بارت ٥٤
#أماً_لهُن
#مريم_السعدي
.
.
ياجشع كلبك ياسواد البيك
اضلم كبريائك قاسي ومدمر
بجهل لحضات عمري فصلت روحي عليك
ضنيتك اصيل ماحسبت جوكر
عكس وياي وترهم بس وي الغير
بس شخصي اليعذب شخصك اليغدر
مو مفهوم ياطبع الغموض البيك
سبع فرات كلبي ب دوامه غضب تفتر
هاهي انتهت اخر نفس للموت
ماضل بس وجع كلبي بنارك التسعر
احركهن شلع كلبي وذكريات البي
لتبقى ابد لا صوت لا صور
لتبقى بعد
لا صوت
لا صور
ازل .....
ثاني يوم الصبح جتي ام صالون للبيت سشورت شعرها ولفته من من جوه بترتيب وسوت الحجاب الها ومكيجتها تميكحجلها وتتمركص خبلتنا
- وج ماما ثكلللل عيب وج عزه شيكلون عينها كويه
- خيكلون عشتو شيحجون خلي يحجون
عسل....
يعلم الله مابقلبي من فرح
قد شافى ما ارتشفته من قرح
يعلم ربي هاجس قد نما بقلب قد توقفت دقاته عن النبض وعادت بمعجزه
قد عشت طفولتي
ومراهقتي وصباي على يده
وها انا اعيش شبابي
اربع مراحل قد مرت بسنين
عليه العوض ومنه العوض
شكرا يارب على مجمل عطاياك
التي تجسدت بانسان
بل هو اكثر من كلمه انسان
حبيبي
خاطرتي
جبران خاطري
جداري الثابت
سقفي المضل
ياكل اشيائي
ياكل تفكيري
يا انااااا
يا نفس نفسي
يا اكتمال قمري
دزيتها برساله بصباح العرس
رد عليه
الللللله كلها بجفه وال (يا انااا ) بجفه
بعدج معشتي كلشي وياي
وياي تعيشين مرحله مرحله
لا اعوض حق سنه سنه عشناها بتعب ثنينا منريد شي بعد عمري احنا واحدنا يكمل اللخ
- صباح الحب
- صباحي عسل ياغزالي
- وين انت
- بالمزين ديزين السياره كملتي
- امم داانتضر
- هسه رايح للبيت
وصلنا وحسن بالباب هااااا خال شدتسوي
- داسوي كلوبات عرسك بعد شيب كلبي انت
روحي عسل كالها وسد الفون
غمضت عيني وباوعت بمرايتي همست للوم
- اقري سوره الفتح
- اوك
طتني القران طبت بيبي تحضر بمي الورد والياس حتى تبدل الحلقات طب عمو رائد ابتسمت تقرب باس راسي ولبسني سوار باوعت لازل ابتسمت وعيونه تشكلت عليها تسحب وكعد بصفها عدلت القاط اله وشعره وهو يباوعلها يبتسم بس عيونه تسولف حب هاي اختي شمسويه بي شنو هالتغيير الصابه باع شون يتاملها
للومه تباوعله وتتبسم حرملت للوم وبيبي تنشر وتباوع لازل ورائد
كلنا انتبهنا عليهم نظراتهم ابتساماته توعد بدنيا جديده وبسعاده انولدت وي ولاده فرحتي
خابر عمو انور كال ساعه ونص ونجي ينتظرون اهل ابو عمو انور وديحضرون بالبيت حسب مكالت للوم واني النسوان يمي نسوان عمام عمو ونسوان خواله حفله ثانيه وركص واني اترقب الباب ازل اختفت وي رجلها
- للومه ازل وين
غمزتلي جوه سكتت
مو وكتها ماعدكم بيت كلتها بس تارس كلبي الفرح
ازل...
