الثأر الخامس عشر
ثارهم وبنت الفقير
بقلمي_ترانيم هادي ♥️🕊️.
_شلونكم حلويني..تصويتاتكم..وتعاليقكم بين
الفقرات لاتنسوها..ومتابعه للحساب ♥️🕊️,
taranim_09
يولو مصكوعين تفاعلكم صاير ابد موحلو يعني عدد المشاهدات اكثر من تصويتات ليش 🙂؟
صوتو عالقصه وعلقو اذا ضل تفاعلكم هجي حتى واهسي يطير ياعيني
سيرين...
سمعت صوت ضرار بسرعه سديت المبايل وضميته بملابسي
اريد اهدي نفسي توترت كلش والرجفه سيطرت على كل جسمي
دخل للغرفه واني على فرد وكفه راح فتح الكنتور اخذ ملابسه ودخل للحمام
طكيتها ركضه عفت المبايل يم الحجيه وكعدت يمها
الحجيه... شمالج يومه وجهج اصفر
سيرين... هزيتلها راسي لان ماكدر اجاوبها احس لساني نعكد
طلع هوه من الغرفه واجى كعد كدامي ومبايله بيده
سيرين بكلبي... جبرتني اسوي كل هذا
عفتهم وكمت للمطبخ ضلينى اني وغيد نسوي حلويات ونبدع بالاكل واني طبخي موكلش زين غيد تساعدني
لليل كعدنا سوا ناكل بس احس روحي تعبانه كلش والرجفه بكلبي
وهوه مانطق ولاكلمه وياي ولاحتى باوع عليه احس متجاهلني
لليل راحت الحجيه وغيد واني رحت وراه للغرفه فتحت الباب لكيته مبدل ويريد يطلع
سيرين... وين رايح
عاينلي عاكد حاجبه
ضرار... مالج شغل
سيرين... طلعني
ضرار... مواليوم فريتج فر ماتعبتي
سيرين... لاماتعبت اريد اطلع احس نفسي مخنوكه كلش
ركز نظراته عليه وحجى
ضرار... يله بدلي خنروح
رحت بدون ماحجي كلمه ستغربت تصرفه وبروده بدلت وطلعت لكيته ينتظرني بالصاله
مشى كدامي بدون كلمه واني افكاري تجيبني وتوديني
طول الطريق ساكتين ابد مانطقنا كلمه،صف السياره ونزلنا
اعاين جابني لنفس المكان الاجيتله اجى لزم ايدي وضلينى نتمشى وهوه بس يذب حسرات وجمارته بحلكه
سيرين... ليش اجينا لهالمكان
ضرار... ماعرف بس ارتاحن بيه
سيرين... اي صح
ضرار... سيرين
سيرين... ها
ضرار... خليج واضحه بمشاعرج ماريدن كرهي والحقد الشايلته عليه يعمييج ويخليج ماتميزين بين الصح والخطأ .
