اسيرة قدرك

البارت 80

اسيرة قدرك..
بقلمي رسل..
البارت الثمانون..
واتباد rasolaa7

منو ذولة الصورهم ع الحياطين
سألني المـايعرف بديرتي شصار
بجيت وكتله ذوله وجوهنا البيض
وبواجينه وحزنه ووحشت الدار
وراهم فرغت من الضحكة البيوت
على فكد وجوه غابت عن الأنظار
عاين عالصور ياهو العليه موت
ومنو بيهم بوجه مبين انضار
تره وليداتنه بالموت حلوين
ومن الجفن حكها العاشكة تغار
دفناهم رغم كل الخصل سود
وعطر بيها الجناسي بحقل الاعمار
على الحيطان بيها وجوهم روح
وقطعهم عبره تكسر وجه الحجار
صورهم جا مشت لولا البسامير
وجا كل صورة منهم راحت الدار
راحوا لكن على البال يبقون
لحـد يوم القيامة ترابهم حار..

الشاعر ايهاب المالكي..

طلعت بعد مافرغت كل حزن بيه
شكيت
وبجيت
ونخيت
واني كلي ثقة بيهم لانهم الوسيلة الي نتقرب
بيها لرب العالمين..

-جان مهاب واكف ينتظرني طلعنا وهو اخذني
لمطعم وجبرني اكل.. نورهان لا تهدين حيلي
كافي عليه فضل لا تخليني احير بيج الخاطري
اكليلج شيء..

-اكلت بدون نفس ما اكدر استلذ بطعم الاكل
واني ابني هيج حالته بس انقهرت على مهاب
لان خطية انتهى وهم صدك بيمن يحير بيه
لو بفضل الي هد حيلنا..

-رجعنا من كربلاء للمستشفى ونفس القلق
كم يوم وكتبوا خروج لابني لان حالته شوي
تحسنت الحمد لله..

-بس جنت مقهورة من سمعت بي ضمور بالدماغ من طلعنا للبيت بوست بنتي وشميتها ووديتها
امانه يم ريا كتلها لما تتحسن حالة فضل
لان هذا يرادله مدارات وما اكدر عليهم اثنينهم..

-بعد اسبوع بدينا نراجع بي أطباء لان مع الاسف المستشفى الصاحي تموته بقينا نجيك وضعه
اكثر من طبيب وجان كلامهم مطمن النا.. بانو لا عنده ضمور ولا شيء من هالحجي مجرد  التهاب أمعاء قوي وكالوا بالعلاج يتحسن..

-جنت فرحانه كلش حتى مهاب احس نفسيته
تغيرت من اطمنا عليه اهتمينا بعلاجه نسهر عليه الى ان رجع حبيبي ابو ضحكه اتشكرت من اهل البيت مقصروا واستجابوا دعائي وما ردوني
بيوم الي نخيتهم بكلب مفرفح كلب والدة محروك
على ضناها  طول هل فترة مهاب خطوه بخطوه ويايه مايوم ذب الوم عليه ولا خله احد يغثني كال هذا قدر ومكتوب..

-تقريبا شهرين بقت منسه يم ريا اني اروح
اشوفها طول ذيج الفترة اما نومتها وكل
شيء يخصها متكفلة بي ريا الي مداريتها و مدبدبه صايره ريا حبيبتي افضالها عليه هواي
رغم حياتها ومشاكلها بس من واحد منا يحتاج
شيء اول وحدة توكفلنا..

-اسر هم خطيه كلش تعلق بيها بحيث ريا
تحجيلي تكول اول ميجي من دوامه يركض عليها
والبنات هم تعلمن على وجودها يمهم
اجه اليوم الي اخذتها منهم وكسرت خاطري
ريا الي تبجي وحاضنتها..  خليها يمي
والله تعودنا عليها..

-اسر حجه وياها واني هم كتلها اجيبها يمكم
يلا فكت شوي وخلتني اخذ بنتي وارجعها
الحضني بعد شهور من التعب بس
الحمد لله عدت هالايام وجهالي بخير ومهاب ما مقصر لا وياي ولا وياهم..