عدلت دكمه قميصه شاورني
- ممكن احجي وياج شوي وحدنا
باوعتله
- هسه يعني
- اي دقيقتين
- تعال بالغرفه فوت قبلي عساس دتفوت للحمام وطب لغرفتي هاي الكبل
- خوش حجي
كام واني يم عسل عدلت بدلتها وكعدتها وتركتها رحت لرائد طبيت للغرفه جان ديكلب بالصور ويفتح بالكناتير القديمه مالتي مبتسم شال وحده كال
- هاي منو الدبدوبه
- ههه اني
- فدوه شون دبدوبه مال تعضعض نوب لبسها كله طز ببابا والبطن طالعه
- اي ههه امي جانت تلبسنا لبس مال بره وبيبي تتعارك وياها
- الله يرحمهم
- تعاي عدي حجايه وياج
- ها عيني وكفت كدامه بطرف ابهامه مسح احمر شفاهي
- هاي شنو
ابتعدت خطوه ليوره
- شبيك شكو
- موطوخ
- تره عرس
- وان يكن شفافج بارزه بي
كالها وعيونه على شفتي خرب المكياج والزفافه راح تجي عدلتها كدامه ورجعت طوخت
- يله نطلع
- اكول اني شداكولج تره مدا اتشاقه
- رائد شبيك اول تالي تحاسب صباح الخير
عصبت عيونه نتر
- ممخليه هاللون الطوخ قبل مسحي دكولج
- مامسحه وعادي مو طوخ كلما هنالك اني الاخلي بيج بس وهسه من خليت اطوخ شوي انت انتبهت تره عادي والله
- اي مااقبل تطلعين بي وحرام عليج تره انتي تصلين
بقيت اباوع بوجهه
- حرام عليه مو عليك داا طللع جرني من ايدي وسد الباب قفلها تفاجات مو هو عبالك وجهه كدامي تحول كتله غضب
- هاي شبيك همست بكل هدوءي مستغربه هالانسان اول مره هيج يتصرف
- داكولج مسحي
كالها بوجهه قريب عليه وحاصر جسمي وره الباب
عصبيته ونحاسيتي قطبين متشابهين تنفارنا نترت
- واذا ممسحته
- متطلعين
- رائد مداعرفك تره
- اي هذا هو جنتي ادميه وما
قاطعته
- جنتتتت ادميه عمي والله زين اشكرك
- دمسحي مسحي
- افتح الباب
عناد براسي صار وهو تخبل
وكف بوجهي
- اكولج شنو تكسرين حجايتي
بقيت صافنه عليه
- تستصغريني مثلا
- لاحشاك بس متعجبه عليك ابد مم
- اي اي هو منا وهيج
- هو وشنو منا وهيج اني وين مخليه هالللون بالشارع بس هيه عرس بالبيت
- دمسحي ميهم
- ماه
نترت مخنزره
جر وجهي من حنكي بلحضه تركزت عاطفه عينه غضب وضغط على سنونه وتقدم بلهفه غاضبه
وباسني بقوه لحضه وكف بيها الزمن دادفعه اخترعت وهدات كل احاسيسي من تركزت عالم توقف بس هدات هو هدا ويايه ايده الكانت ضاغطه على زندي صارت تتحرك حركات دافيه على ضهري يقربني اله اكثر
واني الجنت ادفع لكيت روحي اقبض بايدي على قماش قميصه اسحبه اكثر ناحيتي بدون مااعرف ولااعي
لحضات سجلت اول مرحله تطور فعلي بحياتي
جان فاتح عينه من تقدم هالخطوه ماكان بغير عالم
غمض قوي ورجه جبينه على جبيني جر نفس يرتجف وفتح عينه اني فاتحه عيني بذبول وكفه مابيه اوكف بعد
لزم وجهي يباوع بعيني
بلعت ريكي اخاف انطق
تلمس شفافي بطرف ابهامه بكل هدوء ويعاينها هز راسه متحسف همس
- صارت بعد اطوخ غمضت وين اضمج كالها بحسره تارسه صوته
- لتعاندين فدوه
هزيت راسي دمعت عيني
- باس ارنبه انفي بهدوء تنفسه ابدا مو نضامي رغم حاول ميبين كعد عدل ربطه عنقه واني واكفه مكتفه بكل قوتي صافنه عالصار بينه منصي راسه ميعاينلي رفع راسه باوعلي ورد نصه
- سسسويلي طريق داروح يم انور
هزيت راسي
لزمت اليده ودخت ارتكزت عاليده راسا شفته بصفي واكف
بقيت اعاين حذاءه بالكع دايخه جرني بهدوء وحضنني حضن متردد يسحبني ويوكف ويرجع يسحبني وكانما توسل الغفران كومه مشاعر يريد يحجيها جسدها بحضن قوي هدانا ثنينا دقايق واحد ب حضن الثاني ولاكلمه عالفراش كاعد ومرتجي نازع حذاءه ماعرف شوكت نزعه واني بحضنه بثوبي ومكياجي وحجابي متحضره للزفاف
حدما اندكت الباب حسيت روحي داغفي وهو مغمض بس دكه كلبه سيمفونيه عذابه تدك
فزيت كمت وهو وكف عدلت نفسي وهو لبس حذاءه اشرلي فتحي فتحت ملكيت احد
كال
- سويلي درب
- تمام
طلع كاتم لهفته ماكان بضغفي وتخلل اوصالي ابد كان راكز الخطوه مااعرف لان مجرب قبلي بس نفسه كان فاضحه دكه كلبه وارتباكه مكدر يوكف كعد على طرف الجربايه ونصه تغيرت خلال لحضه كبرت
واكفه يم عسل واطرافي ترجف مثلها
معقول تكون دخلتنا اليوم سوه
اقل الساعه وجوي الزفافه ورحنا كلنا بيت عسل مسوي عرس بسيط للاهليتنا ب٤ العصر رائد اختفى سالت بيبي كالت مادري غير يم الولد بس ماكان يمهم
اتصلت بي مغلق خفت
لل٦ العصر اتصلت محصلت خابرت راكان كلي
- عمي بزاخو
- هااا!
