بقلمي
الكاتبة غدير الحيدري
........
لا بدَ لي أنا ک (غدير)
أن أنصف من عرجوا في عالم سطوري..
لا بدَ لي أن أصف كُلِ ما يحدث...!
الحرمان...
وما ادراك يا خافقي
ما هو وجع الحرمان..؟
"لقيت في الذكرى امان"
"تحب من زادك هوان"
"ميت في قلبه الضمير"
ومن ثم تعود خائبا
تتسائل مع نبضات قلبك التي توارت اثر الفقد؟
"كم فيك يا كم حرمان؟"
تلونَ الحرمان على وجوههم توالياً
وطُبعَ على شخوصهم نقشاً
هناكَ من حُرِمَ من لذة الحياة... "برجيس"
أحدهم حُرِمَ من شعور الوفاء.. "رُبى"
والبعض حُرِمَ من متعة الظهور كأنسان.. "آن، حنين"
أخرون حرمتهم الحياة من القرب فعادوا متفارقين..
دائماً وابداً مفترقون "شونم، بارق"
ها هنا حُرِمَ فرداً من شعور النقاء رغم بياضه.. "كلل"
ولأول مرة يستبدل الهيل رائحته العبقة الى رائحة سامة
رغم إنه كان ولا زال.. "هيل"
وكم عزفتَ أنتَ على أوتار الورود وحصدتَ شوكاً؟؟.. "سلوم"
هنا من حُرِم من الأحتواء فعاد يُبعثر كُل ما يراه.. "جيلوان"
وهناك من أضاع الخطى وهو راعي الطريق.. "عماد"
وسط حقارة القلوب ولد قلباً رمادياً
نصفهُ أبيض نصفهُ أسود
حُرِقَ و أحرَق و سَيُحرق.. "أمير"
وهنا أسأل
"كم فيك يا كم حرمان...؟؟"
ويأتي ختام التساؤل
جمة من الردود
:شعور الفقد مؤلم يا (غدير) وشعور الحرمان ينتهك أحاسيسنا بكل بشاعة لكن... لو لا الحرمان ما كُنا الأن رواية....
#دعوة_إقتصاص
غدير الحيدري
..........
برجيس
اركض وسط البساتين
وبيدي گرصة الخبز
الضحكة مالية وجهي
وصوت امي خلفي
تصيح
:برجيييس لا تتأخرين
يصادفني اخوية الوحيد
راجع وبيدة الكرة
جان يلعب
الوحلة بأيدي واكمل طريقي راكضة
وبنهاية الطريق
ترتسم الي ضحكة ابوية
يكعد بالكاع ويمسح عرق جبينة
تعبان كلش
ومرتجي بعصا الكرك
يفتحلي ايدة
واركض لحضنة
وهو يكول
:هلا ببرجيسة أبوج
...
لالا مو هذا الموقف
خلي احلم بموقف ثاني..
كوب الحليب الدافي
اللي قدمتة الة
بالليلة الثانية من وفاة اخوية الوحيد
اخذة مني والدموع مالية عيونة
وشربة وبداخلة حسرة
جنة نتشارك الحسرة سوة..
حاسة بي وهو حاس بية
بوقتهه حضني
وكال الي
:من اليوم انتي سند ابوج..
...
لالا
خلي احلم بحلم اخر
اول يوم اخلي بي كحلة لعيوني
جنت شابة ومكيفة بروحي
صايرة للوجود...
اجة من برا
نصيت راسي خجلانة
مااريدة يشوف عيوني
لكن شافهه..
واقترب وحضني
وباسني بعيوني ثنينهه
وكال الي
:طالعة حلوة وجمالج ع امج يا عيون امج وابوج
...
لاااا برجيييس لااا
تذكري موقف غير هذي المواقف
صبيتلة اكل
اخذ الماعون من ايدي
وباس ايدي..
بوقتهه حسيت نفسي مميزة
وحسيت نفسي انثى
وحسيت روحي مسنودة..
ما جان يضم عني شي
جان يكلي بكلشي
جان معتبرني سند الة
ومأمن بية
جان يشوفني قوية
لكن...
...
