اسيرة قدرك

البارت 81

اسيرة قدرك..
بقلمي رسل..
البارت الواحد والثمانون..
واتباد rasolaa7

واحنـه شَمــا زِرعنه الزين
على الموزين نِتحاسب..

-توسلت بامي تحجي ليش جانت هيج مصرة
هي حجت من بين دموعها.. ولج يمه شلون
اقبل بي واني ادري الخوات ثنينهن يردنه
شلون يمه اقبل واخليها عالكه بينهن..

-انصدمت من الي سمعته زين منو منهن
جانت تحبه وتنافس تمارة يمه شتحجين..

-بقيت بس صافنه عليها وهي تحجي ليش
رفضت مع العلم انو الكل يعرف الولد جان
رايد تمارة وهالشيء ما يختلفون عليه اثنين..

-والشيء الي عرفته صدمني لان ما جنت متوقعه
منها هالشيء وحاليا هي متزوجة وحتى تعتبر
بعيده عنه قليل ما تجينا استقرت ويمكن اتاذت
حالها حال تمارة بس الفرق هي ابتعدت واستقرت
وتمارة من جانب خسرت كل شيء ومن جانب
زاد عندها الحقد والعدوانية..

-المقصودة من كلامي اختي الي تكبرني بكم
سنه وترتيبها من بعد الجبيرة وام سجى هاي
اختي من تزوجت استقرت وصرنا قليل نشوفها
ونجتمع بيها كل ضنا جان انو الحياة وظروفها
بعدوها عنا بس هسه يلا عرفت انو هي هم
انجرحت وتأذت ويمكن هالشيء هو الي وصلها هيج حال والسبب خبث الناس
اي خبث امه للولد حسب كلام ماما الي
حجته الي بكل قهر كالت..

-يمه اختج فرفحت روحها من سمعت بي رايد
تمارة وبنفسها اجتني تكلي اذا انطيتوا الها
اني اكتل نفسي مو بكيفكم هو الولد يريدني
حجيت وياها يا يمه وما فاد تالي طلعت امه
المسمومه زارعة هالفكرة براسها وتكلها
انتي جنتي واني ما اريد تمارة انتي النادرة
والي اخليها بيتي وتحافظ على ابني واسراره
وهو رايدج من البداية ومحاجيني بس اختج
هي الي ذابه روحها عليه وهيج يمه زارعة هالفكرة عند اختج لايوم ولا يومين وخلتها
كل تفكيرها بي..

-وانه يمه من رفضت ردت اخلصهن اثنينهن
منها لان نيتها واضحة وعمرهم ما يردون
الخير الي ولا الكم والله يمه الي شفته ما
اريده ينعاد بيهن بس من ذيج استقرت وتزوجت
كسرت خاطري تمارة وتشوفيني ساكته
عنها من كلبي الي محترك عليها..

-شكد انقهرت عليهن وثبت عندي كل الحق
ويا ماما.. شكد خبيثه الله لا ينطيها بس لو مفهمتهن بوكتها جان ما حقدت عليج تمارة
حجيتها هي كالت..

-هي بعد قسمة والولد قسمتة مو هنا ومن احجي
منو يصدكني وخواتج معمي عليهن هاي تصيح
اريده وذيج تريدة..

-حسيت بيها مقهورة ومتندمه لان وكفت
بوجه تمارة كمت بست راسها وهديتها وهي
خطية تبجي على تمارة وبالها يمها رغم
كل الي تسوي تمارة وياها بس امي كلبها يمها
كلنا تعبناها لامي من بناتها لولدها الي بقصد
والي شاغل فكرها والحياة جبرته يتعبها
مو بقصدة وهي حبيبتي بالها يمنا كلنا..

-كم ساعة ورجعوا فارس ساند تمارة الي
جانت تعبانه من نوبة الصرع هي عدها صرع
من زمان بس قليل تجيها نوبات الصرع
بس الظاهر ضربة عمر اذتها كلش و
ازمت حالتها..

-طمنا عليها وطلعنا قبل ما تذب سمها علينا
رجعت يم سرى وهاي للثنتين وهي تحجي
ويا علي مليت منها وما يجيني نوم دك جهازي
جان اسر..

-مشتاقلج ادبسز ما كدرت انام..

-مو بكدي واني مشتاقة لحضنك.. حجيتها هو صاح.. وبعد هالحجي اعوفج يمهم مخبل يلا تعالي افتحي الباب بابكم اني..

-شهكت.. صدك تحجي؟!..

