سِدرة مُنتهى

البارت "الحادي عشر"

البــــــــــارت "الحادي عشر"

رواية :سِـدرة مُنتهى
بقلم :استبرق الكردي

     ((  قبل لا تقرأون البارت لاتنسون التصويت والتعليق
                على الفقرات،، هذااا الشيء يحفزن
                                ومااتأخر)))
            **'********************************

{من الصعب تصديق الواقع،، بعد ان عُشت أعواماً كامله في خيالٌ وردي}

طلعت اغسل وجهي لان احس ضغطي هبط،، داغسل فززني صوت من وراي :- بطـــ....... العفو سدره! ؟؟

اخذت نفس ونداريت لكيته واكف يمسح بالنظارات مالته ويباوعلي مبتسم،،،
فجأه توقف عن حركة ايده وصفن بوجهي واني خليت عيني بعينه واباوعله من زماان مالتقت نظراتنه مثل هذا اليوم احس قلبي يخفق بشكل سريع كأنو يريد يطلع ..
فركت عيوني
ا اخذ نَفس وكال بقلق  :- اااا،،،، شبيج بطــ.. سدره شبيه عيونج؟؟

مسحت الدموع الحركت عيوني:-لا لا أبداً مابيه شي اطمئن بس كأنو تراب دخل بعيوني وتحسسن..

-اجيبلج قطره حطيها لعينج تنظف العين!!؟؟
-لا ماكو داعي.. انت اليوم عريس داباركللك،، زواج سعيد ويارب حياة حلوه والذريه الصالحه..

زفر وابتسم ورمش عيونه :- سدره الورده شُكراً الج ومبروك النجاح ويارب الج بالمثل انشاء الله نشوفج عروس ونفرح بيج...

غصيت بحجاياته وابتسمت :- شُكراً الك اخويه..

داندار ادخل لكيت امي واكفه وراي،،، هو صاحو وطلع،، كلتلي :- شسوين؟؟

-مااسوي بس طلعت اغسل و لكيت مُنتـهى كلت عيب مااباركله..
صفنت بوجهي :- شبيها عيونج حمر؟؟.

اخذت نَفس قوي :- دخل تراب بيها وتحسست.
-الدنيا مو ترابه وانت ماعندج حساسيه؟؟؟
-شنو ماما تحقيق؟؟
-ادخلي جوه!!!
-اريد ارجع للبيت
-ليش جاا المن جيتي؟؟
-والله مالي خلك كلشش وهسه راح تصير هوسه وهي حتى عشه مايسوون،، كبل يزفوهم للفندق شعندي رايحه

-منو يردج؟؟
-ابويه وعلي وجعفر ويمكن حتى احمد هم هنا اجو للزفه اكلهم يذبوني براس فرعنه واني ارجع..
خزرتني وكالت. :- يطبج طوب صوجي اني شعندي جايبتج وياي..

هزيت راسي واتصلت بجعفر وطلبت من عنده يرجعني كال :- جاا اذا انتي مالج خلك شكو رحتي يلا تعاي اطلعي اني بلباب بصف سياره الزفه اوصلج وارجع..

رحت سلمت على خاله ورُما وكلت الهم تعبانه واحس مالي خلك خاف اتخربط بالبدايه ماقبلن بعدين سكتن..
ورُما تكُلي :- هي صخله بعرس اخوج فريتج فر ولعبت فلك وبعرس اخوي حتى ركصه ماركصتي وياي شبيج ولج مُعقده صايره عيععع..

ابتسمت وراضيتها بطريقتي وطلعت لكيت جعفر ومُنتهى وولد عمه سوه وابويه واكف يم عمو مشتاق..

دنكت راسي ورحت صعدت بسياره جعفر اشوف مُنتـهى يباوع لسياره ويحاجي جعفر..
حاولت ابعد نظري ولهيت نفسي باي شي يمي.

