بعد فوات الأوان

البارت السابع والعشرون

امين
من فتحت المحل وصرت اشتغل انا وجهاد شويه مشت اموري بعدها بفتره اجاني حجي عبد وقنعني ااجر القطعه
الي بصف المحل وفعلا اجرتها وفتحتها مفروشات بمساعدة جهاد الي صار شريكي
جهاد الي من احتاجه الگا واگف بظهري سند الي والي كبر بعيني بعد ان عرفت قصته وسبب حزنه
واجاني جهاد وهو ضايج سالته

- - خير جهاد ليش ضايج
جهاد دخن جكاره // ماكو شي امين
- - شنو ماكو شي تضم عليه
جهاد // لا شضم بس هذا ابن حجي عبد يحاول يسوي وياي مشاكل

باوعتله واتساءلت // هذا شبي شيريد منك
هز راسه //والله ما اعرف
-زين الحجي شيگول ؟
جهاد // اكثر من مره نبهه وگله ما اقبل تحچي على جهاد جهاد هو الي امشي الشغل
- وهسه جهاد
- - ما اعرف امين محتار الحجي صاحب فضل عليه وانا ما اگدر اتركه

نفخت // لا جهاد عوف الشغل
باوعلي // انت شتگول
هزيت راسي // مثل ما سمعتني عوف الشغل وتعال هذا حلالك وشغلك واول وتالي يكبر ويتبدل حالنه
- - ما گلت شي بس الحجي صعبه اتركه
- - وهم اول وتالي راح اتركه للحجي الله يطول عمره يوم عن يوم يكبر بالعمر وابنه من خلاك براسه
ما راح ايعوفك وانت جهاد اعرفك ما تتحمل راح من بحدك تزهك وتبطل عاد هسه بكرامتك
اطلع احسن ما بعدين

جر نفس وگال //والله كلامك صحيح
حكيت شعري // زين اليوم ابقى يمي وباچر نروح انا وياك ونسولف ع الحجي
- - بس ششتغل ؟
- - شنو شتشغل تجي اهنا هذا شغلك وانت الاسطه واحنه كلنه عمال جوه ايدك
- - تسلم امين هذا تعبك
- - هو لو ما انت انا شفتهم شعرف

جهاد سالني // على فرض اجيت اشتغل اهنا والسكن شلون تره الشغل بعيد عن الشقه
جاوبته // جهاد تگعد بالبيت ويانه انت واحد من عدنا
هز راسه // لا امين ما ترهم ابقى بالشقه على ما الله يحلها
جاوبته وانا ابتسم // تنحل ان شالله تنحل

وفعلا ثاني يوم رحنه الحجي عبد الي من شافني رحب بيه وبعدين اجه ابنه ازهر وگعدنا وسولفنه ويا

جهاد //حجي انت مثل ابوي لا والله انت ابوي الي اخذت بايدي وربيتني وكبرتني انت صاحب فضل
عليه للموت مستحييل انسى فضلك
الحجي // لا بابا انت گلتها انت ابني وانا شفتك وعرفتك وحتى جربتك بس ليش هالحچي
جهاد دنك عرفته خجلان انا جاوبته //حجي جهاد قرر يستقر يمنا شافله بيت زغير وتعرف انت
الطريق والروحه والجيه ما يگدر يجي
جهاد رد // حجي وانا باقي اهنا على ما تلگى اسطه
ازهر رد بتكبر //لا ماكو داعي احنه عدنا بدل الاسطه عشره انت اذا تريد تبطل الله ومحمد وعلي وياك

اعرف جهاد لو بيده يگوم يكسره الهذا ازهر  لكن سكت احتراما الحجي عبد الي خزر ازهر وگله
شنو يابه جاي تحچي بالنيابه عني تره بعدني لا متت ولا خرفت
ازهر ارتبك وجاوب ابو //العفو حجي بس هو يريد يبطل او ...
ما خلا الحجي يكمل //اسكت بابا هاي الورشه انبنت على ظهر جهاد هو اله الفضل بيها من ورشه
زغيره  الى مصنع شكبره وشكده جهاد مو بس عامل واسطه لا جهاد حافظ على رزقي وكبره
مو انت امس اجيت وما تعرف شي وهيج تحچي

باوع النه الحجي وگال //عمي جهاد هذا المصنع مصنعك وانت ما قصرت وبكيفك يمته ما تجي هو مفتوح الك
انت وامين الله شاهد اعتبركم مثل ولدي
جاوبته // واحنه ولدك حجي وانت تمون علينه
باوعلي وهز راسه // عفيه عليك ما ضاعت تربيتي بيك
- - الله يطول عمرك

جهاد //حجي اريدك تعذرني وهم اذا اكو بذمتي شي تگلي
الحجي //لا بابا انت الي تعذرنه
جهاد // زين احنه نروح
الحجي // لا ابقوا رايدكم (باوع الازهر وخزره ) روح يم العمال مو انت لزمت الشغل بعد
شعدك گاعد يمي

طلع ازهر وهو يباوع النه الحجي فتح الميز وطلع رزمه مالت فلوس وخلاهن بعلاگه وگال الجهاد
اخذ بابا
جهاد باستغراب //شنو هاي حجي
الحجي // هاي اعتبرها هديه اعتبرها نهاية خدمه
جهاد رد ايد الحجي //لا حجي ما اخذهن
الحجي //لا تاخذهن انت مثل ابني وانا اريدك من تطلع منا تطلع وانت ثگيل هاك يابه اخذهن (خلاهن بايده )
جهاد // الله يطول عمرك بس هذني هواي

