الثأر التاسع عشر
ثارهم وبنت الفقير
بقلمي_ترانيم هادي ♥️🕊️.
لاتنسون تصوتون عالبارت حلويني
.
وتعاليقكم بين الفقرات لاتنسوها
.
ومتابعه للحساب ♥️🕊️,
taranim_09
_ وكعت على ركبي وانه جسمي يختظ مثل السعفه موكادره استوعب شي بس صوت وشوشه يرن بأذني
اخر شي شفته ضرار وهوه لازمني بعدها انعدمت الرؤيه عني ماشفت غير بس الظلام
ميس...
اعاينلها شلون تحجي بحركان كلب وتتوسل بيهم حتى يرجعوها
ومانحس غير وهيه وفاقده كلها نخبصت بيها اشوفن اخوي روحه راحت عليها يريد يلزمها مايكدر من ورى رجفته
ضرار... عبببايه بسرررعه
ركضت جبت عبايه وشمرتها عليها شالها بسرعه وراحو
عفتهم ورحت للمطبخ واني روحي تلوب شصار بيها
جنوب... شصابها هالبت
ناهد... جا ماشفتنها نزلت مدمايه
زها... شوف شعملتلها حتى يطكها
جنوب... عشتو حجت اسكتي احسلج
زها... بسرعه صفيتي وي بت جتال عمنه
جنوب... وهيه شعليها سالفه مابيها خير لاتحجيها وخليها بحلكج
ناهد... كافي ولجن شني هاي اصواتجن
ميس... الدنيا كايمه وانتن مسويات حزازيات
_دنحجي ودخل هارون ابن عمي رسلان خال سيرين
هارون... هلا يابه شلونكم
زها... هلا بيك وين هالغيبه
هارون... هساه اجيت شنهي الصاير وصدج ضرار جايب بت عمتي دنانير ومزوجها
ميس... البت بالمستشفى ومانعرف بحالها وانتو ضالين دققون شلون سالفه هاي
هارون... اسكتي انتي ماعاجبج لاتفكين حلكج
ميس... مو انت تقرر شوكت افكن حلكي او لا روح مناا احسلك لااصيحن عزام واخليه هوه يصرف وياك
هارون... تمردتي هواي ميس بس هينه
هز راسه ومشى جريت الكرسي وكعدت
جنوب... شمالج ولج شحجى هوه واكلتي بكشوره
ميس... كافي سدو السالفه
سمعت عيطه من الاستقبال كمت رحت للاستقبال لكيت عمه دنانير مفرفحه من البجي وعمي رسلان وذاكر يصيحون عليها
رسلان... تالي عمرج خرفتي چا بتج مايهمج شصايبها
دنانير... ماكلتووو بتي من اخذتوها ورحتو شمرتوها لوهسه صارت بنتي
رسلان... جم مره كنالج نرجعها الج البت مالها ذنب وشسويتي ماهمج ماتت لوعاشت ورحتي ازوجتي
حيان... شمالكم انهديتو عليها البت راحت يم اهلها وسالفه فضت وراحت جايين هسه تفتحون دفاتر حتيجه
ذاكر... دام السالفه فضت وراحت ليش جبتووو البت من بعد هالسنين وفوكاها خاطفها وجايبها يسوحل بيها وتنزل من فوك مدمايه
حطام... وهسه هيه مرت حفيدي ودامها صارت مرته فهيه محسوبه علينه مالكم حققق جايين وتردون تردوها رجلها موجود وهوه اليقرر ترد يو لا
رسلان... وحفيدك شسوا ياعمي مونزلت من فوك وجه مامبين من الضرب
حطام... وجن كبرتو وصارت اصواتكم تعلا عالاكبر منكم حيان كض ولدك وخليهم يحترمون المجان الكاعدين بيه
رسلان... اعذرنه عمي بس البت تصير بت اختنا واذا اختنا شمرتها وماسألت عليها احنه مومثلها دامها محسوبه علينه احنى بمجان ابوها ومسؤلين عنها
حطام... وانه البت بأمانتي ودامها داست عتبه بابي انحسبت عليه وهسه كعدو وعيفو الحجي خلنا نعرف شصايبها عزام شوف اخوك وينه
عزام... جدي ضرار عايف مبايله ماماخذه وادكن على بسول مايرد
سلافه... بس لاماتت ونوبه نبتلي بيها
رضيا... وبيش مفاوله البت موتيها بسرعه
سلافه... انه موعليها على حفيدي چا هيه وحد من امها ماوراها بس المشاكل ودوخه الراس
وباوعت على عمه دنانير بطارف عينها
رحاب... طب الجره على فمها تطلع البت لامها
دنانير... حجت الخوثه
حطام... كاااافي شنهي هالحجي
دنانير... يله اودعناكم اروحن انه تعبت من الهوسه
سلافه... روحه بله ردوه چا شكو عايفتلي بتج
دنانير... حجيه بتي ضاله يمكم لاتنسين صارت مرت حفيدج
حجت اخر كلمه شمرت العبايه على راسها ومشت
رسلان... يله اودعناكم اذا ردو امرلكم
_راحو بيت حجي رحاب كلهم وضلينه بس احنى
بديعه... يمه اخذتي بت اخوج وكليها شي
ميس... تعالي ليه
ميس...
