عقد البنات

البارت 76

#عقد_البنات
البارت السادس والسبعون
للكاتبة لبنى الموسوي

ملاحظة / بارت مفاجئ لـ عيونكم حبايب قلبي ..
بس اترجاكم لتنسوون (التفاعل والتصويت) لأن بعدني ما اگدر أتحكم بالحساب ولا زال يسجل خروج من كيفه مع ذلك اني مستمرة وياكم بالنشر وما خيبت ظنكم بيَّ فـ يا ليت أنتم كذلك مـ تخيبون ظني بيكم وتساعدوني بالتفاعل حتى يتنشط الحساب ويرجع مثل ما كان ان شاء الله
متابعة ممتعة 💛

لم يَعُد يُخيفني شيئًا في هذهِ الحياة مهما واجهتُ من ضيق
فـ بعدَ أن صفعتني الدُنيا مراراً وتكراراً
أصبحَ العظمُ من حديد 
حتى باتَ غير قابل للتهشُمِ و التَمزيق
أو الكَسرِ العَميق
فـ لا يؤثر فيهِ إلا صَدأ القلوب
وقلوبنا قد غُلفت بـ دُعاءِ الأمِ
لا يَمسُها سوء النوايا ولا يوجعها عابر الطريق . ✍🏻
___________

نبض.. اسوء فترة مرت بحياتي هيَّ الفترة الگاعد أعيش بيها حالياً شبية وشديصير وياية ما ادري !!!

وصلت الـ مرحلة صرت أحس وجودي بالحياة ماله لازم مجرد عالة على نفسي قبل لا اكون عالة على الناس اليحبوني ما عندي شي اسويه غير أتمرض وأنام

بعد مشكلتي ويا سيما بـ أيام بسيطة رجع التعب سيطر عليَّ وبدت تظهر عندي أعراض الإختناق الما صدگت أتخلص منها داخل البيت ؏ الأقل

ويا الوقت صارت تزيد بشكل ملحوظ خصوصاً بعد كم المشاكل العشتها ويا أهلي من سالفة عشق ويا الدكتور إلى إنفصال ورد عن زوجها من غير مرض ماما الدتعاني منه بسبب قهرها عليَّ وعلى خواتي .

حاولت أطلع من حالتي وأغير جو البيت بروحتي لأهلي بس انصدمت بشي جديد ما كان موجود عندي سابقاً
بيت أهلي صار رعب بالنسبة إلي مثل الشارع تماماً
رحت يمهم ساعة على بعضها ما گدرت أگعد ، تحججت بشبل ميقبل ابقى هواي واتصلت عليه اجى أخذني بحيث منا لما وصلت البيتي متت والله حياني

مزاجي ضاق ، اعصابي تعبت ، نفسيتي تدمرت ، صرت اتمنى النوم يمرني ولو دقائق بسيطة
وصل بيَّ الحال أسهر 48 ساعة بشكل متواصل وانهار من النعاس بس مع ذلك ما اگدر أنام ولا أغمض عيوني

من شاف حالتي شبل أخذني للدكتور و حتى ينومني كتب لي العلاج عبارة عن مهدئات أخذته واني الممنونة بس المهم أنام وأخلص من عذاب السهر لأن لو ابقى هالشكل يومين ممكن أموت من شدة الأرق والإجهاد

كرهت كل شي بـ حياتي ، عيالي ، أهلي ، أمي ، كرهت حتى نفسي لدرجة گمت أبلع بالمهدئات وأرجع ليورة الشريط ميبقى عندي يومين مدري شلون بقيت عايشة

بـ هالفترة إنعزلت عن العالم إنعزال تام فـ صرت ما أرد على مكالمات ماما ولو رديت مستحيل اشرحلها الگاعد أمر بيه من تعب لأن البيها كافيها ما ناقصها تشيل همي بعد ومن كانت تجي الـ بيتي بـ استمرار علمود تشوفني اسوي روحي طبيعية وما أعاني من أي شي اي نعم تشك بس بـ تصرفاتي اگدر احجب عنها اليقين