- اي ليش متدرين
- شعده شوكت راح
- ب٥ طياره من بغداد لا ربيل صاحبه جاي وراحله
- شمدريك انت
- مو خابرني صاحبه الي واني خابرت عمي
- ها اوك
- اكولج وسناء مداخت اجي عليها
- لاعوفها متونسه خطيه
- ها ديله على راحتها
كلبي انلجم من حركته حتى مكلي جوز مكدر يفوت شافني ملتهيه حتى ممحضرتله هدوم جوز متعلم هو يحضرها مادري بعد
لل٩ بليل رجعنا من العرس وبيبي رادت تروح خابرته اخيرا حصلت
رد
- ها ازل
- انت وينك
- والله طلعت للشمال طيران
- ادري مكلت محجيت
- عادي قابل شصار يابه مو ملتهيه هم امي رجعت لو بقت
- لا هسه حنروح
- انتي ترجعين
- مادري كيفك شتكول
- والله كيفج لاباتي باجر هم كيمر مكيمر
- امم اوك تمام
فكرت ارجع وي بيبي ماكوله مدري شبيه اشتعلت شعل رجعت صعدت فوك رتبت الغرفه شفته مطشر كنتوره ماخذ هدوم يمكن الجنطه الماروني ماهي اكيد ماخذها رتبت ونزلت رتبت غرفتي ومسحت مكياجي بالي يم عسل ويمه هو نار تشعل بيه من صفحتين
ممرتاحه ابد
نمت يم بيبي بيومها حست بيه موعلى بعضي لل٣ دزت عسل رساله
ازل كلشي تمام ليضل بالج
هدات روحي من صفحه وبقت صفحه الثانيه يمه
نايمه لل١٢ الضهر خابرت للومه كالت ودينا الكيمر ورجعنا رديت نمت تعبانه احس روحي مال ركضه وي عسل والركص
عسل...
- يحيى صدك هاي زفتنا
- هههههه لا داكذب هاي كامره خفيه هسه هسه حيطلع رامز
- شكد خبيث شاركني مشاعري المرهفه
- اي ميخالف بليل بليل من يرحون العالم
يحجي وميباوعلي جان اكثر مني فرح مسوي عرس بسيط بس للمقربين من الاهالي يعني كلهم ميطلع ن٣٠ نفر ركص وغنه وعمو انور مخله بنفسه من بده العرس حدما كمل يركص وي خواله وللومه
وانتهت الحفله حسن قبل ليطلع لم شكو كراتين وهاي نوسه بت خاله شكد يا الله شكد حبابه مخلتنا نسوي شي بس تفتر وترتب وي حسن
كلسا ماشرتله وهو يفهمها
لو عالببسي لو عالمي لو عالصور لو عالكيك والاكل وكذا
حبيبي جان موصي صواني لحم عالتمن شي مرتب وراقي صديقاتي من جامعه بس اثنين جوي ومكانها فارغ بقه تمنيتها هي ورسل موجودين يشوفوني شكد فرحانه
اخر شي قبل ليطلع حسن اللي هو اخر واحد بقه طفه نشره الباب وباوع ليحيى
من باب الطرمه صاح
حياووي
هااا
جاوبه وترك ايدي المعرف ليش رجفت من دخل البيت
طفي الشمع يابه لتحتركون مرتك عدها سوابق
ههه صار مشكور خال
فدوه لكلبك الله يهنيك ويوفقك بحياتك فيمالا
وطلع انسدت الباب بقه ناطيني ضهره واحنا بالهول ذب عكازته بقه واكف نزع سترته يباوع للطرمه تمشه بهدوء لازم البوري الستيل طبك باب الطرمه وطفه كلشي وقفل والتفت عليه يبتسم جر نفس وفتح رباطه وتقدملي
نصيت راسي
ها حبيبي
ها
شو وين الوعد
شنو باوعتله شنو ياوعد
