عقد البنات

البارت 13

#عُقد_البنات
البارت الثالث عشر
للكاتبة لبنى الموسوي

غمض عينه يستغفر بـ صوت عالي
تقربت اتوسله بـ نظراتي يحچي الـ حقيقة
التفت على نيزك ورجع باوع لي ماكو شي مو يم بنتچ الموضوع يخص أهلها

- ناصر لتكذب عليَّ
انتَ كنت بالمستشفى وتأخرت كلش بالرجعة
ومن رجعت هذا حالك معناها اكييييد الموضوع يخص رحيل مو غيرها احچي ولتسغبيني رجاءً

- اي يخص رحيل بس أهدي وخليني أفهمچ لتخبصينا
- بيها شي الله عليك گول
- مو گلنا أهدي
- هديت والله هديت بس احچي وفضني مو گلبي وگف

- الموضوع مو خطر بس متعب شوية بالنسبة الچ والها
- وشنو هالموضوع ؟!!

- بالفترة البسيطة الظلت بيها بالمستشفى
ومن دون كل الأطفال چانت تبچي بكثرة بحيث عجزوا يسكتوها

بعدين صاروا يشكون بيها شي لأن لجتها مو طبيعية
واليوم تأكد شكهم
بنتچ عدها عيب ولادي (فتحة بالقلب) بس قبل كل شي لتخافين والله الموضوع مو خطير

طول ما هوَ يحچي گلبي ينبض بـ قوة
من گال عدها فتحة صفنت بـ وجهه مصدومة من الخبر لـ درجة عيني ظلت مفتوحة مرمشت رمشة !!!

- تقرب بـ اتجاهي مرر إيده مقابل وجهي عطاء عطاءءء تسمعيني لو لا

- نزلن دموعي ويا ما نزلت إيده
باوعت له بـ هضمة اذا الموضوع مو خطر مكان حالك هالشكل ولا نيزك بچت بـ هالحرقة معناها دتكذب ناصر دتكذب حتى تواسيني بس لتنسى اني أم وأحس

- وداعتچ وروحه الأبوية ما بيها شي يهدد حياتها
- ماتت لو حـ تموت احچي

- استغفر الله رب العالمين واتوب إليه
بابا ليش دتتفاولين عليها
اذا على نيزك فـ تدرين گلب الأم يصير رهيف وميتحمل هيچ أخبار واذا عليَّ فـ اكيد اتعب من الخبر غير طفلة ومتتحمل الألم شلون ترديني ما اضوج

بس حچاها طلعت أركض للصالة
گعدت بـ فراشي
من البچي نظري راح شوية واجى هوَ وياها ما اهتميت

ظلوا بالباب عيونهم عليَّ محتارين شلون يسكتوني
دقيقة وخطى ناصر بـ اتجاهي
صار يمي ثنى رجله ونزل بـ مستوايا أخذ إيده بـ إيدي وابتسم

- عندچ ثقة بيَّ لو لا
- عندي.. حچيتها وشهگت مسح دموعي بـ طرف أصبعه

- وروح أبوية وداعة أبني الما عندي غيره رحيل مبيها شي خطر وبمرور الأيام راح تتحسن صدگيني

- بس شكلك ميگول هيچ
- ضجت عليها شلون تردين ما اضوج واني يوميا اسمع بچيها بـ أذني لأن متألمة وماكو شي يخفف ألمها

- وشنو يعني هاي الفتحة شتقصد بيها مفهمت
زين حـ تبقى هيچ طول عمرها تتألم لو تتعالج لو شنو احچي شي يبرد گلبي الله يخليك

- الدكتور گال ان شاء الله قبل السنة تنغلق من كيفها
واذا صار ومنغلقت لا سامح الله
ساعتها يتدخلون بـ عملية جراحية ويغلقونها الها بعمر الأربع سنوات الى خمسة المهم بالنهاية تتعالج

- حييييل يعني حـ تبقى موجوعة كل هالسنين
- بدل هالكلام ادعيلها تصير زينة ليش شارية الهم قبل ليدگ بابچ معرفتچ بكل هالضعف عطاء

- ليش هيچ ناصر شسويت واتحمل كل هذا
شنو رب العالمين ديعاقبني لو يعاقب مروان بيها صح هوَ مو زين بس الطفلة مالها ذنب والله مالها

- حچيتها ورجعت ابچي مسح على راسي بـ هدوء
حاشى لله أن يعاقب عبده بـ ذنب غيره
ممكن تسميه أختبار وممكن رحمة الچ لأن رب العالمين لا يُبلي إلا من أحب من عباده الصالحين

- ونعم بالله
- يلا مسحي دموعچ ونامي حتى من الصبح أخذچ الها تظلين هناك للظهر أرجع عليچ من طريق الدوام