سيرين... شنو قصدك
ضرار... ماقصدي شي بس جاي اكلج
تنهدت بألم واحس هالتنهيده جمره وحركت كلبي
سيرين... نبدي حياتنا من جديد
عاين عليه وضيق عيونه وجن ممصدك
ضرار... شني ؟
سيرين... اي خلينه نبدي حياتنا وننطي فرصه لزواجنا
اجى سحبني بخفه وخلى ايده على كصتي يتلمسها
ضرار... بويه جنج مصخنه لوهم رجعتي تمرضتي
سيرين... ضرااار داحجي جد
سحبني من ايدي وضل يمشي كعدنا بزاويه شبه معزوله وناس قليله محاوطتنا
كعدت وهوه كعدت كدامي ويطبط عالميز بسويج سيارته
ضرار... بويه انه ماجبرج على شي اذا انتي مارايدتني ولامتقبله وجودي مافرض نفسي عليج وهالعمر كله كدامج لاتستعجلين بشي
لزمت ايده وبتسمت بوجهه
سيرين... ممم خلينا نحاول ليش حتى نخرب زواجنا بسبب المشاكل
ضرار... ليش فجأه ردتي هالشي
سيرين... فكرت بالموضوع وشفت حياتي ممكن تتصلح ناحيتك وبكل الاحوال متاكده مراح ترجعني لاهلي حتى لوحاولت كل عمري وشعرفنا يجوز بعدين تتصافا الكلوب وكلشي يصلح مع الوقت
صفن بعيوني وجن فاهمني وفاهم الي بداخلي بس مستحيل اخلي يخرب الي اريد اوصله
لزم ايدي سحبها وباس الشامه البيها
ضلينا كاعدين شوي ورجعنا بدون نفس لاهوه حجى ولاني حجيت
لثاني يوم كعدت قبله رحت للصاله لكيته نايم تسحبت على اطراف اصابعي
ورحت على كيف تفقدت اغراضه كلهن عالميز سحبت المحفظه
من التوتر والخوف حتى ماعرفت الزمها
سيرين... يربي فدوه سامحني مجبوره اسوي هيج
شفتهن مامرتبات اخذت منهن ورجعتهن لمكانهن وهوه بدى يتحرك
رحت طكيتها ركضه للغرفه دفنت نفسي جوا البطانيه وجسمي يرجف
اريد اسيطر على رجفتي ،وجن مسويه جريمه
سيرين... ضرار شراح تجبرني اسوي اكثر من هيج يايمه
بالنص ساعه اني على هالحاله هديت شوي وكمت ضميتهن بين الاخشاب مال جربايه خاف يلكاهن
طلعت شفته بعده نايم ... رجعت للغرفه حتى نسيت اغسل وجهي
رحت غسلت وطلعت دشداشه من الجبتهن بيها فتحات من الرجل
ضفرت شعري على طوله خليت حمره خفيفه ،شفت العطر الجابته غيد عالميز
خفت اخلي منه خاف صدك اخلي ويظل يناطح شيخلصني نوب
عفته ومشيت حضرت الريوك خليت الجاي انداريت واشوفه كدامي
سيرين... يااايمممه كلبي
ضرار... صباح الخير
سيرين... تنهدت باريجه وحجيت،صباح النور
ضرار... شبيج
سيرين... ضراار عالاقل طلع صوت حس نفس والله حسيت كلبي وكف
اجى تقدم عليه باسمي من كصتي طول بوسته
ضرار... حروح اسبح وابدل عدي شغل اريد اطلع
راد يروح لزمته من ايده
سيرين... تتأخر
ضرار... تؤ اخلص بسرعه واردلج طياره
سيرين... ممم ماشي ححضر الريوك وانت خلص
اندار راد يروح وماحس غير وهوه ساحبني عليه بقوه تشبث بخصري ومقربني عليه
دفن راسه برقبتي وايده يحركها على خصري ضل يشم بركبتي ولحيته تبزز بيه
سيرين... اوي ضرار لحيتك تبزز
ضرار... سيرينتي
سيرين... ضرار شبيك
وخر راسه من رقبتي وعاين بعيوني وخر شعري المتناثر على وجهي وجهه قريب على وجهي مايفصل بينا غير انش
سحب ايدي وباس الشامه
سيرين... ليش تبوس بهالشامه