لليل وهمه ماكو كاعدين ودخل علينه اخوي بسول
بديعه... ها يمه وين صرتو
بسول... هلا يالغاليه ماكو شي بس متعرضه لانهيار عصبي
سلافه... مايصيبها عرج شمالكم خبصتونه عليها
رحاب... ياعمه هسه البت حالتها حاله ليش هالحجي
سلافه... اركدي اتي ولاتفكين حلكج
رحاب... هوه هذا اليحجي الحك ماتردونه
رضيا... ياحك هذا واتي كاعده ودردمين هناه
سلافه... بسجن ولجن ضلن تتناكرن كومن مني دوختني
بسول... خيتي كومي حضريلي شي للبت مبين اذا اضلن منا لباجر مايخلص مناكرجن
سلافه... چا اخيك وينه
بسول... ضل وياها
سلافه... يايمه تعب هالولد نوب اجته هالغاكه ابتلى بيها
بسول... جده تراها البت ابتلت بضرار شلها خرض وهوه جابها سحول من اهلها
سلافه... مالك شغل خله شيسوي خل يسوي
هز راسه معاجبه الحجي وطلع كمت وراه
بسول... حاخذ رباب واروحن للمستشفى
ميس... شوكت تردون
بسول... بعدهي ماكاعده خل تكعد ونشوف
ميس... انشالله
سيرين...
كعدت على اصوات قريبه مني وريحه الديتول تزرف بخشمي وراسي مصدع
فتحت عيني عاينت بارجاء الغرفه بس اني والممرضه توخر بالمغذي
سيرين... انه شسوي هناه
_اهلا حبيبتي شلون صرتي
سيرين... عفيه راسي يوجعني
_هسه اشوف الدكتور حتى يشوفج
سيرين... زين انه شبيه
_متعرضه لانهيار عصبي
سيرين... عافتني ومشت شوي ودخل الدكتور ضل يحجي واني بالي مويمه
معقوله عايفيني بحدي ليش ماكو احد يمي ،برطمت والدمعه صارت بطرف عيني
واشوف بسول ووياه وحده اول ماشافني ابتسم
بسول... حمد لله على السلامه خيتي
سيرين... الله يسلمك
بسول... دكتور شلون صارت
_الحمد الله بس لازم تبتعد عن الظغوطات وماتضغط على نفسها ومثل ماكتلي هيه سبق واتعرضت لانهيار عصبي لازم ديرون بالكم اكثر
بسول... انشالله هسه نكدر نطلعها
_اي تكدرون
طلع الدكتور واجت البنت تقدمت يمي وتبتسملي
رباب... خيتي حمد الله على سلامتج
سيرين... ها
رباب... ههههه انه مرت بسول
سيرين... هلا بيج عذريني ماعرفتج
بسول... اتي اصلا ماتعرفيها شمالج
رباب... حقها دايخه وماتندل دربها
بسول... ههههههه يله حضرن نفسجن انتضرجن برى حتى نروح
طلع هوه وانه كمت اعدل بحجابي وعباتي
خلصنا وطلعنى هوه يمشي كدامنا وانه بلكوا امشي احس حركتي ثكيله وبلكوا اجر بنفسي
_اول ماوصلنى الدمعه صارت بطارف عيني يعني شلون ماخلص منهم
سيرين... ليش جبتني هنا !!!؟
بسول... خيتي هذا بيتج منا وجاي
عافني ومشى مشيت وراهم اول مادخلنى شافتنا ميس ورهف جانن كاعدات بالمرجوحه مال حديقه
اجت عليه باستني وتحمدلتي
ميس... شلون صرتي
سيرين... احسن
ميس... چا وينه ضرار
بسول... عنده شغل وراح
رباب... يله خنفوت جوا خوما نضل واكفين
بسول... ديربالجن على سيرين انه فايت ارتاح تعبان
عافنا وراح واتبعته رباب
ميس... تعالي نطب جوا
سيرين... عفيه ماريد ادخل جوا ونوب كلهم موجودين
ميس... يا ولج محد هناه كلها طشت لابيوتتها
سيرين... ليش موكلها عايشه هناه
ميس... امشي وبعدين نسولفلج
رهف... افه (نفاخه)
سيرين... جاي تكول
ميس... تريد ابوها وصالي ساعه اقنع بيها عود راح يجيبلها نفاخه ويرد
دنكت عليها وشلتها وحلكها مدمر ككو وعيونها بلكوا مفتحتهن مبين نعسانه
مشينا انه وميس فتنا من يم الاستقبال الحجي بس شافني صاحني نزلت رهف ورحت