حتى الكتب الـ كنت اعتبرها متنفسي الـ وحيد هجرتها وهجرت القراءة وياها ، كل شي بعد ميعبي عيني و لا إلي واهس بالحياة اتمنى أخلص عمري نايمة إلى أن رب العالمين ياخذ أمانته ويريحني من هالعذاب

واني بـ هالوضع سمعت من شبل سيما راجعة لـ زوجها ابد ما أخذني الفضول أعرف شلون رجعت ولا فرحت بـ هالخبر رغم ما كنت اتمنى شي غيره بداية زعلتها بس حالياً كل شي أختلف بالنسبة إلي .

ورى فترة أخذتي أمه الـ علوية معروفة بـ بغداد و بعد سين وجيم گالت الظاهر عندي البنية دايسة على شي نجس إذا ما لگته وجابته حتى احرگه الها ما راح تتعالج إلا بـ هبطة قوية تطلع نجاسة هالعمل من جسدها

حاولت وياية بلكي أتذكر شي يوصلها لـ علتي بس من كثر المهدئات صايرة اني والحايط سوى إذا هوَ يحس ويتحرك اني اگدر أفكر وأتجاوب ساعتها

رجعت للبيت تركت أمه بالصالة ودخلت للغرفة
طلعت شريط الحب أخذت اثنين طبگ و تمددت على وجهي دقائق وغفيت بـ عمق من قوة المهدئات

مدري شگد مر وقت ، حسيت على صوت ضحك عالي بالبيت فتحت عيني بـ إنزعاج ماكو احساس يربي ولا كأنه يشوف حالتي إلا يجيب جماعته يسهرون

سحبت الحجاب ذبيته على راسي شلون مچان ونزلت للمطبخ آكل شي أحس معدتي دتنمرد بسبب العلاج

بعدني بـ الممر صار گدامي صديقه راجع من المغاسل
أخذني الإرتباك ما اعرف شسوي أكمل طريقي لو أرجع حس عليَّ مشى ؏ السريع تجاوزني وهوَ يعتذر

عدى الموقف عادي ولأن ما كان عندي مزاج ما لمت شبل على هالموقف السخيف الحطني بيه واني بنص بيتي

رجع الموقف تكرر وجمعتنا الصدفة من جديد بس هذه المرة نظرات هالرجال ما كانت عفوية مثل سابقتها بحيث ثبت عينه داخل عيني بـ كل صلافة ولو منطيته مجال كان أخذ وانطى بالحچي وياية وكأنه واحد من أهل البيت

صعدت فوگ قفلت على نفسي وأخذت العلاج حتى اگدر انام بـ سهولة ، فزيت الصبح قريب التسعة

نزلت جوة دگيت باب الغرفة ماكو جواب ..
فتحتها بـ هدوء بس شبل نايم على وجهه ومحاوطته هوسة سهرتهم من كل جانب

تقربت بـ خطوات خفيفة رفعت البطل شميته شنو هذا بس لا مُنكر !!! عزة بـ عيني ان شاء الله

- شبل ، شبل گوووووم مو داحچي ويااااااك

ابد ولا حس عليَّ عبالك متبنج !!!
درت وجهي گلاص الماي ؏ الميز أخذته كبيته عليه فز مخروع

- هاي شنووووو شبيچ يمعوووودة

- لا والله !!!
انتَ اللي لازم تجاوبني هذا شنو؟! رفعت البطل بـ وجهه

- مشروب عادي شنو يعني

- مُنكر شبل !!!

