#كحل_عرب
(احضان باردة )
((( بقلم زينب ماجد )))
الحلقة_٣٠ والأخيرة
( النهاية )
سرحان يكول :
أعز من روحي أحـِسـٌكْ
وانته اعز منـٌي
ياحسبة عمر ..خاويتها إمن إصبــاي
بـِطلـَتْ صـَفنتي .. وما بَطـٌلـٌتْ مني
جَسٌيت الليالي ابمرود الحلوات
وسنين العمر بالشيب جسنـٌــيٌ
وليت.. وعف ضميري .. وماكسرت العود
ولـِسـِن.. شبه الزلم .. بالعلن سبــٌني
كـفاني امرح.. ورع.. والتذ بحب الناس
وعملات الكـَبح .. ما يوم خاوني
لا ِزحتْ الحيا... ولاضيٌعت معروف
ولاخنت الوفه.. وربعي اجفلوا مني
أضحك بالوجوه.. ابغير راحة بال
واصبر لو .. ليالي العسر ضكني
أنا ابن العاصيات .. من الليالي السود
لاريد الكـَـماري .. ولهن يردنـّي
ارضعتني امي ابدمعها .. من عرفت الصوت
وغطـّــتني بحزنها ... من مشت عني
(للشاعر الكبير عريان السيد خلف )
رجع عباس للبيت .. وحجي الرجال براسه
منو هذا الزلمة اليدخل البيت بعد ما اني اطلع ؟
معقولة ميادة تسويها؟
لا مرتي اعرفها خوش بنية ما تسويها
بس شلون والرجال يكول يومية يشوف زلمة يطب البيت...
اسألها ؟
لا .. خل انتظر باجر اطلع واراقب البيت واشوف اذا اني ظالمها لو هي صدك ... التفكير صعب كلش
مجرد التفكير بهيج موضوع كلش صعب .
حاول ما يسألها ولا يحسسها بشي حتى لا تشك
الليل ما نامه من التفكير والحيرة والها جذب وها خاف لا يطلع صدك .
صار الفجر طلع من البيت وهو ما نايم
يومها ما طلع للعمالة ..
طلع من الفرع فر من ورا الفرع واجا من الصوب الأخر .. ملفلف الغترة على وجهه وكاعد بقطعة ما مبنية بالفرع .. وكف يراقب من عدها .. صارت ب٦ ونص .. اجا رجال هو يعرفه بالمنطقة الناس كلها تتجفى شره .. اول ما وكف كبال باب بيته فتحه وطب بسرعة وانسد الباب وراه .
تخبل من شاف فات بكل سهولة
شعر راسه وكف ، نص طابوكة بالكاع جرها وركض على البيت .. فتح باب البيت وسداه
باب البيت مجرقع .. سوا صوت من جراه وسداه .
حس اكو ربدة رجلين بالبيت ..
طب للهول .. بسرعة ميادة وكفت كباله وهو الطابوكة بيدة : ها عباس خير شكو
- وينه هاذ الطب للبيت
- يا زلمة شبيك ، دكعد ، شني انت مو رحت
- احجييييييي وين وديتي احجييي
وهو جاي يصرخ .. حس ربدة رجلين على الدرج
ويا ما اندارله .. الزلمه هجم عليه
بوكسيات طيحاه للكاع
وهي تكله : اكتله كبل لا يشهرني ، اكتتتتتله
وهو يردها : سجينة بسرررررعة ، جيبي سجينه
ركضت للمطبخ وجابت سجينه وعباس والزلمة يتعاركون .. جر السجينه منها .. وطاح عليها دج بالسجين زرفاه تزرف .
طاح عباس من اديه سابح بدمه
عافه الزلمه وطلع من فوك السطح
وميادة لبست عبايتها وركضت لأهلها .
الزلمة الحذر عباس صاحب اسواق .. كاعد بدكانه .. شاف عباس من طب .. ما ادخل
رد شاف مرت عباس لابسة عبايتها بدون حجاب وتركض والخوفة بوجه .. ولا الزلمة ولا عباس طلعوا من البيت .
كعد شوية ينتظر عباس يطلع ماكو
صبر على روحه ما يدخل
بس خاف لا كتلوه لإن الوجه الطلعت بيه مرته ما يسر .
راح دك الباب على بيت عباس ماكو احد طلع
هو متأكد شاف عباس دخل ، ويدك وما يطلعله
فتح باب البيت وصاح : عمي ، وينك وليدي موجود انت .
ظل واكف ويخاف يدخل لإن حرمت بيت
مر طفل من الباب صاحلة ؛ تعال عمو طب جوا شوف ياهو الموجود
دخل الطفل وطلع يركض يكله : هذا ولد بيه دم
ركض بسرعة لكاه مدجج وسابح بدمه ..
طلع يركض على بيت جيرانهم العده سيارة كيا .. كعداه وطبو شالو عباس ونقلوه للمستشفى .. خذو تليفونه وخابروا على اخر رقم عباس مخابره .. طلع صاحبه كال الهم : اني صاحب وما عندي رقم اخوه .. عندي بس رقم مروان كرايبهم جنت مشترك وياه بالقاعة مال الحديد ، راح اخابره ابلغه على ما اروح لاهله .
دك التليفون الساعة ٩ ..
مروان نايم .. فز على صوت التليفون : الوو
-الو منو
- اني صاحب عباس حاكم .. اليوم الصبح لاكينه بالبيت سابح بدمه وناقلينه للمستشفى .. بلغ اهله بسرعة هو بمستشفى الجوادر .
فز مروان من مكانه وكاله : شني السالفة ، ياهو المسوي بيه هيج
- ما ادري جيرانه خابروني وكلولي اني طالع ابلغ اهله بس اذا قريبين عليك كللهم
- ما يحتاج مشكور اني راح اكللهم .
سداه منه وخابر على مؤيد وهو يلبس
مرتين بالثالثلثة رد مؤيد : ها مروان
- وين انت
- بالشغل كول
- عباس معتدين عليه بالبيت لاكينه سابح بدمه وهسه هو بالجوادر
- لا يالكعبة ، صددددك
- اي والله
- رايح للمستشفى بسرعة
- اني هم متوجه الها
نزل يركض على الدرج نوسة كاعدة تمسح بالبيت صاحت : مرواااان لا تفوت
- عباس كاتلينه يمعودة بالمستشفى
- يممممه
طلعت هدوة : شني شبيج نوسة
- دخيلك ربي
طلع مروان يركض ونوسة متحزمة للشغل ومتخصرة وتباوع وراه عباس وهدوة تكلها : شمالج يمه شكو
- عباس كاتلينه وبالمستشفى
- بهالحال واردى ان شالله ما يقصر ابو فاضل
- محد دولبه غير مرته البربوك ، لعبت بحاله لعب
- صوجه مو صوجها لونه زلمه حوك ما مشى بشورها وعادة اهله وسكم خواته لخاطر مرته ، امي طمها التراب من حدر راسه.
شوية وطب سرحان سلم .. هدوة كاعدة ومشغلة التلفزيون على القران : شلونج يهدوة اليوم
- شلون حال الفاكد اهله سرحان .. صفيت وحيدة
- اها جا وين رحنا عنج خاطر اظلين وحيدة
- الله يحفظكم .. لجن نسمة برد جست كلبي ساعة السمعيت بعلم عبيس
- شماله ؟
- خابرت امه توني تكول ناس طابين اعليه للبيت ومدججينه .
- ومرته وين عنه
- ما ادري عن اخبارهم انا افتك افادي بهالعلم وما نشدت بعد عن اخبارهم .. عسن نارهم تاكل حطبهم .
شال التليفون وخابر على مؤيد ، عرف من السالفة سالفة شرف ومؤيد كايله : شيخ اريدك وياي نروح لاهل مرته
كايله : هسه انا اجيكم ..
سد التليفون حجت هدوة : عليش تمشله خله يزكط لي وحده
- السالفة سالفة شرف ، جاره يكول مبلغة من امس واحد يطب البيته بعد ما يطلع وراقب اليوم ومرته بعد ما طاب عباس طالعة بطرك العباة تركض من البيت
- ءءءءء دخيلك يا علي .. وما كضوها
- خل امشيلهم .. بعلي تعبت مدري امش لمضيفي ري اعلى وسن مدري لعباس وطلايبه
- وسن شصار وياها
- الجلب ماخذ بزرها وشارد خابرت على جبيرهم يكلي ما عندي علم عنه وهو ما بايك غريب ابنه وخذاه وهاذ بزره وهاي تنوح وتصيح عمي ... جا كتلها عمي يوم الخذيته ما دريتي جلب ما يتعاشر
تظل تبجي وتصيح اريد ابني .
- وشراح تسويلها
- شسويلها بالعشاير ما احكنه جيف بزره ، خلها ترفع عليه دعوة ونوكل الها محامي زين يمشي بالقضية وان شاءالله .
نوسة : جا وظالة وحدها غاد عمي ما جبتها وياك اقلها نشيل عنها ونواسي تلاكيها الدمعة والمخطة سوا
- اني ماشي للمستشفى من يجي مأمون روحي انت وياه وجيبوها .
طلع سرحان
ونوسة راحت تخابر وسن
تكللها : كلبي اشتعل وصدري ورم يريد ابني .. كليلي شلون نار كلبي ما جاي تطفى
- دتعاي يمنه اقلها احنه يمج شحاليلج وحدج غاد
- بلكت يرده ما اكدر امشي
- هو الخذاه يرده ، هسه اجيج حضري روحج
سبحت وبدلت ولبست عبايتها وصاحت : يمه راح اروحن لوسن اجيبنها هي وفر*وخها ، خطية وحدها غ بس تبجي ، الفاصولية ع النار من تستوي بس طفيها اذا تكدرين واذا ما تكدري ودي على ريحانة .
طلعت خذت تكسي وراحت لبيت وسن لمتها عي وفروخها وجابتها واجت .. لكت نجوى وريحانة يم هدوة حجت نوسة : واخيرا اجيتن .. الجلب العضجن شحتناه
ريحانة : اجيت على مود عمة هدوة ، الا ما اكدر افارك غرفة حبوبتي ريحتها بعدها موجودة بالغرفة .
هدوة: ولونه يعمه لو تجن يمي هنا حالجن حال نويسة .
- مو بعيدة عمة انت ، وعمو مؤيد ما مقصر الشاهد الله جاي يشتغل ويطينا مصرف حالنا حال خواته ، والراتب وعبد الله هم ما ناسينا يخابر ويسأل ويدزلنا مصرفنا .. مالتنا وعايشين بغرفتنا ما ناقصنا شي .
- الله يحفظجن عمة ، كلنا يمجن لا تظنن وحيدات .
- والله عمة من راحت محد سد مكانها هي جانت تباوع لوجوهنا وتعرف شبينا ما بينا وكبل لا نحجي تفهم شبينا ، مو جدة ام .
- لا جاي صدك ام ، بس هذا حال الدنيا يعمه ، ادعلها بالرحمة .
- لا اني ونجوى ختمنالها القران ٥ مرات وبعدنا بالختمة السادسة
- الله يطيجن
اندارت لوسن : لا تهمين يعمه اوليدج ان جان نصيبج يرد قهرج هاذ ودموعج ما يردنه ، تحسبي عليه وحاشى ربج يقصر .
وسن :- كله من اديه يعمه .. اني الجبت النار وحطيتها بعبي ، ظنيت من احطلي رجل افتك من حجي الناس وارتاح زدت الهم ما شلته .
