♛ ♛ ♛ ♛ ♛ ♛ ♛ ♛ ♛ ♛
"شفاه مخملية" 💋
بقلم: زهراء السلامي.
#قالوا من اين جائت هذه الحوريه ، جائهم الجواب انها من الطبقه المخمليه..
أًهي من جنس البشر؟ ام ملاك نزلت على شكل رماد مُنتشر ! ، في شفتاها شيئا اشبه بالسحر ، تُغرس فيها الاشواك لتشبع من ملاذها ،
تُباع بالثراء والغنى فـ تصبح "شفاه مخمليه"
بقلم ithuda
♛ ♛ ♛ ♛ ♛ ♛ ♛ ♛ ♛ ♛
بهالاثناء وطلع غيث من غرفتي جحظت عيوني وكأن شريط حياتي كله مر من گدامي واني اشوف حمايه يطلع من غرفة نومي بهيچ وقت بالليل...
وبحركة سريعه منه جرهه من ايدهه وسفطهه ؏ الحايط وباسهه من شفايفهه گدامي!!!!
تخبلت واني اشوفهه تدفع بي وهوه مستمر، صرت اعيط بأعلى صوتي وكأن اوتاري الصوتيه چانن نايمات وهسة صحن...
-هجران: بيبييييي عططييييييه لحگووووولنه
رحت عليه اريد اجره وبرمشة عين شفت اسحاق وفيصل فوگ راسي، جرو غيث عن جواهر الي اختنگت من البچي ومن قُبلته العميقه الواضح گطعت انفاسهه..
جرو وگعو بالگاع وصار فيصل يضرب بصدره وهذا يقاومه بأيده بَـس اكيد فيصل ميگدر عليه وحده فَـہ تدخل اسحاق وظلو يضربون بي ويفشرون عليه وفيصل رفع راسه وصار يسب ويغلط ؏ جواهر المسكينه..
-فيصل: گحـ**** تخووونين زلمتچ ويه ابننن عمممه
جواهر مختنگة وغاصه بدموعهه، حچيت اني بحرگة گلب...
-هجران: هيه معليييهه هذا غيييث الحقييير اعتدى عليهه!!
-فيصل: هيه لو چانت مريه من صگد ماتسمحله!!
-شهد بعياط: حططط لسااانك بحلگك واسكتتت فيييصل والله اللعب بيكممم طوبه انتتتته منو وتحچي بشرررف اختيييي ولللك
صار ملاطم بالحچي ناس تغلط وناس تصد وبيبي عطيه صارت تعيط بعلو صوتهه تريد تسكتهم وهمه ماكو وهاي جواهر المسكينه وجهها اصفففر ليموونه وبس صافنه متحچي أي شي..
بچيت ؏ حالتهه هاي ليش حظهه اغبر ليش اخوان ثنين يحاولون يعتدون عليهه؟؟ وين صايره هاي بالدنياا وحتى اذا نحچي گدام احد يگول فلم هندي بَـس هذا الصاار وصار ويه هالبنيه المزيونه المسكينه الي صار جمالهه نقمه عليهه..
قاطعت الهريجة الصارت اني وحچيت السواه غيث بالغرفه وصارو يلوموني ليش محچيت وليش معيطتلهم...
-هجران: هدددني يگول لعثماان ان انييي الصحتتتله حتى يجيييني
-حجية عطيه: اياااا معزى ايااا ابن الگو** ايا سرسري سربوووت تفييي عليك وع رباية ابوك الگو**
-فيصل: هجررران چان صحتتي
-هجران: غباااء منييي اييي اني غبيييه وتوقعته رح يسويلي شي لو يسوي لبنتي شي وطلع اثاررري حاط عينه ؏ جواهر ويريدهه!!!!
وبينما اني شحرجت من العياط والكل يتعارك وطبو عُثمان وعميد الدين والباقين وانصدمو من شافو حالتنه، مجرد ما زئر عميد الدين بصوت خلسنه جواهر فوراً نزلت دموعهه ووگعت گعدت بالگاع..
تخبل عميد من شافهه تبچي وگاعده ؏ الگاع والكل واگف يباوعلهه، طار عليهه گعد گنبص گدامهه ولزمهه من ايدهه وحچة ملهوف...
-عميد الدين: شمالچ بويه شني متوجعه؟؟
رفعت عيونهه الزمرديه المليانه دموع وهزت راسهه بـ "لا" همست بشي ناصي ماگدرت اسمع شگالت بَـس واضح هالهمسه چان بيهه شي چبيييير الي خلت عميد الدين نهض بحركة سريعه وروحلك ؏ غيث اللزمه وانزل بي دگ كتل..
عُثمان صار حاجز بيناتهم وعيونه تزرزر عليه يريدني افهمه ولو بأشاره واني لسه الدهشه محتلتني من الموقف ومگدرت اگول شي، اصلاً شگوله شحچيله؟؟
ماعرف شلون اوصف حالة عميد الدين ولا شلون حرفياً طبق جملته المعروف بيهه ودائماً يرددهه ؏ مسامع جواهر وهيه "الي يأذيچ اطره نصين وعلي" فعلاً شگ غيث نصين بحيث الدمايه ملت المكان..
حسيته مثل الاسد الغاضب واذو لبوته المجروحه ويريد يدافعلهه، محد گدرله كلهم صارو فوگاه حتى يبعدو عن غيث وماگدروله، منيله هيچ قوة وهيچ عزيمه مادري..
صار يعيط من عُثمان چتف ايده حتى يسلم ؏ روح اخو "غيث" وميسبب عميد الدين حالة قتل هنا...
-عُثمان بصياح: عميييد الدييين قرباااانك عوووفووو
-عميد الدين: ولللللك اليوووم اشرررب من دممممممه
-عُثمان: عمييييد اصححححى راح تقتلووو
-عميد الدين: وللللك هدنيييييييي اليووووم گبببببل لواددي السللااام اليوووم انعل ابووو لابوو الجااابه هالسرسريييي السززز ابن الگو*** ابن البر**** ابن *******
ونزللل اشكااال مسبات وغلطط ماعرف منين يجيبه، احمد وفيصل جرو غيث السكران وطلعو من البيت بكبره وعميد فقد من العصبيه وعثمان صار يعيط عليه والجهال كلهم يبچون وهالليله چانت ليله سوووده..