صعد جعفر وشغل السياره وكال :- شبيج سوره ليش مارحتي وياهم للزفه؟؟
-والله شوو احس تعبانه وعندي خمول يمكن اخذت برد من البارحه..
-اي مو اكلج البسي البسي،، تعاندين...

هزيت راسي وسكتت راد يدخل بلفرع مالتنه كتله :- هنا هنا انيي هسه اتمشا اوصل للبيت .
-لا خلاوصلج..
-شسالفه يمعود هو هذا وياه مو دوم اروح للدوام واطلع وحدي ماعليه شي...

اصريت ان انزل وهو يروح،،، نزلت بعد ما سلمت عليه
مشيت بالفرع وانداريت لكيته على وكفته منتظرني اوصل يلا يروح...
ابتسمت وكملت طريقي،، فجأه طلع جوجو من البيت مالتنه من شافني اجه يركض سريع ووكف بصفي ويباوعلي ويعوي بصوت ناصي...

انداريت اشوف جعفر شغل السياره وراح من شاف جوجو يمي أمن...

الحركه اكلت صدري ماعرف احس طلعتي غلط ومكان لازم اطلع ابداً تصرفي كُلش غلط وعيب منهم
كان لازم اشوف ايده بايدهااا حتى اقتل اذاا كانت اكوو ذرة مَحـبه بداخلي

مداعرف اصرف ولا داعرف شنوو احس المشاعر الي بداخلي عباره عن كوكتيل لفواكهه فاسده وشعورها حقيررر...

اكبر خطأ ممكن ان يرتكبه الإنسان هوو ان يشجع ويوهم نَفسه بِحُب هوو يعرف او متأكد من ان الطرف الثاني ماعنده اي مشاعر تجاهه..

وصلت للبيت وجوجو احس يباوعلي بقلق من باوعتله برطمت،، وطفرت دمعه من عيوني
صار يكمزز ويعوي تنهدت ودفعت الباب ودخلت،،، لكيت زيتونه بنت عمي وغدير كاعدات بالطارمه يسولفن...

بسرعه مسحت عيوني،، من شافني عكدن حواجبهن وكالن:- سدرة؟؟؟؟ جاا مو رحتي ويه عمتي..

غدير:- شبيج ولج مخطوف لونج...

بلعت ريكي واحسسس طفح الكيل بيه معاد اتحمل اي كلمه ثانيه نترت بيهن :- مابيه شي بلا هلاسئله بس  تعبانه اريد انام.....

عفتهن وصعدت لغرفتي وجوجو واكف يم الدرج وصافن عليه :دخلت وطبكت الباب وراي نزعت الحجاب وخاننـّـي دموعي وطلعن بكُل قوتهن يحركن خدودي ...

عضيت على شفتيييي وصرحت صرخه مكتومه احس بدأ يختل توازني ومدااعرف شنوو اسويي
اكبرر وجع ممكن يتأذه منه البشر هووو وجع المشاعر والكسره....
صرت اتمنا لوو بحياتي ماعرفت مُنتـهى ولا حبيته،، اتمنااا اني ماصرت للدنيا لان هَلكت اقدامي مداا يعينوني على ان ابقى قويه..

كعدت على ركب رجليه وصارر وجهي بفراشي،،،، طلعت كُل الي بداخلي صرتتت ارجف وماعرف شنوو اسوي...
الرجفه اخذتني واحس قلبي كأنو ينزف دم..

نززني صوت فتحة الباب ودخول زيتونه وغدير،، وهن يباوعلي بقلق كالت غدير :- شبيج سدوره حبيبتي ليش هيج منهاره...؟؟؟

حجتها وهي تكعد على السرير وتلزم وجهي،،، لماا سمعت كلامها انفجرت بكُل قوتي ابجي واطلع لبداخلي لان الكتمان كاد على ان يَقتلني بدم بارد...

رفعت نفسي حضنتها وابجي :- تعبتتت غديررر تعبت معاد اكدرر اتحمللل....