ضرار... الشامات المطبوعه بيج حافظهن وحده وحده بس هالشامه احبنها
سيرين بتوتر... شسمه تأخرت على شغلك
غمض عيونه وبلع ريقه ،هز راسه ومشى
انتجيت على الكاونتر واني جسمي يختض مثل السعفه
سيرين... اهدي شبيج لاتخلينه يأثر عليج بتصرفاته لاتنسين على شنو ناويه وشنو السواه وياج
هديت نفسي شوي بس الرجفه لازالت مستمره
التهيت احضر بالريوك خلصت رحت رتبته عالميز شوي واجى
متأنق على اخر حبايه لابس تشيرت ابيض رياضي بارز عضلاته وبنطرون اسود وحذاء ابيض
والعطر يمشي وراه اشو العطر الاخليه دقيقه ميضل بملابسي
ضرار... اكعدي اكلي حتى تاخذين دواج
سيرين... هزيت راسي وكعدنا ناكل اكل شوي وكام راح اخذ اغراضه
اجى باسني وبس يوصي بيه واني كضيتها اهز براسي
التهيت انضف بالشقه وارتب التفكير تعبني وتصرفاتي متناقضه ساعه اتندم عالجاي اسويه وساعه اكول يستاهل
واكعه بين نارين نار ضرار وجحيمه ونار تفكيري وبالجاي اسوي
عجزت الاكي حل يوصلني للاريده بدون ماتندم بس ماكو وجن الايام حكمت عليه بموت احاسيسي تجاه ضرار
للعصر يالله رجع اعاينله التعب باين بوجهه الصبح جان مبيه شي اول مااجى راح للغرفه بدون مايحجي كمت وراه لكيته ذاب نفسه عالجربايه ونايم
رحت كعدت بطارف الجربايه واحرك بيه
سيرين... ضرار شبيك كوم
ضرار... تعبان شوي وكعديني
سيرين... عالاقل بدل ونام
كام راح للحمام بدون مايحجي،شبيه هذا اوي شعليه اني
شوي وطلع سابح باقي بس بالشورت وفانيله
سيرين... على كولت غيد عزااا شكد مايستحي
كمت ردت اطلع اجى بسرعه سحبني من ايدي ومشى للجربايه
سيرين... شدسووي عوفني
ضرار... ماسوي شي بس ضلي يمي
سيرين... اي عوف ايدي
ماسمعنى راح تمدد وسحبني عليه ضم رجليه لرجليه قيدني بحركتي وظهري صاير على صدره وجهه دافنه برقبتي
سيرين... ضرار
ضرار... هممم
سيرين... خنكتني شوي بعد
ضرار... اششش كافي نامي
سيرين... مانعسانه
غلس ماجاوبني رجعت حجيت
سيرين... البس ملابس عالاقل
ضرار... جا شايفتني لابس سـ*** ولـ*** وهذن شني
سيرين... هففف ميفيد الحجي وياك
ضرار... كااااااافي انلصمي
عاط عليه خلسني خلس ضلت بس عيوني مفتحتهن وانفاسه برقبتي
ذاب حيله كله عليه وهوه ضخم ومقوي قبضته عليه بحيث جسمي حتى ماحسيت بيه
اول مره انام بحضن احد وبهالقرب
طردت الافكار من بالي واستسلمت للنوم
ماكعدت غير على شي ثكيل عليه فتحت عيني بنعاس عاينت بارجاء الغرفه وضرار بصفي
ذاب كل حيله عليه اريد اجر النفس ماكدر ايده جوه راسي والايد الثانيه مكورها على خصري ونص جسمه ذابه عليه
صرت اشهك من الخنكه ادفع بيه ماينزاح نوب صوتي حسيته راح وهوه لاحس ولاحركه
بلكوا حجيت بصعوبه
سيرين... يايممه ضرار خنكتني اففففف الرحمه ربي
ضليت ادفع بيه وميوخر سحبت ايده وعضيتها بكل قوه حتى حسيت سني نكسر
هوه بسرعه فز وفاتح تك عين
ضرار... ها شكو
سيرين... بخنكه وبلكوا اجر النفس... ماكو شي بس جن رايد تموتني وخررر حموووت يربي
هوه شافني هيج بسرعه كام ويفرك بعيونه بقيت على نومتي واتنفس بلكوا