حرر عُثمان عميد الدين من لزمته القويه وعميد طار لـ جواهر، لزم وجهها بأيده يباوعلهه وهيه تبچي، رجع عاط بوجه عُثمان....
-عميد الدين: اخوووك الساااقط موته ؏ ايدييي فهمتتتت
-عُثمان: شسوووه
-عميد الدين: اطره نصين وعلييي وهاي حلفتتت
-حجية عطيه: عمييّد بسك حبوبه ارتاح خلص انگلع من غير رجعه ان شالله
-عميد الدين: وابو فاااضل اذا اشوفن چهرته محد يلوومني بعددد اذبحححه ذبحة البهاايممم عثمااااان
-عُثمان بعياط: خللللص سوي التريدووو ول
صار هدوء بَـس صوت تنفس الزلم العالي نسمعه، تسحبت ورحت لـ جواهر وگفت بصفهه وهمست...
-هجران: جواهر هم فد يوم احد فاتح باب الحمام عليچ؟
رفعت عيونهه تباوعلي وهزت راسهه نافيه كلامي بمرات متتاليه وهمست بصوت مبحوح...
-جواهر: لاا لااا اني اقفل الباب مستحييل
هزيت راسي وهستوني دا ارجع اگوللهه الگاله غيث واجه عميد الدين جرهه من ايدهه ونزل بيهه جوة وبعد ماعرف شصار بينهم..
**
"جواهر"
اخذني عميد الدين لغرفتنه واني شهگاتي تسبق خطواتي، امشي جسد بلا روح ماعرف شلون حتكون ردة فعله لو شنو حَ يگول لو شلون رح نبدي الحديث..
صوت زمرد وياقوت يبچن ويلوعن وماگدر اروحلهن، حيلي مهدود ونفسي تلعب كله من وره هالنذل والسواه بيه..
راح عميد للباب وعاط برهف وغزاله يجن ياخذن التوأم، رهوفه دخلت تباوعلي وحلگهه متقوس واضح گوة بالعه عبرتهه، تقربت عليه وهمست...
-رهف: جوهرة فدوه لا تزعلين خيولي راح الله لا يرده
-عميد الدين: رهفففففف طلعيييي بررره
طلعت تركض وبيدهه زمرد، اندار يباوعلي واني جسمي كله يختظ هم خوف وهم حيرة..
تقرب عليه وصار گدامي بالضبط، رفعت راسي اباوعله وصارت عيني بعينه، همست...
-جواهر: رح تكتلني صح
-عميد الدين: انكسرت ايدي اذا سويتهه
من حچه هيچ انفجرت ابچي وهوه حاوطني بأيده ويبوس بچتفي حتى اهدأ، همس بحس مسموع وهوه لسه حاضني...
-عميد الدين: وروح ابوي جوهرة لو واحد جاسچ لو زعلچ ماضمن روحي شأسوي
بعدني عنه وصرنه وجه بوجه، مسح دموعي بأبهامه وگال بصوت مكسور..
-اسف بنيتي لان ماچنت موجود ونقذت الموقف گبل لا يأذيچ
-جواهر: عميدي انته ممعصب؟
-ناار بگلبي جوهرة واريد اطلعهه بأي واحد يجي بوجهي بَـس مستحيل اطلعهه بيچ
-انسى الصار وليظل ببالك
-اله اذبحه
لزمت وجهه بين ايديه وهمست بين دموعي..
-حبيبي اذا تحبني عوفه خلص راح والله يحاسبه
-عميد الدين: اخخخ جوهرة ااخخخ
-اسم الله عليك يا عُمر جوهرة، حقك لو زعلت وحقك لو انجرحت منه يبقى ابن عمك وتعده ؏ شي يخصك بَـس اوعدني عميد الدين متسوي شي يغضب الله لخاطري
-اويليي منچ
-اوعدني عميد
-اوعدچ
هزيت براسي ورحت للحمام اغسل وجهي وامضمض حلگي كم مرة، حسيت بي واگف بباب الحمام يباوعلي، طلعت وبوجهي رحت ؏ الفراش تمددت وهوه اجه بصفي، صرنه وجه بوجه وحاجبه لسه معگود، احسه بَـس يريد يطبر احد من عصبيته هاي عود اني محچيتله غيث باسني بَـس گتله تحارش بيه وضوجني بحركاته...
جريت وجهه وبسته اريد انسى بوسة غيث القذره وابدلهه ببوسة حبيبي الاعشقه بلكت انسى، ابتعدت عنه وهمس...
-عميد الدين: اعشگ صلافتچ
-جواهر: واني اعشگك فوگ العشگ عشگين
ابتسم بتعب وقهر واضح ورجع حضني ودفنت وجهي بصدره ورجعلي الامان والراحة...
**
"هجران"
تفرقنه وكلمن رجع لمكانه وعثمان دخل للغرفه وفوراً نام ؏ الفراش مبين مهدود حيله...
گعدت بصفه وزينب راحت گعدت يم رجليه وصارت تدوسله هوه فوراً طفر من مكانه وگال...
-عُثمان: لاا بابه حبيبتي شدتسوين انتي؟؟
-زينب: افركلك
-عُثمان: قربانو الجمال أنَا
جرهه لحضنه يبوس بيهه ويلعب وياهه وكل شويه يباوعلي يمكن منتظر زنوبه ترجع تنام حتى يگدر يحاچيني براحته..
اخذتهه منه وصرت ادگدگلهه حتى تنام وبسرعه غفت لان بعدهه النومة بعينهه..
-عُثمان: هجران شصاير فهميني؟!
بلعت ريگي وجريت نفس وصرت احچيله كُلشي ميهمني شيگول بَـس المهم ابرئ روحي واني ميخصني بسوالف غيث الغثيث..
