『قٌصص ﺑٱرۅد』

⍅الحافي و الاميره⍆

_

اصعب طريق عليه بالدنيا هو طريقي الصبح من باب بيتنه لحد المحل الي اشتغل بي ..ليش؟ مع العلم المسافة كلش قريبة؟

لأن من اطلع من باب بيتنه مرات تصادف طلعتي وي طلعة اصدقائي و ولد جوارينة الي يداومون معاهد و اعداديات و حتى كليات ..

طريق المحل نفسه هو طريق المشي الي يودي ع الشارع العام حتى الكل ينتظر وسائل النقل الي يروح بيها لدوامه (طلاب .. موظفين .. عمال )..

بهل الطريق مرات چان يصادفني ثائر ابن جوارينه لو رزاق لو ارمين لو كرار .. هذولة كلهم ولد منطقتي و كلهم دارسين بس اني الوحيد بيهم ممكمل دراسة بسبب العيشة..

ع العموم والله مو قضية حسد لو غيرة لأن اني مؤمن بسالفة (محد ياخذ اكثر من نصيبة)
مرات چنت اشاركهم الطريق لحد راس الشارع و هناك نفترق اني اروح للمحل و همه يروحون ينتظرون الخطوط حتى يكملون الطريق لدوامهم ..

چنت من افترق منهم صح جسمي يروح للمحل و ايدي تفتح الكبنگ و ابده ارتب الغراض والبس بدلة الشغل ..

بس !!
گلبي و عقلي يروح وياهم لدوامهم و اتخيل شراح يصير بكلياتهم و بمعاهدهم و شلون يگعدون بالقسم و شلون يشرحلهم المدرس او المحاضر ..
امنيتي چانت اخلص دراسة و الله العظيم مو امدح نفسي بس اني ذكي كلش و الشغلة الي اسويها مرة ميحتاج احد يعلمنياها مرة ثانية حتى اسويها ..

الحاصل ..
مقابيل المحل بالضبط اكو محلات و مكتبة مال قرطاسية .. مقابيل المكتبة تصير وگفة مال طالبات كليات ينتظرون خطهم يوديهم للكلية ..

كلهم بنات المنطقة و اعرف اغلبيتهم بحكم اني مولود بهل المنطقة و اعرف كل الناس و الجوارين .. و مو بس هالشي الشي الثاني اني مكمل دراسة لحد صف خامس علمي و مبطل ..

و اكو بهل بنات صديقات طفولة هم بالمنطقة و هم بالابتدائية مرات چنت اباوع عليهم بس والله مو قصدي شي مو زين لا سامح الله بس من باب الفضول و من باب اتذكر شكولاتهم ..

و فد يوم رحت عادي فتحت و گعدت جوه بالمحل و سمعت صياح مال بنات من الفزة مال الصوت ركضت حافي لان من اگعد بالمحل انزع الشحاطة (مكرم القارئ) ...

ركضت و چان اشوف أميرة مچلبة بوحدة من البنات و دجر بيها من شعرها ..
منو أميرة؟
أميرة وحدة الله يحفظنا و يحفظ الجميع عدها مرض نفسي و الكل يعرفها بالمنطقة و اصلا هيه مو اسمها أميرة بس احنى بالمنطقة ملقبيها بهل الاسم ...

مرات تجي يم المحلات و الناس تنطيها لفة لو تنطيها فلوس مع العلم اهلها كلش طيبين و يحاولون ميخلوها تطلع بس هيه تغافلهم و تنهزم .. ع العموم الله يرحمها لان المسكينة اندعمت و ماتت وره كم سنة من هالموقف ..

الحاصل ..
اني ركضت و چان اجر البنية من ايد أميرة والمصيبة اباع ع البنات كلهم مهزومات ههههه يعني الجبانات واگفات بعيد و بس يصيحون ..

گلتلهم هو هذا الفالحات بي بس تصيحون مگدرتو تفكون البنية من ايدها ..

محچو شي و أميرة راحت و البنية تبچي و فوگاها حتى البنات هههههه هم يبچون لزمتني الضحكة بس الموقف خلاني ساكت و البنية الي خلصتها من ايد أميرة بديت احچي وياها و اگلها كافي خلص مصار شي و ماعرف شلون باوعت ع البنات الورايه شفتهم يضحكون ..

چان اتذكر اني حافي هههههه و من يومها لهذا يوم الله الكل يعرفني و يلقبني بفلان الحافي لان الموقف اهل المحلات القريبة شافته و حچته و سمعوه اصدقائي وهمه الي طلعو هاللقب ..

