أحببت روحك

١٧

أحببت روحك💞
فاطمة العامري ✍️

وره  سبوعين اتصلت هديل عليه اليوم كالت حبي حضري روحج اليوم انت وسرور وشدن حزمجن وتعالن

خير شكو نشد حزمنه

اليوم جابونه تمر من البستان وعمل شعبي يله بسرعه

يا هم تمر اخخ من هسه ضهري وجعني

يله يله بسرعه اجتي بيبي وامي فرشت وبدن يشتغلن

اي يمعوده هو انتوا تصحولي بس للكراب
سديته منه ورحت السرور الحالفه متروح بس ابويه عاط عليه وكلهه يله بلا دلال

ورحنه مثل كل مره نفرش فرش كبار ونحط التمر ونبدي نعزل النظيف للجبس والتعبان للدبس و اليابس للخل ونعزل لعماتي ولعمامي كلمن حصته

جنه كاعدين كلنه ونشتغل وبيبي بنصنه وتسولف ويه امي وحننه نكركر وحدنه وجان اسمع صوته يصيح لهديل

جمدت باوعت لهديل بخزره عرفت شنو معناته الحقيره ماكالت هو هنا
باوعتلي ضحكت بخباثه وصعدت جتفه كلتلي انت ماسالتي وعافتني وراحت فوك

اني تلعثمت من يمي ضلينه نشتغل وره شويه نزلت هديل عمه كالت

ها يمه شراد اخوج
كلي نزلي ملابسي الوسخه وسويلي جاي

راحت سوت الجاي وماأسمع اله صوت رجليه هو ينزل الدرج ويه كل خطوه دكات كلبي تزيد والحراره صعدت وكمت احوص اريد اشرد سمعت كال
الله يكويكم

هله يمه

هله حبيبي كل الهله هله بهطول هله يا بيبي

هله بيج بيبي دنك عليه وباسه  وكال
ليش متعبه روحج حبيبتي كومي رتاحي همه
يكملون

لا يبيبي بس اشغل ادياتي جا شعندي

عاراحت حبيبه

اني مدنكه وبس احس بحركاته كعد عله القنفه الي يم بيبي وتصير على يميني

كال شلونج سرور   يمه هو هيج كال ودلي اطلع اشرد لبيتنه ختنكت ولا جن اني كاعده بس سويت روحي ولا يمي بس اني أغلى من داخل هيه جاوبت
الحمد زينه
اجتي هديل جابت الجاي وخلته كدامه كله
اي والله يسلموا
كعدت يمنه تكمل شغله وهو لزم مبايله

هديل تحاجيني واني كلسى اخزره وارجع اكمل والسوالف مستمره

وره شويه طب مؤيد وجه احمر ومحتر كال
سلام عليكم
اني رديت وياهم بصوت واضح حته اسمعه
وعليكم السلام هلو مؤيد شلونك

هلو نور شلونج شلون صحتج

الحمد لله اسأل عليك

بتسم تسأل عليج العافيه وضحك باوع لأخو مؤيد كعد يم بيبي
يداهر وياهه وحط اييده على متنه ويبوسسه افشش يريحت الجنه هنياله جدي

ضربته بعكسه ولك انت ماجوزز من سوالفك
وين جنت جاي تلهث

جنت بالجم
ياجيم هذا
هههههه التمرين العب رياضه

سرور منزعجه بس تريد تكوم نوب كالت
بملل وضوجه
هذا شيخلصه عمه ضهري شكل تعبت

مؤيد ضحك وكل لبيبي

بيبي ماشوفلي مره من نسوان كبل اريده مره حوك لا تتعب ولا تمل مو من ذني الي يتنعوصن

سرور كامت تعوج بحلكه وكالت علكيف عالساس البنات كاتلات روحهن عليه ندسته تسكت
بيبي كلتله وين رايحه البنات المعدلات شزينهن وشحلاتهن وشندرهن  بس خلي ازوج اخوخ ونوب انت
مهند كال وبدع ماشاء الله ابن عمي

اي والله بيبي زوجيني بس اني مواصفاتي خاصه

اي بيبي ازوجك يوم عيد انت بس اشر وكول شتريد

اريد عيون خضر وساع والشعر اشكر محابس
وبياض ناصع يلالي كون تشرب المي يلالي بزردومه هههه