-عُثمان: وانتيييي لييييش مادگيتييي عليه لو صحتييي ؏ الاقلللل
-لتصيح فدووه والله خفت عُثمان چان واگف بباب الغرفه وهددني اذا احچي
-يوليي هوه سكراان يعني مستحييل يگدر يأذيكيي
-اخوك يخووف وسوالفه محلوة من هسة اگولك واني صراحة خفت ؏ روحي وماجازفت وصحت لو دگيت عليك خاف انوب يأذيني لو يلفق عليه تُهمة ويخرب بيناتنه
-وتا لوو حكه تظنين اصدگووو!!
-يعني متصدگه؟
-اكيييد لااء هجران هذا اخووي وانا اعرفوو اكثر من روحوو غيث يااما دخلنه بمشاكل وسووه سوالف ماتنحكيي
-هجران: مرة غزاله گالت تحارش برهف لهيچ عميد الدين طرده من بيته
-اتفضلييي يعني يتحارش بطفله شتتوقعين منّوو هذا؟؟
-اسفه عُثمان بَـس خفت والله لتلومني اني مادري بيك رح تكذب اخوك وتصدگني
-اكذبو لان گتلِك اعرفو وخلص ماكو داعي تخافين وانا عاذرِك اخذتِك الخوفه وماعرفتي تصرفين
-اي والله صرت ارجف منه خصوصاً من گعد ؏ چربايتي واني ظليت اخذ وانطي وياه بالحچي اريد اللهي حتى اشرد منه بدون ميحس عليه
تنهد بتعب وهز راسه، زفر بهوى حاار قوي وگال بحيرة...
-عُثمان: الله ياخذو فشلنه حسبي الله بي من رجال
-اني الحيرني شلون شاف جواهر
-يولي هذا مو بوعيو تلگي ما شايفهه ويخايلو
-لاا هوه حچه بيهه
-عُثمان: كذاااب
-هجران: معقوله؟؟؟
-عُثمان: اي أنَا اگلِك كذاب ويخربط
-حتى لو نبه عميد الدين وخلي يشوف خاف اكو زرف بالحمام فد شي لان جواهر گالت تقفل باب الحمام فَـہ مستحيل شايفهه
هز راسه مؤيد لكلامي، عض ؏ شفته السفليه قوي وگال بحيره...
-حسبي الله ونعم الوكيل
-خلص گلبي خيولي لتعب نفسك وتفكر زايد
-عُثمان: هسة عرفتي هجران ليش أنَا ما ارضى يجي لبيتنه!!
-اي صراحة اني استغربت من مرة راد يجيلنه يباركلنه ؏ البيت وانته ماقبلت وخليته يجيك للمحل
-يولي هذا اخووي اعرفو واعرف عربديتو وسوالفو الصايعه
-الله يخلصنه منه
باوعلي نظرة واضح بيهه انكسار، انقهرت عليه خطيه شلون موقف صعب، يبقى اخو وميگدر يسويله شي...
مرت ايامي وغيث ماشفته بعد ولا لمحته حتى من رجعنه للعراق وسولفت ويه جواهر واتطمنت عليهه خفت عميد الدين مأذيهه بَـس فاجأتني من گالت عميد اعتذر منهه ؏ تصرف غيث ووگف وياهه وساندهه..
تعبت بهذا حملي ووزني ثگل وگوة امشي، عُثمان ويايه بكل خطوه حتى من رحنه للطبيبه حتى تفحصني وگلتلهه خلينه نسمع دگات گلب الطفل..
مستحيل انسى هاليوم من شفت دموع الفرح بعيون عُثمان وزادت فرحته من الدكتوره گالت اني حامل بولد، بيومهه طرنه من الفرح والگاع مسايعتنه من الوناسه بَـس رجعت لزمت كلبي من تذكرت كلام خاله صافيه من گالت عُثمان خلفته كلهه ولد!!
معناته لسه اكو احتمال ان يتزوج مرة ثانيه وبده القلق ينخر بگلبي بَـس اخاف افتح الموضوع وياه لان ادري بي يضوج ويظل گالب وجهه اليوم كله من اجيب طاري الموضوع خصوصاً هوه وثامر لسه مارجعو نفس قبل..
افكر واوقات اوصل ابچي وحدي چني مخبله بَـس ارتاحيت من اتصلت بأمي وسولفتلهه وگالت هاي مُنجمة وميصير اصدگ بكلامهه والله سُبحانه يگدر يغير الاحوال بين ليلة وضُحاها ولازم ابقى عندي ثقه وايمان بالله..
جابت جواهر بالسلامة واجت "دُر" للدنيا ورجعت الروح بالبيت، عميد الدين طار من الفرح بَـس خاله انتصار حسيتهه ضاجت لان جابت بنيه ومرة سَمعت جواهر حچايه وعميد ردهه وگال بالضبط...
-عميد الدين: يمه ذني الملائكة الما يعجبنچ جوز هنه اليطببني الجنه، ادعيلي احسن بتربيتهن ويكونن من الصالحات ويحفظني الهن ويحفظهن الي وماريد شي من هالدنيا
-انتصار: يمه شمالك چا والوليد ياهو يشيل اسمك!!
-عميد الدين: لا تفكرين زايد يوم تتعبين وعلي خليهه ؏ ربچ وكلشي يجي من الله حياه الله
سكتت امه وسكت كل واحد راد يفتح هالموضوع وياه لو ويه جواهر وكُبر بعيني وبعيون الكُل بحكمته وايمانه بالله..
وره فترة من ولادة جواهر رهوفه تزوجت وانتقلت عاشت ببغداد علمود جامعتهه ويا عينييي شصار بعميد الدين، اوول مرة بحياتي اشوفه بهالوضع..
دموعه عشره عشره وصار يبچي مثل الطفل عليهه وهيه تبچي وجواهر تبچي وخاله انتصار وحتى بيبي عطيه، عرسهه انگلب مناحة بعد هاي ملح البيت رهوفه ورح تطلع من البيت ويظل مكانهه فارغ...