- الله يعينج جا معصومة انت يعمة ابنادم خطاء والله يشيل حملج الله يرحمها امي من جنت اهم بحالي ويا فليح جانت تمسد علي بحجاياتها ولهساه اضكرن جلمتها تكول ( ربج ما يخلي حمل مطروح يشيله ويغير الحال ) ، وهالتشوفين حالي ويني ووين فليح .
- والنعم بالله
مشى سرحان للمستشفى .. عباس بالعمليات
نشد جاره وحجاله كل الحجي اليعرفه .. اخذ مؤيد وعاف مروان بالمستشفى وطلع لبيت اهل ميادة .. اهلها نكروا جايتهم .. وكالو : ولا اجتنا ولا مرت علينا الشاهد الله هسه سمعنا منك .. كل علم ما عدنا ..
كال الهم : بتكم داست بيت رجلها وكتله هي وصاحبها .. كلشي يصير بابنه انتم المسؤلين عنه
كاموا يحبحبون بيد سرحان خاطر يستر على سالفة بتهم .. وما يحجي بيها ويفضحهم ، بس سرحان كال الهم : اعذروني انا مضطر ااقدم البلاغ للشرطة يدورون الساقطة بتكم .. موش بت بيت هي واسترنها ، مرة ابيت زلمة اتفوك رجل لدارها وتعاونه اعلى جتلة رجلها بت الليل ما تسوي سوايتها .
راح قدم بلاغ ..
وقدم كلام جار عباس للضابط وحجاله وطلعت مفرزة لبيت اهل ميادة .. ابوه يبوس بيد الضابط ويكله : احبن ايدك سيدي وعلي من اكضنها اغسل عارها بس استر عليها الله يستر عليك .
اخوتها وابوها وجوهم سود وهم يتوسلون سمعتهم من الناس ، وهي ما بينه .. فتحوا القضية وصاروا يدورون عن ميادة والزلمة اللي طب البيت .. راحو على اهله ما يعرفون بيه وين .
عباس سوا العملية
بس دخل غيبوبة
واهل ميادة شالو من البيت وعافوه ما يندري وين خبرهم .. ناس تكول طلعوا للكوت وناس تكول للعمارة وناس تكول .. لا طلعوا لايران وعافوا العراق كله من فضيحة بتهم .
شنو خبر ميادة ما يندري
اهلها صدك ما يعرفون بيها ولا شايفينها .. لو جذب هم ما دروا ... شالوا وشال علمهم وياهم محد يعرف خبرهم.
ظل عباس ٣ اسابيه بغيبوبة
صحى .. امه واخوه ومروان ومامون كلهم يمه .
وخواته نهاد وحتى الاء .. زارنه
بس نانة ما اجته ولا وصلته .
انقل ردهات واتناوبو على مرافقته مؤيد و مروان وسجاد وعلي .. يومية على واحد يبات وياه .. ومامون يروح ويرجع عليهم .
نانة : لا همني حالة عباس ولا همني اسأل عنه اصلا ، يستاهل كل الصارله .. مو هي هاي السكمني اني وخواتي على مودها جبر الاء على زواجتها من علاء بس حتى تخلص منه وانجبرت ارضى بشاهين بس حتى اخلص منه وماتت يمه كواغد مكسورة ظلع من وراه .. ويريدوني احزن عليه .. لا والله حيل وابو زايد
امي تضوج من تسمعني ادعي عليه
وتكلي : شنو انت ما عندج كلب .. مهما كان يبقى اخوج و الظفر ما يطلع من اللحم .
- لا والله لو ظفري مثل عباس بجلابتين اشلعه ولا اخلي وياي يسمم جسمي .
تضوج من احاجيها هيج
كمت اسكت حتى ما اضوجها بس ما يهمني امره صحى ما صحى .. ما يهمني ، اعرفه عار كلشي ما يصيبة .
ضيمي ويا شاهين
امر من ضيمي ويا عباس ..
وضعي وياه بس عرك ومجادل ..
جنه نتجادل على سالفة العرس .. اكله مرت ابوي ما صالها شهرين من ماتت يا عرس ، يكلي : موتاكم ما يخلصون اني اريد اتزوج واخلص ، شعليه بالماتو والعدلوا .
اسبوع يلح بهالسالفة
ابوه خابر على سرحان يسترخص منه ع العرس
سرحان راح حجه ويا هدوة ، واجت هي تحاجيني : لا توكفين قسمتج خيتي ، توكلي على الله وفضيها ..
- ما اكدر هدوة هي فرحة جذب ، الحجية ما جانت بس امج امنا كلنا انسى كلامها الطيب لو انسى معشرها .. ياما كدت علينا وياما خذت مصرف منها وطلعت ، وهسه اتزوج ولا كانها ميتة
- اربعينها طلع وحكه رجلج احنا الموت ورانا ورانا وطلايبنا ما يفض .. فضيها وعرسي واستقري .. واعذريني لو ما حضرت عرسج عبني عكب امي حرمت اعليه الفرح ، بس لا توكفين قسمتج الموت امر الله ، كلي لرجلج تامر وامشي اعلى رايه .
- والله ما ادري بس والله مالي نفس
- هو ياهو الله نفس .. كلنا ارواحنا ضيجة بس شنسوي هاي الدنيا .
دزت امي موافقة وحددنا العرس بعد ٣ اسابيع ..
وهنا جان لازم نحضر غراض البيت
حاجيت شاهين كتله : نروح اني وياك نشتري الغراض ..
كال : ماشي ، اني باجر امر عليج ونطلع للكرادة نحجز على الاثاث اللي يعجبج .
نمت الليل كله اصمم واتخيل اثاث بيتي
وفرحانة راح يصيرلي .. بيت واثاث ومملكة زغيرة تخصني .
كعدت الصبح سبحت وبدلت تنورة وقميص
امي ما ترضى بالمكياج .. لإن بنية بيت حتى لو كلية غير الحمرة الخفيفة والمسكارة ما ترضى ، واني هذا كل المكياج الاحطه سواء بالكلية او بأي طلعة .
رتبت حاجبي وشلت شوية من جوا
وسويت رموشي بالمسكارة ورسمت الحمرة على شفايفي ونزلت فرحانة .. شافتني امي عقدت حاجبها : شمسوية بحاجبج نانة مامة
- شلت شوية والله مو راح اتزوج
- ميخالف يطلع وجهج ع العرس ، امسحي الحمرة .. طوخ لا يشوفج مؤيد
- مؤيد شنو ماما غير راح يجي شاهين ونروح نشوف الاثاث
- ميخالف حبيبتي من تزوجين حطي المكياج اليعجبج .. امسحيها .
رحت اخففها .. اتصل شاهين
عفت الخاولي وخذيت التليفون رديت : الووو هلو شاهين .
- هلو نانة
- شنو بعدك بالبيت واني مبدلة ومنتظرتك .
- ما راح اجي
- ولييش ؟
- امي وابوي راح تروح وياي للاثاث
- تحجي صدك لو تشاقى
- اي والله
- امك شنو قابل هي راح تعيش بالبيت وتأثثه
- لا تكولين امك ، احترمي
- وما تحترموني لعد لو بس ادورون مني احترام ، اسمع شاهين لو ما اجيت هسه والقران العب جولة افتهمت .
قفلت الخط بوجه وضربت التليفون بعصبية وعيوني دمعن من القهر ... حجت امي : هاااا
- والله معلية ، شنو مبدلة ومنتظرته ويكلي امي التروح وياي ، اني شنو لعد ، خراعة خضرة .. والله ماا .. مااا
- دوكفي هسه خل نفتهم على شنو تبجين
كام يخابر ما ارد عليه واشمر بدية
وكالها والله اذا صدك اخذ امه وعافني .. ما اخذه وكلشي انهي وياه .. هي متجاهلتي خذت التليفون وردت عليه ...
يكللها : عمة امي تريد تختار يعني شكللها ما اريدج اريد نانة عيب ما اكدر اكول لامي هيج
كالتله : ما بيها شي من الزينات تاخذ امك ، امك هاي فوك الكل ، بس عمة انت لازم ترضى الطرفين وتاخذ امك ونانة وتختارون الاثاث سوا .
سدت الخط منه .. كتلها شكالج
- كال خل اشوف امي وارجعلج
- وشنو ينتظر امه ترضى اروح وياهم لو ما يرضى خو يجيبها و يجي بسيارته لو الا ياخذ اذن امه .
- ماما ميصير هيج كلام نانة ، ام هاي
- واني شكايلة قابل مانعتها بس هذا حقي غير راح يصير بيتي
- هسه دهدي وانتظري يخابر
- اني شلون راح اعيش ويا واحد كالت امي وحجت اختي واخوي هيج يرد وابوي ما يقبل .
- اهله بنتي شلون لعد ؟
- وهو شخصيته وين واهله يمشونه ، والله لعبت روحي من عنده .. ما اريده .
ظليت ابجي واحجي احجي احجي
وافتر بالبيت طالعة روحي .
خابر كال الها : امي ما ترضى تروح ، تكول اذا راحت هي انا ما اروح .
- وهسه شلون عمه
- عمه نانة غالية بس اني ما اكدر ازعل امي ، يعني اذا خذيت واختاريت امي وحتى ابوي يزعلون من افضلها عليهم
- عمة مو تفضيل هذا بيتكم غير انتو تختاروه
- امي هي تريد تختار اثاث بيتي ، وبعدين حقها عمة هي والدة وتريد تفرح بيه وتأثث بيدها
- والله يا عمة ما ادري ، هاية متخبلة ومن الصبح لهسه تبجي شلون كولي
- يعني اني شبيدي عليها غير امي ، قابل ازعل اني .
سدت الخط من عنده
اني طكت براسي كتلها : اليوم انهي وياه كلشي وخلي ابن امه .. لامه تتهنى بيه .
خذت مني التليفون وما انطتنياه واني امشي واضرب برجلي واحجي وابجي واتحلف ..
فات الظهر مامون .. لكاني ابجي
حجه : خير شكو
سولفتله امي الصار .. كال الها : حقه .. امه جا يزعل امه لخاطر نانة .. هم ما يصير
- واني كايلتله يزعل امه على مودي بس البيت هذا اني راح اعيش بيه مو هي غير اني اثثه .. شنو هي
- ترا انت باطلة امه هاي كل هالسنين تربي وتعبت عليه وفرحتها من تاثث بيته وتحضر العرسه انت مالج كل حق
- شنو ما الي كل حق ، غير بيتي
- لا مو بيتج بعدج انت ابيت اهلج .. تسكتين وكلشي يجيج ع الجاهز ما يعجبج شي عود بعد العرس يصير بيتج وغيري اليعجبج على كيفج
- زين ليش مترضى اروح وياه .
- مرة جبيرة لا تحطين عقلج وياها نانة .. كبري عقلج .. حاليا سايريهم بكلشي يردونه مو يكولون تمسكن لما تتمكن .. اتمسكني وطيعي لحد ما يصير بيتج وكتها تنعاب هي لو ادخلت بشي يخص بيتج .
ظل يحجي وطلعني صفر ع الشمال
وكلشي مو من حقي ..
انطتني ماما التليفون وكالتلي : خابري واحجي وياه بهدوء واحجيله شنو انت تحبين وخلي الحجي على ايده كانما اختياره .
- ولا والله ما اخابره .. اصلا هسه اذا اخابره .. انزل بيه دوسة ونص روحي طالعة منه .
