضوع واصلا ولاجابو سيره تصرفو عادي الاحسن من نكون بحدنا اسأله اي هيج افضل
سيرين... شكرا
ضرار... على شني !!!
سيرين... لان دافعتلي كدامهم واخذت حقي من هالسعالي
ضرار... وجج بويه هذا واجبي ولازم يعرفن ويامن يحجن كبل لايسوون عصابات وعلى منو على مريتي
حيدري... شاركونا بالحجي چاي تحجون
ضرار... مالك شغل
انمار... كاعدين يمنا وتتهامسون چا احنى وين عنكم
بسول... مالكم شغل هوه ومرته
رضوان... يله انه رايح
حطام... وين بعد وكت
رضوان... باچر لازم اسافر ولحد هسه كلشي مامحضر التهيت انشالله غير وكت
سلافه... چا يمه اته يوميه مسافر
رضوان... حجيه شغل ولازم انه اروحن واشوفن البضاعه
ضرار... شوكت ترد
رضوان... شهر تقريبا
ضرار... تانيني جاي وياك
سيرين... لليل كلها راحت واني احس حيلي نهد كضيناها انه والبنات نضفنا البيت
وكلوحده صعدت لغرفتها رحت سبحت وبدلت جسمي مكسر ولاحس بيه
اول ماحطيت راسي عالمخده نمت من التعب
سيرين...
ايام مرت على الحادثه الصارت بعدها محد جاب سيره ولافتحو الموضوع
حياتي وي ضرار شوي بدت تتحسن وخاصه هوه تعامله زين وياي ومامنقص شي عليه وتصرفاته وياي متحسنه اكثر من قبل وهوه مكضيها يوم يمي ويوم يم مياده الشويب يعدل بينا
مياده على حطتها مرات ضرار يسمعها تتداهر وي عمتي وهوه كلشي ولاامه يوكع بيها ويضربها
يكعد يفهمها يحجي وياها
وهيه مايفيد وياها صرت اني ادافعلها واوكف بوجه خافن يأذيها لويسويلها شي
وبت عمتها تجينا كل شهر اعرفها من تجي يعني تجيب حبوب مانع وهيه حتى لوضرار مايتقربلها مستمره تشرب
علاقتها وي ابن خالتها مستمره وكلما ضرار يجي يمي تضل تتصل بيه نصحتها هواي وحجيت وياها وحتى هوه اكثر من مره نصحها خافن احد يسمعها وخاصه ضرار اذا درى بيها بس هيه ماتقبل وكلش متعلقه بيه بحيث مرات اعاينلها روحها تلوب ومن اسالها تكلي اليوم ماسمعت صوته ولامطمنه عليه كلش انقهر عليها بس مابيدي شي
تعبت من الحجي وياها وانصح واحجي ولاكان تسمعني والاكثر ذنبها عليه وسرها يمي لاكدر انطي بيها ولاكدر استمر اضملها
صرت باليوم الي يكون ضرار يمي اضل اراقبلها خافن احد يشوفها لويسمعها تخابر بيه
اما جنوب ماكو على لسانها غير ازان اعاينلها مثل الفراشه فرحانه بحبها اله ويوميه يتخابرون بمبايل عمتي بدور وبهالمده علاقتهم قوت كلش تمنيت فرحتها تدوم وتضل فرحانه
اما عرس غيث طول كلش وكلما يردون يحددو يأجلها وضالين يلحون عليه وهوه ميقبل
ورهف حبيبتي صارت قطعه من روحي وبنت الي ضحكتها وسوالفها مالياتني صرت انه مسؤله على كلشي يخصها وهيه تعودت عليه ماكو على لسانها غير ماما
الحجيه وغيد كل مده يجونه لوضرار ياخذنه الهن وماكو شي جديد بحياتهن غير غيد احسها متغيره وموعلى بعضها دومها شارده واذا اجتنا تضل تتلفت وتكعد على اعصابها وكأن بيها شي
سيرين...