مادري كولي لنفسج مو انت الامان وانت الحنان وانت انت شو جني صرت جلادج
مادري نصيت راسي
بارده
اي صح بردت مو البوب مفتحه تعاي بالغرفه دافيه
اوك
مشيت وراه فتح الباب كانت بس مشتغله تبلامات صغار معلك ملابسي وملابسه مشغل الضوابات وكانه اختار الهدوء بالضلمه حتى نخفي ارتباكنا ثنينا
وكفت كدام المرايه انزع الحجاب وهو وكف ورايه يفتح دكم القميص يعاينلي يبتسم
شبيك هيج تباوع
هاليوم البيت هذا حيشهد بدايه حياتنا
اي
مرت عم ابويه اميره ايه الله هههه كالت صلو قبل كلشي
اي اوك
اني ناذر اصلي على عباتج
اني ماعدي عبايه بس اباوعله حايره
ابتسم وفتح الديلاب الفوك نزل جيس وفتحه طلع عبابه تخبل قماشها ولبسها الي
همس
على طولج
تريد البس عبايه
اتمنى وانتي بكيفج بعد
يحجي بتمني هزيت راسي باوعت للعباه وباوعتله
يعني حتى بالجامعه
هز راسه وانتي براحتج اني هاي امنيتي
اوك مو اني ممتعلمه عليها
تتعلمين ياستري انتي وعافيتي تقرب باس راسي ونزل الحجاب منه غلغل ايده بشعري وحضني بهدوء
كال
اخذي راحتج ليش هيج مرتبكه
لا بس مادري شايله هم
هو موفرض علينا كلبي عادي براحتنا اني هم مثلج مرتبك واكره هالخوف البعينج مني جنت اعشق شعاع الامان بيها هسه مداشوف بس خوف
يعني ميخالف تنطي صبر مو
قاطعني
اصلا اني دانتضر لحظه التنامين بيها بحضني البيننا اكثر من شي اسمه حب جسد عسل
اوك
تقربت باوعت لجلنطه الصغيره هاي مال الاحد
اي هاي لتلعبين بيها وانتي من تحضرين هدوم حضري ثخان لان بارده هناك تره
اوك
انتي رايحه لتركيا قبل مو
اي وانت
امم مرتين طالع يله نبدل اني حفوت بحمام البيت لان اندار عليه الببسي
اوك اني هنا دابدل
وبدلنا التقينا من جديد ببجايمنا الناعمه هو كان لابس كحلي واني الزهري فاتح تركت شعري وغسلت مكياجي
وتمددنا بالصاله لان بس تلفزيون واحد اكو شغله على فلم
وتمدد كعدت بصفه جرني لحضنه وتنهد
شكد جنت اتمنى نتفرج سوه ونضحك معقوله هاي احلامنا تتحقق
الحمد لله
دنتفرج وثنينا مدنفتهم شي من الفلم طفاه واندار عليه
ليش
لان ثنينا ممنتبهين
بقه يباوع بعيني نظرات حنيه بهل اللحضه دك تلفونه جره وباوعله عكد حاجبه
منو هاي
منو
مادري رقم غريب
رد
نعم
وبقه ساكت
شوي شوي ملامحه تغيرت انعصر وجهه صار احمر وعيونه دمعت نصه راسه بلع ريك وسده وذبه بكل هدوء
كام بهدوء وتمشه مرتجي علحايط وصل للغرفه وتمدد واني وراه اخاف اسال منو او يمكن شكيت واخاف اتاكد
نام وغطه راسه
كل واحد بينا عده جرح ميطيب يخاف احد يدوس عليه وياذي وضع الكره معناه حب مختلف اذا المشاعر بردت حيل ومهتم معناه انتهى الحب
ويحيى مكدر ينساها ابد ولاينسى ليله التركته وخذلته ولاكدر ينسى اشتياقه الها