لالا خلي احلم من جديد
الاحلام حلوة
خلي احلم للمرة المليون
يوم البجيت
وخفت من عامر
يوم الحسيت بضعفي
جان موجود
جان سند الي
بوقتها مسح دموعي
وكال الي
صياح:وعيونج يا عيون ابوج طول ما انا عايش ماراح اخلي الهوى يمسج انتي برجيسة ابوج الغالية ومسحي هاي الدموع وسوي كلبج حجر هالدموع هي مبتغى هواي ناس من يشوفوهه يرتاحون انتي بنت صياح ماتلوك لعيونج غير نظرة النسر جمدي عيونج وكلبج وخلي حزنج بروحج
هزيت راسي بمعنى اي
كال
صياح: ينكسر الانسان صح بس مو كل الانكسارات ينبجي عليهه
صفن بعدهه كال
صياح:الدموع توكع بحالة وحدة بس اذا فقدتي عزيز وسند الج بوقتهه الج الحق تبجين
......
انا هسة فقدتك؟
مو من حقي أبجي؟؟؟
....
فزيت ع كفخة
ولكيت روحي مبللة..
جيلوان يهز بيه ويصيح
جيلوان: بررررجييييس اصحيييي برجييييس جاوبينيييي
باوعت الة
وباوعت لبهية
اللي سمعتة مو غلط..
اللي انا بي مو حلم
ولا كذب ولا خداع
صياح مات...
انهمرت دموعي بسرعة
وصفنت بالكاع
اعصابي ترتجف
اسمع جيلوان يكول
جيلوان: برجيس سمعتي الحجيتة؟
رفعت راسي
الدموع مسوية بعيوني مجزرة
كلت وانا ارتجف
برجيس: قتلتوا ابوية؟؟ بعد ما دمرتوني قتلتوا صياااااح
صرخت ودفعتة
رجع لزمني
صرت اصرخ واضرب بي
وهو يلزم بية
برجيس: وللللك صياااااح ماااات انتتتتت قتلتةةة انتتتتتت
دفعتة بقوة
وهجمت ع بهية
صرت اجر بملابسهه واصرخ
برجيس: هاييييي مخططاتج مووووو انتيي خططتي لموووت ابويةةةة
جرني جيلوان
كلهم التموا
صرت مااشوف بعيني
الحزن نطاني قوة رهيبة
كتلتهم وكتلت روحي
صرت عاصفة
ادمر كلشي يواجهني
صرخت صراخ هز اركان البيت
ولطمت هواي
واذيت روحي لدرجة كل مااتذكر الموقف
احس بنفس الوجع
اللي حسيت بي بذاك اليوم...
فرغت ضيم الحياة كلة
ودمرت روحي وضعت
كلهم يباوعون مصدومين
الوحيد جيلوان يلزم بية
يحاول يسكتني
اخر شيء
انرفعت من الارض
هو شالني
واتجه للدرج
يريد يحبسني بذيج الغرفة..
يريد يموتني فوك موتي
صرت اضرب بي واصرخ
ضربتة ع راسة واختل توازنة
رخت ايدة ووكعت
من فوك الدرج للكاع
تمددت وسطهم
انسانة ذليلة متعبة متدمرة
اشبه ببقايا الانفجار
اشبه بالجثة الهامدة
ماحسيت بوجع جسمي..
وجع قلبي غلب
ربى ركضت الي
وهيل صارت توخر الشعر عن وجهي
اجة جيلوان بسرعة وبعدهم
رفعني من الارض
ورجع يحاول ياخذني لفوك
جنت ابعد بي
وادفعة بكل ماعندي قوة
يسحب بية تجاه السطح
وادفع بي
عضيت ايدة بقوة
فلت ايدة مني وتحررت
رغم كل الوجع
رغم كل الدمار اللي تملكني
ركضت..
ركضت للخارج
طلعت من المطبخ صارت امامي مجموعة كلاصات
دفرتهه وتكسرت
اجتازيت الطارمة
فتحت باب البيت
وطلعت اركض وسط البساتين..
من مال الله يا محسنين..
