السلام عليكم
نبدأ قصتنا
راحت مروة وضيق الدنيا كلها فيها عند حسام .. ولأول مرة تسلم عليه بضيق وبرود .. حسام مش بس لاحظ ده لاده لاحظ حاجات كتير بس كل حاجة في وقتها ..
_ إزيك يا مروة عاملة إيه ؟
= كويسة .
_ مش باين .
= كويسة وخلاص يا حسام .
_ طيب .. أنتي سبتي عمر ليه يا مروة ؟
= عادي .
_ يعني إيه عادي ؟
= عادي يعني عادي ..
_ لأ مش عادي .. أنتي عارفة أنه جاله إنهيار عصبي وضغطه علي وكان هيروح فيها ؟
= بقلك إيه يا حسام الموضوع خلص خلاص .. أنا حاولت أحبه ومقدرتش .. مش عافية .. والله يشفيه ويقومه بالسلامة .
حسام بضيق من طريقة كلامها : طيب بلاش عمر .. فين حجابك ؟
= خلعته .
_ يعني إيه خلعتيه .. هو لعب عيال !؟
= مش مقتنعة بيه أنا حرة .
حسام مذهول من طريقة كلامها ومش عارف إذا دي كانت أخته ولا مين ؟
حسام متعلق بآخر قشاية إن دي تكون أخته : طيب يا مروة جاوبيني دلوقتي مين لمياء دي ؟
مروة بتوتر : واحدة صاحبتي .
_ بس أنا عارف هي مين ؟
مروة بتوتر زايد : م ..مم.. مين يعني ؟
قرب منه ونزل علي ركبه وهي قاعدة قصاده علي الكنبة .. مسك ركبها بإيديه الاتنين وبصلها برجاء مغلف بالقلق : مروة أرجوكي سيبي البنت دي .. تاثيرها وحش عليكي وده واضح .. أرجوكي قاطعيها دي بنت مش مظبوطة وبتروح ديسكوهات والله أعلم بتعلم إيه جوة .. دي وكمان ماشية مع راجل .. عارفة يعني إيه ؟أرجوكي ملكيش دعوة بيها .
قامت مروة بكل قوة وزعقت : وأنت مالك أصلا .. أنت حيالله أخويا لا رحت ولا جيت ..
اتصدم من كلام أخته وبقيش قادر ينطق .. مروة كمان بحلقت فيه ومش عارفة إزاي قالت الكلام ده .. حسام مسك ركبها جامد وقال بخفوت وصدمة : أنتي إيه اللي قلتيه ده يا مروة ؟
مروة : حسام أنا ..
_ أنتي إزاي تقوليلي كدة .
= حسام ..
حسام بزعيق : حسام إيه وزفت إيه .. البت دي تقطعي علاقتك بيها وإلا قسما بالله ..
مروة فطت وانفجرت : وإلا إيه .. وإلا إيه يا دكتور ؟
_ أنا آسف يا ..
= لا وتتأسف ليه منا بس اللي آخد علي دماغي .. أنا بس اللي تتدمر والباقي يعيش حياته .. أنا بس اللي أتهان ..
_ مروة أنا ..
= أنت إيه ؟ ظهر وشك الحقيقي .. أنت زيك زي اللي برة دول بالظبط .. أنا مش مهمة لحد .. كل واحد بيحب نفسه بس .. وأنا من هنا ورايح هحب وأهتم بنفسي وبس .. يولع البيت باللي فيه وأنت معاهم .. أنت من هنا ورايح مش حبيبي ولا عايزة أشوفك تاني .. أنا بس اللي هشكل حياتي .. دي حياتي أنا .. أنا بس اللي أمشيها .. وعندًا فيكم كلكم والله لو فيها عيوب الدنيا لأحبها وأفضل معاها .. أنت ملكش دعوة بيا فاهم .. مش عاوزاك في حياتي .. حياتي أنا ..
حسام مصدوم ومكتش يتوقع إنها تبقي شايلة كل ده من ناحيته .. عنيه دمعت ودور وشه بسرعة الناحية التانية .. أخد موبايله ومفاتيحه وبعد كدة بصلها والدمعة متعلقة في عينيه : أنا عمري محبيت ولا هحب حد قدك .. أمي حب بالفطرة .. حتي ندي لما حبيتها كانت بتغير منك عشان بحبك أكتر منها .. أنتي حب الطفولة يا مروة .. أنا شلتك بإديا الاتنين دول وأنتي لسة مولودة وأنا طفل عشر سنين .. أول مبصيت لعنيكي اتعلقت بيهم .. كنت أفضل أهاديكي وألاعبك وأهتم بيكي .. كنت بحبك لدرجة أنك لو مش أختي كنت اتجوزتك .. أنا أهملت ندي فترة الخطوبة عشانك .. حسام عايزة ده .. حاضر يا مروتي .. حسام نفسي في ده .. من العين دي قبل العين دي يا مروتي .. مكنتش أتخيل أبدا إن حبي ليكي وخوفي عليكي بقوا عبء تقيل علي قلبك للدرجة دي .. أنا .. أنا .. ( ومسح دمعته ) أنا لسة شايفك الطفلة اللي جبتلها أول عروسة لعبت بيها وكانت طايرة من الفرحة .. أنتي كنتي آخر حاجة متعلق بيها في البيت ده .. خلاص ياستي انسيني من النهاردة .. اعتبريني مت .. لا هتدخل في حياتك ولا هتعامل معاكي بأي شكل من الأشكال .. بس خليكي فاكرة إنك أنتي اللي دمرتيني .. دمرتي اللي باع الدنيا كلها عشان رضاكي .. ومش مسامحك علي دموعي دي ولا كسرة قلبي دي يا .. يا مروة .. سلام .. سلام يا .. أختي ..
