العراق

3

العراق 
للكاتبه :فاطمه العساف

لـ نفسك
غادر كل من حطم فيك شيئًا .. أو اطفأ بك وهجًا، واترك من خذلوك لا تشاركهم حديثًا أو مكانًا، اعبر بقلبك لمكان آمن
.................

ناي: هذا الولد نفسه الي شفته بالكليه بقئ بالي شغله
هو منين حصل حسابي  زين منين عرف اسمي
شويه ودزلي رساله ليش يهمج منين اعرفج او يهمج اني منو
رديت عليه  مومهم اعرف انت منو لان عرفتك  بس حسابي من وين حصلته
رد عليه بضحكه وكال

اسلام :مايصعب عليه شي

ناي : كتله خير ان شاء الله  وطفيت جهازي و تمددت  خلي انام واشبع نوم مدام باجر عطله وما عندي دوام
بس هم مكدرت انام رجعت دزيت اله رساله

شنو تريد مني؟

اسلام : لا سلامتج مرايد شي

ناي :لعد ليش  راسلتني

اسلام :لا هيج بغلط راسلتج

ناي :شنو بغلط متحجي  شنو تريد  او من وين حصلت حسابي

اسلام :اللغه عربيه عندج قويه
حسب مجاي اشوف

ناي : ههه اي عراقيتي قويه

اسلام : بهاي حقج  على شنو هلكد مهتمه بالعراق

ناي :من وين عرفت مهتمه بالعراق

اسلام :شوفي حساب الانستا مالتج
وراح تعرفين

ناي :اي صح احب العراق

اسلام :لعد ليش تركتي ؟؟

واجيتو على بريطانيا!

ناي :اني ماعشت بالعراق حتى اتركه
اني انولدت هنا بريطانيا

اسلام :لحظه لحظه اشلون اشلون
عيدي

ناي :بعدين صدك انت شعليك

اسلام : مو جاي نحجي بهدوء
بعد هاي شعليك شنو لزومها

ناي :يعني هسه متكول شنو تريد  او منين اخذت حسابي

اسلام :اكول بس بشرط

ناي: شنو شرطك؟؟

اسلام: نلتقي بكوفي اني وياج  ونسولف واكلج ها

ناي :لاصدك هاي شنو
اكيد لا
وهم تعرف اشلون مااريد اعرف
وانت بعد لتراسل
تمام وهسه باي

اسلام :تمام
باي
جنت متأكد انو فضولها راح يرجعا الي
وتراسلني حتى تعرف شنو اريد  منها او من وين اخذت حسابها
بس هي حاليا جاي تطبق وضع الامبلاه
كل النساء يجمعهن الفضول على مختلف اعمارهن وجنسياتهن وعلى رغم اختلاف اماكن سكنهن او طريقه حياتهن
الفضول يلم شمل كل النساء

ناي :جانت وحده من عاداتي قبل لا انام اسمع اغاني او اسمع شعر
جنت احب اسمع اغاني عربيه  مثل اغاني
هيثم يوسف او كاظم او حتى شيرين او اغاني اجنبيه مثل  اغاني  شاكيرا مغنيه كولمبيا
او سيلينا جوميز  او ريانا  او شعر محمود درويش

ومرات اسمع اشياء دينيه يعني باسم كربلائي
واحب اسمع قرآن بصوت عبد الباسط
التجويد بصوته كلش يعجبني

جان بيتنه الصبح مثل سباق اني وامي
اذا اني كعدت قبلها اشغل فيروز  بجهازي واخلي صوت عالي
اما اذا امي كعدت قبلي لا تشغل قرآن

جنت كل يوم انام واني افكر باجر اني اكعد قبل امي او امي تكعد قبلي

بس هاي اول مره ماافكر بهذا الموضوع  صار هذا ولد يشغل تفكيري
شنو يريد  او اشلون كدر يحصل حسابي
زين يندل بيتنه او لا
او يعرف اهلي

نمت بوقت متأخر واني تفكير ياكل براسي
حتى ثاني يوم كعدت متاخره وهاي اول مره هيج اتاخر من اكعد
بقئ موضوع الولد بالي يروح منا ويجي منا
حاولت الهي نفسي بشي
وانسي روحي موضوع
فتحت التلفزيون  وبقيت اشوف شنو معروض
عجبني فلم شفته
مرت كم ساعه  بس بقئ موضوع ياكل بروحي
بقيت افكر بيني وبين نفسي شنو راح يصير اذا طلعت ويا لكوفه واني اصلا مراح اطول بس اعرف شنو يريد مني او من وين حصل حسابي وخلص
يعني وقت كله ميتجاوز نص ساعه