ترأفون بحال حقيرة هدمت عائلتهه
ترفقون بحال ذليلة مازالت تذل نفسهه
حسيت ع جيلوان خلفي
جر ملابسي ووكعت
احتك وجهي بالتراب
وحسيت بألم رهيب
كمز فوكاي وجرني
خلاني جوة ايدة واخذني سحل للبيت
دخلني للبيت وطبك الباب
اسمع صياحهم
وكعت بالكاع
اشهك بقوة وروحي محتركة
صار يهز بية
ويصيح
جيلوان: اصحيييييييي شبيييييج اصحييييي
ركلتة براسي تجاه صدرة
ووكع بعيد
صرخت وصوتي مبحوح
برجيس: قتلتتتتتةةةةةة مووووو؟؟؟ ارتاحيتوووواااا هسسسسسة
الدموع ملت عيوني
رؤيتي صارت مشوشة
ضربت عيوني بقوة
حسيت بوجع رهيب
بس كلة ما يتقارن بوجع كلبي..
اظلمت الدنيا بعيوني
رجع الي
لزم وجهي يمسح بعيوني ويصيح
جيلوان: كافييييي برجيس ولج كااااافي
حسيت بأنطفاء تام
صفنت
لو ما حابة جيلوان
جان صار كلشي بخير...
ع الاقل
ما جان دمرني عذاب الضمير..
لزمت التراب بيدي
همست بصوت مبحوح
برجيس: هي هاي البساتين اللي تعب بيهه صياح وهاي التربة اللي توارى بيهه وماحصل منهه شي اليوم راح تتوارى بيهه بنتة
صرت اشيل بالتراب واخلي ع راسي
وابجي اكثر واكثر
جيلوان يباوع الي وعيونة مليانة دموع
ضحكت
برجيس: شكلي حلو وانا هيج متوارية بتراب بساتينكم مو ؟؟ تريد تجرب شعور التراب من يوكع ع راسك شكد تحس بذلة ودماار تريد تجرب دماري؟
شلت تراب بيدي
خليتة ع راسة
شهكت بوجع
برجيس: حتى وانت متواري بالتراب شكلك ابن عز مو ذليل انت ابن العميد مو ابن صياح
نصة راسة
لزم ايدي
همس بصوت مخنوك
جيلوان: برجيس كافي
تركت ايدة
لزمت وجهه ودموعي تحرك خدي
همست
برجيس: خلص كلشي هسة صياح اختفى من عالمكم خلص
جيلوان: والله مو احنة اللي قتلناه والله
برجيس: انتو قتلتوا بنتة انت قتلتني الي اكو اكثر من هيج؟؟ ليش سويت بية كل هذا مو انا حبيتك؟
سكت
ابتعدت عنة
اجة كلل
كال
كلل:كافي كوم شوفلهه حل وجهه مليان دم وعيونهه انكلبت
باوعت الة
ابتسمت بألم
برجيس: ابوية مات أرتاحيتوا؟
كلل:لا حول ولا قوة الا بالله يمعودة يا راحة دكومي كومي
كومني جيلوان
باوعت لكلل وهمست
برجيس:كلكم ساقطين و......... و........ عبالكم بأشكالكم تنخدع مشاعرنا
هز راسة
كلل:خلي ترجع الماي لمجاريهه واربيج هسة انتي تعبانة
سحبني جيلوان للداخل
باوعت لهيل
جانت مصدومة وخايفة
كلت بتحذير
برجيس: انتبهي حتى ما تصيرين مثلي
صعدني لفوك وصرت اصيح
برجيس: انتبهيييي لا يغروج بيت العباس تراهم ساقطين وبهية السحارة اللي اسست للسقوطية مالتهم
جيلوان خلة ايدة ع حلكي
وسكتت..
سحلني للغرفة
تمددت بالكاع
دموعي توكع واناشغ مثل الاطفال
الذكريات هاجمت عقلي
واصبحت اسيرة الوجع
قفل الباب
اجة يمي ورفعني من الارض
صار يوخر شعري الواكع ع وجهي
بدون ما يحجي شي..
