من النور الى الضلام

البارت الثاني عشر

حمزه
اني من الجرح ياصاحبي تعافيت
عبرتني المنيه ويومها تبدل
لكَطت السنين ولحكت ع الضال
رحيت المصوفر كبل لا يذبل
تانيت امنياتي الما منعسة تنام
حتى اكدر بسكته من القيود افتل
عفت بيت ابوذية على العش مكتوب
كلبي بفركة الخلان وجناح
وبديت انحاز للشمات وجناح
صدك خليتني ريشات وجناح
لكن صفك جنحي لما ردت ارحل
صفك جنحي لحد غيمة
عفت ذاك الغصن هيمه
عمر وياك ادور حل
جبيرة السما وين اسال
اخاف اشرد ومااندل
الا ان قررت حسيت عمري الضاع
شفت الطير ثاري من يطير اسهل
اثاري العش عذر للما يعرف يطير
اكول شبي الشامت مايريد ارحل
حركني الظن مثل لعبة الغميضان
وره حايط الشوك بلوعتي اتختل
جنت الخاطرك تحلف بخلكي الناس
انازع واليمر يشوفني مدلل
حكت لاغلاطك بنصين كلبي اعذار
ترفه تغار منها حياكة المغزل
اضوكك بالجفن واستطعمك بالروح
واجمد ابعدك وبهواك انحل
مدينة ظني تشبه دولة افلاطون
شفتك بيها فكره استبعدت تفشل
طيني اتغلب بقوة على نار ابليس
تغلط واني اشوفك بس اكول اغفل
واتلمس جفونك لمسة المكفوف
اريد الكالي دمعه لو جفن مبتل
واتركك واسمع بعزتك تصهل خيل
خطوة تكلك امشي خطوة لاتنذل
وانه غيمة برد مابيها بس فياي
انطي الشمس ظهري وانجوي اتحمل
مرات اختنك لمن يجيني الليل
افك شباك صدك واوكف اتأمل
صياد احس روحي والنهر وشل
ول كلبي ليه الراي والشور والحل
يومن بدونك كنت اكظيه مكسور
تبطي الدقايق فيه والوكت يثكل
روحي بجنبك مثلت شاهد الزور
والحك من صوبي لصوبك تحول
كنت ارتجيك تكون في ظلمتني نور
وليلي في روحي بالبعاد طول
لما تركتك صاحلي الشوك معذور
والحب من مهر الاماني ترجل
عفتك بس احس مدري شنسيت وياك
واطمئنان روحي والامان اختل
اخاف من الندى والورد مااثق بي
اذا بلبل يغرد نار يمه اشعل
وراك الماي صافي والنجوم احجار
خصر الشمس منه شفت ليل انسل
نسيتك والتعب جف اليفك الباب
احس لوحة بحياتي بفركتك تكمل
وانه وصيت كلبي وكتله كلشي يهون
نوط جروحك على الروح شكله
ياكلبي وسبب ذل الطير شكله
منو يعرف النوم شلون شكله
لان لاشايفه ولامار بيه
......................................................................

ذيج الليله نمت ودموعي ع خدي تمطر

وهديوه تمسح دمعتي وتنزل دمعتها حارت اش
تسوي حتى بس اسكت واني ابد

ليش هساع انتَ متزوج ....ورطتني وياك ليش
لا يتركني ولا يعتقني منه

هالنوب كَلبي كَبت بيه نار وتسعر احس روحي
توجعني

ما اعرف ولا اتذكر شلون غفيت
للصبح، امي تمسح راسي تريدني اكَعد اكل
لخاطر اللي ببطني

بعدها ع تحجي وياي واسمع صوته
يصيح بأسمي

دموعي كتت غصب، همست

-يمه كَوليله انتهينا خلص ما ضل شي اسمه
يعقوب وحلاوه لا يحلم بعد

امي ما ردت، نزلت وتركتني

دقايق وصوته غزا البيت كَمت بسرعه للباب قفلته

هو صعد يدكَ بالباب لحد ما مل واني
حرف ما نطقت
اسمع امي تكَوله

-يعقوب ترا هالشي ما يجوز لا تضغط عليها يمه
والرب من البارحه ما نشفت الها دمعه
انتَ بالضبط تريدها تريد اللي ببطنها وذيج اش
غير نفهم
اترك بنتي كاااااافي

امي تحجي وهو نفلق يغلط عليا
كأني ما اسمع رجعت لفراشي تغطيت ونمت، اش ورطني وحبيتك واني ما اعرف الحب
الله ياخذك جنت ادعي وادعي ومن كَلبي همين

ع الشي الحسيت بيه بسببه

غفيت ما اعرف شكثر وجاني صوت هديوه

-حلاوه يمه بس اكلي لكَمه حبيبه واللي تطلبينه
يتتفذ يلا يمه فدوا ما كَلبي رح يكَف

مسحت دموعي وكَمت الها
ابتسمت بوجها ونزلنه، هي مستمره تحجي
اني ما اركز بـ اش تحجي

للظهر وجا ابراهيم مزنبر ويزاكَط
كَعد كَبالي وزكَح

-هي لعبه يوم اريد يوم ما اريد...هااااا ما احجي اني

اني ادحكَ بيه متفاجئه بأخوي

وامي تكفخ بيه ع ظهره

-هو هيج تحجي وياها غير تكَف وي اختك هااا

كَام وهو يهبط برجله ع الارض

-ما اختي ما ادمي، ماااا ادمي يا ناس
تكَدر تفهميني شكووو نضل هيج نحن هااا يوم نزعل يوم نرضا ارجع اني كل يوم جايبلي
ضباط وعمامي...حلاوه شي انتهى حرمته انتِ
طلع متزوج، ودحكَتيني اش سويت
ملخت حالي وكاونت وتضاربنه وقامت القيامه
وطلع هو ابو الحكَ
وعمامج وياه وباللي يسويه، القانون وياه والشرع
وياه
اش اكَدر اسوي ،نرفع قضية طلاكَ، تعرفينه
شكثر واصل ماكو داعي اشرح
اعتقد دحكَتي هالشي بحالج،واذا ما هو يطلكَ
لو انفلق الف فلقه ما اكَدر احول شي