-جواهر: رهوفة ديري بالچ ؏ نفسچ وشنو تردين لو تحتاجين لتترددين وتتصلين بأبوچ حبيبتي واحنه بلمح البصر نجيچ
-رهف ببكاء: احبچ جوهرة الله لا يحرمني منچ
تحاضنن ورجعن يبچن عبالك ام ودتودع بنتهه، بعرس رهف اجو اهل الانبار وشفت هاديه بَـس ابد ماحتكيت بيهه وسالفتهه بعد مانفتحت ابداً وميقبل عُثمان احچي بيهه وكلما اسأله يگول حلهه ويه خاله وماكو داعي اتعب روحي وافكر بالموضوع..
تأخرت بشهر التاسع ياله جبت بالسلامة ونور "حسين" للدنيا ونور حياتي وحياة عُثمان، صاير ميطلع من البيت مگابله وگاعد وزنايب تغار منه وتأذي هواي فَـہ ماگدر اعوفه وحده ابد..
وبيوم رجع عُثمان من الشغل تعبان، رحت اصبله غده واجاله اتصال وسمعته يگول هلوو خالو، عفت الغده والچمچه وگعتهه بالگاع وطفرت للصاله اشوف شعنده خاله وياه..
وگفت فوگ راسه وزينب تلعب وتگمز وعثمان كل شويه يشيل اصبعه ويحطه ؏ شفايفه حتى تسكت...
-عُثمان: ماعرف والله خالي، أنَا اعرفهه ما ترضى.. ماشي احاكيهه أنَا.. ماشي يسلّمو لبالك
سد الموبايل وباوعلي وتنهد، فوراً تجمعت الدموع بعيوني وگلت ببحة...
-يريدك تتزوج هاديه صحح؟؟ وهسه انته جاي تاخذ رأيي!! والله يا عُثمان ما ابقى وياك والله والله
-عُثمان: تبيعيني بهالسهوله هجران؟!!
-لعد تجيبلي ضررره!!
-عجل وحُبنه وين راح؟
-ميهمني ادوس ؏ گلبي حتى لو اموت بيك هوه محد طيح حظي وسود عيشتي غير گلبي الاغبر
-عُثمان: وحسين؟
-اخذه يميي لو هم تريد تحرمني منه!!!
-عُثمان: ابني هذا
-عثماان اسمعنيي مو تصير نفس بكر تروح تتزوج وتظل تهدد ترا اني بزعت وميهمني لو تگص راسي مانطيك الجهاال
صفن بوجهي وحسيته عصب من ذكرت بكر گدامه، گام من مكانه وراح للغرفه بدون ميحچي شي..
لحگته چان ديبدل ملابسه، لبس القميص وديدگمه وصحت ودموعي تنزل...
-وييين راايح؟؟!
-عُثمان: اششش
-ماااا احچي وييين رايح للانبار مووو
-اسكتي هجران ماريد نتعارك والطفل نايم هينا
-عثماان من الاخر تروح تتزوج وديني لأهلي وتحلمم تشوفني بعدد
عاط بصوت خله حسوني ينز...
-عُثمان: منوو گال اتزوووج يوليييي
-انتتته
-ايمت گلت؟؟؟
-لعد خالك شيسوي بيك؟!!
-منو گال أنَا رايحلو؟؟
-شمدريني مو دتبدل
-يعني اذا بدلت معناتهه رايح للانبار؟؟!
هدأت ومسحت دموعي بأصابعي، حچيت ؏ كيف...
-يعني مرايح تتزوج؟
-استغفر الله ربيييييي انتي ايمتت تفكريين بعقلِك قبل لا تحكييين!!
-عُثمان والله القلق دمرنيي
-وع شَنو هالقلق؟!!
-اخاااف
-يلعنوو ابوو الخوف أنَا ما گلتلِك لا تفكرين بالموضوع بعد؟؟؟
-لتعيط فدوه
-هجرران وهدنتينييي
-اني اسفه
زفر بقوه واستغفر، تقربت عليه ولزمت ايده وهمست...
-وعد اخر مرة اذكر هالموضوع وراح انسى
-كل مرة تگولين هيك
-لا والله وراس زنايب وحسوني رح انسى
هز براسه وغمض عيونه ثواني وطلع من البيت، من عصبيتي حتى نسيت اسأله وين رايح وشصاير بَـس بعدين افتهمت ان خاله كساب متصل بـ عُثمان وگايله يجس نبض عمو خليل حتى يخطبون غزاله لـ اسحاق وكالعاده غزاله رفضت ومقبلت...
هاي المرة الثالثه اسحاق يحاول يخطبهه وهيه ترفض ومتقبل تگول تريد تكمل دراسه ومدا تفكر بالزواج وطبعاً اكيد عميد الدين ميقبل احد يضغط عليهه ويگول براحتهه..
بهالفترة كُلش اللتهيت هم حسوني صغير وزنوبه تتنحس عليه وعرس ندى گلب الدنيا تزوجت قبل كم يوم من محرم وسوولهه ذاااك العرس وزوجهه حباب كُلش ويمووت عليهه ؏ گولتهه لو تطلب عيونه هم ينطيهه..
اخذت حسوني ارضعه وموبايل عُثمان چان ؏ الميز بصفي، اخذته وفتحت الرمز لان اعرفه وصرت اگلب بي..
وبين ما اني اگلب شفت رقم هاديه حافظه عنده واني تعاي وحظريهه شيسوي برقمهه عشتو، ذبيت الموبايل ووره شويه اتصلت بيه جوري تسأل عن احوالي وگلتلهه...
-جوري: خربب لچ شكو تحظريهه وهيه كلشي ممسويه
-هجران: عشتوو وشكو عايف رقمهه عينيي
-جوري: خاف يعصب ولچ
-هجران: اذا عصب اني اعصب
-ههههه لچ شنو هاي ماعرفتچ
-هجران: جوري سمعي اني مليت والله متهمني لا هاديه ولا ابو هاديه المهم اني اعيش مرتاحة ويه رجلي وجهالي واذا هوه هيچ كاتل روحه عليهه يروح يتزوجهه ويطلگني
-جوري: لعد مو تحبي!!