- لا يمعودة حلال والله نوع من أنواع الشعير هذا

- والحلال يخليك تنام على وجهك هيچ لو عبوة تطگ فوگ راسك همْ مـ تحس شو مگاعد اصدگك

- اهوووووو لتزهگيني قبل ساعة نايم شتريدين أگعد بصوت واحد مـ تشوفين شلون مسطور من التعب

- السالفة بدت تزيد عن حدها سهر وضحك ومشروبات ما اعرف منين ما منين وإذا صبح عليك الصبح دايخ عبالك واحد مخلص ليله بالملاهي ترى طگت روحي منك ومن جماعتك الما عدهم ذرة احساس

- قابل يوميا سهرانين شو مـ ننجمع إلا بالعطل
بعدين تعالي والله حيرتيني وياچ السهرت برة متقبلين وتگلبين الخلقة والجبتهم يسهرون يمي تدردمين وتخلصيها تحقيق أفهمي نفسچ حتى اگدر أفهمچ وارتاح

- يعني ضروري تسهرون مو كافي واحد مگابل الثاني طول اليوم بالدوام شبع خو ما شبع

- شباب وروحنا طافرة من وضعية البلد شكو بيها نغير شوية من الروتين والملل وننفه عن نفسنا بشنو ضاريچ

- واني والله ممجبورة أحبس نفسي طول الليل بالغرفة علمود لا اصادف واحد من جماعتك طاب لو طالع من الحمام حس شوية الخاطر ربك حسسس

- وانتِ ليش تطلعين من الغرفة اني شـ موصييييچ

- لا والله شلون يعني ما أنحصر ، أجوع ، أختنگ ، شنو هذا بيتي لو حاسبني خطار بيه وجماعتك أصحابه

- لتدوخيني حاولي تصمخين بالغرفة هوَ يوم بالإسبوع واني راح اسوي حل السالفة المغاسل يجوز أبني وحدة بالحديقة وأقطع هالغرفة عن البيت

- يكون أحسن حتى لتخبلني عليك ويلا گوم صحصح شوية حتى تتسوگ مو يوم عطلتك تخلصها نوم

- أمرچ خاتون مو خادم الخلفوچ اني

- مراح أطبخ وأخلي بـ حلگ أهلي شو البيت بيتك انتَ والأكل الكرشك بعد على شنو هالحچي الزايد منك

طلعت من الغرفة ضايجة شوية وحسيته دخل للحمام

بين ما تسوگ ورجع نظفت هوستهم وجهزت له الريوگ ردت اروح للمطبخ جبرني اگعد ؏ الصينية وياه

كالعادة يجرحني بالكلام وراها يجي يعتذر ..
وصلني المرحلة حتى بعد ما أحس بـ طعم اعتذاره لأن ادري بيه عبارة عن لقلقة لسان لا ينفع ولا يغير منه شي

كنت اتمنى اترك البيت واروح الأهلي حتى أتخلص منهم بس للأسف جربت وفشلت لأن ما اگدر استقر بـ مكان وتختفي مني حالة الإختناق غير بـ هالبيت وبس

باردة ثلج والجو قمة الكآبة والوحدة ..
أفتر بالغرفة على نفسي حايرة انطوائيتي بدت تخنقني بشكل فضيع لو ما مخافة رب العالمين لإنتحرت بلحظتها

وجهت نظري ؏ المهدئات بـ نظرة مترددة أبلع لو أقاوم بس المشكلة ما أگدر اهدأ إلا عليهن وبنفس الوقت أحس هنَّ السبب بكل الإجهاد الصار لي أشهر أدور بـ داخله !!!

سحبت الموبايل ردت أتصل على عشق تراجعت
يا إلهي شـ گاعد يصير وياية حتى أهلي كارهتهم ليش هالشكل مو عقلي راح يتجمد

أخذت الكتاب الصار لي شهرين قارية منه بس ورقتين فتحته وبديت اقرا بعدني بأول سطر رگعته بالكنتور حيل عبالك محتواه استفزني .. ليوين راح أوصل بعد !!

نهضت من مكاني نزلت للمطبخ أريد أشغل نفسي بـ أي شي في سبيل أتخلص من التفكير
سويت نسكافيه بـ كوب كبير جداً وطلعت بعدني بأول الدرج سمعت صوت قهقتهم واصل لهنا ، يربي شگد أكره تجماعتهم ما أحس بـ الراحة اتجاهها ولا أعرف السبب شنو !!!

