لاتنسى اضيء نجمتك الساطعة وتعليقك ليسعدني 🤎..
تعليقات بين الفقرات لطفاً🤍..
اسمعوا الأغنية إلي فوك وانتم تقرون البارت
__________________
أحبّ نفسك، وابدأ بنفسك، لأنَّ كل شيء في هذا العالم قائم على النفع الشخصي. - فيودور دوستويفسكي، الجريمة والعقاب
_________________
أركان
رجعت من الشغل وجبت ببغاء وياي اشتريته من صديقي عمره خمس أشهر بسته أوراق يحجي عادي وكلساع يردد كلمة شلونك شكله كلش حلوو لونه رصاصي وابيض واشتريت وياه قفص حسب مافهمت ياخذ فترة يالله يتعلم عليه لان متعلم على صاحبه
"أركان يالله انزل صار الغدة"
سمعت بنين تصيح كلتلها هسه بين مابدل بدلت وكملت ونزلت جوه
"يمه ترا كلكم معزومين عالعشه البارحة علي عزمنا"
فاطمة تحجي وي امي والله الهم خلك لهل سوالف التعبانه
"چا انتي هسه يالله تذكرتي"
ياسر كعد يحجي وياها ويلاهد بيها عبالك فارة وبزون ما فد يوم شفتهم متراضين
"هوا انتي ثوله مو بيدج عقلج كله بهل تلفون"
"المطلوب استاذ ياسر المطلوب "
" ادري عقل لو بانيه رحمه لربج"
"شدخل البامية بالعقل"
"ياخي شكلها غريب لا هيه مربع ولا هيه مستطيل وفوگ كل هذا متروسة شعر"
"ولك هيه وينها البامية غير بالشته تتمنى بس تشم ريحتها تصير غاليه الكيلو بعشرة الاف يعني أغلى منك"
اركان: "بالجبهه بعد اخوج"
" خوه چيس حب كلكم درتو عليه "
ياسر كعد يتمسكن لأن اني وفاطمة درنا عليه
وكلساع نذبله كلمة نخلي مثل الكنغر يگمز
" اني من هسه ماروح عندي طلعة وي اصدقائي"
حجيت اني علمود محد يسأل عليه
" وين رايح؟ لا يابه امشي ويانه "
ابَوي حجه وياي استغربت لأن اني اصلا ماريد اروح وعندي طلعه لبيت عمتي الولد كلهم ملتمين هناك
" لبيت عمتي يم الولد ليش؟ "
"بوية من نرجع من العشة عدنا كعدة انته ووائل وياسر كلكم اريدكم متواجدين"
"عود أن شاء الله اذا ماعندي شي اجي"
صارت الساعة تقريبا بـ ٦ اني كمت بدلت وكملت لبست ملابس مال طلعه عاديه بنطلون اسود وتيشيرت بني وحطيت عطر sauvage من ديور صار شكد استعمله بس بعده نفس الجمال وماكدر اغيره برأيي العطر الجميل هوا الكلمات الطيبة والنقية التي تخرج من فمك ويسمعها غيرك أجمل العطور هي الكلمات الي تسعد المقابل
لكن هذا لايكفي فما فائدة الكلام الطيب والشخص نتن وقذر الأفضل أن نكون معطرين داخلياً وخارجياً ...
عدلت شعري ونزلت جوه الطلعة هاي كلها مالي خلك الها هم راح اشوفها وارجع مثل الاغبر افكر بيها بس شسوي ابوي يريدني اروح .
الطلعة من تصير بيها نسوان شدو روسكم يالكرعان صار ساعة منتضرين فطيم تدور على اللينر مدري شمسه مالتها وبنين تريد الطوك مالها واني صوتي راح واني أكول يالله ترا تأخرنا..
"تراا هاي مو وضعيه صار ساعتين أكول يلا عيب ندخل للناس هيج متأخرين"
هوا لمن اسوي نفسي معصب يلا يحسن واخيرا طلعنا خليت ياسر يسوق لأن تعبان
وصلنا فتح الباب ألنا محمد اخوهم سلمت ودخلونا للديوانيه لگيت علي وابوهم سلمت عليه وكعدت.