حتى اني غزالته معوضته
ساعه اكثر اني بره الملم بهدوء بالبيت راسي الف فكره
كملت ورحت للغرفه اريد احتوي واخاف اجرحه اكثر لا رجلي شون اعوفه
تقربت منه وخرت الجرجف بهدوء وجريت راسه لحضني وحضني بكل قوته محجه شي بس تنهيدته تشكي وكانه طفل بقيت امشي ايدي بهدوء بشعره حدما هو حجه
موكتلج متريدلي الراحه شوفي شوكت اتصلت عود دتبارك
بست راسه
ميخالف حبيبي لتنقهراني يمك
عسل ماريد فد يوم تجيبين سيرتها اختنك انتي وجودج يغنيني عنهم
اني موجوده وياك مثل مصرتلي كلشي اصيرلك كلشي
باسني من ركبتي وتطور بحركاته
وكانه يريد ينساها بهالرغبه
دفعته وباوعت بعينه
مو اليوم ماريد هيج نبدي اريد بخالص مشاعرك وحبك موشي مضوجك وتريد تنسه
غمض وهز راسه صح كل كلمه كلتيها صح رجع حضنني ونمنا
الصبح للوم جابت الريوك وي عمو وطلعو مضلو عشر دقايق
تريكنا وشغلنا تلفزيون وبدينا نحجي
يراد هنا نص تخم
ليش خو كامل
ها
اي والله كامل اكولج هذا دفتر يمج جيبي
اوك
نزلته كال كتبي
تخم يراد
اوك بعد
وباوع للبيت ابتسم
ميز وكراسي لان هاي نايلون ولونها رايح
اي اوك
ناخذ هذا الكزاز عاجبني
اي ان شاء الله
بعد شنو
بردات تعبانه
اي صدك بردات
اريدها كلها تول ابيض اوف وايت
هممم يعني يصير حلو هيج
عاجبني مادري بعد
تامرين وبعد
فرن ماعدك
فرن ماجيب اسكتي
لاحباب
لا عسل رحمه لاهلج اخاف
هههه شون سمعه هاي تتذكر
امم كالها وضحك رفع راسه ليفوك جانت اول مره تشوفيني
منتبهت جنت فاصله من الهبطه
اي حبيبتي حسج مطلع
كرص خدي يبتسم
شكد حبيتج نعنعلا متت خوف بذاك اليوم
تدري للوم هم محروكه
اي ادري شايف ركبتها خطيه
تدري جانت متعقده منها بس من تزوجت ابوك
كامت متهتم
حجي بيناتنا حاجزلها بعد شهر عد دكتور يسوي عمليه لحركها
جذب
اي والله خوش دكتور هذا عيد ميلادها عساس ب٢
فدوه اي ب٢
اي هو حجز الها مندري بعد شيصير
امم خليت ايدي جوه خدي
انت وابوك غيرتو حياتنا
والله انتو بيت عمران شقلبتوها
شعلينا احنا من الله ننحب
اي بالقران تاخذين الكلب
اي بعدشنو
مادري شوفي انتي
اريد قواري مال اتراك
هههه بسيطه مناك من نروح عودين
خوش ههه واريد طبلات
ماشي سجلي بعد
نبدل البيبان محلوه
موكتلج اغيرهن ان شاء الله
شوكت تكدر توفي دينك
ب٢٠٢٠ يتوفن
خوش مبقه شي
شغله شغله ننفذ بيتنا هذا
زين اني عدي اجار عادي اساعد
اي يجوز اخذ منج اتداين وارجعلج شوي شوي
اي حباب ههه
جر نفس لزم ايدي باسها كال
وتالي وياج
شكو
يله منعستي
لا شنعس هو ب١١ ونص كعدنا
دكومي داكولج شغله
كمت وراه
متوقعت فد يوم راح احب شخص بهالكثر
وانسدت علينا الباب
انسدت وياها كل احزاننا
ازل ....