-حياتنا مستقرة والسبب انو خالاته مبتعدات
عنا وهو هم من ذاك اليوم صار حذر منهن
مرت الايام وبعد مرور تلاث سنوات على خطوبة ناز هنا بيت عيالي مخبوصين بيها
وهي وقتها مخلصته على تحضيرات العرس لان
ما بقه شيء كلها 15 يوم ويتزوجون وبطلب
من وليد الي بعد مكدر يتحمل كاللهم آخر سنة جامعة اخليها تداوم يمي بالنجف ومحد جان
معترض لان حقه خطوبتهم طولت كلش..

-بهاي الايام كثرة جياته على ناز لان بدوا يحضرون الجهاز وبيوم جنت بايته يم عيالي طلعت للحديقة وابتسمت على منظرهم جان حاضنها ويبوس براسها يردد هالكلمات.. والله ناز واكع بيج وبحبج الدرجة انه بصفج واشتاقلج احسج حيل بعيده شسويتوا بيه هاي بس
انه خطوبتي هالكد طولت رجع باسها.. ما مصدك كم يوم وتصيرين بغرفتي وبحضني وتنورين
دنيته لوليد..

-كحيت خفيف لا يروح الاخ يتماده هو ابتعد عنها والتفت حجه بضحكة.. ابد مو وكتج ست نورهان قطعتي ام اللحضه علينا..

-ضحكت.. هو انت تشبع لحضات يلا عيني
رايحة الله يخليكم البعض..

-طبعا ناز ووليد شكد لايكين البعض وليد شخصيته قوية وهيبة ومن يباوع على واحد
يتوسعن عيونه ونظرتهن حادة
الولد الله يشهد ثكيل كلش وحقها ناز من ترفع
راسها بي ما يوم شكت ناز منه دائما تحجي
بي بفخر هو خطية ما  قصر عليها من الخطبة هو متكفل بمصاريف جامعتها ما قبل عيالي
يصرفون عليها يكلهم هاي مرتي وشنو تحتاجة
تاخذه مني ما دامها بالشرع مسجلة باسمي..

-طول هالفترة هو يمنه ضحك وشقه ويا مهاب ومهاب يحبه هواي علاقتهم قوية لان وليد
دومه قريب من اسر ومهاب ودائما هو يمهم
يطلعون يتونسون سوا ينجمعون خصوصا بفترة خطوبته لان صار هواي يتردد على بيت عيالي كلما ينزل مجاز حتى يروي شوكه من محبوبته..

-وره خمس ايام هو صادف يمنا اتصلوا عليه  وطلبوا يلتحق رغم هو جان مجاز اجازة
عرسه بس جان التحاقهم ضروري واجباري لمدة اسبوع واجب  بالموصل وهو ضروري يتواجد جان توه فرحان لان ترقى رتبه جديدة شكد حاول وياهم بس ابد ما قبلوا واصروا الا يجي سمعت هالشيء من مهاب وانقهرت عليه خطيه فرحان يجهز وذول كطعوا اجازته ومو بس هو لا كم واحد من جماعته هم طالبينهم..

-مهاب اخذه وطلعوا يتونسون قبل لا
يلتحق بالليل رجعوا وصادف اسر وياهم وزيد
انجمعوا بالحديقة وضحكهم  وسوالفهم  محد
بيهم نام بهاي الليلة تعللوا للاربعة الفجر..

-ناز جانت مقهورة كالت.. نورهان شوفي  وليد حتى ضحكته بقهر ما يريد يعوفني اجهز وحدي شكد خبيثين كطعوا واهسه من خابروا يعني
الا هسه يطلبونا..

-شغله يا عيني حجيتها وكمت وياها نسويله
ريوك بس هو ما راد واترخص كال وراي
طريق للنجف ومناك التحق لان الزي وغراضه هناك..

-طلع ورجع مرتين سلم على مهاب ورجع
على زيد بعدها كلبه ما انطاه يشوف دموع
ناز وراه رجع عليها وهاي جانت اول مرة يسويها ويحضن ناز كدامهم هي تتوسله ميروح لان
تريده يطلع وياها يكملون نواقص عرسهم
هو باس عيونها.. مو بيدي حبيبتي هذا شغلي
وما اريد  اخسره بقى يوصي بيها ويلا
كافي بجي شنو اول مرة التحق احسبي بالساعات
تلكيني يمج وعلي  انه خلص صبري واني منتظر اشوفج بالبدلة واخذج من هذا اخوج الغثه..