"هاا ولك أركان شنو انتهت صداقتنا صاير لا تخابر لا تسأل حتى طلعات مثل قبل ماكو حتى الولد يسألون عليك"
"علي انته بعينك تشوفني مافارغ كله شغل وهاي الايام صحتي متدهوره أن شاء الله بنهاية الأسبوع نسويلنا طلعة وإذا صار عندي مجال نروح لأربيل نتونس شنو رأيك"
"عمي موافق وين ماتريد نروح مو زين شفنا وجهك"
" هوا انته يوميه تصبح بوجهي شهل جذب هذا"
" مو صوجك صوجي اني وجهه الطاوة"
" ولك منو وجهه الطاوة"
" انته اكو غيرك "
" ولي من وجهي اذا اني وجه طاوة انته وجهه الچوب"
اني جاوبته هيج هاي الوسامة الي تنكط مني تالي يسميني وجهه الطاوة
ابو عزيز :" اللهم زوج شباب المسلمين زوجات صالحات عاجلاً غير آجل "
سمعت الرجال كاعد يدعي ويحجي وي ابوي
" اي والله عمي هيه هاي الدعاوي إلي تفتح النفس"
حجيت وياه هيج
" هاا ولك مني تعيسة الحظ إلي حبيتها"
" كلشي ماكو وداعتك ماكو احدق مني بالكرة الأرضية"
"يابة هم يالله استعجل ترا راح تشيب"
"مالاكي بنت الحلال"
" چـاا شنو كدامك بس گ**د بنات الحلال هواي بس انته مامدور"
" ولك مو هيج بس بعدني ويني وين الزواج خليني عزابي بعدني بريعان شبابي"
"ياشباب هذا الي تحجي عليه وينك وين الشباب راح تشيب"
" شنو حتى مجاملة ماكو كل هاي الوسامة وتگول اشيب"
" هاذا هو تاليتك راح تنركع بوحده چنها جبار وگول علي ماگال"
" افاا عليك اني اختياراتي مميزة دوما "
" گلبي حاسني راح تزوج وحدة من شغل ام عباس "
" يا ام عباس هاي عمي انته طلعت تعرف الدنيا كلها"
" هاي ام السحورة البنات كلها متوجهه الها يگلك شغلها بالايد".
"ما شاء الله عندك معلومات عن هاي السوالف "
ضلينا نحچي هوا كام من يمي لأن راح يصبون عشه ماچنت ناوي اكل بس الاكل يفتح النفس ضليت انگنك بالأكل أكلت شويه لأن مامشتهي اكل الضهر بعده نايم على گلبي
كعدنا نسولف عالشغل لو ابوي يفتح سوالف الطلايب والناس الي كل همها القتل فجأة دخل نفسة هشام مدري شسمه اني عرفته هوه نفسه هذا الي تقدم الها احس اريد اكوم أكله بسنوني شلون تجرأ ويريد يخطبها اله اني بديت اوعى على مشاعري شوي شوي وچنت ماعرفها لأن اول مره اعيش هذا الشعور مو من الأشخاص الي كليوميه وي وحده أو عدهم صداقات مع الجنس الثاني كضيت مراهقتي وشبابي كله بالشغل وماكو وقت اصلا لهل سوالف هاي وماوعدت بنيه بزواج أو شي كلشي كاعد اعيشة وياها من تشتت وضياع اول مره سمعت عن الحب وقريته بس بالكتب ويمكن چنت متلهف لاعيش هذا الشي بس ماعرف ليش هيه بالذات
"السلام عليكم"
تقرب اجه يسلم عليه اني جاوبته بس شويه بثكل ماعرف ليش بس شي بداخلي يحثني على هذا الشي
"وعليكم السلام والرحمه"
كعدت وضليت منتبه إله فصلته تفصل
كعد يسأل شتشتغل ومن هاي السوالف واني اجاوبه الاستاذ فاتح وياي تحقيق هسه اكوم افلش وجهه
تقرب ياسر من يمي
"شمالك ولك راح تاكل الرجال بسنونك"
"مابيه شي"
" هوا شنو مابيك شي شوف عيونك شلون ناطات على ساعة تگوم تكتله"
"يابة كتلك ماكو شي لاتضل تلح"
"دولي اني هم اثول كاعد يمك"
مبين ضاج من كلامي كام وغير مكانه واني لزمت راسي شويه وضليت استغفر
"اي انه وعلي راح نصير نسايب "
مبين علي ومحمد ما طايقينه والجو متوتر بيناتهم يعني مو ميانة أو صداقة لا احسهم گوه متحمليه
" شلون راح تصيرون نسابة مافهمت"
سألته هذا السؤال اريد اشوف جوابه
"اني وزهراء بنتهم راح ننخطب على سنه الله ورسوله لا تخافون عود اعزمكم عالعرس ههههه لو نسوي العرس اني وعلي نفس الوكت بعد احسن مالي خلك المصاريف نتشارك اني وعلي نفس الفلوس جيبنه واحد مو علي؟ "
علي كلش ضاج من كلامه لأن كاعد ينسب اخته بنص ديون وهوا بس متقدم الها وبعدهم مارادين جواب إله أو منطين كلمة موافقة وكاعد يسولف بكيفه صدك مايستحي بس هذا اخوهم عزيز فرحان للسالفه ولا عبالك رجال مشورب وكاعد يحجون بأخته مهما يكون هوا يضل متقدم الها بس ماكو ماكوو رد ومبين مغلسين عليه
الرجال مهما يكون لازم يتميز برزانته واسلوبه ورجوليته وشهامتة إلي تخلي إله مقامة بالمجتمع زينة الرجل شخصيتة إلي تكون مبنيه رزانة الأفعال والأقوال تذكرت مقولة إن الرجال معادنٌ، ورخيصها .. لو نسمةٌ مرت عليه تأكسدا
حسيتها مناسبه اله خفيف ومامصدك ولاعبالك رجال كاعد بنص ديوان وبي زلم كاعد يسولف وكأنو سالفة عادية ذرة اسلوب ماعنده چنه ديچ مهلس بي طفگة ماشايفها عند أحد مو من طبعي احكم عليه بس بدقيقة وحده عرفته شخص جدا منحط.