- الله يخليك بس احچي الحقيقة راح تعيش لو لا
- ان شاء الله تعيش بشنو طالبتها ترى الموضوع بسيط

- وشگد بعد تبقى بالمستشفى طولت هواي
- أسبوع اقصى حد وراها يبدي دورچ راح تتعبين وياها لأن الطفلة تتألم وصعب تنام من غير العلاجات

- فدوة الها اني وتعبي
بس المهم تصير زينة لو بـ إيدي حتى الألم أشيله عنها

- أبتسم نصف أبتسامه الله يحميها الچ من كل سوء

حچاها وطلع من الصالة
ظلت نيزك يمي تواسيني شوية وراحت لأن أبنها گعد

گمت طفيت الضوة وتمددت دموعي مدتقبل توگف
غمضت بـ تعب
كلما أتخيلها تبچي گلبي ينعصر من الألم

مكنت أريد أطفال من مروان
بس من انزرعت بأحشائي روحي صارت بيها
أثناء الحمل هواي كنت أخاف ليطلع الطفل يشبه أبوه لكن مجرد ميمر كلام ناصر بـ ذاكرتي لا إرادياً أرتاح من الأفكار السلبية وقلبي يطمأن

~ « تساقط أوراق الماضي في خريف الحاضر »

واگفين يم المحل
خالتي تتسوگ واني وناصر عيونه تتغزل ببعضها
سمعت صوت شاب ديصيح التفتت صاير أعصاب على رجال كبير بالعمر شوية ورفع إيده ديضربه

ركض ناصر هوَ والعالم
وگفوا حاجز بيناتهم وظلوا يتعاركون وياه
تأخر الموضوع يلا إنحل قريب الربع ساعة رجع ناصر أعصابه بـ عيونه صاح يلا نرجع اذا خلصتي يوم

نرجس.. شكو شبيهم ذولة
ناصر.. العار ديضرب أبوه مشايف هيچ بشر عاق دخيل رب العالمين شديصير راح تنگلب الدنيا بينا

نرجس.. ياااا عزة الله ليوفقه شلون گلب عليه فلا تقل لهما أفً وهذا جاي يضربه گدام العالم

- الله غاسله وسوء العاقبة اله ان شاء الله
- معرفت ليش هيچ يعامله
- يگول تعبني يعاند وينسى ومثل الطفل اذا راد شغلة يدگ رجل إلا يحصلها حتى لو ميستفاد منها

- اي غير رجال چبير يعني فعلاً يرجع مثل الأطفال

- يمعودة عالم بطرانة
لو الله حارمه منه چان ساعتها حس بـ هالنعمة الـ غيره محروم منها ويتمناها بس يجي يوم الله بالمرصاد

- الله يهدي على هالرجال والله كسر گلبي
- يلا خصلتي
- بس أشوف هالمحل ما اتأخر
- استعجلي شوية
- أول مراحت تقربت من ناصر ضايجة اگولك هذا يعني الرجال العجوز مبين طيب ليش أبنه هيچ حقير

- ليش الطيب ضروري يكونون أولاده طيبين مثله ؟!!
- اي يعني غير واگعين من ظهره

- آمنة وميسم واگعين من ظهر عمچ موسى شتشوفين يشبهن أبوهن وأمهن لو لا

- لا ابد وين هنَّ ووين همَ
- ليش ؟!!
- ما ادري يمكن لأن بيبي ربتهن مو أمهن انتَ شتگول

- بالضبط هذا جوابي الچ
صح العرق دساس بس التربية تلعب دور چبير
يعني حتى لو واگعين من ظهر فاسد اذا تربوا ع الخير راح يكونون من الصالحين والعكس صحيح

- مثل آمنة وميسم
- اكيد
- لعد هذا الولد اكيد أمه مو زينة ومربيته على الخُبث

- ههههه انسي يلا لتصرعينا بسيرته
- شسوي مو بـ إيدي والله ضجت كلش اذا گدام الناس هيچ يعامله لعد بالبيت شيسوي بيه

- الله موجود
- ونعم بالله بس لو اني أبني هيچ يسوي احرگه بمكانه

- هههههه يصيح عليَّ يعني
- شحددده
- طفل انتِ أمه واني أبوه شتتوقعين يطلع اكيد ملاك

رجعت للواقع بـ ألم غير معقول
ألم مضاعف
من جهة الماضي وذكرياته الـ صارت عبارة عن سراب

ومن جهة ثانية تحقق الكلام الكان بيوم مجرد حديث عابر وصرت أم الـ طفلة من خبيث مثل مروان

بس كلام ناصر صحيح
حتى لو هوَ أبوها مستحيل تطلع تشبهه
راح أربيها ع الصح والغلط وازرع بيها الطيب من الصغر وما أسمح العرق بيت موسى يلوث برائتها الحلوة