طول ما هو يحچي ملخت حالي بچي
رديت

-فدوا مااااا اريد، ليش ليش ابراهيم ليش اني
ما جنت مرتاحه وكَلت ما اريد اتزوج
الله ياخذكم انتَ وياه

-ما تقدرين، شكثر تكاونت لخاطرج ع اكَولج واصل
بالدوله ....حتى اذا اريد اسوي شي

يفرها عليا حتى عيب نتجرجر بالمحاكم وما احول شي
ع تفهمين خبالووووو ع تفهمين

-اييييي وهساع شكوو جاي تهد عليا هاااا
شيش بيك عليا بلله

-حيوانه اش شيش بيا....بس يكَولي عقلها وخلي
تتصرف عدل لا اعدلها اني وتكاونت وياه
وهاي جيتي

-اي اني عوجه خلي يفكني، متزوج وابو نسوان وعينه فارغه وچذاب ماكو مثله

فرك وجها وسكتنا عبن امي كَعدت تنحب
بأسمي وتبچي

وحتى أثمها صار ابيض وخفنا

بطلت بچي وكَلت لابراهيم خلي معند واني اعند منه

واضل هينه حتى لو جا وخطفني ارجع
انهزم منه والله ما ترجعوني

هو ما حجا وامي ابد ما راضيه ع عملي
بس اني فد مرا مقهوره هيج شغله وغيره ووجع بداخلي اول مرا اجربه

لليل رجع جا جنت متمدده بحظن امي وابراهيم
ما هينه

هديوه تمشط شعري وتبوس بيا
همست
-تحبينه اعرف يمه لا تأذين حالج حلاوه لخاطره

نزلت دموعي غصب، رفعت نظري الها

-هالشعور يأذي يمه كَلبي يوجعني هديوه ليش حبيته ع اش حبيته كَصف عمره كون

استمريت ابچي ....وهي تمسح بدموعي
ما حسينه غير بدخلته
بدون لا احم ولا دستور، اني بمكاني ما تحركت ما بيا

سلم امي ردتله السلام

كَعد مقابيلي رأستاََ ورث جكَارته
اردف

-زعلج ع اش هااا، يبنت الناس عليتي حالي ما افهم اش بيج

ما جاوبت ضميت راسي بحظن امي

-يمه كافي ...هاي عرفنا ما تتراهمون اتركها
دحكَ حالها بسببك اش صار بيها

-واني اش مسوي الها عمه بدال ما تنصحين وتوعين تأيدين كلامها

سكتت امي، وبعدتني عنها وكَامت

-هذي هي اني ما اشيل خطا احد تكَدر تقنعها
شي يرجعلك

كَالت هيج وطلعت، نفضت حالي وكَمت بوراها
هو رأستاََ كمش ايدي وسحبني اله

دفعته عني وصرخت

-أياك أياك تتدنى مني ماااااااا اريدك بأي لغه احجيها

دفعني وطبكَ الباب بقوه

-شكووو غير افهم ع اش هذا فهمممممميني

توجهت اله، وشكثر جبرت حالي ما ابچي

-ارتاحيت انت وياها هااا، فوخت دودتها، لو دودتك انتَ شكثر حقيررررر واكرهك والرب اكررررهك
وخر عني واعتقني منك

هو انكَلب حاله وهمس

-حبيبي والله ما

بعده ما اكمل صرخت بقوه

-لا تحلف چذب لا تحلف، تريدها ضل عدها فهمت اني عبالك اتقبلك لو بالشهر تروح الها مرا

يااا اني يااا هي وحتى ما تختار ارجع الها واني ابن عمي كل اللي ببينه طفله

وايمتى ما ردت تجي تدحكَ بنتك تطر البيت وتفوت

صرخ

-انتِ مستوعبه اش ع تحجين، هساع كَبالي تمشين مثل الچلبه بدون نقاش يلا

فتح باب الاستقبال يسحب بيا بقوه واني ابچي
واصارخ بصوتي وامي
تدفع بيه عني وصلني للباب ودخل ابراهيم

بس دخل البيت جا طاير بأتجاه يعقوب
وتلازمو هو تركني وزنكَ ابراهيم من ياخته واحد اكل الثاني

امي ترجف، واني حالي ما احسن منها
عبن فد مرا صارت ناس ملخت ناس ويتضاربون بكل قوتهم

صرخت

-كااااافي كااااافي كاااافي يالله

وما حسيت بشي بعدها ....الدنيا تفتر بيا
احس بأمي وهي تبچي
وتضرب وجهي بس ما ع اكَدر افتح حتى عيوني

وهو صوته بأذاني، صوته وهو يتوسل بأمي
وغابت روحي

ما اعرف شكثر واحس بشي يچك ايدي
بالزور رفعت جفوني ودحكَت حالي

بالمستشفى ...وامي ويعقوب فوكَ راسي
بس دحكَني كَعدت
ضمني لصدره يبوس بيا
ويردد

-الحمدلله ع السلامه حبيبي ....

