『قٌصص ﺑٱرۅد』

⍅حال و حال⍆

اجينه من وكت قبل الموعد اني و بنتي ... بنتي عدها مراجعة علمود سنونها و جيت وياها بصالة الانتظار الي بداخل العيادة اكو شباك ع الشارع ..

يعني من الشباك نگدر نشوف الناس الي بالشارع بس من فوگ الجو چان طبيعي بس السكرتيرة بداخل العيادة راحت تفتح الشباك .. (علمود تغيير التيار الهوائي يعني) ..

من فتحته طلع صوت الشباك و طبعا هو مرتب على الطراز الحديث .. الصوت مال الشباك نقلني من مكان لمكان تذكرت صوت الشباك الي بالصالة مالتنا چان صوت الشباك وصوت السكة الحديد مال البردة يرعبنا اني و اخوتي لأن معناها راح ننكتل ..

چِنه عايشين بمشتمل طابق ثاني المشتمل كله صالة و غرفة نوم وعدنا حمام هو حمام و هو تواليت (مكرم القارئ) و مطبخ صغيروني ..

غرفة النوم ابوية و امي ينامون بيها .. و الصالة احنى الجهال ننام بيها .. لعبنا و دراستنه و حچينه كله بهل الصالة و ممنوع ننزل نلعب بره البيت لان ابونه ميقبل .. و فوگ هالشي اذا نلعب بالصالة و نطلع صوت وهو نايم بالغرفة يطلع تقريبا بالاسبوع ٣ مرات تتكرر الحالة يطلع يكتلنه كلنه ..

چان اول ميطلع ميحچي ولا كلمة و أمي المسكينه رأساً من تشوف شكله مبين معصب گبل تروح للمطبخ تسوي نفسها تشتغل بس هي چانت تبچي بالمطبخ متشتغل هي تخاف تصير بينا و بينه لان يكتلها الها هم چانت تنهزم ..

هو أول ميطلع من الغرفة يجي أول شي يسوي يسد الشباك .. الشباك چان حديد و بي صوت مال الحديد من يزنجر من المطر .. صوت الشباك چان يحك الگلب حك ..

يسده و بعدين يجر البردة المفتوحه .. السكة مال البردة چانت حديد و هم صوتها يخوف من تنجر احنا بهل الاجزاء مال الثانية رأساً نگوم نبچي تلاثتنه لان نعرف راح ننكتل و نروح كل واحد بمكان .. الي يگعد ع التخم والي يوگف يم الحايط (يعني ينطي ظهره للحايط و يرجع ايدناته ليورى) و الي يگعد بالگاع .. كلنا ننتظر الضرب .. بس الحلو بالموضوع (بابا مچان يفرق بيناتنه) چان كلنه يكتلنه نفس الكتل يدفرنا برجله راشديات كفخ شيل و شمر ع الگاع .. ميفرق ..

ابونه چان كلش عادل بكتلنه ابونه عادل لدرجة الزراگ الي بجسمنه ميروح لان مستحيل يمر اسبوع اذا مننكتل و كلنه بينه هالزراگ ..

و طبعا من كثر الكتل الي اصلا احنى مظلومين بي تعلمنه نصير هادئين بس مرات چِنه نحچي بيناتنا نگول اذا هو ميقبل نطلع صوت هنا بالصالة ليش ميخلينه نطلع بره نلعب و نطلع صوتنه بره و نجي نگعد عقال هنا ..

بس مچان اكو جواب لهل السؤال قانون ابوية لازم يمشي علينه و لازم نبقى بهل الصالة و يوم وره يوم تعلمنه منلعب جهال نخاف من اللعب اني الي اعرفه الجهال يخافون من السعلوه من العجوز ام وجه المحروگ من الذيب الي لحگ ليلى من السحارة بس احنى نخاف من اللعب ..