سيرين... هخخخ يممه التوبه اذا خليتك تنام يمي كلبي حيوكففف من وراك
عاينتله لكيت صافن وفاتح حلكه مركز نظره على رجليه الدشداشه مرفوعه وهيه بيها فتحات كلشي ظاهر من جسمي
كمت بسرعه عدلت الدشداشه وهوه مستمر يباوع
سيرين... دووور وجهك
ضرار... ليش
سيرين... عيب تباوع
ضرار... شعليه انه انتي مطلعه سيقانج ولـ*** هذاك هوه مبين بيها
سيرين... ممطلعتهن بس انت عينك فالته
حك لحيته وعيونه مضيقهن ويباوع عليه من فوك ليجوا
ضرار... انه عيني فالته
سيرين... اي
عفته ورحت عاينت للساعه جانت ب٨ حيلل شكد نايمين
شوي واجى وراي يفرك بعيونه عاينلي وحجى
ضرار... بدلي خنروح يم الحجيه
هزيت راسي ومشيت اخذت بس شال وعبايه اشو هم كدام شقتنا
لبستهن وطلعت لكيته طالع قبلي عفته ورحت دكيت الباب شوي وطلعت غيد
اخترعت من شكلها وعطت
سيرين... إسم الله يااايمهه شبيه وجهج
غيد... وسم شبيج ماسك مال وجه هذا
اجى ضرار صفن عليها شوي تحمحم وحجى
ضرار... ها بويه شني هذا المخليته
غيد... ادخلو ادخلو شعدكم واكفين وانتو شدعوه هالكد داقكم وجهي هذا ماسك اسمه مال وجه
ضحك ضرار بصوت عالي ودخلنى لكينى الحجيه كاعده تسبح وبيدها القران سلمنى عليها وكعدنا نسولف شوي
وغيد تفتر علينه بماسكاتها ضاله تهفي على وجها تريد ينشف ونوب تغسله وترجع تخلي غيره
سيرين... هذا شنو راح تخلي
غيد... هذا يرطب البشره
سيرين... خليلي وياج
غيد... دتعاي يحظي جنج وجه ميت
ضرار... افا عليج وججج لاتخربن وجوهج بهالشغلات وشعرفتي منهن وتخليهن
الحجيه... يايمه جا ماتكلها خلصت الحصه على وجهه هاي صار ثلت علب مال كهوه تخلصهن بهالسبوع
غيد... هذيج علبه بقت نصها شمخلصه يايمه
ضرار... يابه حروحن اجيب عشى واجي
الحجيه... لاتعب روحك وليدي هسه انسوي
ضرار... وين التعب ياحجيه كلشي لاسون هسه اجيب واجي
غيد... شسمه جيبلي وياك حلويات
سيرين... وانه
ضرار... وبعد
سيرين... لاتنسى الحلك
ضرار... بويه عوفج من الحلك بعدين
جاوبته بفهاوه وعدم فهم... شنو
ضرار... ها يله حروح قفلن الباب ولاحد تطلع
حجى اخر كلمه وخزرني وجن جاي ينبهني
راح هوه وقفلت غيد الباب وراه اني كمت اخذت المبايل ورحت لغرفه لغيد
اتصلت على اهلي خلصت منهم ورجعت اتصلت على بدر
احس روحي ترتاح يمه مارايده هالبعد ابد
بدر... سيرينتي طول غيابج
سيرين... هففف شسوي مابيدي شي
بدر... بس حاولي تعرفين المكان الا انتي بيه والخلقج مابقيج دقيقه يمه اعرفيلي ايشي بسيط ووين انتم
سيرين... م ماعرف كلشي ماعرف مكان بعيد ومعزول ماعرف وين جايبني بالظبط
بدر... سكت شوي ورجع حجى،سيرين فدوه اروحلج اصبري ولاتخلي يلمس شعرايه منج والله اموتن ماتحمل
شهكت ببجي وصوتي بلكوا يطلع...بدر اموت ولااصير لغيرك بدر فدوه حاول تساعدني ماكادره اتحمل بعد
انداريت لكيت غيد واكفه وعاكده حواجبها شافتني طبكت الباب بقوه وراحت
شوي وسديته منه اول مارحت اندك الباب عفت المبايل عالميز وكعدت يم الحجيه مثل العاقله