-صح بَـس مستحيل اكرر غلطتي ويه بكر وابقى وياه ؏ حساب كرامتي ويظل يدوس عليه مثل ذاك
-خرب عرضچ متغيره ولچ
-لان شفت الضييم وماريد اضعف حتى لو روحي معلگه بي اجيب روحي وادوس عليهه بالنعال
-عههههههههه حمت البنيه
-ههههه اي لعد شسوي متگوليلي
-جوري: لا والله عاشت ايدچ بَـس كلما اتذكر تتوسلين بـ هاديه حتى تعوف عُثمان اغم روحي اهمداچ يغبره شكو تتوسلين
-لچ اني الي اغم روحي ماعرف شبيه چنت شگد عوبه اتوسل حتى تعوف رجلي شنو هالخبااال
-جوري: اي والله خبال، يله اني اروح هاي سليمه تصيحلي
-بعدهه تضوجچ؟
-جوري: لعد تتغير هيه نفسهه حية ام سبع روس
-هجران: ههههه يله روحيلهه لتسويلچ سالفه
-باي حُبي
-باي
سديته منهه وگمت اصب العشه، تعشينه وشربنه چاي وگعدنه نسولف سوه...
-هجران: حبيبي اريدك تطلعني اشتري ملابس
-عُثمان: صار
-وحباب هم اريد لحسوني وزنايب اللعاب
-عُثمان: صار وغيرو
-ولشي سلامتك گلبي
هز براسه وتنهد، ظل يباوع لـ حسوني وگال..
-عُثمان: اريد اخذكم بالاربعينه نزور
-هجران: الللله صدُك والله؟؟!
-عُثمان: اي حبيبي وتا عرضت الموضوع ؏ عميد الدين گال ما مشكله ياخذ جواهر وبناتو ويجون ويانه
-اييي فدوه حتى جوريه وشهد والكل خليهم يجون ونبقى ببيت اهلي
هز براسه وابتسم، عفته ويه حسوني يلعب وزينب تلعب وياهم ورحت اسبح، ثاني يوم گال تحضرو حتى نطلع لكربلاء ورح نروح بالسيارة من الطُرق الخارجيه لان مو مال نمشي لان عدنه جهال..
حضرت كلشي وانطلقنه لـ كربلاء يوم 25/10/2018 نؤدي هاي المراسيم الحُسينيه الضخمة وهيه زيارة يجون الناس من جميييع انحاء العالم، شيعه، سُنه، مسيح، صابئه.... اشكال يجون ويحيون ذكرى اربعين الامام الحُسين (؏)..
وصلنه لـ كربلاء بعد معانات الطريق والجهال يبچون وتبهذلنه بَـس كل هذا وبقينه صامدين حتى نحصل زيارة الحُسين بالدنيا وشفاعته بالاخرة..
وصلنه لبيت اهلي وعفنه الجهال يمهم وطلعنه نزور، بقينه يم اهلي تلاث تيام وعميد الدين شگد تشكرر من بابه وكل شويه يگول زحمناكم وضوجناكم بَـس بابه مكيف ؏ جيتنه ويگول طبت علينه البركه بجيتكم..
بيوم 20 صفر وهوه يوم الاربعين رجعنه من الزيارة هلكانييين تعب وسيارات ماكو مادري شعجب واذا اكو سيارات فَـہ مقبطات، الجهال يبچون ورجليه صارن يونن عليه من الالم..
بيت اهلي بعيد يعني مو مال نمشي فَـہ جوريه عرضت علينه عرض لطيف وهالعرض خلانه نتعرف ؏ عائله تجنن وشنو احچي عليهم قليل...
-جوري: خلونه نروح لبيت اهل صديقتي سُرى بيتهم هنا قريب علينه
-عميد الدين: لا بويه فشله شني نروح بيت وادم مانعرفهم
-جوري: لا سيد همه يستقبلون زوار وبيتهم مرتب ونظيف وكُلش خوش ناس
-عُثمان: ومنو ذوله؟ شمعرفنه من وين ما وين جاين شلون نأمن؟!
-فيصل: لا خويه انه اعرفهم همه من بيت السلامي
-عميد الدين: حجي طاهر السلامي شيصير منهم؟؟
-جوري بحماس: جدهم!!
-عميد الدين: هااا والله؟؟ ونعممم چا عرفتهمم
-هجران: ايي يله لعد خلونه نرووح
وافقوني وطلعنه لبيتهم، اتصلنه بـ سُرى وزوجهه گال رح يوگفولنه براس الشارع حتى يدلونه وصدُك بعدنه هستونه اجينه وشفنه رجال يلوحلنه وبصفه سُرى..
تسالمو وياهم وتباوسو الرجال اسلوبه حلو گالو اسمه سيد عمار، اشرلنه ليگدام وگال تفضلو منا واخذونه لبيت اهل سُرى، وگفنه بالباب وبيبي عطيه گالت...
-حجية عطيه: اللهم صل على محمد وال محمد الله يستر عليهم ماشالله
-سيد عمار: الله يحفظچ حجية
راح ومجرد ما دگ الباب وطلعلنه رجال مشيب بَـس شكله محبوب وابتسامه حلوة مرسومه ؏ وجهه، سلم ؏ عميد الدين ورحب بي واندار ؏ عُثمان وفيصل والبقيه وانخبص ويانه خبص خطيه..
اشر ندخل لبيته وطبينه وبوجهنه صار رجال طووييل جندله شواربه كثيفه ولابس زي عسكري وصوت اللاسلكي الحاطه بخصره يثول، مسدس مشكل بخصره من الجهة اليسره واللاسلكي باليمنه ونجمتين ؏ چتفه..
سلم علينه وچان صوته خششن وعالي ومبينه قبضة ايده قويه من لزم ايدين عُثمان وصافحه..
اشرلنه الرجال الچبير حتى نطب احنه النسوان من باب مبين مطبخ، نقرت ؏ الباب نقرات خفيفه وفتحتلنه مرة تطلع ببدايه الاربعين وجهها بشوش...