والله چِنه نخاف من اللعب و كبرنا و احنى على هالحطة احنى بنات ثنين و اخ واحد اخونه الصغير و اني الجبيرة و اختي الوسطانية الي اصغر مني تقريبا صرنه معقدات اني واختي و تعلمنه يوم وره يوم نصير مثل امنه ..

اخونه بعمر صغير گام يشتغل وي ابونه و طبعا من كبرنا مگدرنا نكمل دراسة بسبب ابونه حدنا للثالث متوسط و نبطل و نكعد ننتظر (رجال) أي رجال يتزوجنه و يدللنه ..

و عادي حتى لو يطلع مثل ابونه هم لازم نسكت و نتحمل حالنه حال منو (دقيقه اني منو شايفه تتحمل كل شي) اهااا امنا مثل امنا نصير .. نسكت و نتحمل و شعرنا يصير ابيض گطن مو من العمر لااااا من القهر و هذا الي صار بالضبط ..

اتزوجت رجال مختاريته ولا حتى شفته .. مجرد ابوية اجه للبيت و گال لامي رتبيها لبنتج ههههههههه رتبتني امي عدلتني طلعتني بمظهر لائق للزواج .. و علمتني اهم قانون بهل الدنيا (قانون گولي أي) قانون گولي أي حتى لو اعرفه غلطان حتى لو يغلط بحقي أگول أي ..

و اخذت هالوراثه وياي و رحت لبيت اهله لرجلي رحت واني شايله بجنطتي كلمة (أي) .. و دخلت بهل البيت الي بي ٣ شباب و بنات ثنين و امهم وابوهم .. عائلة عبارة عن مشاكل ميمر يوم اذا متصير عركة بيناتهم ع الصينية يتعاركون ع الشغل مال بيت يتعاركون على اسخف الاشياء يتعاركون يعني كلاص المي هم يتعاركون عليه شلون (مثلاً واحد يدز اخته تجيب كلاص مي) شوية تتأخر ..

خلص صارت عركة و كفران و غلط و سب و شتم بالقلم العريض .. عشت ببيت اهلي من يوم ولادتي لحد يوم مجيت لهنا والله مسمعت كلمات (قبيحة) ابد ببيتنا حتى گلت بيني و بين نفسي هسه اني اذا اخلف هنا معقولة ابني راح يطلع هيچ لسانه زفر (مكرم القارئ) ..

و طبعا مرت الايام و سنه جرت سنه و ماكو حمل ما حملت .. و كل متمر سنه سوء التعامل من زوجي يزيد بالبداية چان ضرب خفيف و بعدين گام يضربني قوي ولا مرة رحت لأهلي گلتلهم زوجي كتلني مع العلم همه يمنا بنفس المنطقة لان اني جيت متدربة شلون الجنود الي يطلعوهم بالافلام من يدربوهم بالضرب حتى يتحملون اذا تأسرو لو دخلو بأشتباك ..

اني جيت حاضره .. ع العموم .. أم زوجي گامت تلح على سالفة التحاليل و هو طبعا رجال ميقبل يروح يحلل لان اكيد العيب مني مو منه و طلع العيب مني انفصلت (تطلگت) لان عائلة البساط الاحمر عائلة نابليون بونابرت يريدون حفيد (سليل العائلة المالكه) يريدون طفل يربوه ع التقاليد الحلوة
ع الكلام المهذب..

ع العموم .. تطلگت و رجعت لبيت اهلي و طبعا الحلو بالموضوع اني اتحاسب و اسمع حچي من ابويه على شي مو بيدي ... شگد صعبة من البشر يتحاسب على مرضه او على خلل بجسمه هو ممختاره .. بس سبحان الله تزوج طليقي وره فترة و هم مصار عنده اطفال و من راح حلل هم طلع عنده خلل ..

يعني الصوچ مچان بس بيه بي هم ... و بقيت بالبيت و طبعا وراها بفترة تحولنه لبيت ثاني لان اني واختي بنات و ميصير نبقى ننام بالصالة طول العمر و أجرنه بيت بي ٣ غرف .. و طبعا چانت الوضعيه المادية شوية متحسنه بسبب شغل اخويه گعدنا اني واختي بغرفه لان اختي چانت بذاك الوقت بعدها ممتزوجه و اخويه بغرفه وابوية و امي بغرفه ..