لا لا زودهه هدوني عليه متت صدك ودلي اشيل الطاسه الي كبالي وركعه بس خليته عالصامت وسويت روحي احجي ويه هديل عود اني كلشي ماسمعت وكلت لهديل
اي وشصار بالبطله وهيه شلون تلكفه وهيه طايره كالت يابطله؟ ندسته كالت ها اي غير ماتت من الغيره وتهمس وتضحك
همستلهه طبعا تضحكين عليمن طلعين اخت الخبيث خبيثه

عاد بيبي ضلت جاوبه يا عاب حالهن البلك
اكو احله من دم بناتنه الي يلعب لعب و من ندارتهن

مؤيد كال يا نداره بيبي وحدتهن بس تعرف شلون تكنك وتلزم الموبايل  اي خويه هاهيه عليهم بس تلكه من هاي الموصفات حجزلي اخته

مهند ضحك وكله دخلي الكه اني عود اطيك اختهه

كلهه كامت تضحك سرور كالت
اكلج بيبي اني تعبت خلي يكملون الولد ألمن رايدين عضلاتهم وكامت

مؤيد كال وأنتن شنو شغلجن تعاي كملي شغلج لا اجي اسحلج من شعرج

مره عمي كالت
عوف الجاهله شبيك وياهه

ضلينه نشتغل مؤيد صعد يسبح كوه كومتته بيبي مايسكت بس يصنف ويدردم علينه

كالت مره عمي يله يمه جيبي الجياسه خلي نعبيهن كوم يمه هوودي شيل ذني خليهن على الميز بالمطبخ وذني بالطارمه افور الدبس بره ريحته قويه

كله اي يمه صار
كام شال اول مجموعة ورجع عالثانيه وكلما يتقرب من يمي عطره يتغلغل بأنفاسي كمت رأسا غسلت وبقه بس يجبسوا صحت عالسرور يله نروح كالت مره عمي

انتظري يمه اخذي حصتكم
لا عمه خليهنه صار المغرب من يمرلكم بابه طيهيا طلعت سرور من  الاستقبال كتله جيبي الجنطه
جبته
والموبايل
كالت رجعته بالجنطه

سلمت على بيبي وطلعت وهيه ورايه تسلم عليهم وتلغي طلعت كدامه جان واكف بالباب

طلعت صارت عيني بعينه ضليت اباوعله نوب دنكت دمعت وكلبي يفور وكفت قريب عليه لازمه الباب منتظره سرور  احرك  بطرف رجلي بس  مقدمة القدم  عله الكاع بحركه خطيه وعفويه يسره يمنه  هو ضل يكلب بالموبايل متكئ عالحايط وحاط ايد وره ضهره ومنتجي عليه  احس بتوتر وكوه اتنفس
كاتمه انفاسي

رجعت دخلت ولزمت الباب وصحت
يله سرور راح--

جان همس
نصي صوتج
باوعتله ورمشت بعيوني هو دار وجهه بقه يباوع بالموبايل جريت نفس بهدوء اجتي سرور
اي جيت  هو خله الموبايل بجيبه  تمشينه تمشه قبلنه بخطوه حته ماكال خلي اوصلكم بس يمشي مشينه ورى وساكتين كلسى اشيل عيني اباووع عله طوله وشعره وصفحته ركبته يمشي بثكل وحاط ايدددي بجيوبه ووكلس يرفع راسه ليفوك ياخذ نفس عميف ويرجع ينزل راسه ولا لتفت علينه سرور تحجي ويايه علكيف واجاوبه بأي وبالي كله يم خطواته وصلنه قريب بابنه دخلت سرور دك موبايلي وكفت
الووو
ها اي   مالتي هاي سرور من جانت تلعب بالموبايل     خليه يمعوده عدي غيره هاي خالته حتياط بالجنطه     يله باي لا وصلنه

خليت الموبايل بالجنطه واريد اطب
كال ناسيه شي اروح اجيبه

باوعتله وصفنت  عليه حجيت بهدوء
لا مو مهمه الشاحنه عندي غيره
نحجي شي وعيونه تحجي اشياء