-ام سُرى: يا اهلاً وسهلاً
-جوري: خالة شلونچ حبيبتي تذكرتيني؟؟
-لعد شلووون انتي جوريه
سلمت عليهه واحنه تبعناهه وطببتنه لصالتهم وبيبي عطيه بَـس تگول...
-حجية عطيه: اللهم صل على محمد وال محمد الله يحرسكم يخيه الله يحفظلكم راعي داركم ويزيد عليكم نعمته
-رحم الله والديكم حجيه
گعدونه بالصاله واشرتلنه ؏ الحمام وگالت ام سُرى...
-ام سُرى: حبايب هذا الحمام هنا وهاي اكو غرفتين هم خاف البنات بعجبهن يبدلن لو يرتاحن وكلهه بيهه فراشات وكامله
-انتصار: الله يسلمچ حبوبه رحم الله والديچ
گمت اني وشهد وجواهر ننزع جهالنه بالغرفه وچانت مؤثثه وبيهه ؏ صفحة فراشات مسفطه مثل مگالت ام سُرى..
شويه واجتنه بنيه شابه كُلش حلوة ماشالله سلمت علينه ورحبت بينه وگالت اسمهه "دُر" وتصير اخت سُرى الاصغر...
-جواهر: هـلا بيچ حُبي، فدووه اسمچ نفس بنوتي
اشرت ؏ بتهه الصغيرونه "دُر"، شالتهه البنيه الشابه تبوس بيهه وتگول...
-دُر: اووي حياتيي هاي لعابه ماشالله
-هجران: هههه ؏ امهه
-دُر: صدُك والله هيه امهه لعابه
جواهر تشكرت منهه واخذت بتهه وبناتهه ياقوت وزمرد هم للحمام حتى تبدللهن هناك..
ترخصت منهم وگمت اجيب مي لزنوبه وسمعت صوت بنيه بالمطبخ تعيط ومبينه معاجبهه...
-مااامااا المواعييين كسرت ظهرييييي
-ام سُرى: لچ زهرااء شبيچ تخبلتيي
-زازا: ماما ظهرييي ماتحمل بعدد رح ينكسررر
چانت تحچي وتتذمر خطيه انقهرت عليهه فَـہ دخلت للمطبخ وهيه نزت من شافتني..
(طبعاً هاي البنيه اني نفسني الكاتبه مو عبالكم 🌚🤝)
-هجران: هلوو حبي
عدلت وگفتهه ولمت شعرهه بيدهه المبلله وگالت بأبتسامه...
-هلوو حبيبتي
-هجران: اجيت اريد مي لبنتي عطشانه مُمكن تنطيني
-زهراء: اي هسة دقيقه
اخذت صينيه وراحت للثلاجه وطلعت كاسات مي من ذني الجاهزات وحطتهم بالصينيه، اللتفتت عليه وگالت...
-زهراء: روحي ارتاحي حبيبتي اني اجيبلكم
-هجران: هاا ماشي محتاجة مساعده؟
ضحكت ضحكة عفويه وعفست ارنبه خشمهه وگالت...
-زهراء: لا حبيبي تسلميلي
ضحكت ؏ كيفي وشلهت رداني اريد اساعدهه، لزمت ايدي بقوه وگالت...
-زهراء: شدتسوين؟؟
-هجران: اساعدچ شويه
-زهراء: ابدد ماقبل والله اصلاً هذا عقابي لان ماسوي شي بالبيت ويصيحولي زازا الفاهيه هههههه
-هههههههه ممبين عليچ فاهيه
-لا يعمري يمكن المنطقه كلهه تعرف بفهاوتي
-هجران: اووي سوده عليه
-زهراء بأبتسامه: شنو اسمچ انتي؟
-اسمي هجران
-زهراء: انتييي هجران اخت جووري؟؟؟
-هجران: هههه ايي هاي الظاهر جوريه حاچيتلكم عني
-زهراء: اي قبل فتره من اجت لبيتنه خطيه چانت يمكن متزاعله ويه زوجهه واجت تزورنه ويه والدتچ، حچتلنه عنچ وگالت عندچ بنوته
-هجران: صح وهسة عندي ولد اسمه حسين
-فدووه الله يحفظهم
-تسلمين
راحت تودي المي واني گعدت ؏ الكرسي بالمطبخ اصلاً نسيت زنوبه تريد مي هههه هالبنيه جذبتني بكلامهه ودخلت گلبي وحبيت اسولف وياهه..
رجعت شايله حسوني وتبوس بي جابته الي وگالت بضحك...
-زهراء: هاي اكو وحده كُلش حلوة هناك گالت ودي لـ هجران
-هجران: جواهر؟؟
-زهراء: مادري يمكن، فدووا بناتهه يخبلن كلهن يشبهنلهه
-هجران: اييي ابد مماخذات من ابوهن تلاثتهن
-زهراء: هيه مرت الشيخ صح؟
-اي هيه
-زهراء: اسألچ سؤال بَـس ممكن غريب
-سألي حُبي
-زهراء: شلون جواهر مرت الشيخ وهيه هيچ صغيره؟
-هجران: عادي عميد الدين مو چبير
-زهراء: هاا مادري عبالي چبير لان سمعت بي شيخ وعبالي كُل الشيوخ كبار
-هجران: لا لا مو شرط
-زهراء: اني شفت بَـس ظهره ههههه يمكن چان لابس دشاشه سوده وچراويه ؏ راسه عرفته الشيخ لان بابا صاحله وگال هـلا بالشيخ
-هجران: هههه اي هوه هذا
راحت ؏ المواعين تغسلهم واندارت تسولف ويايه...
-زهراء: تصدگين من سُرى گالت رح يجي شيخ لبيتنه هاي بتول صارت ترجف
-هجران: يااا لييش
-زهراء: متأثره بالقصص وتجيني تگلي زازا خاف ياخذون وحده من عدنه فصليه هههههههه
متت من الضحك وشرگت بالمي ؏ حچيهه، مبينه هالبنيه اجتماعيه وتاخذ وتنطي بالحچي...