جان كاعد هوه والحجيه هيه شافتني دارت وجها معاجبها
حطام... تعالي بنيتي كعدي هناه
رحت كعدت بصفه اعاينله صح هوه جبير بالعمر بس مرتب وحلو نفس ضخامه ضرار ونفس الملامح ينطيه شوي شبه
وجهه كله نور والابتسامه مرسومه على وجهه بس الحزن باين بعيونه
حطام... شلون صرتي بويه
سيرين... الحمدلله
حطام... بويه اتي دامج مرت ضرار صرتي محسوبه علينه ومنا وبينا واعرفن ضرار شلون اخذج من اهلج وانه اوعدج تردين لاهلج بس اصبري علينه
سيرين... شوكت يعني !!؟
حطام... موهسه موهسه بس خل تفض وتردين وهسه بويه هالبيت بيتج واحنه اهلج اتعودي على عيشتج هناه هالفتره وكلشي تحتاجي انه موجود مثل جدج وضرار يكفي ويوفي
سيرين... حجي انه مارايده شي بس تردوني لاهلي
حطام... هذا هوه
سلافه... بت جابر وجن ماعاجبتج العيشه هناه
سيرين... وانه شفت منكم
سلافه... ولج عوبه وترادين
حطام... بسج يامره شمالج
سلافه... انه هالبت مابلعها وانوب تعيش جدامي
سيرين... غير بيت زوجي واعيشن بيه
لزمت عوجيتها وانه طكيتها ركضه
ميس... هههههههههههه مبين راح تكثر المشاكل
سلافه... انه الج يام لسان منين اجى بيت زوجج
عضت اصبعها بندم وحجت... هخخخ منك ضرير سويت البراسك وجبتها ليه
حطام... بويه ميس اخذي البت خلها ترتاح
ميس... صار
رحت ورى ميس شفتها دخلت لغرفه جوا مونفس الغرفه الجنت بيها دخلت وراها
شفت ام ضرار وجنوب ومره ماعرفها شافتني وابتسمت بوجهي
بديعه... هلا يمه ريحانه تعالي ليه شلون صرتي
رحت يمها سحبتني من ايدي وباستني ،المره الثانيه جانت تقرا قران باسته وعافته على جهه عاينتلي وركزت بوجهي
بدور... اللهم صل على محمد تعالي ليه بالله
كمت كعدت يمها سحبتني وباستني والضحكه شاكه حلكها
بدور... ولج بدعه شوفي هالبت شلون كبرانه وصايره احلى من كبل
بديعه... ياعيني جا ترديها تضل بزر
بدور... جا ابنج المخبل شعامل بحالها سوده عليه
جنوب... هسه ضرار رجله تحكه
ميس... ههههههه أنعم الله اخوي مخبل
بدور... چا انه مجذبه والله مخبل وين اكو واحد صاحي يسوي سالفته ويسوحل بالبت من اهلها وفوكها يطكها
بديعه... متزوجين وصير بينهم مشاكل
بدور... اعرفن جا شمالها البت اخرست
جنوب... يمه چا انتي اطيها مجال تحجي
بدور... احجي
سيرين... ها شحجي
بدور... خايبين هاي فاهيه تبط الكلب ميلي عني ولج
بديعه... ههههههههه علكيفج وياها تعالي سيرنه يمي
سيرين... سيرين اسمي
بديعه... اعرفن بس اسمج صعب اصيحلج سيرنه لوريحانه
ميس... اخوي مايرضى احد يصيحلها ريحانه صيحيلها سيرنه احسن هههههه
بدور... چا اخوج شني حاجز الاسم ومايرضى نصيحلها
جنوب... غير مريته ويدلعها احنى ليش ندخل
رهف... ابه ابه
جنوب... هاج شوفي تريد ابوها
بديعه... چا وينه ضرار موراح وياهم
ميس... بسول كال عده شغل وراح
_هزت راسها وأشرتلي اروح يمها
بديعه... يمه ذبي عباتج وشالج محد يمنا
ذبيت عباتي وشالي وكعدت بصفها سحبتني من ايدي وخلت راسي بحظنها
سيرين... مشتاقه لامي هم هيه مثلج وبحنيتج
بديعه... الله يجمعج بيها يمه
سيرين... خاله احجيلي اريد اعرف كلشي يخصكم
جنوب... اي والله هالسالفه يرادلها كعده
ميس... واحنه هم نستمع وياجن
اجت ميس ونامت على رجلها الثانيه وجنوب مخليه راسها على رجل ميس ورهف تلعب بلعابتها