بچيت بـ خنگة وغمضت أدعي
يا رب گوملي أياها بالسلامة ولتعاقبني بيها
كافي عليَّ زواجي من مروان وحياتي الضاعت ما أريد هالمرة أنفجع ببنتي لأن صدگ هيچ انتهي وأموت

اذا سويت ذنب سامحني
واذا أذيت أحد مستعدة أستغفر طول العمر حتى تغفر أذيتي بس المهم ترجعها الـ حضني سالمة من كل وجع

من القهر للصبح مگدرت أنام
بعدني متمددة وعيني تحاول تاخذ النوم سمعت صوت باب غرفتهم أنفتح رفعت راسي ناصر طلع

سد الباب والتفت ديروح للمغاسل شافني گاعدة
رفع حاجبه مستنكر الوضع
عدلت گعدتي خطى بـ اتجاهي ليش لسه منايمة عطاء

- شسوي حاولت هواي مگدرت اغفى بالي يم رحيل
- اني شحچيت البارحة
- مو بـ إيدي والله مو بـ إيدي حچيتها ونصيت اشهگ

- سحب الغراض من يمي وگعد بـ صفي ليش دتسوين هالشكل متعودت اشوف عطاء ضعيفة

- من يوصل الموضوع يم قطعة من روحي اني ضعيفة
- بس الأمومة تحتاج قوة الضعف ميخدمچ

- عقلي شوية ويوگف ناصر
أفكر هواي أفكر من جهة مرضها ومن جهة ثانية خايفة ما اگدر أربيها وتالي تطلع تشبه أبوها وجدها

- بت عطاء مستحيل تشبه أحد غير عطاء نفسها
متأكد راح تكونين گدها
ويجي اليوم الأذكرچ بيه بعد متشوفيها أحسن الناس

- يعني تشوفني اني گد مسؤولية الأمومة
- اذا انتِ مو گدها منو لعد يستحق هالشرف كافي بس طيبة گلبچ وأخلاقچ الحلوة

مسحت دموعي وبصوت مخنوگ تشكرت كلامه
سكت شوية
قطعت الصمت بـ وگفتي رايحة اسويلك ريوگ گوم يلا غسل حتى نطلع ليوازيك الوقت وراك دوام

حچيتها ورحت للمطبخ
جهزت الريوگ وأخذته للصالة شوية ورجع مبدل
باوع للصينية وبدون ميحچي راح للمطبخ
جابلي إسكتان ثاني وگعد صب الچاي بنفسه يلا اگعدي

- ليش صبيتلي ما اشتهي هسه عود من أرجع اتريگ
- عطاء !!

ما جادلته گعدت قدم الإسكتان عليَّ
انجبرت أكل
لأن طول ما هوَ يتريگ عيونه تراقبني فـ محبيت أزعله

خلص الريوگ رجع نفسه إنسد ع الحايط
رفعت راسي ديباوع عليَّ تلعثمت أخذت القوري داخليه بالصينية حتى أوديها للمطبخ گال ممكن سؤال

- بدون ما أواجه عيونه گلت له اي اكيد تفضل جواب
- ليش وافقتي على مروان ؟!!

- جاوبتك سابقاً ليش دترجع تسأل نفس السؤال ممليت

- لا أريد الحقيقة
أريد جواب منطقي تقبل بيه الروح قبل ليتقبله العقل

- معندي غير هالجواب لأن هيَّ هاي الحقيقة
- مو هاي قمر مو هاي ليش مدتساعدين نفسچ وتخليني اساعدچ ليش مُصرة تدفنين روحچ بالحياة

- لتكمل ناصر
انتبه على بيتك وحياتك وأترك عطاء
الحچي ميفيد والصار صار وانتهى هاي قسمتي والحمد لله على كل حال المهم عايشين ونشتم الهوى

- يعني أفهم من كلامچ فعلاً اكو شي مدتحچيه الية !!

- ماكو
- اكو قمر اكو
- كافي اترجاك كافي لتأذيني والله تعبت الضغوطات

شلت الصينية داروح للمطبخ قطع طريقي بـ جسمه
لو عرفت
لو بس شميت خبر شميت هااا
مروان اله إيد حقيرة ببعدچ عني مراح أرحمه قمر وروح أبوية ما أرحمه وساعتها موته يصير على إيدي

- باوعت له بـ خوف
اني السبب اني الحكمت على قمر وناصر بالموت
لذلك عانيت وگاعد أعاني وراح ابقى أعاني طول عمري

تجاوزته ومشيت للمطبخ
بس خليت الصينية ع الحوض گعدت بـ مكاني أبچي

شوكت تنساني ناصر
شوكت تعيش حياتك وتتجاهل الماضي !!
خايفة عليك والله خايفة ما أريد يمسك أي سوء
كافي عليَّ أحس بيك تتنفس الهوى الأني أتنفسه أكثر من هالشي ما أريد من رب العالمين