رفعت وجهي بايدها ومسحت دموعي :- تحبين مُنتـهى؟؟؟

باوعت الها بعيون مدمعه وبرطمت وهزيت راسي  بــ اي..
تنهدت، وبــاوعتلي بنظرات ماتتفسر وكالت :- من يمته!؟؟

-من لماا جان يلزم ايدي ويلعبني 
نظراتهاا وعكدت حواجبها ودموعها الي تلالي بعيونهاا مثل خنجرر وربت بصدري...

لمتني لحضنها وكالت :- يااا حبيبتي يسوره الله العالم شنو حال كلبج هسه...
لزمت وجهي وباست خدي ولفتني بحضنها احسهااا تعرف شنوو بيه وانييي انهاريت ودموعي ماتتوقف لحضه اصعب شي هو حب من طرف واحد...

باوعت لزيتونه مبنده بواچي وياي اجتي وحضنتني وتصبر عليه...
كل الكلمات الي يكُلنها ماطفت لوو بصيص صغيرر من الجمره الي تسعر بصدري...

بعدتهن عني وكعدت على سريري وجريت اللحاف واردفت :- ياريت تطلعن وتغلقن الباب وراجن لان محتاجه انام وارتاح...

زيتونه :- يااا سوره شنوو نطلع ونعوفج وحدج.

مسحت عيوني بكف ايدي،، ورفعت راسي الها :- احد كَلج انا مخبله!؟؟؟

-لاا سوره مو هيـــ.........

قاطعتها :- ياريت تطلعن وتسدن الباب وراجن وشغله لخ والله ورب العزه والجلاله لووو حسيت احد عرف بالي صارر هسه بعد لا اني اختجن ولا اعرفجن..

زيتونه :- سوره بس اعصابج حبيبتي ابجي طلعي البداخلج لا تكتمين على نفسج...

-شُكراً مااحتاج ابجي مووو ضعيفه اني حتى تهزني هيج اشياء هذاا كله وهم اني وهمت نفسي بي،،،
بالإضافة اني حذرتجن الي صار مايطلع رجاءً،،، عوفني اريد انام...

طلعن وسدن الباب،، لفيت نفسي بالحاف واقنع نفسي انام بس هيهات تجي النومه لعيوني.
ضل الندم ياكل بيه وكل دقيقه تجي بعيني الدمعه واني اتذكررر احلامي الفاشله الي كنت راسمتهم على شخص هوو من الاساس يشوفني اخت اله بَـس

امسح دمعتي والوم نفسي واكلها :- تستاهلين الي جرالج كله صوجججج ووووووو
ماحسيت على نفسي اله واني ارجف بفراشي واسناني سن يطك بسن بس كأنو فاصله عن العالم..

كرفصت على نفسي ولتفيت  بالحاف حيل وفقدت،،، اصحى وانتبه بس على الكحه الي شكت كلبيي واذتني حيل..
،،، ماصحيت غير على اصوات بالبداية غير واضحه، بعدين توضحلي الصوت جعفر قريب مني وايد على جَـبيني.

احس اجفاني ثكال ماكدر افتحهم،، بس اسمع ابويه وجعفر يسالون امي :- هي شبيها من البارحه مو على طبيعتها

-مابيها شي بس يمكن بليل اخذت برد خطيه امس اجيتها لكيتها مكشفه..

-راح اطلع اجيبلها علاج بلكت تصير احسن..

-وين يمه وين تروح ساعه هدعش وين اكوو صيدلية مفتحه...

-اكوو يضلون خفر وره الولايه...

-شيوديك وره الولايه وليدي اصبر هسه ننطيها خافض حراره تصير احسن، اذا مصارت زينه ناخذها باجر للطبيب...

-جاا راح انزل اسويلها حليب حار بلكي يدفي بلعومها

ابتهال :- روح يمه نام باجر وراك دوام اني هناا يمها...