الحجي //لا قليل وقليل كلش شنو اريد انسى انت كبرت الشغل وحافظت على حلالي وادري انت مو رايح تريد
تشتغل انت مزعت روحك من ازهر تره كل شي ادري وهم اگلك يمته ما يعجبك تجي وتشتغل ومحد ايگلك
على عينك حاجب
باوعلنه وگال // سبحان الله الوكت يركض ركض امس اجيتني جهاد شغلتك وانت امين عبالك البارحه
من اجيت وانت زغير وانا الخاطر خالك شغلتك وجهاد خوش علمك الصنعه الله يوفقكم وتصيرون احسن
ناس لان انتم خوش ولد وتستاهلون كل خير

جاوبته //  وانت حجي الله يوفق ولدك ويرزقكم
الحجي هز راسه // انت گلتها التوفيق من الله الي عليه راح اعوف الهم تجاره وفلوس وهمه بكيفهم شيسوون
خلي يسوون
جهاد // احنه نستاذن حجي
الحجي // الله وياكم وانتوا هم ياالله تتزوجون (وباوع الجهاد )  تره كبرتو وانا اريد افرح بيكم ما دامني عدل
انا جاوبته // حجي الله يطول عمرك  بس الله وايدك خلي جهاد بالبدايه يتزوج صار شايب
الحجي باوع الجهاد // ايي لازم يتزوج وانت امين هم مو زغير
- الله كريم حجي الله كريم

سالمنه الحجي وجهاد حضنه ودنك على ايده باسها واشوف الحجي بعينه دمعه جهاد //حجي باي وكت تحتاجني مو
بس شغل لا اي شي ما يردك اله السانك وهاي (اشر على رگبته ) هاي گدامك وروحي ترخص الك ياطيب
حجي عبد // تسلم الله ايوفقكم وشتحتاجون تجوني تره انا صح كبرت بس بعدني واگف على رجليه

وطلعنه من حجي عبد  وانا اشوف جهاد شگد مقهور وما عوزه يبچي عرفته ما هانت علي العشره وهم لان الحجي
چان كلش طيب ويا

وصار جهاد يجي الصبح للشغل وبالليل يرجع وايام يبقى يبات بالمحل وانا هم بديت ابني بالبيت چانت القطعه
مساحتها چبيره وچان بيها بعد بيت لذلك فاتحت جهاد انو ياخذ قسم منها ويبني مشتمل اله بالبدايه ما وافق وگال
لا وشلون لكن انا قنعته انو هو عقار ويفيدك هو وافق وسوينه  مكاتبه وفعلا بدا يبني بعد ان انطاني فلوس القطعه
بهذا الوكت شغلنه چان ماشي والناس عرفتنه وصارت علينه رجل حتى من غير اقضيه

لمن خابرني سالم وعرف عن نفسه انا اتفاجآت بعدين من حاچتني سماح والطبيب عرفت انو مروه تمر بظرف
صعب كلش
خليت جهاد بالمحل ورحت الامي واخذتها البيت عمتي وخليتها تحچي ويه سماح وسالم
بعدها قررت اروح اشوف مروه والي يصير يصير اخذت امي وعمتي وزينب وصادق وعلي بسيارة جهاد الي ما
قبل اناجر سياره ورحنا شفنا مروه ومن شفتها  شكيت بيها واگعه لكن هي اصرت على كلامها بعدها رحنا شفنا
الطفل بالمستشفى وانا اشوف امي شلون الطريق كله وهي تبچي وتدعي المروه بالصحه والسلامه وتحتسب على جمال

صرت على تواصل ويه سالم الي بالبدايه چنت احس منه برود اتجاهي طبعا انطيته العذر ومن عرفت
بي اجه للبصره بشغل اخذت سيارة جهاد ورحت عزمته بالبدايه ما قبل لكن كدرت اقنعه وافهمه انو
  احنه نقدره ونحترمه وجبته البيتنا وراحت امي تسلم علي بعد ان طلبت منها لا تگله
جيب سماح لان فكرت اكسبه السالم واخلي هو يبادر ويجيب النه سماح

بعدها بشهر ونص خابرنه سالم وطلب مني اخلي امي تجي لان سماح جهضت الطفل
استغربت طلبه لكن عرفت انو سماح گدرت اتاثر علي وفعلا صادق اخذ امي هيه وزينب وبقن يمها تلث تيام
لكن هنه ما شافن مروه او بالاحرى يوسف ما قبل مروه تجي الي چانت تخابرني دائما الساعه 11بالليل
وانا چنت ما اخابرها لان اخاف عليها يعرف عدها جهاز ويسويلها مشكله
چنت دائما ادزلها رصيد حتى تگدر تحچي براحتها

خلال اشهر  كملت البيت بنيت ديوان وهول وغرفتين جوه وغرفتين وصاله فوك وقررنا ننتقل للبيت وصرت
افكر اشتري اثاث جديد لكن امي ما قبلت وكالت // كل شي لا تشتري الفلس العندك ضمه اريد ازوجك
انا اشتريت كاونترات للمطبخ واشتريت قنفات للديوان وانتقلنه البيتنا الجديد وانا اشوف الفرحه بوجه اخواني
والتباهي بعيون امي الي حست تعبها ما راح ابلاش  واتفاجأنه بسالم جاي وجايب مجمده هديه للبيت
هذا الشي كبر سالم بعيونه مو على مود الهديه بس عرفنا سالم يفتهم بالاصول

وجهاد بعده يبني بالمشتمل والحزن ما مفارگه
اما ابوي فمن چنا گاعدين ابيت الحجي وهو ما يلفي للبيت اله كل خمس تيام يجي ليله وهو ما طايق
يباوع بوجه احد من عدنا وما يتحمل اي كلمه سالته مره // يابه انت وين تروح
هو باوعلي وگلي // شنو انا جاهل زغير وتگلي وين تروح
- - لا بابا العفو بس نخاف عليك خصوصا واحنا وضعنا يختلف
ابوي // شبي وضعنا كل شي ما علينه
- - بس الامر ما يخلو تدير بالك