بذاك الوكت اني قررت اشتغل و طبعا ابوية لأول مرة ميعترض على هالشي ليش؟؟
لان عرف اني خلص راح ابقى يمه طول العمر .. رأسا تخلى عن تقاليدة و قبل بالواقع اشتغلت بالشركة العامة للغزل و النسيج .. عاملة چنت اصغر وحدة بالقسم كله كلهم نسوان كبار بس اني صغيره حتى مره اكو مرية رادت تزوجني لأبنها متدري اني منفصلة و ما يصير عندي اطفال اصلا ..

حچيتلها كل شي چان تشيل الفكرة من راسها و راحت طبعا حچت لكل النسوان بالمعمل هواي بيهم انقهرو عليه لان ببداية حياتي و بعدني شابه و حياتي تخربطت من بدايتها ..

حتى مرة وحدة منهم تقربت مني هي مرية چبيرة گامت تحچيلي على ماضيها وخطية هم بچت لان تعذبت هواي بحياتها .. اني من حچيتلها على ابوية شلون يعاملنه و شلون زوجني غصبا ما عليه و هيچ صار وياي كامت تبچي ..

گالت تدرين قبل ما اعرفچ چنت اتوقع اني اكثر وحدة مظلومة بس انتي بهل العمر وهيچ صاير بيچ بلكي المستقبل احسن .. گلتلها خاله فدوة اروحلچ المستقبل خلي نقربه مثلا هسه مستقبل اي بنية شنو لو تتزوج لو تنجح بحياتها اني زواج ميرهملي و النجاح هم ميرهملي قابلة بحياتي هيچ و شيصير خلي يصير ..

و بقيت فترة اشتغل بهل المعمل وفد يوم اخوية اجاني للمعمل من وقت .. تفاجأت من شفته بره گالي بابا توفى بچيت ..

بچيت رغم ما هو مأذيني و مأذي امي واخويه بچيت و حتى اخويه بچى .. و رجعنا للبيت و سوينا الفاتحة و راح ابونه ..

بقينا بالبيت بدون أب .. بس حياتنا تغيرت جذريا گمنا نضحك هواي لان هو حتى الضحك بدون سبب چان يرزلنه عليه گمنا نطلع سوه حتى اخوية الي هو رجال شفنا بي شخصية ثانية ..

گام يطلعنه دائما و دائما متونسين و چان دائما يحاول يغير الموضوع اذا حچينا بالماضي و دائما چانت امي تگول الراح راح لا تظلون تعيديون بي و لو هالشي مستحيل ينسي لان الانسان عبارة عن حاضر و ماضي .. الحاضر هو اليوم الي نعيشه و الماضي هي تراكمات الذكريات و التجارب الي عشناها ..

بس گمنا نتناسى مو ننسى .. و بيوم من الايام جتني بنية بمنطقتنا الي چِنه گاعدين بيها هي تعرفني اصلا (يعني معرفة جوارين) و تعرف مقتطفات من قصتي يعني سالفة اني اتزوجت و اتطلقت لان ميصير عندي اطفال .. وهالحچي امي حاچيته لامها ..

گالتلي شنو رأيچ عندي فكرة مشروع نشتغله اني وياچ و خاله فلانه .. فلانه هي هم جوارينه رجلها هم متوفي و عدها بس بنات ٢ و البنات ثنينهم متزوجات وهي وحدها گاعده بالبيت .. گلتلها شنو المشروع؟

گالت خاله فلانه گالت شوفي بعد بنيه وياچ ثقه و تكون مؤدبه و محترمة و تعالو ببيتي خلي نسوي شي مثل الحضانه بس هو مو حضانه مرخصه من الحكومة (يعني شغله بيناتنه وبس) .. يعني ببساطة اكو ناس عدهم جهال صغار يريدون يطلعون وحدهم لو مثلا موظفات لو معلمات يخلون جهالهم يمنا بهل البيت مال (خاله فلانه) واني وهالبنية نداريهم و طبعا بأشراف الخاله ..