راح جعفر وباله يم سدرة وخايف عليها،،، طلع سلام بعد ماتطمن على بنته..

فتحت عيوني لكيت أُمي كاعده يم راسي،،، ايدها على خدها وشعرها حاطته وره اذنها وصافنه.

شفتي وجسمي ثكيل اريد احجي اريد صوتي يطلع ماكو.

باوعت على كد مامغطيني يمكن النضد كله امي حاطته عليه كوه بعدته عني
واردفت بتعب :- شنووو هذاا! ؟؟

فزت امي وحطت ايدها على كصتي تتحسسني وكالت :- هاا يمه سوره شلون صرتي...؟؟؟

زفرت بتعب :- ماما متألمه بطني موتتني.

رفعت نفسي وخرت الغطا وامي ساعدتني،،، انتبهت جايتني الشهريه ولاعبه بيه طوبه،، غيرر الألم الي قطع احشائي...

ساعدتني امي اكوم للحمام وجابتلي مستلزمات نسائيه وهي تباوعلي وكل شوي تذبلها حسره...
وتكول :- شجتج ياأمي صخونه ماكلتج ودور منا الدوره..

تنهدت بدلت وخلصت وطلعت لكيت زيتونه تبدل الفرشه مالتي باوعت عليها بنظره باهته..

تنهدت واجت لزمت ايدي :- شلون صرتي!؟؟

-ليش شبيه اني!؟؟

-اعرف مكسورة خاطر،، والله من البارحه لليوم ماتركناج عقولنه وافكارنه كلها يمج...

عكدت حواجبي :- شنوو من البارحه لليوم..

عقجت وجهي ونفخت بألم وهي اردفت :- ولجج سِـدرة انتي من البارحه العصر نمتي وهسه ثاني يوم صارت ساعه ب١١ونص بليل.. وطول الوقت ترجفين وتهذين بكلام مامفهوم..

تمددت ورفعت راسي لفوك اححسه شثكله :- كل هذاا الوقت نايمه ولجج جسمي موتني وراسي اتمناا هسه لوو اكصه واخلص لان بعد ماتحمل هلكد الوجع ذبحني...

حجيتها ودمعت عيوني متأذيه،،، احشاء بطني تقطعت ونفسي تلعب كلششش،، غيررر الصداع الي اخذني من كد ماقوي ودي اتمرغل وياه واشمره بزبل..

بهلاثناء دخلت غدير وبيدها علاكه مال علاج وكالت :- هذا العلاج هسه خابرت ايهم جابه وعلمني عليه فــ هسه نازله اجيب العشا والله ثم والله اذا مااكلتي ماتلومين غير نفسج...

اجبروني على ان اكل بس احس مُقرفه من الاكل حيلل احس كلشي نفسي تلعب منه...
غيررر الكحه الي شخطت بلاعيمي اكححح واذب بلغم تدمرت...
ومن كد ماكحتي قويه الي اكلته كُله ذبيته

غسلت وجبرتني امي اشرب العلاج وكالت :-باجر اكول لواحد من الولد يحجزلها عد دكتور عبد العزيز باعن كحتها شلونها خاف رئتها تعبانه اسم الله...

غدير :- واخذيها لدكتوره تغريد خوش دكتوره شهريتها مأذيتها..

- اي هم هيج..

ضلن شوي يمي يشاقني ويغيرن عني بس اني كوه افتح عيوني واسدهن..

رفعت راسي واني عافسه وجهي وغدير طابكه المخده وممده بالطاع وتسولف ويه زيتونه ويشاقن،، عود يلطفن الجوو...
:- اكول يعني شنوو لصبح ضالين على هاي الحطه اديجن على خدودجن وداكات فج وتكهكهن ترا راسي راح ينفجر منجن...

زيتونه :- يااااا ولج سدره شجاج غير جاي نغير عليج الجوو ونخلي مُعطر بالافراح..