دفعت ايدة
لكن ما جانت الي قدرة للنهوض
كلت بوجع
برجيس: شوكت مات؟
جيلوان:امس وتم الدفن وكلشي
برجيس: بالعافية عليكم دمرتوا عائلة كاملة
جيلوان: مو احنة القتلناه الجشع قتلة
صرخت
برجيس: الله يلعنككككك
صاح بية
جيلوان:كااااااافيييييي كااافيييي ابوووج قتلة عامر قتلة صديقة اللي جان يسطي وياه عليييينة هذا الجشع اللي قتلة احنة ما مسؤلين عنة ولا عن سجنة حتى ابوج غلط وهذا عقابة
جمدت الدمعة بعيني
كام ووكف كدامي
جيلوان: بررررجيس انا اتعاطف وياج لكن الحقيقة تختلف احنة ما جبرنة ابوج يحب امج وينهزم وياهه واحنةمو كفيلين بي عاش هنا وزرع واشتغل بس جان ياخذ المقابل وهو عيشتة واكلة ومنامة وبقت حركات الورث انا مالي دخل بيهه ابووج مو مظلوم ابوج ظالم ظلم نفسة وظلمج وظلم امج والناس
صفنت علية
همست
برجيس: افهم من كلامك تريد تشوه صورة ابوية بنظري؟؟
جيلوان: برجيس الواكف كدامج اسطة بالسقوطية اناااا مو نزيه بس بنفس الوكت اعرف الصح والخطأ وابوج غلط بحق نفسة وبحق ناس هواي
غمضت عيوني
كمت من مكاني
ومشيت تجاهه
همست
برجيس: تكدر تسوي معروف وتطلع برا؟
هز راسة
طلع وسد الباب وراه
سحبت مخدة
وخليتهه ع الارض
ونمت..
مااعرف شكد مر وقت وانا نايمة
لكن..
لاول مرة اشعر بالفراغ
جنت انام وانا مرتاحة
اكو ام واب
بعدهه قلت راحتي بموتتة امي وسجن ابوية
اليوم انا خالية من اي شعور جيد
اليوم انا ميتة بالحياة..
فتحت عيوني
صار كدامي سقف الغرفة
اسمع اصواتهم جوة
همة اهل..
لكن انا وحيدة
كمت من مكاني
دخلت للحمام
باوعت لروحي بالمراية
وكم أحدثت بي الحياة النوائب؟
هل أستسلم؟
فتحت الماي
ووكع ع راسي وجسمي
شوي شوي بديت اتبلل اكثر
انا عالقة بالتفاصيل الصغيرة
نزعت ملابسي المبلولة
وصفنت ع روحي
انا وحيدة كما خلقني ربي لأول مرة..
سديت الماي
نشفت جسمي
وطلعت
لبست ثوب خفيف
ورجعت تمددت بالكاع
احس ببرد
هذا برد الفراق..
فراق العائلة
وبعدهم..
ورجعت غطيت بالنوم
مرة اخرى
فزيت بعد وقت طويل
ايضا وحيدة
كما خلقني الله
وقت ليل
باوعت ع الساعة
4 ليلا
انعكس شكلي بالمرأة
انسانة خاوية ضعيفة
خائبة الرجا
راح استمر هيج؟
ابتسمت
ولمحت ع وجهي ابتسامة مكسورة
كمت من مكاني
تمشيت بالغرفة
بعدهه باوعت لميز المراية
فتحت الجرار
وبديت احسب
حبة حبة..
باوعت للساعة
اوووو بعد وقت طويل
ولسا الليل ما خلص
احداث روحي هواي...
...........
السماوة
الساعة ال7 صباحا
هيل
غاطة بنوم عميق
وحسيت ع كلل يصحيني
مرة يلزمني مرة يتراجع
وهو يكول
كلل: هيل كومي ورانة طريق طويل
فتحت عيوني
كلت
هيل:وين؟
كلل:مو كتلج لبغداد
هيل:مااروح
كلل:مو بكيفج
هيل: تستعير مني ليش تزوجتني؟
كلل:احجي عدل انا ما مستعار ولا خجلان منج
هيل:جا ليش؟؟
هز راسة
كلل: اصلح الخربتة
هيل: مااعرف منو مفهمك ان المكسور يتصلح
كلل:مو كتلج اللسان الطويل مااحبة؟
هيل:وانا العندي كلتة لبغداد ما اروح
ورجعت راسي
وخليت الغطة ع وجهي
بقة صافن
بعدهه ابتعد وهو يكول
كلل:طبج مرض جعلج ما رحتي خليج سكراب يا عطلات غبرة مايصير براسج خير وانا مكيف اوديهه تتعالج اوديهه ......... مو تتعالج الب...... لسانهه بطولي
سكت بعدهه كال
كلل:الأدبسزز المستهترة
بقيت مغلسة ع كلامة
الى ان رجع نام
مر وقت
وفزيت ع صوت صراخ
احس كلبي وكع
كمزت واباوع كلل ركض كدامي لبرا
طلعت واباوع برجيس تصرخ
المسكينة ابوهه مات...