-سرى وخرت الجهاز.. شكو ولج.. عفتها
ونزلت ركض وهذا يضحك عليه فتحت
الباب.. هاي من شوكت انت هنا..

-غمزلي.. من مريتي اشتاقت لحضني.. يلا ولج
تعالي وياي ما تكولين رجلي وحدة بالبيت يضوج
خطية لوما صدكتي شفتي فارس..

-الي يسمعك يكول صارلي اسبوع يم اهلي
لوما اليوم اجيت اجيب البنات واجي هو كال..

-لا عوفيهن نايمات لا تكعدينهن اني الصبح
اجي عليهن..

-لبست صايتي ووصيت سرى على البنات
وطلعت هو جان منتظرني بالسيارة بس صعدت هو عض شفته وتقرب عليه دفعته .. عيب شو صاير فاسد كلش بالشارع احنا..

-هو ضحك.. شعليه اني غير انتي مشتاقتلي وهاي كطعت نومتي علمودج نوب ما راضيه..

-باوعتله بصدمة هو ابتسم الجذاب ورجع
يسوق وصلنا للبيت ركضت للغرفة الواحد بغير مكانه ما تغفى عينه خليت راسي على المخدة
هو شوي ودخل جفلت من صاح.. كومي لج
اني جبتج تنامين جان عفتج  بيت ابوج..

-كمت واني نعسانه واسر عرفت نيته
يريدها ليلة مميزة من كال عوفي البنات كمت
غسلت وبدلت ورجعت يمه وفعلا جانت ليله
من العمر ويا اسر الي يوم عن يوم احبه اكثر..

-اليوم الثاني رحنا لسماح جانت عازمتنا
من دخلت لبيتها جان كئيب مابي روح وهالشيء هي هم تعاني منه لان من تزوجت لليوم ما صار عندها حمل مو شماته بيها بس احس هاي
عدالة الله اتذكر شكد جانت تحجي عليه
بداية زواجي وهم هاي حوبة اولاد رجلها
حرمتهم من ابوهم وشتت عائلتهم تالي الله
حرمها من الخلفه وهسه هي بحسرتهم
سبحان الله الانسان شنو يزرع يحصد..

-من بعد هالايام انصدمنا صدمة العمر باستشهاد وليد خطيب ناز الولد مجهز كل شيء وما باقي الا ايام قليلة ويفرح ويفرح اهله بزواجه
بس ما تم هالشيء بسبب التنظيم هاي الايام
بصعوبة عدت اسر تحطم عليه نكسر ضهره بفكد وليد الي جان اله اخ واقرب من اخ عزل
نفسه واغلب وقته يقرا قران الروح الشهيد
الي خلف وراه فراغ موجوع لاحبابه
وخصوصا ناز الي انتهت وظلمت دنياها بفراكه..

-اسر التحق كم مرة واني اضل الوب الي صار ويا وليد دخل الخوف لكلوبنا من يروح لما يرجع اني كلبي ما مرتاح..

-مر سنة ونص من حياتنا ايام مرت بحلوها
ومرها كلها رجعت شوي شوي لحياتها صح الغالي ما ينسي بس الحياة مستمرة الا ناز الي جانت متحطمة حبيبتي حتى دراستها سنه الاخيرة ما داومتها..

-اما سرى علاقتها بعلي مستمرة والحب
صار من الطرفين وبهاي الفترة تقدم الها
وتحددت خطوبتهم شكد عاتبتها و طلبت منها ترفض بس ثنينهم جانوا يحبون بعض وهي
متمسكة بي لهذا مليت منها والي يجيها من ايدها اني الي عليه نصحتها..

-اليوم خطوبتها اخذني اسر لبست فستان
اسود مرتب ومكياج وعدسات بس هذني بيت
اهلي خليتهن اسر كل شيء ولا اخلي العدسة
يسميهن عيون جذبيه واني اضحك عليه..

- دخلت البيت اهلي وتمارة الحقد يتطاير
من عيونها احسها تدور وره عمر ما مرتاحة
الها ومبين هالشيء من نظراتها عليه وبس
الله الي يستر لان عمر مو هين وما استبعد
ينهيها اذا ندكت بي..

-كم ساعة واجوي الزلم واسر ومهاب جانوا حاضرين سوينا حفلة بسيطه بيناتنا سرى و
علي هيج رادوا بعد العقد دخل علي يمها
يلبسها الذهب بهاي الاثناء صاح عليه اسر
كمت هو جان يم الباب التفتت على مصدر
نظراته وجان شكله ما راضي ومثل الي عصب باوعت عليه وعلى سرى الي باست علي بخده
وهو حضنها وباس راسها اسر خزرني ابتعد وسحبني..