بعدت وجهي عنه

رجع سحبه لوجها،،هالنوب الممرضه واكَفه وامي
وهو مچلب بخلقتي

همس

-تسمعيني بالاول بدون خبالاتج رح انجن من تصرفاتج اللي ما تحسبيلي بيها حساب

هديوه تتحمحم تريد ماكو هو قافل

-يعقوب شو وخر وخرررر عنها ما ع تدحكَها اش حالها ....وخررررر

هو مزنبر يمسح بوجها ويدحكَلي

هو ما بيا شي بس بسبب الضغط،،وصراخي وما
ماكله زين
نهبطت واغمى عليا، بس خلولي مغذي

وكَومني هو بالزور امشي،ادافر بيه كَبالهم
وابراهيم طكَت روحه

دحكَني ما ع اكَدر امشي، شالني وصعدني بسيارته
بچيت، رأستاََ صرخ

-اياج اييييياج بطلي دلع وخلي نتفاهم لا ومحمد يصير شي بحياتج ما مدحكَته

ابراهيم رجع تلازم وياه بالباب،ما اعرف اش
همس اله ابراهيم سحب امي ومشو
واني تخبلت، اصرخ بأسم امي بجنون

جا لناحيتي،،عصر فكي

-كَتلج كافي فهمتي كاااااافي

خنست واشهكَ، اريدها تروووح ما ع ترروح يالله

هو صعد السياره ومشت بينا اني بس شهكَتي تطلع غصب عني اش اسوي يعني

ضرب الستيرن كذا مرا
واندارلي

-كااافي كَلبي يكَوم يأذيني من تشهكَين كااافي فدوا

دموعي نزلوو ع الحُب الچذابي

يمشي بينا ما اعرف وين لانو خرج عن منطقتنا
وسحب جهاز ما اعرف بمنو اتصل

-تسمعني، مممم وينك هساع بمكانهم يعني
لا دحكَ هييي دسمعني، نظيف لو لا، هاااا تمام لا يول بغداد شكوو لا، ههههههههههه
يلا بعدين اخابرك شكثر تخربط يلا هلا حبيب

سويت حالي ما ع اسمع شي ولا انتبه اله ....وهو همين ساكت

-وين تريد بيا رجعني لامي ع اكَولك ما اريدك غصب هي لو بالزور

التفت يعيب شلون احجي

-لا والله اي غصب وبالزور همين حبيبي

.

.

.

وصلنا وتذكرت نفسه هالبيت جابني اله من خطفني هينه

نزل فتح الباب، ودخل السياره
ورجع سد الباب وجا شالني بين اديه

بس رفعني لحضنه دحكَني، ونضره ع وجهي
باس راسي
ودخلنه البيت...ما چبير بس انو حلوو ومرتب
فرد مرا

صعدني لنفس الغرفه ...هذي ما اعرف صديقه
متزوج لو تاركه سياحه وسفاله
لو اش ما فهمت شي

نزلني ع التخت، تمددت بدون روح حيلي بايد
وجسمي يرجف وياي

بطني تمغصني شكلما صار هوسه واصرخ

هو طلع للمطبخ جابلي مي وعصير وكيك
خلاهم كَبالي اني أثمي مر ما ع اشتهي شي غير يعتقني

-يلا كَول احجي اش لازم افهم يلا خلصني

ما اهتم اش احجي طلع، اسمعه يطبك بالباب قفله
ورجع للغرفه طكَها قفل

جان لابس بنطرون اسود وقميص ماروني طوخ
بساع نزعهم وزتهم ضل بالداخليات وتدنى الي

-اش ع تسوي هاااا وخررر عني ماااااااا اريدك
ما ع اطيق اسمع شي يخصك
لا تتتدنى الي والرب اصرخ وافضحك وخررر

كأنو ما يسمع، تقدم الي سحب شعري
يشم بيا خلا وجهي بين اديه
ودنكَ لشفتي بدون وعي لثمها لدرجه اختنكَت

-ما تدنيت الها وعرش الله ما تكَربت منها
جنت تعبان وغفيت بمكاني عبن انوس لزكَ بيا وغفى بحضني حضنته ونمت والله

ما رديت ودموعي تكت، واني دايره وجهي عنه

صار بوجهي ما يفصلنه غير ملاكَى
خشومنه

انتِ ما عساس تحبيني اللي يحب
هيج يسوي ممممم حلاوه دحكَيلي، اعشكَج اني
عيب ما تحسبيلي حساااب لو غيرج

ادوسها بحذائي بس شلون بكَلبي حبيبي ما يرضا تتأذين ما يرضا تبچين

اشششش بدون بچي، حبيبي حلاوه ليش تسمحين
كلها تتدخل ببينا هاااا

ما ع احجي وياج خليني صاير مؤدب وهادئ
الا اتحيون هاااا

طول ما يحجي دموعي تهبط
ما حجيت ما ع اكَدر اصدكَه واطيق چذبه اشوفه
چذاب فرد مرا

تدنى الي اكثر ،باس كَصتي وخشمي وخدودي
بهداوه نزل لركَبتي

شمها بقوه، عضني بخفه اكثر من مرا واديه
بدت تتجول بدون رقابه....

-يعقوب وخر عني لا تجبرني لشي ما اريده
ما ع اصدكَك ع تفهم ما اصدكَككككك وخررر

همس
-احبك خبالووو، احبك يعلتي ابو عصافير، شو بس دحكَيني ولج اني اخونج سويتها بس ما هساع
ما اكَدر اتدنى عند اي وحده وصراخج يرن براسي

اول مرا ادحكَه هيج ذايب منتهي لابعد
درجه

نزل راسه لركَبتي يبوس بيا
لحد ما جهازه يرن ووهو فاقد اني لا بيا ابعده عني
ولا بيا اتقبل حركَة كَلبي

ابتعد عني، مسح وجها لانو جهازه مستمر
يفصل ويرجع

-نعم يلا الغي خلصيني،اهووووو شكوو شكوو تبچين ما نخلص من الموال هذا، دحكَي قسم بمحمد
ارجع افرك أثمج بالقندرا صيري ادميا

انوس خلي ينام نطي شي وسكتي عجل شكوووو
ولي يلا اي ع اكَولج انكَلعي خلصيني

استغفرت ربي .....هساع اش الورطه هذي
بس غلقه منها

همست بخنيكَ

-ليش تعذبنا هااا ع اكَولك روح الها هي همين روح وتريدك ما ع تدحكَ اش سويت بينا

ليش يعقوووب ليشش تعرفني يتيمه تحركَ كَلبي ليش ورطتني بيك وانتَ متزوج

زفر نفس وكَعد كَبالي جان يدحكَ ع الارض
رفع نضره لوجهي عيونه تصعد وتنزل
ع ملامح وجهي بين عيوني وشفتي....
اردف