إله شوي ضحكت من گال راح ننخطب ههه كل عقلة واني موجود يصير هذا الشي ماطول هيه ماتريدة اني مرتاح
"احمم عمي اني جايك بموضوع"
گحيت علمود أعلن عن الموضوع مع انو چنت مامقرر اسوي هذا الشي
"تفضل غالي والطلب رخيص"
"اللة يديمك ويخليك عمي اني جايكم من الباب اطلب ايد بتكم الصغيرة على سنة الله ورسوله"
اباوع على ابوي مصدوم لأن ماگايله شي او فاتح الموضوع وياه واني بوقتها اجاني دافع غريب الي خلاني اطلبها كدام المهتلف هذا اريد اشوف ردة فعله يمكن غيرة مو عليه بس عليها هيه..
علي رفع راسة وضل يباوعلي بس هذا اخوها عزيز گمز وگال
" اختي مخطوبة لـ هاشم "
ابوه مرضى عليه وخزرة وگال
"نتشرف وين الكه مثلك لبنتي بس انه اسألها واردلكم جواب لان ماريد اجبرها على شي"
باوعت لهذا هشام احسه يريد ينفجر من الأعصاب حيل والله أخذها من يمك وانته رجال وسوي شي اذا مو هسه اجنزه اني اصلا منتظر منه كلمة أو غلطة وحده علمود اضربه هوا ضل يباوعلي ويحجي ويه عزيز
" خالي اني رايح للبيت"
" وين رايح يابه بعد وكت توك دخلت اكعد اكعد"
"لا والله عندي شغل وعندي طلعة وي أصدقائي"
حچه هيج وطلع واحنا هم ضلينا نص ساعة ورجعنا للبيت لأن طريقنا شوي يتأخر
____________________..
زهراء
"ولج اجوج خطااااااااابة"
واكفه كدامي واني اباوع الها هاي البنيه تخبلت لو اني تخبلت
" يابه ترا والله مو بنت المالكي شو چني مطي ماكل رمان مصار يوم من خلصت من هاشم نوب يطلعلي واحد جديد"
"ولج هذاا الجديد مميز دهرر صابج بس لاسويتي سحر إله"
"شگالولج عليه رحمه لربج هوا اني اريد اخلص من هاالخطب هايه".
"ولج هوا أركان نفسه اجه طلبچ"
هيه حچت هيج لو اني اصتكيت من الصدمة يعني ماعرف مشاعري ابدا بس مصدومة ماتوقعتها منه
ملاك تهز بيه واني ولا يمها دهر صابني أن شاء الله هذا شجابه عليه كله من وراي اني رحت يمه وگلتله أسراري وهوا رجال لا يعرفني ولا اعرفه معقولة تقدملي بدافع الشفقة لو شنو؟ گلبي ليش هيج كاعد ينبض سريع مادري شنو شعوري بهذيج اللحظة لأن مابيناتنا شي بس مراسلة مرتين اني شسويت بنفسي
.
"ولج ملاك شسوي"
"شراح تسوين اكيد راح تقبلين"
" شقبل شتحچين انتي ويني وين الزواج وهذا السگط شعنده متقدم إليه اني مو گتله ماريد اتزوج"
"غير انتي تحبي اكيد راح توافقي"
"ملاك گومي من يمي لا اطلع قهرتي كلها بيج ياحب هذا الي تحجين عليه حتى لو احبه مستحيل أوافق ويني وين الزواج عود ناويه من ادخل السبعة وعشرين يالله افكر بهذا الشي اريد اتوضف ابني مستقبل إليه "
" دكلي خراا وين تلگين مثله الي يشوفج يگول العراق مشرمها بالتعيينات تشيبين وتموتين وماكو اي تعيين"
" هذا الي مئيس مثلج هيج يگول بس اني اريد اكمل"
" اي كملي يمه اكيد نشرط تكملين دراستج يالله"
" ملاك كلنا نعرف زواج ودراسة ميتراهمن شألحك العيال يردون شغل وتنظيف وطبخ والرجال يريد ملابس ولگمة بيها حظ وغيرها كل عقلج اني كد هاي المسؤليه ترا لا تشوفيني هيج قويه وكذا بس اني صغيرة كلش من هاي الناحية بعدني لهسه امي تضفرلي شعري لأن ماعرف".