رجعت راسلته

ناي:راح اروح قبلك  لكوفي الي شفتك البارحه بي انتظر عشر دقايق واذا مااجيت
أروح

اسلام : جنت متأكد منها راح توافق نلتقي بكوفي  من اجتني رساله منها مجنت مستغرب ابد
رديت عليه بكلمه ok

وفعلا على سريع غيرت ملابسي واخذت اول تكسي شفتها كدامي
من وصلت جانت هي واصله قبلي وكاعده ب اخر طاوله بزاويه مال كوفي
ف من وصلت يمها بتسمت الها
فسحبت كرسي وكعدت مقابيلها
بديت اني بكلام من سئلتها اشلونج؟

ناي :انت شنو تشوف

اسلام :اشوفج بخير زينه

ناي : اي حلو  وانت اشلونك

اسلام :بخير كلش

ناي :هسه تكدر تحجي شنو تريد مني
او من وين حصلت حسابي او مكان سكني

اسلام :ههههه مو صعب تره
من تسئل كلشي تعرف
ومن تدور على شي راح تندله

ناي :حسيته جان يريد يتلاعب بكلام ويتهرب من جواب
بس  كلت اسايره واشوف وين يريد يوصل
جاوبته اي صح الي يسئل ميضيع

اسلام :  حاولت اغير الموضوع
وافتح موضوع مطول شويه
شنو  يعجبج بالعراق؟!

ناي :هوايه اشياء منها 
تعجبني المواسات العراقيه

من يتأذى شخص  'نكله بيه ولا بيك'

ومن نحس بشخص متوجع واحنه مو يمه بعاد عنه نكله 'ياريتني يمك'

ومن نسمع شخص عنده ضغوطات او نسمع بمشاكل إنسان نكله 'سوده عليه كل هذا عليك وحدك'
تحسه ضماد لجرح مو كلام

اسلام :اول مره انتبه لهجتنه  شكد حلوه
واول مره هيج اركز بكلمات
او مره احس بكلماتنه الها معنا

ناي: بشنو صافن وجاي تفكر

اسلام:لا هيج ولا شي
صدك انتِ كلتي لمنو قبل لتجين
يعني اهلج بسرعه وافقو من كلتي الهم

ناي:ليش لازم اكول لاحد قبل لا اطلع كلت لامي راح اطلع

اسلام :شنو كالتلج
ماسئلتج وين رايحه ويا منو او شكد تاخرين
او معارضت او رفضت

ناي :لا ليش تعارض او ترفض او ليش تسئلني كل هاي الاسئله
مجرد كالتلي خلي بالج من نفسج

اسلام :بس هيج كالت الج

ناي :اي ليش

اسلام : لا  ولا شي

من شفت حياة ناي
والحريه الي عدها اكتشفت انو بنات بالعراق شكد مظلومات
ومحرومات من ابسط حقوقهن
يعني مستحل او ممنوع بنبه تطلع لمكان  وحدها لاي مكان خاصه مناطق الجنوبيه
او ممنوع بنيه تأخر
وحتى من تطلع لازم تطلع ويا اهلها
ولازم قبلها بكم يوم تكعد تقنع امها وتوسل باخوانها علمود يطلعوها طلعه بسيطه لمكان قريب او لسوك او لمرقد ديني حتى تزور واكو عوائل اصلا متقبل بناتها تطلع
حتى لبس  مو بكيفها
مجرد يوصل عمرها ١٥سنه مجبره تلبس عبايه  سواء برضاها او غصب عنها حبتها او محبتها هي مجبره تلبسها مع انو موحرام اذا مالبست عبايه
بس مجتمعنه يفرضها على لبنيه
ومالها حق ترفض

غير موضوع زواج القاصر والزغار بعمر
او موضوع بنت العم لابن العم
وتنجبر البنيه تتزوج ولد متحبه بس لانو هو ابن عمها
وهم يخلون البنيه تبني امالها وكل احلامها وتحب شخص  بس لانو فهموها من وهي طفله انو هي لابن عمها وبنهاية راح تزوجه
حتى او هذا ولد ميحبها هي

وينجبر الولد يزوج بنيه ميحبها بس لانو من هو زغير اهله كالو هو راح يزوج بنت عمه
حتى حق زواج محرومين منه