-اچذب عليج اكَُلج نزوه وشهوه ونفسي بيج
لا وجلال الله لااا انتِ حتى ما تعرفين شكثر معاشر بنات ....
حتى مجرد تخيل ما يخطرلج ...اجملهن واحلى منج
بس كَلبي وين لاي وحده دكَ
ارجعي بذاكرتج....لمن جان عمرج 14 وتتمشين
بالشارع ومنو يمشي بوراج
والرب جنت حاسبج جاهله حالج حال ساره (اخته الزغيره)

شايله بأيدج چبس ع تاكلين ونضرج يتوزع
ع الشارع

تاكلين ودموعج تنزل وما ع تكَف ذيج اللحظه
كَلبي ارتبك ما ع ادحكَج الجاهله

اللي تركض وتزاكَط وتكاون وماخذه الدنيا بضحكتها
ومن جها متزوج اني وعندي انس منها

من ذاك النهار تربعتي بكَلبي ....تجاسريني
وتغلطين واني اضحك وبرضا همين

اتلذذ انرفزج،صرت ادحكَ جسمج وكل شي بيا ينتفض اريدج ....

واني متأكد عمتي هدى تدري عبن جانت تدحكَلي
واني عيوني بيج واتحسر

خطبت وسويت حالي هايم بيها واني مولع
بكل ذره بيج

وما كَدرت اكمل واستمر بالچذب ...يحجون بيج
ولد عمامي كلهم ويحجون ع ابراهيم
لصلافتج الا اني

اطب جتفه وابتسم عبن يتأذى من كلامهم

وبعد وبعد كل هذا وتكَوليلي ليش

سحب ايدي ع جهة كَلبه ..هينه احجي وياه

ولج هي سهله عليه اتوسل بوحده بكَد عمرها مرتين

.

.

.

ضليت ابچي ....حضنته تدنى الي اكثر
حضن وجهي بأديه،،،يبوس بوجهي مكان مكان

سحب دشداشتي مني وزتها ....نجن لحد ما ابتعد عني اني مستسلمه لاي شي ع يسوي

احبه واكره الضعف اللي يصيرلي من يكون بكَربي
رجع تكَرب مرا ثانيه

كَلبي يرجف وياه ....غزله بيا وبخلقتي

همست وعيوني بعيونه

-يعقووب احبك والله ...ما ع اتحمل الاذى وغيرتي عليك ع تموتني حبيبي

دنكَ التهم شفتي الجوه .....
وشفافه نزلت تتحسس جسمي بكل حب كَلبي يدكَ بقوه للمساته ...

-تأذين حالج بحالج ع احلفلج ما نفسي بمرا غيرج
احبج خبالوووو احبج ام عصافير

ابتسمت واني اخلي راسي ع صدره
غطينا بنومه وبطني تمغصني ابد ما راح ألمها

فتحت عيوني واني شبعانه نوم ويعقوب بعده
غافي تكَربت بوسته
وهو يبتسم حتى ما اعرف نايم او لا

تململ يسحبني لحضنه،،،جهازه بورايا

دحكَت الساعه بعدها بالخمسه وضلام بعد

تدنيت اله عطشانه اخاف اتحرك

-يعقوب يالله يعقوب ع تسمعني

-يالله ع اسمعج حبيبي

-ما تعيب كَوم عطشانه ريكَي ناشف رح اموت
عطش

بساع نهض فرك وجها وعلكَ الاضويا

يدحكَني ويبتسم ....ربي ما تحرمني منه،خليني بس اني بكَلبه وبحياته

طلع هو جابلي مي، فتح البطل خلاه بأيدي
دنكَ باس بطني

-اشون صرتي ع تتوجعين حبيبي، بطنج توجعج

هزيت راسي بـ لا

-زينه ما بيا شي بس جوعانه ....ع تمغصني جووع

-ههههه يدللل ابو عيون شهيلا ...هساع تاكلين كيك
ويكشف الضوا ...واحلى كَيمر لشفافك حبيبي

ابتسمت

-اي والله مشتهيتا تسوي فضل تجيبلي لنفرين

وضحكت، هو وياي فرد مرا منطلق
رجع تمدد واني كَعدت اكل كيك وهو يدحكَلي
كَعد مقابيلي واللكَمه بطرف أثمي

خله شفافا عليها وسحبها من بينهم، نرفزني

-اش بيك خلي اكل فدوا ...تريد انطيك بس ما اللي بأثمي

غمزلي مرتين

-اللي بشفافج عسل واطيب

سكتت عنه وكملت وهو يسحب بيا
لحضنه ورجع يبوس ويحضن ،يالله ما يشبع هالزلمه من هيج سوالف
ملعب هذا يربي،،،،ما جاني نوم اما هو بس خله وجها بركَبتي غفا

ما اعرف بوكتها اللي تصرفته صح
لو اش بالضبط لحظه الوم بحالي ولحظه انطي اعذار ما ع افهمها

وهديوه لو ان عرفت بيا رديت لنفس الموال
تنجن عليا يربي اش اسوي

تركتها لله وغفيت .....نص ساعه وكَعدت
وهو وياي فز ع فزتي

-هااا حبيبي نمشي، اش بيج ما مرتاحه

هزيت براسي، وهو رأستاََ كَام لبس ملابسه
واني بورا غسلنه

وطلعنا طلع للسوكَ جاب الريوكَ ورجعنا

بس وكَفنا مقابيل البيت ضاكَ نفسي وتنهدت
بنفاذ صبر ....