-شوي ثكل بنات سلمى..

-من صدك هنا نرفزني.. شبيك اسر ترى عيب
هذا كلامك ترى صار رجلها عادي ولا تجمع
اني شعليه شنو شايف علينا.. همست شكد معقد..

-هو صاح.. شكلتي بلا عيدي..

-سكتت الظاهر معصب وذبها بينه ومالي
خلك اتعارك ويا.. هو طلع رحت وراه
وين رايح مو معزوم هنا؟!..

-وين رايح وين جاي انتي شكد تسألين ليش
ما اخذج ويايا النوب مو احسن حجاها بنرفزه لج بابا بطلي وين رحت ومين اجيت خليني
زين وياج..

-تنهدت اهو اليوم تريدلك مشكلة كوه
شبيك يا عيني..

-لا تلغين زايد ساعة واجيج افتهمتي حجاها و عافني وطلع..

-ضجت كلش طلع الحفلة من خشمي رجعت يمهم بدون واهس والتفكير تعبني حتى ما اتذكر
ضوجته لو سويت شيء غلط بس هو مدري
شبي شوي و راحوا اهل علي من طلعوا
كمنا ركصنا شوي الخاطر سرى الي فرحانة..

-بعدها اجه اسر بسرعة طلعتله لا يطنكر
بالزايد وحضي المصخم ناسيه الحمرة ما ماسحتها والعدسات بعدهن بعيوني صعدت
مشينا شوي هو بس يستغفر التفت عليه.. القنادر انزعيها دخيلك ربي كالبتلي عينها خضر بعد شتلعبن بخلقة الله وهذا حلكج الصابغته احمر
امسحي لا افركه الج هسه..

-شبيك اليوم شبيك الخاطر الله طلعت روحي ساعة السودة الي اجيت بيها والله ما يصير
هيج انطيني الكلينكس خلي امسحها وترتاح
كفرت خوما كفرت نسيتها ترى من وراك..

-ماعندي حجاها وسحب شالي عادي بهذا امسحيها خلا على حلكي وخرت ايده ومسحتها والدمعة تفتر بعيني نوب عدستي دورت على العلبة ناسيتها ماكو وهذا يلح.. اوكف هنا
جيبلي بطل مي اخلي هاي العيون بي حجيتها بنرفزه..

-هو ضحك وهز ايده نزل جاب واجه نزعت العدسة خليتهن بالبطل درت وجهي عنا مدري
شبي تخبل عليه اليوم..

-من فكت طناكيره حجه بهدوء.. اي هيج وجهج احبه بدون هل ملاعيب والعيون الجذبيه انتي جماره ما تحتاجين ذني عليمن بعد كالبة
خلقة ربج..

-سكتت وما باوعت عليه ضايحة منا كلش
وصلنا نزلت وعفته دخلت هو يحجي ما اجاوب شنو كبالي صرت اركع بي ما اسمع غير
بس ضحكته اجه حضني.. لا تتخبلين ادري ضوجتج بس هل علي ما ارتاحيتله وانتي متكشخة كدامة ترى مردت اضيع فرحتج هناك كلت الحد ما نرجع و احاسبج..

-اسر طلعت روحي يا ما حاسبتني بعدين
ما يهمني لا علي ولا غيره الخاطر اختي
تكشخت وفرحانه وانت طلعتها من خشمي..

-باس خشمي.. شبي يخبل خشمج ما اشوف
فرحة طالعة من عنده دغدغني ويبوس بركبتي
ويتعذر ومن وره علي وما ارتاحله تالي
فكت طنكورتي اعرفه يغار بس ما اعرف
ليش ما يرتاح لعلي خطيب سرى رغم هو
حتى ما يعرفه..

-حياتنا مشت مرات حلوة ومرات أهله يسوون مشاكل تسمم عيشتنه بس صرت ابتعد عنهم
ومرات ما اوصله حجي لان مليت منهن وهن الظاهر ما ناويات يكفن عني صار شكد وياهم وما اتقبلني ما اعرف هالحقد شنو الي عدهن..

-اسر اليوم نورنا جان اسبوع ملتحق ومن يروح
هن يشدن وياي حضنته.. الله يساعدك..

-باسني وراح باس البنات رتبت جنطته
وسويتله اكل هو سبح وطلع بالليل اجتمعنا
هو كال.. حضري روحج نطلع للسليمانية
اسبوع ضايج نغير جو..

-شبيك حبيبي ليش ضايج؟!..