بديعه... احجيلج يايمه سالوفتي
_تنهدت وبدت تحجيلي
انه اصلي من ناصريه انه جنت الوحيدة لاهلي وداهي جان يشتغل وي ابوي بالمعمل وكريب منه وصديج الحجي من زمان، عبن مرة من المرات شايفني راده من المدرسه ولاحكني ومن عرف انه ابويه يصير صديج ابوه ماصدك خبر واجئ خطبني من ابوي
ازوجنئ واجيت عشت هناه وصرت انه الجنه الجبيره للحجي حطام بعدها ازوج هجاس ورزام وصرنا ثلاث جناين للحجي حطام
الحجي والحجيه جنت اعتبرهم مثل اهلي واكثر الله يحفظهم ماشفت منهن ايشي موزين وحمويني ونسوانهم مثل اخواني وخواتي كلب علئ كلب
جبت انه خمس وليدات ضرار الجبير وبسول وعزام وليث وغيث وبت وحده الي هيه قيس
الشيخ حطام جان كل السلف تعرفه واله صيته والكل تنشدله وهوه مايكصر وي احد
جانت علاقته كويه وي جدج الحجي وهب جان عنده مرجان وجابر الي هوه ابوج وعمتج زهره جدتج ماخلفت بــعد وعبن هوه يحبها ماراد يكسر بخاطرها واكتفئ بالعنده
حيان ايصير اخو الحجي وجدج ،ابوج حب بنيته وعبن هيه الوحيدة والمدلله لاهلها جانت دومها شايفه روحها وبس تجي معناها اجت المشاكل وياها جانت صاحبه لسان وكحه وابوها مطيها حريتها ومايرفضلها طلب
ابوج حبها واجئ تقدم عليها بس هيهه رفضته وتقدملها اكثر من مره علما رضت
كبل لاياخذها مارضت اتعيش وي اجدادج وهوه من كثر حبه ليها ماجان يرفضلها طلب وبنالها مشتمل بصف بيت جدج حايط بصف حايط
ورئ،شهرين من زواجها حبلت وانه هم حبلنا سوا
وهمين جبت ميس وياج
ميس... يعني احنى نفس العمر
بديعه... اي بس سينه اكبر منج بيومين
ميس... اي زين
بديعه... وعبن دنانير ماحبت تكون اول خلفتها بنات رادت ولد بس ابوج جان طاير بيج يايمه وجن من جيتي ملك الدنيا
جان يمشي ويصيح بتي جنها شطب ريحان واتي عمرج شهرين ويكول يامحلاها ريحانتي
سيرين... فدوه اروح لكلبه ولحد هسه يسميني ريحانتي
بديعه... وعبن جان يسميج ريحانتي احنى تعودنا على اسمج وياهو اليشوفج يصيحلج ريحانه
بس ضرار ماجان يرضى احد يصيحلج ريحانه اذا سمع احد صايحلج يتعارك ويكلب الدنيا جان هوه وابوج اكثر اثنين مكيفين عليج ودايرين بالهم عليج
ولو امج اجت وجابتج وياها عبالك عيد عدنا يصير جنتي صغيره ومحبوبه ومن ترافتج تنحبين
بدور... چا تذكرين الطلايب التصير عليها وشلون يتكاتل ابن عمها وي ضرار من وراها
سيرين... ههههههه من وراي ليش !!!؟
بديعه... ضرار جان حريص عليج واتي طولج شبر مايخلي احد يجيسج غيره وابن عمج جان بعمر ضرار وعبن ضرار مايرضى يتكربلج يتعاركون بيناتهم والمشاكل كايمه من وراهم علما داهي يوكع بضرار ويدكه وثاني يوم يردلج
سيرين... اوي حتى بهاي مدخل ليش
ميس... اسألي
بديعه...
المهم قوت علاقتهم وجانت حياتنا ماشيه ومابيها اي مشاكل
بـ سنـه ١٩٩٨ سنه الكشره ولحد هسه ذكراها بكلبي
جانت اكو كاع بطرف السلف وبطرفنا وصارت جثير مشاكل من ورى هالكاع وعبن ولد الحجي جانو رايدين يبنون بيها والفلاليح رايدين يزرعون بيها
وبيوم وليله سمعنه هوسه صايره والفلاليح متجمعين وجايين عالكاع ، ومانشوف غير داهي وهجاس ورزام جاايين وكلواحد اخذ سلاحه وركض
مانعرف شنهي الصاير ووين راحو ، واجانى الخبر الهزنا هز ودمرنا
داهي انجتل على ايد جابر ...