-هجران: ههههه ليش اجه هيچي شي ؏ بالكم؟
-زهراء: مو شوفي احنه نكتب اني وخواتي
-شتكتبون؟
-قصص يعني ناس يجوني ويگولون نريدچ تكتبين قصتنه
-هجران: هااا شگد حلوو
-اي وهاي بتول نايمه بالقصص وبالجديد قاريه قصه مال فصليه وصارلهه كم يوم ترجف
-ياااا خطييه
-هاي اختي هواي تتخيل شغلات وتظل تفسر كل قصه ؏ حياتنه ومن افتهمت جاي شيخ لبيتنه صارت تگمز ههههه
-هجران: ههههه لاا شيخ عميد الدين كُلش خوش رجال وماكو اطيب من گلبه
-صدُك والله؟
-اي والله وهاي جواهر مرته گلبهه بعد اطيب وتجنن خلقه واخلاق
-هيه مال خلقه اي والله تجنن الله يحفظهه بَـس اخلاق بعدني ما سولفت وياهه
-هجران: سولفي هيه هم اجتماعيه نفسچ
-لعد ماشي اكمل هالبلاء واروح
ضحكت وياهه وسولفنه شويه وكل ساعه اريد اساعدهه وهيه متقبل، گمزت من الكرسي من دگو ؏ باب المطبخ بطريقه همجيه..
-زهراء بصياح: منووو؟؟؟
جاوبهه رجال صوته خشن ينزز..
-الرجال: صيحيلي دُر
-زهراء: ماشي ثواني
راحت صاحت اختهه دُر واجت حچت ويه الرجال من الباب افتهمت هذا الملازم الاول زوج دُر بَـس عجييييب الفرق البيناتهم واااضح، دُر ناازكة وناعمه وهوه ضخم وطويييل والي يشوفهم يگول ابوهه..
اجت جوري وسُرى وبتول وبقيه البنات كلنه گعدنه بالمطبخ نسولف سوه، تونست وياهن وتعرفت عليهن وحده وحده واختهن بتول سوالفهه تخبل كُلش فرفوشه وتنحب..
نمنه كلنه البنات بغرفه وسهرنه للصبح سوالف وضحك واكثر ثنين سولفت وياهن دُر وزازا وجواهر..
بتول ظلت تسأل جواهر ؏ عميد الدين ههههه البنيه ممصدگة اكو هيچ شيخ حباب..
گعدنه الصبح وودعناهم وامهم شگد حبابه ظلت تتوسل نجيهم مرة ثانيه ونشرف بيتهم تگول زوار الحُسين ؏ راسنه من فوگ ونخدمهم بعيوننه..
طلعنه متوجهين للامام وبالطريق اتصلت بينه غزاله تبچي چانت تتمنى تجي ويانه بَـس بقت ويه امهه هناك لان عمه سلمى كُلش مريضه صارلهه اسبوعين ونفسيتهه متدمرة فَـہ بقت غزاله يمهه..
وصلنه للامام وايدي بأيد عُثمان، هوه شايل زنوبه واني بيدي حسوني، وگفنه بين الحرمين ويين چان البارحة مينمشي عبن الزيارة واليوم فرغ العالم كلهه رجعت لبيوتهه!!
عُثمان رجع اتصل بـ غزاله وفتحلهه كامرا يصورلهه وعمو خليل هم سلم ؏ عُثمان بطريقه حلوة مادري شعجب بَـس يمكن لان مسافرين بغير محافضه..
اندار عليه عُثمان وگال...
-عُثمان: هجران أنَا اروح ازور وانتي گعدي هينا لا تتحركين تمام؟؟
-هجران: ماشي حبيبي بَـس مو تتأخر
هز براسه وعاف زنوبه بصفي وجواهر وجوري وبيبي عطيه هم گعدن ويايه، زرنه الزيارة وصلينه ركعتين ورجعو الزلم...
-عميد الدين: تقبل الله علويات
-منا ومنكم
-عُثمان: هجران تعالي وياي
اشرلي بأيده حتى اگوم واني گمت وعفت الجهال ويه جوري بَـس گال جيبيهم، لزم ايدي مثل قبل شويه ورحنه نگعد بالصحن من الجهة الثانيه.. گعدنه بالايوان وزنوبه بحضنه وحسوني بحضني، عُثمان جر كتاب وگال...
-عُثمان: خلينه نقره الزيارة
-هجران: اني قريتهه قبل شويه
-عُثمان: مايهم عيديهه كلو ثواب
هزيت براسي وصار يقره بصوت مليان خشوع، اشوف دموعه تنزل ويه كل كلمه يگولهه، دموعي من وحدهن صارن ينزلن وياه، كمل الزيارة وحط الكتاب بالگاع ورفع ايده متحضر للدعاء وگال...
-عُثمان: ربي لك الحمد ؏ كل نعمه نعمتهه الي، ربنا تقبل منا هذا القليل، ربنا ولا تؤاخذنا ان عصيناك..
يدعي واني احچي وياه، مسح وجهه وصله ؏ محمد واندار يباوعلي..
ابتسمت بوجهه وهمست بدون صوت...
-هجران: شنو؟
ضحك وهز راسه بـ "ماكو شي" تنهد براحة وگال...
-عُثمان: اتشكر من الامام انو دعى ربو تا يرزقني هالطير
اشر ؏ حسوني ولزم چف ايده الصغيروني وباسه وانوب اخذ چف زنوبه وباسه وگال...
-عُثمان: واتشكرو لانو حفظلي هالملاك
ابتسمت بمكر وگلت...
-هجران: واني؟ متريد تتشكر منه علمودي؟
قهقه بصوت كُلش ناصي وعدل گعدته، شال زنوبه حطهه ؏ فخذه الايمن حتى يگدر يباوعلي بوضوح...
-عُثمان: انتي هجراني اتشكر الامام لانو لين گلبِك تجاهي، تدرين أنَا اول مرة اجيت ازور بيهه وياكي هينا دعيت من اعماق قلبي وطلبت من الحُسين (؏) يلين گلبي وگلبِك ؏ بعض ونصير سند وعزوة لبعض ونبقى سوا ومايفرقنه احد
-هجران: وتحقق مُرادك؟
ابتسم وهز راسه بـ رضى، وسع ابتسامته وگال بهمس مسموع...