و ناخذ هالقاسمة الله .. بس قبلها نگول هالحچي للجوارين حتى ناس تگول لناس .. گلتلها ياريت لان قريبه على بيتنا و شغله حلوه و اني اصلا احب الجهال ..

طبعا اني مفتهمت هي ليش اختارتني لحد ما التقيت بصاحبة الفكرة الرئيسية المرية الجبير الي نصيحلها خاله .. هي رايدة هيچ وحدة لأن تعرف الي ميصير عدها اطفال شلون تتشوق لتربية الاطفال و راح تكون اكثر وحدة حنينه بتعاملها وياهم و رحت و التقيت بالمرية طبعا اني شايفتها قبل بحكم هي بالمنطقة بس مممتعرفه عليها تعارف كامل يعني مجرد سلام ..

و حچتلي ليش اختارتني وطلعت هي دازه عليه هالبنية جوارينه و بدينا بالموضوع .. و سبحان الله بس بدينا بالشغله الناس كلها حبت الموضوع و گامو يخلون يمنا جهالهم و حتى اكو اطفال صغار كلش هم چِنه نرعاهم و انعرفنه بالمنطقة و شغلنه صار كلش زين و الراتب الي چنت احصله من هالشغلة اكثر بهواي من شغلتني بالغزل و النسيج ..

و بيوم من الايام خلصت شغل و دارجع للبيت المرية الچبيرة گالتي اگلچ عندي حچي وياچ گلتلها هسه؟ گالت لا وره مياخذون الناس جهالهم گلتلها زين .. و اجوي الناس اخذو جهالهم و بقينا بس اني وياها و البنية الي جتني بأول مره ..

گالتلي تعرفين شهد گلتلها اي اعرفها هي طفله بعمر ٣ سنوات تقريبا .طبعا اني ما اعرف اهلها منو بس اعرف شهد و اعرف كل اسامي الجهال مو بس هي..

گالت ام شهد متوفيه و ابوها عايش و ماعرف بصراحة شلون توفت والدتها بس الي اعرفه هي الوحيدة لأبوها ..

والدها الله مفضل عليه و امكانيته زينه .. و هو هم تره من منطقتنا بس ماعندهم علاقات وي الناس .. امه عايشه بس چبيرة كلش ما بيها حيل تمشي المسكينه هو ميأمن على بنته يم احد غريب .. قبل مچان يجيبها يمنا چانت تبقى يم امه ..

بس امه مثل مگلت كلش چبيرة متگدر ع البنية وحدها و انتي بعينچ دشوفين شهد كلش حركه و وكحه و بصراحة من الاخير هو شافچ هنا اكثر من مره من يجي ياخذ بنته .. و حاچاني و طبعا هو عباله انتي بنتي .. بس گلتله هي اكثر من بنتي و حچيتله قصتچ و لو اعتذر لان هالشي مو من حقي بس الولد لان سمعت طلبه گلت خلي اگله كل شي يخصچ الولد يريد يتزوجچ و طبعا گلتله هي عدها مشكله بسالفة الانجاب و قبل .. و ينتظر رد أولي منچ حتى يتقدم و يروح لأهلچ ..

گلتلها لا اسفه ماريد اني ما اتزوج بعد .. گالت بكيفچ و سديت الموضوع و راها بأربع ايام طلب ابو شهد يحچي وياي بعد ما سمع جوابي ..

گاللها بس اريد احچي وياها بأي مكان تختاره گلتلها ماشي خلي يجي لبيت اهلي وهناك يحچي وياي و رحت حچيت لأمي و لأخوية گالو مدام الرجال نيته شريفه خلي يجي هلا بي ..