" حرامات چـنت متحمسة ؏ــود يصير عدنا عرس واركص بعرسج "
" لا تخافين ازوجج ياسر بيدي واني ماتزوج "
" كبررر"
ضربتني وهيه تضحك
" لعد شكد مفلفله عليه حتى ماگلتي لا".
حاجيتها هيج من ناحية الضحك
" لا والله مو مفلفله علية اصلا محاچية وياه ابدا بس اباوعله من بعيد اتمنى يبادلني الشعور ويجيني من الباب مو من الشباك واني اصلا مو مال هاي السوالف حتى ماعرف شلون اتصرف من اشوفه احس نفسي مبتدئة"
ضحكت على فطاريتها شكبرها وشكدها بس بعدها طفلة حتى بطريقة كلامها وشلون تحرك بأيدها.
" ولج ملاك إذا ظليتي هيج ماتعيشين"
حجيت وياها واني العب بالحمرة إرسم بيها على ايدي
" ليش اني شمسوية"
" كلشي ما مسويه بس ادعي الله يحفضج من كل شر"
" زهراء اليوم انتي بالعه شي شو گمتي تمضرطين"
"كبرر صوجي اني ادعي الج بالزين"
باوعتلها وگلتلها هيج صدك الإنسان متعلم بس عالرزايل
"لا مو غريبة اليوم مدري شبيج دعاء وكذا احس انتي مو اختي"..
ماحس إله راشدي اجه بنص وجهي طلعت هيه ضربتني واني اركض وراها واصيح
" بنت الحلووو ليش تضربين عوبه ثوله فاهيه"....
"اي واخيرا انحلت العگدة"
" ياعكده ملاك؟ شو كومي اطلعي من غرفتي يالله ماعوزي مجانين إذا تضلين هنا مااضمنلج نفسي "
طلعتها بره ونزلت جوه يحح بالراحة النفسية واخيرا رجعت انزل احس نفسي مسجونة فوگ
بس معقولة يمر اليوم بدون مايصير شي هذا من المستحيلات بحياة زهراء
" والله وطلعتي وحدة جايفة وحرامات ازفر لساني بيج "
" شتريد رحمه لجدك ترا بزعتني بحياتي "
" هوا انتي ششفتي علمود بزعتج طلعتي مصاحبة صديق علي وفاره راسة ام الزلم"
" اي فريت راسه المطلوب شتريد مني؟"
تعبت واني اشرح وأعيد يعني هالانسان جد ماينحزر كليوميه طالعله بسالفه ولا عبالك رجال شكبره وشگده واخوي يدور المصايب اليه
" چان فكرتي قبل ماتاخذيها مني وجعتج لهسه ماناسيها مو چنت محترمج ومخليج تاج على راسي واختي واختي تالي تغدرين بيه ليش هيج سويتي هيه مو صديقتج شلون طاوعج كلبج و غدرتي بيها واني مو چنت اسولفلج شكد احبها لهسه افكر واطلع أعذار واكول چنتي طفلة بس ماكو مبرر لفعلتج الله عوضني بأية وزرع بذرة حبها بنص گلبي وانسه القديمة ورزقني بطفل مثل الورد بس مستحيل اغفرلج والله ابچيج دم مثل ماحرگتي گلبي والله زهراء اكسرچ تكسر واطلع كل ألم تألمته بسببج اني صابر بس لأن اهلي موجودين بس اذا ما اخلي حتى الشوارع متلفيچ اتفلي بوجهي"
اني من حچه وياي هيج بچيت ونزلت راسي حيل استاهل كل كلمة
" عبالك انام الليل ومرتاحة والله تأنيب الضمير كسرني والله مايمر يوم بدون ماادعي على نفسي بالموت ترا اعرف غلطت وهاي غلطتي راح تسببلي مشاكل بس اني بكلشي راضية منك لأن اني غمه ماصنت الصداقة والخوه شتسوي سوي احركني اكتلني اني استاهل اني وحده بلا ضمير باعت صديقتها واخوها بعد شتريد اني ك** و س** كافي مليت اكتلني وخلصني صار سنين اني متحمله بس والله تعبت ليش متفهمون لمن أكول تعبت؟ "
أشهك من الدموع اني اصلا الموضوع هذا ماحب افتحه مرات اگول كل إنسان يغلط ويتعلم من أخطائه اني هم هيج ليش مايرحموني والله ماعيدها اتمنى يرجع بيه الزمن واضرب نفسي راشدي واصحيها على زمانها العايشة بيه واعلمها انو إلي تسوي غلط بس صديقات السوء چان الهن دور بكل هذا اني ماعرفت اختار صداقاتي وچنت اندفع بسرعة بكلمة وحده گدرن يقشمرني ويخلن اخوي يصير ضدي اهخخ لو بس اكدر ارجع الزمن اني سويت كوارث بطفولتي ومراهقتي لا الله يرضى بيها ولا محمد ص.