شلون جتله وشنهو السبب وهوه كبلها بيوم جانو كويعدين ياكلون على سفره وحده وصوت الضحك مالهم مالينه
مات وخلا بركبتي خمس ولد وبت شلون اربيهم واتكفل بعيشتهم وهمه بعدهم صغار
من بعدها اضلمت حياتنا وخربت علاقه الحجي وي جدج وصارت المشاكل بين ولدنا وولدهم
دم ابوج انهدر وامج تطلكت من ابوج وذبتج على اهلج
ماعرفنا شصار بيكم ماصار تكاطعت اخباركم وانكطعت علاقتنا وي هذاك الصوب
واذا احد اتكرب لصوبنا لواحنى تكربنا لصوبهم يصير جتله حلال
ضليت انه عايشه هناه وكرست حياتي على تربيه ولدي تعبت بحدي وحيلي انهد بس كبرو وعوظوني
ترملت بعز شبابي
ماكملت وغصت ببجيها
سيرين... تحجي وتشهك بالبجي كلنا دموعنا تجري وساكتين مسحت دموعها بشيلتها ورجعت تحجي
بديعه... العيشه جانت صعبه كلش وانه جواي ست اولاد حياتنا مشت بس الثار ضل ملاحكنا والمشاكل ابد ماكفت من هذاك الصوب
كبرو ولدي وتخرجو وزوجو وانه اشوفن ابوهم بطوله جدامي كل واحد منهم ماخذ لمحه من ابوه بس اكثر شي ضرار
ملامحه واسلوبه عصبيته وتصرفاته وجن من اشوفه اشوفن داهي جدامي الوحيد بيهم ماجنت اكدرله جان عنيد وعصبي بشكل لايطاق وحامي على دم ابوه
يكون ويكعد وهوه يكول دم ابوي مايروح هدر جان صغير بس عكله اكبر من عمره جنت خايفه من تصرفاته وتفكيره ماجنت اعرفن شنهي الرايده والبراسه
سيرين... ولحد هسه تصرفاته مامفهومه والي براسه مامفهوم ابد ولهذا السبب هوه يكرهني ويكره ابوي
بديعه... ضرار جان واكف يمهم بوكت مانجتل داهي يايمه شنهي موقفه وهوه يشوف ابوه يموت جدامه
وعلى ايد منو على ايد الشخص الجان معتبره ابوه الثاني وداعتج جان يصيحله يابه
سيرين... دموعي تجري مثل الشلال ماعرف شجاوبها من ناحيه حقه بس ماله حق يسوي وياي كل هالتصرفات
بديعه... بنيتي هسه صرتي مرت ضرار وجنه بهالبيت معناها محسوبه علينه
بدور... مرت الجبير بالله مياده العوبه مامحسوبه هاي عايشه عد اهلها اكثر ماعايشه يمنا
سيرين... عددكم جبير انا من جيت شفت الاستقبال متروس
جنوب... تف تف عين الحسود بيها دود
بديعه... شوفي هجاس ورزام عازلين كلمن ابيت ابصفنا وبيت الحجي رحاب جدامنا وبصفه ولده رسلان وذاكر خوالج
سيرين... انه حتى مشايفتهم ولااعرفهم وفوكها محسوبين خوالي
ميس... بالعكس تراه تعاركو وي عمه دنانير علمودج ومن درو ضرار جايبج رادو يردوج بس جدي مارضى
بديعه... شوفي بسول مزوج رباب تصير كرايينه من بعيد وعزام مزوج مالكه بت خالج رسلان وعدهم اثنين بنات تؤم
سيرين... اي وبعد
بديعه... غيث خاطب دانه بت عمه هجاس وليث لساه لامزوج ولاخاطب
ميس... وانه بزر الكعده لامزوجه ولامخطوبه
بدور... انشالله يجي دورج انتي والعدي
جنوب... وصل بسمارج
بديعه... وهجاس عده درغام مزوج وعده ولد وبنيه وفيروز وناهد بنياته وعمج رحاب عده انور مطلك مريته وعده بت وحده بعمر رهف حيدري واوس لساهم مامزوجين ودانه وزها بنياته
سيرين... دخت وكلشي مافهمت
جنوب... تتعودين بعدين
بديعه... وعمتج بدور رجلها شهيد مستشهد وي رجل عمتج
سيرين... عمتي زهره !!؟
بديعه... اي وعدها بس جنوب ودام كعدتج مطوله يمنا لازم كلشي تعرفين بهالبيت وتتعودين عالبيه
بنيتي ديربالج على رجلج واكسبي وداعتج لوكسبتي يمشي وياج مثل ميل الساعه ابني واعرفنه عبن خلكه ضيك بس مطوله وياج واتي التفتي لحياتج وانسي الصار وابدي من جديد
سيرين... اذا هوه يكرهني شلون اكسبه وماعنده غير الضرب وعصبيته ابد ماتنحمل
بدور... چا اتي ياهو كلج يكرهج وحتى لويكرهج بشطارتج خلي يحبج
سيرين بكلبي... انه ماحبه شلون حتى اخلي يحبني
جنوب... تراه ضرار ماكو منه وربج اتكربي منه وشوفي
ميس... وحتى من راح تتقربون وتقوى علاقتكم شعرفج يجوز اتصيرون احسن من هسه وحتى يرجعج لاهلج
سيرين... صدك !!!؟
ميس... والله
بديعه... كومي يمه اصعدي لغرفتج ارتاحي
سيرين... ماندلها
ميس... احنى نصعد وياج انه وجنوب غرفتنا بنفس الطابق
سيرين... انه حتى مانتبهت الغرفه وين
جنوب... بالطابق الثالث
سيرين... حييل شدعوه
ميس... جوا غرفت اخوي عزام وجدادي وهالغرفه لامي وعمتي والطابق الثاني غرف بسول وغيث وليث والطابق الثالث غرفه مياده والغرفه اثانيه صارت الج وانه وجنوب بغرفه
جنوب... وغرفه الخطار صايره بصف الاستقبال وهذن كلهن مامكفيات والجناين يردن غرف لولادهن
بديعه... كومن ولجن كافي حجي خلن البت ترتاح
سيرين...