-احبُكي هجر گلبي انتي امي وحبيبتي وقوتي وروحي من هالدنيا، انتي تعويض رب العالمين الي
-هجران: وانته تعويض رب العالمين الي
استمر يباوعلي واني نزلت راسي لان استحيت، لسه اخجل من عنده وهذا الحياء اليجيني فجأة ماگدر اسيطر عليه..
نزل راسه الي وگال بصوت ناصي بَـس اني اسمعه...
-عُثمان: تُحرقَني تلكَ النظَرات التي بيننا، تُحرقَني شفتاكي المخملية، اشُعر ببُركان مُتناثر في يسار صدري، تتوَجُع انانيتـيي بجنابكي، تتألم غيرتـيي المُحاربه لاجلكي ولحبكي المُلهم لـروحـَي، تسَيرينَ في شريانـيي..
يَهدأ قلبي بجانبكي ويتوتر بقربكي، ماذا فعلتِ لقلبي ايَتُها المخَمليه؟ فأنكِ المُعجزهه التي خُلقتَ لقلبي..
رفعت راسي اباوعله وگلبي احسه رح يطلع من صدري من الفرح والتوتر والخجل والحماس.. كل هالمشاعر اختلطت ويه بعضها بهالاثناء وماعرف شلون اوصف حالي لو اوصف حُبي لهالرجال الگاعد بصفي..
بلعت ريگي وهمست بصوت يرجف...
-هجران: صارلك هواي مامتغزل بيه بالفصحى
-عُثمان بغمزة: ممم لان كنت اترجم مشاعري بالحركات
-هجران: ههههه عثمااان بطل سوالفك
-وبسطالو للحمزة لوما الناس هينا كان شفت شغلي
-هجران: عزاا عيب احنه بالامام
-عُثمان: اهاا صح نسيت والله
-ايي اگعُد راحة فشله
-حاضر
-هجران: احبك
ابتسم وميل راسه لجهتي وگال بأبتسامه رقيقه...
-عُثمان: ما اكثر مني
-هجران: اهم شي گصيت شواربك سر سعادتك ههههه
-عُثمان: احييي والحمزة گصيتهم لخاطرِك يولي
-ههه فديتك
لزمت ايده وباوعت ؏ ايدنه المتشابكه ويه بعض وتمايزت اختلاف لوننه الي صاير عندي عادي ولا اتأثر منه ولا اخجل، تقبلت روحي بسببه وحبيت نفسي وجسمي وشخصيتي والاهم من كل هذا ان عشقت الرجال الغيرني والي خلاني اصير انسانه ثانيه..
رددت الكلام الي ببالي والي حبيت اگوله اله هنا بالامام وردت الامام يشهد ؏ حُبي لـ عُثمان ويحفظه الي..
بلعت ريگ وهمست خجلانه...
-هجران: اعشقك في التفاصيل التي لا تلتفت لها، كـ خطوط يدك والجانب الذي تفضل النوم عليه وساعة استيقاظك وكلامك المميز واللهجة الغربيه الي تكتم انفاسي وتجبرني للنظر اليك، اعشق تميزك عن الاخرين بـ هندامك وكلامك وعطرك وجمال روحك يا روحهه لـ مخمليتك.. اعشقك!
ابتسم وهوه يباوع لـ شفايفي الي تگول هالحچي وختم گعدتنه بُجملة خلت فراشات تطير بگلبي وبطني وحتى بدماغي من السعادة...
-عُثمان: وانا عشقتُ فتاة تملُك شفــاه مخمليـــة.
♛ ♛ ♛ ♛ ♛ ♛ ♛ ♛ ♛ ♛
Sun/Aug/29/2021
وهنا كان لازم نختم قُصة هالاشخاص المختلفين شكلاً ونفساً وعقلاً وتفكيراً ونتركهم يعيشون بسعادة عارمة وندعيلهم بالراحة خصوصاً لـ هجران الي عانت ويانه من بدايه قصتنه لحد آخر بارت لكن!!!
كان عوض الله عظيم ومُنصف بالنسبة الهم وحبو يشاركون قصتهم وياكم حتى توصلكم عدة رسائل واهم رساله الي شرحتهه هالقُصه بكل وضوح وهيه...
{وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ ۖ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّهُ يَعْلَمُ وَأَنتُمْ لَا تَعْلَمُونَ}.
♥️
ضحكنه وبچينه وتونسنه وزعلنه وانتظرنه وتحمسنه ويه الابطال، حسينه بمشاعرهم وشاركناهم بألامهم وافراحهم وسفراتهم..
ولكن صار الوقت حتى نجهز امتعتنه ونشيل من بيت الگصاب المسرودة قصتهم في "شفاه مخملية" وننتقل لبيت النقيب في قصة "ذيب بابل" ونلتقيكم بأذن الله عن قريب هناك ونشوف شنو ترويلنه هالقصه من احداث جديده وحماسيه ورح نشوف حياة وشخصيات جديده ومُختلفه تماماً عن ابطال قصة "شفاه مخملية"...
ممنونه منكم لان اخذتو من وقتكم وفرغتو انفسكم وقريتو هالقصه وشاركتوني بتصويتاتكم وتعليقاتكم الحلوة التبهج القلب، اتمنى نالت اعجابكم ♥️.
استودعكم الله واتمنى تبرولي الذمة ؏ أي تقصير صدر مني او تعب نفسي سببته الكم بسبب القفلات 😅🙈 بَـس حبيتكم تعيشون تفاصيل القصه نفس ما ابطالنه عاشوهه...
والي يسأل عن "ذيب بابل" فَـہ منشور مقتطف بصفحتي اذا تحبون ضيفو لمكتباتكم حتى تشاركوني بسرد القصه ونتونس سوه ♥️...
والي يحب يتابعني انستا حتى كلما يجيني شي جديد من الابطال اخبركم هذا اليوزر مالتي zllp.y والرابط موجود بصفحتي الواتباد ♥️.
اختكم زهراء السلامي تحبكم وااايد وااايد 💋🤍.