-مهاب كام عليه.. كافي لك عاد استحي
كول اخوتها كدامي ارجع للنجف طلعت عينك
هنا وانتي كافي مشكله صونده بعيونج هي كلها
اسبوع ويرجع..

-اخر شيء قبل لا يطلع باس راس عمتي.. بروح ابوج عينج على ناز منا لما ارجع اني استلم
المهمة عنكم هي ضحكت وناز تباوع عليه
بحب سلم وطلع واكيد ما خله الموقف من
نصبات مهاب عليهم هي شبعت بجي هو
الظاهر سمعها رجع عليها.. شبيج ولج لا
تفاولين عليه جني رايح وما ارد وراي طريق
لا تفاولين عليه بهاي دموعج..

-هي حجت بلهفه.. اسم الله ليش تحجي هيج
باس راسها وعيونها وطلع..

-من بعد ما راح بوجهنا للنوم احسها اطول
ليلة والفضل المهاب ووليد الي ما خلوا
واحد ينام من سهرهم وونستهم وعبالك اليوم العرس..

-العصر صعدت يم ناز شوي واتصلت بينا
سرور واستلمت ناز تحشيش جانت فاتحه
الصوت واسمعها تكلها.. ولج ناز شسويتي
بخوي اعترفي وين مسويتله سحر يمشي ويحجي بيج ناز يا ناز وحتى امي وصاها  عليج لا تزعليها بكلمة وكل شيء بنفسها اشتروا..

-ناز جاوبتها بخجل.. غير حبيبته واستاهل
ولي سحر شنو مو اني سرور وذيج ناصبه
عليهم وخلصتها وياها تحجي بالقلم العريض
وبيوم العرس هيج يسوي بيج اخوي وهو
متحلف يكسر ضلوعج من شوكه سدته ناز يلا خلصت منها..

-اتصلت عليه هو جاوبها..  شويه ونوصل لا يضل بالج واخاف تنكطع اخباري يعني منكدر نفتح اجهزتنه لان هناك شبكات ضعيفه وهم
ما يخلونا..

-التفتت عليه.. نورهان خايفه عليه الموصل
اوضاعها تخوف..

-الله الحافظ لا تفاولين على الولد كومي كملي
شغلج ما بقالكم شيء..

-مرت يومين وهو ماكو ناز كلبها نار
صارت تجهز بدون واهس لان بالها يمه..

-بالليل دخلت عليها للغرفة جانت تحضر جنطها .. ها ولج راح تعوفينه راح اشتاقلج
الله يسعدكم ويترس حضنج جهال..

-حضنتني.. لا اجيكم هواي ما اخليكم تشتاقون وليد كال بس كولي واني اجيبج عليهم..

-بديت ارتب وياها لان الجنط لازم يودوهن
هناك لبيته والزفة تصير هنا هي فتحت الكنتور
وطلعت قاط كلش حلو.. نورهان هذا حلو اختياري وحسيته يطلع بي حلو هو انطاني
القياس وكال اريد البس على ذوقج ما شفت
احلى من هذا وبعد ما ادري جبته حسب كلامه ما ادري جبير صغير..

-يجنن ولج هو ينلام من كالج على ذوقج
اروح اخلي مهاب يشتري قاط قبل لا يكسره
رجلج حجيتها بضحكة هي كالت.. لا عيني
هالمرة رجلي يكسرهم بجماله..

-سكتت شوي وحسيتها مهمومة سالتها شبيها
هي كالت كلبي مقبوض نورهان على
وليد ماكو صارله يومين والله ميته على صوته
حتى كرهت شغله من يروح كلبي يروح ويا..

-بعدني ما جاوبتها دك هو ضحكت.. ابن الحلال بذكره بلا هذا شمدري نحجي بي هي جاوبته بلهفة..

-الو حبيبي يمه ياصوتك رد العافية الي
ليش هيج تسوي بيه.. هم بدوا يتغزلون كمت.. قبل لا تنحرفون خلي اكوم احسنلي..

-هو الظاهر سمع صوتي حجه بضحكة.. نورهان يرحم اهلج عوفيها ترى تشوفيها اكثر مني و
اني اغار بويه انتم يمها وانه هنا مربط بس
خلي ارجع واخليكم  تتحسرون  على شوفتها..

-ضحكت وسلمت عليه وطلعت هي نص ساعة
واجت وراي مبتسمه و فرحانه غمزتلها.. ها
سمعنا صوت الحب وتعدل المزاج..

