اسيرة قدرك

البارت 88

اسيرة قدرك..
بقلمي رسل..
البارت الثامن والثمانون..
واتباد rasolaa7

وانته تدري هذا دربك
ياخذ امن سنين حزني
ما لكيتك وانته رايح
ضيعيتك .. ضيعتني..

-هو بسرعة رفع راسه عليه باوعت عليه
بخوف.. لا اسر لا والقران  ما اعرف منو هذا
جذب اسر جذب جنت احجي بخوف
هو باوعلي بنظرة مطمنه وحضني..

-اعرف بس وداعتج اخذ حكج من عيونهم..

-بعده الجهاز بيده صاحب الرقم الغريب رجع
دز وهالمرة جان الكلام ثكيل كلش وبصيغة
رخيصة كاتب بكل جرئة.. اوف لج شكد
مشتاق الصدرج وبعد كلام طايح حضه..

-خجلت وبنفس الوقت رجف جسمي بخوف
وقهر اذا اختي هيج تخطط الغريب شنو اترجه
منه اباوع لاسر عيونه صارت بكصته من
الغضب بسرعة دك على صاحب الرقم..

-بس جاوب هو استلمه غلط يحجي ويا
بحركة كلب وذاك الظاهر جان مستفز لان
اسر صار نار اخر شيء صاح بي.. اذا انت
رجال دليني بمكانك وجايك لو باخر الدنيا صير رجال وواجهني لا تتختل وتحجي من وره
الشاشة كواد..

-رجع حجه باعصاب.. انتظرك يا كواد
بس خليك على كلامك ولا تصير جبان وتتختل سده وركض اخذ سلاحه والسويج والتفت
راد يطلع..

-حسيت روحي انسحبت من جسمي اذا طلع
بهذا الغضب ما يرجع ومنو يكول ذاك ما عنده
غايه تخيلت يكتله لو يغدر بي انتفضت ركضت
حضنته ودموعي تنزل.. لا تروح اسر فدوه
اروحلك لا تروح والله يريد يستفزك مستحيل يواجهك شنو ما رايد روحه ارجع خلي يولي
والله طلعت روحي لا تكملها عليه بقيت اتوسله
احجي ويا واختنكت كلبي وجعني بشكل عفته
ولزمت كلبي افرك بي..

-سندني وكعد خله راسي على رجله بقى يفرك كلبي واسمعه يردد آيات ونظراته وانفاسه
تشرح كمية القلق همست بتعب..

-ليش هيج نهجمنه بيومين
ليش محد يريدنا نرتاح
اني تعبت اسر لا صحة ضلت ولا طاقة
بعد اتحمل اكثر لا تزعل مني بس هاي مو عيشه هاي انتقام بعد ما اكدر اتحمل والله ولشوكت
ترى خلصت طاقتي عود من يشوفون واحد
منا بالكبر يلا يرتاحون..

-اسم الله عليج اخ يا ريا شتشوفيني مرتاح
من اختج واهلي عساها بحضهم وما يتهنون
وغلاتج..

-وديني الغرفتي تعبت خلي انام هو شالني
واخذني بقى يمي ويمسح على كلبي
عيني عليه ما انكر صاحب نخوه وموقف
وما انكر يحبني ويعشكني هم
وما انكر غيور ودمه حامي على عرضه
بس اخ من شكه وتسرعه الي دمرن صحتي
لو تعرف بالي بداخلي يا اسر جان ما مسحت
هيج على كلبي
اعذرني احبك هواي بس لازم هالشيء يصير لان كافي وصلت حدها واصلا مفروض من زمان بس شسوي لروحي الي تكفخت وما صحت
الا هسه..

-رجعت حجيت بقهر بداخلي.. لا مو هيج
بس الشخص الي على نياته والي ما اياذي ولا يحقد وكله اي وصار البشر يدوسونه ويعتبرون طيبته ذل وضعف وما يرتاحون الا لما يجعلون منه شخص هو بذاته يتعجب شلون هيج تغير..

-اني اعترف شخصيتي مو قوية بس هم
استغلوني كلهم وضغطوا عليه وجنت بيدهم
مثل الاسير الفلسطيني الي يوكع بيد يهودي
والله بتصرفاتهم خلوني اتصرف تصرفات
غلط في سبيل بس اقوي من حالي ما اعرف
الوم منو نفسي
لو اهلي
لو اسر واهله..