مروة مسكت دراعه بسرعة : حسام أنا آسفة مش قصدي أنا ..
_ ابعدي يا مروة .
=لأ مش هبعد أنا مش حبيبتك ؟ دي كانت ساعة غضب و ..
_ ابعدي يا مروة بدل مدمرلك صورة حسام اللي تعرفيه زي مدمرتي صورتك اللي أعرفها .
سابت دراعه وعمالة تعيط .. فتح باب الصالون ولقي الكل موجود ومذهول ومحدش بيتكلم .. قربت أمه منه فأخد إيدها وباسها
أمه بحزن : معلش يبني حقك عليا .
_ مفيش حاجة تستاهل دموعك ياست الكل .. بعد إذنك .
= اتفضل يبني ده أنت تشاور .
بص ناحية مروة اللي بتعيط وبتستنجد بيه .. بص ناحية أمه : هاتي شبكتها نرجعها لصاحبها.
طارت أمه تجيب شبكة عمر وهو بصلها تاني .. لسة بتعيط وتستنجد بيه .. حن وحب يضمها .. يطمنها أنه عمره مايتخلي عنها .. أو يضربها قلمين يمكن تفوق .. بس قلبه قسي تاني لما افتكر كلامها الجارح .. أخد الشبكة من أمه وهمسلها : خدي بالك منها .. مش هبقي موجود عشان أعمل كدة .
وباس راسها وحاول يقرب من أبوه بس أبوه بص الناحية التانية .
_ حتي لو قسيت عليا عمري مهبطل أحبك يا أبويا .. خد بالك منها لو ليا خاطر عندك .. سلام كلكم .
وقفل الباب ونزل .. طارت مروة علي الباب وقعدت تخبط فيه : أنا آسفة يا حسام آسفة آسفة آسفة .. والله ما أقصد أنا مش عارفة قلتلك كدة إزاي ؟ ارجع يا حسام متسيبنيش عشان خاطري متسيبنيش .. أنا بغرق من غيرك .. وقعدت تعيط
فجأة أخدتها أمها في حضنها ودموعها نزلت علي حال عيالها الاتنين من ظلم الكبار .. قومت مروة وهي لسة في حضنها وبصت لجوزها وولادها الاتنين نظرة نارية : عمري ما هسامحكم علي كسرة نفس ولادي الاتنين .. عمري .
وأخدتها أوضتها وقفلت الباب عليهم . . وصمت تام سكن الشقة
في الأوضة .......
_ عشان خاطري يا ماما اتصلي بيه أعتذرله .
= بلاش دلوقتي يبنتي .
_ عشان خاطري ياماما .
رنت الأم علي حسام .. بص حسام في الفون وكان هيرد بس فكر لو مروة عايزة تعتذر .. هو حاليا مش مسامحها علي غلطها فيه .. كل شوية يعيد كلامها وقلبه يوجعه أكتر لحد ما سرح وفجأة .. عمل حادثة .. غاب عن الدنيا ومشاكلها .. بس لسة القلب مجروح ..
الأم : قفل تليفونه يبنتي والله ..
مروة : أمانة عليكي يا ماما لو فتح تقوليلي .
_ حاضر .
= ينفع طلب تاني ؟
_ أؤمري يبنتي .
مروة بحزن : ينفع تاخديني في حضنك شوية ؟
_ شوية بس ؟ خديه العمر كله يا حبيبتي تعالي .
واترمت في حضنها وعيطت .. قد ايه حضنها دافي .. قد إيه بتبقي طيبة وحنينة لما تبعد عن شغل البيت والسوق .. ليه متهتميش بيا يا ماما .. ليه سايبانا وكل اللي هامك هناكل ايه ونشرب ايه .. ياااااه يا ماما .. ده أنا مش فاكرة آخر مرة أخدتيني في حضنك كدة كانت امتي .. كنت أتضايق لما أشوف صحابي أبهاتهم وأمهاتهم جايين يروحوهم .. وأنا اللي يروحني حسام .. وآه من حسام .. إزاي عملت كدة فيك بس .. إزاي لساني طاوعني .. إزاي !؟
في المستشفي ...........