ع العموم مو مشكلة اللقب لان مو هاي قصتنا ..
البنية الي ساعدتها ثاني يوم جتي هيه و امها تشكرت مني و وراها مادري ليش گمت ادور بالوجوه على هل البنية ..

بقت براسي و حسيت اريد احچي وياها بعد مره بس مشفتها بعد ... يوميا انتظرها تجي و هيه ماكو و الحلو بالموضوع البنات مرات يسلمون عليه و اريد اسألهم بس استحي ..

بس وره اسبوعين گلت على شنو مستحي؟.. عادي
بحجة اسويها بالضحك و اكلهم وين صاحبتكم الي من وراها صرت حافي ..

و صدگ والله سألت و المصيبة طلعو البنات ميعرفوها گالو بذاك اليوم چانت اول مرة تجي هنا و وراها ابد مشفناها ..

استغربت اني و بقيت ادور عليها بنص الوجوه ..
لحد ما گمت اسوي شغلات اول مره اسويها بحياتي..

گمت انزل اني اتسوگ للبيت من السوگ الجوه ..
و بالسوگ اگول بلكي الله اشوفها صدفة ...
و ياريت لو بس ع المسواگ حتى گمت اسوي علاقات وي شباب بالفروع الي بعيدة عن بيتنا و اگول بلكي الله من اكون هناك يم الشباب تفوت صدفة بوحدة من الدرابين ..

بالمناسبة البنية مو كلش جميلة و لا تخبل و تموت و هالحچي بس ماعرف الي صار بالضبط و خلاني هيچ ادور عليها..
و مشفتها بعد ...

لا بالمنطقة و لا بالسوگ و لا حتى بالدرابين و لا حتى بنفس المكان الي صار بي الموقف ..
على گولة ابو المثل ( فص ثلج و ماع لو فص ملح و ذاب )
اختفت ..

الحاصل .. اقرب وحدة عندي بالدنيا هيه أمي احچيلها كل صغيرة و كل چبيرة تصير بحياتي .. وهي تعرف كل القصة و تگلي انت حبيتها بس هذا حب عابر و بمرور الوكت تنساها ..
گلتلها يمه ماعرف بس اريد اشوفها ..

طبعا أمي صح چبيرة بالعمر و صح متعرف الاألف من الياء و لا قارية و لا كاتبة بس ذكية كلش ..
وفد يوم رحنى اني وإمي لشارع السعدون لأن عدها تحاليل .. و اكيد الاغلبية بيكم شايف العيادات هناك بالسعدون شلون صايرة يوم المحشر و بيها ناس من كل محافظات العراق .. لأن المجمعات هناك طبية و بيها اسامي دكاترة كبار و مضبوطين لكل الاختصاصات يجوهم الناس من كل مكان ..

الحاصل فتنا لعيادة و گعدنا ننتظر سرانه امي عطشت و گالت اريد مي يمه اكو ترمز من هذولة الصغار الي قبقهم يصير ازرگ لو اخضر لو اي لون ثاني و بي بوري صغيروني ع الميز محطوط ..

رحت اترس منه كلاص مي لأمي چان السكرتيرة تگلي اخوية ترى الترمز بي ثلج قبل شوية حطيتله بس مابي مي دقيقه اخلص الي بيدي و اروح اترسة ..

گلتلها لا اختي ابقي كملي شغلچ و بس گوليلي وين الحمام و اني اروح اترسة .. گالت بره بالممشى ع اليسرة بصف عيادة دكتور فلان ..

اخذته للترمز و طلعت دامشي للحمام چان عيني تصير صدفة ع الگاعدين بوحدة من العيادات چان اشوف نفس البنية وي أمها ..

جمدت بمكاني و ماعرف شسوي و من الصدمة دخلت بعيادة ثانية و نسيت اصلا اني شداسوي حتى نسيت أمي وياي و من باوعت ع الترمز تذكرت كلشي .. ركضت رجعت لأمي و گعدت بصفها گلتلها هيه هيه و روح ابويه هيه ..

أمي گالت شبيك تخبلت شنو هيه و وين المي؟
گلتلها نسيت هههه و صدگ نسيت اترس الترمز و رجعته مثل ما اخذته ..

گلتلها هسه اترسه بس يمه هيه البنيه الي جرت شعرها اميرة المخبلة برة بوحدة من العيادات و گمت ابوس ايد أمي و أگلها شسوي الله عليچ شسوي؟
گالت وين هيه؟
گلتلها هناك .. چان تگلي گوم ..