-بقيت افكر واثنينا ساكتين الى ان غفيت
ونسيت للحظات صاحب الرقم وتمارة
وهالدنيا الغادرة وحتى الم خشمي نمت
وكانو لجأت للهرب من الواقع..

-ما اعرف شكد نمت فزيت عطشانه حلكي يابس
اباوع للفراش اسر ماكو كمزت مثل المخبله ادور
واصيح عليه البيت فارغ خفت عليه اريد موبايلي ماكو شلون يارب هسه اني بلا شلون اعرف
اخباره بقيت الوب وكلبي على نار واطرد
بالافكار السلبية الي كل شوي وداهمت عقلي
المزدحم بالافكار والهموم..

-تقريبا ساعة وجان يندك الباب اترددت اكول منو خفت لان وحدي شوي واجاني صوت مهاب ام مهرة افتحي الباب..

-فتحت الباب هو حجه بسرعة.. انطيني باجات خالي ورخصة السلاح ناسيهن..

-حجيت بخوف.. عفيه شبي اسر شكو
هو صاح بعصبية.. استعجلي مو وكت اسألتج ريا الخاطر الله..

-رحت اجيبهن شفتهن على الميز انطيتهن
اله وحلفته يحجي شصاير ووين اسر..

-هو تنهد وحجه.. خالي عابر السيطرة يمشي كل سرعته زين ما دعمله واحد وكتله بمكانه
لاحكينه واكفلهم متلاغي وياهم ومهددهم افركم فر وعلي توخرون مني لو شلون..

-عاد هم لولد كايليه بس شوفنه الباجات اذا صدك انت عسكري يلا تعبر سلاح وسرعة جنونيه وتريد نعبرك عاد خابرني اجيبهن لان ناسيهن..

-وهسه خلصتي اسالتج خلي الحك عليه واقفلي بابج لا تفتحينه لو يتفلش حجاها وطلع..

-هو طلع واني بقيت بقلق واصلا هي هاي حياتي خلصتها بس خوف وقلق طلع الفجر وهم
ماكو ضليت الوب اخاف صار شيء
اخاف الولد الي يدز رسائل غدر بي
تعبت من التفكير فرشت سجادتي وتوجهت
لربي ابجي وادعي روحي مفرفحة
ومسلوبة الارادة ياربي ما يصير عليه شيء
يارب احفظه بعدها دعيت اذا الي حوبه تبينها بتمارة الي هدمتني ودمرت حياتي وخلت
الي يسوه وما يسوه يتشمت بيه وانو الكلام
طلع من اختج..

-شوي و اندك الباب ركضت افتحة شفت مهاب ساند اسر اشرلي لا تحجين تعبان دخلت للغرفة رتبت مكانه هو نومه انطاني حبوب صغار وقطرة مرسوم عليها عين.. ذني بوكتهن ياخذهن اروح شغلة جم ساعة وارجع اشوفه ديري بالج عليه..

-طلع لحتكه يم الباب.. مهاب شبي خالك حباب احجي؟!..

-هو حجه بثكل.. هو انتن شبقيتن بخالي هالمرة اني راح اوكف بوجهجن اذا فكرت وحدة تغثه
كافي دمرتن الرجال من الله لا ينطيجن..

-رجع كمل.. ساعتين احنه ننتظر ذاك الساقط كايل الخالي تعال بشارع المطار تلكاني انتظرك مر ساعة وجان ينغلق جهازه شوي ورجع هو اتصل يضحك على خالي.. ما تصورتك اثول
شصخم بيك انت اريد حضن مرتك بقى يحجي كلام مال مثل اخلاقه خالي انفعل يركع بالبنيد ماكو شوي وصاح..

-مهاب الحكلي كل شيء ما اشوف بس ظلام ركضت بي للمستشفى 3 ابطاله مغذي يلا نزلوا ضغطه زين ما نضربت الشبكية ونعمى..