-لج ماما احترمي ميصير هيج اتنزلين دوسة ونص شنو هيج كلام ميصير مهما كان هو الرجال وانت المرة
- يمه مو رجال مو رجال تعرفين شنو يعيني مو رجال .. كل ما احاجي كال امي اختي .. ابوي .. ماله كلمه .
- اهله بنتي اهله عيب هالحجي عيب
اصيح ومامون كاعد صبتله امي غده وجهاله حافينه كال الها : مو صوجها صوجه .. خو اني احجي العليه والمو عليه .. بس المرة ما تسترجل الا لما تشوف الكدامها مو زلمه .. تسترجل عليه .. الا هو لو كد كلمته يوكفون بوجه اهل ..مرة، يعرف يمشي اموره بروحه مو احد يمشي .. الا شاهين ... اهله يجرون منا و نانة تجر منا وها عمة خل اشوف وها عمة اصبريلي .. زلمتيش متكليلي .
- يا عمة انت تهيجها لو تخليها تهدي شويه
- لا هي غصبا عليها تحترم رجلها هاذ مو بكيفها .. بس هذا الحق عمة ، انا شكبرني من خذت بطة تتذكرين لو لا ؟ .. وابوي شيخ حجايته تمشي غصب .. وكلالي من تحجي بهالسالفة اتبرى منك واكصبنك .. مشاني ابوي ؟ فرضت حجايتي وعرفت شلون ارضي ابوي .. مو مدحا بنفسي بس الرجال الما يعرف شلون يدير روحه عن اهله ويمشي مرته بكيفه مو بكيف احد لا تسمينه رجال.
- ميخالف عمة شاهين ابنهم الزغير ..
وهم لو ما يعزونه ميوافقون بنانة بس هو لإن رفض كل وحدة غيرها وتعلق بيها رضوا حتى لا يزعلونه .
- الله يوفقهم .. نانة خابري وسوي مثل ما كالتلج عمتي احجيله التحبين يشتري وخلي كانما هو اختياره هيج .
شمرت ايدي وكمت ما عاجبني الحجي
رحت نزعت وبدلت وحسرة بكلبي .. كلشي متضايقة
خابرني : واسف والله اعوضج وحبيبتي عليج الله لتزعلين شسوي هاي امي وما اكدر ازعلها .
كتله : زين اخذها وروح .. بس الكاونتر اريد لونه ابيض وبيه وردي ، وغرفة النوم جاي موديل غرف تركية بيضة اني اريد منهم ما احب الصاج .
كال : تدللين اني راح اختار اليعجبج بس لا تزعلين انت .
سكتت ومشيت وياه على مايه
ثاني يوم رايح هو وامه اختار اثاث البيت
وجايب رجال للبيت ياخذ قياسات الكاونتر .. و الاستقبال .. والغرفة .
بس خلاها سكته ..
لا حجه ولا كالي شصار بعد
كل ما اسأله يكلي : ها ، بعدهم ما مكملين
اكله : اختاريت الكتلك عليه
كال : اي اي اختاريت لا تشيلين هم .
كبل العرس بأسبوع .. خابرت امه على امي كالت الها : اثاث البيت كله خلصناه وتممنا كلشي .. بقى بس النيشان وحنروح اني واخته نشتري .
كالت الها امي : النيشان غير هي تختاره
كالت الها : لا ما اثق بذوقها وما اريدها تلبس اللبس اللي تلبسه عادة .. يجون اقاربنا اصدقائنا ذوقها مو تمام ، راح نروح اني واخته نختارالها الملابس والمكياج
- بس ميصير هيج غير قياسها واختيارها ، كل واحد يلبس اللي هو يحبه
- اي انت اشتريلها اللي تحبه قابل ما عدها ملابس بس اللي راح نشتريهم ، انت متساعدين بنيشانها ، بناتي كلهم اني اجهزلهم فوك ال١٠ جنط .
استحت امي من حجايتها .. وراضية بكلامها
بس ما كالتلي .. خايفة لا اتخبل بالزايد
رايحة مداينة ٥٠٠ الف وكايلتلي .. هاي فلوس من ام شاهين دزتهن للنيشان .
كلت الها : معقولة دز بس ٥٠٠ هو كال اكثر
كالت : ميخالف ماما .
خذتني واشترتلي كلشي يعجبني ، واني مجمعة عندي هم زدت ع النيشان لإن اعرف امي ما عدها وتزيدلي على نيشاني .. وبقينا صبح وعصر نروح للسوك نتمم النيشان .
لحد ما كالي شاهين : خلي امج او وحدة من خواتج تجي ترتب ملايسج بالكنتور .. المواعين ترتبهن .. الغراض .
: ملابسي بعدهن عندي ما موديتهن للبيت
- لا شفتهن بالغرفة صايرات هوسة ..
- ليش هو البيت خلص اثاثة
- ها ، بعد شويه ينرادله .. والا اكلج اني راح اخلي اختي تصفطلي
- لا لا .. راح اخلي نهاد ونوسة يروحن يصفطن البيت ، بس اني اريد اشوف الاثاث كبل لا هاي .
- ما يصير شلون غير بعد العرس تشوفينه
- شنو ميصير بس اشوفه .. حلو مو حلو صوره عاد
- الله كريم .
خابرت على نهاد اجت من عيالها .. مرت علينا
اخذت غراضي هي ونوسة وراحن رتبن البيت وصورلياه واجن متخبلات : ولج نانة شلون بيت شلون اثاث ، كله من الزين يخبل يخيل .
اني اسمعهن وعيوني فرحانه واكلهن : صدك .. حلو يعني .. ما صورتن .
نوسة : يا شلون ما صورته .. كله البيت صورته يخبل .
شوفتني التصوير وعساها لا شوفتني
الغرفة اني ردتها تركي ولون ابيض مشتريها عراقي ولونه صاج ... الكاونتر ردته لو ابيض ووياه وردي لإن المطبخ حيل صغير ويحتاجله الوان فاتحة توسعه .. مشتري لون الكاونتر اسود باسود .. التخم تمنيته لو شذري .. مشتري لون احمر .
روحي صارت بكصتي ..
كتلهن : ما اتزوج والله .. ما اريده
نهاد : تسودنتي انت .. شبيج البيت يخبل
- اي بالعافية عليهم ما اريده
-- ليش شبيج بس احجي شنو الما عجبج
صحت امي وحلفتها بروح ابوي الفلوس الاشترتلي بيهن امه انطتهن الها لو منج .. بعد ما ضغطت عليها كالت مني وما تسوى ولا تسوينها مشكلة
كتلها : لا والله هي مشكلة .. صالة شكد اكله اشتريت مثل ما اريد يسايرني ويجذب ويكلي اي .. الرجال الجذب عليه وما تجرا يكلي الحقيقة والله ما اريده
نزلن بيه امي وخواتي دوسة ونص بالحجي واني ابجي واجر روحي منهن واصيح: ما اريده
نهاد : اكلج شو انت متعافية ، لا جديات والله ، هاي اني وياج اختج صالي سنين اني و ٤ جهال بغرفة وحدة ، وابوس ايدي وجه وكفا لو عمتي خلتني احطلي جولة بغرفتي واطبخ اليعجبني وانت بيت كامل مكمل وما عاجبج .. شنو عفه هو .
- السالفة مو سالفة عفة ولا فلوس ، سالفة احترم ولج ما مخليلي كل اعتبتر ومتحكريني وجني وحدة ما اناسبهم ولا اناسب ذوقهم والطلي الماخذته ما يكدر يحجيله كلمة بوجه اهله ، ما اريده فكووووني منه ، وعلي ما احبه كووووة هي .
نوسة : خب وعلي متعافية ، مشتريلج اثاث كله من الزين وبيت يضوي ضوي وتصيحين ما اريده
- وشفايدة الاثاث واني ما الي قيمة عدهم ... حتى ملابسي الداخلية هم مشترينها وهو ساكت تحجين صدددددك ، ما اريده .
دزيتله رسالة واني ابجي ( الغي العرس ما اريدك ولا اريد عرسك وتعال اخذ الذهب وانهي كلشي )
ظل يخابر ما اجاوب
حرك التليفون حرك .. ما جاوبت
رد يخابر على امي وامي تكله : والله يا عمة شسوي تخبلت لا دا نكدر نهديها ولا تسمع من عدنا .
عاندت الا افسخ الخطبة وانهي المهزلة هاي كبل لا تصير واقع .. خابروا اهله .. الدنيا انكلبت بعد اقل من اسبوع ع العرس .. شلون تبطل .
اجا سرحان صاحلي كعدني كال : بتي عيب وما يصير وزحمة ، وارضى ما دامه الزلمة يحبج .. ولخاطري ولخاطر شيباتي واني عمج ، عيب وابوه اتصل بيه ما يصير .
لخاطر سرحان رضيت شوية
خابرني شاهين رديت عليه من ورى خشمي كوة طايقته كارهته كن كل كلبي ، ومن يكلي حبيبتي وحياتي بودي ازوع .. كلش طالعة روحي .
حتى يرضيني كال اني راح احجز لتركيا نطلع نتونس .. كتله ما عندي جواز .. كال : ميخالف لعد احجز لدهوك هناك جبال ومصايف حلوة نقضي بيها شهر العسل .
راح يبلغ ابوه حتى يحجز لدهوك
ابوه رفض نطلع شهر عسل وخابر على امي يكللها : قابل بناتج متعودات يطلعن شهر عسل ، كافي لعبت روحنا نانة ساعة لاغية العرس ، ساعة تطلع النا بسالفة سفر ، كافي تلعب بعقل ابني ، يجون ناس اصدقاء يواصلون شنكوللهم والله مسافرين .
كالتله : امي لا احنا ولا نانة طالبين شهر عسل ، هالشي شاهين هو الراده .. وبيناتكم ترضون ما ترضون ما النا علاقة .
خابرني يعتذر يكلي : ابوي ما رضى نطلع لدهوك ، وعد بس يمر شهر ع العرس نروح اني وياج
- اخوك من اتزوج .. مو طلع لتركيا هو ومرته شهر عسل لو لا ؟
- اي بس ابويه مدا يقبل هسه .. خليها نعوضها بعدين
- شاهين انت شنو دورك
- يعني شنو اوكف بوجه ابوي
- لا لتوكف بوجه ابوك بس الصراحة اني ما مستعدة اعيش ويا واحد مثلك ، لا احبك ولا احترمك وهاي حقيقة ما اكدر انكرها ولا اكدر اجبر نفسي عليها لو مهما حاولت .. اسلوبك هذا ديخليني تلعب روحي منك مو احبك .
- لإن انت وحدة ما مرباية وما عندج كل احترام .
- وشعندك تاخذ وحدة ما عدها تربية
- سدي الموضوع نانة .. وخلي العرس يمشي على خير .
- ماكو عرس حتى يمشي على خير ، البيناتنا انتهى .
حجيتها وخابرت مأمون ابجي ، فتحت الخط اني انشغ حجه : لج ها متكليلي شبيج ، شصاير .
- اذا الي ذرة قدر بكلبك تعال
- شبيج نانة
- تعاااال والله نفسيتي صفر ، كافي ما اريد
- جايج
لبست بدون ما اكل لاهلي
طلعت بالطرمة وعيوني تجري
شوية وصفت سيارة مأمون بالباب ، طب للبيت لكاني واكفة وعيوني مورمة من البجي : لج بابا شبيج تخبلتي انت ، تعاي شو تعاي
- مامون عليك الله اوكف وياي
- وياج والله بس كولي التريدينه يجرالج وغصبا ما على الكل .
