السلام عليكم
أولا ..شكرا علي دعمكم ليا صحيح الريتش في النازل رغم اعتزازي الكبير بالرواية دي إلا إني مش زعلان طول منتوا بتدعموني كدة
ثانيا .. اقتربنا من نهاية المشوار والرواية .. أتمني أسلوبي كان خفيف وحلو عليكم ومش هبطل أكتب روايات أنتم اللي حببتوني في كتابتها .
نبدأ بقيييييي
أنتي خسرتي نفسك قبل متخسري كل حاجة .
بصت مروة لقيت إن حتي شبحها موجود وبيتكلم : أنتي اللي ضيعتي نفسك واستسلمتي لكل الضغوط اللي كانت عليكي .. لازم تحددي موقفك .. لازم تعرفي إنتي واقفة فين ؟ بطلي هروب وضعف لازم تواجهي ..
بصت مروة للسكينة اللي في الشنطة بتاعتها : أيوة .. اختفت الأشباح.. لازم أواجه .. كفاية ضعف .. ويا أنا يا هو .. وأخدت طريقها متجهة لمصيرها .. مروان !
صحي مصطفى الصبح بعد ما مروة مشيت مش فاكر إيه اللي جابه هنا .. الفون بتاعه رن فرد عليه ..
_أيوة .. عملت إيه ؟
= تمام سعادتك .. قبضنا على اللي شغالين في البار والزباين اللي كانوا قاعدين .. وقفشنا شوية بيشموا بودرة ..
_ كله يبات في الحجز النهاردة لحد ما آجي ونشوف مع النيابة الدنيا هتمشي إزاي ولو حد كبير حب يطلع الننوس ابنه أو بنته سيبهولي .. اتصل عليا في أي جديد .. سلام .
رمي الفون وزفر بضيق .. افتكر كل حاجة وندم إنه ضرب أخته بالشكل ده .. وطرد أخوه برة بيته .. دخل المطبخ وعمل سندوتشات جبنة رومي وبيضا وصب لبن ويدوب هيطلع افتكر لما حسام كان دايما يحطلها طماطم سندوتشات الجبنة البيضا .. قطع شرايح طماطم وحطها وطلع وراح ناحية أوضته واتفاجئ بالباب مفتوح .. ركن الصينية وجري ع الأوضة لقاها فاضية .. لف البيت كله زي المجنون يدور عليها وملقهاش .. فتح الأوضة اللي فيها خالد وأمه ولقي خالد قاعد ع الكنبة وحاضن أمه والاتنين نايمين بس قاعدين .. اتنفضوا أول ما الباب انفتح ..
مصطفى : مروة هنا ؟
خالد : إيه اللي هيجيبها هنا مش معاك .
الأم بزعيق : وديت بنتي فين ؟
مصطفى بزعيق هو الآخر : وأنا اش عرفني هربت تاني ؟
طار ع الفون ورن علي حسام : ألو أيوة يا ..
حسام : اديني مروة أطمن عليها يا مصطفى أرجوك .
مصطفى بذهول : هي مش عندك !؟
حسام باندهاش : لأ طبعا هي مش عندك ؟
مصطفى : هربت تاني .. أنا نازل أدور عليها سلام .
حسام رمي الفون وراح لعمر : عربيتك جاهزة ؟
عمر : ايه خيـ ..
حسام : مفيش وقت هاتها ندور علي مروة هربت تاني .
............
مروان بيجهز شنطته وأوراق السفر .. طلع من الحمام بعد ما خلص وأخد شاور لقي الفون بيرن بنمرة أبوه .. اتنهد ورد فزعق أبوه : أنت مبتردش ليه يا حيوان ..
مروان بضيق : كنت باخد شاور .
_ يا برودك يا أخي .. فاضل ساعتين ع الطيارة والبلد ملناش قعاد فيها وأنت بتاخد شاور .
= أروح بعفني يعني ؟
_ خلاص اخلص وعدي عليا خلصت روحك .
قفل معاه ورمي الفون بغضب .. قفل شنطته ويدوب طلع بيها الباب خبط .. ساب الشنطة وفتح الباب واتفاجئ بمروة ..