رجعت بتفكيري بيوم زواجي من طيف
الي هو جان قبل كم شهر
بيومها محسيت نفسي اني الي راح تزوج
ولا حسيت هذا زواج
زواجي ماجان عندي هاي الفرحه
او لهفه بذاك اليوم
وانما حسيته شي واجبي وجان لازم اسوي
حاولت انو الغي زواج واخلي هذا زواج ميتم وتعاركت ويا والدي
بس بنهايه هذا شي مو بيدي
لانو والدي والد طيف من واحنه زغار متفقين انو احنه من نكبر نزوج
جان رد والدي لسه بالي
والد اسلام : عيب كدام الناس نلغي زواج والكل يعرف طيف الك
راح يكولون شنو بيها او شنو شاف منها
حتى تركها وماتزوجها

اسلام :يابا اني مااحبها

والد اسلام :من تعيش وياها راح تحبها

اسلام :تره هي مو غريبه عليه حتى مااعرفها
ومن أعيش وياها راح احبها
اني من نولدت اعرف طيف وهاي سنين كلها ماحبيتها تريد من اتزوجها احبها

والد اسلام : اني تزوجت امك ماحبها ومن عشت وياها حبيتها
وصار عندي منها ولد وبنات واحفاد

اسلام :اني مااشبهك
و لا راح اكدر احبها ولا اكدر ادمر حياتها وياي

والد اسلام : هذا كله حجي لا راح يفيدك ولا راح يغير شي زواجك انت وطيف باقي و
ومراح يلغي اني منطي وعد الاخوي انت تزوج طيف ومتفق ويا

وطيف تحبك  وراح تحافظ عليك وتعيشك بسعاده

وهي بنت اخوي مو غريبه

اسلام : جان ضغط ابوي حتى اتزوج طيف من جهه
وكلام ناس اذا اترك طيف من جهه
وطيف نفسها هاي جهه وحدها
من هي تحبني وبانيه احلامها وياي واني مامخليها بالي ينكسر خاطري عليها

مالومها بس الوم اهلي واهلها من خلو فكره زواجي اني وياها بالها
خلوها وهي طفله  تحفظ انو من تكبر اتزوجها
من خلوها ماتفكر تحب شخص غيري
لانو فهمت من تكبر تزوجني
جانت كلش كاسره خاطري
هاي من اهم الأسباب الي خلتني اتزوج
طيف
وره زواجي بكم شهر قدمت على دراسه بريطانيا وانقبلت
طلعني من تفكيري
صوت ناي وهي تحجي وياي

ناي :مو احجي وياك مترد
وين صافن؟ بشنو تفكر!

اسلام :لا  هيج ولاشي
تعرفين هذا شي ممنوع عدنه بألعراق

ناي :شنو ممنوع

اسلام :انو تطلعين وحدج وبدون متكولين الاهلج

ناي :ليش

اسلام :هاي بعد 

ناي :يعني  هذا قانون ثابت

اسلام :مو قانون
بس عادات وتقاليد  وحكم المجتمع العراقي وخاصه جنوبي وهم الوسط

ناي :شنو جنوبي شنو وسط مافهمت

اسلام :هههههه باعي يا سنيوريتا

العراق يتكون من اربع مناطق
الشمال و الوسط والغربيه والجنوب

وكل منطقة بيها عدد من محافظات

ناي :حلو
قصدك اقاليم

اسلام :لا باعي الشمال اقليم وحده اي
بس باقي مناطق لا مو اقاليم

ناي :فهمتك
زين انت من يا منطقة

اسلام :اني من الجنوب من الناصرية

ناي: اي فهمتك
المهم هذا مو موضوعنه مجاوبت على سؤالي

اسلام :الي هو؟!

ناي :الي اجيت على موده

اسلام :هههههه مو مهم بس كتلج الي يسئل عن شي راح يحصله

ناي :تمام
  هسه لازم أروح جانت فرصه سعيده لانو التقيت بحضرتك

اسلام : زين ممكن نكون  اصدقاء

ناي :لا اسفه

اسلام :تمام شكرآ على الإزعاج

ناي قصدك :اسف على الإزعاج ؟

اسلام: لا انتِ رفظتي وهذا شي سببلي ازعاج

ناي :ههههه جديد هاي
هسه اروح يلا باي

اسلام : جانت مشاعري بهذا وقت متضاربه
بين زواجي من طيف وبين اعجابي ب ناي
طيف شنو ذنبها احب غيرها او تعجبني بنيه ثانيه غيرها
فكرت بمشاعرها اشلون راح تدمر وهي اشلون راح تأذه واني راح اكون خاين بوجها نظرها
بس بهاي لحظه قررت انو مراح اتواصل ويا ناي مره ثانيه
ليش اظلم الاثنين وياي.