حسيت على نفسي گمت ع السريع غسلت قبل ليجي
رحت للصالة ما هوَ
قفلت الباب غيرت ملابسي وطلعت لگيته واگف يدخن بالحديقة من شافني طفى الجگارة وتوجه للباب فتحه

الطريق كله هادئ حرف متنفس
وصلنا للمستشفى
بدل ما خالتي تقويني هيَّ همْ إنهارت وياية
ظليت يمها للظهر اجى ناصر من طريق الدوام رجعني للبيت

إسبوع مر أيامه حسيتها سنين من عمري
اليوم الظهر
گاعدة بالصالة أساعد نيزك بتجهيز الغدة سمعت الباب إنفتح عادي متحركت هذا وقت رجعت ناصر

صار صوت ضحكت نيزك بـ إذني
رفعت راسي هاي ليش دتضحك معقولة وياه
بعدها عيوني على باب الصالة
دخل حامل رحيل بـ حضنه رميت الصينية على الأرض وركضت أخذتها الـ حضني أبوس بيها بـ لهفة

نرجس.. ههههههه ولچ يمة مو زين تبوسيها هيچ خطية بشرتها حساسة متتحمل هالبوس

حتى مرديت عليها
أخذتها وگعدت مفتحه عيونها وتباوع منا ومنا
نزلن دموعي وهمست بـ إذنها هسه يلا إرتاحت روحي يروحها الأمچ الله ليحرمني من هالعيون الحلوة

من شافوا لـ هفتي عليها تركوني وياها وطلعوا
بـ يومها متغديت
مگابلتها وگاعدة حتى ميهلي اروح للحمام بالگوة خالة أخذتها مني سبحتها وغيرت ملابسها من حيدرة

لليل گاعدة أرضعها سمعت الباب إنفتح
بسرعة غطيت صدري
دخل ناصر بـ إيده كيس نصى على رحيل باسها وحطه بـ حضني باوعت بـ استغراب شنو هذا ناصر ؟!!

- چنا منتظريها ترجع بالسلامة حتى تاخذ واجبها منا

- لااااا شنو هالزحمة
ليش انتَ وخالتي قصرتوا بشي
شو من ولادتي لسه كله عليكم حتى ما ادري وين أودي وجهي من الـ....

- لتكملين وتزعليني شنو حاسبتنا غربة حضرتچ !!!

- طبعاً لا
باوعت الـ رحيل مبتسمة خلينا نشوف خالو شنو جايب

فتحت الكيس جهاز كامل الـ عمر السنة تقريباً
رفعت راسي داعترض خزرني
ابتسمت بـ خجل والله هواي يعني شغلتين تكفي بس مو جهاز كامل مو كافي عليك مصارف البيت وأبنك

- الخال شنو دوره لعد هوَ همْ أب ثاني
- مقصرت الله يرزقك من واسع رزقه ويفرحك بـ أبنك

مسح على راسي وطلع من الصالة
بعدني اتفرج ع الملابس بـ فرحة دخلت خالتي
أخذت رحيل من حضني شمتها وعلگت شي بـ لفافها

بعدني محاچية إجت نيزك وسوت نفس الشي
بعدت الملابس عن حضني وگمت
الأولى آية الكرسي والثاني قل أعوذ برب الفلق وأثنينهن ذهب باوعت عليهن مصدومة شنو السالفة !!!

نرجس.. مو الچ البنيتي لذلك صوتچ ما اريد أسمعه

عطاء.. خالة والله كلش هواي
ادري بوضعكم لو عدكم همْ نگول ميخالف
بس اني مو غريبة اني بتكم واعرف البير وغطاه ليش دتحملون نفسكم فوگ طاقتها

نرجس.. التنطيه اليوم برضا تنرزقين باچر أضعافه

عطاء.. ونعم بالله بس همْ هواي
باوعت الـ نيزك هسه بلا عوفي خالتي انتِ ليش
مو كافي ناصر جايب الها جهاز كامل ليش اكو بيناتكم فرق حتى كلمن يجيب هدية شكل والله ميصير

نيزك.. تستاهل چنتني حتى من تكبر يغزر بيها ونعيش حبايب ميصير المكافش من الروس

- حضنتها أضحك والله ما ادري شگول
صدقاً خجلتوني بـ كرمكم ومعندي شي أردكم بيه غير دعائي الكم بالرزق والسعادة

- مد ناصر راسه من الباب يمعودااات ميت جوع وحده منچن تفوت تصب العشى لا اروح الأميرة توكلني

نرجس.. يا عشتووووو عاد الكرم يخر من إذنها زين لو خلت گبالك تمرايتين كل سلبوح بيهن بطولك