وغيد عابسه وجهه ومتباوع حتى عليه اخذت الاكل من ضرار وراحت للمطبخ
كمت وراها شافتني وتجاهلتني بنظراتها
سيرين... غيد شبيج ؟
عافت الاكل من ايدها ونفخت بضيق
غيد... سيرين جاي تسوينه غلط مهما جان الانتي بيه هسه صرتي على ذمه رجال وكدام ربج انتي زوجته
سيرين... غيد فدوه لاصعبيها عليه هالزواج صار اجباري وموبرضاتي
غيد... ماراح احجي شي بس ياسيرين وروح ابوي يجي يوم وتتندمين بكد شعر راسج عالجاي تسويه لاعبالج ضرار هين وتكدرين تلعبين عليه لا غلطانه والف مررره غلطانه اذا شفتي مطيج مجال وضحك بوجهج عبالج موفاهمج ولافاهم تصرفاتج بس مستخطيج ومعديها بمزاجه
ولو انكلب كلهذا وعرف بالجاي تسوي صدكي مايرحمج ولاتلومي عاليسوي وياج ابد لان انتي جبتيها لروحج
_بكلامها خوفتني اكثر احس الحروره صعدت لراسي من الخوف بس ماهتميت واليصير خليصير
لليل يالله رجعنى لشقتنى وصلني وراح ماسمعت غير بس صوت القفل
رحت بدلت وضليت افتر بالشقه ماكو شي اسوي وملل ياكل بيه
نص ساعه ورجع لكاني كاعده بالصاله اجى عاف الجياسه عالميز وكعد بصفي
ضرار... شمالج
سيرين... مابيه شي ليش
ضرار... جا ليش معبسه وجهج
سيرين... لا
ضرار... ماحب اشوفنج هيج اضحكي بويه وها جبتلج الحلويات الترديهن وشسمه
سيرين... شسمه
ضرار... الحلك
سيرين... ياااي قصدك ابو الحلوك
عض شفته وهز راسه وهوه يبتسملي بمكر هفف شبيه هذا
اخذت علاكه وحده تربعت وصرت اطلع بالحلويات
سيرين... وهذيج المن
ضرار... لغيد
سيرين... ممم اضمها الها
ضرار... هههههههههههه لاصيرين طماعه الجبته الها جبته الج
سيرين... ممم ضرار
ضرار... عيونه
سيرين... شسمه منو تحب اكثر اني او غيد هاا
ضرار... شلج بهالسؤال
سيرين... رفعتله كتفي بعدم الامبالاه وهوه سكت
شوي وحجى
ضرار... غيد مثل بتي انه مسؤل عليها سيرين شايفه خوف الاب لبنته انه خوفي عليها هيج واكثر
اول ماشبت ابوها اشتشهد وعمامها الك*** ماواحد كلف روحه وعرف شبيهن مابيهن كلمن التهى بروحه وماكالو نسوان منو الهن
اشتريتلهن هالشقه كدام عيني وخاصه هنه بس نسوان صرت اروح وارد عليهن واذا غبت لوشي مازن موجود بمكاني هوه يدير باله عليهن
وخاصه غيد بنت ولازملها مداراه ومراقبه امها مره جبيره وبس هالوحيده
صرت انه ابوها واخوها وصديق الها وكت الحاجه وسند بظهرها
ماتتخيلين الفرحه وانه اسمعها تكول يابه
ضحك بخفه حك لحيته ورجع يحجي
وبدون ماتدري بروحها تكلي عمو لوضرار وماعرف روحي شني بالنسبه الها
سيرين... صدك نتبهت عليها اصيحلك يابه ومرات ضرار
_عجزت شجاوبه اذا انـتـهـه هالكد خايف عليها ليش مافكرت بابوي وانو ممكن يخاف وينقهر عليه
مافكرت بحاله من اخذتني من عده وحرمتني منهم
_لثاني يوم العصر جنت كاعده بالغرفه ارتب بالملابس المغسوله وضرار بالصاله يشتغل
شوي واندك الباب كام هوه فتحه سمعت صوت غيد عفت البيدي وطلعت
سلم عليها وهوه عافنا وراح
غيد... وججج سيرين ...
يـــتـــــــبــــــــع....