الثأر الخامس
ثارهم وبنت الفقير
بقلمي ترانيم هادي ♥️
سيرين... خيرر ومنو انتو حتى تجون ؟
بسول... عذرينا خيتي غلطنا بالدار
عافوني ومشو شبيهم هذول سديت الباب ودخلت جوا
نهايه... منو دك الباب
سيرين... ماعرفنهم بس غلطانين بالعنوان
خلص النهار وبس اني وامي وليال بالبيت للعصر اجو اخواني حيلهم مهدود عبالهم مثل كل مره يجون يلكون امي نايمه هيه شافتهم بهالحاله لطمت على صدرها وضلت تعيط عليهم
نهايه... ولكمم شني هذا حالكم هيه هاي طلعاتكم
مُراد... يمه واليرحم اهلج كافي مامسوين شي غلط بس انساعد ابونا حتى نستقر ويتحسن وضعنا
نهايه... انـتـهـه اااسكت ولااتسمعني حسك اصبرولي يجي ابوكم ويسويلكم حل
سيرين... يوم اهدي لاتوكعين
نهايه... ولج همه معادينا ويردون بس حجه حتى يسوولنا شي ويأذون ابوج وهذول يفرفرون من الصبح للمغرب يالله يجون وين اطي وجهي شسوي ربببي ناار ابوج وناركم شبيدي انه عليكم
حجت اخر كلمه ووكعت من طولها ركضنا عليها وهيه فاقده لاأيد ولارجل شلناها وبلكوا صحت
شوي واجى ابوي وهم حجى وي مُراد ومرتضى بس همه معاندي حتى ابوي يكعد وهمه يشتغلون بداله اخر شي ابوي عاط عليهم وكالهم
جابر... وعلي اذا شفتكم طالعين مره ثانيه لساني مايطخ لسان واحد بيكم وخليكم بعنادكم
عافنا وراح يم امي بالغرفه لحكتهم جان كاعد يم راسها وكاض ايدها
نهايه... خايفه عليهم والله چا انه ماكيف حتى بعينوك ويشيلون الحمل منك
جابر... الله كريم بويه تهون ولاشغلين بالج عبن هذول ازلامي ينشد بيهم الظهر لاتخافين عليهم
مرت ايام عاديه ومرتضى ومُراد ماطلعو بعد واني هالسنه لازم جامعه بس بسبب ضروفنا ماقدمت كلش نقهرت
وابوي باشر باوراق نقل اخواني وخلال مده نقلهم على مدرسه قريبه يمنه
بيوم من الايام اندك الباب قوي كمزت عاينت عالساعه جانت ٥:٣٠ خذت شالي وطلعت
جانت امي واكفه وابوي طالع بالباب يحجي وي ماعرف منو بالربع ساعه دخل وعايللنا
جابر... هذول ربعي مرو عليه حتى نروح سوا للشغل
نهايه... چا شعدهم جايين بهالساعه وهمه منشوكت يجوك
جابر... مادري والله عيب افشلهم واردهم
دخل ابوي بدل وطلع ... رحت حضنته ودعته كلبي مامرتاح ابد من طلعته
سدينى الباب والنوم ماجافانه ضليت كاعده علما طلعت الشمس كعدت اخواني وسويت ريوك حتى يرحون للمدرسه
وضل ابوي كليوم يروح لشغله وي صحبانه بس بهالفتره حالتنا كلش نتكست بسبب الفقر
بحيث تمر ايام نحير شناكل والبيت فارغ مابي
ومراد ومرتضى اصرو حتى يطلعون يشتغلون بس بعطلتهم
وابوي مانعهم وبدر انقطعت اخباره رايح لبغداد هوه وعمتي علمود شغله
غسلت المواعين ومسحت ايدي بدشداشتي ورحت حتى ابدل
بس استوقفني حديث ابوي وهوه يكول
جابر... تهون يامره ماضل شي ونرد لديرتنا
نهايه... شلون واحنى حالنا كلماله ينتكس وفوكاها مجاي يطوك اجور تعب مال شغلك
جابر... وهذا الشاغلني عبن العمال كلها يطوها وانه لا
نهايه... وتالي تضل هيج وشصار عالسالفه الصارت
جابر... ربج يفرجها وعبن انه حجيت وي مرجان ولهسه يدور عالرجال وعياله وانه اعرفنه الحجي لوعرف بحفيده مايرضى عليه عبن مايحب الظلم