ابوي بنفس عصبيته // داير بالي بعدين انا اشتغل بالصفاة وهناك ابات يم جماعه
امي جاوبته //وليش ما تشتغل اهنا
ابوي رد //هو وينه الشغل اهنا ماكو اي شغل وانا بكيفي وين ما اريد اشتغل محد مسؤول عني
امي //بس احنه مسؤولين منك لازم تشوفنه وتدبر عيشتنا
ابوي باستهزاء // هاا ياعيشه هاي مو ابنج جاي يشتغل انا سويت العليه تردين مني عيشه

امي // شسويت انت احنه كل شي ما شفنه منكً الي شالنه امين من هو زغير
ابوي // انچبي والفصل نسيتي لو ابوج دفعه
امي // الفصل دفعته عن ابن اخوك ما دفعته عن واحد من ولدك وهسه اجه الوكت امين كفا او وفا
ولازم ينتبه النفسه ويتزوج

ابوي باوعلي // اي خلي يتزوج منو لازمه
امي // منين العده والماعده ذبه ع البيت انت لازم تزوجه
ابوي ايهز بايده //. وانا منيلي
امي //بفلوس البيت الي بعته زوج ابنك واصرف علينه
ابوي باوع الامي باستهزاء // هاا هو هذا الي كاتلج فلوس البيت

هزت راسها // ايي لان احنه احق بيهن
ابوي وگف ورفع اصبعه وگال // اسمعوني كلكم فلوس الببيت الي تعبي ما اروح ازوج بيهن ولدج وهذا ابنج
(اشر عليه ) يشتغل وما شاء الله اموره ماشيه هو وصاحبه يريد يتزوج يتزوج من كده
وانتي هذا السانج گصري لا اعرف شلون اخليج بس اتاشرين

صادق بعصبيه //شنو هذا الحچي بابا شلون هيج تحجي ويه امي
باوع الصادق //تعال اضربني ليش بس اتصيح اسمعوني انا ما عليه انتم زلم دبروا حالكم
صادق راد ايجاوبه وانا لزمت ايده يعني اسكت وهو طلع واشوف امي مقهوره فهمتها من يجي
بعد لا تحچي ويا

هو يجي يوم يومين ويروح  مو بحاجته لكن امي تگول //ليش فلوس البيت عده وانت مكسور ظهرك بالشغل
هزيت راسي //مي خالف يمه هذا ابوي وهذا طبعه مو جديد علينه
صارت امي تبچي وهي تگول// مو كافي ظليمة مروه حتى حسره علينه شوفتها
اتحسرت //الله كريم يمه لازم الها حل
امي //الله كريم يايمه من اتذكر شلون وجهه ازرك روحي كلها تروح

صادق // يمه مو گالت طايحه من الدرج الحمد لله الله قدر ولطف بيها
امي رفعت وجهها // اي الحمد لله والشكر
اتقربنا يم امي وحضناها وهي عيونها مليانه دموع ورحت الغرفتي واجه صادق يمي
صادق // امين صدگني هذا ابوي ولا خالي
باوعتله هو گال // ما تشوفه من چنه بذاك البيت ولان ما كو شبكه بيوم اليجي لو نص
الليل يطلع ع الشارع وبس يخابر وهسه نفس الشي اكيد ورا فد مصيبه

جاوبته // ياخي ما سمعته گال محد اله شغل بيه انا بكيفي
صادق // بس هم حقها امي شكم دووب كله عليك
- - الحمد لله والشكر الله هو الرزاق
- - والله ياامين ساعات احس بيك انت ابوي لو شنو نسوي ما نوفيك

ابتسمت // لا تگول هيج صدوقي وداعتك باچر تتخرج محامي واتباهى بيك
- - لا امين اريد اصير قاضي
- - ياالله شد حيلك وانا وياك شنو تريد صار
وره اسبوع اجاني صادق للمحل واشوف بعيونه كلام // خير صادق شكو بس لا متعارك
نفخ وهو يحرك برجله //  امين اليوم طلعت وره ابوي وشفته وين يروح

باوعتله وابتسمت //  هههه شنو صاير تحري
هز راسه //تگدر تگول هيچ البارحه عرفت ابوي يطلع الصبح انا طلعت ورا بدون ما يشوفني وشفته اخذ تكسي
وانا هم  بقيت ورا ورا الى ان شفته
اتقربت منه //شبيك صادق شصاير ؟
باوعلي // ابوي ما يروح يشتغل

رفع حاجبي // - هاا
هز راسه // ابوي من نزل راح للسوك واتسوك وراح على بيت
- بيت ؟
هز صادق راسه وگلي //ايي بيت والحد جيتي وهو ما طلع
- بيت منو ؟
- ما اعرف
- - ما سألت ؟
- - لا ما سالت بقيت واگف وشفته الحد الظهر وهو ما طالع منه

رجعت گعدت وگتله /=ستتصور شنو هذا البيت
صادق // شنو معقوله ابوك يسوي شي بي خير اكيد هذا البيت مال ...
- - استغفر الله شلك بهذا الحچي
صادق // حقك ما شفت المسواك حمل سياره وهو الف ما انطى العلاوي لو انا ابو الكليه حتى ما سالني
شعدك ما عدك

هزيت راسي وكتله  //  عوف هسه ودير بالك تحچي شي يم امي خلي نتاكد
صادق // وشلون تتاكد؟ 
- - ما عليك انا ادبرها بس من نحتاجك دليني البيت
- صار

رجعت للبيت وصرت افكر وانا اگول // يعني مبينه ابوي متزوج مع الاسف هذا جزاء امي الي تعبت
واتحملت كل شي ويجوز مو زواج يجوز شغلة ... خليت اديه على وجهي وگلت//  استغفر الله