:- اكوو معطر جوو بالسله الي جوه الدرج جيبيها وعطري،،، سلميلي على افراح..

ضحكن :- مدام بديتي تحششين يعني وجع مابيج...

-ابوس اخلاقج الفاشله حبيبتي

ابتهال :- يلااا بنات روحوا نامو وارتاحو خلو سوره تاخذ راحتها هم خطيه

هزن راسهن ابتسمن وطلعن بس اكووو كسره جبيره بداخلليي وخصوصاً لمااا اشوف نظرات الشفقه بعيون البنات ماعرف هذا بس احساس لان هن يعرفن بـــ.....

زفرت بقهررر،، وتذكرت صلاتي،، كعدت مفزوعه واسال امي :- صلاتي يومم صلاتي مااصليت..

-اي ياأمي غير طريحه الفراش وضاله على الخافض حراره..

دكت الباب زيتونه وانطت لامي كوب حاطته بصينيه ستيل ويطلع منه حراره..

بعدت الغطا وكوه عنت نفسي اكوم احس رجليه مثل الخيوط وواكفه عليهن على كد ماتعبانه المرض اكلني..

ابتهال :-وين يوم وين رايحه..

باوعتلها بنظرات تعبانه :- اريد اتوضى واصلي...

زفرت واردفت مُبتسمه :- بس هسه عليج الشهريه ميصير؟؟

غمضت عيوني وعقجت وجهي :- ماما كُلش دانسى تعبت..

-سلامتج أُمي انشاء الله مابيج شي ،،، بس تعاي شربي هذا دارسين قبل لا يبرد، بالكي تصيرين احسن

-ماريد يوم مااحبه...

خزرتني :- سدرة اخذي وبدون كلام زايد يلااا خليني محترمتج،،بلكي توكفين على حيلج واكدر اخذج للطبيب

هزيت راسي بتعب واخذت شربته رغم مااحبه بس مجبوره متأذيه بطني...

رجعت تغطيت وامي كاعده على الكرسي يم راسي صارت عيني بعينها وكالت :-سِـدرة!! ؟

-ممم

-شبيج هلكد تعبانه..

-مادري..

هزت راسها وصفنت رجعت باوعتلي واردفت:-شنو مشاعرج تجاهه مُنتـهى؟؟؟

احس قلبي طفر من مكانه باوعت عليها بصدمه وخوف :-ولا شي..!!!!

تنهدت بقهرر وكالت :- من يمته تحــبي!؟؟

بلعت ريكي وعاينت عليها بخجل :- منو كلج هذا الكلام؟؟

-محد!!! ،،اني اكتشفته بنفسي

-لاا ماما غلطانه..

عصرت ايدي وهي تباوعلي :- ولججج يوم اني امج وصديقتج كان لازم من البدايه تكولين او تحجين،،، ومن جان احد يسالج على مُنتـهى جنتي تبتسمين وتكولين صديق طفولتي ومثل اخويـــ......

قاطعتها :- وهو هيج.

رفعت حواجبها بتعجب :-ووكعتج ؟؟مرضتج؟؟ طلعتج قبل الزفه؟؟؟ وكفتج وياا والدمعه الي تلالي بعينج؟؟؟ لوو كلبة خلقتج بالحنه!!!! شنوو تسمين هاي،، سِـدرة انطيني جواب اقتنع بي.....

سَگتت وضلت عيني بالفراغغغ طول ماهي تحجي،، تنهدت واردفت :- مُـراهقه !!

-يعني صح !؟

دنكت راسي،، ومشاعري صارت كوكتيل خجل، حسره، تعب، خسران ندممــ......... ووو

عاينتلي بحسـره وكالت:- من يمته تحبي؟؟

غمضت عيوني واردفت :- من لماا جان يشتريلناا اني ورُما ويلعبنه....

جظحت عيونها وكالت :- من لماا جنتي طفله...