-هو يحجي بانفعال واني لحظة اخجل منه انو
اختي الي وصلتنا هالدرب ولحظة كلبي يتكطع
عليه نزلت دموعي هو هز ايده وطلع ومبين
زعل مهاب جبير على خالة هالمرة بس
اني شبيدي كلها ترجع عليه تعبت اني تعبت
والله ومحد يحس..

-رجعت يمه اتقربت عليه بست عينه ورجعت على الثانية وراسة هو فتح عيونه الي تعب
الدنيا بيها حجه بصوت تعبان.. تعبان ريا ارحموني كرهتوني بالساعة الي اجيت بيها
للدنيا ادري طالبيني طلابة من اشتعلوا اهلي واختج وخلصت منهم..

-سحبني عليه.. خليج يمي بلكت أنام بقيت يمه ابجي بسكته بس دموعي تنزل على ايده
مسح عيوني.. كافي حبيبتي صحتج عندي بدنيا كلها احاسبهم الخاطر دموعج النزلوها..

-باس كتفي وعيوني.. اعرف اني اول واحد أذيتج ضربتج بلا رحمة مو شاك بيج بس صار عليه ضغط قوي من التفكير ماعرفت شتصرف وحتى من كتلج خنتيني ساعتها الشيطان جان متربع براسي وأذيتج لج مجرد فكرة تباوعين الغيري حتى لو بدون قصد ما اتحمل مخبل
بيج اني واعرف غيرتي تاذيج بس ما اتحمل
ريا..

-اسمع كلامه واعرفه صح بس ساكته لان ما اريد اضعف اني ابالي قررت اعوفه خلي
هو يرتاح واني هم ارتاح لان اذا بقيت هم
فترة ويرجعون اهله لو تمارة ويسويها حضي وهم يرجع يصدك خلينا بعاد عاد بلكي نرتاح..

- فزينه على صوت تليفونه رفع خط اسمعه يكول الحمدلله خويه مقصرت شتطلب حاضر ادري هو سرسري بس شسوي يبقى خال الجهال محسوب عليه..

-من سده سالته شكو؟!..

-اخوج العار حفينه يلا وصلنه لواسطة كدرنه نطلعه والبنية صاحبة عمر طلع عدها ضمير شاهده انو هو خارج العصابة وهالشيء هم
ساعدنا بس طلع اخوج ماخذها بقوة واجرم
بيها الظاهر مشتكية لارفد..

-هو راجع لعمر سأله صدك هيج مسوي بيها اخوج معترف بانو كلامها صح لان عباله مو بنية وضحكت عليه واكتشفت هالشيء من صديقتها كالت ترى هي مو بنية بس هي مرجعه نفسها وفهمك كفايه اخلص منها..

-واني من رحت جنت ناوي عليها ال**** هي هم تشتكي بس خلتني بصدمتي شفتها بنت بيوت
ردت افهم منها.. لعد شلون صديقتج كالت مو بنية وخلتني اعتدي عليج؟!..

-رادت تحجي ملحكت كبسوا علينا..

-عاد ارفد كايله بس انت كايل لامك اني نايم
وياها ومتورط هو مجاوبه لا ردت اضغط
عليهم حتى يزوجونا..

-زين انت تدري بيها طلع عدها اهل وطلعت
من اهالي ال**** شارده من ابوها ومرته
وهذا الي مسوي نفسه أخوها المطبر مغتصبها قبلك ومسويلها عملية ساترين عليها علمود يستفادون منها بشغلهم شجاك انت ما مبين
عليك تصدك بهيج عالم المهم جاي نحاول نطلعك
وهي هم ساعدتنا..

-و نحاول بلكت نكدر نوصل لاهلها لان الظاهر ماعدها شيء سجلها نظيف بس مورطة نفسها ويا هل عصابة يعني باختصار يعمر هالبنية شاردة
من اهلها وواكعة بيدهم..

-رافد حجه و سوه الي عليه بس عمر مجاوبه.. ما تهمني هيج هيج تبقى كحبة ونضحك عليه بيها زين ما وصلت للعرس وين متولي تولي..

-واليوم يطلعوا العمر بس يكملون الاجراءات حجاها بس صراحة ما فرحت ابد حتى اسر استغرب.. لج يبقى اخوج وصارله بالتسع شهور مسجون شبيج حبيبتي مو جنتي ملهوفه بس
حتى يطلع ويخلص من هالتهمة..