رجعت للغرفة من التوتر شربته واني أفتر باوعت للساعة راح تصير الثلاثة واني بدون المهدئات مستحيل أنام

عندي صندوق خشب جامعة بيه أغراض الها خصوصية مميزة داخل گلبي ، طلعته من الكنتور وتربعت ؏ الچرباية فتحته صار بـ وجهي الـ عقد من يوم مـ تمرضت واني نازعته نهضت بدون تردد لبسته ؏ المرايا ورجعت الـ مكاني

باوعت داخل الصندوق أول هدية من عمو صادق بعيد ميلادي السابع قطعة خشبية على شكل عروس ، رفعتها أضحك شگد فرحت بـ يومها من هداها إلي حسيت بيها شي مميز أو فعلاً هيَّ كانت ولا زالت وراح تظل مميزة بـ نظري ، مستحيل تنمحي هالصفة عنها بس لأنها منه هوَ شخصياً . 

سرحت بـ عالم أشبه بـ الخيال ويا باقي مميزاتي
ذكريات طفولة على هدايا أخواني على صور كنت بيها إنسانة طبيعية رغم مآساتها إلا أنها كانت تمتلك أكبر طموح بـ هذه الحياة غير عن الشبح الـ متلبسني حالياً

رفعت الـ صندوق نفضته من الأوساخ ومسحت التراب عنه قبل لا أرجع الأغراض بيه ، بعدني أنفخ الغبار عن إيدي سمعت صوت الباب أنفتح !!!

رفعت راسي بـ استغراب مو بالعادة شبل يصعد بوجود اصدقاءه إذا ميضربها سهرة للصبح فـ لا يرتاح

وهنا چانت الصدمة الحقيقية !! صديقه رافد واگف بكل صلافة بنص غرفة أخوه ويتفرج على عرضه

گمزت من مكاني اريد شي أستر بيه نفسي ماكو
قفل الباب وتقرب ركضت للزاوية داسحب الحجاب من التعلاگة أخذه قبلي وقيدني بيه صار ظهري على جسمه مد راسه لفحت انفاسه القذرة على مسامعي

- اشششششش اش اش اش خلينا نتفاهم بدون صياح

- شبببببببببببببببل

- رفع كف إيده كتم صوتي بيه : ها هااا مو گلنا بدون صياح ليش دتتعبين صوتچ الحلو رجلچ مستحيل يحس حالياً لتعاندين حتى لتجبريني أأذيچ

- الله يخليك أنزل شبل لو لمحك هنا روحك مـ تكفيه

- هههههههههه لا سبع والله ، صديقي قابل تعلميني بيه

حچاها ودفعني للچرباية بـ سرعة رهيبة قبل لا اتحرك صار فوگاية قيدني بـ جسمه .. بچيت

- اترجاك لااا ، لتسويها فدوة لتسويها احلفك بـ عرضك

- رفع أصابعه مرر أطرافها على خدي و بين خصلات شعري : بلا مو حرام هالجمل كله يروح الواحد ميقدره

- أبعد عني أختنگت ما اگدر اتنفس بعد الله ياخذذذذك

- حقچ والله العيشة ويا شبل تخنگ مدري شلون متحملة ولو خطية صارلچ أكثر من سنة مريضة ومحد يعرف علتچ وين بس ولا يهمچ هسه اني اداويچ

نصى باسني صرخت بـ حرقة .. كتم صوتي ؏ السريع وفتح سحاب السترة ما لابسة تحتها غير كيمونة خفيفة بـ جرة وحدة من إيده مزقها على جسمي مباشرةً صوفر بصوت عالي : *** بـ **** على هالبياض الشايلته يبووو هذا شبل غير أثووول

- صحت بـ شهگة : شـ گاعد تحچي ااااانتَ الله يشيلك

- ليش عيني متدرين ؟!! شبل اسم على مسمى بس ؏ الزلم مو عليچ ، رجلچ يحلوة **** يعني يدور حلوين