هز راسه ودار وجهه ومشه بقيت اباوعله

هسه يدور وجهه هسه يدور احجي بكلبي
راح يصير وره الشجر وراح ومادار وجهه درت وجهي وطبيت  ركعت الباب وعيوني تصب بدون إذن مني مسحتهن عالسريع ودخلت جوه حقدتت عليه اكثثر من زعلي عليه ولا معبرني كلت اله مااحجي ويا بعد

مرت الايام وبدت امتحاناتك اخر السنه
و ذبينه نفسنه عالدراسه وبيوم عدنه أمتحان صعب هديل تكول تعاي اني ابد ماروحت حته من هو ماموجود ماروح بعد كطعت فد كطعه

وبيوم امتحان الرياضيات كالت اني مهند راح يقريني كتله على راحتج كالت متجي كتله لا

وضليت أقره وحدي ولاصت عليه وابوي اختصاص اجتماعيات واصلا مغيرين كل الماده وراد يقريني ولاصت عليه
طلعت الدروس من اليوتيوب وشكو موضوع ماعرف اكتبه ويطلع الشرح بس يطول المهم
دبرت اموري وكملت وتعشينه ورحت اعدل غراضي لدوام مال باجر فتحت الموبايل لكيت جايه رساله منه

ليش ماجيتي تقرين شكد عنيده  

جاوبت بقهر
مو قصة اعناد بس احب اعتمد عالنفسي

ها مو جنتي تجين اقريج شنو الي تغير

عادي كبرت جنت صغيره وماعرف اعتمد عله نفسي هسه  ماحتاج احد يساعدني

اي واضح متحتاجين احد ماشي عالراحتج

اني هم طفيت الموبايل لا تبجين كافي هو شكو كلش عادي احاجي ويه  روحي واخذ نفس عميق رحت فرجت وغسلت وافكر بالكلام  وأتحرك وبالي يمه الى ان نمت

مهند
ايام كام تمشي كله نفس الشي احسه بلا طعم الحرب والاوضاع الي جاي نمر بيه متسولف مرار بس الي يصبرنه دعوات اهلنه وناسنا واحنه نشوفهم يجيبون مالذا وطاب حته نراكيل يجيبون لشباب وبطانيات اشكال اكل بس اكو مقرات جانت قليل توصلهم المأونه وجنه واحد يشد ازر الثاني وعدادنه تزيد متنكص يروحون  عشره يجون ميه الحمد لله نتقدم للعدو منرجع وكت متهدء الاوضاع نكعد نسولف نفضفض وقوة علاقتي بسعود  وصار مثل عادل واكثر سولفلي كل مشاكله ويه اهله واهل مرته واخذه غصب لا اهله قابلين ولا اهله  وجره من ضيم لضيم وكف شغله وهو من اهل الفلوجه وصارت أوضاعهم بالنازل وكطعهم الضيم فضطر يامن مرته بيت صغير اجره وطلع للحشد يكول احسن ماكاعد لاشغل ولا مشغله وكل اجازه ايمنلهه الراتب ويسوكله ويجينه مهموم وحاير بزمانه بس هو حشاش الى  درجه او يمكن من الضيم يضحك للهوه فصار صاحبي للوحه فالهه خابروا الوضع جاي يسوء وهو جان مطلعهم مناطق أمنه عود بس تازم الوضع بالرمادي فكتله بجيتك الثانيه جيبهم يمنه بغداد أمن كال
علووا  بنزلتك هاي شوفلي بيت بأقل ايجار واني اجيبهم واجيك وتفقنه

من نزلت مثل كل مره لا اشوفه ولا اسمع منه خبر ام راس يابس اني كلش تحملت عليهه
خاصا من جانت متاخر بالليل وماعجبه ادخل بيه   سمعته حجايتين بالعظم اعرف قسيت
بس حته تعرف غلطه  واريد اشوف وين توصل بعنادهه

وبيوم جنت مجاز كعدت من نومت الضهر غسلت وطلعت الملابس الوصخه وصحت لهديل وهيه تلمهن كالت جاي نشتغل بالتمر وبنات عمي يمنه

