السلام عليكم
شكرا على كل الدعم اللي انتو بتدهولي ده ويارب أكون عند حسن ظنكم .
نبدأ بقيييي
مروة فضلت مصدومة أسبوع من اللي حصل ورفضت تتكلم .. لمياء فرحانة وشمتانة فيها وعاملة نفسها الصدر الحنين .. مروة بقي عندها هاجس الحمل وبدات تظهر عليها اعراض الحمل وده اللي راعبها .. واحدة واحدة لمياء عرفت تخرجها من المود وتاخدها معاها الديسكو .. زودت مروة جرعة المخدرات والخمرة لأن الجرعة القديمة معادتش تحوق .. ولمياء خطتها ماشية في السليم ..
مصطفي وخالد وكل اللي يعرفوا مروة ماعدا ندي معرفتش باللي حصل .. كلهم كانوا بيدوروا عليها في كل حتة ..
ندي اتخطبت من العريس وقررت تتجوز جواز تقليدي والحب ييجي بالعشرة وخلاص .. رغم ان حسام لسة في القلب ..
حسام من ساعة ما أغمي عليه مفاقش ونقلوه المستشفي والدكتور أكد لعمر ان حالته دي مينفعش معاها تدخل طبي .. كل اللي محتاجه الدعاء .. الدعاء وبس ..
مروان اختفي تماما واتصل بحد معرفة يخلصله الباسبور واوراق السفر .. خلاص قرر يسافر ويسيب الهم اللي اتعك فيه ومش راضي يخلص ..
بعد أسبوعين من الاحداث دي ....
مصطفي قاعد في مكتبه سرحان في أخته المختفية وفجأة جتله رسالة من رقم مجهول :
( أختك اللي بتدور عليها ومش لاقيها بتسهر كل يوم في ديسكو " ..... " الساعة 10 بالليل ولو مش مصدق تعالي شوفها النهاردة بعينيك )
مصطفى بيقرأ الرسالة للمرة المليون ومش مصدق اللي بيقراه .. الدم بيغلي في عروقه وحاسس إنه هيطلع من دماغه .. وقرر إنه لو شافها ليطلع الأيام السودة اللي عاشها علي جتتها .
مروة قاعدة في الفيلا بتاعت لمياء وسرحانة وعمالة تعيد في كل اللي حصل وكل اللي عملته الفترة اللي فاتت .. بصت للمياء اللي كاتت بتتزوق قدام المراية ومش مصدقة .. مش مصدقة إن البنت دي غيرتلها هدومها .. طبعها .. أخلاقها .. وحتي برائتها .. هي اللي عرفتها علي مروان اللي خدعها .. هي اللي عرفتها سكة الخمرة والمخدرات .. هي السبب .. بس ياتري ممكن ترجع ؟
_ هتجيبي المأذون امتي ؟
= مأذون ايه ؟
_ أصلك مبحلقة فيا كدة شكلي عجبتك .
= لأ عادي .. خلصتي ولا لسة عاوزة أنزل .
_ لأ خلاص خلصت يلا بينا .
ونزلوا وراحوا الديسكو .. ومروة متعرفش القدر مخبيلها ايه هناك .
في مكان تاني ..........
_ حسام .. حسام .. أهو بيفتح عينيه يا دكتور .
/ أيوة بس مش سامعنا .
_ منا بنده عليه أهو .. حسااااام .. اصحي يلا في ممرضات مزز هنا فوق .
/ ايه اللي بتقوله ده يادكتور ميصحش .
_ يا دوك هدي أعضاءك أنا عارف الأشكال دي بتصحي إزاي ؟ قوم يلا سعاد اللي من غير معاد هنا هتتهجم عليك ههههههه .
/ هو ده وقته يا دكتور استغفر الله العظيم .
_ طول منتا مستشيخ كدة مش هيفوق .
= آااااااه .
_ أهو قال أه .. الحمد لله شفت طريقتي .
/ أصحاب العقول في راحه والله .
_ قوم يلا سعاد جت وعايزة تبوسك .
= أنا فيييييين ؟
_ حمدا لله ع السلامة يا أخ .. في حد ينام أسبوعين .. ليه من أهل الكهف .