هو ساكت يدحكَني، سحب راسي ناحيته
باسني بقوه

-يلا حبيبي يلا مممم لخاطري حلاوه

ابتسمت غصب ونزلت وياه وهو مبتسم وايدي بأيده

بس دخلنا البيت العوجه بوجهنا وعمي منصور
همين كَاعدين ع يتريكَون بالمطبخ
سلمنا وبس عمي جاوب علينا
بساع كَالت

-بخت جنت عدها ونحن نخابر وكَلوبنا محتركَا وما ترد حتى

تحجي وتلوي بوزها، ضغط ايدي
وأشر براسه اصعد

تركتهم وصعدت وكَفت عند الباب عبن هو يقفلها

فلوسه بيها...وسلاحه وكوم شغلات تخصه

اما اني عدا الذهب وزاتتا بالجرارا

ضليت انتظر بيه واللغوه الصارت بسبب
الزقوم الجابه الي وبأيده شايله

اني بس اسمع الهوسه وعمي يغلط ع يعقوب
وعليها ،بس يعقوب وين يمشي عنده
هيج كلام ....صراخه خلا العيله

كلها تطلع مفزوعه وعفيفه طلعت من غرفتها

المكياج وملابس النوم الشفافه والشعر

منثور، غمضت عيوني واني ادير وجهي عنها بغضب

هي عساس استحت من طلع ادهم ركضت لغرفتها

غميت حالي ...هذي اش عامله بحالها
واني حتى ما اتذكر لبست ثياب نوم غير بمره جربتهم وما دحكَني بيهم

عود متزاعلين .....عوووع منج ومن شكلج القذر

هو جا الي ...بدون كلام فتح الغرفه
ودخلنا اني اتوجهت للكنتور اطلع ملابس الي
وهو نفس الحاله

واكَفه بالباب وهو حضني من ورا

-محد ع يرحمني، كفرت حبيتج كفرررت مشيت ورا كَلبي ...حتى انتِ وياهم ليش هيج

التفت اله حضنته وهو يبوس بيا

شال ملابسه وراح للحمام ...انتظرته يطلع
ورحت سبحت

بس طلعت الحمام هي صارت بوجهي

تخطيتها، سحبت ايدي تضغط عليها

-اذا ما هججتج ما اتسمى عفاف ....لتستعجلين ع رزقج والنبي اخلي تفله ميتفل عليج

نترت ايدها
-اعلى ما بخيلج اركبي واللي يطلع بأيدج سويه
شلون ناس بلايه كرامه وتحب الاهاين

.

.

.

دخلت علينا 2014 ونحن نفس الحوسه
وما تغير اي شي عدا انو يعقوب نقلوه من هينه
وصار داومه ببغداد

واللي نقلوه عدهم عداوه قديمه وياه
هذا اللي فهمته منه وسكتني

وهالشي سوا بيا حاله نفسيه عبن اخاف يتزوج هالنوب عليا واني عفيفه ما ع اتحمل
ادحكَ شكلها .....

بس غياب يعقوب عن البيت ....جنني وحبي وشوكَي اله يزيد
يوم عن يوم ....بشهر الواحد ما اتذكر تحديداََ
اي يوم بالضبط

بطني كبرت زياده وحركتي قليله بسبب
هالشي وهديوه مرات تجي عندي

ومرات الا ينزل يعقوب يلا ياخذني الها

جنت ع افتح الشبابيك اهوي الغرفه
واعزل ع كيفي بيها لانو يعقوب رح ينزل واني فد مرا مشتاكَه اله

نزلت اجيب مكناسه من جوا ....واني ع انزل
سمعت عفاف تكَول للعوجه

-عمه مينفع شكَد داحاول وادور وحده شغلها مضبوط بس ماكوو سويت مرتين ودتشوفين بعينج ميتغير شي

-عجل ضلي هشكل لا يدحكَ الج ولا ويلادج وضلي اتوسلي يدخل غرفتج وما يدخلها حتى

ولج هالزعطوطه لاحسه مخه اتصرفي ترا ان ولدت رح يروح صوبها وانسي عندج زلمه
ليش هساع همين حاسبه حالج عندج زلمه

هي بدت تبچي واني ما فهمت بالضبط اش مسويه اله مرتين اش يعني

ع افكر ونسحب شعري بقوه ....لو ما اچلب بالباب
جان ع ضهري
وما احس غير التكفخ بيا من كل ناحيه وصوتها
يرن بأذني

-الله ياخذج ويخلصني منج بواكَة الرياجيل، هالكَدج وما كَدرت اسوي شي لاحسه عقله

هي تحجي وتبجي والعوجه وياها
تأيد بكلامها واني بس اصارخ هو اني بالزور اتحرك
وشعري كَطعته بأديها واني

اريد افلت شعري من ايدها ما ع يفلت
بس كمشت ايدها عضيتها بقوه بس هي ملختني

هالنوب متفاجئه ماكو احد بالبيت ولا احد
جا فكني ....

تضرب ع خلقتي بقوه ..خشمي صار يكت
دم وأثمي نفس الحاله بس احس بالزفره بأثمي

غوشت الدنيا بعيني وبس باب الاستقبال اندفر
وصوت ادهم

-يمه حرااااام وعرش الله حراااام عليجن اش مسويات بالبنت يمممممه

حسيت بأديه ترفعني ....رفع وجهي
يمسح بالدم بالزور دحكَته يلهث خايف اديه تمسح بشفتي

الله ما خفتن منه، خويه شو حلا تسمعيني خويه

اريد احجي شفافي ترجف ...بس الدم
يخر من أثمي

غمضت عيوني احس بكل شي بس ما ع اكَدر
ارد عليه

شالني وبس احس بحركته وهو يخليني بالسياره
والعجيب ماكو احد ماكو اي مخلوق غير العوجه وعفيفه