- ما گدرت استوعب كلامه ، صفنت بـ وجهه مصدومة لو الحايط يتحرك اني اتحرك ساعتها

- لتستغربين و داعة أمي اني شخصياً مجربه واني ما أحلف بأمي إلا للغالين لأن تعرفين الأم شگد عزيزة

نصى باسني بـ وحشية رغم مقاومتي ورجع كمل كلامه القذر : وأزيدچ من الشعر بيت أبوچ مروان تعرفيه لو لا ؟!! اييي يمكن تعرفيه .. هه المهم
أبوچ باعچ لـ شبل مقابل حبوب مخدرة وهالحبوب محد يگدر يحصل عليها غير رجلچ لأن رجلچ نفسه أكبر تاجر مخدرات بالعراق تابع للـ ××××××× اسألي عنهم وتعرفين منو ذولة وشنو سمعتهم اخاف صار عندچ شك بـ كلامي

- وخر لككككك وخرررر قذر الله ياخذكممممم كلكمممم

- راح أوخر بس مو قبل ما أستطعم بـ هالكيك الرباني

حچاها وصار يجردني من باقي ملابسي ..
كل صوت يطلع مني يكتمه بـ كف إيده ، أخر شي خنگ رگبتي بالعقد انقطعت السلسلة وتطشرت ؏ الفراش

متت حسيت گلبي راد يوگف لحظتها ..
شنو يعني معقول هذا حـ يكون مصيري من بعد التعب والله العظيم أكبر حرام !!!

غمضت عيوني بـ قوة وصرت أنحب بـ صوت طالع من أعماق روحي ، لازم تتصرفين نبض لتخلين واحد قذر مثل هذا يلوث شرفچ

حسيت بـ أوجاع حقيرة فتحت مرعوبة ، التفتت على يساري الصندوق الخشب موجود رفعته بسرعة ورگعته بـ راسه بـ كل ما وضع بيَّ رب العالمين من قوة
مباشرةً فقد الوعي

سحبته من كتفه بعدته عني ، انترست إيدي دم منه
نهضت مفزوعة لا عليَّ ولا عليه شي يسترنا
لميت خرز العقد والسلسلة وراها سحبت الفرشة غطيته ما اگدر أتحرك وهوَ گدامي متجرد من الملابس

ركضت للكنتور لبست شي طويل يسترني ورميت على راسي الحجاب وغادرت الغرفة بدون ما التفت وراية

طلعت من البيت مرعوبة الشارع هدوء ما بيه غير بس صوت الحيوانات لأن ورانا بساتين متروسة كلاب

ما اعرف شلون وصلت الـ بيت أهلي ومن شدة الصدمة مـ انتبهت على نفسي طلعت وتمشيت وعديت مسافات مو قليلة بدون ما اتخربط وينقطع نفسي

دگيت الباب والجرس بشكل قوي ومتواصل لأن اعرف بيهم نايمين يعني صعب يسمعون وفعلاً بالخمس دقائق يلا فتحت لي عشق الباب بس عتبت العتبة فقدت توازني ، سندتني تصرخ وراها ما حسيت بـ شي بعد

عشق.. انخبصنا ، ماما انجنت ، ما ظل براسنا عقل
خل نترك جيتها الـ فجر ونترك وگعتها لأن تعودنا عليها
بس منظرها والدم المالي إيدها هذا الفعلاً رعبنا شصاير وياها وشنو الـ وصل أختي لـ هذه هالحالة

سحبناها اني ورد للمغسلة ، غسلنا وجهها .. گعدت
بس شنو الدموع تتسابق على وجناتها والمصيبة شكلها كلش مصدومة حتى الكلام مديطلع من لسانها

حاولت اگومها بـ مساعدة أخواني ، وگفناها ؏ المغسلة وبديت أفرك إيدها بـ كفوفي هيَّ شافت الدم لو انهارت أكثر بحيث من الشهگة متگدر تتنفس بعد