گمنا طلعنا و دليتها ع العياده و اشرتلها ع البنية بس بدون متشوفني البنية لان تعرفني ..
گالت هاي امها؟
گلتلها ما اعرف ما اتذكر نسيت شكل امها بس يمكن أي هيه امها ..
گالت اختفي ...
گلتلها شنو يمه؟
گالت اختفي ابن الابنل ..
گلتلها شنو يعني گالت ولي انتظر بره و لا تخليهم يشوفوك ابقى انتظر بره العمارة بعيد و اني من اطلع تعال عليه ..
گلتلها صار ..

چان اطگها بركضه و نزلت وگفت يم ابو عربانة مال لفات و چاي ع السايد الثاني مال عماره و طلبت اكل و چاي من ابو العربانة بس عيوني ع الباب مال العمارة ساعه و شويه تقريباً چان امي تنزل ..

رحتلها چان تگول جبت رقم امها و صارت صديقتي بس همه مو من المنطقة و بيت اختها للأم البنية يمنه بفرع بيت ابو فلان ..
گلتلها هاااا شلون؟
گالت سويت نفسي جاي مراجعه على نفس العيادة و بديت احچي وياها و عرفتها على نفسي و تعرف حچي النسوان و التعارف شلون يصير و افتهمت كلشي من ام البنية ..

گلتلها اهاااا هسه افتهمت لعد هذولة چانو جايين خطار و بايتين يم گرايبهم و الصبح دتروح لدوامها من يمنه..
گالت اي يمه اكيد هيچ صار ..

گلتلها زين معرفت البنية انتي امي؟
چان تگول لك انت والله اثول هههههه گلتلها ماعرف يمه من الفرحه گمت اشخبط بالحچي .. گالت عوف كلشي عليه معليك انته ..
گلتلها اي يمه فدوة لعمرچ ..

و اشتغلت التلفونات بينها و بين ام البنية و أمي عزمتها من تجي لبيت اختها تمر علينه للبيت ..
وگالت من تجي ام البنية انت افتح الباب حتى تعرفك ..

و صدگ والله وره كم يوم جتي امي البنية و اختها (الي بنفس منطقتنا لبيتنا) و دگو الباب و اني فتحت ..
بس المفاجأة چانت شنو؟
ام البنية اصلا متعرفني و لا شايفتني بحياتها ..

بس خالتها هيه الي اني عبالي امها بيوم الي جتي تشكرت مني، طلعت السالفة شنو؟
صح توقعي ... چانت البنية بايته ببيت خالتها لان امها مريضه و بالمستشفى و ثاني يوم عدها دوام و بقت تنتظر خط يروح لنفس كليتها من مقابيلي و ابو الخط جوارين بيت خالتها و ابن خالتها رايح محاچي و گايله بدون زحمة بنت خالتي تاخذها وياك بس هالمرة لان عدنا حاله و هالحچي ..

و طبعا هو وافق بس البنية وره الموقف الي صار وي اميرة رجعت ومداومت ..
المهم خالتها عرفتني و گالت يا يمه الدنيا شگد صغيرة (لان خطية متعرف انو العقل المدبر لضربات سبتمبر هيه أمي وهيه مرتبة كلشي) ..

ع العموم
خلصت الگعدة مالتهم و بس طلعو النسوان رحت ركض لأمي چان اول كلمة تگولها ..
مو من قسمتك ... گلتلها ليييييش
گالت حاچي عليها ابن خالتها و بس تتخرج يتزوجون ..

طبعا انقهرت وره كل هالتعب و حق الي خلق هالدنيا لو البنية حالتها غير شكل چان حاربت الدنيا كلها و اتزوجتها بس مو من قسمتي ..

ومرت ايام و سنين و اتزوجت اني و صارت سوالف الشغلة بس منسيت البنية لهذا يومنه و الغريب بالموضوع لقبي الي لزگ بيه طول هالسنين يذكرني بيها كل يوم و كل دقيقة و چنت ناوي اسمي بنتي اميرة على اسم الي چان اساس هالموقف كله بس امي مقبلت هههه

شسويت اني عندي كيا الحمدلله و الشكر ..
الكيا مالتي لازگ عليها ليوره عالجامه الخلفيه اسم جبير كلش .. شنو الاسم؟
الاميرة ... صح مقبلت امي اسمي بنتي اميرة بس قبلت اسمي سيارتي الاميره

( الحافي و الاميرة )
انتهى