= أنا نمت أسبوعين ؟
_ أيوة وسعاد عملت معاك الغلط .
= سعاد مين ؟
_ يااااااه دي قصة طويلة أحكيهالك بعدين .
/ طيب أستأذن أنا حمدا لله علي سلامتك يا دكتور .
= الله يسلمك يا دكتور تسلم .
وقعد شوية مسترخي في السرير وعمر بيضحك معاه .. وفجأة افتكر آخر حاجة حصلت معاه قبل الغيبوبة ..اتفض وعدل نفسها وكلم عمر اللي استغرب التغير اللي حصل لصاحبه فجأة : إيه مالك ..
حسام : هو أنا بقالي أسبوعين هنا صح ولا ده تعبير عن طول المدة ؟
عمر : لأ ده بجد .
_ مشفتش مروة لما جبتني هنا ؟
= لأ مخدتش بالي .
_ هات التليفون طيب .
= منتا عارف مينفعش هنا و ..
_ بقلك هات التليفون .
= حاضر حاضر خد بالراحة .
رن علي مروة بس اداله مغلق لأنها رمت الخط وجابت واحد جديد .. اتصل علي عيلته بس محدش رد لا أبوه ولا الولاد اخواته .. أمه ممعهاش وكانت لما تكلم حد تاخد تليفون جوزها أو حد من عيالها .. رن علي دنيا ..
_أيوة يا دنيا يا حبيبتي عاملة ايه ؟ عامل ايه جوزك وابنك المقروض .. الحمد لله دايما .. مال صوتك ..
بص لصاحبه وقلبه اتقبض وبلع ريقه : مالها مرو.. إيه ؟ عملت ايه ؟
حسام كان مصدوم من اللي بيسمعه ..
لأ طبعا مصدقش طبعا اللي بتقوليه ده .. ده .. إييييه ؟ ولاء ؟ طب .. طب هي كويسة ولا ايه دلوقتي ؟
وشه كان محمر ومش مصدق إن أخته وبنته تعمل ده كله مقابل الفلوس ..
ولاء كويسة ؟ طب .. ومروة ؟ ايه ؟ لحد دلوقتي ؟ ومصطفى ملقهاش لحد دلوقتي ؟ بالراحة من غير عياط طيب يا دنيا هلاقيها متخافيش اهدي .. قمر عرفت ؟خلاص أي جديد هكلمك متقلقيش فاهمه ؟ يلا سلام وخلي بالك من مالك . سلام .
عمر : مالك كدة مش مظبوط ؟
حسام بتوهان : مروة مختفية ومحدش عارف مكانها فين لحد دلوقتي .
= طب اهدي وهنلاقيها متقلقش .
ضربت فكرة في دماغه رغم رفضه لها بس مفيش غيرها .. طلب ندي ويشوف .. ممكن تكون عندها .
ندي : إزيك يا حسام عامل ايه ؟
حسام : كويس وأنتي ؟
_ الحمد لله .
= ايه الدوشة اللي عندك دي ؟
حبت ندي تغيظه زي ماهو غايظها : خطيبي جاي النهاردة .
اتصدم حسام بس قرر إنه يتوجع بعدين .. عشان أخته .
= بجد ؟ مبروك .
ندي حست إنها وجعته وندمت : الله يبارك فيك .
= بقلك هي مروة عندك اديهاني لو سمحتي .
_ مروة ؟ مروة مين اللي عندي ؟
= مروة أختي .. مستغربة ليه ؟
_ أصل إحنا متخانقين لينا أكتر من شهرين ونص ومبتجيش عندي وبطلنا نذاكر مع بعض .. حتي الجامعة مبتروحهاش ومحضرتش امتحانات الميد والغريبة إن الدكاترة منجحينها .
حسام مش مصدق اللي بيسمعه .. دي كانت بتقله إنها من الجامعة ع البيت ومن البيت ع الجامعة أو بيت ندي .. حتي لمياء كان فاكر إنها صديقة جامعة بس ؟
حسام بصدمة : أنتي متأكدة ؟
ندي متضايقة أنه كل اللي هامه أخته : هكدب عليك ليه ؟
حسام حس بضيقها : تمام شكرا .. آسف ع الازعاج ومبروك مرة تانية .