- عصرت كفها حيل ابچي على بچيها : اششش يعمري انتِ ارتاحي لتخافين هيانچ بيناتنا ماكو شي اهدأي

عطاء.. أخذوها للغرفة خل ترتاح شوية

نظر.. اني راح أفرش الها السرير وافتح الضوة حتى لا تخاف خطية يمكن مخترعة من الظلمة الـ بالشارع

ورد.. عفية بأخوية البطل أركض يلاااا

بس حچتها راح يركض .. تقربت من عدنا سندت أختي على كتفها وباستها بـ قوة فجأة نطقت نبض : مدي إيدچ بـ جيبي رمانة

مدتها طلعت العقد ، السلسلة مقطوعة و الخرز مبعثرة
ظلينا وحدة تباوع للثانية لااا اكيد صايرتلها كارثة

أشرت ماما بـ عيونها يعني لتحچون ، دخلناها للغرفة من التعب بـ صعوبة وصلت .. مددناها ؏ السرير وبقينا فوگ راسها ثواني وغفت تعجبنا شلون گدرت تنام

عشق.. ماما هسه شـ راح نسوي شو هاي غفت

ورد.. وقتها والله على هـ الوضع گلت مستحيل حـ تنام

عطاء.. خلوها ترتاح مبين تعبانة كلش

عشق.. واحنه شلون راح اموت واعرف شـ صاير وياها

عطاء.. أول وتالي مـ نگدر نتصرف واحنه نسوان وحدنا ما ظل شي للصبح ، بس تطلع الشمس أتصل على عمكم صادق يجي يشوف شبيها شفتن وضعها هيَّ من غير شي مريضة يعني مستحيل اگدر اضغط عليها بـ هالحالة

صح حچت هيچ بس هيَّ أكثر وحدة قلقانة بينا بحيث ظلت گاعدة على أعصابها شوية تمسح راس أختي وشوية تمسح دموعها المتقبل تنقطع لأن طول اليوم وهيَّ حاسة نبض بيها شي ، سبحان الله دائماً من نصير بـ مشكلة گلبها يعلمها حتى بدون مـ نتنفس ونشكيلها همنا

للصبح و هيَّ على نفس الـ گعدة مـ تحركت خطوة من مكانها واحنه وياها ؏ الواهس بس نظر خطية من التعب غفى على نفسه هوَ وگاعد

صارت السبعة ونص بعدنا صافنين عليها منتظريها تگعد فتحت عيونها ، طفرت ماما تمسح على وجهها شو هذه فجأة صارت تصرخ : مات مووو ماااااات

- بسم الله يمة بسم الله بنيتي منو هذا المات

- رفعت إيدها غطت عيونها تنحب بصوت عالي : ماما ضربته اني ضربته ، ضربته ولكممممم ضربتتتتتتته

- دخيلك ربي وچ منو احچي وگفتي گلبي

- حچت من بين شهگتها : صديقه اعتدى عليَّ وضربته

- صخام الصخم وجهي شنو هالحچي ولچ

- رجعت تشهگ ، تركتهم وركضت للصالة أخذت جهازي اتصلت بـ عمو صادق اعرف بيه يصحى من وقت حتى بأيام عطلته وفعلاً بسرعة جاوبني

- السلام عليكم
- وعليكم السلام عمو حباب تعال الـ بيتنا بسرعة بسرعة

- شكو ولچ

- مصيبة عمو لا مو مصيبة مصايب تعال الحگ النا وابد لتسأل ما اگدر احچيلك ؏ الموبايل

- اجيت مسافة الطريق

سديت الخط ورجعت للغرفة ، بعدها على نفس الوضع كل شي متگدر تحچي خلصتها بس تنحب وتلطم

شوية ورن الجرس صحت بيهن ألبسن هذا عمو صادق

- ركضت فتحت له : همزين مـ تأخرت نبض راح تموت
- شبيها يمعودة

- دتفضل جوة ما اعرف حتى اشرحلك انتَ أفتهم منها

دخل يركض ، بس شافته طفرت عليه وگعت يم رجله ولزمت بـ حذاءه .. نصى بنفس اللحظة گومها

- شبيچ يبعد عمچ شنو صاير وياچ

- عمو يمكن مات ، عمو اني كتلته اي اني بـ هالإيد...

