الثأر الرابع
ثارهم وبنت الفقير
بقلمي ترانيم هادي ♥️
سيرين ...
اعاينلهم وجوهم جحضت قطع الحديث بدر
بدر... ها اكيد واحد من ربعنا
مُراد... بس انه اعرفن ربع ابوي وهالرجال ماشايفه كبل
نهايه... كافي حجي وكملو اكلكم وانت صاير هواي دقق كمل اكلك
كملو وكمت شلت السفره غسلت المواعين ورحت حتى ابدل قطع تفكيري اصواتهم وهمه يتناقشون
جابر... اذا اضلن هيج طك رويحتي لازم اشوفلني حل
بدر... على كيفك ليش هالرجفه انشالله ماكو شي
جابر... شلون ماكو شي وانه متاكد اذا ماكو شي مهم مايخطي عتبه بابي
نهايه... وشلون بينا نضل هيج
جابر... ماخايف على احد بس عليهم ياخذون روحي ولاياذوهم بشعره
نهايه... اسم الله عليك واحنى منو النا انشالله تنحل وكلمن يروح لداره
وفجأه انفتح الباب وطلع بدر بوجهي خزرني وحجى
بدر... جاي سوين ؟
سيرين... ماسوي شي تخطيته ورحت كعدت يم ابوي لزمت ايده
سيرين بقلق... يابه احجيلي شصاير ومنوه هذا التحجون عليه اعرفن صاير شي جبير وماراضين تحجولنا
جابر... بويه رويحتي تتأذه بأذيتكم وتالي اتي واخوانج دفعين ثمن اغلاطي وين اهج بيكم بهالدنيا وانه ماكو حتى اهل بضهري
حجى اخر كلمه ونزلت دموعه حضنته وكمت ابجي وياه ... سلامتك من كلشي دامك انـتـهـه بظهرنا مايصيبنا شي واذا ماعندك اهل ولاعشيره انه واخواني وامي اهلك وكل ناسك بس لاتقهر روحك
جابر... واتي جيف واكفه بضهري ومستند عليج يردون يكسروني بيج
سيرين... منو هذا اليريد يكسرك بيه؟
اخذ نفس ومسح دموعه وحجى...صيحيلي اخوتج وتعالي ليه
كمت صحت مرتضى و مُراد النعاس مغطيهم بلكوا سحلتهم من الفراش
جابر ... تعالو بويه
رحنى وكعدنا يمه والغريب لامي ولابدر نطقو كلمه
جابر... شوفو احجيلكم هالسالفه عبن محد بيكم يدري بيها ... عاين عليه ورجع حجى
بس اختكم بوكتها جان عمرها ثلاث سنوات
جابر...
شلونهم الغوالي ... احجيلكم سالفه واتو سمعوني لاحد يكاطعني بجلمه
انه رجال عايش على اهل الله درست بغداد عبن ابوي رادنا ناخذ شهاداتنا ونتخرج
خلصت دراسه وتخرجت ورجعت لديرتي وعبن ابوي رجال خير وكل السلف تعرفه وتعرف خيراته واليطلبه مايردله ايد
جان اكو رجال صديج ابوي علاكته كويه كلش من طفولتهم ولهذا وكتهم تربو وكبرو سويه
جانو داهي وهجاس ورزام ولد الحجي هذول رفاك الروح وعبن تربينا سويه وماكو اكوا من علاقتنا جانت
بس لوالشيطان دخل بينا يهجم بيوت... المهم ارجعلكم بسالفوفتي
بيوم شفت وحده من بناتهم وعرفتها تصير بت اخو الحجي صديج ابوي
وانه ماصدكت خبر رحت وثبرت اهلي عليها وطلبتها ثلث مرات يالله رضو يطونياها وعبن هيه جانت مدلله وكل السلف تتمناها وانه روحي صارت عليها
وشرطت الاعزلها بيت بوحدها وبنيتله بيت بصف اهلي حتى تكون كريبه على اهلي وسويت كلشي رادته خذتها والله رزكني منها بت جنها شطب ريحان
المره ضاجت وتكدرت عبن رادت ولد وكتلها اليجي من الله رحمه وانه عدي هالبت مثل الرحمه اليه وانه اشوفنها تكبر جدامي وكلما تكبر تصير احلى
بيوم جنت جويعد وبتي بحضني ندك الباب ورحت فتحته
جابر... يهلاااا بالشباب شلونكم
درغام... عمي عبنهم ثبرونه الانجيكم وهالتشوفهم ضالين نفتر بيهم
حيدري... ها عمي ماناوي تدخلنا موانشوينا بهالشمس
جابر... ههههه يلا وليداتي دخلو
احفاد الحجي حطام جان ليث ولهب اصغر ثنين بيهم عبنهم توم هالوليدات