كمت من حضنها واشوفن رهف مخليه لعابتها ونايمه عليها وحلكها مفتوح ومدمر ككو ولابس تك حذاء
انومها يمي عادي
بديعه... بتج يايمه اخذيها
سيرين... بنتي انه !!؟
بدور... بنيتي هالبت عكد مااحنى محاوطينها بس تحتاج امها وابوها اكثر من ايشي ضرار مودومه موجود ومياده اصلا ماتعاينلها وهالتشوفين ضاله من ايد لايد
بديعه... يمه ديربالج عليها فدوه لكلبج
سيرين بكلبي... بيوم وليله صرت بنص عالم ماعرفهم وجنه الهم وزوجه لشخص لاحبه ولاريده وهسه يردوني اصير ام انه هم محتاجه امي
اعاينلها شلون نايمه مجرد ماباوع بوجها وجن راحه الدنيا مرسومه بوجهه
كمت منهن شلتها وهيه لازمه لعابتها صعدنا وانه احس روحي طلعت علما وصلت للغرفه
_عفت رهف عالجربايه واني كمت استكشف الغرفه
واسعه ومرتبه بشكل حلو فتحت الكنتور واحد مليان ملابس واغراض مبين للشويب هذن
والثاني فارغ ،رحت للحمام
سيرين... شلون يلمع اكثر من وجهي ،اعاين للصابون والشامبوات وهواي اشياء مرتبات
سيرين... همزين ماكو بانيو خافن نوب يغطني بيه ،ضرير حتى تركيبه اشيائك غريبه مثلك شنو هذا نوب
رجعت لفراشي واني طول الليل اتكلب مامتعوده انام بمكان غريب وفوكها بحدي عالاقل ضرار جان قريب عليه
استسلمت للنوم ،ماكعدت غير الصبح على صوت البنات
جنوب... صح النوم عيني يله كومي نظفي وغسلي نوم الظهاري مايفيد هنا يلا
ميس... شلون بالله ضلين تلعلعين
جنوب... اسكتي اتي چا غير اكعدها ،غميت كصتي ورجعت حجيت ،وانه شمالني ماخذه دور العمه الشريره
ميس... صباح الخير
سيرين... صباح النور
جنوب... درينا ولجن اااامشن خلنا نتريك حتى الجاي برد
ميس... مترحين تسممين شمنتظره
جنوب... اريدج تسممين وياي
سيرين... عفيه انه مانزل استحي وخافن مايرضون
ميس... عليش هالخوف وتراه جدي كال كعديها خل تتريك ويانه
سيرين... اي ماشي
ميس... كعدي رهف وياج
جنوب... هههههههههههه شتكعد يمعوده دشوفيها شلون نايمه
سيرين... اعاينلها فاتحه ايديها وحلكها وغاطه بالنوم
ضليت اكعد بيها بلكوا يالله كعدت تفرك بعيونها ومبرطمه
صح النوم يحلللو
رهف... ابه
ميس... بابا بعدين يجي يله تعالن ننزل
سيرين... خل اغسل
شلت رهف ورحت للحمام غسلتلها وغسلت
نزلت جوا طلعنى بالحديقه جانو مخلين فراش وكلهم ملتمين ويسولفون والسفره فارشيها على طول
سيرين... صياح الخير
_صباح النور
كلهم جاوبوني وعيونهم عليه شبيهم هذول
بديعه... تعالي يمه حدري يمي
رحت وكعدت بصفها ورهف بحظني
غيث... شلونه مرت الاخ
سيرين... ها انه !!؟
ليث... لاعروك اذاني
غيث... شمالج فاهيه
بسول... عوفوها شمالكم
ليث... غير مرت اخونه بس لاهم تطلع نفس مياده خاطر يخلن ضرار يهج بليله ظلمه
جنوب... هههههههههههه لاااا سيرين مومثلها
عزام... تراها البت مبينه فقيره
سلافه... خوفك من الفقير
بدور... ولكم عيفو البت واكلو
عزام... خافن تطلع خرسه بالله احجي
سيرين... احس صخنت من المستحه وهمه يسولفون ويشاقون وياي
بديعه... يمه جا ضرار وينه من البارحه
بسول... يمه رايح لبغداد عده شغل
بديعه... موجن روحاته لبغداد كثرانه ولايكعد
حطام... چا تردين تكظيه عيفي والتهي بمريته يمج