دتحچي رن الجرس بـ صورة سريعة ، مباشرةً لزمته من قميصه : هذا شبل لو يمكن الشرطة عمو ساعدني

- اششش اهدأي اهدأي محد يگدر يأذيچ واني موجود

- حچاها وطلع ، كلنا تبعناه ، بس فتح الباب هجم شبل مثل الثور الهائج ميشوف گدامه بس يريد يوصل النبض

- قطع عمو عليه طريقه : ووووووين شو داخل السوگ هرج سمحنالك تفوت أرجع لمكانك يلاااا أرجججع

- صادق لتتدخل هالـ **** خانتني ببيتي وعلى فراشي لا و ويامن ويا صديقي يا مكان هذا التريدني أرجعله

- خانتك شنو ؟!! شدتحچي انتَ ألزم حدك وأعرف على منو دتحچي وشنو دتحچي وإلا هاللسان اگصه الك وحقك الخلقكككككك

- لك لتخبلنننني الفرشة مليانة دم وگعدت لگيتهم هيَّ وياه منهزمين هاي شـ تفسرها يالشرييييف

- شبيك انتَ شنو مليانة دم غير...

- لتكمل اني مماخذها وحتى ***** راحت ويا صاحبي

نبض.. كااااااافي عاااااااااد
الك عين جاي وتحچي بكل صلافة ياااا نگسسسسس

- كتت الأكو والماكو ، خزته تخزي ، مسحت بـ ذكوريته الأرض ، حتى نست وجودنا يمها وأولنا عمو صادق لأن الكلام الـ تفوهت بيه مـ ينحچي غير بين المرأة وزوجها

صاروا بين مد وجزر مرة يصير هوَ أبو الراهي ومرة هيَّ أخر شي بدا يتجاوز عليها بـ كلام قذر لأن لسه مُصر أختي خانته ويا صديقه رغم الحقيقة الواجهته بيها بس هذا شبل من يومه يومه شكاك يعني مستحيل يصدگ كلامها بعد كل شي شافه بـ عيونه

من وصل الـ مرحلة الطعن بالشرف مـ تحمل عمو يظل ساكت ، لزمه جنزه شگد حاول يقاومه بس فشل لحد مـ انهارت قواه بين إيده .. سحله سحل طلعه برة البيت الناس كلها متجمعة مقابل الباب على صوت الهوسة ، شمره بـ قوة للخارج ورگع الباب بـ وجههم

ظل يمنا للظهر يحچي ويا نبض .. دنصب بالغدة اندگ الباب حيل الأفندي جاي وجايب أبوه وياه ما كفاه كل شي صار صدگ لو گالوا عينه عين الـ ****

اتصل عمو صادق بـ أبو محمد وصارت گعدة شـ كبرها انكشف بيها المستور ، نكر شبل كلام أختي مقابلها تهم المسكينة بالخيانة وظل يهدد ويتوعد الها

اسبوع واحنه مخبوصين منا هيَّ منهارة ومنا هذا العار انچلب حشى السامع بحيث صارت سيرتها بالمنطقة على كل لسان لأن اثنينا جيران والناس متصدگ تلزم الها سالفة تلوك بيها

اليوم اندگ الباب طلع نظر يشوف منو شوية ورجع گال بابا بالباب يريد طريق ، ركضت ماما لبست عبايتها وطلعت واجهته بـ كلام نبض السمعته من صديق زوجها

نكر كالعادة وطال بيناتهم النقاش أخر شي انصدمنا بيه متواعد ويا شبل ببيتنا حتى يحلون الموضوع بس سمعت نبض بالسالفة انهارت من البچي متريد ترجع بحيث حلفت لو يجبرها إلا تنهي حياتها گدامنا