و اجه لبيتنه و طبعا شهد وياه اني الگعده كلها شهد بحضني گاعده لان متعلمة عليه يوميه يجيبها يمنا گالي يا بنت العالم گبال اهلچ احچي هالحچي اني رايدچ بالحلال وكل شروطج اقبل بيها ليگدام و اذا بيوم اذيتچ تگدرين تطلبين طلاق..

و طبعا المرحومة ام شهد بيوم ولادتها متوفيه و هو بقى بدون زواج ٣ سنوات لان يخاف على بنته لا ياخذله وحده تأذيها و من شافني هيچ اعاملها و من سمع سالفتني من خاله تمسك بيه اكثر ..

و گال جملة هي الي خلتني اقبل لان شفته صريح گال مستحيل الي مثلچ تأذي طفله و اني لو عليه ما اتزوج وره ام شهد للموت والله بس امي متگدر وحدها على شهد و اني عندي رزقي و شغلي و گعدت فترات طويلة علمود ابقى بس اربي شهد والحمد لله انتو سويتو هالشغله شوية اخذت نفسي و رجعت لشغلي بفضلكم ..

وافقت و تزوجته بس شرطت عليه ابقى بشغلي گالي يا عيني اني من البداية گلتلچ كل شروطچ اني قابل بيها طبعا الرجل كلش محترم و ابن خير و امه كلش محترمه و فرق بين هالعائلة و ذيج العائلة (مال بيت طليقي) من السما للگاع ..

انتقلت وياهم و طبعا هو عنده شغل هواي الرجال و صارت عنده علاقة حلوة بأخويه و اخذ اخويه شغله وياه .. و ساعد امي و اختي هواي و حتى مره گال ليش ميجون كل اهلچ يعيشون يمنا هنا البيت چبير و احنا بس ٣ نفرات گلتله لا مترهم .. والله العظيم عرفت معنى الحب على ايده عرفت معنى شي اسمه رجل يحترم المرأة بكل شي عرفت شنو معنى كلمة رجال لان الرجل الحقيقي طلع موجود چنت فاقده الامل بعد ما شفت ابويه و طليقي الگه رجال يعاملني تعامل حلو ..

بس ابو شهد خلاني احس اني عندي قيمه اني انسانه خلاني احب الحياة والله و شهد صارت بنتي الي ما جابتها بطني و طبعا وره كم سنه من زواجي الشغله الي چنت اشتغلها توقفت ..

لان المرية كبرت كلش و راحت گعدت وي وحدة من بناتها و بقيت وي شهد بس هسه اذا اطلع بالشارع بمنطقتنه شباب كبار لحياهم طويله و شواربهم هالثخنها من يشوفوني يگولولي هلو ماما ساره شلونچ ههههههه ..

احلى شعور احس بي من اطلع للسوگ اني و شهد و تشوفني بنيه لو ولد طبعا اكيد كبار و اعمار مختلفه بيهم حتى الي جهاله وياه لو جهالها وياها .. رأساً يوگفون يسلمون عليه.. يعني چنت اتمنى اصير ام لطفل واحد صرت ام لكومة اطفال و هسه كلهم صارو رياجيل و نسوان و شهد هم كبرت حبيبتي و صارت مرية و هي نفسها الي هسه وياي بالعيادة و گلت بنتي لان هي بنتي والله ..

و هي اصلا متعرف أم غيري بهل الدنيا و هسه اني عايشه بأحلى حياة وي اكثر انسان محترم ابو شهد و بنتي شهودتي و طبعا اخوية وضعه تغير و امي الحمد لله عايشه وي اخوية لان هم تزوج ..

بس ماعرف ليش صوت البردة و الشباك وره كل هالسنين و هالعمر بعد يخوفني يارب العباد لاتشوف احد من هالناس الي شفته بصغري و بتجربتي الاولى بزواجي يارب ارزق الكل بحياة بعيدة عن الخوف و الحزن .. يارب ..
انتهى
(حال و حال)