سيرين... عفتهم ومشيت فرحت لان نوعا ما مشاكل ابوي راح تنحل وهذا المايتسمى بلكي احد يضربه على عقله حتى يرجعلو
رحت سبحت وخليت امي تضفرلي وابوي كاعد يشرب بجايه ويسبح بمسبحته ومرتضى ومراد يحضرون بدروسهم وليال تنام من وكت
نهايه... خلصت هاج
سيرين... يوم طلعيلي كذلتي
نهايه... وشلج بهالعطوب يمه عيفج منها
سيرين... مااا مااا احس روحي كرعه اذا ماطلعت شعراتي
نهايه... وجج اركدي عبن اتي تخبلين ماله داعي طلعين عطوبج
جابر... هههههههههههه ياامره طلعيلها هالشعرات عبن بتي بكذلتها وبدونها تبكى جنها شطب ريحان
نهايه... اوففف منكم تعالي ليه خلني اطلعها الج
...خلصت وكمت وكفت كدام المرايه خليت الماشات بشعري وضفايري على جتفي يمشن وياي
نهايه... سيرينه تعالي ليه يمههه
سيرين... هاا يوم
نهايه... جيبيلي هالعلاكه الجبيره بالكومدي اليم التلفزيون عبن مابيه حيل اكومن
سيرين... صار
رحت وطلعت العلاكه دوم جنت ازعل لان ماتخليني اشوفن البيها وتالي لوتكفخني لوتعضني حتى ماشوفها وترجع ورى شوي تصالحني وطيب خاطري
اخذتها يمها وصارت طلع منها ملابس اشكال كلهن بسيطات بس حلوات
سيرين... الله يووم هذن الي
نهايه... اي الج
سيرين... چا ليش ماتخليني اشوفنهن
نهايه... عبن اعرفنج ماترتاحين الاتلبسيهن وتتكشخين بيهن وانه اجمع كطعه كطعه بيهن حتى اجهزج لزواجتج وماينكصج شي
سيرين... كمت بستها وحضنتها الله يحفظج الي يالغاليه
نهايه... ويحفضلي ياج على كولت ابوج جنج شطب ريحان يمه
صح مرت ابوي بس حنيتها عليه نستني حتى حليب امي الي شمرتني وماسالت عليه مافكرت بحالي وشلون صرت وانه ولاجبت سيرتها ولاذكرتها بيوم عبن احس بس الكره والحقد بكلبي عليها ولواشوفنها بيوم ماراح اعرف هيه امي
جابر... الله يحفضجن بويه
سيرين... ويحفضك النه يابه وجهت نضري للملابس والشغلات الجايبتهن الي يوم منين جبتيهن وانتي ماطلعين هواي
نهايه... عبن عمتج من جانت تروح لبغداد جنت اطيها حتى جيبلج وياها والمره الله يطيها ماتكصر والاريدنه تجيبه
ضلينى شوي نحجي بعدها لميت الاغراض ورحت نمت خليت راسي عالمخده وستسلمت لنومي
سيرين... بااااابا وينننك تعاالي
مشيت بخطوات متثاقله بنص الظلام والاصوات ماعرف منين مصدرها والكاع كلها حفر
سيرين... ارريد اااابوي ياابه وينك تعاال اخذني
امشي على كيف خاف اوكع بالحفر ...شفت ابوي اجاني وصحتله
... ياابه وين عفتني تعال طلعني من هالظلمه
تقربت عليه عاينت لجهته كلها نور وجهتي كلها ظلام
جابر... بنيتي لزمي ايدي وتعالي ليه
مدلي ايده حتى الزمها لزمتها وسحبني عليه
ضحكت بس سرعان ماتلاشت ضحكتي من نجرت من ايدي ورجعت لنفس الظلام عاينت جان واحد ضخم كلش ومحاوطني مجان مبين منه شي غير الظلام معتلي وصاير قريب عالحفره بس يخطي خطوه يوكع بيها سحبني عليه وكعنى اني ويا
نزيت من الحلم الجنت بيه عاينت بارجاء الغرفه ماكو احد بس اخوتي نايمين والباب يندك
الجو جان زين بس حسيت نفسي سابحه بالعرق
نفس الحلم بس هسه يختلف ومنو هذا السحبني للحفره ؟
الباب يندك بصوره متعدده عاينت عالساعه جانت ب٦ كمت من فراشي