ثاني يوم رحت للمحل وجاب جهاد ريوك واجه يمي شافني مالي خلك سالني
- -شبيك امين شصاير
نفخت وجاوبته/=  ما صاير شي
- -؛هاا ما صاير شي هاي سولفها على خالك مو عليه انا مربيك فهمني

جريت حسره وسولفت اله كل شي سمعته من صادق وانا بالاساس چنت ناوي اسولفله لان من انا زغير ما اعرف
اضم على جهاد شي واذا حاولت اضم احس  بي راح يعرف ويزعل  مني وانا اشوف جهاد شي چبير بحياتي
جهاد حك شعره وكلي // صادق يندل البيت
هزيت راسي
- - زين باچر الصبح خلي يجي اهنا واروح انا ويا يدليني البيت وانا اعرف اتصرف

وفعلا ثاني يوم الصبح اجه صادق وراح هو وجهاد بسيارته حتى يدلي البيت ومناك يوصله للكليه ورجع جهاد
وره الظهروگلي // باچر او عگبه وراح نعرف الخبر اليقين

ما سالته لان اعرف بي هو ذكي ورزن وما يتهور يومين اجاني  الصبح جهاد وگلي
- - امين تعرف البيت الي يتردد علي ابوك لا دگول البيت الي گاعد بي المن
انا باهتمام سألته // المن جهاد ؟
اتقرب مني جهاد وگلي //  والله ما اعرف شگلك ابوك متزوج ارملة ابن عمك جمال
انا اتفاجئت // جهاد تحچي صدك ؟
هزز راسه  // اي صدك ومتاكد الف بالميه

نزل عليه الخبر مثل الصاعقه مو لان ابوي اتزوج لا هذا الشي ما يهمني بس انه ياخذ مرت جمال جمال الي
چان السبب بالي وصلناله جمال الي عذبنه من احنا زغار ومن ورا مروه وسماح راحن فصليات
جمال الي من ورا عفنا بيتنا وجوارينه واصدقائنا

ابوي ياخذ مرته الي ما قبلت حتى تطلع لو فلس من املاك جمال وتساهم بالفصل الي وكع علينه تروح تاخذها
ليش ما فكرت بينه ما فكرت تزوج واحد من ولدك ما فكرت تدخل السعاده الهذا البيت الي كله هم وحزن
رحت اتزوجت بس حتى ترضي نفسك

جهاد گلي // امين  اهم شي لا تخلي امك تسمع ولازم تواجه ابوك وتفتهم منه وهم لازم اخوانك ما يعرفون
لان يجوز يتهورون
- - اكيد صادق من يعرف راح يتهور صدگني جهاد احنه ابوي ندري بي ونعرف طبعه وما ضجت
لان طلع متزوج بس انو يتزوج ارملة جمال اهنا المصيبه
جهاد // اعرف امين لذلك اكلك ما اريد امك تعرف
- - الله كريم

وره يومين اجه ابوي وره المغرب چنت گاعد بالهول هو دخل سلم وگعد ع القنفه انا رديت السلام ابرود ورحت
الغرفتي اتمددت  ع الجربايه تقريبا ساعه واجه صادق وهو يگلي
- - شكو امين بس شفت ابوي صعدت الغرفتك
- - ماكو شي

صادق رفع حواجبه // صدك ماكو شي خاف تتشاقه لا اكو وانت وجهاد ضاميين عليه
نفخت وجاوبته // اسكت صادق جاي اگلك ماكو شي ليش تلح
- - شنو الح امين انت گوه رديت السلام اكيد اكو شي واذا ما تكلي شكو انا راح اعرف بطريقتي
جاوبته بقلة صبر // اي اكو حضرة ابوك متزوج مرت جمال
انفتح الباب وشفت امي بوجهي وهي تكلي // ياجمال هذا ؟

انا حاولت ابدل الموضوع ابتسمت بوجهها هي ردت سالتني // امين ياجمال الي ابوك متزوج مرته
جاوبتها وانا اضحك // لا يمه شنو ابوي متزوج منيلج الحچي
- - امين اجيت اصيحكم ع العشا وسمعت كل شي گلي الصدك ابوك متزوج مرت جمال ابن عمك

هزيت راسي امي ما عقبت گالت  // ياالله انزلوا اتعشوا
نزلنه انا وصادق واحنا متعجبين من برود امي والتمينه وابوي ما اكل امي سالته // ليش ما تتعشه
ابوي //ما اشتهي بس اريد چاي
امي جاوبته //لازم غداك دسم ابو امين
هز راسه وبوجهه ابتسامه مخفيه //ايي والله اليوم سمج وكثرت
- - بالعافيه عيني

وصرنا ناكل واحنه نباوع الامي وهي تحاول تبين طبيعيه بعدها راحت زينب وجابت چاي قدمت الابوي والامي
وانا جابتلي كوب  صادق ما يشرب چاي وعلي گاعد يباوع ع التلفزيون لمن ما امي حاچت ابوي
- - طالب بعد لو تشتغل اهنا لو تگعد وتسكت
ابوي // شنو شتگولين ؟
- - اي نريدك يمنا وداير ما دايرنا وانت كبرت ولازم ترتاح
ابوي جاوب // اي اي ان شالله

امي // وهم انا گلت  اشوف الامين بت حلال ونتعاون ونزوجه
ابوي // شنو شنو نتعاون شلون يعني
- - يعني من عنده ومنك ونزوجه
ابوي // ليش انا منيلي
امي // من فلوس البيت