قفل معاها وبالرغم من كمية الوجع اللي جواه بس دماغه شغالة زي الموتور الجرار بتحلل وتستنتج
.. و فجأة جت في دماغه فكرة تانية اتمني متكونش حقيقة ..
اتصل بجاميكا .. ثواني ورد : أهلاااااااا ازيك يا دكترة .. واحشنا والله .
حسام : الله يخليك .. عايزة في خدمة بسرعة .
_ اؤمر .
= فاكر صور الديسكو اللي بعتهالي قبل كدة ؟
_ طبعا .
= هات العنوان بسرعة .
_ حمامة ............. خد العنوان أهو ( ...... )
= تمام متشكر سلام أكلمك بعدين .
قفل وقام بسرعة يلبس ..
عمر : أنت أهبل !؟ مفكر نفسك رايح فين ؟
حسام : لازم ألحق أختي قبل متقع في حفرة النار .. معاك عربيتك ؟
عمر : أه .
حسام : خدنا ع العنوان ده بسرعة .. يلا متنحش بسرعة .
ندي قاعدة بتبص في الفون بدموع : ليه بتعمل فيا كدة .. ليه أختك هي أول وكل حاجة في حياتك .. نفسي أكون في نفس غلاوتها عندك .. مش عايزة أكتر منها حتي .. ليه ليه ليييييه ؟
وبعد كدة وقفت وزعقت مع نفسها : أنت كداب .. وهي كمان كدابة .. أنتو الاتنين كدابين .. أنتو مش أخوات .. اللي بينكم ده مش حب أخوي أبدا .. ده حب راجل وست مش أخوات أبدا .. أنا مش عبيطة وأنتو مش أخوات .. أبصم بالعشرة أنتم مش أخوات .. أنا مش عبيطة .. مش عبييييييييطة .
في الديسكو ......
مروة ولمياء وباقي الشلة بيرقصوا .. مروة بس اللي أخدت مزاجها فيهم .. سابوها تكمل رقص ورجعوا التربيزة ..
لمياء : يلا بينا نروح .
سهيلة : ومروة ؟
لمياء : واحنا مالنا ومالها إحنا نروح ونسيبها .
نيرة : ليه ؟
لمياء : وإنتي مالك ؟ بقلكوا إيه أنا مروحة اللي عايزة تيجي تيجي اللي عايزة تقعد تقعد أنا مصدعة خلقة .
نيرة : ومزاجنا هناخده امتي ؟
لمياء : عندي في الفيلا بابا مسافر .. قلتوا إيه ؟
سهيلة : قلنا يلا ده بيحصل كل امتي امتي .
وفعلا مشيوا وسابوها تواجه مصيرها لوحدها .. رجعت مروة التربيزة وملقتش حد .. افتكرتهم لسة بيرقصوا وراحت تشرب ويسكي .. مكنتش تعرف إن مصطفى شافها وجاي عليها ودمه بيفور : مروة !
مروة بتدعي في نفسها إنها تكون مش سامعة كويس .
مصطفى بزعيق وغضب الأعاصير : بصيلي يا مروة .
لفتله مروة ولقيت قدامها شيطان مستعد ياكلها.
مروة بتهتهة : أ .. أ.. أبيه ... م.. مصطفى !
مصطفى : أبيه إيه بقي يا مروة الكلب .
وقام لافخها قلم حست إن سنانها كلها وقعت .. عدلها تاني وقالها وهي بتعيط : أنتي لسة شفتي حاجة يا كلبة يا عار العيلة .
ولسة هينزل عليها بقلم تاني راح حسام مسك دراعه بايده السليمة : أنا سكتلك كتير علي جبروتك يا مصطفى لكن توصل إنك تضربها كدة مش هسمحلك أبدا .
=====================
#يتبع
أوبا ... يا تري إيه اللي هيحصل الحلقة الجاية ؟
مستني آراءكم وتوقعاتكم للحلقة الجديدة .. مش آراءكم بس وتوقعاتكم كمان تمام ؟
#حياتي
#النهاية_اقتربت
#بحبكم
#Abdo_Salah
By:Abdelrahman Salah