-تنهدت بقهر.. هو سبب دمار حياتي حجيتها
التفت عليه.. شكو احجيلي ليش تخليني اخابره واساله شنو معنى كلامج هذا؟!..

-ماكو شيء بس ضغط عليه هواي بتصرفاته
لهذا هيج احجي قابل شكو..

-اسر..

-عيونه ابويه انتي..

-لعد شنو تكول للولد سهله يعني اكيد دافع شيء افضالك ويا اهلي كثرن وهو ما يستاهل..

-فدوه الج كل هذا الخاطرج اعرف بي ما يستاهل حجاها واني سكتت ضجت لان هو دوم شايل مبالغ عن اهلي يساعدهم حتى بعلاج فارس مال إدمان اسر ساعد بابا وياريت احد يستاهل
من اهلي لو اهله..

-كمت انظف شوي واجه حضني.. اسبح وطالع اشوف الولد ونطلع عمر حضنته بقوة هو باوعلي مستغرب ودخل يسبح..

-ركضت على الموبايل اتصلت بسرى
وعيني تراقب اخاف يجي فتحت خط حجيت
بسرعة.. دزي عمامي وفارس وبابا يجون يأخذوني تمارة تهمتني يم عيالي عندي علاقة
وهجمت بيتي سرى لا تعوفوني..

-سرى شهكت.. صخام بعينها ولج ريا وهسه
انتي شلونج واسر شسوالج..

-شك بيه وموتني كتل من وراها بسرعة
وصليلهم خلي يجوني ما اريد ارجع بعد..

- تصرفي هذا جنت مقررته ومنتهيه منه
جنت شايله بكلبي على اسر من ضربه الي
وخشمي الي احسه مكسور وهو عباله مثل
كل مرة يبوس ويعتذر وهيج ريا ترجع لحضنه بس ابد مستحيل اضعف بعد اليوم اضطريت
احجي عليه انو هو مصدك حتى يجوني..

-طلع من الحمام بدل باسني وراح واني تصرفت طبيعي من راح حضرت غراضي من رجعت
للغرفة شفته عايفلي الموبايل ابتسمت بقهر
الظاهر خلص عقابه عباله بكم بوسه صالحني
على هالضرب الي الحيوان ما يتحمله وياريت
مسويه شيء هي طلعه وطلعت من خشمي
وهذا جان نتيجة حكمه وابعادي عن العالم
بهذيج الفترة جنت مثل الما شايف وشاف
لهذا وكعت بهالغلط وكلها عاقبتني عبالك
مسويه جريمة..

-فهمت سرى وكتلها تعالي انتي هم وياهم سديته بسرعة دكت سمر سلمت بقت تسأل على اسر كتلها زين مابي شيء هي كالت..

- ريا بيبي اتخربطت علينه لان خالو طردها
وحايرين بيها..

-جاوبتها.. شعليه بيها طبها طوب الباطلة..

-عوفج منها بس على كيفج ويا خالو فدوة خطيه
تعبان كلش مهاب ميت قهر عليه من حجاله شلون عبر السيطرة يكول جان صافن بغير عالم دايس بانزين حتى ما شافها زين ما نكلبت السيارة بي جان مات وخسرناه..

-عاد مهاب حجه ويه الحرس فهمهم مريض ومن دروا عسكري بي ورتبه معتذرين منه..

-سمر احنه مانرهم بعد خالج كرهته شيصير بي عسا من ايده هو انطه مجال الهم هيج يسوون
لان كلها تعرف بي متسرع ويرجع عليه
وكدام اي احد يهيني لهذا لا تحجين شيء ولا
تلومين محد يهمني بعد..

-صاحت بيه.. شنو هل حجي هذا كل السواه ماوكف بعينج شبيج ريا ترى اي واحد
يسوي هيج واكثر لا تلومينه واختج
دارسة خطتها ويا ابليس..

-بعد ما يوكف شيء بعيني وما اريد واحد
يسويلي شيء واريد اصير ناقصة واخلصكم
مني سديته بوجهه هي وحدة من الناس ما تحملت العيشة رغم سامر هم جان يحبها وفترة وعافته
الله يساعدني بعد كل الي عشته وجايه خالو وخالو..