هزيت راسي وسَكتت وهي هم التزمت الصمت،،، بس كل شوي تباوعلي بنظرات وكأن اسهم تنبت بصدري..

:- ليش ماكلتي لاحد..

-مااحب احد يعرف بهيج اشياء غير ربي ،، ومااريد اشوف نظرات الشفقه لان كنت متأكده هي هاي النهايه..

فركت وجهها وكامت وكالت بلطف :- نامي نامي أُمي ورتاحي محد يفيدج..

احسس امي متندمه على شي وتعرف شي وماتريد تكوله الي...

على كد مااحس جسمي تعبان بس غمضت عيني غفيت...

كعدت ثاني يوم ويه آذان الفجر بضبط،، بس كل حيل مابيه اكوم...
قريت دُعاء الفرج وروتين الصباح اول مااكعد نفسه،، سبحت تسبيحة الزهراء.

باوعت للسكف وافكرر،،، تزوجها؟؟؟ اي اكيد! ،،صارت مرته وحلاله،،، يمكن بعد كم شهر تطلع حامل ويصير عدهم طفل ويعيشون حياة طبيعيه بس انا شنو؟؟؟
.
هم مستمرين بحياتهم بس اني معقوله اضل على نفس النقطه؟؟؟ شنوو اسوي!!؟
_لازم اطلع نفسي من الي انا بي وابدأ حياة جديدة وابطل ارفض كُـــل الخطابه بدون مااعرف عنهم شي.

مناا وجاي اريد اكمل حياتي وكل شخص يتقدملي اسئل واتأكد واشوف اذا يناسبني اقبل واتعرف عليه بفترة خطوبه،،، اذا اشوف لو خطأ واحد افسخ !!

لان الخطأ الواحد بفترة الخطوبه معناه كومة اخطاء بعد الزواج...
خلاص لازم اشيله من بالي بس اضل ادعيله ربي يسعده ويوفقه بحياته
هوو صديق طفولتي ولحد الان بين فتره وفتره نلتقي ويسلم عليه نفس قبل بضبط..
ومايناديني غيرر بطه بس بالفتره الاخيره،، صار يصيحلي باسمي...

بصراحه هذا الشي يزعجني،، احب اسمعه وهو يناديني بطه، بطوط

جؤ جؤ استغفر الله ياربي...
كمت من فراشي ونزلت اريد اشوف جوجو كلبي نار عليه مشتاقتله..

نزلت واني امشي على كيفي انفتح باب غرفة جعفرر وبالزي العسكري وبيده جنطه صغيره،، شافني على الدرج وانملئ وجهه ابتسامه بشوشه
واردف :- صباح الخير بنيتي شلو صرتي،، شوو اشوف وجهج.... مشاء الله مشاء الله مابيج شي مثل الورده.

ابتسمت ولزمت ايده وحجيت :- صباح العافيه حبيبي،،، اي شويه احسن بس جسمي نحلان..

-شجاج منين اجتج هاي النوب..

-حضي المصخم جابها،، نوب عندي امتحانات..

-اطمئني اخذنالج اجازه.. مناا لما تصيرين زينه..

دخلنه للمطبخ واحنه نحجي لبيت صنطه،، حط جنطته بالكاع وراح يشغل الصوبه النفطيه ويحط جدريه بيهاا مي وبيض على النار وجكارته بحلكه..

- اكلك
-عيني!؟؟
-انت مامتريك شنو هلجكاير مو زين..

باوعلي وكال :- هسه راح اشرب حليب واتريك ووراها جاي واطلع للدوام...

-اليومم وياك جنطه شنو؟؟

-عندي واجب بديالى والله

-هاا مو هذاك اليوم رحت واجب ببغداد؟؟

-اي جاا احنه كل يوم يشمرونه بمكان شغلنه صعب

يحجي وهو يحط مي حار فوك الحليب الطوز،، :- كومي غسلي وجهج وتعاي شربي حليبـــ...