مروان بصدمة : مروة !
مروة بثبات : كنت متوقع مش جاية تاني ولا ايه ؟
ودخلت لقيت شنطة السفر بتاعته ..
هو : خير .. عجبتك قبل كدة وعايزة تجربيني تاني ؟
هي : لأ .. الموضوع إني مش مصدقة .
_ مش مصدقة إيه ؟
= إنك خدعتني .
_ مش فاهم .
قربت منه ووقفت قدامه بشجاعة لأول مرة في حياتها : مش مصدقة اللي كان بيقلي بحبك بعدد شعر راسه في اليوم إنه يخدعني .. مش مصدقة إن اللي كان بيتغزل فيا كل ثانية يخدعني .. اللي بنفسه طلب مني أبقي مراته علي سنة الله ورسوله علشان من حقه حتي لو في السر .. أنت بتحبني وأنا واثقة من كدة .. في حاجة وقفت في طريقنا فقررت تسيبني . قلي كدة .. قلي أي حاجة غير الخيانة والخداع ..
مروان مش مصدق إنها صادقة .. هي عجباه مش بيحبها .. لكن مش معنى كده إنه يدمرها ..
مروان حب ينهي المهزلة دي وإنها تمشي لأنها بتفكره بظلمه وغلطاته الكتيرة والكبيرة والألم الضخم اللي بتسببهوله .. قرب منها : عارفة مشكلتك إيه ؟ إنك مصدقة نفسك .. مصدقة إن في ناس بتحبك وتخاف عليكي .. مصدقة إن في حد بيهتم بيكي .. إيه يعني بحب فيكي .. بتغزل فيكي.. منا لازم أعمل كدة عشان أقرب منك .. لازم أبقي الصدر الحنين والراجل اللي تحبي تحكيله كل حاجة .. الراجل اللي تقبلي تتجوزيه عرفي عشان مقدامكيش غيره .. وأبقي غبي لو مستغلتش ده لصالحي .. أنتي اللي هبلة وصدقتي .. مش ذنبي إنك مش عارفة الصح من الغلط .. ومش ذنبي أتجوز واحدة قبلت تتجوز عرفي أو تنام مع واحد من غير جواز .. باعت نفسها برخص التراب .. طيب منا أتجوز واحدة معرفتش راجل قبلي ومحدش لمسها .. امشي يا مروة .. امشي عشان مبحبش أهبل معايا في شقتي .
مروة مش مصدقة الحقيقة البشعة اللي قدامها .. ده لا يمكن يكون بني آدم .. ده مسخ .. مسخ في زمن كترت فيه المسوخ ..
زعلت علي حالها واتقهرت .. مكنتش متوقعة إنها بقيت رخيصة للدرجة دي ..
هي : كنت جاية أقلك إني عندي شعور بالحمل .. بس أنت متستحقش تبقي أب .. متستحقش كلمة راجل .. متستحقش إنك تعيش .. أنا حبيتك لأنك كنت أول حب وراجل في حياتي .. أو أنا كنت مفكراك راجل .. كنت طيبة وعلي نياتي ومكنتش متوقعة إن حد هيخذلني ويتخلي عني في حياتي .. كل حلمي إني أبقي حرة وأعيش حياتي مع اللي أختاره .. بقلبي اللي اختار غلط .. أنت مش راجل .. أنت مسخ .. ضحكت عليا وعشمتني وبعد ما أخدت غرضك رمتني .. أنت فعلا عندك حق في جملة واحدة .. أنا اللي رخصت نفسي .. بس رخصت نفسي ونزلت بيها لمستوي واحد زيك وكنت عامية .. أنت اللي رخيص مش أنا ..