نمت بعد تعب الزفه
لل٢ يله كمت عيني منفخه ريحه السبيناغ بيبي مسويته يخبل
- اويلي بيبي الريحه اوووف
- صبي اكلي اني تغديت
- عاشت ايدج يربي يربي تاخذين مركز الاول بالطبخ
انزول عليج اكولج اني حروح بيت ام سيدار الله يرحمها اختها جايه من كركوك احبها هواي صديقتي يمكن ابات خطيه سيدار توسل ومرته هم خابرت
- روحي بيبي
- تجين
- لالا شعدي جايه خل اكوم اعزل البيت
- ديله براحتج اذا ضجتي خابري حتى راكان يجيبج لو سيدار
- ان شاء الله
راحت بيبي وكمت عالبيت عزلته واتخيل هي ويايه اخر تعزيله عزلنا جنت اني وياها سوه وراها كامو يجيبون خدامات مخليت شي حتى الجام حتى سيراميك الواجهه والقرميط جلفته
دااكوي هدومه اعلك اخر قميص بيدي سمعت صوت القفاله فزيت اني وحدي بالبيت ساعه١٠ رغم اكو سيطره براس فرعنا بس خفت
مديت راسي شفت طب ديجر بجنطته
شافني وكف اتفاجا ابتسم
- ها شو هنا شعجب
- بقيت صافنه عليه
- شنو قصدك عمي خل اروح لبيت اهلي احسن
- لا والله بس الحجيه كالت بيت سيدار عبالي رحتي انتي لاهلج
- لا جان عدي شغل
- هاي انتي جالفه البره طالع وجهه
ابتسمت وجريت عيني بغرور
طب للغرفه مالتي شاف قمصانه داعلكها
هنا حتخلين هدومي
لا مو قصدي بس داكويها واصعدها
لا اااشسمه خليها لتصعديها كالها وتكتف منصي ورفع عينه شوي شوي
باوعتله ابتسم تقدمت اخذ الجنطه همست
- الحمد لله عالسلامه
- الله يسلمج جرني من زندي باس راسي مبتسم
- ليش مكتلي
- والله صارت مفاجا وانتي ملتهيه طفرت هذا جاي زياره وراها حيروح لسويسرا بعد ميرجع وعدنا اعمال متعلقه فضيناها ولله الحمد
- الحمد لله وين بتت
- ااا فندق عادي وين يعني هو كل مره نبات بي
- همم
- تنزع تتعشه
- اي و الله مكلت بالطياره هاي امي مسويه اخضر
- اي ههه
- اكو تصبين
- اي بينما احمي انت تبدل
- يله يله
رحت للمطبخ وانشف بشعري توني مخلصه سبح وجنت لافته بخاولي واكوي بالملابس
لبسي البسيط دشداشه كودري قصيره موكلش وربع ردن كلوش ومن فوك تخصيره
صبيت وحضرت وصحته
رائد تره صبيت
اي يابه جيت
طب كعد بالمطبخ توه طالع من الحمام
مشط وكعد عالميز كال
جبت كرزات مناك خطيه جايب كومه صوغات عود حضريهن
اي اوك
طبيت بين ما ياكل اجيب الجياسه جبتهن وفرغتهن بترتيب يباوع لحركاتي ورجلي بعدني بجو الحفله الحنه البيدي وصبغ الاضافر
وهو يراقب وياكل
جبت جنطته يمه
هاي شنو الباكيت
هاي عسل لامي مال سكري
والثانيه
ااا خليها بالغرفه جوه
اوك كلتها ونصيت
وهاي شنو العلاكه
باوعلي ابتسم واللكمه بحلكه
هاي زي الج
الله زي كردي
امم بس مو مال حجاب
اي عاشت ايدك فتحته جان شي يخبل
عفيه كلش حلو
بالعافيه
ورجع كمل اكله
كملت الغيارات الوصخه داشيلهن ونفضت الجنطه واحجي
هاي الغراض وره البيت تره صفيتهن
اللله امي هسه تكتلج
كتلها كالت فدوه لعيونج عيني
وج بيها مكينه ام الفتل والصوبه علاء الدين
مبقيت لاعلاء الدين ولا علي بابا
احجي وارتب بغياراته الوصخه
ضحك
كال
والسندباد
باوعتله وشلت الجنطه
عيني السندباد شايل عليجته ويفتر وهسه ديتغده اخضر
ههههههههه
ضحك من كلبه وغص شرب مي وضربت على ضهره بخفيه بقه يباوع بعيني يبتسم وعيونه حاوطت شفتي