مثل كل عصريه كاعدين اني وميس ومياده ورهف تلعب هيه وبنات عزام وبنت انور بعمر رهف يوميه يجيبها يمنا وتضل تلعب وي البنات
اجت جنوب طايره اعاينلها الضحكه شاكه حلكها والفرحه بعيونها
مياده... خير شمالج
جنوب... قبل شوي من جنت بغرفه عمتي جانت تحجي هيه وامي وكالت مالكه راحت لاهلها حتى يخطبن لازان وكبل كم يوم كالي راح احجي وي امي وتجي تخطبج
ميس... صدددك عالخير خيهه
جنوب... متدرن شكد فرحااانه والله طاايره من الفرح احس كلبي حيوكف يرربي
سيرين... هههههههه على كيفج وي روحج
جنوب... كللي هسه شسوي خافن يجن ويلكني جني سعلوه
مياده... خيه كومي عدلي واحنى هناه
جنوب... اي رااايحه
ميس... سيرين روحي وياها تخبلت البت هههههه
سيرين... اي رايحه
كمت وراها لكيتها طلع بالملابس وتشمر بيهن
جنوب... اجيتي بوكتج حايره شلبس وكلشي مجاي يعجبني
سيرين... انتضريني عندي دشداشه مرتبه شتريتها من بغداد تلوكلج
عفتها ورحت جبتلها الدشداشه وختاريت وياها شال يناسبها
رجعت لكيتها كاعده عالجربايه وصافنه
سيرين... جنوب شبيج
جنوب... ماعرف شبيه فجأه نقبظ كلبي خايفه كلش
سيرين... رحت كعدت يمها لزمت ايدها بارده كلش وترجف ، على كيفج اهدي ليش هالخوف
جنوب... ماعرف سيرين ادعيلي فرحتي تكمل وانجمع وي الاحبه ابد ماتتخيلين شكد تمنيت هاليوم وهوه يحجيلي شلون ننجمع سوا واصيرن مرته وبأسمه
سيرين... انشالله يربي وهسه كومي قبل لايجن وبطلي هالخوف مجرد متوتره
جنوب... اي يمكن
سيرين... كامت سبحت وبدلت شسورتلها شعرها وظفرته ظفيره راخيه وشوي حمره خفيفه وحكل
جنوب... شلوني
فجأه دخلن ميس ومياده
ميس... تخبلين
مياده... خايبه شنهي شطالعه كيك
جنوب... هههههههه لاتخلني انغر
سيرين... يله تعالن ننزل
ميس... خايبات اوكفن چا احنه وحد هم خل نعدل رواحنا
مياده... سويتلي واهس خنروح اعدل روحي چا انه غير احلى منج
سيرين... هههههه مااشي
_ راحت كل وحده لغرفتها خلصت ونزلت جوا جانن كاعدات بالصاله اول مانزلت دخلت مالكه الضحكه شاكه حلكها
مالكه... هلا
بديعه... هلا يمه
مالكه... عمه اليوم موكتلج حنروح نخطب لازان
بديعه... اي وشصار
وجهت نظرها لجنوب ورجعت عاينت لعمتي
مالكه... خطبناله وحده من ديرتنا والخميس المشيه
_هيه كالت هيج وكأن صاعقه ونزلت علينه اعاين لجنوب كوا حابسه دمعتها وتعاين لمالكه بعدم تصديق
سيرين... جننوب تعالي شوي اريدج تساعديني بشغله
رحتلها سحبتها من ايدها وصعدنا لغرفتي
سيرين... جنوب
جنوب... شقصدها الخميس المشيه ها ؟
سيرين... اهدي شوي
جنوب... سيرين شهدااا سمعتيها شكالت كالت خطب اي خطب غيري يربي شلون يسوي هيج موكال احبج بس الج سيرين والله هوه كالي كم يوم واخطبج شوفي هالخطب غيري
كعدت بالكاع تبجي ومخليه ايدها على حلكها تحبس صوت شهكاتها حضنتها وضلت تبجي بحظني
جنوب... فدوه كليلي السمعته جذب يحبني والله مايسوي هيچي مستحيل يخدعني ويجذب عليه
سيرين... عايني عليه افهمي السالفه منه يجوز مالكه غلطانه
جنوب... سيرين فدوه اروحلج جيبيلي مبايل امي
سيرين... شلون
جنوب... ماعرف بس اريد احجي ويا اريد افهم منه
سيرين... اووف انتظريني
نزلت لغرفه عمتي جانن ملتهيات يسولفن رحت دورت على مبايل عمتي بدور لكيته مشمور عالجربايه اخذته خليته بملابسي ورحت
لكيتها كاعده عالجربايه وتبجي نطيتها المبايل واتصلت عليه يمكن فوك الخمس مرات تتصل وميجاوب اخر شي يالله جاوبها
جنوب... الوووو
ازان... جنوب
جنوب... شهكت بالبجي وحجيت، ازان فدوه كلي شهالحجي م مالكه كالت الخميس المشيه شقصدها
ازان... اهدي وافهميني
جنوب... ااااحجي كلامهااا صح
ازان... جنوب اسمعيني
جنوب... اااااششش وجاوبني اي او لا
ازان... اي
جنوب... حست مثل واحد وصحاني من الحلم الجنت عايشه بيه بهالحظه فقدت شعور الفرح الجان محاوطني اريد استوعب الكلام الكاله
ازان... جااوبيني
جنوب... ليش سويت هيچي ؟
ازان... وداعتج مجبور
جنوب... ههههه مجبور
ازان... موبيدي جنوب امي وصلت للموت بسببي حجيت وياها وحاولت اقنعها مارضت
جنوب... وشبيه حتى ماتقبل هاا كلي ليش سويت هيج ليش ماتمسكت بيه وبهالسهوله عفتني ليش علقتني بيك عيشتني بحلم وردي وكلام ووعود يعني كل هذا هيچي ويننننه كلامك موكتلي هالايد ماتخلى عليها بيوم ههههههه ابشرك اجى هاليوم وكدرت تتخلى عني
ازان... حبيبتي فدوه اروحلج لاتحجين هيچي ولج لاشلعين كلبي والله موبيدي
جنوب... ااااش لاتكول حبيبتك اسمعني وخلي هالحجي بالك من اليوم انسى جنوب كلشي بينا انتهى وها عالخير على خطبتك وانشالله انه حكون اول الموجودين
سيرين... اعاينلها منهاره وتحجي وتشهك بالبجي دموعها ابد ماتوقفت سدته منه ونطتني المبايل
وجهت نظري للباب واشوفن ضرار واكف....
تكـول جـنوب . . .
لم اتألم لاني عرفتك ... بل لأني اكتشفتك
_ يــــتـبــع . . . . .
والي عنده سؤال استفسار ايشي يجي عالنستا♥️,
حسابي الانستغرام :
taranim.hadi