قهرتني هواي
جانت تعالج اشبه بالانسان الميت
وسط ناس مااعرفهم
هل هم زينين
ام لا؟؟
تحذيرهه الي صدمني
بنفس الوقت نبهني
حتى ما أمن لكلل
بعد ماا جيلوان اخذ برجيس للغرفة
صارت بهية تباوع ما تعرف شتسوي
ودار بينهه وبين ابو سلوم كلام
ما اهتميت
وسحبت نفسي
ومر اليوم
لليل انا كاعدة بالغرفة
لكن تحذير برجيس ببالي
وكلي قلق...
دخل كلل للغرفة
جان جاي من برا
شايل بيدة كيس جبير
عدلت كعدتي
نزع السترة خلقتة مكلوبة
كال
كلل:الله يسلمج لتكلفين نفسج وتكومين
نصيت راسي
صار يستغفر
حسيتة كوة طايقني
دخل للحمام سبح
بعدهه طلع وصلى
وانا كاعدة وصافنة
كال
كلل:عاشت ايدج متعشي انا
حسيتة يبسمرني
لا هو شنو حسيت
هو يبسمر عينك عينك
فتح الكيس
شمر علية جبس ونساتل
كلل:هاج تزقنبي هذا جبتة الج
رجع يدور بالكيس
شمر علية حب
كلل:الكرزات فالهه علينة مو حلو كرزي حب وادعي علية وهاج هاي عصاير لان البيبسي يأذي عظامج يا سكراب
بلعت ريك
باوع الي
كلل:لا ولو هذا واجبي
شمر الكيس الفارغ ع وجهي
وطلع برا الغرفة وهو يدردم
كلل:لسانهه لو ينكط سم لو ما يتحرك اصلا
لميت الجبس والنساتل والعصاير
خليتهه بالكيس
تنهدت
يمكن الغلط مني مقصرة من ناحية الخدمات
كمت من مكاني
حتى اضم الكيس
دخل للغرفة وبيدة كلاص حليب
باوع ع الكيس بأيدي
كال بنترة
كلل:وين موديتة؟؟؟
هيل: اضمة
كلل: وانا جايبة حتى تضمي؟؟
ارتبكت
اجة بسرعة جرة من ايدي
فتح سلة الزبالة وشمره بيهه
كال
كلل:انا جبتة حتى تذبي هنا كلشي اسوي علمودج هذا مكانة
ويأشر ع السلة
شمر كلاص الحليب بالكاع
تطشر ووكع الحليب
كال
كلل:نظفي المكان يلا
سحب سترتة وطلع وطبك الباب بقوة
مااعرف ليش بجيت
ومااعرف ليش كلبي وجعني
وبنفس الوقت حسيت روحي زودتها
صرت انظف الكزاز
ومسحت الكاع
خليت معطر
وكعدت ع صفحة
خليت ايدي ع حلكي
شنو نهاية النفق المظلم هذا؟؟
ومر وقت طويل
كلل مااجة..
انتظرت ماكو
بالعادة ما اهتم لامرة
بس اليوم اهتميت
تمددت بفراشي
واباوع ع اميال الساعة
مطفية الضوة ونور خافت يدخل للغرفة
لل1 اجة
فتح باب الغرفة
كعدت
فتح الضوة وباوعلي
بعدهه غلس عني
وتمشة للداخل
نزع ملابسة
وراح لفراشة دون كلام
تجرأت وكلت
هيل: كلل
حل السكوت
بعدهه سمعت تنهيدة
كال
كلل:لانج اول مرة تصيحين بأسمي راح اجاوبج كولي
هيل: انت ضايج مني؟
كلل: لا
هيل: توقعتك ضايج مني
كلل:لا
هيل: ماشي تصبح ع خير
تنهد
كلل:هيل
هيل: ها
كلل:باجر نروح لبغداد
هيل: ماشي
كلل:وانتي بخير
ونمت هذي الليلة بهدوء..