-طلعت مستمسكاتي كلها اخذتها وحضرت
جنطي دك اسر.. حبيبتي طلعي السمجة من الفريز اشويها ترى ميت جوع..

-كتله اي وسديته مر الوقت واني منتظره خبر
من سرى هو اجه من شافني كل شيء ما مركبه .. بيج شيء ها شو طباخج فارغ؟!..

-مالي خلك اسوي شيء..

-هو ضحك.. لعد اليوم اوكلج من ايدي الظاهر الطناكير كابه راح طلع السمجة اسمعه يطكطك بالمطبخ رحت اغسل وجهي غراضي جنت
ضامتهن بالكنتور لا يشوفهن ويسويلي سالفة..

-اتقرب عليه باسني وره اذني همس بحب.. اليوم نعوض الليلتين الكشر الي راحن و عساهن لا ردن اعدلج ابو النفسية من تروح فدوه الضحكتج
تمارة وكل عشيرتي..

-ضحكت.. اي نعوض اخاف ما نلحك نشبع حضن..

-شبيج اليوم كلامج الغاز شكو ريا؟!..

-ماكو شيء غير اجاوبك هو كرصني.. شورانه حبيبتي اشبعج جنج على حضن..

-ابتعد عني رجع للمطبخ بهاي الاثناء ندك الباب قوي ركضت قبل اسر فتحته هو اجه وراي
جانوا سرى وفارس كاللهم يا هلا يابه..

- سرى جاوبته بنتر.. لا نهلي ولا نمرحب جاين ناخذ بتنه الي طيحتوا حضها.. فارس خزرها.. اسكتي..

-اسر بس يباوع علينا ما مفتهم شكو اني بسرعة ركضت للغرفة لبست صايتي اريد انزل اسر صار بوجهي.. وين ريا هذا شنو معناه؟!..

-وخر من طريقي اسر كتلك احنا ما نرتاح
سوى خلي اروح ونخلص سرى سحبتني
نطلع هو راح سد الباب وكف يمه مانع احد يطلع..

-فارس حجه ويا.. دنزل عمامي وابوي ولد عمي جوه امشي نتفاهم اسر رفض.. لا انزل ولا ريا تنزل اخذ عمامك وروح..

-بقى فارس يحجي ويا فتح الباب نزلنه هو يباوعلي مصدوم ونظراته كلها قهر وعتب
ركضت وره بابا اسر راد يسحبني بابا تكامش ويا ضربه قوي على صدره حجه ويا بغضب.. تشك بنتي لك انت منو هواي سكتت الك تحلم بعد تشوفها طيحت حضها ونكول رجلها تالي
تشك بيها..

-اسر حجه بحركة كلب.. انتم ليش باطلين عمي هو ياهو التهمها مو بتك الثانية واني كلت الريا ما
اسكت الها اطلع حقج منها ومن كل واحد حجه عليها شختلف هسه واجيتو تأخذوها..

-خليها ابالكم احبها واخاف عليها اكثر منكم وما تطلع وياكم.. حجاية منا حجاية منا صارت ضجه طلعوا الجوارين على الصوت يباوعون ولد عمي ادخلو اسر دفعهم قوي صاح بيهم بغضب .. انتو معليكم مرة ورجال قنادريش تدخلون راد يصير مضارب بينهم لان شتدت كلش فارس ادخل بسرعة هدأ الوضع اخذ اسر على صفحة يحجي ويا واسمعه كاله.. ناخذ ريا ويانه ترتاح..

-تخبل اجه ركض عليه سحبني خلاني وره ظهره ومرجع ايده شابكني بيها ما همته الناس ولا كانو
يشوفهم يحجي بعصبية هو بكيفكم تأخذوها اسويها دم وعلي الي يتقرب عليها بيكم خير
روحوا على بتكم ذيج..

-كلها ضجت بالصياح هو صعدني فوك سرى وفارس وابن عمي صعدوا ورانه اسر يحجي
ولمحت بنبرته قلق وخوف انقهرت عليه بس
كافي تحملت هواي لازم اخلي حد كرامتي نداست.. ولج اعرفج اذا رحتي بعد مترجعين صاح بصوت عالي تريدين تموتيني ليش تستغلين هل حب وتعذبيني ليش لج ليش ريا لا تروحين..