وطلعت السكينة واتصدم مروان .. لاحظت مروة علامات الصدمة علي وشه فضحكت بمرار : متخفش مش هقتلك .. كنت ناوية إنك لو رجعتني واتجوزتني هنسي كل اللي عملتوا فيا .. أما لو طلعت ندل زي مهو الحال دلوقتي ورفضت أقتلك بس أنا اكتشفت حاجة .. تعرف إيه هي ؟
مروان بخوف : إيه هي ؟
مروة بقهر : إني أرتكب جريمة زي دي وذنب زي ده في واحد ميستاهلش .. ميستاهلش يموت بالساهل كدة .. بس أنا بدعي عليك .. عارف إيه دعوتي ؟ يارب يجيلك سرطان ياكل لحمك كله زي ما أخويا قطع لحمي .. يارب تطلب النجدة من أي حد وتلاقيش حد جمبك يشاركك عذابك وهمومك .. يارب تموت وأنت متعذب ومقهور علي حالك زي مقهرتني علي حالي .. يارتني معرفتك يا أخي ..
رجعت السكينة الشنطة ونزلت .. ركبت تاكسي وحاسة إن دموعها معادش ليها معني .. مسكت قلبها والسواق سألها : فيكي حاجة يا أبلة ؟
اتماسكت وقالت بهدوء : لأ أنا كويسة .. ينفع توديني اسكندريه .
السواق : أوديكي بس المشوار هيكلفك .
هي : يكلف .. وديني هناك لو سمحت ..
مروان فوق ضحك واستهان بالدعاء بتاعها .. راح رش برفان ورتب شقته وكمل لبسه .. الباب خبط تاني ..
راح يفتح بملل وهو كان متوقع مين اللي جايله .. دخلت لمياء وأول ما شافت الشنطة : اممم قررت تسافر .
هو : الطريقة الوحيدة اللي أخلص بيها من الهم اللي أنا فيه .
طلعت لمياء المسدس : وأنا مش هسمحلك تسيبني .. الأول مامي وبعد كدة بابي وداوقتي أنت ؟ أنتو بتتخلوا عني ليه ؟
أنا أجمل من مروة .. أحلي منها .. أذكي منها .. أحسن منها .. ليه حبتها وعايز تتجوزها وأنا لأ .. ليه كله بيتخلي عني .
هو : محدش اتخلي عنك .. حواليكي صحابك !
هي : صحابي ! دول بتوع مصالح .. معايا عشان أنا اللي بسهرهم وبجبلهم مزاجهم .. حتي أنت لما عرفتك كنت مجرد ديلر .. مفيش حد بيحبني .. أنا مش عارفة إيه اللي الناس مستنيينه مني عشان ينتبهولي و يحبوني حب صادق .
هو : الوحيدة اللي حبتك باخلاص أنتي اللي دمرتيها .
هي بزعيق : عشان أجمل وأحلي مني .. هي اللي أخدت الأضواء مني في الجامعة .. هي اللي غطت عليا .. هي اللي أخدتك مني .. ليه ؟ ليه ؟ لييييه ؟
هو بزهق : أنا مش فاهم عايزة مني إيه دلوقتي ؟
هي بغل : مش هتسافر .. هتعلن جوازنا ونربي ابننا سوي .
هو : ولو رفضت ؟
هي : يبقي حكمت علي نفسك وعليا بالموت .. ورفعت الزناد .
هو : سيبي اللي في إيدك ده بطلي هبل .
واتخانقوا علي المسدس وفجأة طلعت رصاصة طايشة .. عارفة مكانها كويس !!!
في اسكندريه ... علي شاطئ البحر أثناء الغروب .....
مروة بتراقب غروب الشمس .. الشاطئ بيفضي ومفيش حد .. عيطت كتير وبعد كدة قالت : أنا عارفة إنه غلط يارب .. بس أنا مش قادرة .. مش قادرة أعيش .. ينفع تسامحني ؟
=====================
#يتبع
أوباااااا .. يا تري إيه اللي هيحصل بعد كدة .. ومين اللي الرصاصة جت فيه ؟.. توقعاتكم للحلقة الأخيرة .
الحلقة طويلة أهو علي الله الريتش يحصله إنعاش ولا حاجة 😂
استنوني الحلقة الأخيرة بقييييييي 😂
#الحلقة_الأخيرة
#حياتي
#بحبكم
#Abdo_Salah
By:Abdelrahman Salah