ماما بـ صعوبة قنعتها تسكت ، اعرف شلون تفكر متريد تدخل ويا بابا بصراعات لأن هيَّ أكثر وحدة تعرف بيه ميجي بالعناد والعصبية بس وعدتها مراح تسمح له يتحكم بيها مثل أيام زمان لو على جثتها

ما صدگت سكتت نبض الدور گبت ورد ، ظلت تصرخ اليوم اطلع واريد اشوف هالأنجاس الـ شنو ديخططون بعد

رادت تطلع منعتها ماما، صاحت بيَّ : عشق تعالي لزمي أختچ ترى مالي حيل للمشاكل كافيني الصار لليوم مصيبة بعد وأسلم أمانتي الـ ربي وارتاح

عشق.. اسم الله ماما هدأي روحچ وخليها عليَّ اني راح اتصرف ، تقربت منها اعقلي ورد ترى مناقصين مصايب

ورد.. وخرررري والله اليوم إذا ما أخلي دمهم بـ طولهم فلا اتسمى ورد الشام وهسه تشوفون

عشق.. يمعودة الخاطر ربچ اگعدي راحة متشوفين وضع ماما ومنا نبض شـ حالها كافي عاد ارجعي الـ عقلچ

ورد.. والله ولا اگعد لتقنعيني مستحييييل اسكت بعد

حچتها ودفعتني تريد تروح ، لزمتها بـ قوة قيدت إيدها
المشكلة فقدت مگاعد اسيطر عليها ..
نبض من شافت وضعها رجعلها الحيل وگامت من نومها ساعدتني بيها

بالگوة مسيطرين عليها نلزم إيد تفلت الثانية
أختي انجنت عقلها مو براسها ومبين ناويتلهم ع الشر

خلصتها تصرخ عوفني خل اطلع .. وماما تتوسل ظلن لازماتها لا تسويلنا مصيبة تضيع بيها حياتها أكثر ما هيَّ ضايعة

- ماما كاااااافي من شنو خايفة بس فهميني ليش ظل شي حتى نخاف عليه ؟!!!

- يمة استهدي بالرحمن حتى ما يسوون توسخين إيدچ بيهم عوفيهم همَ ورب العالمين

- ما اعوفهم والله ما اعوفهم لهنا وكافي بعد تعبنا منهم ومن قذارتهم إلى متى نظل ساكتين بس جاوبيني إلى متتتتى

باوعي دباوعي زين شگد ما نسكت شگد ما يدوس علينا أكثر ، والله لأطلع حق أختي من بين عيونه هوَ وذاك العار الگاعد بـ صفه

حچتها و دفعتنا حيل ، صارت ماما گبال الباب فتحت إيديها تتوسل يمة لا تطلعين

اثنين احنه وما گدرنا نسيطر عليها ما ادري شلون فلتت من عدنا راحت على ماما تركض دفعتها وطلعت خارج الغرفة

لحگناها بـ خوف شو هاي راحت للمطبخ ثواني وطلعت بـ إيدها السكين الكبير مطلعته من الجرار

صارت ماما گبالها تحاول تمنعها ، تريد تسحب السكين منها وهذه تتصارع وياها ما نسمع إلا ماما صرخت بـ كل صوتها

باوعنا مرعوبين جارحه إيدها من الطول للطول
باستها تعتذر وطفرت للصالة ، دنشوف جرحها صرخت بينا عوفوني ولحگوا أختكم لتسويلنا كارثةةةة

ركضنا بسرعة بعدنا بـ باب الصالة ونسمع العيطة گبت منين ديطلع الصوت مندري بس شكلها علگت بيناتهم ورد أختي واعرفها مترتاح إذا متسوي الـ براسها....

يتبع..

لتنسوووون ⭐⭐⭐⭐⭐⭐
كل الحب ❤🥀

حساب الأنستا يفيدكم بالبارت القادم 🌚💔