ابوي طلع مبدل وبيده استكان الجاي وامي اتبعته ... الشيب مالي راسه وبشرته من حروره الشمس صايره سمره وملابسه كلش تعبانات مثل حاله بس كلهذا وضحكته متفارك وجهة ودومه مطمئن وامله بالله جبير
شافني صبح عليه وباسني من راسي ... ها بويه ردي نامي بعد وكت
سيرين... حتروح
جابر... اي بويه حروحن للشغل عبن اليوم متأخرين اجو
سيرين ... حضنته وبسته من صدره يابه دير بالك على روحك عبن مالنه غيرك وانشالله هالتعب مايضيع
جابر... اتو بس كونو بخير وانه كل التعب البروحي يختفي بس شوفتكم مرتاحين كافيه تمحيلي كل تعب الحمل وحروره الشمس
سيرين... نزلت دمعتي ومسحتها بقسوه تشبثت بيه ماريده يروح حاسه كلبي ناغزني ومومثل كلمره رايدته يبقى حاضني ويمسد على راسي
ابوي هذا الي شكد ماحجي بيه مستحيل اكدر اوصفه
جابر... شمالها رويحتي
سيرين... بابا ابقى ولاتروح
نهايه... وجج ليش هالبجي يمه
جابر... ابنيتي اطمني عبن انه العصر راجع چا شمالج اليوم
سيرين... يابه اتذكر مستحيل بيوم انساك لوانسى تعبك ومانسى شلون جنت تسهر حتى تدرسني وتذب كل مصروفك وتشتغل زايد حتى تجمعلي وتجيبلي الاحتاجه جنت تقصر على نفسك وماتقصر عليه بحاجه
جابر ... عبن انه مفتخر بيج اول فرحه ليه ورحمه من رب العالمين الله يحفظج بويه وديربالج على رويحتج لزم ايدي باسها سرعان ماجريتها وبست ايده
سيرين... فدوه اروحن لعمرك انـتـهـه بس كون بخير
جابر... يله بنيتي انه اروحن ... انطى مصروف لامي وراح سدينى الباب وراه
النوم طار من عيوني رحت سويت ريوك النا وشوي وكعد مُراد
اجى باسني من كصتي وصبح عليه وتلاحكه مرتضى وهوه شايل ليال بيده واثنينهم النعاس بعيونهم
عافها بالكاع حتى يغسللها وهيه تاخذ مي وتشمره عليه ويسد الحنفيه وترجع تفتحها علما بزعته وعضها من خدودها
مُراد... ولك شمالك وياها
مرتضى... چا ماتشوفها موبزعتني وحتى المي خلص
مُراد... علكيفك وياها خلها تدلل عليك شعندك غيرها
مرتضى... عدي سيرينه
سيرين... هههههههههههه حبيبي يله تعالو تريكو
فرشت فراش بالحوش وعفت الصينيه بالكاع
رحت اصيح امي لكيتها تسبح
صحتها وكعدنا نتريك وليال تفتر من حضن لحضن
... مر اليوم عادي لحد العصر وامي كاعده بالحوش لوتطلع برا تعاين عالباب وترجع
واني مكابلتها
نهايه... سيرين ابوج اتأخر وين راح
سيرين... وين مبايلج خل اندك عليه
نهايه... روحي شوفي بصف التلفزيون تلكي
رحت اخذت مبايلها جان ابو الدكم وصغير عد ابوي واحد وعد امي حتى لونحتاج شي نتصل على ابوي وقت الحاجه
اخذته وتصلت على رقم ابوي مقفول
تقريبا لل٨ بليل ماكو وهوه بعادته للخمسه العصر ويرجع
مرتضى و مُراد كلساع طالعين يرحون ويرجعون يشوفو وامي بلكوا كاضينها حتى ماتروح
اخذ مراد مني المبايل واتصل على بدر رجعو الصبح همزين
ساعه واجو يمنه وتكابلن امي وعمتي يبجن وبدر راح هوه ومراد ومرتضى بقى يمنا
للوحدة بليل احنى ننتضر وماكو لاابوي ولابدر واخوي
اندك الباب وكام مرتضى يفتحه طلعت وراه
سيرين... وين جنتو كل هالوكت وابوي وينه
دخلو بدون مايحجون والتعب باين عليهم
بدر... دورنا مالكينا ورحت لشغله كالو اليوم ماجاي ورحت لديرتنا وسألت عليه ولاواحد شايفه