- والله ما احبه يا بشر كلت اتعود واساير بس ما اريد اتزوجه .. ما اريد اتزووووج
- شو تعاي خل نطلع
اخذني وصعدني بسيارته .. خلصت الطريق كله ابجي واكله : ما اريد اتزوج والله ما اريد .
- بس فهميني مشكلتج شنو
- اهله ميردوني ، ميحترموني ..
اني احبه .. شخصياته اني وياه ممتوالمه
تفكيري وتفكيره ممتناسب .. ما اريد فلوس ولا اريد بيت ، ارضى اعيش بكوخ بس ويا رجال احبه واحترمه .. وهالرجال مو شاهين .. ما اريده .
- الحب مو غصب والزواج مو غرفة وكاونتر تنصبه اذا مو تفاهم ومحبة واقتناع الحياة جحيم تصير ..
- وشلون افهم اهلي هالحجي
الشغلات الجبيرة بعيني يصتصغرونها وكله يطلعوني بطرانة من احجي من اكلهم ما احبه يكلولي : يا حب بطرانة انتي ..
من اكلهم ما عنده كلمه .. يكلولي بطرانة انت
من اكلهم اهله مستصغريني ويشوفوني وحدة معيدية .. يكلولي بطرانة انت
اهم شي عدهم رجال متمكن وعنده بيت كلشي مو مهم غيرها ، بس والله اني ميهمني لا الفلوس ولا البيت كل الاريده .. شخص مقتنعه بيه وشاهين ما مقتنعة .
- ما دام ما مقتنعة اعبري النهر ماطوله ضيك
- واهلي ؟
- اني اهلج واليريد يفك حلكه خلي يفك حلكه وياي ، ماطول ما تريدينه .. هاي قناعتج .. ليش بعد تتورطين ويومين وتطلكين خل يكولون مفسوخة خطبتها ولا رجال مطلكها وينحسب عليج زواج .
من كام يحجي هيج
ارتاحيت راحة احس هم كلش جبير واحد شاله عني .
رجعنا للبيت كاله : مؤيد خابر على خالك كله زواج ماكو .
انكلب البيت كله صياح وشلون وما يصير
اني سكتت نص حجاية ما فتحت حلكي ، لعب بالحجي لعب كال الهم : الزواج مو كوة والخطبة انخلت علمود يجربون ذولة يرهمون يصيرون زوجين لو لا .. يا اخي ما رهمو مو فد سالفة البنية دتصيح وتستغيث ما تريده .. لا مقتنعه بيه لا مقتنعه باهله لا مقتنعه ببيت لا باثاث لا بكلي .. وتصيح الغوث بس خلصوني
وليش ننكر صارلنا اسابيع حقها كالبينه ضدها .. بس كل حق ما الهم واهله معاندين وياها اليوم عدنا وهيج سووا بيها بعد يومين شلون .. وهو مضعضع ماله حجاية على اهله .
لو شاهين خاطب بتي نرجس وروح اكبر ابني لو مو يحطلها بيت لو يوزنها ذهب ما ارضى بيه هيج زلمة ابن امه ما يصون مره ... وزواج ماكو ترضون ما ترضون .
اندارلي كالي : جيبي الجهال واليوم تباتين عدنا وعوفي اهلج يقتنعون ما يقتنعون .. الحايط يندلونه .
ظلن خواتي يصيحن
وامي ما راضية .. بس مؤيد .. ايد الكلام وكال الهم : اذا هي ما رايدته مو كوة هي بعد شنسوي
وخواتي يكلله : والصرف هذا و الذهب والنيشان والناس العزمناها .
عفتهم وطلعت لبيت هدوة .. دخلت بغرفة علي
كعدت يمي هدوة وهي تحاول تقنعني ، مامون راح اشترى حلويات وبيبسي يحاول شوي يرفه عني لإن هلكد بجيت .
طب من لكه هدوة تقنعني كال الها : يمه من رخصتج .. الزواج مو ثوب وتقنعينها تلبسه .. هاي عشرة عمر ما طولها ما مستعدة تعيش وياه لحد يجبرها .
عاد سكتت وانطاني الحلويات ومسح على راسي : اكلي واتهني ولا تشيلين هم واني موجود .
تنهدت تنهيدة كلش قوية على حجليته هاي
الراحة الحسيتها مو طبيعية مثل الوحدة الجانت ضايعة بظلام وما تدري شلون تطلع منه بوسط شعور الخوف والضياع .. وفجأ طلعت لبستان حيل جبير وضواه ضرب عيونها ... خلصت من الهموم ومن الحرب النفسية العايشتها ويا روحي واني اقنع نفسي بيه وما قانعة .
خابر مؤيد وانطاهم خبر
واجا خالي تعارك ويا اهلي .. تلعبون علينا يومية لغينا وردينا شنو بتكم شايفتنا لعبة عدها .
طالعله سرحان كاله : من رخصتك ابو حسين بس الصوج بيكم مو بالبنية .. اثنين اليطب بينهم ثالث يخربون ومحد خرب عرس ابنك غيركم ، شتخسرون لو مخلينه هو ومرته يختارون ويقررون كلشي ومحبة توافكله اعلى رايه ويتزوج وهو منسعد وهي منسعده .. انتم دخلتوا روحكم بكلشي لحد ما خليتوا البت تجزع ، لا تلومونها وانتم اهل الصوج .
ظال عمي يترادد ويا سرحان
طلع مأمون حاجي وكايله : عمي البنية عيونها كل عين هالكبرها وتصيح خلصوني ، ابنكم الا ما عنده كرامة حتى يلزك روحه .. كافي فضوها .
شاهين متخبل شلون مامون مدخل
كايم وغالط على مأمون ومتلازم وياه وكابة بيناتهم .. سرحان جر مأمون من شاهين وكاله : اخذ ابنك لؤي وكله لا يكرب ولدي ، تراه اليكرب ولدي ما يامن شري ، اخذ ابنك وامش .
جر لؤي شاهين وطلعوا من المنطقة
واني رجعت للبيت مرتاحة همي وانزاح رغم كل الهوسة الصارت من احس خلصت بعد ما اتزوج بودي اطير من الفرحة .
لميت هداياه والذهب وانطيتهن لامي كلت الها : وديهن
كال مؤيد " الخطبة اذا انفسخت فالج نص المهر ، ليش دا ترجعين الهم
كتله : لا اريد مهر ولا اريد فلوس خلوني بس فكيت روحي وارتاحيت ، خر** بابو الفلوس اخذوهن كلشي ما اريد
نهاد تغمني : وجه الفكر خليج بلكت يجيج واحد اضيم مني هيج من تنسكمين يلا ترضين .
- ما اريد زواج ... ما اريد اني وحدة احادية الخلية ما اصلح للتزاوج عوفوووني .
رحت اسوي كاستر وفرحانة حيل فرحانة
لان خلصت هوسة العرس والتحضيرات راح اظل حرة ، وكفت بالمطبخ اخوط بالكاستر واغني : اطبطب وادلع ، يي يؤلي انا اتغيرت عليه .
طبت امي لكتني اتمايل واغني واخوط .. هزت ايدها : شكول الله يكتبلج البيه الخير .
رحت بستها : ان شالله يا عسل انت .
ضحكت ومشت عني ..
التليفون يمي اتصل شاهين .. دست الدكمة الحمرة ولغيته رد اتصل مرة واثنين وعشرة .. رد دز رسالة : اني بالباب بس رايد احجي وياج كلمة اخيرة ، عليج الله بس نحجي .
كلت دخل اطلع .. اكله انتهينا وامشي
هسه عليمن اتخفى منه .. طلعت كض بدية يتوسل بس حتى اطلع وياه كتله ما اكدر .. كام يجرجر بيه ، واني بطرك الثوب والحجاب .
صعدت كلت بس خل يفر شوية يحجي العنده ويرجعني .. شو هذا اخذ السيارة وطر الدرب واطلع من المدينة .. كتله : انت وين ماخذني ..
- بس نحجي
- شاهين انتهينا كافي اقتنع ، يعني قسمة هي واحنا ما بينا قسمه ، رجعني كتلك
- كام يمشي .. التليفون بيدي
دزيت رسالة لمأمون ( شاهين ما ادري وين ماخذني)
جر التليفون .. اندزت الرسالة المأمون .. من شاف اني دزيت المامون تخبل
كام يصيح ويكفر ويبجي ويغلط
حتى اني لمت روحي ليش راسلت مامون لو دازتها لمؤيد اخوي ..
وصلني للبيت المقرر نتزوج بيه
كال : انزلي
يحجي والدموع بعينه .
استخطيته بس اكو خوفة بكلبي ، كتله : شاهين كافي والله ما تسوى تسوي هيج ، يعني عوفني وشوف اللي اتناسبك ، الف وحدة تتمناك .
جر ايدي وهو يكلي: ومنو اليناسبج انت ؟
مامون مووو ..
هو الفسخ الزواج
هو القنعج حتى تعوفيني وتلتفتين اله مو
- هو شعليه
- شلون شعليه هذا رايد بس يخليج خدامه لجهاله ويخاف يخسر هالخدمه ، هاللعب بعقلج
- مامون ما اله علاقة ، اني الي رفضت كلشي
- ليش
- لإن ما اريد اتزوج
نزع الحزام : تعوفيني على مود مأمون
- شاهين لا تتخبل ورجعني ، عيب هالتصرفات مهما يكن انت ابن خالي .
ضربني بالحزام على وجهي .. كمت اصرخ واكله : تخبلت .. شبيك ، حيوووووان وخر مني .
- لج اني الحيووووان ، اني ما ترضين بييييه
انهد عليه ضرب بالحزام كمت اصرخ وابجي منه ... اجا كضني من شعري يسحل بيه يصعدني فوك للغرفة ويصيح : شايفة هالبيت وهالاثاث وكلشي مجمعة فلس على فلس حتى احظى بيج ونتزوج وتعوفينيييييي .
- ما اريدك كووووة ، حي ان مثلك ماااا اريده
رد يضربني بالحزام وتلازم وياي يريد يجر بثوبي كمت اصرخ وادفع بيه وهو يحاول يشك بثوبي من يم صدري .. ذبيت روحي للكاع وميت نفسي وهو يجر بيه .
ما اكدرله .. احس كل قوتي بادت واني الم بروحي وهو يجرني .. امد ايدي بس اريد شي اكضه ، انفتحت خانة بيها احذية انجر بيدي حذاء الكعب مالت بسمار ، بساع ضربته بوجه وكمت صرخ هو وكض ثوبي ، انديت عليه بالحذاء اضربه على راسه .. فلت ثوبي من عنده ركضت من عنده نزلت اركض وهو وراي ، طبيت للحمام كبل لا يوصل قفلت الباب كام يصيح : افتحي لا اكسر الباب والله .
- ما افتح حيوان جلب نذذذذل ، الله يخلصني منك ... يا نااااااااس ، ياااااا عااااااااالم
كام يضرب ع الباب : خرب صوتج لا والله ادفر الباب واكسره وافوتج ، اطلعي
- ما اطلع
كام يضرب بالباب ويحاول يفتحه كمت اصرخ بعلو صوتي .. من اصرخ يعوف الباب من صريخي يخاف لا الجيران يجون على صياحي .. وهو يصيح : اطلعي ما اسويلج شي ، طلعي .
- خابر على اهلي ، حيوووووان ، يلااااا .
ظلينا هو يصيح طلعي واني اصيح خابر اهلي
اندكت الباب وفات ابوه واخوه اسمعهم يتعاركون وياه ويكلوله : تخبلت انت اهلها جايين بالطريق خابرونه انت ماخذها ، اشرد بسرعة احنه راح نرجعها .