- - هم رجعتي على فلوس البيت
امي هزت راسها // اي ارجع ليش هو البيت مو النه كلنه
- - وانا انطيتكم كملتوا بي
- - لا طالب انت انطيتنا فلوس اهلي الي جابوهن الي وكملت بيهن وبنيت غرفه الابن اخوك تتذكر مو

ابوي بقلة صبر //اي وهسه شتردين
امي // اريد تنطينه من فلوس البيت اريد ازوج الولد
ابوي // وانا ما عندي
- - ليش ما عندك وين وديتهن
- - شنو تحاسبيني
- - اي احاسبك

ابوي اتقرب منها // هاا ومن يمته صايره تعرفين تحچيين وتحاسبين
اهنا امي گالتله  بثقه // من زمان طالب من زمان من لمن اخذت رباب وخبلتك علينه وجبت جمال وملاك
وشمخرتهم على ولدك وبناتك
ابوي // وهسه شتردين ؟
- - اريد حقنا من البيت
ايوي // وانتم ما الكم كل حق
امي خلت عيونها بعيونه // زين ما طول هالشكل تطلع من البيت وبعد ما تجي

اتفاجئنا من كلام امي حتى ابوي صار يباوعلها وهو متفاجأ وعيونه يطلع منهن شرار ويگللها
بت الكلب اتطرديني (ولزمها ضربها انا وصادق صرنا كدامه هو يرجف ويكول )
- - ميلو لا احرك البيت ميلو اريد اموت هاي الچلبه
امي // مو انا الچلبه طالب انت الچلب انت الدني نفس اول ما على مرت اخوك وانوب على مرت جمال

ابوي من سمع كلامها اتوتر وبين ما مهتم هز راسه // زين ما طوول تدرون انا ما مسوي شي لا حرام ولا عيب
امي باستهزاء // باالله ما تستحي فرحان ماخذ مرت ابن اخوك هي لو بيها حظ اخذها جمال
- - انچبي لا تحچيين عليها شوفي نفسج عبالك طالعه من الگبور
- - من خيرك ودلالك الي ما شفنا

ابوي // وما راح تشوفينه غصبن عليج عندي كومه فلوس يس كل شي ما تشوفين منهن تدرين ليش لان
اكرهج واكره حتى بزرج
اهنا اتقرب صادق وگله // ما طوول تكرهنا وتكره امنا اطلع منا وبعد لاتجي
ابوي بعصبيه // ها تطردني ابن سهيمه
صادق بعصبيه // سهيمه اشرف واحسن منك اطلع وبعد لاتجي

وطلع ابوي وهو مستهزأ بامي ويگول // انا رايح هم زين اجت منكم لان بصراحه من ادخل  واشوف
چهرتها اختنك اروح يم مرتي الزغيره (باوعلنه واتقرب عليه )  تره واذا تردون اطلك امكم انا برسم الخدمه

طلع وهو يضحك وانا اشوف اشلون امي انقهرت بقينا گاعدين يمها ونحاول انلطف الجو لكن امي بقت ساكته
بعدها گامت للحمام وسمعناها تتقيأ
انا رحت وراها شفتها ساده الباب حاچيتها // يمه بيج شي اخذج للمستشفى
طلعت وهي تمسح بوجهها  بالخاولي وعيونها حمر هي  // لا ما بيه شي بس يمكن كثرت بالاكل

بقينه گاعدين يمها هي ما قبلت تروح للغرفه كالت الزينب جيبيلي فراش بالهول  زينب فرشت الها وهي اتمددت
انا وزينب  نمنا يمها وانا لان طوول النهار بالمحل غفيت ما حسيت اله على زينب  وهي تگلي
- - امين اگعد امي صخنت كلش شوفها جاي ترجف

باوعت الامي ولمست جبينها شفته ناار طلبت من زينب تجيب البطانيه وغطيناها صارت مره تعرك مره ترجف
ومغمضه عيونها  الصبح اتاخرت ما طلعت للمحل بقيت الى ان گعدت سالتها
- - ها يمه اشلونج
جاوبتني بصوت بي بحه // الحمد لله زينه

- - الحمد لله ( باوعت الزينب ) زينب سوي الامي ريوك وانطيها علاجها ولا تخلينها تسوي اي شي
- - اي ان شالله بس انا ما اعرف اطبخ الغدا
- - انا ادزلكم من المطعم
طلعت وزينب لحگتني للباب  //. امين چا والمدرسه
اليوم لا ترحيين ما تشوفين وضع امي

وطلعت وانا ما مرتاح وبنفس الوقت مقهور من تصرف ابوي وره الظهر خابرت زينب
- - الو ها زينب شنو الاخبار
- - هلا امين امي رجعت صخنت
- يمته ؟
- - قبل شويه  وردت اخابرك وهي ما قبلت
اتغدت
لا امين شربة بس خاشوگة مرگ
- - زين حضريها انا جاي حتى ناخذها للطبيب

وطلعت من المحل شافني جهاد سالني //خير امين
- - الوالده تعبانه وراح اخذها للطبيب
جهاد // انتظر انا جاي وياك
- - لا جهاد انا اخذها
- - شنو هالحچي ناخذها اثنينه

وطلعنه انا وجهاد بسيارته ودخلت للبيت لگيت امي متمدده سالت زينب // حاضره
- - اي بس امي ما تقبل تروح للطبيب
اتقربت منها وحاچيتها وانا لازم جبينها //ها يمه اشلونج
هي گعدت // هلا يابعد امك ليش جاي من وكت
- - ماكو شي بس اريد اخذج للطبيب
- - امين انا ما بيه شي ارتفع سكري وصرت زينه

هزيت راسي // اي مي خالف بس اريد اطمن عليج زينب حضرتي ملابسي
- اي حضرتهن بغرفتك
- راح ابدل ع السريع وانتي حضري امي
وصعدت سبحت بسرعه وبدلت ونزلت لگيت امي گاعده وهي تباوعلي // يمه والله روحتي ما الها داعي
- - لا امشي اخذلج تحليل ويشوفج الطبيب