فتحت عيوني بالمستشفى وادهم كَبالي بالردهه
اني ما مستوره شعري وحالتي حاله

بس دحكَني مسح راسي واردف

-ماكو شي خويه زين وضعج وبنتج زينه الحمدلله

ابتسمت وهزيت راسي اله

لحد مخلص المغذي صرت احسن
وكَمت وياه مفتشله من حالتي، تخزي فرد مرا

وصلنا البيت وادهم يمشي كَبالي واني بورا

وتمنيت ما راجعه واشوف الانظار كلها بأتجاهنا

من عمي للعوجه للعفاف لسيف لبناتهم لنهله اللي دموعها بخلقتها

بهذي اللحظات ما اتمناها لعدوي والله حتى لعفاف نفسها ما تمنيتها

ركض عمي لادهم يزنكَ بياخته بدون كلام يضرب ادهم
وهو خطيه ما فهم اي شي من عمي
ونهله همين اتجهت الي تفلت عليا واني مصفصفه
ادحكَهم اش صاير
ما استوعبت غير لمن حجت نهله

-ليش حلا ليش تخونين يعقوب وي اخووو عليج الله ما استحيتي ولج شلون كَدرتي انتِ

جانت ع تصارخ ونفس الشي ركضت لادهم
تغلط عليه وهو مبهوت وحتى كلام ما طلع اله غير بس عيونه تتنقل الي

جمدت وحرف ما ع يطلع مني ....وعمي ذبح ادهم
كتل بدون ما يحجي يضرب بيه
وهذا مستسلم لكل شي

صرخت
-عمي والرب والرب ماكو هيج شي. حسبي الله عليجن عممممي والله ومحمد ماكو هيج شي

وهينه هجمت عليا العوجه تكفخ بيا فوكَها

وعمي خبصنا وادهم كَاعد ع الارض حتى كلام ما يحجي ....دموعه نزلت وهو يدحكَ امه

-حراااام عليجن، ركضت لنهله
ولج ما تعرفين الحيايه ولج رح يخربن بيتج وبيتي ولج والرب چذذذذب نههههله فدوا ما تصدكَين

نهله حالها حالي ....تصارخ بخبال وعمي نفس الشي

والشغله طلعت چبيره ...اني وادهم بالغرفه

وبدون ملابس وبوضع مخزي والشاهده العوجه ووحده من بناتها وعفاف اللي

مدحكَتنا، هينه اختل عكَلي ...واريد احجي ما ع اكَدر
ادهم نفض حاله يصارخ

-وعرش الله ما صار ليش يمه لييييش رح تخلينا نتكاتل يعقوب ما فكرتي اش رح يصير بيه
كرهج ما رح ينفعج ...وانتِ تدحكَين ويلادج
ناس تكتل ناس

ما تجاوبييين يممممه ابنج بالطريق اش رح تكَوليله

شكثر مدحكَه ناس بلايه ضمير ....بس مثلها ابد
اش رح تستفادين من عفاف

ساعه وادهم يشرح لعمي والعوجه ما تركت مجال يصدكَ ادهم

عبن عفاف مدحكَتنا والعوجه شاهده وبنتها همين

جسمي كله يرجف ....اني ما مسويه شي
وخايفه من يعقوب ...حيلي باد وشفافي ترجف

ضليت بمكاني اطرافي ثلجت،وادهم يقنع بعمي
وجاب القرأن وحلف كَبال عمي

ما طخني ابد وان جان شالني غير لانو كتلني وما كَدر يكَومني وياه

وعمي ...عبن حلف ادهم كَال لعفيفه والعوجه
يحلفن

وهن تقدمن يحلفن بدون حتى تفكير
ودخل يعقوب علينا ...هينه كَولولي موتي اختفي
ولا يدحكَج اعرفه مجنون وبدون تفاهم
رح يسويها دم

عمي بساع أشر للكل يسكتون ويدخلون جوا

يعقوب دخل يخابر ما انتبه النا وكل ضنه نعرف
برجعته وخايفين عليه

ابتسم يبوس براس ابوه ...وحتى للعوجه نفس الحال

وهن يدحكَني عساس مسويات فضل عليا
ساكتات
هو يبوس بيهم واني تركتهم وصعدت غرفتي
دموعي بدت تنزل وجسمي

صار عباره عن مكناسه يطفطف برجيف ودمي
نشف

هو اسمع صوته يصيح بأسمي
ما بيا اكَول هااا او ارد عليه حتى ...لحد ما دخل هو

ركض ناحيتي يحضن بيا وشفافه ع كل سنتيم بوجهي تتنقل بلهفه

-ووووووف شكثر مشتاكَ، انعل ابو الشغل اللي يحرمني عطرك حبيبي

دموعي ما بطلت وجامده بدون نفس

بيج شي حبيبي، ليش ع تبچين حلاوه هااا ابويه
دحكَيني اششششش خرررب كااافي
يويل كَلبي شلون دموع يالله

-مشتاكَه الك حيل يعقوب ما تتركني فدوا لا تروح بعد ما اتحمل
هينه بديت ابچي بقوه وهو انخبص
كَعدنه ع الارض حاضني يبوس بيا بدون وعي

-ابددد جيت اخذج وياي نروح لبغداد اني همين ما ع اتحمل بمحمد بعد مكَدر هيج ابددد

اششششش كاااافي بدون بچي شو شو بس رفعي راسج....احد حاجي وياج منو مزعلج
كل هذ عبن مشتاكَه الي چذااابه

بلعت عبرتي واني اهز برأسي

-مشتاكَه الك فد مرا ....ع احجي وياه وعيونه تصعد ع خشمي وتنزل لشفتي

تلمسهم واردف

-اش هذا منو ضاربج ....سكتتت
ما تحجيييين خرسا احجي لا انزل اكَلب الدينا ما ع اسأل ...ومن دحكَ ماكوو جواب
تركني وطلع هرج الدنيا

بس حتى جواب من اي مخلوق ما حصل، اسمع صوته وهو مفرفح يصارخ

الا بنت الشوارع اللي ملفيها ردته

-شمدرينه قابل احنا ضربناها حلوه هاي هي ايمت تنزل اصلاََ يا كَاعده ع التلفزيون يا نايمه

هينه تفرعن عليها ويصارخ

-دكَولي اني احجي والا اكَلج بدون ما تحجين اعرف سوالفج

بلش غلط وتكفخ بيها لدرجه صوتها غزانا
واني ادحكَ ومحمد تمنيت يضل يكتل بيها وما يشفا غليلي جنزها