هو معاند ظال واكف ويبجي ويكله : اريدها ما اعوفها اريدها .
- ولك ما تريدك كوه عي ، عوفها امشيييي
ظل يبجي بين ادين ابوه وحسين اخوه اجا دك ع الباب كال : طلعي
من شافوني اديه ووجهي بيها اثار ضرب تخبلوا ، تعاركوا وياه شلون كاتلني هيج ، واني ابجي وامسح بدموعي .
اجا مؤيد ومأمون خابروا على حسين كالوله : احنا بالمنطقة دلينا البيت .
كالة : احنا جايبينها وجايين بالطريق
مامون كاله : البنية لو متأذاية بشعره الا بيوتكم اهجمها .
وحسين يرده : السوته بتكم مو قليل عافته كبل العرس ب٥ ايام بعد ما رتب واثث كلشي .
مامون راده : والله من دنعل ابوكم لابو اثاثكم الخابصينا بيه .. ولد خير ، لو ولد فكر جا شسويتو .
تعارك حسين ومامون بالتليفون سحبني خالي وصعدني بسيارته ورجعني للبيت ، ذبني اباب البيت وكام يتعذر من امي ومشوها وميخالف والولد متأذي .
لما اجا مامون ومؤيد شافوني ..تخبلوا
علي جان موجود طلعوا تلاثتهم هدوا على بيت خالي من طالع شاهين كاضينه كتلة غسل ولبس .
ونهوا وياه كلشي
وشمروا الهدايا والذهب كطف بالكاع عليهم ومأمون يكللهم : هذا خيركم الخبصتونا بيه ، اخذوه .. تفو على هالخير الاف مرة منيتو بيه جن بس انتم مشترين ذهب وبيت ومكعدين مرة ذبيتوها مذلة ولد الاوادم .
طلعوا ورجعوا كالو هم زين خلصت منهم
رغم الصار بس المهم خلصت من شاهين ..
مرت الأيام بهدوء ..
عباس طلع من المستشفى وامي نومته بغرفتها اداريه
ومرته ما الها اثر ، والاتعدى عليه ما شافوه بعد .
الاء لهساعة زعلانة ويا علاء وما تريدة كشت روحها منه يوم الرضى بمرته وسامحها على طيحة ابن الاء وحركة بيتها .. جزة كلبها من عنده .
وسن رفعت قضية اطالب بيها بابنها وبالطلاق ، بس كاظم ما اله اثر وكا حضر كل الجلسات .. وقضيتها صعبت حيل .. بس كدرت تكسب بس قضية الطلاق .
ابنها ما اله خبر .
مأمون من نانة فسحت خطوبتها
كأنه جان منتظر زلة من مروة علمود ينهي الخطبة وياها .. كالتله اني معزومة ويا صديقاتي بعيد ميلاد
- وين العيد ميلاد
- بالجادرية
- بيش الساعة
- ٩
- وبالجادرية تروحين وحدج ب٩ ؟ ممنوع
- بس اني انطيت حجاية لصديقتي وكلت الها اجي
- ممنوع كتلج
- زين تعال انت اخذني
- حفلة بنات ماخذج شنو حماية هليها وثاني يوم روحي انت وامج لبيتهم وانطيها هدية
بقت تحاول تقنعه ما رضى .. سد الموضوع وهو يعرف ابالها ما انسد .. كاللها : ما تروحين
- ماشي هاهيه
سكت وسد التليفون بالليل .. خابرها ما ردت خابر على امها كالتله : نايمة
ما صدك .. لاف السيارة وطلع للبيت .. ما دك الباب ، بس باوع .. سيارة مروة ما موجودة ، طب ابيته وكعد ع الدرج .. يخابر يخابر .. حركها حرك بالتليفونات .. ردت كال الها : ليش ما تريدن
- اسفة والنبي نايمة ، ما ادري ، كول حبيبي تريد شي .
- ارجعي النومتج ما طول نايمة .. عبالي كاعدة ومتجاهلة الاتصال
- لا حبيبي شلون اتجاهلك ، عمري انت .
سد الخط وكام بعد سيارته من البيت ورجع طب البيته وكعد ينتظرها ب١١ ونص صفت سيارتها .. نزلت تفتح باب البيت .. وهو طلع من بيته مبتسم : هلووو ، شلون جانت الحفلة
بسمرت كباله من الخوف جمدت
ظل على ابتسامته : دخلي السيارة خلي نحجي .
- مأمون والله العظيم
عافها واندار للسيارة صعدها هو ودخلها للبيت هي ركضت جوا تبجي ، طلعت امها ، صف السيارة وكاللها : هذا سويج السيارة ومشكورة ع المغافل والجذبة عمة ، خوش تغطيلها وادوريلها جذب حتى تستمر بغلطها
- لا بالله ابو الاكبر ، صدقني لما خابرت من حيرتي خفت اكولك بلا شعور طلعت مني كلمة نايمة ومكدرت اتارجع بيها ..
- هاي مال البلا شعور عوفيها خالة ، اني بتج من الاول ما هاويها ، خو اجت منكم .. اني صالي ساعتين مسايركم وكاهد بهالحر منتظرها حتى اثبت هالجذبة عليكم .. وسقط حقكم يمي .
مروة : والله العظيم مكدرت ما اروح اتفشل ويا صديقاتي وهم عازميني ، مأمون اسفة والله مو قصدي وروح بابا ما اعيدها
- وروح بابا التحلفين بيه التسوي سوايتج مرة تسويها الف مرة مو اني الاتغافل ويتمشى الماي من حدر رجلي ، ابن ابوي والكطها وهي طايرة ، من لما سايرنيني وكلتي هاهيه عرفتج تكشين بس سايرتج لهنا وحدي .
- حدك شنو يعني اني اغفرلك كل اغلاطك وانت على غلط واحد توكف وياي
- ياهو الكايلج اغفري ، متوسلج اني كترجيج من يمج تغفرين لا تمنين علي بيهن ما طالب منج مغفرة ومو اني الاطلب المغفرة من احد .. نترجاها من الله مو عبيدة .
ظلت امها تترجاه وابني وابو الاكبر وبس هالمرة وعديها وهو ركب راسه مثل المتاني الزلة وطاحت بيده .
وكفتله وهي تكله : ليش تصر خو كول نانة فسخت خطوبتها وما ترضى الا تعوفني .. ورايدلك حجة
- مو جذب نانة بنية ربات اهلنا واعرفها ورابية على اجتافي وجهالي يحبونها وهي تحبني وتناسبني ، والصراحة احنا ما نتناسب .. اني زلمة شرقي تريدين تكولين عني كتخلف كولي ، تريدين تكولين ريفي كولي .. ما يعجبني مرة تركب سيترة وكل ما جالها طرت الشارع ، ما يعجبني المرة التلبس قميص كصير ويا البطرون .. وانت كبالي طويل ووراي هاج لبسج استحي اباوعله .. عليمن افضلج عليها .. اني اريدلي مرة بالبيت مو جنها زلمة حالها حالي تلبس البنطرون تكض الشارع ، رايد مرة امنها على جهالي بيت ، والصدك انت مالج امان
ردته امها : يعني هيج صرت ابو الاكبر البنية صغيرة وتحبك وتغيرت هواية لاجلك ، ميصير هشكل .
- عذريني لهنا وحدي .. بتج اني ما اريدنها ، ياريت تفرغون البيت باقرب وقت حتى نفض كلشي
- بيت شنو تريدني اعوف بيتي مأمون
- اني اشتريته منج وانت وفيتي حك الورثة واشتريتيلج عقار وماجرته ، طلعي المؤجر وعيشي بيه يا ام مروة كافي كل هالسنين واكفلكم اني وما اجاني من وراكم غير وجع الراس ، هسه ما اريدن مجازات بس فكونا .
- أجره منك وابقى اني وبنتي
- لا ما اريد بعد شي يربطنا ام مروة لهنا وبس فضيها وياي تعبتوني هواي .
مروة : مامون والله ما اعيدها ، والقران بس هالمرة موتني بعد لو عدتها ، عليك الله
- هذا الاسبوع يتفرغ البيت ام مروة
ظلت تتوسل بيه مروة وتبجي ..
عافها وطلع ، خبصت الدنيا صريخ وبجي ..
طلع من البيت
فر السيارة ونزل ع المحل اشترى كلشي يحبوه جهالة ونانة ، شال التليفون وخابرها .. ردت عليه : ها مامون
- الجهال كاعدين لو نايمين
- لا نامو من زمان .. ليش
- اطلعي مشتريلكم حلويات ، بس كليلي بيتنجان اذا تكدرين كلش مشتهي .
اي ادلل من عيوني
كمت بسرعة نزلت جوا الكل نايم فتحت الثلاجة وطلعت بيتنجان اكصصه ، طب هو فتحتله باب المطبخ .. دخل وحط الحلويات ع الكاونتر واني اكصص ، كام يساعدني شغل النار جوا الطاوة وحط زيت ، حطيت البيتنجان وهو كاض الخاشوكة ويكلب بيه .. جريت علاكة الحلويات طلعت ككو ، جان يكول : نانة
- ها
- شحسيتي من فسختي خطبتج ويا شاهين وخلصتي
- رغم الكتلة المعدلة الاكلته ، بس اييييه تحس هم وانزاح من صدرك .. كلش ارتاحيت
احجي ومنتجية ع الكاونتر اكل بالككو .
جان يكولي : نفس الاحساس
عقدت حاجبي : شلون يعني ؟
- فسخت الخطبة ويا مروة واحس جبل هم تزلزل وانزاح عن صدري .
تعدلت من مكاني : عليك الله فسخت
- اي والله
- ليش
- ما تعجبني لا هي ولا اطباعها ولا اسلوبها ، احسها محيلة ومو كفو احطها مرة ، كضيتها بزلتها وسرحتها .
- هااا
من حجاها احس كلبي طبل بصدري مو نبض عادي .. حجه : ماعون
سرحت بافكاري بعيد ، ضربني راشدي بضحك: مااااعون ولج
- هااا اي
دنكت بسرعة اطلع ماعون اله .. وانطيته اله .. كلاهن كلهن وهو يكلي: كليلي اخدم روحك بروحك بعد عليمن طالب منج
ضحكت وكفت حضرتله الصينية
بس الفرحة الصارت بكلبي ما صايرتلي كبل ..
حطيتله الصينية وكعد يتعشى .. لاحظ اني فرحت هواي .. ظل يباوعلي بس ما حجه كلشي .
ظل ياكل خلص اكله وكال : يلا سدي الباب وراي ، تصبحين على خير .
قفلت الباب وبلا شعور اغني : بسبس بسبس .. بسبس ميووو كلب كلب وين وين غايب عليه يوميين .
طلع مؤيد : هاي شبيييج تخبلتي
ضحكت وطبيت للمطبخ دخل وهو يكول : شتعشى مامون
- بيتنجان
شاف الحلويات جر من عدهن وكال : راح اخذهن لعباس خطية خل ياكل .
- اخذهن الجهال الصبح عود يشترون .
اخذهن وراح واني خلصت الليل كله بافكاري ..
ما اريد ارجع لنفس النقطة .. بس مو بالكيف ، افكاري وحدها تسرح .
ثاني يوم مامون بلغ سرحان
وسرحان كلش فرح بهالقرار .. ومروة ما رضت ظلت تبجي وتتوسله ..