وطلعنا زينب ويانه وبقى علي وصادق بالبيت ورحنا للطبيب حجزنا وبهاي الاثناءجهاد گال
- خلي ناخذها نسويلها تحليل نكسب وكت
سوينه التحليل ورجعنا دخلنه ع الطبيب الي فحصها وشاف التحليل وطلب بعد نسوي تحاليل بعدها
سجل علاج وطلعنا رحنا انجيبه انا وجهاد ودخلنا ع الطبيب وخلينه امي وزينب بره

اشر الطبيب ع العلاج وباوعلي وگال// هذا العلاج تاخذه بوكته ولازم تراقبوها اذا بقت تصخن افضل تنام مستشفى
- - ليش دكتور ؟
الطبيب // الصراحه سكرها معلك وضغطها جدا مرتفع
- -  بس ما عدها ضغط

- - هسه صاير عدها نتيجة انفعال انتو ديروا بالكم عليها
- - ان شالله دكتور
طلعنا انا وجهاد امي سالتني // ها يمه شگلك الطبيب
جاوبتها // الحمد لله امورج تمام بس گال قللي الملح مو زين عليج
— اي مو گتلك ما بيه شي
جهاد //ما دامنا  بالعشار خلي افركم شويه

باوعت الامي الي هزت راسها رحنا يم الكورنيش وبعدها نزلنا المطعم وامي ما قابله طلبنه عشا وهي تگول
- - شنو عليمن رايحين ونتعشى ابيتنا
جاوبتها //- يمه الله عليج ما ضجتي من البيت
- - چا شسوي وين اروح گبل اروح البيت خوالك هسه ما اگدر اروح واعوف زينب

جابولنه العشا وامي حچت // شنو هالزحمه يمه جهودي
جهاد // خاله اكلي تره اذا ما تاكلين اخذج البصره لاند واركبج بالكوب
- - ههههه راح اكل عساك سالم

امي اكلت شويه وزينب تاكل وهي مدنكه وراها اخذنا الصادق وعلي عشا وطلعنه رجعنا للبيت
وانطيت الامي علاجها وگلت الزينب تفرشلي يمها هي ما قبلت بس انا اصريت نمنا انا وزينب يمها وكل ساع
واحد من عدنا يشوف حرارتها الي ابد ما فكتها وهذا الشي خوفني

ثاني يوم گعدت لكيتها گاعده ومسويتلي ريوك انا گتلها//  يمه شلقصه اله تگعدين
- - يايمه تريد اتمرضتي گوه ما بيه شي گعدت صليت وسويت الريوك صادق ورا كليه  وعلاوي وزينب هم
جاوبتها // لا زينب اليوم ما تروح
امي // ليش عود ؟
- - يمه تبقى يمج
- - ما بيه شي امين گوه تريد اتمرضني خليها تداوم تفوتها دروس

امي حتى وهي مريضه شايله همنا هزيت راسي // مي خالف انا اروح اخذ الها اجازه  وزنوبه شاطره ما ينخاف عليها

وفعلا رحت واخذت الها اجازه ورجعت بالليل امي تقريبا زينه وخافه صخونتها بقينا يمها بالغرفه وزينب سوت العشا
وجابته بالغرفه وصرنا ناكل واحنا نقلد على طبخها وهي تكول // لحد يقلد عود خلي نشوف طبخ نسوانكم
صادق  //عمت عيني اي والله عمت عيني اذا اخلي مرتي تطبخ
زينب //چا منو اليطبخ

صادق // انتي زنيبه شنو ناقصج ايد رجل تردين مرتي اظافرها تصير بيهن ريحة بصل وثوم
زينب // وشنو عيني انا السيلانيه مالتكم
صادق // لا زنوبه انتي الهنديه
زينب // ههههه تره ما تضحك ومن تجي مرتك غصبن ما عليها تطبخ
علي // هسه خلي يتزوج  وبعدين اتعاركوا ع الطبخ

شال علاوي الصينيه وزينب جابت قوري الچاي والاستكانات وراحت تغسل المواعين لمن ما اندك الباب واجه
ابوي الصراحه الكل ضاج من شفنا هو دخل سلم وكال // شعجب كاعدين يم امكم مو بالهول
علي جاوبه //  بابا امي اتمرضت وامس امين اخذها للطبيب
باوعلي وسالني // هاا وشگال

جاوبته ابرود // السكر شويه مرتفع
هو اتقرب عليها وگال//  ما تشوفين شر ام امين...بعد شتسوين العمر اله حوبه كبرتي. (گالها باستهزاء )
هي هزت ايدها //  شنو طالب ناسي انا ازغر منك بسبع سنين
ابوي // اي بس انا ما شاء الله بعدني شباب اصلا اليشوفني يگول اخوج الزغير

صادق حچى بهمس مسموع  وگال // شايب ومراهق
ابوي سمعه وهو صار يصيح //ولك صادق شقصدك من كلامك
صادق ما رد بس بقى يخزر بي وابوي راسا رفع القوري وشمره على صادق الي اتخطا يايده امي
من شافت هذا الشي راسا نشغت وانغمى عليها بوكتها انخبصنا صادق لازم ايده الي احتركت واجه على امي
وزينب ظلت تصرخ
وابوي ايسب ويگول // ايي سوت روحها طايحه عبالها اعبرها لصويدق اله اموته

احنه  انخبصنا بامي  وانا گلت الزينب //بسرعه جيبي عباتها (وخابرت جهاد ) الو انت وين
- - بالورشه خير
- تعال امي اتخربطت
- - جاي جاي