وهي حبله صارت الدمايا شط جواها وعمي
تخبل عليها

اما يعقوب تركها وحتى ما التفت، صعد الي
سحبني للغرفه وطبكَ الباب بقوه

-ما تحجين مووو احجي ما تردين مووو ولج ليش ساكته لا تجننيني

ما عندي شي احجيه اخاف اكَول العوجه وعفاف
ويحجن السالفه اله

يعقوب واعرفه هو مجرد كَالو اله تدحكَ واحد موتني كتل
ما عاد اخوو ضليت ابلعم وركضت حضنته بقوه
هو بادلني يمسح راسي

خفت خووف ما طبيعي ونسيت شلون جنت مشتاكَه اله وحتى انو ما مدحكَته من 10 ايام همين نسيت

فرد مرا شكله متغير ...
هو صح اسمر بس
صاير اسمر بزياده وهالنوب شواربه سوود صاير يخوف

-ما رح تحجيلي ...اعرفج اني مشكلتي حافضج حلاوتي شو ابويه اش صار بغيابي

نزل ايده لبطني ورجع دنكَ باسها

-ماكو شي بس اشتاكَيت الك ولهديوه من زمان عنها ما رحت الها يلا يعقوب فدوا اسبح وارتاح
نروح لامي يلا

ابتسم وهز راسه
-واني ممممم ما مشتاكَه تضلين وياي ...

ع يحجي وندكَ الباب بقوه وصوت العوجه
تردد

-ما تطلع جيت للمسعده ..ذيج رح تموت فاضت ولك ما تخاف ربك انتَ ....ما ارضى عليك ليوم
الدين ع عملك هذا

هو استغفر وبعدني عنه
وبملابس الدوام طلع وراح الهن وهي بچيها
خبص البيت،،،وحوبتي ما خطتها

ضليت انتظر وانتظر ورجعو ورا اذان الضهر

ويعقوب دخل الغرفه تمدد ع التخت وهمس

-حلاوه طلعيلي ملابس اريد اتغوسل عاد خست معفن من يومين

ركضت للكنتور حضرتله وخليتهم بالحمام
لكَيته غافي
اريد اسأله واخاف،،ندهته

-يعقوب يلا ما تريد تسبح كَوم يلا

سحبني فوكَاه بوسني ورجع يشم بيا بالزور ابتعد
واني ضليت بمكاني

الهبطه اكلت من كَلبي وجسمي ما ع يكَف ويبطل يرجف
الما طلع بنشف بشعره وكَف ع المرايا

-يعقوب اش صار ع عفاف زينه ماا

-اجهضت

بس كَال هيج وبعد ما حجا شي واني همين سكتت
ليش الچذب فرحت

وبداخلي حمدت الله عبن بساع عاقبها

بسببي او بغيرا ما هينه تتهمني بأدهم وبكلام خزي

هو تعبان بس ضل واكَف يدحكَ حاله
بالمرايا وباله ما وياه

-يعقوب يلا ما نرووح .....ضل ساكت فرك وجها

-اش صار شلون تكاونتي وياها،،نحن نضل هيج
ولج ما تخافين ع اللي ببطنج اني ما تحسبيلي حساب

صفنت اش حجن اله هساع شلون احجي

-والرب ماااا ...اريد احجي وهو صرخ بيا

-كاااافي ما اريد اسمع

تركني وراح للتخت،،،اكبر غلط ما حجيت اله
الصار اني بس ردت اروح لهديوه

حتى هي تتصرف ما جنت اعرف اش اسوي حتى
بس الخوف اخذ من حيلي حيل

تكَربت منه، هو بي حاله يخلي المخده ع وجها
بعدتها، دحكَني بغضب

-يعقووب ما عساس مشتاكَ الي ممم مااا عساس تحبني وين حبك

استغفر ودار وجها،،،نرفزني

-يعقووووب ما تجاوبني

سحبني اله،،،،يتلمس خشمي وشفتي

لانو احسهم بدو يورمون ....هو بالاصح أثمي من لحظتها كبر

-ولج ليش ساكته، ع تتوجعين هاااا حبيبي
حلاوه، اشش ما اريد ادحكَج تبچين

-والرب ما أذيتها والرب حتى ما حجيت وياها
بدون سبب ضربتني

حضني لصدره،،واني بالزور حضنته عبن بطني
ما تسمح
همس

-اريدد ....

-اش تريد، جوعان عندي هينه رمان من الجبته الي

ضحك ومسح وجها

يعقوووب ما تحجي ما تريد رمان ...اكو موز
ممم لا هذا ما تحبه تريد اجيبلك
كيك

هو مستمر يضحك ...تدنى يبوس بيا

-ما اريد غير اشبع عيوني من خلقتج

حلاوتي ...اريد اضوكَ متلهف وجلال الله

-اش غير افهم اش بيك يعقوب ،،صاير لوتي

-لا والله وانتِ ما ع تفهمين عليا يعني

هزيت راسي بنفي ...حضني اقوى
وتمدد ينام

العصر كَعديني نروح لهديوه،اني همين
مشتاكَ الها ولابراهيم والله

تمدددت بحضنه مبتسمه،وهو بساع غفا
عبن تعبان .....

ضليت مبتسمه ادحكَ خلقته ...بس ليش الچذب الرجفه ما ع تروح مني وع لحظه اخاف

تصير مصيبه وادهم ما حجا وي يعقوب حتى

مشيت اصابعي ع عيونه ،ابتسم بثول
بست عيونه وكَصته وخشمه

هو بعز نومتا ع يبتسم، خليت خشمي بركَبته
تنهد ع حركتي
بسته منها اكثر من مرا ...همست

-احبك والرب ما يحلا زلمه بعيوني غيرك انتَ

هو ومغمض لثم شفتي وانفاسه زادت

-شكثر تحبيني ممم كَولي حلاوه، لتشلعين كَلبي

ضليت ساكته وخاتله بحضنه

حبيبي خبالووو اندار قربان لعيونك ابو عيون
شهيلا
ابتسمت اكثر

كَمنا ثنينا وهو يدحكَني مبتسم،،ندكَت الباب
بأيد خفيفه
وصوت انس وهو ينادي

با با اتح با با

بساع راح للباب هي فتحه وهي حضنه
لانس
وهو الطفل فد كيف وفرحان ضحكته ترد
الروح وهو يحضن بيعقوب

وهو يعقوب يشم بيه ويبوسه بقوه وهذا متونس
يضحك ...