-فدوه اروحله هو غير طاير من الفرح
وما مصدك بس هالكم يوم وننجمع كل شوي وسالني كملتوا كل شيء شناقصكم حبيبي
فكره يمنا..

-خلصنا تحضيرات وكل شيء كمل ما ناقص غير وجود وليد الي دخلنا انذار بسبب تاخيره   يومين عن موعد نزوله وطول هالايام
هو لا يتصل ولا الولد يحصلونا كلما يدكون
يطلع رقمه مغلق..

-عصريه مجتمعين ونسولف بس ناز خطيه عيني عليها فاصله وكانو ما كاعدة ويانا رغم احنه هم بقلق بس سرور جانت متطمنه كالت دوم هيج يختفي لان من تصير عمليات عدهم ما يكلبون
اجهزتهم ودومه وليد هيج قالقنا..

-شوي ودك موبايل مهاب رفع خط واسمعه يحجي ويا الطرف الثاني.. وعليكم السلام سأله منو وياي وضل يحجي ويا من كمل تنهد براحة
كال هذا صديق وليد منطي رقمي وليد يطمنا عليه
قبل لا يطلعون واجب لان ميكدرون اثناء الواجب يفتحون الموبايل وهو الي طلب مني اتصل
عليكم واطمنكم عنا وان شاء الله يومين وينزل..

-مهاب ارتاح و ناز فرحانه لان اطمنت
الصراحة دخلنا انذار من اتاخر وما يتصل
بس الحمد لله من سمعنا هو بخير..

-كمنا نسوي عشه وبيت عمتي صاير هوسه
من الخطار لان اهل وليد اجوي البغداد قبل يومين يم بيت كرايبهم بس مهاب وعمتي عزموهم اليوم على العشة..

-التمينا لمة فرح تعشينه ومن كملنا شغلنا رحنا الغرفة ناز احنا البنات التمينا شغلن اغاني و يركصن ونتفق شنو نلبس والمكياج
بلحضة هاي الفرحة اختفت والضحكة انطفت من
سمعنا  صرخة هزت اركان البيت طلعنا
نركض والخوف والقلق مسيطر علينا لان
نعرف كلش زين صاحبة هالصوت وهالصرخة
الي طالعة من ام وليد..

-دخلنا عليهم و انصدمنا من ام وليد الي وجها احمر ومبين ضاربه عليه عيونا عليهم بقلق
وكانو كلوبنا دك عدها انذار الشؤم
ناز حجت بخوف..  شكو عفيه شبيكم
عمه ليش تعيطين..

-الصدمة الكبرى اجتنا من سحبها الحضنه
مهاب وباسها براسها بقوة حجه بكل قهر.. وليد راح خوية ناز وليد أستشهد..

-هو حجاها وضج البيت بالبجي خواته
ملخن روحهن وصراخهن يفتت الحجر
امه تكسر الخاطر انتهت مصيبة وحلت عليهم ما باقي كم يوم ويفرحون بي تالي يزفونا للمقبرة
ليش شنو ذنب امه الي انحرمت من شوفته بقاط العرس
شنو ذنب محبوبته الي تعد يوم يوم بس
حتى ينجمعون وتكمل فرحتهم
والاهم هو شنو ذنبه يذبحون احلامه و يذبحونه
وهو بعمر الورد..

-عيني على ناز ودموعي تصب من سمعت الخبر وهي كلمة ما نطقت ولا صرخت الصدمة خلتها
بس دموعها تنزل البيت غيم بالسواد بس أصوات الحزن تتعالى الي تفطر الكلب ليله انكلبت
علينا من لمة فرح و تخطيط عن عرسهم
الى حزن وشلون راح يجيبونا وتشوفه امه
والحبيبه..

-ثاني يوم طلعوا ولدهم واسر ومهاب يستلمون  الجثث لان مو بس وليد الي استشهد وانما
اربع شباب ويا مستشهدين أثر كمين ناصبينه
الهم الدواعش الله يلعنهم..

-كم ساعة ودخلوا اسر ومهاب الي وضعهم
يكسر الخاطر بتابوته للبيت هنا ما ضل واحد
ما شبع بجي لحظات صعبة كلش صعبة
والله خلوا التابوت الي جان ملفوف بعلم
هي شافته امه لو تخبلت شبعت بجي عليها
وادعي الله يصبرها اني طفل كم شهر ابني
وانتهيت عليه شحال كلبها وهي تكبره وتتعب
عليه تالي تلوحه ايادي الغدر والكفر وتقتله
وتقتل فرحه امه بي..