-دفعته.. كافي كل عمري ما ارتاحيت وياك بس مشاكل وقهر ومرض وحبسه وكله ممنوع
كافي انهاريت كافي تعبت طاقة ما عندي
بعد اتحمل على لحظة يوكف كلبي واموت ما اتحمل بعد..

-هو حجه بحنية.. شتريدين تأمرين بي بس ابقي بيتج ما متقصد هيج اخنكج بحياتج واحبسج بس من حبي وغيرتي وحرصي عليج ابقي حبيبتي والي تردينه يصير..

-نزلت ويا فارس وما باوعت عليه ما ردت
اضعف هو ركض للمطبخ شوي وصارت ريحة ركضنا لكينه شايل الصونده مال الغاز ومتسرب
و ريحه تخنك وشايل الجداحة ويحجي بحركة..

-احركها واحرك نفسي وما اخليها تطلع منا
اريد اشوفكم شلون تاخذونها.. ركض عليه فارس بس هو ضخم مكدرله سدوا الغاز دفعوا كوه
جان سوه بينا مصيبة..

-حجيت بلحضة عصبية وانهيار من الموقف.. دوم هيج تسوي بينه بخبالك تريد تحركنه وتريدني اعيش وياك لو اموت ما ابقى تريد تموتني اسر
وتكول ما حابسج..

-صفن عليه بخذلان.. روحي الله وياج كرامتي فوك كل شيء والظاهر نزلتها من كتلهم لا
تاخذونها تردين ترجعين للي اتهمتج مو روحي
ريا الله ومحمد وعلي وياج..

ردت اكلك
هجـرك ابــرودة شتــا
ومــاعنــدي ثــوب..

- نزلت هو هم نزل ورانه واني القهر ينهش
بروحي والله بعد ما اعرف شتصرف بس كل
الي اعرفه هالشيء لازم يصير من زمان
سمعته يحجي ويا فارس.. اخذ اختك عمامك
ينتظرون واطلعوا راسي راح يطك رحمة الموتاك..

-عمامي كالوله النا حجي ثاني فارس كلش يحب اسر حسيته كلش انقهر دائما يكلي اني خجلان منه على وكفاته ويانا كالهم.. روحوا اني باقي يمه
عندي حجي ويا..

-رجع فارس يم اسر الي ضل كاعد على
الدرج سيارتنه تحركت والقهر متغلغل بروحي
سرى ضلت تباوع همست.. لج خطية نظراته كلها قهر وراج الله لا ينطي اهله وتمارة..

-دخلت لبيتنا واني محمله هموم زواج ما حصلنا منه غير الحقد
القهر
المرض
الاذيه
المكائد
ولا هو ولا اني ارتاحينا صعب كلش نكمل
يحبني هواي واعرف بهالشيء واحبه هواي
واكثر يمكن بس لهنا وطرقنا تفترق افضل
يمكن الله يكتبلنا راحة تمحي كل الي شفناه..

-عمر صار كبالي.. حمدلله على سلامتك
حجيتها هو اجه يمي باسني من راسي..سهله بعد اخوج تنحل وتمارة احسابها عندي..

-عفته ورحت حتى ما علقت على كلامه بعد
وكت كلها صارت تحن على ريا من كفختها
الدنيا احس روحي توجعني هالمرة الوجع
مو بالجسد مالي خلك كل شيء اهلي عايفيني براحتي بناتي اسر دزهن بيد فارس..

-مر يومين واني على نفس وضعي ادخل على البرامج اشوف اسر متصل بعدها حضرني بيت ام مهاب كلهم صاروا ضدي كطعوا ويايه حتى نورهان مهاب منعها..

-جنت كاعدة وكالعادة فاصلة عن الدنيا
اجه فارس كعد يمي.. فكيها كافي زعل
ذبلتي خويه وانتي مريضه ولعيونج اليوم راح نسحلج تمارة....

يتبع....

حبايبي ان شاء الله البارت القادم الأخير
كم يوم اكتبه وانشره لان بي هواي تفاصيل..

اللهم صل على محمد وال محمد❤️