اني كلبي رف واريد اشوفهه بسرعه مشطت وكلبت شعري ليوره وعدلته وحطيت عطر ونزلت وكله ملتمه وهيه كاعده بكل هدوء تشتغل ولابسه حجابهه وثوبه ردان اباوع عله اديهه الناعمه البيضه
سلمت عليهم وهيه ماردت واني كل بالي وأذني تعمدت سلمت عالاخته وهيه  ولا يمهه تشتغل بهدوء ولا رفعت راسه ولا باوعت بس حركت دمي من اجه مؤيد وسلمت عليه وتسأل عليه ردت اجر كصيبتهه بس الكعده محضوره
بس لازم ابينلهه ماميت عليه كلت اريد موصفاته الي اخذه وتعمدت بعيده عن مواصفاته واني اصلا ماحب الشكر
لان عندي بس عيونه السود تسوه الف مره شكره   حسيت بيه ضاجت  وكلت يالله هتز الجبل ومن رادت تطلع اتمنيت اهلي يجلبون بيه سمعته من كالت اريد اروح طلعت بالباب وره شويه طلعت صارت عيني بعينه اوووف يابه صارلي شكد محروم من هل نظره ضليت اباوعله املي عيوني منه وبنفس الوكت نظرتي بغضب حييل مقهور منه دنكت ورتبكت  كمت اكلب بالموبايل وبالي مو يمه اصلا بالي وتفكري وكلبي كله يم الغضب الي متبعد عني غير متر تقريبا دقايق او ثواني بعد متكدر توكف صاحت على سرور كتله صوتج باوعتلي وكامت ترمش خوف بارتباك بسؤال انت شبيك عفته وماحجيت بعد اجت اخته
مشيت قبلهم  اوصلهم واسمع بس خطواتهم وصوت سرور تحجي وياهه وهيه ساكته  اتصلت بيه هديل بعد  ماحاجته  سألته  تريد شي اجيبه بس اريد اطلع حجه لان راح تدخل للبيت وادري هالمره راح يصير زعلهه اكبر لان ستفزيتهه اكثر من مره حجيت وياهه شكل وكلبي يحجي شكل ماطتني اي امل ولا بكلمه تحسسني اني مهم بالنسبه اله او اي اشاره خضره ماكو حجت بجمود بس عيونه كاتمه هوايه حجي ماافتهمته  درت وجههي ومشيت وروحي يمهه
اريد التفت وادري بيه ورايه تباوعلي ماطبت  بس كبريائي ورجولتي صارت سد كونكويتي بينه وسمعت طبكت الباب وحسيت طبكت كلبه وزعلت
مرت يومين  اروح وارجع ولتهيت بسعود ودبرت لأهله منطقه ابسط من منطقتنه شعبيه وبيوته ارخص وكفلته  وجاب عائلته وعنده  بس بنيه عمره سنتين   والي عرفته مرته حامل

ولتحقت ومرت الايام  كمنه اذا صارت اجازاتنه سوه   نزل اني ويا  ومرات ويه عادل ومرات هم ينزلون واني ابقه وهكذا

وبيوم جنت مجاز وابويه خابرني جنت طالع ويه الولد وكال اني تعبان وعدنه شغل بالمكتب ومؤيد طالع للبناء تعال ودي الناس يشوفه بيت ابو فلان
رجعت ورحت للمكتب  ولتهيت بيع وشره معامله لتهيت لثنعش تقريبا واني راجع شفت عمي يطلع  بسيارته ستغربت رحت تمشيتله
وكف كبالي تعبان خيرك عمي شبيك شفته يتوجع نزل كال اريد اروح للطوارئ شو معتي توجعني صدك جذب عمي ليش ماخابرتني
راح كعد بالصدر واني وديته للمستشفى
سولوا تحاليل كالوا عنده رمل ويسبب الام
اخذ العلاج كتله باجر اجيك نروح أخصائي
لا عمي ميحتاج شي بسيط
وأني اصريت
كال اذا خذت العلاج وأذاماصرت زين عود اتصل بيك
رجعنه وطبيت بالفرع كال اطبك بابكم واني اخذه للبيت ماقبلت وصلته للبيت ودخلت السياره وطيته السويج وسلمت وطلعت

بهل فتره عدهن امتحانات نهائيه ويوميه هديل تروح لنور وتقره وياهه وبيوم عدهم رياضيات كتله لترحين هيه خلي تجي حته اقريكم

كلت بلكي تجي اتصلت هديل بيه وماقبلت
ردت اروح اسحله سحل
دزيته رساله وصاك عالسنوني من الغضب
كتبتله شكد عنيده
جاوبتني  هيه كبرت ومتحتاج احد