ناصر.. لعبتي نفسي يمة

نرجس.. هيَّ هاي الحقيقة وهسه بس تعرف طلعنا من المستشفى تدز الطلي وخروفه حتى ياخذوهن منا

ناصر.. لحد يبلغهم خليهم يعرفون من كيفهم
نرجس.. هوَ همْ هيچ خطية قمر متگدر تداريها وحدها

ديحچون ردت اطلع اصب العشى منعتني نيزك
أكلنا وراح ناصر الـ غرفته يشتغل
ظليت فرحانة بالغراض الجابهن كل شوية أطلعهن وأخذ نظره سريعة عليهن همْ من ناصر وهمْ الـ بنتي

لـ نصف الليل بدت المعزوفة العالمية
حيدرة مناك ورحيل منا
ناصر يم مرته وخالتي يمي بس أبنه أرحم يبچي شوية وينام أما بنتي على فد جرة ولا قبلت تسكت

باوعت الـ خالة خطية من التعب عيونها بلون الدم
تقربت منها اطبطب على ظهر بنتي گومي نامي تعبتي اني يمها ليظل بالچ

- يااا شلون أنام واعوفچ لا ما أگدر خليني هنا أحسن

- شكو عليَّ قابل هاي نيزك وناصر همْ سهرانين
بعدين كافي مقصرتي
صارلچ نص شهر وياها بالمستشفى لو أمي متتعب الها بگد تعبچ الله يجازيچ عني بألف خير

- بنيتي انتِ لتحچين هالشكل
- نصيت بست راسها خالة الله عليچ خو ما لسه زعلانة من كلامي الله يشهد مكنت قاصدته بس صارت

- ماكو أم تزعل من ضناها واعرف وراچ شي بس فات الموضوع وطلعنا من ذاك البيت ميسوة الحچي بعد

- يلا لعد گومي نامي حبابة
- والله ما اگدر

- الخاطري خالة ولتخافين
لو تعبت راح اجي وأگعدچ قابل اخجل من أمي اكيد لا

- بس حچيتها گامت بوست رحيل
علاجها لتنسيه بـ 3 وكل ساعة غيري تحتها لأن خطية بسبب العلاج هواي تتدرر وجلدها حساس متتحمل

- ان شاء الله

راحت تنام واني عجزت اسكت بنتي
من البچي صوتها راح
وصلت مرحلة صرت أبچي وياها لأن ادري بيها موجوعة وميطلع بـ إيدي أشيل هالوجع منها واخليه بيَّ

للثنتين وهيَّ تفرفح
على صوتها طلع ناصر فتح الباب ودخل جيبيها عنچ

- لا وين خليك يم أبنك هسه شوية وتنام لأن تعبت

- هوَ چان يمي توني انطيته الأمه جيبي عنچ وارتاحي مراح تسكت هيَّ يوميا للصبح على هالحالة

حچاها وأخذ رحيل من إيدي يفتر بيها بالصالة
گعدت اباوع عليهم
للحظة حسيت اني ويا متزوجين وهاي بنتي وبنته وكل شي صار كان مجرد كابوس وانتهى خلال هاللحظة

صحيت من صفنتي على صوته يحاول يسكتها
رجعت نفسي للحايط
انسدت عليه وعيوني تتأملهم لو هيچ الأب لو الأحسن محد يتزوج حتى ليورط بنات العالم وياه !!!

ساعة وهوَ يفتر بيها حسيته تعب
گمت أخذتها من إيده
كافي روح نام وراك دوام ما ظل شي ويطلع الصبح

- وانتِ شلون تگدرين عليها وحدچ

- لازم أتعود
اليوم انتم موجودين باچر وحدي
عليمن أعتمد اذا مو على نفسي روح يلا خليني سهرانة وياها حتى الموضوع ليصير صعب عليَّ هناك

- تحتاجين حليب حتى اجيب الها ويا حيدرة
- لا حليبي كافي مرتك خطية معدها فتحتاج مساعدة

- تصبحين على خير
- وانتَ بخير
- أبتسم وطلع سد الباب وراه باوعت للساعة صار وقت علاجها انطيتهيا وغيرت تحتها شوية إرتاحت

نص ساعة ورجعت تبچي
ظليت هيچ للصبح من التعب صرت أغفي على نفسي

- بالسبعة دافرها بالصالة دخل ناصر ها شنو منامت ابد
- لا وبعد مالي طاقة نعست كلش

- نيزززززك نيزك وينچ عيني تعالي للصالة
- إجت تركض ها ناصر
- أخذي رحيل من أمها خل تنام شوية منا لما تگعد أمي وتاخذها عنچ عود روحي كملي نومتچ