نصيت اخذ الغراض وجفلت روحي بشي رعبني
وكل ذره بيه تتكهرب
فانيلته بيها اثر
باوعتله دياكل مندمج
انشليت والله شلتها وعيوني تسورب
اي هذا حمره وبصدره بفانيلته صفحه صدره
رائد
همم
كالها واللكمه بحلكه ممهتم
رائد هاي شنوو
شنو
عكد حاحبه لرجفه ايدي
وكف يشوف الداشوفه
وانفضحت ملامحه من بهت صفن بلع اللكمه واني رعشه كهرباء مشت بجسمي شكو احساس حقير حسيته
باوعلي عيوني انترست دمع
هسه عرفت ليش متريد تتقرب لان مكتفي موو
ازل هاي مو
لتكذب
همست واختنكت العبره بصوتي
لتكذب حرامات تنهز صورتك
بلع ريك ساكت بس عيونه تنتقل من الفانيلا للجنطه نصه راسه وكان يبين خجله
رائد اني ماكدر بعد
رفع راسه راسا خانس فك عينه على وسعهن همس تثقين بالله
هزيت راسي برفض
عوفني كافي عادد ذليت روحي دكافييي مو خلصت كرامتي تركته
نصيت راسي كوه شالتني رجلي طبيت لغرفتي لميت هدومي دمعه منزلت تحجرت عيني بقسوه اجه وكف يم الباب محجه كلمه وحده
من شافني دالم جر الجنطه وجريتها بكل قوه صرخت
ديررر بالك تمننعنيييي
ازل باعي اني
رائد توكع من عيني واني شايفتك جبل
بلع ريك لعصبيتي دزيت رساله
للومه دزيلي حسن فدوه
دزت راسا
همزين جان يمنا اجاج
لبست صايتي اطلع من الغرفه وكف بوجهي
دفعته ونار احس بضلوعي
وصلت باب البيت ولزمني من طرف صايتي ردني
وكفت والدموع جرت مكدرت بعد التفتت عليه
قتلت حلم عمره سنين كتلها وشهكت ليش هيج
بلع ريك ملامحه تعبت كال مغمض
ازل اني مخليتها والله العظيم صدكيني اسمعي مني مو موو جايج محتركه روحي اشتياق والله
النوبه نار وشطت بيها طلعت واخذت الجنطه امشي اطلع عالشارع حدما يجي حسن مكدر يلحكني لااعيط بنص الشارع لان هددته حسن طب للفرع صعدت ورجعت كوه كتمت دموعي حسن حس بس باوعلي ودار وجهه
دك تلفونه
رد
الو ها نوسه
لا ليش تعبتو روحكم
عاشت ايديج والله متقصرين احسن بت خال
اني دا ودي بنت اخو مرت انور لبيت اهلها تردون شي
ها لا والله بعد فد نص ساعه يعني ساعه اني يمكم اي تمام اخوج رجع ها اوك ديله ممنون ياب نوسه هله عيني
سده وباوعلي
تردين شي من الاسواق لو كبل للبيت
بلعت ريك بصعوبه
للبيت
اوك
وصلت للومه جانت دتغسل لزيد باوعتلي كالت
هلا بازول جتي حبيبتك باوعتلي عكدت حاجبها
كالت
بيش شي ماما شو وجهج اصفر
لا مابيه تعبانه معزله البيت
رجلج اجه
ها لا بعده
زين سويتي جيتي حتى متضوجين تعاي تعاي انور بليل كلش يجي تعاي نسوي كهوه نسهر عالكرزات بس خل انيم شمشون
اوك كلتها وجريت حسره ذبيت الجنطه بالغرفه شافتها بس غلست روحي تحترك حرك تمنيت مشايفتها تمنيت مصاير الزواج طفيت الضوه وقفلت الباب مطلعت بعد روحي تستعر نار الوب بالغرفه مثل الطير المذبوح
اني شسويت بحياتي شسويت بروحي ليش هيج ليش ليش فعلا ضاهر الانسان مونفس باطنه اكثر من مره كاللي ضاهر البشر مو نفس باطنهم ازل
تلفوني دك بيبي
رديت صوتي مشحط من الخنكه
ها بيبي
ها يوم وين انتي
اني بييتنا
ها رحتي زين سويتي ضل بالي عليج
لا رحت
ديله عود تعاي باجر مو تطولين
الله يسهل
راحت ورجعت غطيت راسي دكت الباب للومه مرديت تركتني متاذايه حيل واني البيدي جرحت روحي وضلمت نفسي