-ماكو شيء بس شوي مشاكل بالشغل
واريد ارتاح كم يوم..

-ما لحيت عليه لان اعرفه يضوج بالزايد
هو ما يحب واحد يساله عن شغله ويلح
طلعنا اشتريت كم شغلة لان هناك باردة
مهرة ما قبلت تروح رادت تبقى يم نورهان
ابوها شكد اصر عليها بس هي ما قبلت
بقت يمهم على واهس فضل ومنسه تحبهم هواي..

-اهله اشتعلت غيرتهم هو راضه امه و انطاها فلوس كالها روحي لايران زوري..

-ثاني يوم سلمنا عليهم وطلعنا وريا ويانا وصلنه
وهناك سمحلي شيعجبني البس بس لازم مستور فرنا بكل الأماكن ونسنا كلش تعرفت هناك
على بنوته من اهالي كركوك كلش حبابه من صدك تونست رغم اكره الطلعات مرات لان
ما احب اختلط بالناس بس هالمرة غير شكل
اسر منطلق ولا عبالك اسر الي يعقد بالطلعة اخذنا هدايا للكل و اخذت كم شغلة لسرى ونورهان صعدنا الألعاب تخوف وهو مشدد ايده علينه لا نوكع ما خله شيء بنفسنا صارت
سفرة اروع ما يكون بحيث مرات يراودني
شعور انو ما افرح هواي لان اعرف حضي
ويجيني خوف لا يطيح حضي وره هالفرحة
بس اتعوذ من ابليس وعشت هالسفرة الي
غيرت من نفسيتنا هواي هو حبيبي هواي
تعدلت نفسيته لان جان ضايج وحسب ما كال
من شغله..

-مر الأسبوع ورجعنا رحنا نسلم عليهم بس
عمتي جانت مطنكره رغم هو راضاها وانطاها فلوس وراح تروح تزور بس بعد هم
يضوجون نطلع هو هم ما اهتم جان تعبان سلم وصعد..

-وره كم يوم العصرية بدل راد يطلع طلبت
منه ياخذني لاهلي هو كال يلا بسرعة لا
تاخريني..

-ذبني عليهم وراح اول مدخلت اتلكتني تمارة
حجت بحقد.. لا هلا بيج عبالج اعديها الج
مو ترى ساكتتلج بمزاجي بس اصبري يا ريا..

-هزيت ايدي.. دروحي سماح الثانية حضي
ذابني عليجن كافي ترى عيب كبرتن ما تملن
الخاطر الله حجيتها وعفتها ورحت..

- لكيت بس ماما بوستها.. شو ماكو احد؟!..

-هي كالت سرى طالعة ويا علي وعمر وفارس
طالعين وهاي اني وحدي اختج ما تتحاجه
ومخليه كورها بكور عمر تعبتني..

-خلي تولي بس السان انتي شلونج مشتاقتلج
خوما بعدها تأذيج يمه لا تسكتين فدوه اروحلج
بقينا نحجي تقريبا نص ساعة واجه عمر
ريا ركضت عليه وهو يبوس بيها سلمت
عليه هو كال انام ساعة وكعدوني..

-صعد وكلها دقايق وما نسمع غير بس صوت الصياح ركضنا صعدنا واشوفه لازم تمارة
ويضرب بيها رحت عليه اوخره عنها
صارت عيني على لابتوبه واتفاجا بالصور
الطايح حضها جانت صور تلعب النفس
وكلهن النفس البنت..

-كوه وخرتها منه هو نزل شايط فلش البيت اخذ كل ملابس تمارة بالطرمة ذب عليهن نفط حركهن سوه غرفتها طحين وما نعرف شصاير بينهم
هي خنست وشردت وهو اشتعل بنار
كوه هدينه الوضع ونريد نسال عمر
وما نسمع غير صرخت سرى..

-يبو هسه وينهم وخالو عفيه شبي..

-اجينا عليها شكو شبيج؟!.. هي كالت
خالو خالد انشل مصيبة ريا مصيبة ووكعت
عليهم..

-عمر صاح شبيهم ما تحجين شكد فاهيات
وماما فرفحت خطية على خالي..

-ماما ضلت تلح على عمر ياخذها وتبجي
هو كالها خلي نفهم شبيهم وين اخذكم هسه
اتصل عمر وسرى وتالي فهمنا المصيبة
القذرة الي صايرة بخالي وخلته ينشل سرى
بدت تحجي واحنا مصدومين وماما بس تبجي
خطية كطعت كلبي..