واجه جهاد وشلنه امي انا وصادق وزينب اجت ويانه وهي تبچي وديناها للطوارئ وهناك گالوا لازم
تنام مستشفى
ضربوها ابره وامي ما منتبهه بقيت انا وصادق وجهاد وزينب الدكاتره ما قبلو بس زينب تبقى يمها
احنه طلعنه بالحديقه
مالت المستشفى صارت الساعه 12 انا حچيت ويه جهاد //اخذ صادق وروحو للورشه
جهاد//  گلي شصاير
- - اجه ابوي وهذا  صادق ما لزم السانه اتعاركو وامي هالتشوفها  ومن يروح  للبيت اكيد يتعاركون جهاد انا ما اگدر
اعوف امي وزينب انت رووح واخذ صادق وياك لا تخلي يروح للبيت

- - ولا يهمك واي شي خابرني
- ما قصرت
صادق //. ابقى اهنا ما اروح بس اروح ارتكب جريمه
جاوبته //. مو وكتك صادق احنه بيا حال
كله من ابوك ما افوتها اله
غمضت عيوني واتنفست جهاد لزم صادق من ايده وكله //. امشي وياي اهم شي سلامة خالتي وكل شي سهل

وراح صادق هو وجهاد وانا بقيت الشي الي ما اهتميت اله انو ابوي ابد ما اتصل ولا سأل على امي علاوي يتصل
عليه من جهاز امي وانا طمنته وكتله شويه ضغطها مرتفع وسالته وين ابوي جاوبني
- نام
ما اتفاجأت من تصرفاته وعرفت ليش جمال طلع خسيس وملاك حقيره رغم عاشو ويانه بنفس البيت لكن
الفرق انو ابوي الي رباهم رباهم ع الكره والخباثه
واحنه امي الي ربتنا ع الاخلاق ومخافة الله

ما اتحملت بچيت ورحت شفتها بعد ان اتوسلت بالاستعلامات رحت يمها وانا اشوفها نايمه بقيت گاعد لمن ما حسيت
بيها ونت
انا وزينب اتقربنا يمها وانا لزمت ايدها وبستها وزينب تحچي وتگلها // ماما الله يخليج گومي احنه محتاجينج

بقيت للصبح گاعد وانا كل شويه اطل عليها  لمن ما اجه الطبيب وشافها وگال لازم تبقى بالمستشفى
قررت ادخل امي مستشفى اهلي وكتبلي واخذتها صارت عمتي امل وزينب وخالتي سعاد يتناوبن عليها

خامس يوم  احس بامي صارت زينه وابوي ما سأل ولا كلف نفسه يخابر امي بس انتبهت گالت
- - اريد اشوف البنات
انا خابرت سالم وفهمته على حالة امي وهو گال //ان شالله اجيب سماح وليش هسه ياالله خابرتني
- - ما ردت اكلف عليك گلت ما بيها شي لكن الطبيب گال تبتعد عن التوتر
سالم //ان شالله باچر يمكم
- سالم

- ها امين گول محتاج فلوس
- - الله يحفظك بس ياريت تحجي ويه يوسف يخلي مروه تجي
- - ان شالله هسه احاچي
- - مشكور الله يحفظك
وره ساعه سالم خابرني وهو يگلي // والله يا امين يوسف ما قبل
- - ها وليش ؟
سالم // مثل ما گتلك ما قبل

عرفت هو حاچي لكن سالم ما يقبل يگول طلبت منه رقم يوسف اتصلت هو جاوبني
::الو
- -الو السلام عليكم
::عليكم السلام منو
- - وياك امين اخو زوجتك مروه
هو رد ابرود ::اهلا أأمرني
- - ما يامر عليك ظالم بس اتصور سالم حاچاك على حالة امي وهي طالبه تشوف البنات

::والمطلوب
- - تسلم ابو محمد ردنا مروه تجي حتى لو بنفس اليوم اخلي صادق يرجعها
رد عليه بهدوء ::اسف والله طلبك مرفوض
- -هاا وليش
:: لسبب بسيط انا من اخذت مروه اخذتها بشرط ما تشوفوها للابد
رديت //على كيفك ويانه اعتبرها حاله انسانيه
:: والله حاله انسانيه ويه الناس العدهم انسانيه مو وياكم

من سمعت كلامه لو يمي چان موته خلاص جاوبته بعصبيه  // صدك انت ما تستحي شنو قصدك
هو رد عليه بنتر ::منو الما يستحي انا زين خليها ابالك الما يستحي كل شي يسوي
جاوبته // انت جاي اتهدد واحنه عدنا مره تعبانه وانا ما الي خلگك بس خليها ابالك اجي واخذها من عيونك

ما انتظرت اسمع رده سديت التلفون وانا ارجف ابدي الزمه الهذا يوسف واكتله رجعت يم امي لگيت يمها الطبيب
الي گلي // الحجيه تعبانه و اي توتر مو بصالحنا
من طلع الطبيب امي سالتني //ها يمه خابرت اخواتك
انا ابتسمت وگتلها // اي وباچر ان شالله يجون

شفتها ارتاحت من كلامي وانا گلبي عبالك بركان محتار اذا باچر ما اجت مروه شنو اگللها والطبيب منع عنها التوتر
ثاني يوم تقريبا الساعه عشره  الصبح خابرني سالم وسالني على اسم المستشفى وعشر دقايق همه يمنا
امي من شافت سماح حضنتها وسماح بس تبچي عمتي امل چانت موجوده حاچتها
//سموحه لا تبچيين امج زينهالحمد لله ما بيها بس العافيه