-تكابلن كلهن عليه
امه
خواته
ناز الي شمرت روحها على التابوت وتحجي ويا وعبالك يسمعها تبوس بالتابوت.. كوم وليد
كوم يجذبون عليه رادت تفتحه مهاب ما خلاها حضنها ودموعه تنزل وياها..

-امة تخبلت فتحت التابوت شبعنا بجي من شفنه وليد وجهه بياض يشع بس جان بياضه
على صفار لان دمه خلصان
شهكت بقهر على حال امه وناز وحالته هو
الي جان مبتسم وكانو نايم والله ولا كانو جثه..

-ناز فقدت كوه وخروها حال اسر ومهاب
يذبح من القهر اسر دنك عليه باس راسه.. انكسر
ضهري والله كسرت ظهري بهاي نومتك
ردت ازفك يخوي مو ادفنك وبس اجتافه
تختض مهاب نزل باس راسه رجعوا غطوا
وشالوا التابوت..

-ناز ركضت وراهم.. لحد ياخذه رجعوا
رجعوا وليد مهاب فدوه لا تاخذه بعدني ماتهنيت بي وليد ليش عفتني وينه وعدك تحجي وتبجي
بجت الكل اهله طلعوا ويا يرجعون للنجف
وهالمرة ابنهم مو وياهم مجرد جسد منتظر
مكانه الاخير..

-ناز اصرت تروح من شافوا حالتها اخذوها
هي لبست صايه على السريع ونزلت والقاط
مالته بيدها اباوع لمهاب ذب حسرة تهدم
جبل كلها راحت مهاب مقبل اروح بس بقيت اتوسله لخاطر ناز شلون اعرفها بهل وضع
لان انقهرت عليها جانت حالتها حالة..

-هو يخاف على الجهال ما قبل كتله يم ريا وماما يبقون يمهم فدوه عاد اقتنع ريا حضرت غراضهم وخابرت فارس يجي يأخذها هي والجهال
لان بيتنا فرغ..

-اسر مو بحال احد حتى ميحجي صدمتة
وحالته حالة الفاكد اخو رحنا وياهم كعدت
يم ناز الي سانده راسها على الجام وتباوع على تابوته الي مزينه العلم ودموعها
تنزل وتحجي بكلام ما مفهوم من وره شهكاتها
والقاط ما ذبته من ايدها مخليته على كلبها..

-وصلنا النجف وتحديدا بيتهم وهناك لكينه اصدقائه تارسين الشارع ومحضرين الموسيقى
وكانو فعلا اليوم زفته دخلوا للبيت و دوا تابوته بغرفته اباوع خطيه فرشتهم البيضه مفروشه وعليها جكليت وشكد معتني بالغرفة جمالها
ياكد بانو هاي غرفة عرسان..

-هنا ناز تخبلت وصراخها ملأ الغرفة وهي
تعاتب بوليد.. وليد ارجع مو هاي الغرفة الي تجمعنه ليش انت ما بيها ليش استعجيلت
ارجع اموت بدونك والله..

-سمعنا صوت الموسيقى طلعنا امه
شالت صورته وناز قاطه وربعه زفوا
بس زفة تختلف هالمرة الزفة يم رملة علي
وهالمرة ترقيته ماكو اعلى منها ارتقى لربه شهيد..

-اخذونا وكوه قبلوا لان جماعته كلها جانت
حاضرة والشارع انترس زلم وهم نفس القهر مجلبات بتابوته وبجي كوه بعدوهن عنا
ناز كامت تاخذ تراب وتذبها علو رأسها
بجتنا كلنا وياها كوه سندها مهاب وطلعنا
وهي تصيح لا تعوفونا وحدة..

-مرت سبع ايام نفسيتي تحطمت وياهم ناز بغرفة عرسها طول ايام الفاتحة مطلعت من بعد
السبعة رجعنا البغداد وهم حبست نفسها دوامها قرب بس مالها نفس شيء اجلت هالسنه بدت الناس تجي تعزي وهي بس بجي مخلصتها
ابوها كام يتردد يجي يمها هي كلش متعلقه بي
وما كدر يعوفها اجه عليها وهي حضنته وشبعت
بجي وهو ما بيده شيء غير بس يصبرها..