واسبوع وما راضية تفسخ ..
وبس تتوسل بيه وتبجي ليل ونهار .. وهو مطنش
من بعد الاسبوع اجاه اتصال .. رد : الو
اجا صوت بنية : الو
مامون : منو ؟
- تذكر صور البنية الدزتهن الك مروة حتى تهدد بيهن قاسم ..
- يا صور
- صور بملابس مشلحه وفيديوهات ركص
-، اي اتذكرتهن ليش
- اني اللي بالصور والفيديوهات وقاسم ابويه
تنهد : وشرايدة
- الرايدة اكلك .. مروة مو بريئة مثل ما انت متخيل هي حية ولعبت على الكل .. اول شي هي الجانت تواعد اخوي الله يرحمه وتغوره عود انت تحبها ورايدها .. واساسا هي ما جانت حامل بتزعمتي جذبت عليه وخلتني اوصل حجاية لابوي .. خوالها اثبتوا ان هي مو حامل بس هالسالفة هي وامها مشنها عليك حتى تتزوجها وتخليهن عايشات بالبيت بلاش وهن اسسن عقار براسك ..
- خلصتي ؟
- ميهمك الكلته
- لو وياها جا همني بس ما يهمني بكد ما مضايقني اتصالج بصراحة اني ما حاب اسمع صوت واحد منكم
- اي لعد خل اكولك اخر شي وامشي .. مروة عدها فيديو ضدك .. شنو الفيديو اني ما اعرف بس الاعرفه من بت عمتي كالت ميكدر يعوفها ولو عافته تشهره شهيرة .
- خابريها كليلها فدوة خل تسترني
اسمعي لعب الزعاطيط البناتجن لا ادخلني بيه ، ولي ولا تخابرين بعد
سد التليفون منها وما اهتم الاتصالها ..
بس عرف الحقيقة ان مروة اساسا ما جانت حامل ولعبت كل هاللعب بس حتى تخليه يتزوجها .
خابر على امها كال الها : مع الاسف ، اني سنين واكف وياج يا ام مروة وكلشي تحملت واكول خوش مرة وتستاهل بس طلعتي ما تستاهلين ، تلعبين عليه انت وبنتج
ظلت تحجي وتتعذر وتحلف ولا والله وماكو هيج ومنين سمعت وماكو هيج ومنو كلك .. نهاها وياها وكال الها : خصم الحجي اني بيتج عارضه للبيت .. يشترونه مني وغصب اطلعين منه خاف استحي وظال بكصتي مستحى واكول عيب اجرجر نسوان ، لهنا وانتهت خيوريتي وياكم .
ختمها وياها وقفل الخط ..
وراح يحجي لنانة على كلشي دار وصار ويتناقش وياها .
ثاني يوم وصل قرص DVD وياه كتابة : لو فكر ابنك يعوفني ، اوصل هالفيديو لمركز الشرطة وولدك اثنينهم يتورطون .. مروان ومامون .
اجا للبيت كال الهم : شغلوا هالقرص خل اشوفن شنهو مصيبة مروان ومأمون التهددني بيها هالساقطة هاي .
مامون ما جان بالبيت بس علي ومروان .. فتحو القرص طلع مقطع لما مأمون يكتل بابن قاسم .. ومروان واكف يباوعله لحد ما مات ... وتصوير لاخ شلون مروان يصعد بالجثة بسيارته وطلع بيها .
ضحك مروان : خرب بيومي شكد طالع حلو .. مو حقهن النسوان كاتلات روحهن عليه ..
باع العضلة شلون جانت باوع
والله سوتلي واهس ارجع للحديد
سرحان : وهذا الهامك .. الفيديو هذا لو وصل لمركز الشرطة يسجنونكم .
مروان : هيهييهيهيييييي ولج نويسة حضري الصفرطاس اخيج راح يطب سجن
ضحكت نوسة وعلي يكله : عود ليش اني مو وياكم ، شنو انتم ما حاسبيني بالحساب
- خب وكتها جنت طام روحك بكبور النجف شنحسب انت
اي اي عود هم اكعد وابجي شلون ما طالع بالفيديو ويانا .. نريد ننسجن وما نريدك كوة هي .
هز ايده سرحان وكاله : شكول طيح الله حظك
- حجي من تكولها بعلي ماي بارد يتسرسح على افادي
غماه وطلع ..خابر على خوال مروة كال الهم : البت سترناها وصرنا خيرين واجينا وياكم بس مال بت امس صارت وتهددني بعلي تشوفون مني الماويخطر بخيالكم ، كضو بتكم لا تخلونا طشار تفكنا يلوحكم .
بسرعة اتصلوا على امها كالولها : الشيخ هددنا بتج شمسوية
واجو من ديالى لعبوا بيها جولة وام مروة خابرت تتعذرلهم منه ، وهم اجو لمضيفه يتعذرون منه .
بس ما جازت ودت الفيديو لعمامها .. نصبوا عزا من شافوا مامون واخوه كتلوا ابنهم لحد الموت ..
اخذ الفيديو وودوه لمركز الشرطة ..
بسرعة اجت الشرطة اعتقلت مروان .. بس مامون ما جان موجود ..لحكه سرحان لمركز الشرطة وكال الهم : اللي بالفيديو زلمة حرك بيت ابني .. وراحو ضحيته مرة وطفل من عايلة ابني .. واحنا بالعشيرة هدرنا دمة .. وكتلناه .
مامون بسرعة خابر على عمة تزناد كاله عمي .. هيج وهي القضية تعال ..
وسرحان خابر على بيت قاسم .. كال الهم : احنا مفاصلين وهادرين دمة اعلى يا اساس ترفعون قضية على رولدي واطالبون بدم كتال عيالنا .
كالوله : حق ابنه ناخذه من عيونكم
كاله : اذا تظن الك حك يمنا ومفكر تاخذه من عدنا جا حضر روحك لطلابة ما تخلص من عدنا .. حضر عمامك .
خابر على عمامهم .. كالوله : الزلمة مهدور دمة واحنا متبرين من عدنا وقاسم اذا طالب بدم ابنه يطلع من عدنا وانت وياه والياخذ الحك .
قاسم شاف عمامة تبروا كنوا وسرحان نقطة ضعفه ولده لو تأذوا يهجم الدنيا .. كام قاسم وتنازل بالقضية ..
بس ابن قاسم يهدد ويتوعد لمأمون .
وزناد بيت الدعوة بمركز الشرطة ومحاها .. وطاحت القضية عن ولد سرحان وطلع مروان سباهم سباية يصيح : سرحاااان اذبحلي طلي سرحاااان نمت يوم بالسجن .. اني وكل حلاتي تواضعت ونمت بالسجن لخاطرك .. اذبحلي عجل لا خروف لا خروف .
وصدك سرحان ذبح ذبيحة من جفى شر هالتهديد عن ولده ..
بس جزات هالموقف شالوا غراض ام مروة ومروة ذبوهن بالشارع وفرغوا البيت تخبلت هي على غراضها وبيتها كامت تبجي وتتوسل الشيخ كاللها ؛ حمدي ربج كضت على خير .. ما ادك بحايط نسوان لا جا لعبت بحال بتج الوكحة لعب بس بختها مرة واني ما اجيسن مرة .. اتجفي شري وشر ولدي وشوفنا كفاجن .
عافت البيت وفكت منه
ومامون ما تقرب لمروة ولا عاتبها ولا كال الها ليش سويتي هجي .. اعتبرها شي ما يستحق الكلام .. وانتهت .
بعد مدة .. باع البيت واشترى قطعة كاع مساحة ٤٠٠ متر بزيونة .. ذب العندة و الما عنده واشتراها ... وقرر يبنيها سحب قرض وراد يبيع سيارته ..سرحان ما رضى كاله : شكد تحتاج اني اطيك .. واعتبره دين تردلياه من يصير عدك .
وبالفعل بفلوس القرض بلش يبني البيت .. ومن يحتاج يطلب من ابوه ..
ونانة التهت بدراستها وايست من مأمون لإن لا املها ولا بادلها بمشاعر .. ملتهي يبني ابيته .
ظل فوك السنة ونص يبني ببيته ..
خلصاه وكعد يأثثه .. لحد ما سواه قصر بيت مثل القصر ينصفن بجماله ..
وكت الخلصه
نانة جانت كلية مرحلة رابعة بدايتها .
اجا وانطا مفاتيح بيته بيد ابوه وكاله : هسه جايك ومقرر قرار وهذا مفاتيح بيتي .
- شنو القرار
- اني رايد اخطب نانة .. صحيح من زمان انتم اطلبون مني هالامر واني اتجاهله بس ردت اكون نفسي واسس بيت مريح لعائلتي وارجع جو العائلة الفقدته من سنين ، ما اريد ينقصهم اي شي .. بنتي جبيرة بعد وابني كبر رايد اخليهم كل واحد غرفته وانطيهم خصوصيتهم واعوضهم عن المر علينا بكل هالسنوات ..
- هذا قرارك ابني وانت اعرف باختيارك والشي اليريح يريح افادي ، ابو اني غايتي ومناي بهالدنيا راحتكم .. نتوكل على الله ونخطبها ؟
- توكل
انطى خبر لبيت حاكم وكاللهم اليوم عشانا يمكم ..
مشت هدوة و نوسة و مروان وسجاد ومامون ولمة .. سوا عشى على روح الموتى وتعشوا .. خلصوا سرحان فتح الموضوع وحجه ويا مؤيد و عباس وامها كال الهم : احنا اهل ان شاءالله ونظل اهل ، واني اليوم جاي اطلب بتنا مو بتكم عبن هي ربت عدن .. رايدها لمأمون .
مؤيد انطاه الموافقة بلا ما يرجع لنانة ولا حتى لامه كاله : شيخ ماكو احسن من مأمون لاختي ، وهذا احسن قرار لجهال اختنا المرحومة ما تجي على راسهم مرت اب غريبة .. واحسن منكم ما نلكى .
نانة جانت كاعدة وما عدها اي علم بالخبر
من حجوا وهم كاعدين وجها صار طماطة .. اندارلها سرحان ومأمون كاعد .. كاللها : شرايج يبنيتي ، مقتنعة ، الراي وشور الج .
كامت بسرعة وطلعت وايمان كالتله : بيها الخير شيخ
هلهلت نوسة : كللوووووووووووووووش شايف خير ومستاهلها شايف ومستاهلها .
ابتسم مأمون .. ونرجس كامت تكمز وتصيح : هيييييي عرس بابا هيل وطش بالولاية
كلهم تضاحكوا بصوت عالي على دكتها وكال الها سرحان : ان شالله يطش ..
مروان : افا .. مو بالحيف اخلي مامون يتزوج لوحدة ، بوية اليوم تخطبلي
مروان : اهيييييي اتزوجت وياي مرة وفكرتني فارك ما اريد
- وعلي رجلي على رجلك ما تتزوج بدوني حراااام
سرحان : وسن بنيتي وهاي اخطبنها الك مني ووعد ازوجنكم بيوم واحد .
مامون : لا بوية عليك الله ، والله ما اريد وياه
كاله : ابد حرام بالحرم الا اثنينكم
مروان : عفيييية بسرحااااان اطيني حبة بروح ردحة
كاملة وحباه والكل يضحك كام يهز : وعرس الزين هيل وطش بالولاية .