امي //وهسه من شفتج صرت احسن بس وين مروه ليش ما جبتوها وياكم
باوعتلي سماح انا راسا رديت // اهوو شوف شلون نسيت ما وصيتك سالم اجيبها وياك وانا ما عندي رقم زوجها
امي /|اخذه من سالم وخابره اريد اشوف بتي قبل لا اموت
امل // اسم الله عليج ام امين عمرج طويل لا تحچيين هالشكل امين يضوج وهو من اول امس واگف على رجلينه

امي // سوده عليه تعبتك يمه
بست ايدها // تعبج راحه
امي //. الله يرضى عليك
سالم اتقرب منها وباسها براسها وهو ايگلها // خاله ان شالله اجر وعافيه ما تشوفين شر
امي //الله يخليك ويوفقك  بس فدوه ياخاله انطي رقم يوسف الامين لو انت خابره

جاوبت سالم  //انطيني رقم يوسف
ملا الي سالم وهو يعرف انا مخابره كتبت ارقام واتصلت جاوبتها //  مغلق يمه
سالم //اي هو دووم مغلق اذا يروح للحقل
- - شويه واتصل

وطلعت انا وسالم الي گلي //يوسف خابرني وصاير بيناتكم سوء تفاهم ووانت غالط وهو اكيد هم
جاوبته //والله ياسالم انا حچيت ويا بكل ادب بس هو صار يحچي ويستهزأ وغلط علينه
سالم // انا راح اخابره وانت احچي ويا واعتذر منه لا تنسى يوسف مصيبته چبيره
هزيت راسي وگتله //اتصل وافتح السبيكر

سالم باوعلي واتصل
- الو شلونك يوسف
:: هلا سلوم اشلونك
- الحمد لله يوسف تره ام مروه تعبانه كلش ومن حقها تشوف بتها وامين مو قصده يغلط بس الله يساعده يشوف امه
وهي كلساع تطلب بناتها
:: سالم انت مو اخذت مرتك هذا هو انا ما اخليها تجي واذا تجي فتحلم بعد ترجع وتشوف ابنها لا ينسوون بتهم فصليه
ولو انت ناسي
سالم //يوسف شبيك ليش هيج تحچي جاي اگلك المره تعبانه

::مو مشكلتي يردون بتهم ابني يبقى وخط طلاگها يوصل الها ها ويصيرون محقوقين الي اذا صار بابني شي لان
لاتنسى ابني طفل ويرضع من صدر امه وهسه من رخصتك عندي شغل
من سمعت الكلام ردت اخابره لكن سالم گلي // اسكت امين خلي يهدأ وانا ارجع واخابره

طلعنا انا وسالم ورحنا اتغدينا واخذنا غدا السماح وعمتي بعدين اجه صادق وعلي وجهاد امي بوكتها نايمه وهمه
ما حبوايقلقوها علاوي اتقرب منها وصار يبوس بايدها وبخدها هي فتحت عيونها وباوعتلي سالتني
- - خابرت راح يجيب مروه
انا ابتسمت بوجهها وگتلها // ايي يمه راح يجيبها
هي باوعتلي وگعدت گالت // لا تچذب عليه اعرفك من اتچذب

سالم // خاله خابرنا وگال راح اجيبها هي وحمودي
امي // زين اتصل علي خلي احچي ويا
سالم // شنو ام امين تچذبيني
امي // لا بس اتصل عليك الله اريد احچي ويا

عمتي امل اتقربت على سالم وحاچته بصوت ناصي //  اتصل بلكي من تحچي ويا يستحي ويجيب مروه
اتصل سالم وانطى النقال الامي بعد ان فتح الها الحاكيه حتى تگدر تحچي
:: الو ها سالم
امي بتعب //لا يمه يوسف انا ام امين
:: هلا بيج الحمد لله على سلامتج
الله يسلمك يمه يوسف طالبتك ...

هو قاطع امي وگلها :: اتعذريني ام امين بتكم بيوم الي اخذتها صارت الي ملكي وانتم اغراب بالنسبه الها
ردت اسحب التلفون لكن امي ما قبلت جاوبته وهي گوه تتنفس //يمه الخاطر شيباتي بس اشوفها واشمها وترجع
::حجيه اختي بكدها من ابنكم خطفها وماتت وامي انحرمت منها وهسه بتج اعتبريها ماتت وانتي انحرمتي منها

صادق ما اتحمل سحب التلفون وهو يگله بعصبيه   //ياناقص انا الك اله اندمك ياحقير
:: هي لا تغلط تريدون بتكم تعالو اخذوها بس ابني يبقى واذا صار بي شي احقكم
صادق بعصبيه //اي نجي  ناخذها وخليلك ابنك طز بيك وبي واذا صار بي شي نفصلكم مثل ما فصلنه اختك

سدا صادق وانا رحت يمه واگله // انت الى متى تبقى غبي وما تفتهم
صادق وهو يرجف من الغضب //لا افتهم وافتهم زين ( باوع السالم ) وانا اعتذر منك سالم بس انت سمعته شلون
حچى انا هسه اروح اجيبها وانعل ابو لا ابو ابنه
امي صار نفسها قوي گالت وهي بالگوه تحچي //لا لاتروح تجيبها وتشلع گلبها مروه اتحملت كل الهيه بي الخاطر
ابنها مثل  مثل ما انا اتحملت عوفوها خلوها  خل خلوها لا يجيبها الها الله

واتخربطت امي صار نفسها قوي وشفايفها بيض وفقدت اجو الاطباء الي گلونه انو امي انجلطت
وره يومين امي اتوفت وهي تباوع بعيونها بدون ما تحچي سوينا فاتحه واجه ابوي للفاتحه وصادق صار يتهدد
يريد ايطرده لكن انا گلت الصادق اسكت انا اتصرف

اتقربت من ابوي وگتله بهدوء وبالحرف الواحد // تخلص الفاتحه وبعد ما اريد اشوف وجهك

//////////////////////////يتبع