مااعرف ليش صارت كل هالخربطة بية
ومااعرف ليش تأثرت بحالة كلل..
.........
بغداد
آن
كاعدة امامة ومفتوحة عيوني
انا مصدومة من اللي اسمعة؟؟
عقد؟!!
يعني زواج!؟
اني اكون زوجة عماد!!
بقيت فاتحة عيوني
مااعرف شكول
عماد:ااااا. باعي مجرد عقد يعني مو زواج كامل حتى ما تتقيدين مني ولا اتقيد منج
هزيت راسي بمعنى لا
كمت وانا خايفة
آن:لالا انا من باجر راح اروح منا
عماد:آن انا مو قصدي شي
آن:لا انا ثكلت عليك وباجر اروح
صاح
عماد:لاااااا جاي اكلج لاااا متطلعين منا
دمعت عيوني
عماد: ماعندج مكان تروحين الة
آن:مااريد تسوي فضل علية اكثر من هيج
عماد: هذا مو فضل انا مجاي اسوي شي جبير ولا طلبت منج مقابل وبالنسبة للعقد انسي سالفتة انا كلت هالشي حفاظا عليج مو حلو اجي واطلع والتقي بيج وماكو بينة شي شرعي
غمضت عيوني
احس نفسي ما متقبلة سالفة العقد
احس روحي مو كد هذي الخطوة
كال
عماد: خلاص لا تفكرين بشي انا اسف
شال مفاتيح السيارة
ووصل لباب الشقة
كال
عماد:اذا احتاجيتي شي ابو سجاد موجود ماراح يقصر وياج اني بعد مااجي لهنا
فتح الباب
وطلع وعافني
كعدت ابجي
يا ترا غلطت من سويت هيج؟
حتى لو ع الورق
ليش اسوي بروحي هيج؟
ليش ادمر روحي فوك ما متدمرة؟
بس ترهم؟
ترهم يبقة هيج مطرود من بيتة؟
شراح تسوي بيج الحياة بعد
يا آن؟؟
.........
بغداد
الساعة ال2 ظهراً
شونم
رجعت من دوامي بتكسي
اسب والعن بسعد
اتصل علية ميرد
خلاني بهذي الحالة
ورطة يا ربي ورطة
النوب ابو التكسي ذبني بعيد عن بيتنة
واجيت امشي للبيت
من بعيد اباوع بارق واكف؟!
خير يا طير
لابس ملابسة العسكرية
هالمرة زايد جمالة بوجود اللحية
قبل كانت بس شوارب مشنترة
وصلت يمة
باوعلي بطرف عين
كلت
شونم: خير
بارق:الخير يصيبج
اجيت ادخل منعني
عقدت حاجبي
شونم:شكو شصاير؟؟؟
بارق:فيوز كهربائي ببيتكم وعطلانة الكامرات والعميد خارج بغداد وسعد متورط بوحدة اجيت وجبتلة مهندس كهربائي ودايشتغل حتى يصلح الكهرباء
باوعت ع الكامرات
شونم: تحجي صدك؟
بارق:لعد اهلوس مثلج؟
شونم: شقصدك
بارق:امس دزيت مسكول ليش ما اتصلتي؟
شونم: ليش اتصل؟
بارق:ما ميت عليج ردت استرجع الشغلة اللي تخصني
استغربت
شونم: شنو اللي يخصك؟
بارق:محبسي اللي نسيتة عمدا حتى يوصل الج وتحتفظين بي رجعي عيني رجعي
شونم:ذبيتة بالزبل
بارق: غالي هذا رجعي يابة
ميلت راسي
شونم: يعني متصل ب11 علمود محبس؟
بارق:اي حنيت الة
شونم: شطلعك من البيت مو كاعد وحيد
بارق: اكو ناس مستهترين كسروا الوحدة
شونم: وكسروا ماعون الدولمة هم
بارق:وكسروا كلبنة
رفعت حاجبي
شونم: بس يمونون مو؟
بارق:ماينين من زمان
شونم:شوكت لحكت تتعلق بيهم ؟
بارق:من اول يوم شفت عيونهم
شونم: بس انت بالمستشفى كنت حاقد عليهم
غمز بسرعة
بارق: حقد عزاز هذا
شونم: هاااا هيج لعد حلووو
بارق: ماينة ابد مو صافي
شونم: دخلوه بمحطة تصفية
بارق: شنو هو؟
شونم: مايكم
بارق: ها عبالي غير شي
تنهدت بتعب
شونم: انت مو تكول كلشي بينة منتهي؟
بارق:اي ليش منو كال العكس
شونم: ها؟
عقد حاجبة
بارق:ليكون عبالج انا احبج وميت بيج ومشتاقلج ومتجنن عليج لا لا لتروحين زايد ماشايفج بعيوني اصلا
احس تنرفزت منة
دفعتة بقوة ودخلت للداخل
واني ادردم
شونم: مستفزززز
دخلت للداخل
وانا ادري بي كذاب
ادري بي يحبني
وادري يسوي كل هذا بس علمود يزعجني
شكلنة راح نبقى معلقين هكذا
بمنتصف الاشياء دائما
دون ادنى مستقر....