- كالت.. خالو جان طالع ومن رجع للبيت فاتح الباب صاعد الغرفته ولاكي احمد ابن خالة سناء ومرته بوضع يلعب النفس وهذا حاضنها
ويبوس بيها وهو خطية من صدمته قافل الباب
مال الشارع وراكض على سلاحه وضارب احمد طلقتين وهي حابسها بالغرفة ومشبعها كتل ومخابر اخوتها يجون ياخذونها ومن جايين مسولف الهم وكايللهم هاي عاركم وانتم اتصرفوا وياها واحمدو الله ما ذبحتها بعد الي شفته بعدها ما متحمل و واكع عليهم لا يحرك ايد ولا رجل من صدمته وهسه خالي و احمد اثنينهم بالمستشفى..

-نزلت دمعتي بقهر على خالي ياربي هاي
شصاير بالدنيا والله ما تستاهل حبه هي حتى خلفة متخلف مبقيها لان يحبها وحتى ما يجرحها
متحمل بدون خلفه ومكتفي بيها وهو الف وحدة تتمناه خالي حنين ومعدل ابد ما يستاهل هيج
ينكسر من مرته وابن اخته فزيت على صوت
ماما الي صاحت بيها وهذا شبي ولج بس لا مات
وخالج يبتلي بي..

-عمر صاح.. هي هاي العايزة يبتلي بواحد****
خلي يولي هالعار..

-بقينا بقلق وكل شوي نتصل سمعنا انو بيت
جدو كلهم جايين لبيته وخالة ام احمد مفرفحة
تكلهم هالكلب لوميت ولا منزل راسي كدام
اخوي..

-احمد مصوبه خالي برجله وبطنه ساعات
يلا اطمنوا عليه وطلع من العمليات ومشوها انو خالي ينظف بسلاحه وضاربه بالغلط يستحون يحجون من العار والفضيحة..

-انقهرنا كلش معقولة هيج الشيطان يوصل
بني ادم مراحل محد يصدك بانو احمد هيج
يسوي بخالي وهم علاقتهم اخوه مو خال وابن
اخته..

-اجه عليه اسر طلعت بقهر الطرمة كلها
رماد من وره عمر وتمارة ومنا سالفة خالي
لوما جايه لاهلي احسن على هالمشاكل
صعدت هو حجه مستغرب.. شبيج ريا
ليش وجهج مخطوف؟!..

-ما كدرت اكوله الي بيه فشله شكله خالي
مرته هيج لو ابن خالي نفسه دنت على عرض
خاله هم حتى اخجل احجيها اله تنهدت وكتله
عمر وتمارة شوي تلاغوا وهذا كتلها ماكو شيء..

-رجعت للبيت بدون روح بالي يمهم كل شوي
سرى تتصل وتطمني واني اطلع من اسر
واحجي هو اجه وراي.. من اكلج شصاير
احجي ما تعرفين تجذبين شكو شصاير؟!..

-خالو بالمستشفى وما يحرك لا ايد ولا رجل
متعارك هو ومرته وصاير عصبي وواكع
عليهم وجاي اخابر سرى اطمن عليه..

-هو كعد واخذني لحضنه.. ان شاء الله مابي
شيء كولي يالله..

-خليت راسي على صدره والتفكير ذبحني
منا بعمر وشنو هاي الصور مال بنيه الي محتفظ بيهن لعبت نفسي معقولة هاي حبيبته وشلون
هيج يسوي ومنا بخالي والمصيبة الي وكعت
عليه وما اكدر احجي اخجل من اسر..

-كوه يلا غفت عيني الصبح كتله اروح
ويا فارس لخالي هو عقج الوجه وما قبل..

-حباب اسر خلي اشوفه لا يصير عليه
شيء واتندم ليش تحرمني منهم ترى ياما
عشت يمهم وددلوني وتالي يوكع وما اشوفه
ما يصير هيج يا عيني..

-هو كال اني اخذج عوفي فارس حجاها
واني خليت ايدي على كلبي شلون ياخذني
خاف لا هناك وواحد يفلتها واترزل وتعالي
ليش تضمين عليه....

يتبع....

في البارت القادم..

-اتصلت عليه تبجي.. تعبت اني والله تعبت
ما اعرف شسوي خابرت صديقة وهذا حلف
انو عاقد عليها متعة ومتخصه بس ضاع عني الصدك والله حجتها وانفجرت بالبجي..

حبايبي الاحداث دا اختصر واسرع بيها ما بقى
الا القليل كلش للنهاية

لا تنسون التصويت وتفاعلوا تقديرا
لاخر البارتات..

اللهم صل على محمد وال محمد❤️