مسحت دموعي وباوعتله هوا هم باوعلي ونوب ضحك بستهزاء وراح وهوا يضحك ويغني لهدرجه مرتاح لدموعي .
اني دخلت للاستقبال لگيت امي
"تعاي زهراء خابري خالتج كليلها خل تجي باجر وتجيب وياها حذاء حسين ماعرف لهل تلفونات هاي"
"ماا يمه خلي ملاك تخابر"
أكثر شي اكرهه وماطيقه هوا الاتصال ماحب ابدا احجي وي واحد مخابرة احب بس اراسل.
"يمه ملاك فوك شيصعدني الها"
"اهوَوو"
اتصلت على خالتي
"الوو ها خاله شلونج "
ماعرف احجي بالتلفون احتاريت شأكول وامي تضحك عليه
" خالة فدوا باجر تعاي وجيبي وياج حذاء حسوني ترا امي گرعت راسي گرع مو حذاء عبالك مطلي من ذهب"
حجيت وياها هلكلمتين وانطيته لأمي رجعت صعدت فوك يم ملاك الضوجة تقرأ الف ضاله محصورة بين أربع حيطان
" هاا مو طردتيني من غرفتج شعندج جايه؟"
"عمي اسفين بس دخليني ترا ضوجه وروحي طالعة من خشمي"
" أكلج اني حجيت ويه زينب ونرجس باجر ورا مانخلص دوام نروح للمول نفتر ترا ضوجة وامج اني اقنعها لا تخافين"
"يابه هاي ماتسمه طلعه اريد اطلع لباريس لو اليونان"
"حاضر ست زهراء أمري دللي مو عندي جواز وكذا والسالفة بيدي"
" شبيج شو ضايجة اليوم"
سألتها لأن مبينه مو على بعضها
" ولج لو شايفة شكد ضجت من سما كالت لمحمد چذاب"
" ليش مافهمت"
" مادري بس اني ماحب هاي الكلمة احسها تقلل من قيمة الشخص مهما يكون تكون موحلوه لمن تنحچي"
" بس هيه تطلع كردة فعل اني وحدة من الناس لمن انصدم أكول چذاب"
" اكو كلمة بديلة وهيه (صدك) مايحتاج تچذبين واحد بنص المحادثة احس عيب "
" هدي علينا يالاميرة ديانا"
"ولج هيه مو شغلة عيب لو حرام او اخلاق بس اني انزعج من هاي الكلمة مادري ليش اعرف كومه ناس يحجوها بس اني اكرهها وگلتلج الأسباب احسها تقلل من قيمة الرجال"
"والله مادري تفكيرج متطور واني ماعرف لهاي التقنيات "
كعدت بصفها وفتحت تليفوني احتاريت اراسله لو لا كتبت له:
" شنو هاي ترا اني من حچيتلك مو علمود تشفق عليه أو تنضرلي بهاي الطريقة ماطلبت منك هذا الشي ليش سويته؟؟ من اجيت حچيتلك لأن اني عوبه ثقيت بيك بسرعة وياريتني متت ولا راسلتك قليل ادب "
اجيت اكتب احلى بلوك لاحلى عيون لا والله بس عيونة كلش حلوه زيتونيات واني گليبي رچيچ أمام هيج عوينات
عود صرت عصبية ودزيتله الرسالة ورا نص ساعة تقريبا يالله شاف رسالتي وكاعد يكتب
" انتي شكاعد تكتبين شنو هالكلام هذا بابه وازني كلامج لو شفقة چان ماجيتج من الباب فكري قبل لاتكتبين هيج اشياء ثانيا هالمره سماح مرة الثانية إله اكسر راسج إذا عدتي هاي الكلمة "
چان قصده بالاخير على كلمه قليل ادب والله وطلع عصبي هالولد
"إذا مو شفقة شتسميها ورا محادثتك بأسبوع تجي تخطبني هذا شيتسمه؟ "
ملاك فوك راسي چنها شمر تريد تقرأ المراسلة
فجأة اجاني اتصال من يمه واني گبل نصيت الصوت احتاريت اجاوب لو لا كتب لي" جاوبي"
" لاتخافين جاوبي اني راح اوكف اباوع خاف واحد يجي".. ملاك كالت هيج وراحت يم الباب
دهر صابج يم صلبوخ عافتني وظلت لازمه الباب اني فتحت الخط بس ايدي ترججف
"الوو"
اني گلت هيج يمه صوتي من الصدمة نشحط طلع چنه صوت جبار ولا عبالك صوت بنيه
"اولا عدلي الفاضج اني سكتت على كلمتج هاي بس ماريدها تنعاد مو طفل كدامج"
يمـه صوته خشن وبي بحه يجنن حتى ماركزت على كلامه گتله شنوو