- أي تتدلل

أخذتها مني وطلعوا وسدوا الباب
رميت نفسي على الفراش من التعب ثواني وغفيت

حسيت على صوت القرأن
فتحت عيني رحيل نايمة بـ جانبي
باوعت للساعة راح يأذن الظهر گمت طلعت خالتي على السجادة ونيزك واگفة بالمطبخ تسوي الغدة

- الله يساعدچ
- هلا حبيبتي ويساعدچ
- إعذريني اليوم أخذتني النومة وخليت الشغل عليچ

- يمعودة يا شغل همزين نمتي وإلا تنهارين بعدين
الليل كله بالي يمچ
حيدرة أهون ينام ويگعد بس بنتچ للصبح أسمع بچيها الله يساعدچ شلون راح تخلص وياها

- موجوعة حقها.. حچيتها بـ خنگة گبل أجت حضنتي
- تهون وتصير سوالف بس قوي نفسچ

مسحت دموعي بـ إيدها يلا روحي غسلي حتى تاكلين شي بين ميجي ناصر ونتغدة

اندگت الباب بـ هالأثناء
ردت أطلع اشوف منو گامت خالتي خليچ اني رايحة

فتحتها ورجعت داسألها منو دخلت عمتي أميرة
هوَ اني شفتها لو گلبي أنعصر
گبل وبدون سلام گالت جهزي روحچ دترجعين للبيت

رادت حاولت خالتي شرحت الها مرض رحيل ولا تحرك بيها الإحساس تجي يعني تجي لتحاولون

اني همْ مردت تكبر المشكلة خصوصاً ناصر على جية
لميت الغراض ورحت أسلم على خالتي
گالت اني يوميا أمر عليچ لتخافين ما اخليچ محتارة

تشكرت منها ومن نيزك وطلعت ويا عمتي
وصلت للبيت بس بيبي موجودة
خطية گامت تلگتني بالهلاهل أخذت رحيل مني حطت بـ لفافها فلوس وظلت تناغيها صدگ حسيتها فرحانة

- شنو أسمها بيبي على الله أسم حلو
- رحيل
- هوَ اني حچيتها ما احس إلا مرت عمي صاحت صوت زرفت طبلة أذني التفتت عليها مصدومة

- رحيل شنوووو مو مروان سماها أميرة !!!
- لا رحيل
- هوَ غيره لو بـ كيفچ تلعبين بس لأن مترديها بـ اسمي

- ماكو فرق هوَ أبوها واني أمها المهم الطفلة تسمت
- اني الچ بس خل يجي مروان واعلمچ

هزيت إيدي وصعدت الغرفتي
ويا مفتحت الباب انفتحت عيوني من الصدمة
مو غرفة طولة مال بهايم البطالة ع الملابس ع الصحون عبالك مهجورة من سنة حتى ريحتها مقززة

ركضت فتحت الشباك وبديت أنظف بيها
ساعة يلا خلصت
رفعت الفراش ضميت الذهب مالت رحيل جواه ونزلت ظهري مكسور من التعب بعدني ع الدرج دخلت آمنة

بس شافتني ركضت تبوس وتحضن بيَّ
دفعتها اضحك كافي ولچ مو خدي أنشلع هاي وما صار النا إسبوع من متشاوفين

- هواي إسبوع والله احس صارلي سنة مشايفتچ
- هههههه حبيبتي
- اشتاقيتلچ عوبة طولتي كلش
- غير أجيب بنتي خو ما أجيكم وحدي مترهم مو صح

- أحلفي الحلوة هنانة
- روحي يلا تلگيها بـ حضن بيبي بس على كيفچ وياها

بس حچيتها راحت تركض ضحكت على سوالفها
تبعتها لازمة الطفلة ودگ بوس
شوية وراحت الغرفتها رجعت بـ إيدها فستان صغير يا أهل الدار شوفوا عمة آمنة شنو جابتلي

- تقربت منها أضحك ليش زحمتي نفسچ عاشت إيدچ

- ماكو زحمة حرمت نفسي من المصروف علمود اجيب شي يلوگ البنت أخوية الحلوة

- باستها حيل وباوعت لي صدگ شسميتها أميرة مو
- لا رحيل
- الله يجنن احلى من أميرة بهواي

أميرة.. الله يطيح حظچ ترى داسمع يا خايسة بس مو صوجچ ولا صوچها صوچ أخوچ الطلي

- يمة لتزعلين والله أسمچ قديم
وين اكو طفلة هسه يسمونها أميرة ترى العالم ديتطور والحرب العالمية خلصت

هيَّ حچتها لو ابتلت على عمرها
ظلت ساعة تغرد
شگد حاولت آمنة تغلس بس أخر شي متحملت دخلت الغرفتها وسدت الباب حتى تخلص من رزالتها

رحت وراها فتحت الباب لگيتها تفتر بالغرفة ها شبيچ

- أحاول اطرد الطاقة السلبية
- هههههههه ليش هالطريقة تجيب نتيجة حتى اسويها

- تجيب والله جربي وحـ تشوفين
صدگ نظفتي غرفتچ
وچ ميقبل أصعد أنظفها كلما اگوله يرد تنكسر إيدچ لو تلوح شي بيها عبالك مليانة ذهب مو قذارة !!!