سبرين... لطمت على صدري وشهكت... بددر ااابويههه روحووو دورو شنووو مالكيتو
بدر... اهدي ننتضر منا لباجر اذا مابين نقدم بلاغ
نهايه... يمههه راح الرجاال ولكم الصبحح اجو ربعه طلع لشغله شني وين راااح
بدر... عمه شنهي منو الاجى عليه؟
سيرين بشهكه... هذول وياه يشتغلون قبل فتره صارو كليوم يجون ياخذو وياه للشغل
صفك ايد بأيد وفرك وجهى بعصبيه
مرتضى... مانضل منا لباجر هسه انروح ونشوف ابونه وين
مرتضى ومراد رادو يرحون بس بدر منعهم مر الليل علينه مثل السم والنوم ماطرق عيونى
للصبح بدر راح هوه واخواني قدم بلاغ على اختفاء ابويه
ويوم يجر يوم لحد مامر شهر والشرطه ايست من رجوعه وستسلمو
بس احنى لا صرت حتى اني اطلع وادور عليه بدر يمنعني ونتعارك بس ماجنت ارضى الااروح وادور وياهم
امي وعمتي بس بجي وكل هالمده همه يمنى وكله بدر يصرف علينه وشغله عايفه والمصروف العنده شبه بدى يخلص
رجعت هلكانه من التعب اني ومراد ومرتضى كليوم انروح لمكان شغل ابوي ونضل نسأل وندور عسى ولعل نلكى شي يوصلنا اله
بدر جان طالع لكيت امي شاده راسها ودموعها تجري وعمتي يمها
رجليه ماحس بيهن من المشي واذا ماعدنا كروه نطكها مشي روحه ورجعه والشمس احسها تاكل براسي
نهايه... ها يمهه مالكيتو شي
سيرين بحزن... رحت وبستها من راسها انشالله نلكاه
عفتهم ودخلت لغرفت ابوي وسديت الباب عليه نزعت العبايه والشال
ورحت للخانه مالته طلعت قطعه من ملابسه واشم بيها .... يابه انه بنيتك شلون عفتني وين انـتـهـه وبيا كاع ماريدن شي بس تكون بخير وترجعلنا
غفيت بمكاني وماكعدت الاعلى صوت امي وهيه تكعد بيه
نهايه... كومي اكليلج شي وجهج مصفر
عاينتلها وبجيت سيرين بشهكه... خايفه لايكون صايرله شي
نهايه... لو ابوج صابه شي لاسمح الله عبن هالكلب اليدك واشرت على مكان قلبها ...مايبكى بيه نبض
حضنتها وبجينا اثنينا كمت وكومتها وياي حتى تاكل خاف لاتوكع
خلصنا وغسلت المواعين اخواني وبدر نامو بغرفتنا وانه وعمتي وامي وليال نمنا بغرفت ابوي
نمت بحضن امي وهيه تمسد على راسي تمنيت ابقى كل عمري بحضنها وبحضن ابوي
نمت بحضنتها وكلبي ناغزني وجسمي يختض خوف,توتر ماعرف على شنو
ماجنت ادري حياتي راح تصير كابوس واسوأ كابوس امرن بيه
اليوم الي بسببه تغيرت حياتي ... كعدت من نفس الحلم الي يترددلي بكل مره وكل مره اشوفن هالحلم متاكده يصير شي جنت بحضن امي على نفس نومتي
سيرين...
عندما يسدل الليل ستائره بألوانها السوداء المخملية
ويقبل القمر مختالاً مرتدياً عباءته الفضية, وتأوي الطيور إلى أعشاشها تحتضن صغارها برفق وحنية ويزحف الصمت بخطاه الواثقة يسود الهدوء الكرة الأرضية
تنام أعين البشر مطمئنة وعيوني على النوم عصية أبقى وحيدة أنا ها هنا أجتر آلامي وأحلامي المنسية، فتعال أيها القمر نتسامر
ظلام وهدوء قاتم ,لكل شي اله عجائب والظلام والهدوء اله عجائب أيضاً
عاينت عالساعه جانت ب٣:٤٥صافنه بالظلام
وكلها نايمه وماحس غير الباب يندفع ويدخلون علينه ا....
يـــتـــــــبــــــــع....
كتبولي توقعاتكم للبارت الجاي
ولاتنسون تصوتون 👍😘
الكاتبه ترانيم هادي ♥️✨,