"اللهم طولج ياروح اني لو اريد استغلج ماجيب اطلب ايدج من ابوج على سنة الله ورسوله والزواج مو سالفة ينمزح بيها كبري عقلج ووازني افعالج احسن من اتهام الناس"
ملاك اجتي كعدت يمي وتصيح يمه الصوت يمه انا ياطير ضيعني نصيبي وتدك وتركص بس علكيف إلى أن كرصتها كرصه معدله يالله سكتت
" لعد فعلتك هاي شنو تفسيرها غير انو انته شخص استغلالي استغليت كلامي واجيتني بدافع شفقة لا أكثر ولا أقل "
احتد الكلام بينه هوا يذب كلمه واني انتضرة يكمل نوب اجاوبه
"بابا شبيك عصبت عليه أقبل بهاشم المسودن وماقبل بية"
ملاك ضلت تغم بيه
كمزت كمزه مو طبيعية من سمعت صوت صياحة وخرت التلفون من اذني
" تسكتين لو لاااااا لا تخليني هسه اجي لبيتكم والله اهجمه على راسج ديربالج تجيبين طاري هذا الكلب"..
" چنتي خوش بنيه"
"مو اني ماشوف اي مبرر لافعالك شنو السبب الي يخليك تتقدم إليه غير الشفقة صوجي اني حجيتلك بهذيج اللحظة امداي اي والله"
بچيت مادري ليش بس بوقتها بچيت منا كلمات عزيز مغروسات بعدهن بگلبي وهذا الثاني فوك راسي ذبيت حركتي بيه مع انو اني بداخلي اعرف انو ماكو شفقة ولا من هاي السوالف بس أخذت الشفقة
" عذر" علمود اذب شويه من إلي بداخلي عليه اني شخص اناني من صغري ولحد ماكبرت افكر بس بنفسي..
"ليش تبچين"
كعدت أناشغ وملاك مستغربه من وضعي صار اسبوعين كاتمه وكاتمه وما ابچي بس اليوم مدري شجاني نفجرت هوا سكت بس صوت نركيله يمه
" أنه أَحْبَنج"
حجاها وذب حسرة شكبرها
اني سمعت هاي الكلمة وكعدت ابچي بالزايد عبالك بوري وانفتح بعيني
"شمالچ بويه اسكتي لاتبچين عمي انه سكتت بعد شتردين"
صوته بهذيج اللحظات الي عشتها مستحيل انساه كلماته احساسه شخصيته عيونة وشكله مخلد بعقلي وبأفكاري أركان چان طيف حلو مر بحياتي نسمة هوا بوسط الصيف احساسي بوقتها مختلط فرحة صدمة بس أكثر شي چنت اتذكره من هذيج الليلة هوا الحب...
شوية هدئت شهگاتي هوا چان فاتح كاميرا بس اني سادتها
گتله:
"شلون حبيتني"
حجيت هاي الكلمة بس بعدها شهكات خفيفة تطلع مني
سمعته ضحك ويامحلة ضحكته كله هذا بگلبي واني والجرئة مانتلاقه لذلك ماكدرت اعبر عن الشي الي بداخلي واني نفسي ماعرف شنو الي بداخلي بس الي اعرفه مشاعر غريبة ومفرحة الي اجتاحتني
لهسه اتذكر صوته وهوا يغني إلى ورا ماعترف إليه صوته بيه حنية مو طبيعية مادري شلون نگلب من صوت عميق إلى صوت يدخل الگلب بسرعة وبالحالتين اني حبيته
لتسولف علينة من يسألون
عيون الناس لاتحسد عشكنة
واذا طلعت شمس فوت انة للبيت
لان شمسين معناها احتركنا
من احضنك احضن الدنيا بدية
حبيبي وغالية عيونك علية
بسرعة الوكت صاير يخلص وياك
الهوا انتة واذا رحت اختنكنة
عيون الناس تحسد كل حبيبين
يردوني ابتعد عنك واعوفك
واذا انت جرح مااريدك تطيب
اوكف بصفك ولا مااعوفك
واذا طلعت شمس فوت انة للبيت
لان شمسين معناها احتركنة
احتركنة
مكانك لابكلبي ولا بالعيون
كل جسمي الك من جدمي للراس
مرات ارد ابوسك لكن احتار
اذا كلك خدود منين تنباس
من احضنك احضن الدنيا بدية
حبيبي وغالية عيونك علية
بسرعة الوكت صاير يخلص معناها وياك
الهوا انتة واذا رحت اختنكنة
واذا طلعت شمس فوت انة للبيت
لان شمسين احتركنا احتركنا
لأول مره أخجل حسيت ذبت مثل الزبد وصابتني رجفه ايدي ترجف وجسمي كله چان يرتعش وماعرف ليش