-مرت الايام واجه الاربعين وهم راحت للنجف تزوره ونفس الكلام ونفس المعاتب ليش عفتني كوه سكتناها رجعنا البيت اهل وليد الله يرحمه
ناز راحت للغرفة وما نسمع بس الشهكات
والمعاتب..

-ثاني يوم تحضرنا نرجع ناز بقت تشم بملابسه اخذت جنطة صغيرة وخلت بيها محبسه
وشغلات تخصه ومن ضمنهن الرتبة مالته
وطلعت بس قبلها ذممت عمتها بانو تنطي
كل شيء يخصه وحتى الغرفة تنطيها بثوابه..

-رجعنا بس جنه خايفين ومستغربين ناز بعد ابد ما بجت بس تصفن وعيونها حمرة وكانو حابسة دموعها..

-مر كم شهر على استشهاد وليد وبهالفترة
يلا شوي بدا يرجع وضع مهاب الي جان
منتهي عليه طول هل فترة اني قافله بيتي ويمهم ناز شوكت ما افوت عليها تقرأ قرأن وتصلي ومرات كلش قليلة اسمعها تبجي خفت عليها
حيل اتذكرت شصار بيه من كتمت بداخلي
دخلت يمها..

-ابجي حبيبتي طلعي حزنج ترى وليد يستاهل
دموعج لا تكتمين وتتمرضين هاي اخوج
رجال ومن يدخل للغرفة يشبع بجي..

-هي كالت لا ما ابجي وليد ما يقبل ما اريد
ازعله ولا اذي كلبه..

-استغربت منها هي كالت اني حلمت بي وره
الاربعين كاعد بحديقة جبيرة كلش واني يمه بس ابجي هو مسح دموعي وباس عيوني.. مو كافي
بجي ليش تأذين كلبي بدموعج..

-اني ما اريد اذي نورهان هو يحس بيه
ويعرف اني ابجي عليه نزلت دمعتها غصب
مسحتها حضنتها.. الله يصبرج حبيبتي
هنياله شهيد..

-نورهان اني وعدته بيني وبين نفسي ما ابجي اريد ابرد كلبي وكلبه بالتمسك بالله تعرفينه
هو شكد جان ملتزم اريد امشي بطريقه حتى
الله يصبرني ولو ادري لو اشكد اصبر ميرجع بعد.. سكتت وما اعرف شحجي ما عندي
غير الدعاء الله يصبرها..

-اليوم مر سنة ونص على استشهاده ناز
تمسكت بالصلاة والقران ودوم تهديله اهله
بيتهم طفه لان جان شمعتهم
اما اني نقسمت نصين بين بيتي وعيالي
مهاب صار هواي يتودد عليهم وهم خطية
ناز نروح يمها نغيرلها جو..

-بالليل اندك الباب وتفاجانا بجيه عمي
ابو مهاب والي فاجانا اكثر من عرفنا انو
جيته على ناز ياخذها ويا لان راح يسافر
للاردن و يستقر هناك..

-رحت عليها.. شلون ولج تعوفينا ليش
تردين تعوفين امج وتروحين بالغربة
هي كالت..

-نورهان المن ابقى واني اخو وليد صار فترة يلح عليه.. انتي امانة وليد وما تروحين الغريب
رايدج مرة الي حتى اذا بس عقد المهم ما
تاخذين واحد غير وليد وهو نفسه بيج....

يتبع....

اقروها واهدوا ثوابها الشهداء العراق
ولروح بطل البارت وليد ( الاسم الحقيقي
فراس) اعتذر عن الحزن بس هذا حق
الشهداء علينا..

بِسْمِ اللَّهِ الرَّحْمَنِ الرَّحِيمِ
الْحَمْدُ لِلَّهِ رَبِّ الْعَالَمِينَ
الرَّحْمَنِ الرَّحِيمِ
مَالِكِ يَوْمِ الدِّينِ
إِيَّاكَ نَعْبُدُ وَإِيَّاكَ نَسْتَعِينُ
اهدِنَا الصِّرَاطَ الْمُسْتَقِيمَ
صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلاَ الضَّالِّينَ

صدق الله العلي العظيم

صاحب التوقع الصح

اللهم صل على محمد وال محمد❤️