والجبير باحفاده ابن داهي ... دخلو جوا وتلكتهم رويحتي
تصفك بايدها وشعرها محلول والحجوله برجليها ... عبنها الوحيده عدي وجانت مدلله عد ولد الحجي وعد اهلي وكلها تحبها
ضرار... شلونها ريحانتي ...راح وشالها وهيه تبوس بخده
حيدري... افا شنهي هاي بتك عمي عبن شافت ابوها الثاني ونستنا
جابر... هههههه حكها اذا مدللها اكثر مني
شوي ومانسمع الالباب تفلش طلعو الولد وانه وراهم
جابر... شنهي شصاير
زكريا... عمي صاير هوسه عالكاع الي بسلف
وابن الحجي داهي متدخل وصاير هوسه عليها وعبن جدي متدخل بيها وصاير بالسلاح
ضرار... چا هالكاع مونباعت وابوي شصايبه
عافنا وراح هوه وخوته... دخلت جوا طلعت سلاحي وردت اروحن
دنانير... خيرك يرجال وين رايح
جابر... صاير هوسه ولازم اروحن قفلي الباب وديربالج
... وصلت وجانت ازلام ابوي وازلام الحجي كلها موجوده
هالكاع صايره بطرف السلف وطرف الحجي وصايره حزازيه بين الرجال وطرفنا يطالبون بيها وعبن سووها عناد الاياخذوها احنى عاندنا حتى مانطيها
بوكتها حاولنا نحلها بالتفاهم وبدون سلاح تحاجو ولد الحجي وي ولد الديره وطبينا احنى نفاككهم بالنص
جابر... داااهي عيف السلاح من ايدك
داهي... جابر وخر من طريجي عبن هذول مايفيد وياهم الطيب
هجاس... ولد ال*** دايسين كاعدنا وجايين يهايطون بارضنا
دفعتهم ثنينهم هجاس تراجع بس داهي جان معاند ومايرضى يوخر
داهي... جابر كتلك وخر
جابر... كافي ولك خبااال واستجن خلنا نحلها بالتفااهم
داهي... لاتلخ وخر من طريجي
راد يروح لزمته ودفعته دفعني حتى اوخر ورديتها اله اقوى وشلت السلاح بوجهه
جابر... لاتتهور وتسوي شي تندم عليه
رزام... جااابر نزل سلاحك وعوفكم من العصبيه
جابر... ولك انحير بعصبيتك لوبالوادم
داهي... هينه ترفعه بوجهي
اجى يريد يلزم السلاح دفعته ومانحس غير صوت الرمي فوك روسنا
جان الصوت كوي ماركزت بس على رفيج عمري وانه اشوفنه سابح بدمه وينازع برويحته
دكايك هنه والهوسه صارت
هجاس... كتلته يجابر ؟
جابر... ولك شني كتلته موانه
اجو ولده ولتمو عليه الحجي وكع من طوله
ضرار... عمي ليش هيج ؟
جابر... ولكم موووانه ... عفتهم ورحت اشوفنه لزمني هجاس وطكني بالسلاح الكاضبه على راسي وطلكه بصدري مادري منين اجتني
... بوكتها دخلت غيبوبه شهرين
سيرين... وبعدها شصار ؟
من كعدت لكيت اخوي فوك راسي سولفلي الصار بوكتها ... داهي مات انه جتلته بيدي من ورى تهوري وعصبيتي كتلت صديجي ورفيج روحي بيدي وانه اشوفنه مغطى بدمه
اخذو للمستشفى ونص الطريق وميت عبن الطلكه يم كلبه وصايبه جلطه وميت بساعه
ابوي والحجي تكاطعو والكعده من صارت دفعو فصل ودمي هدرو وانه اذا وصلت الدير جتلي حلال
ابوي طردني ورى ماطلعت من الديره دزولي طارش ... اطلك دنانير عاندت وحتى رجعت للديره وصارت هوسه وبالسلاح
حتى اخذ بتي ومرتي بس الصدمني هيه بروحها تريد تطلك وبتي شامرتها على اهلي
طلكتها وخذتج ورحت للحله يم عمتج زهره
تعبت بتربايتج وخاصه اتي بت وتردين امج ويرادلج عنايه ومدارا وعمتج الله ينطيها هيه الدارت بالها عليج
ورى شهر رجل عمتج شافلي شغل وبديت اشتغل علما جمعت كم فلس وشتريت بيت على كدنا
ورى مده كصيره عمتج اقترحت ارجع وازوج حتى دير بالها عليج وماضلين بليه ام لحت عليه وكدرت تقنعني
وبعدها خطبت امج من ديرتنا بوكتها امها جانت ميته وعدها بس اخت ومزوجه بغير محافظه وابوها رجال جبير