سلافه... چا هالولد عايف نسوانه شنهي نوبه سفطهن اثنين بعد جم يوم يجيب الثالثه والرابعه
حطام... مانه صغير ونفتر وراه يله اكلو وبليه حجي
سلافه... يمه ميس صبيلي جاي من يمج كابلتني البومه نسد نفسي
غيث... جده هستوج جنتي تاكلين وهسه نسد نفسج
سلافه... سد حلكك ولك شماكله انه عينك على لكمتي
ليث... والجبن منو خلصه
سلافه... احد يطيني العصه مالتي خلني اكسرهم لهالبعران
غيث... زلم مشوربه شطول الواحد وشعرضه سويتينه بعران مشكوره جده
سلافه... يابعد بيتي چا اتو وين اكو مثلكم
ليث... هذا الحجي الزين
كعدنا نتريك شوي واجى حيدري ووياه واحد
حيدري... يهههلا بالربع شلونهم تدنه اته خلنه نكعد وياكم
انور... شلونهم الجماعه
حطام... هلا بويه
عاين عليه ومركز نظره
انور... هيه هاي مرت ضرار
حيدري... هالتشوفها مغندبه من لصبح شمالج
سيرين... مابيه شي موجاي اكل
انور... حكه ضرار ماخذها بس موجنها بيضه زياده تتوصخ بسرعه
حيدري... شتريد نصخمها حتى تعجب حظرتك
بدور... اهمشي تعجب رجلها مالكم شغل بيها
بسول... احجي جدامه هيج لامايشكك شك
اعاينله عظ شفته بفشله وجن حجى شي غلط
بسول... يله اكلو اكلو
انور... دومك مخزينه ميس اطيني الصمون من يمج داحسته بحظنج
ميس... هاك
سلافه... شعدكم اليوم مصبحين علينه
حيدري... ها جده مارضاها بحقي وجنج جاي تطردينا
سلافه... وشمالك فكيت حلكك عليه شحاجيه انه
حيدري... اجينه نسلم على اخونه ومريته ماجايين على نور وجوهكم
حطام... طيح الله حظك وين ضرار عنك
حيدري... عوفه بغداد ، فاكين من هوسته
بديعه... سوده عليه هالولد متهجول
عاف الكلمه من ايده وعاين لعمتي
حيدري... جنه غوريلا شكبره وشكده جايه تكليلي ولد
كام بسول وشمر عليه الخاشوكه
رباب... هههههههههههه خل يسمعك
حيدري... خل يسمعني شنهي تخوفوني بيه
سيرين... كعدنا نتريك والولد يسولفون ويشاقون بيناتهم والحجيه تخوزر بيه مبين كعدتي معاجبتها
خلصنى وكمت لميت السفره وي البنات الولد طلعو لشغلهم سوا
وعمتي قسمت الشغل بيناتنا ومالكه ورباب مكضياتها يتأمرن عليه وينترن بالحجي وجن وجودي معاجبهن
طلعت انه برى حتى انظف حوشهم جبير من غير الحديقه ولازم كليوم تنظيف والشمس دك براسي
جريت الصونده والمكناسه وضليت انظف شوي وسمعت دك الباب هنه جوا وبس انه برى
عفت البيدي وطلعت فتحته شفت مياده واكفه عيونها حمر وتخوزر بيه ووراها رجال عافها ومشى
اجت هيه دفعتني بقوه ودخلت انه بسرعه لزمت الباب والاجان وكعت على راسي
سيرين... شبيها هاي ثوره
ماهتميتلها والتهيت انظف خلصت ودخلت جوا شفت رباب جاي تكنس شافتني اجت يمي وشمرت المكناسه
رباب... هاج كملي بدالي شعدج واكفه
سيرين... بس هذا شغلج موشغلي
رباب... مواتي تحددين شغلي يولا يله فضيها
عافتني ومشت وضليت انه اكنس شوي ونزلت مياده من فوك مخليه المكياج كله وطك بعلجها وكفت عالدرج وعوجت حلكها
مياده... العوبه من هسه راح صير سندريلا الهن همداج
غمتني ومشت وانه مستغربه تصرفاتها
خلصت وصعدت للغرفه اريد اسبح حاسه نفسي خست وملابس مجايبه
سمعت الباب يندك ودخلت ميس
ميس... هاج هذن ملابس اكضي ييهن علما نشتريلج