حسام راقد علي السرير وفتح عنيه ببطء وبص جنبه لقي عمر مبتسم .. ابتسم هو كمان : ازيك يا عمر إزي الصحة ؟
عمر : الحمد لله .. حمدا لله علي سلامتك .. وانفجر في الضحك ..
_ أنت يبني اتجننت ولا إيه ؟ في حد يضحك في وش حد كدة وهو خارج من حادثة ..
= مش قادر أمسك نفسي ههههههههههههه.
_ يلا أنت مخبول ولا ايه حسبي الله .. وبتضحك ليه ؟
= شكلنا عملنا عقد عمل مع المستشفي نبقي فيها دكاترة ومرضي .. زي افيه فيلم اكس لارج لما قاله قسما بالله لأتقلب معاك ههههههههههههه .
_ ياشيخ اتقي الله .
= ههههههههههههه.
_ خلاص .
= مش قادر ههههههههههههه .
_ مقلنا خلاص بدال ماروقك .
= تروقني إيه بدراعك المتجبس ده .
بص حسام علي دراعه ولقيه متجبس فحس بألم فيه .. حسس عليه وبهزار : أه يا دراعي ياني ياما .ههههههههههههه .
= ههههههههههههه .
وفضلوا يضحكوا ويهزروا لحد جه الدكتور وابتسم لما شافهم .
/ من كتر حبكم في المستشفي يوم تبقوا الدكاترة والتاني مرضي .. وتبدلوا بقي .
= شفت .. قلتش حاجة أنا .
_ خير يا دوك ؟
/ كنت عايزك علي انفراد .
حسام بص لعمر : اتكلم يا دكتور أنا وعمر واحد .
/ أنا آسف مع احترامي لـ د/عمر بس أنا عايزك واحدك .
= طيب أنا هستناك برة .
_ ماشي . .. خير يا دوك .
/ أولا الحمد لله ربنا جاب العواقب سليمة وهي شوية رضوض في جسمك .. بس دراعك اللي اتكسر .. قدر الله وما شاء فعل .
_ الحمد لله .. بس أنا حاسس إن في حاجة تانية ؟
/ قلي يادوك محسيتش قبل كدة قلبك بيوجعك ولا حاجة ؟
_ لأ .
/ متأكد ؟
_ أيوة .. خير يا دكتور قلقتني .
/ أصل أنت جاتلك أزمة قلبية وخايفين لاقدر الله يكون عندك مرض القلب .
سرح حسام في كلام الدكتور وافتكر لما حسس علي صدره مكان قلبه من الوجع .. افتكر فجأة الحلم أو الكابوس لما مروة كانت بتستنجد بيه من الغرق وهو مش قادر يشدها عشان دراعه واجعه .. بص لدراعه وفجأة قلبه اتقبض ..
/ إيه يا دوك رحت فين ؟
_ ها ؟ لأ معاك .. لأ مجتليش قبل كدة .
/ خلاص هنستمر في الفحوصات وإن شاء الله خير .. بس ياريت تتخلص من السبب في الأزمة اللي جتلك دي .
حسس حسام علي دراعه : يا رتني أقدر .
/ حاول .. أه صحيح كل متعلقات العربية في الأمانات عشان العربية راحت التوكيل تتصلح .. حمدا لله علي سلامتك وتقملنا أسد كدة إن شاء الله .
_ إن شاء الله يا دوك متشكر علي تعبك معايا .
/ العفو ده واجبي عن إذنك .
رجع عمر بعد ما الدكتور مشي : خير يا حسام ؟
_ مفيش بيشرحلي حالتي .
= وايه اللي مرضيش يقولوا قدامي .. أنت مخبي عني حاجة ؟
_ لأ مش مخبي .. ومتحاولش تستخدم ذكاءك كدكتور نفسي عليا عشان أنا زيك بالظبط .
= خلاص يا عم متزقش .
_ المهم هي أمك فين بتشقط برضه ؟
= أه هي تقريبا خلصت علي كل الدكاترة فدخلت علي المدير بقي ربنا يستر ههههههههههههه.
_ ههههههههههههه
بالليل في الديسكو .......
مروة : أمال فين البنات ؟
مروان مجوش .. وده أحسن عشان عايز أقلك حاجة مهمة .
مروة بكسوف : إيه هي ؟
مروان مسك إيدها وشد عليها : أنا بحبك وبموت فيكي .. مش قادر أتنفس وأنتي مش معايا .. مروة .. مروة تقبلي .. تقبلي تتجوزيني عرفي !؟
=====================================================
#يتبع
أوبا ... يا تري إيه اللي هيحص بعد كدة ومركب القصة هترسي علي إيه ؟
مستني آرائكم وتوقعاتكم .. اتوقعوا يمكن تصيبوا .. مروة هتوافق ولالا وايه مصيرها يا تري
نتقابل الحلقة الجاية ..
متنسوش تشيروها مع صحابكم ..
#حياتي
بحبكم 😍💖
Abdooo