قاطعه دخول امي شافتني وابتسمت :- صباح الخيرر..

حط جعفرر كلاص الحليب على ميز الطعام وكال :-صباح الورد ياست الحبايب،،
حجها وهو يبوس راسها..

ابتسمت وباسته وكالت :- شنوو يمه اشوف جنطتك وياك؟؟

-عندي واجب بديالى.

هزت راسها :- درب السلامه وليدي تروح وترجع بالسلامة حبيبي..

ابتسمت وغسلت وجهي واخذت الحليب اشربه،، صارت عيني على جعفر وهوو يطك بيضه فوك الحليب ويخبطه حتى يشربه...

قرفِت ولعبت نفسي شنو هلعبان نفس نترت :-شنوو هلتلعوص الي تريد تشربه..

باوعلي رافع حواجبه :- ليش ولج صحي كلشش زين

-يااا زين ولك جعفر باوع لون الحليب شلون صارر.

-بابا اني احتاج هذاا المزيج وانتم كلكم لازم تشربوا بس ماتحبوا مااجبركم ،،، شايفه شلوون يقوي العظام والاسنان غيرر الكالسيوم والتغذيه الي بي...
ويحارب امراض السرطان لازم دوم تشربو لوو مره وحده بالاسبوع. هسه اني بين يوم ويوم اشربه صح مااحبه بس اسد خشمي واشربه صحيي كلش صحي  

هزيت ايدي وهوو اشوفه سد خشمه وشربه طكه وحده حط الكلاص بالسنك وفتح الحنفيه عليه وطلع بتيته سلك  وخيار وطماطه من الثلاجه

وامي تسوي ريوك وتسولف ويانه... :-. كعد يتريك بتيته سلك وخيار وطماطه وبيض سلك ..
كلتله امي :- يوم خلاسويلك ريوك؟

- هاي يمه داتريك وراي طريق..

اجه بابا صبح علينه ويسال عني واني اجاوبه بس من البارحه لليوم الكحه ماهدتني هلكتني والله
جابت ماما ريوك تريكنه كلنا سوه وكعد ادهم ابن غدير هذا يكعد وي صيحة الديج مدري شعنده..

طلع جعفر لدوامه والوضع كلششش تمام اخذوني العصر اهلي للدكتور وكال :عندهاا حساسيه بالرئه حاده مبين من كحتها والدوره الشهريه هم تأثر والحاله النفسيه وووووو.
ضل يعدد.

كتبلنه علاج وطلعنه رحعنه للبيت واشوف امي نظراتها الي مو كن نظراتها الي اعرفها. 

رجع دوامي والحمدلله صحتي بدت تتحسن احسن من قبل...
وافتهمت ان امي واخواني وابويه ثاني يوم العرس معزومين عدهم وتغدوا ببيت خالتي وصال...

اجذب اذا اكول نسيته ابداً مانسيته بس احاول اتناسى اكثر من مره تصدف واشوفه وهوو ياخذني بكلامه الحلوو وسلامه مثل كل مره...

بس بصراحه كل مااذكر اني مناسيته  اكره واقرف من نفسي لان افكرر برجال متزوج وهو حاسبني مثل اخته...

بيوم جنت هسه جيت من الجامعه وزيتونه وغدير عدناا هذن الاثنين روح بروح واني جد احبهم..

سلمت عليهم وصعدت ابدل نزلت جانن هن كاعدات بالمطبخ وامي تصلي وفيد بغرفتها...

اسمعهن يحجن بطاري مُنتـهى بالبدايه ماتوضحلي شنوو يحجن،،،
بس ركزت بكلامهن و انصدمت صدمة عمري،،،....

يتبع (للحكايه بقيه).....

         ¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦¦™¦¦¦¦¦¦

               اطربوني احب اسمع توقعاتكم😍🌚♥️

                 تدرون شغله!!؟ احبكم ♥️♥️😍...

تصويت هاا 🌟🌟🌟🌟😁