للصبح مبطلت بجي وندم وحسره تالي تعبت كمت طلعت للحديقه شفت عمو كاعد فاتح الصونده عليها مبدل ديروح للشغل الدنيا بارده بس اني مداحس بس بنار
طلع وسد الباب داشوفه من شباك المطبخ سد الباب وطلعت بالحديقه كعدت عالحشيش منده واباوع للسما
الك بيها اراده ربي معقوله هاي طبيعته معقوله هو هيج زاني وخوان لو يمكن متزوج اي اكيد اكيد واني اكبر قشمر اني الجبتها لروحي وتذكرتها
من صدك بجيت بخنيك بخنيك
شفتي اساو شفتي ابوج شسوه بيه لو موجوده انتي جان مخليتي ياذي كلبي
جان مسمحتي بهالمهزله تصير اني الجبتها لروحي رجال ديكولج شايفج بتي وانتي مثل الزمال جلبتي
احرك بروحي واحجي منهاره تاليها كمت نمت راسي حيطك طبكت حبايتين ونمت نومتي تعذيب مونومه سمعت الاذان وسمعت كلشي تحرك بالبيت وبجي زيد وحجي للومه وياه ولاكانما غافيه وصورته كبالي
ازل اني والله العضيم مخليتها
وانشال واندك
نحسه اني نحسه ومحد يجرعني شكو ورطتي روحج وي واحد
وسكتت
شريد اكول عليه لل٣ الضهر دكت عليه وسناء مرديت دكت اكثر من مره ومرديت وراها راكان اربع مرات دك
اخر شي بيبي دكت
رديت اخجل منها
احمم الو بيبي
ها بيبي شونج
هلو الحمد لله انتي شونج
زينه الف الحمد لله اكولج بيبي متجين
لا مو شوي للومه محتاجتني ممريضه ففباقيه يمها
ياا موهذا هم مدري شبي فوك واجه راكان عليه جاب طبيب وراح كتله شبي عمك يكولي مصخن
بيبي تغير جو اربيل عليه
مادري والله
يمه مو اني مفاصلي ماكدر انزل واصعد يعني متكدر للومه تضل وحدها
سكتت
كالت وجرت حسره
لعد ارتاحي هسه اشوف شون يله عدها العافيه
تسلمين
دير بالج عنفسج بيبي
اوك
سديته وشمرت اللحاف كمت صليت حتى فروضي نسيتها كملت صلاه طبت للوم
كال
ادري لاعشه البارحه لاربوك اليوم ولاغده شبيج ماما خاف مريضه
انداريت عليه جنت ناطيه ضهري
فكت عينها كلها نترت
شبيج لللج شبيها عيونج منفخه تقربت تنتر
نصيت راسي والسبحه بيدي كالت
كملي وتعاي اشو
هزيت راسي بله صوت
ماشي
طلعت وسدت الباب تلفوني دك راكان مرديت عفته
طلعت يم للومه سالتني
اكلي واحجي
باوعت للاكل الصابته مالي نفس لاي شي
احجي شكو وي رائد مو حسدناككم ولاتتحملون نفس
دمعت عيني باوعتلها
بلعت ريك همست
شكو ماما احجي
يعني للومه تتوقعي ميقرب مني لان عده غيري
فكت عينها
وج صار اربع اسابيع من تزوجتي
ماكو همست ونصيت دموعي نزلت عالميز البارحه جان بزاخو من رجع بليل شفت اثر بفانيلته مسحت دموعي ودرت وجههي
شنو اثر يعني
حمره بلعت ريك باوعتلها بجمود
كالت وصوتها رجف
واجهتي لو
واجهته ارتبك بعدين كال مخليتها
ضربت على كصتها وباوعتلي معبسه ساكته واني ساكته نصيت راسي نترت
اتزقنبي هسه
ماريد ماشتهي
اكلللي داكولج جريت الماعون ناحيتي عيون للومه تلوم بيه وتكولي حذرتج ومسمعتي
اكلت لحد الان اتذكر من كدما حسيته مر بحلكي جان تبسي دجاج
كملت وكمت للغرفه قفلت الباب عرفتها راح تجي تسال استفسر تعاتب واني تعب كلبي من وكت
وفعلا جتي فتحت الباب شافتها مسدوده ردت راحت متلح بطبيعتها
.
.
يتبع
.
.
.
تحية حب وتقدير للمتابعين من الدول العربية من كل مكان شرفتونا ونورتونا ❤
وتحية خاصة لنجوم الواتباد المتألقات 🙂
.