- هاي شبيچ هوَ متعمد حتى تظل فوگ راسي بس مو مشكلة نظفتها وماله حجة بعد عليَّ

- عاشت إيدچ أحسن من المشاكل مشي إمورچ
- هوَ همْ هيچ أي مگلتي انتِ شـ خبارچ صار شي جديد

- لا ملتهية بالدراسة تدرين سادس ويحتاج تعب
- وهيثم

- اشوفه من بعيد يوميا يجي ياخذ براء نهاية الدوام
بس مرة رحنا اني وأمي الميسم
وهناك گدرت احچي وياه شوية گال من تدخلين للكلية اخطبچ لأن بدا يشتغل وديجهز نفسه للزواج

- الله يتمملكم على خير تستاهلون السعادة انتِ وياه

للثنتين كلهم أجوي بس مروان ماكو
عمي مُنتصر وجب رحيل
بس لا عمي موسى ولا مرته ذكروها بثوب صغير عبالك بت الجيران مو لحمهم ودمهم ورغم هذا مهتميت

لليل گاعدة بالغرفة أغير تحتها
انفتحت الباب ودخل الأفندي شكله عصبي يمكن الجوة شاحنته ومصعدته الية لأن منظره مو طبيعي

- باوع للغرفة ورجع نظره عليَّ هاي منو نظفها
- اني منو قابل
- يلا انزلي سويلي العشى

گمت عفت رحيل ع الچرباية ونزلت حميت الأكل سريع
بالي ظل يمها ما آآمن عليها وياه

جهزت الصينية وصعدت ركض
فتحت الباب
لگيته گاعد يمها ومنطيها أصبعه لازمته بـ إيدها
تصنمت بـ مكاني معقولة هذا الديصير لو اني بـ حلم !!!

رفع راسه شافني واگفة تركها ونزل ع الأرض
خليت الصينية يمه وصعدت الها
بعدني مگاعدة حچى بنتره اني مو گلت تسميها أميرة ليش كسرتي كلمتي وسميتيها رحيل ؟!!

- لحگت أمك تفتن ما شاء الله
- عطاءءءء
- شبيه أسم رحيل والله احلى من أميرة بألف مرة ليش تريد تعقد الطفلة محلو أسم أمك هيَّ گوة قابل

- يعني سويتيها وياية شغلة عناااااد
- باوعت له وسكتت
- نصى ياكل يصير خير ان شاء الله أطلعها بيچ بعدين

- ولا إهتميت
شيريد يسوي قابل بعد ميخوفني بـ تهديده

شوية وبدت سهرتها
خطية هوَ يصير الليل والوجع يلزمها بعد متگدر تسكت

حاملتها وأفتر بالغرفة احاول اسكتها صاح دختتتتتت
باوعت له بـ ضجر الطفلة مريضة مروان

- مريضة على روحها مو عليَّ أريد أنطمر أخذيها ونزلي جوة لأن لو تظل هيچ اگوم اخنگها بـ إيدي

ابتسمت بـ إستهزاء وأخذت غراضها والعلاج
نزلت جوة الصالة ثلج
وين اروح خطية آمنة عدها دوام الصبح مو مال أسهرها

باوعت حايرة حتى صوبة ماكو بالمكان
حضنتها بـ قوة احاول انطيها من حرارة جسمي
من البرد وجهها ثلج

بعد أمها زادت بالبچي فوگ وجعها برد الصالة
اني هم بچيت وياها
ردت اروح يم آمنة طلعت بيبي من غرفتها ليش هنانة

- مروان ميتحمل صوتها وآمنة عدها دوام وين أروح
- الدنيا ثلج حرام عليكم تردون تموتون الطفلة بخبالكم

- حچتها وفتحت الباب تعالي يمي
دفيها عدل البرد مو زين على مرضها هيچ مراح تطيب

دخلت للغرفة گعدتها قريب الصوبة
دفى جسمها بس استمرت بالبچي باوعت البيبي شلون مو مراح تخليچ تنامين

- فدوتها يمة لا تفكرين بيَّ خليچ ويا بنيتچ وعوفيني

ابتسمت بـ وجهها وگمت أفتر بيها بلكي تسكت شوية
للصبح ظلت هيچ
بيبي تنام دقايق وتفز على صوتها انقهرت الحالتها بس شسوي مجبورة ابقى هنا معندي مكان غير غرفتها