ورى ماخطبتها ابوها مات ورى شهر ... زوجنى واجينى هناه
سيرين... واهلك ماشفتهم والحجي وجدي شصار بيهم
جابر... اخوي الجبير جان يجيبلي اخبارهم امي من بعدي تمرضت وجنت اروحن ادخل للديره بالختلات حتى اشوفنها واخر مره شافني ابوي
طردني من البيت والديره وماخلالي مجال حتى ارجعن وحلف الكل اذا حجو وياي يتبرى منهم
ومن وراي ابوي كطع علاقته وي عمتج بس الله ينطيها ضلت وياي وجانت نعم الاخت الصالحه وياي بكل خطوه علما كونت روحي وكدرت اوكف على حيلي
والحجي وابوي علاقتهم تكاطعت ومنعو ايواحد من بيت الحجي وهب يخطي خطوه للسلف مالهم
كبل كم شهر كعدو رجال بطارف ديرتنا صارو يحاربونه برزكي وشغلي
بس الصدمني جان ابن داهي الجبير ربيته بيدي وجان يصيحلي يابه وهسه اجى حاربني برزكي وبيكم
رجع فتح الدفاتر النسدت من كبل ويريد ياخذ بثار ابوه ... جنت اشوفنه من بعيد والغضب مالي عينه
يريد ياخذ ثاره منكم حتى يحرك رويحتي عليكم
واولهم اتي... حلفلي يأذيج وتصيرين اله اسيره
سيرين... شني هذا تفكيره واسيره ايشش ياابه لاتنطي مجال هيه هاي رجولته كدرته بس عالنسوان بس لواشوفه الا..
حط ابوي ايده على حلكي وحجى .... اشش لاتشوفي ولايشوفج خليج بعيده ولاتسوين شي
اعرفنه وهذا ترباته على ايدي عبن لوخلى شي باله يسوي واذا كره يكره من كل كلبه ومستحيل يخلي شي يمنعه حتى يوصل لليريده
مُراد...يابه ماخلي يجيس سيرينه لويمس شعره منها اوكفن بوجها ولااخلي يجيسها
مرتضى... لاتخاف علينه عبن احنى ترباتك وكلنا اهلك انه واخوي موجودين انموت ولانخلي يجيس شعره منكم
سحبهم ابوي عليه وحضنهم وبس صوت شهكاته تنسمع... والله حلال ال 9 اشهر بيكم
كمت حضنتهم وبس دموعنا تجري... كلهذا صاير وهالمشاكل والثارات منورا شنو
وابوي اتعاقب على غلط مامسوي ولاله بيه ايد وهسه لحكونا من بعد ماخسرو ابوي كلشي مرته واهله وعشيرته
بدر... يله انه اترخص
جابر ... وينك بويه بعد وكت
بدر... لاعمي هم يالله ارجع وباجر لازم اروحن لبغداد
جابر... الله وياك وليدي ولاتكطع جياتك وسلملي على امك
بدر... يوصل
راح بدر واحنى كلمن لف نفسه بفراشه... طول الليل اتكلب والنوم ماطرق عيوني افكر بالصار والي راح يصيرلنا
...الصبح كعدت على صوت ليال وهيه تكعد بيه وصاعده عليه حتى تكعدني
سيرين... اففف وخري جعصتيني
ليال... سينه ماما سوت اكل كعدي
سيرين... اخخخ لج وخري اي كعدت
سمعتني عيطت عليها عافتني وراحت ركضت كمت رتبت الفراش ومشطت شعري وضفرته
ابوي طالع للشغل ومرتضى ومُراد ماكو اكيد بالشغل واهلي ميدرون
وبس امي كاعده وتعجن وليال يمها كاعده تاكل
نهايه... سيرين غسلي وتعالي تريكي
سيرين... صار يوم
رحت غيلت وكعدت اني وليال نتريك شوي وندك الباب
كمت لبست شالي وفتحته ... جان اثنين رجال ضخام حجبو عليه ضوى الشمس
واحد منهم خزرني والثاني صفن وجنه مصدوم
نهايه... سيرين شمالج طولتي منو عالباب
سيرين... اصبري يوم ورجعت وجهت كلامي الهم نعم منو انتو ؟
باوعلي واحد منهم خزرني وحجى بغضب... ماكو زلام بالبيت طالعتلنه النسوان
سيرين... لااكو بس انتو الظاهر اجيتو بوقت غلط
_امشينا غير وكت نجي
سيرين... خيرر ومنو انتو حتى تجون ؟
بسول... احنى ...
يـــتـــــــبــــــــع....
ولاتنسون تصوتون لان جاي اتعبلكم بالكتابه ♥️✨,