سحب محفضته وخلا 25 بأيده ومستمر يبوس
بيه ....هو طفل وما يعرف الفلوس عساس

بس تربية عفيفه اش تطلع

هو طلع شايله ويلعب وياه ...تنهدت بألم

ليش ربي اش مسويه اني حتى عفاف شكثر

اكرها ما أذيتها ليش هيج وياي

استغفرت ربي ...صح مبتعده عنه وما اصلي

بس بداخلي موجود ودائماََ استعين بيه

رجع واشرلي امشي بورا خليت ايدي بأيده

-البسي عبايتج ابويه يلا الا احجي يعني ما حاله هذي

غميت حالي ورجعت لبست واتسترت

ونزلنا...العوجه بالمطبخ تبچي وما اعرف شكوو

ونهله وجهها ما يتفسر وهي تدحكَني

بعدت نظري عنهم وكأني ما ع اشوف لحد ما طلعنا
من البيت تنفست براحه

يربي اش اسوي ...ركضت للسياره وهو حتى يغلط
عبن ركضت

-ترا كرهت هيج اضل مقيده لا ركضه لا مزاكَط
والرب بعد ما احبل

-لا والله ما بكيفج هوو السالفه يعني

-اي بكيفي، كَول يلا بكيف منوو هااا

جنت احجي واضحك

هو عفس وجها عبن كلها تكَوله تمشي بشور حلا
سحبت شواربه
هو عاط متألم وعض ايدي

-خرب شيب العرج حيوانه هو هيج، اخخخ بويه جننتني هالبنت

-عليك الله ما تحجي بمثل هديوه تضحكني عليك بدل ما اخاف

كَلتها وتدنيت بست شواربه

مشينا واني مخليت شغله ما سويتها
مرا اكَرص ايده مرا اهلس شعر ايده وهو يتساخط

شغل اغنيته اللي يحبها ويردد وياها

حبيبي امك متقبل من احاجيك روحي معلكَه بيك

بكل مرا يشغلها ابتسم

بس وصلنا نزلت واني امشي بسرعه
هو بوراي
دخلت البيت اصيح بهديوه

يمممه، هديوه وينج حبيبي يالله ليش ما تردين

طلعت هي دموعها تكت،،واني ركضت لحظنها

-اش بيج يمه ليش ع تبچين عليج الله شكوو

مسحت دمعتها ودخلنا الاستقبال ناسيات يعقوب

ابراهيم منتكي ع الحايط والدمايه تارسته

ويعقوب دفعني وكَنبص مقابيله ينفض بيه ما ع يرد

التفتت لامي

-عمه شكوو منو هيج مسوي بيه ما تحجين

-اخوان البنت اللي يحبها ... كَالت هشكل وبچت بقوه

ابراهيم بهذي الحاله وجكَارته معلكَه بأثمه

يعقوب سحبه بالزور طلعه وياه ومن طلعنا
بوراهم صرخ بينا نرجع

ابراهيم هيكل ع يمشي ويعقوب يشحط بيه
وهديوه نكَزت بچي

التفتت اسكت بأمي ...اللي كتلت حالها

-يممه فدوا هدي هساع يعقوب يحلها والرب متأكده ورح تدحكَين اش يسوي

-ولج يمه الف مرا كَلتله جوز عنها ...الخلقها خلق مليارات منها اش اسوي ما ينفع وياه

حضنتها ...شوي ونست تقريباََ ورجعت تبوس
بيا
وكَامت جابت جهاز بنتي اللي لليوم ما اتفقنا اش
اسميها.....

هو ليش الچذب من اول ما عرفت بيا بنت واني
بببالي اسميها "هدى " ع اسم امي

وما صار مجال اكَول ليعقوب يلا ملتهين
بكوناتنا وهوساتنا

وكَعدت تشوفني شكثر جايبه الها غراض
حتى ستوتات لشعرها

بچيت وضليت ابچي واني حاضنتها اريد احجي
وما اريد ازيد همها همين من جها ابراهيم
واني اللي الحياة

ع تبعثر بيا اريد وما اريد لازم افهم يعقوب
بالاول ما عندي غيره ولا اكَدر بدونه

والاتهام هذا يهجم بيوت ...هي نجنت تدحكَني ابچي
وع البچي مالتي تبچي ...

ضلينه هالشكل ....سكتت وهمست

-يمه يعقوب ما تغدا وهساع يجي جوعان نكَوم نسوي عشا ما احسن من البچي

ابتسمت وكَمنا سويا لحد ما غابت الشمس وهم ماكو
امي عينها ع الباب

وبس دخلو البيت زتتت اللي بأيدها وركضت
لبراهيم

-هاااا اش سويتوو يعقوب عمه همين رحتو تكاونتو

طلعت ادحكَ يعقوب ملابسه مكشمه
وابراهيم راح بحال وجا بأخس منه باد حيلي واني ادحكَهم

-ماكو شي عمه بس فركَة اذن الهم حتى يعرفون بمنو اندكَو

وهو بأيده اخذ ابراهيم للحمام بالزور يدفع
بيه ويردددد

-يلا يلا اشلعها الك من شواربهم بس اصبر تايها الهم وعينك تشوف ان ما خليتهم
يبوسون حذائك تتزوجها كَول يعقوب كَال يلاااا

اني بوراهم لحد ما دخله الحمام ....جا بأتجاهي
واني حضنته ابوس بيه وابچي

يتبع .......