ماعرف انقهر منه لو عليه لا اكدر اني اتنازل
وإصلاحه ولا هيه الي تعتذر عفت الأمور لزمن
خلصوا امتحانات واني رايح راجع  للضيم

جانت  نهايه 2016  كلش صعبه علينه وعلى كل العراقين الشهداء جر واحنه بنص النار بس نباوع الله وأهل البيت

شهر يجر شهر وحنه حته اجازاتنه قلت صحيح حرروا مناطق هوايه من الفلوجه والرمادي وبلشوا بالموصل والنصر قريب انشاء الله وكتهه قسمونه أقسام قسم راح لجانب الأيمن من الموصل والباقي توزعنه  وروح الاصرار موجوده من غير الدعم اللوجستي والبشري يزيد المتطوعين الله يكثر شيعت علي وينصرهم والله بقوتهم وتماسكهم يرعبون العدو لان دفعهم عقاءدي ولاءي مطلق
ونتقل وياهم سعود ودددعني وكال هناككك الوضع بعدد اصعب خاف اتأخر بالاجازه دير بالك  عله الاهل هاي امنه يمك
وراح واني ادعيله وادعي للكل بالنصر والسلامه وحالته مو احسن من حالهم وحالهم اسوء من حالنه يعني بختصار الموت يتلاوه ويانه ملاوه

نور
خلصت من الخامس الحمد لله بس فرحتي ناقصه وروحي لايبه مع انو الكل باركلي
بس اني اريد شخص واحد وتكمل فرحتي بس دائما احاجي بكلبي وفتح صفحه الفيس واشوف شينشر واني هم انشر للعراق بس ميعرف صفحتي ابويه بين كل فتره وفتره يتخربط فكتله لازم تعلمني على السياقه كلشي يصير
شنو بابه تردين تخلصين مني وتاخذين سيارتي
من عمري على عمرك حبيبي غير اني ابنك الجبير يعني لو اني ولد ماجان هو هسه يسوق وعنده اجازه ليش اني لا

لا حبيبي شعندي غيرج انت وختج بس تصيرين 18 اسويلج اجازه حته لا تصير مشكله من طلعين بيهه واذا ضبتيهه اخذلج سياره من تنجحين من السادس بتفوق مو تكولين بتفوووق

انشاء الله ارفع راسك والله خليك خيمه عالراسنه

بديت  اخذ محاضرات وشاده حييلي
حته الموبايل شمرته على سرور حته لا التهي
وخلصت العطله والاوضاع بغداد زينه بدتت تحرر مناطق العراق وصلوا الموصل وحنه الفرحه ماسيعتنه واشوف بيت عمامي همهم ومهمومهم  رجعت الولد بالسلامة اني اروح لبيت جدي بالاسبوع مره وسرور مو كلش تحب تروح بس بيبي دائما تجينه وهديل ومره عمي تجي يم امي وتشكي من قلت جياته تكول حته من يطوا  اجازه مينزل كام يطبك شهر شهرين ياله ينزل واني كاعده ع الدرج واسمع وتنهد بحصره وهو احنه من البدايه مابينه علاقه رسميه بس اقلها اكو سلام وكلام عادي بس هسه الجفاف شتاحني شتاقتله بكل معنه الكلمه وطكت روحي
وبيوم سرور جابتلي الموبايل
وجنت اقره كالت صديقتج دكت عليج اخذته وتفقنه نروح للمدرس علمود المحاضره وخابرت هديل تروح ويانه بدلت وضليت انتظر كلبت بالموبايل وكلما الزمه لاأراديا اروح عالصفحته
وشفت ناشر منشور ودموعي كامت تصب
شفت الفديو  مرتين ودموعي تجري نسيت كل الزعل وتصلت بي

اتمنه الكل يشفون الفديو
طبعا من شفت هذا الفديو بجيت
بحركت كلب شكد راحوا شباب وخلو وراهم احبه اهل واصدقاء وزوجه واطفال
الله يكون بعونهم ويصبرهم

طبعا نور من دزتلي المقطع كتلهه الله يساعدج بوكته شصار بيج اني من يمي نعصر كلبي
ردت انهي هذا البارت لهنا بطلب من نور
بس كتله كلبنه تعب من القهر ماكدر اخليهم ينامون مقهروني راح اكمل ولو الجزئ الي ورى فنتظروني 💞