مامون : خب دروح زوج اني واعرس وياك
مروان : ابوي واطاني مرة والشامت يرجع ليورا ... شد شد .... هلا هلا هلا
وكامت الجهال تركص وياه
مامون بداع الشقى رداه .. بس فرح لإن مروان راح يتزوج ويستقر ، وطلب من ابوه ينطي بيت حتى يعيش هو ومرته وحدهم لإن نور بنته جبيرة بعد مو مال تعيش ابيت جدها
وسرحان كاله : اطلع المؤجر من البيت اللي بالحبيبية وانطي لمروان .
وبالفعل طلع المؤجر وانطى لبيت لمروان .. ومروان رمم البيت وعدله ..
ونانة الفرحة ما واسعتها .. طايرة فوك
جانوا متفقين على ما مروان يكمل البيت الزواج بنص السنة حتى الجهال كلهم عطلة وحتى نانة .. خاطر يتزوجون ويفرحون بلا ما يشيلون هم المدرسة للجهال .
مأمون جان حاير وين يسوي العرس .. قاعة لو بيت
لإن بيت الورفلي زغير .. وناسهم هواي وما يريد يسويه ابيت ابوه الاول احترام لهدوة خاف تتضايق .
راد بقاعة
مروان وافق .. ونانة وافقت ووسن ما ادخلت بهالتفاصيل .. بس سرحان اعترض كال لا بوية شني عرس بقاعة هاذ مو ثوبنا ببيتنا نحتفل ويا عويلنا
مامون : بس بوية البيت ما يكفي وادمنا هواي
- عليش ما تخلوني اقتراح وبكيفكم بعد
- شنو ؟
- عليش ما تخلوني افتح قصر جلوب ونسوي العرس بيه
مامون : فكرة عظيم ، اني اول المؤيدين
مروان : وعرسي يصير بقصر جلوب ... شدددددد طبعا موافق
سرحان هاهيه : اني راح اخليهم يغسلونه ويفرشونا ونسوي العرس بيه ونعزم الوادم واليودنا يجينا.
دز نوسة وبناته وبنات اخوه وياسر كدامه لقصر جلوب ، استضافهم هناك زناد وضيفهم ابيته ودز عائلته يساعدون بغسل القصر .
رجع انفتح القصر و البستان اللي بكفا القصر .. سرحان ما هامل البستان حاط بيه فلح وسنويا يطلع خيرات الله كلها .. وعايشين عليه هواي ناس يسرحون بحلالهم ويدارون البستان .
مامون اخذ نانة والجهال ودخلهم البيت
نرجس وحيدر طاروا من الفرحة من شافوا غرفهم وشلون ابوهم مأثث كل غرفة حسب ما يحبون باللون الوردي و الازرك ..
نانة : دخلت غرفة النوم تركية فخمة حيل تجنن
ظليت عيني شايهة بجمالها واكول : اااالله ، تخبل والله
مأمون : يعني عجبتج
- اي والله تجنن اني احب البيضة ..
- ادري بيج تحبين الابيض .. لهذا اكثر الاثاث وحتى الصبغ .. ابيض .. الكاونتر جان ابيض واسود .. بس جبير حيل مو كأنو مطبخ .. كانما صاله
الديوان حيل واسعه كال الها : خطاري هواي لهذا خليتها واسعة حتى هم تكفي وهم كشخة
- هاي عاشت ايدك
- اكو شي ما عاجبج اغيره
- لا والله كله يجنن
- عال
يبقى بس النيشان .. خليت عند امي مليون ونص تنطي لامج .. تاخذين اللي يعجبج .. و اذا نقصتي بلغيني .
ابتسمت وكلت اله : شكرا .
- ادللي عيوني .. كم نانة عدنا
جانت المحبة بيناتنا قائمة على المودة والاحترام .. مو عشق وغرام وغزل ، ابد ما عنده هيج مشاعر بس يحترمني ويقدرني لابعد الحدود وهاي جانت عندي كافية ما جنت احس محتاجة اكثر من هيج .
رجعت للبيت طايرة من الفرح
بلغتني امي بفلوس النيشان رحت اني وخواتي اشتريت كلشي احبه ومقتنعة بيه ..
حضرن خواتي الجنط وفرحاناتلي ..
ويبوسن بيه ويوصني وينصحني ..
جنت اشوف الفرحة بعيونهن الي .. وحيل فرحانة بوجودهن .
خذن الجنط وراحن صفطنها هن وامي بالبيت اللي بزيونه ورجعن متخبلات ع البيت وعلى تصميمة وبنائه .. باني مامون على ايده
كلتلهن هاااا .. مأمون لو شاهين
ضحكن وكالن : ردنالج الخير والله جان رايدلج الاحسن شمدريج يمكن الله جازاج بشيلتج الهاليتامة ، لو ما انت جهال بطة هيج والله جازاج بيهم .
- الحمد لله رب العالمين عوضني بيهم وبكلشي حلو ..
شدينا جنطنا واجرنا البدلات منا من بغداد وخذيناهن ويانا .. نور بت مروان جانت طايرة من الفرحة لإن ابوها رجع يتزوج امه ونرجس على نفس الفرحة لإن اني وابوها راح نتزوج وكلنا نعيش ببيت واحد .
اجرنا كوستر .. وطلعنا للمساوة على طريق النجف .
هناك قررنا نزور الإم علي ونعقد عقد السيد يمه لإن ما سوينا خطوبة كلنا هي حنة هي عرس .. لإن احنا اصلا بيت واحد منين نخطب وين نروح وسن سرحان مربيها واحنا وبيت سرحان واحد .. ناس طابة بناس .
على كولة سرحان مريكتنا اعلى زياكنا وبنياتنا اعلى كليباتنا ولا طبة الغريب .
كعدوا برا كلهم وكالو : هنا نبقى .. كل واحد يزور على راحته ويرجع .
طب مامون ونانة والجهال لوحدهم
ومروان هو وعائلته
والبنات خواتها كل وحدة هي وجهالها ورجلها ..
هدوة كاعدة وسرحان طب كبل الكل : ها يهدوة جا ما تزورين
- يعذرني ابو الحسن وعلي جدامي ما يعينني
- سهلة ان شاءالله
كعد يمها وتنهد : تشوفين ذاك المجان
- شماله ؟
- بيوم من الايام اجيته فجرية وكلبي مورث واصيح الغوث يا علي .. طبيت لهالمجان ودموعي يسجبن ما اذكر بجيت بكدهن .. كبل لا اجي هالمجان جنت اصيحن بالبستان بكل حسي وانا كاض بسرج خيلي وابوي يسمع حسي ومحد برد افادي غير علي ... برده بحمامة حطت اعلى امتوني
تعرفين هالحمامة ياهي
تبسمت وكالتله : ياهي
- انت الحمامة
عطية الله وعلي .. ولون ظل افادي موجر سنين لجن رديتي وطحتي بعشي .
- تذكر ذيج الايام
- جنها امس
- اي والله جنها امس ، اذكر بهاليوم الاجيت بيه ليجاي تبجي يم علي انا جنت ابجي لوحيدي وزينت راسي واصبحت كرعة خاطر لا احلى بعيون غيرك .
ضحك وحب راسها .
طلعوا الكل .. وكالو خل نمر مرة سريعة على الكبور احنا جايين جايين بعد .. مشوا واول ما نزلوا بكبر خنجر وجمارة اللي انملى من بعدهم بكبر حاكم و كواغد وناس من كرابتهم .
مد سرحان ايده على كبر خنجر وكاله : السلام يا خوي عفا والله كلبي ما نساك ولا الساني مل طرواك .. انت اعلى بالي بكل مسيت غروب وما لي غير الفاتحة اذكرنك بيها وتبلغك سلامي .
وكفت هدوة على كبر امها وابوها واختها جمارة وهي تكلهم : ها يا هلي شلونها علومكم .. بعدكم اعلى المحنة يو التراب غير كلوبكم ... اشتاكت ذني لحسكم وعيوني عطشانة اعلى شوفتكم .. ها يا هلي شلونها علومكم
يمه طاب كلبج بشوفة ابوي
برد افادج بجمارة ..
فرحت عيونج بشوفة اخوي ..
شلونكم غاد بدوني ؟
كعد مأمون على كبر اكبر يقرأ سورة يس .. ختم القراءة كبل لا يجون من الكبور غاد .. حجا ويا بطة وحط ايده على كبرها : مرت ٦ سنين على فركاكم بس كابوسكم ما فاركني حاضرني كل ليلة ، ابريني الذمة رايح اسس عائلة . ماخذت غريبة خذت التصون جهالج كبالي .. ادري فرحانتلنا وادري بكلبج الطيب ما يتمنى غير فرحتنا ... ام الاكبر شما اطول السنين حبج بكلبي زرعة ما تموت .
باس كبرها وشال الماي غسل اكبورهم اجن خواتها يبجن على كبرها ..
مشى سرحان لكبر ابوه وصاح : علي بوية تعال ليجاي اغسل كبر جدك
اجا علي ومروان يباوعون الكبور ويسألون ابوهم هذا منو وهو يعرفهم بالموتى وكف على كبر ملوك كاللها : ها يم ازناد ... تعاينين السميتي غريب شصار ؟
كليلي شفادتج الحيلة بالدنيا وبيش واجهتي ربج .. ما نشدج عني ما كالج شسوالج هالغريب ؟
مأمون : بوية ما باريها الذمة ؟
- لا والله بوية ما باريها .. نتواجه يم الكريم وكلمن ياخذ حكه .
غسل كبورهم .. عرض كدامه صورة جبيرة لسلطان وشاف كبرة .. تبسم بحسرة : كضيت عمرك يا سلطان ادور علو بالدنيا دست الجبير والزغيرة وطغيت حتى اعلى ابنك .. تاليتك يبن ادم بحفرة شما تعلى ... الله يعينك يسلطان اعلى ذنب جسام .
عاين لكبر جسام قرا الفاتحة وكاللهم : اغسلوا كبره واقروله الفاتحة .. خيرة الزلم هاذ .. هاذ المظلوم هاذ.. رجل عمتكم يستاهل .. غسلوه بويه واقروله الفاتحة ..
رد منهم ووكف كدام كبر ابو كاله : ها حجي كواك الله ... ادري ظالة بكلبك جثة اخوي بس ما طحت بيها اعذرني ... الف رحمة اعلى شيخ مطر .
صعدوا السيارات وهو شال ايده ويكللهم : الرحمة اعليكم يهلنا .
وطلعوا من الكبور
توجهوا للسماوة
جان زناد كتانيهم غاد عد القصر .. نظفوه وفرشوه .. عد ما وصل شيخ القصر وازلم جثيرة منتظرته ويا ما نزل نزل شيخ ال جلوب ... هتفت الزلم وهوس : هاااااا اشهد يالجدك ابيض تاريخه .. اشهد يل جدك
ودك رجلهم ودبجوا .. اشهد يالجدك ابيض تاريخة
رد الثاني واصاح : العشرين بجدك تتباهه بيومه .. العشرين بجدك .
ويقصد ثورة العشرين الشاركوا بيها اجداده .
وبقت الزلم تهوس وتدبج لشيخ السلف وهو يعاين لولده واحفاده وناسه .. بعد ما انولد غريب .. الله قدر وخلاه شيخهم وكرمه بكل هالخير والاولاد .
هو رافع ايده ويحييهم ومالي عينه بولده .
دخل للقصر ...
باوع على كتره .. حديقة القصر اول مكان يشوف هدوة بيه عد ما جانت تغني ..
باوع اعلى يسرته ديوان البيت ياما انظلم بهالمجان وياما اخذله حك بزود الله
دخل ازود .. هنا جان كل صبحية عادة الشيخ مطر يتريك ويا عائلته بالقصر وهو يجي متأخر من الشط وابوه يلوم بيه .