ملاك تغم بنفسها وتكول إلك الله يالحديقة
واني احتاريت شأكول
رجعت عدت نفس السؤال
"ههسه محجيت شلون حبيتني وين شفتني"
"غير انتي زهورة ام سبرنگات"
عزاا العزاني شمدري اني عندي سبرنكات راح من بالي انو اني عشت فترة من حياتي بقربة ويمة والنهار كله بيتهم واتذكر مقتطفات من چان هوا صغير وأني صغيرة
"تذكرين من چنتي تركضين انتي وفاطمه بالبساتين واني اجي اضربچن لأن تاكلن المحصول"
اني ضحكت من حچه هيج
" يعني طلعت نفسك انته الانفه ابو خشم اليابس خشمك مايكصه السيف هوا احنه شچنه ناكل هنه شكم برتقاله وتفاحة"
"اي هوا هذا اني مابقى بس تاكلني يا برتقالة يا تفاحة چنتن ملهوگات"
"اعذرني هواي دعيت عليك واني صغيرة"
" أفااا عليج هذا اني أركان چنت معيشچن بخيري تالي تدعين عليه"
" ليش تبوگ كلمتي ترا افاا بس اني اكولها"
" اي مو مسجله بأسمج"
وراها سمعت صوت جوه بأسمي
"اني حروح"
" يلا باي حبي"
اني سمعته هيج كال وسكتت احتاريت شأكول
" باي"
وسديته من يمه
" بويـــــــــه الـك الله يالسـنگل"
ضحكت عليها ونزلت الدرج لكيت عزيز
" صارلي ساعة اصيحلج شبيج يالثوله سويلي چاي وصعديلياه "
كعد يغلط الأخ يدور حجه علمود يسوي سالفة
كعدت سويت چاي وحطيتله هيل وحطيت بدال الشكر ملح مو بيدي خبيثة
صعدت للغرفه انطيته الچاي شويه وما اسمع بس الغلط والفشار طلع ابوي وكلها من غرفها على صوت عزيز چنت اضحك بس من طلعو ضميت ضحكتي
" بنت*******"
" عزيــــز انطيـتك مجال زايد وحق الله إذا تنزل اكسرك شنو بيت مابي اي راحة وين اهج فهموني راح تجلطوني"
حجه هيج وكعد عالتخم لزم گلبه تندمت هيج سويت من شفت ابوي بهيج وضع مافكرت بيه
كلمن طب لغرفته وامي اجت حذرتني وضلت تغلط عليه تگلي العرگ دساس اخذتي هاي صلافتج من عماتج ومدري شنو ماخلت كلمة ما ذبتها بوجهي ودخلت الغرفتها
_________________
أركان
بعد خروجنا من بيتهم توجهنا للسيارة اول مادخلت ابوي حچه
"انته ماتعرف تگول قبل ماتسوي هاي الفعلة البنية إذا عجبتك غير تجي تگلي علمود انه بيدي اخطبها الك خليتني بنص بيتهم يلا عرفت السالفة ماتعرف الأصول "
"يابه بعد صارت راح الموضوع من بالي"
"مو هيه أكله لو شي ينشرب وراح من بالك"
امي تدخلت بالموضوع
"شكوو خيرر".
" ماكو شي بس ابنج تقدم للبنية ولا اني اعرف ولا انتو خلاني اغط بهدومي لو شايفة ملامح الصدمة إلي على وجهي "
" منوو تقدم لمنو ولك شسويت اركان"
" يايمه مو چنتي ترديني اتزوج هاي اليوم تقدمت لبتهم زهراء شفتها مناسبة الي"
فاطمه كعدت تصفك بأديها وتگول:
" شايف خـير ومستاهلها"
إلى أن أمي ضربتها بعكسها خلتها تكعد وتسكت
" يمه البنيه حلوة وما عليها تعيوب بس هاي إذا انكسر اضفرها تگول طلگني"
" عوفج من البنيه ابنج ماجه وگلي عاد ناخذ زلم ويانا ونطلبها من ابوها مو اني چلب حراسة مامهتم لأمري ضاربني بعرض الحايط"
" يابه حجيت هاي الحجاية بس علمود اوگفها ومايردون جواب لابن عمها اني اصلا من رحت ماچنت مخطط لكل هذاا"
" وشدخلك بأبن عمها اكيد ينطوها إله لأن أقرب الهم"
سكتت وكلمت سياقتي وامي وفاطمة يگرگرن فوك راسي امي تسأل بفاطمه اذا عدها صور لزهراء علمود تركز بشكلها وتشوفها لخواتها بعدنا بسم الله بس كلمة نحچت وطش الخبر أركان راح يخطب...