سيرين... شكرا
ميس... يمعوده عليمن شكرا هنه ملابس
سيرين... انه عندي بس ضرار مخلاني اجيبهن
ميس... خل يرد واكله لويجيبهن لونشتريلج خوما ضلين بطرك وحده
راحت وانه دخلت اسبح خلصت نص الشامبو الغسولات جن مشايفه حتى جلدي وجعني من الجلف
خلصت وطلعت نشفت شعري وكعدت امشط هوه طويل وحيل يتعب يرادله وقت يالله يتمشط
شوي واقتحمت مياده الغرفه اجت تقربت عليه ولزمت شعري
مياده... والله وزين كل هالحلا لضرار
دفعتني وراحت اخذت عطر من على الميزة وطلعت
سيرين... هاي شنو سالفتها
_ مر ايام على كعدتي عدهم كلهم زينين وياي وخاصه الولد ماكو منهم ودومهم يسألون عليه ويشوفوني شمحتاجه
الحجيه ماتحجي ابد وياي وكلما تشوفني تخزرني رباب ومالكه شادات وياي بحيث شغلهن كله يذبنه براسي
ومن يشوفن عمتي يسوون نفسهن هنه الينظفن من غير كلامهن اليذبنه ويسم البدن
ميس وجنوب صارن مثل اخواتي وصديقاتي مونساتني كلش وكل وكتي وياهن
مياده قدر المستطاع احاول ابعد عنها وماختلط وياها بس مشاكلها وي البيت كله ابد ماتخلص
بحيث كليوم عركه وي وحده منهن وحتى وي الحجيه
ضرار من بعد ماجابني ماشفته ولاسمعت اخباره ونوعا ما رتاحيت بس غيابه خلا فراغ جواي تعودت عليه كلش
ورهف هالبنت صارت مثل روحي ضليت انه اعتني بيها وبكلشي يخصها صرت دايره بالي عليها اكثر من روحي لدرجه حتى هيه صارت متكدر بدوني
سوالفها وضحكتها ماليات عليه
سيرين... انه استسلمت للواقع العايشته واقتنعت انو هذا هوه قدري صرت احاول اتقرب من الكل واقوي علاقتي بيهم وهمه زينين وياي كلش
اهلي يوم بعد يوم واشتياقي الهم يكثر يوم يجر يوم وانه كلبي طاك عليهم ردت بس خيط يوصلني الهم ردت اطمن عليهم واسمع اخبارهم بكل صلا ادعي ربي يجمعني بيهم وارد الهم
اما بدر احاول كل وكتي ماتذكره ومافكر بيه اذا الله راد يجمعني بيه او لا كلشي بايده واذا مامقسوملي اتمنى الله يسعده واكدر انساه دام الله جمعني بضرار لااعتراض على حكمه
_بيوم جنت كاعده بالغرفه انه ورهف وامشط بشعرها
وهيه تلعب بلعابتها وتعظ بيها
رهف... ثينه_سيرينه
سيرين... عيونها
رهف... ابه
سيرين... بسبب لسانها تصيحلي ثينه وهيه من تسمعهم يصيحولي سيرينه تعودت تمشي وتصيح ثينه
دومها تبجي على ابوها تعجبت شلون متعلقه بيها وهوه كل وكته ماموجود والايام اليبقى بيها قليله
خلصتها ونزلتها جوا تعلب وي بنات عزام مرات يتعاركن وثنينهن يدورن عليها ويكتلنها
ويجي عزام يصالحها لويشتريلها حلويات لويطلعها وتضل مالكه تدردم لان طلعها وماطلع بناتها وياه
وهوه من يرجع يصالحهن ويكعد يلعب بيهن ، ومالكه هيه الي تدفع بناتها على رهف حتى يكتلنها
ولو متوقعه خباثتها وتصرفاتها دام عمتها دنانير
شكرت ربي وحمدته لان ماطلعت عليها
اطباعي واسلوبي على ابوي ماعدا ملامحي عليها
_ نزلت رهف وصعدت للغرفه لفيت راسي ونمت احس جسمي مكسر من الشغل والدنيا ظهريه وحاره كلمن كاعد بغرفته
_ماعرف شكد نمت وماحس غير بـ
يـــتـــــــبــــــــع....
_ وشوفن انه جاي اشوف عدد المشاهدات اكثر من التصويتات
يعني انتي من راح تقرين القصه وتصوتين عالبارت شراح يصيرلج مثلا !!!؟؟؟