ثاني يوم قبل الظهر مرت خالتي ساعتين ظلت يمي
غيرت تحتها ومسدت جسمها لحد منمامت بحضنها يلا رجعت للبيت
وظلت يوميا تجيني ومرات تجيب نيزك وياها تشوفني

إسبوع وصار موعد مراجعتها للدكتور
صعدت الـ مروان كان متمدد دينام تقربت منه بـ هدوء خلي احچي بالطيب بلكي أگدر أحصل منه شي

- مروان مروان دتسمعني
- شكو
- لازم أخذ بنتك للدكتور محتاجة فلوس عفية انطيني

- انتِ أغنى مني اصرفي من جيبيچ ولتظلين تگدين
- واني منيلي والله حلوة هاي
- ليش منيلچ من جبتي لسه العالم تدفع عبالچ ما ادري

- همْ أمك متبطل نقل حچي حـ تموتني ناقصة عمررر

- جيبي شگد عندچ خل اشوف بلا

بس حچاها خليت ونزلت
هيَّ هاي الناقصة انطيه فلوس الطفلة فوگ البخل مالته

دزيت خبر الخالتي بـ إيد مالك
للعصر اجت تاخذني طلعنا چان اتفاجأ بـ ناصر دينتظر بالباب بس شافني اجى أخذ رحيل من إيدي باسها

حتى التكسي جايبة لباب البيت
وصلنا للدكتور
گاعدين ننتظر دورنا سألت خالتي مروان انطاچ فلوس حچيت الها كل شي صار عافتني وگامت بسرعة

ظليت اباوع وراها مدري وين راحت
شوية و وصل سرانا
راح ناصر أخذ الورقة وطلع الفلوس من محفظته گبل صرت خلفه هاي شدتسوي الله عليك اگعد راحة

كل شي محچى سكتني بـ نظرة وحده من عيونه
ما خلاني أدخل
أخذها هوَ وخالتي ربع ساعة وطلعوا
راح يشتري العلاج من الصيدلية صرت استحي اعارض لأن كلما أفتح حلگي يخجلني بالرزالة النازكة

رجعوني للبيت من الباب وراحوا
دخلت ميته تعب
الليل كله سهرانة والنهار شغل بس نومتها نمت
توها عيني ماخذة النوم فزيت على صوت الباب إنفتح بـ قوة رفعت راسي مرت عمي واگفة ومتخوصرة

- نايمة المسعدة والدنيا زاهيتلها
- عمة تعبانة
- عمة العماچ ان شاء الله واحنه شكو تعبانة ميته هذا مو فندق گومي يلا شوفي شغلچ لا أشوف شغلي وياچ

- هوَ شنو شغلي ترى الصبح نظفت البيت كله والمطبخ لملمته بعد الغدة شـ ظل شغل فهميني

- گومي اغسلي المدات توسخن من المطر مالت البارحة
- أي ميخالف

- بس طلعت رجعت راسي ع المخدة شو دطيرررري

شوية ورجعت دخلت تغلط وتفشر
لبستها ولا عبالك أسمع
اذا الحايط يرد اني أرد ساعتها،، مرة مرتين عشرة الى أن ملت وتركتني

گمت قفلت الباب وجريتها نومة لـ ثمانية بالليل

گعدت على صوت بنتي
نزلت آمنة مسوية العشى خليت رحيل يم بيبي ورحت أصلي طول ما اني ع السجادة هيَّ تدردم عليَّ

اجى مروان بالليل لزمته أمه شحنته خوش شحنه
طب للغرفة ثور هايج
فشار على غلط على كلام منبوذ
تركته يصيح أخذت رحيل ونزلت الغرفة بيبيتي لحگني راد يطب وگفت بيبي بـ وجهه أخر شي طلعته وقفلت الباب

ثاني يوم أشتغلت الصبح رغم تعبي بس علمود اتجنب المشاكل حتى طاقة معندي علمود أعاندهم

لـ 12 الظهر خلصت كل شي
بدلت الـ رحيل ونومتها بـ غرفة آمنة
تمددت بـ صفها كل شي ما أريد غير بس أنام من التعب أحس اعصابي إنهارت الوجع براسي مو طبيعي

ما ادري شگد نمت
دخلت آمنة مرعوبة تركض وتتلفت وراها
نهضت بـ خوف شبيچ ولچ شكو وشنو هذا حالچ
صارت ورى ظهري أحتمت بيَّ تتوسل ضميني قمرررررر مروان اذا اجى للغرفة حـ يذبحني
بعدني بـ صدمتي دخل مروان السكين بـ إيده من الباب صاح تعالي لچ ساقطة اليوم أخذ روحچ بـ إيدي...

يتبع

لتنسووون ⭐⭐⭐⭐⭐⭐
كل الحب ❤🥀