.........
جيلوان
ايام طويلة عشتها بدوامي
بوسط الحرب والقصف
وخلايا داعش وازمات الموصل
وسط الموت والضياع
لكن
الكون بكفة
وبرجيس وحدهه بكفة
وقلبت الميزان..
ما طلعت عن تفكيري ابد
وكل لحظة هي ببالي
اعترف قبل مو هيج
لكن هسة حبيتها
وانا واثق حبيتها حب فعلي..
احداث هواي مرت علي
موت ام بارق وموت الكثيرين بالمعارك
اثرت ع نفسيتي بشكل كبير
ومن غيرها انا نفسيتي عليهه ماي ورد
كد ما متعطرة وهادية
رجعت من دوامي
وشفتها
ماعارت الي اي اهتمام
ولا استقبلتني
ما حسستني اني موجود..
رغم ما مريت ع عليا
وصار الي هواي مارايح الها
لكن ليش؟
مااعرف
يمكن برجيس لا تزال تفكر بأنتقام فعلي
ومرت ايام
وبيوم اجاني اتصال
من احد الضباط بالسماوة
يخبرني بوفاة صياح
صياح انجمع مع عامر بسجن واحد
وحدثت خلافات ومشاكل
اثرها عامر قتل صياح
اسعفوه
لكن الاصابة كانت خطيرة
ومات..
برجيس شلون؟؟
وبهذا اليوم بالذات
وبعد فترة طويلة من السكوت
برجيس اصرت على رؤية ابوها
يمكن كلبها علمها باللي صاير..
احتاريت شلون اوصل الهه الفكرة
وما كان عندي حل
غير بهية
حجيت الهه
وانقلبت الموازين
برجيس سمعت كلشي
اثر اللي صار
دمرت روحها ودمرتني
وحسيت بندم فضيع
مع كل حركة تصدر منها
كنت اموت
وكنت اتمنى تقسى اكثر علية
لان استاهل
طلبت مني اتركهه
وتركتهه
وبقيت محتار
افتر وسط البساتين
شجاني واذيت برجيس بأبوهه؟
وين كان عقلي من سويت كل هذا؟؟
ويمر الوقت
كل مااروح اشوفها
الكاهه نايمة
الى ان صار الليل
بتمام الساعة ال2
دخلت للغرفة لكيتها نايمة
ماحبيت ازعجها
بالتالي تعبت هواي
ولازم ترتاح
تركت الباب مركونة
ونزلت
كعدت ع التخم بالصالة
غلبني النعاس وغفيت...
بين الحلم
بين العلم
سمعت صوت صياح
فزيت برهبة
اباوع عمو كلل يصيح بذعر
وهو يكول
كلل:الحككككككك جيلوان بررررجيييييس ماتتتتتت
احس عقل ما بقة براسي
سويت الدرج خطوتين
وصلت لباب الغرفة
لكيته متمددة وبأيدهه علبة دواء
وحلكها علية اثار سائل ابيض..!!
والأيد الثانية مليانة دم..
والدم سايح واصل للباب..!!!!
برجيس شسويتي بروحج!؟
وشسويتي بية!!
برجيس ماتت!!!
............
اغنية البارت
انتظرووووونا
ولتنسون التصويت