"ولك أركان البنية حليوه عاش اختيارك بس كون تطلع أخلاق وتتعايش ويانه"
" ليش يايمه كاعد تحسسيني احنه حيوانات"
"لا يمه انته ماتعرف بنات هاي الصفحة كله يفيكن بملابسهن وين يگدرن لشغل البيت والسوالف يردن خدم يخدمنهم"
" مو الكل".
"اي بس انه اريد الك بنت الحلال يايمة مو ورا الزواج وتنصدم بيها"
نزلنا امي وفاطمة بالباب مال البيت و رحنا للطلابه إلي كال عليها ابوي
بالنسبة إلي اكرهه النضام العشائري وهاي السوالف احسه مو منطقي ابدا وجهلي بس مع الأسف حاليا إلي ماعنده عشيرة تأكله الذياب والعشاير شيء سائر لا يمكن التحكم بيه خصوصا واحنه ببلد القتل فيه أسهل من شرب الماء...
القصة طويلة وناس ماصافين على رأي واحد عدهم إطلاق شرارة النار شيء سهل وقتل الأرواح فخر نسوا الدين و القيم والمبادئ التي أوصى بها الله والمرسلين يخافون من العيب اكثر من الحرام...
رجعنا تقريبا الساعة بالعشرة باليل كعدت شويه نوب صعدت فوك سبحت وبدلت ونزلت جوه سويتلي نرگيله باليوم اعمرها اربع مرات كعدت عالتلفون تفاجئت بالرسالة إلي دازتها هيه شنو هاي تفكيرها شلون گلبت السالفة حسستني اني مسوي ذنب مو جاي اخطبها..
ضلت تخرط بالكلام واني گلت قبل ماعصب خل اتصل عليها اتصلت اول مرا بس مافتحت خط رجعت مرا اتصلت جاوبت گالت الَو بس صوتها يرتجف وناصي گلتلها علي الصوت..
من بچت اني ماتحملت اسمعها شلون تناشغ چنها طفل طلعت من حلكي كلمة احبنج بدون ماحس ونجرفت وي التيار تيار هائج بأمواج عالية واني الغريق الي چنت بيه وماكو حبل نجاه اكدر اتماسك هذا وصفي لحبي الها مو شي اكدر اتحكم بيه اكو شي جواي هوا الي يحثني على كل هذا
محادثة صغيرة چانت كفيلة بتغيير كلشي الراحة هذا الشي چنت احسه وياها غنيتلها أكثر اغنية احبها ومن اسمعها اتذكرها كل هذيج الايام الي مرت سافرت بالخيال والآن الخيال حقيقة.
"صوتك"
حجت هيج ورا ماكملت الأغنية
"شبيه؟"
"مايشبه صوتك الطبيعي هذا اهدء واجمل "
"الصوت يتغير حسب المشاعر الي بالاغنية مثل ما الوجة ينطي تعابير حزينة مفرحه خائبة..
الصوت أيضا كذلك"
"اها حلوه هاي معلومة"
اكو صوت چان يمها استغربت وسألتها
"منو يمج"
"محد "
حجيت وياها شويه وسديت التلفون لأن اعتقد طولت وياها بالحديث
صار شكد ما كاتب شي فترة كلش طويلة تقدمت اكتب شويه من مشاعري علها تخفف لهيب قلبي
لديها عينان فاقت الليل بسوادها وهزت أركان قلبي بجمالها لم يصف الجمال الا لها ولن تصف الفخامة الا بأسمها متناقضة جدا ارها.. لكنني ابقى اهواها
صنعت من ذهبً والماس صنعت حبا في قلوب الناس
صنعت خصيصا بأسم خافقي وكأنها تعلم مدى الهوس والاحساس نعم انها اميرتي زهرة صعنت وسط البستان....
_______________
بارت طووووويل ومليئ بالاحداث
بنات هذا البارت كتبته البارحة بس مانزلته لأن الوقت متأخر والأغلبية نايمين لذلك هسه نزلته وحبيت اشكر ملاك لأن ساعدتني بكتابته اما بالنسبة للتفاعل اتمنى هذا البارت يوصل ١٠٠ تعليق بين الفقارات وخمسين ڨوت لأن تعبني💕
توقعاتكم للقادم؟
البارتات الجاية حرريقة🔥
شنو مشاعركم بعد اعتراف أركان 😭
دمتم بخير 💕