ياما اجا ومكسور كلبه ورفض يكعد بهالمجان يتريك .. ويطر هالممر مغتاض لغرفته ويسأل ربه يمتى يطي مراده .
هنا غرفة الشيخ مطر والشيخة ملوك .. ياكا جانت سليمة تكرصه وتندسه وتهدده خاطر لا يوصلها ويكرب حجرة ابوه .
هنا جانت الخاتون كضت ايامها السود ...
هنا جانت امه تكعد
كلهم مشوا وظلت بس ذكرياتهم بهالقصر ...
اندار الهم : غرفة الشيخ مطر لا تكربونها .. وابدوا بتحضيرات العرس .
حضروا كلشي لباجر ..
ومشن يتفقن على صالون زين يمكيج نانة ووسن ..
وعلي وسجاد والولد يشتغلون بتحضيرات عرس مروان ومأمون ..
نصبوا جادر جبير وسووا امسية شعرية وجابو منشد ..وحجزوا بفنادق .. بس جانت الفنادق بعيدة عن البيت كالو كل واحد ياخذ عروسته ويروحلها بسيارته .
عزموا الناس وناسهم اجت من كل صوب
بنات ستار وابنه ولالة واهلها وال شمخي ..
كلهم حضروا العرس وسووها زفة وهوسة شكبرهاااا
والواهليه فوك الروس والجكليت صار سحك ..
مأمون تذكر ذكرى بعز هالفرحة بعرس ابوه عد ما دنك يشيل ياخذ جكليته وبطة خذتها منه وملخاها ... ابتسم ابتسامة حزن بنص عرسه .
نانة جانت بعز فرحاتها
ونور فرحان اكثر من امها ومخبلة امها جيف صارت عروسة ..
وكف سرحان و هو يعاين لولده كل واحد بيهم استقر وارتاح افاده منهم .. اندار لهدوة يكللها : ظل بس عليوي بعد ازوجنه وانام مرتاح
- ان شاءالله يوم السعد هاذ يوم الازوج عليوي
- وابو علي ؟
- اكصن راسه
- هههههههه هالراس ما يحلاله اعلى وسادتج يهدوة
عاين ورد حجه : تذكرين يوم الوعدج بهالمجاج وعد ؟
- شنهو ؟
- تضكرين يوم الكتلج انا وياج للشيب يهدوة .. غزانا الشيب وكلبي اعلى وعده وياج هدوة .....النهاية
☆☆☆☆☆☆☆
الاء : تصالحت ويا علاء .. وعشت حياتي وياه عادية بس جزت اطالبنه واطلب منه خليت كل همي جهالي .. وهو صار يحاول يعدل بيني وبينهم يوم يمي يوم هناك .. انتقل لبغداد شغله .. وغيرها سواها ٥ ايام هنا وخمس ايام يم مرته الثانية ..من بعدين اخذلها شقة ببسمايا وكعد بيها هو وجهالة ورد باع البيت الاني بيه واشترى شقة هم ابسمايا .. وعشنا هناك .. بس ما صارلي جهال منه .. كالو تابعة كالو سحر كالو ما كالو وعجزت اطباء يكلولي ما بيج شي والسادة يكلولي عمل ما ينفك .. عفتها على الله ومنتظرة الفرج من الله لحد هذا اليوم .
نانة : عشت ويا مأمون بالبيت اللي بزيونة .. مرتاحة الحمد لله بس مامون بسبب السكر ما يصير عنده اطفال بعد .. بكد ما احبه .. كلت للناس انو الخلل بيه اخاف الناس تشوفه بالعين الزغيرة لو يلوموه .. خليت اللوم عليه وتحملت سؤال الناس ومغثته .. وهو يستاهل .. صح ما عنده مشاعر ولحد هذا يومي ما كايلي كلمة احبج .. بس محترمني مقدرني ... رحنا عمرة سفرني تركيا ولبنان وعمان لإن راسي وراسة ما عندي جهال عوضني بخير الدنيا .. واني احس الله معوضني بنرجس وحيدر اني ربيتهم واحسهم جهالي صدك مو جهال اختي مكتفية بيهم من الدنيا ..
احس سالفة الحمل وغصة الطفل حوبة شاهين الما كدرت احبه .. صح صارت مشاكل هواية بس هو جان يحبني واني اللي ما جنت مقدرة هالمحبة لإن ما عندي مشاعر وياه .. وظل من بعدي هواي يصيح ( منفوسة عمرج ما ترتاحين ) .
. بس الحمد لله مرتاح وما احس ناقصني شي بالدنيا .. تعينت ومشغولة بروحي لبس ومكياج واعتناء لإن ما عندي طفل .. واداري نرجس وحيدر .. ومامون روحي من الدنيا مداريته بمي عيوني واحمد الله على هالنعمة ..
. صح السكر ماله علاج بس اتمنى معجزة من الله تشافي مأمون .
وسن : تزوجت مروان ورجعت اعيش وياه بس هالمرة ابيت لوحدنا .. عمي انطاه فلوس فتح كوفي .. والكوفي زاد خيرله فتحله فرع ثاني بزيونه بشراكة ويا مامون وخير من الله عايشين .. بس اجذب اذا اكول تاب .. اول فترة وبعدين رجع لسوالفه .. بس كبرنا وجهالنا كبروا بعد مو مال ارد اتعارك وياه وازغره يعيون جهاله .. كمت اصم سمعي وحتى ما توصل تليفونه خاطر لا اشوف وانقهر
بس الحق لله .. ما مقصر علينا بأي شي
كريم وكلبه طيب ويحب جهالة ومداريهم ..وما مخلي شي بنفسنا ، عيبة بس النسوان .
ابنه من ابتهال ذبته عليه واتزوجت
جابه عندي عاش .. وباريته حاله حال جهالي
بس ظلت غصت ابني الفقدته بكلبي .. كاظم من اختفى .. طلع هارب لتركيا ومن تركيا طالع لاوربا .. اكتشفت هالشي بعد سنين .. بعد ما اخذ اقامة بوحدة من الدول الاوربية .. ما طالبت بابني بعد لإن مرت سنين واكيد استقرت احاوله وما يعرفني ليش اروح اخربط حياته خصوصا العيشة باوربا امان ع الطفل يعني مأمنه يعيش بخير ما ينظلم ويعيش بظلم مرت اب لو اهل النظام هناك صار على اللي يأذي طفل .. ورضيت بقسمتي ..
بسنة ٢٠١٦ حبلت بطفل من مروان وجبت ولد سماه عمي سرحان كرار على اسم الامام علي .. وعشنا بفضل الله بخير .
نوسة : عشت ويا امي سنين ودخل ابني كلية بس اشتغل ويا مروان وكضتله الشغل .. صار ابني وضعه خير من الله .. جمعنا اني وياه الفلس ع الفلس واشتريالنا قطعة وشوية شوية بنيتها لحد ما خلصتها ...
من خلص كلية كال : يمه اني احبن وحدة وياي بالكلية ورايد اخطبها لإني راح اتخرج وما اشوفها وما اريد اواعدها من ورا اهلها رايدها بالحلال
كتله .. شكو احلى من الحلال يمه
بعتلي جم قطعة ذهب من عدي .. على الجامعهن هو وبمساعدة امي و عمي سرحان زوجته بنية خوش بنية حبابة وتحبه وبت اصول .. وكعدنا اني وياه ومرته ابيتنا الجديد .. جنتي تموت عليه جن بنيتي مو جنتي واني هم حسبتها بتي لإن ما عندي بزر غير سجاد .. خلف اثنين بنات سماهن ريتاج و ريماس .. روحي من الدنية هن .
بسنة ال٢٠١٧ .. اخوي اجا لبغداد وسجاد استقبله تعجب بالحال الصرت بي .. جيف هم بعدهم على فكرهم وكال : اذا انت وابنج خير عليمن ما تشيلين ابوي وياي ترا تعبنا وعلاجه كاسر ظهري .
كتله : جيبه ليجاي واني اداريه شعدي
ما صدك جاب ابوي وحطاه بركبتي .. صح مؤذي ويصيح هواي ويغلط على مرت سجاد بس هي حبابة تكلي : ماما واذا صيح لتتضايقين هو رجال مريض والمريض الله يعلم بنفسيته شلونهة حتى يأذي الناس
كتلها: الله يرضى عليج يماما ويجازيج
وظالين اني وياها نتعاون على ابوي .. صارت بيه كورونا ووصل للموت بس طاب ورجع احسن الحمد لله بس هالطكة العنده سابينا سبي .. من لما انفقد بحرب ايران صار شبه مسودن تصرفاته ما يتحملها عقل .. بس اكول اب والله ما يضيع اجر احد .
وعشنا بفضل الله .
هدوة : عشت ابيتي بعد ما طلعوا الولد .. ظليت راسي وراس نوسة وعليوي وسرحان .. لحد ما ستار راد حصته من بيت اهلي .. باعو البيت
وعباس ومؤيد اشتروا بيت بالتجاوز .. اتزوجوا اثنينهم وامهم وياهم وصاروا عدهم فروخ والحمد لله عايشين
وبنات المرحوم عاشن عدي .. ضميت حصتهن عد سراحان يشتغل بيهن ويزيد عليهن كل شهر لحد ما بسنة ٢٠١٨ .. اشتريتلهن بيت وسجلته باسمهن اثنينهن كلتهلن عمة اليوم انا موجود ما ادري باجر عكبة شيصر امنت حلالجن واجرته وكل شهر الجن ارويتب منه واظلن عايشات وياي وانا اشيلن كل حملجن .
وشايله وصية امي لليوم ما عايفتهم ومعيشتهن عدي
... وكلها تهون الا مصيبة عليوي هالولد معاند ما يتزوج ... طاحت وذرة الساني اريدنه يعرس ما يرضى يكلي يمه ما اريد المرة .. خب كتله يمه خل ازوجنك ريحانة هم بت خالك وهم امن عليها
يكلي يمه لا .. ما اريدن عرس
شد هالنجمات وشاف رويحته من صار ضابط كل نسوان الدنيا ما يعجبنه ظال مكضيها تسخت .. وما رايد عرس عجزنا انا وابوه نقنعه وما يرضى .
بس انا بخير ما طوله بخير ..وعايش بنعمة .
كرمنا الله بحجة انا وسرحان وحجينا بيت الله كبل كرونا بسنة .
بس الجدامي مو بخير .. رجلية كل ما جالهن يتعبن اكثر ووزني يزيد اكثر .. صرت لا اكدر اكوم ولا اكدر اكعد .. بس كعدة وامراض الدنيا بيه ..
وعايشة على الادوية والله الشافي .
هاي قصتي وهاي قصة اهلي ..
ان شاءالله ما تعبيناكم .. وهمومنا اخفيفة اعليكم
انا جدتكم هدية اودعنكم بالله واهل البيت .. والخاتمة يم بت ماجد .
زينب : وهنا اوصل لختام هالقصة
عشت وياها سنة ونص .. جنت بحال وصرت بحال والي وياها كومة ذكريات موجعه ومفرحة بكل بارت كتبته بهاي الرواية .. اعتذر عن التقصير .. والتقيكم برواية جديدة ان شاءالله.
اتمنى تحجولي ذكرياتكم ويا هالقصة خلال هالسنة ونص العشناها بالرواية .
خلصت رحلتنا وانتهت قصتنا ...
مع السلامة
#زينب_ماجد