اسيرة قدرك

البارت 75

اسيرة قدرك..
بقلمي رسل..
البارت الخامس والسبعون..
واتباد rasolaa7

يالمكابلني
وين مشرد عيونك..

-كلامه اذاني هواي نزلت راسي وابجي
فزيت من صوته.. بسرعة  تلمين غراضج وجيبي بناتج وتعاي وهناك اعرف شتصرف وياج..

-امسح بدموعي وارجع ابجي مقهورة وهاي
المرة من نفسي نزلت من السيارة هو ما نزل
كال بسرعة جيبيهن وتعالي دخلت للبيت
ماما بس شافتني اجتي عليه حجت بخوف.. ها شبيج امي ليش تبجين منو وياج لا توكعين كلبي؟!..

-ليش يعني متدرين مو جان يمكم..

-باوعتلي مستغربه.. منو ولج يمه احجي عدل..

-اسر منو غيره حجيتها هي كالت.. لا اجه ولا شفته من طلعتي واني كاعدة هنا وين جاي
بعد..

-تنهدت اكيد هيج حجه حتى يوكع المديرة بالكلام يعني تمارة مصخمة وجهي الحقيرة..

-الم بغراضي ودموعي تصب خايفه منه حيل
حتى ما عندي القوة اتخيل شلون يعاقبني
اخاف يجرم بيه ومحد يخلصني من ايده شراح يخلصني منه..

-ماما من شافتني ابجي كالت فهميني شكو
ليش هيج حالتج شسوالج؟!..

-بديت احجي الها شلون جنت اطلع بدون
علمه واكلها بعلم اسر وشلون اشتغلت بالروضة وهم بدون علمه احجي و اخلي الغراض بالجنط..

-هي ما قبلت عليه والصراحة هواي جانت
اتاكد عليه من اطلع ريا بعلم رجلج
ريا رجلج يدري بيج واني اي وكتله هيج
خلصتها هسه يلا ندمت ردت اقوي حالي
واحس بروحي قوية تالي طيحت حضي بيدي..

-هي رزلتني وبقت تلومني.. ليش هيج يمه
ليش هيج سويتي بروحج ياما حجيت ونصحت وأسألج تكولين اسر يدري مستحقه هاي الدموع هاي المرة ولج يمه ملعونه المرة الي تطلع وما
تنطي علم لرجلها واني اكول هاي العاقلة
ليش هيج سويتي بنفسج..

-اسمع كلامها وما اتحملت اني منا تعبانه
وفكري وقلقي كله يم اسر وكلامها زيدها عليه.. كافي يا امي مو انتي وهو عليه راح انفجر
والله كافي الله يخليكم اي اني حقيرة اي اني
تستكثرون عليه الطلعة بس عوفوني مليت..

-هي انقهرت عليه وصتني الزم بيتي ومن يصير
عصبي اسكت وما احجي شيء كالت لان حقه بس انتي لا تحجين شيء وتخلينا يتخبل عليج..

-ان شاء الله حجيتها وطلعت خليت الغراض وهو كاعد نفس كعدته صعدت البنات وره مخليت
ماما تطلع اخاف تسمع حجايه منه صعدت وطول الطريق ساكتين لا هو حجه شيء ولا اني
وهدوءه هذا خوفني كلش..

-وصلنا للبيت مبين جوه ماكو احد لان الباب
مسدود وحتى ماكو صوت باوعت عليه من كال.. اصعدي حضريلي الحمام..

-رحت وهو شال البنات ويبوس بيهن ويشمهن وهنه يسولفن ويا حضرت الحمام من طلعت
هو دخل واتقرب يمي اني كلت هذا هو راح يضربني اصلا تحمل هواي بسرعه خليت ايدي احمي وجهي.. اسر الله يخليك والله بس افهمك..

-مد ايده و وخر ايديه حجه ببرود.. ما اضربج لا تخافين تدرين ليش لان مليت منج وحتى الضرب ما يفيد بيج بعد انتي وحدة صلفه وحتى مكانه
بكلبي الج ما ضلت بعد الي سمعته عنج..

-لو اضربج يمكن اثبت حبي الج واكول من حرصي وغيرتي وخوفي وحبي الج بس ذني متستاهليهن المرة الي تسوي الي براسها
وما تحسب حساب لزلمتها هاي مو بس ملعونه لا هاي **** وهسه اخذي غراضج من الغرفة وروحي بغرفة بناتج وجهج ما اريد اشوفه بالغرفة..

-كلمة ما كدرت احجي بس دموعي تصب
لو ضاربني ولا اسمع منه هالكلام سكت شوي
ورجع كمل..غير اكل وشرب وخدمه لبناتج
كل شيء ما اريد منج..

-زدت بالبجي ردت احضنه.. اسر مو هيج
خلي افهمك ما خلاني اكمل دفعني قوي..لا تفكرين ابد تتقربين يمي كتلج لعبت روحي
منج حجاها ودخل للحمام..

-كعدت بالكاع ابجي طلع من الحمام اخذ جهازي فرمته ونام واني محتركه حرك كمت يم البنات
نومتهن ونمت يمهن ليله مرت عليه مثل السم
استحقرت نفسي لان هو قابل شمدري ردت
اقوي حالي ردت اسند نفسي حتى يحسبولي
حساب هو واهلي بس ما توقعت هيج يعاقبني..

-مرت الايام واني يم البنات بعده كلش اذاني وجفاه عني جرح كلبي كل ليلة اكول هسه يسامحني هسه يجي ويخليني بحضنه ونرجع
مثل قبل صرت اشتاقله ومرات ابرر حقه
مرات احجي واكول قاسي وكل الي صار بسببه بس هو وين قافل ولا حتى يباوع بشكلي..

-عقابه هذا كلش جان ثكيل وحسيته قسه
هاي المرة عليه وعلى روحه كم مره بالليل
احس عليه يفتح الباب واني اسوي نفسي متغطيه ونايمة واشوفه يصفن عليه ويتنهد ويطلع
يكابر هواي وشلع كلبي..

-فترة وتمرضت صوتي اختفى كلش من القهر وكلامي صار بس اشارة عباله اجذب عليه
سوه نفسه ما مهتم بيه بس من شاف فعلا
صوتي انتهى احسه احترك حرك بس ما يبين
كل هذا وهو مستمر بعقابه..

-طلع العصر من رجع جايب علاج وحليب وعسل خلاهن يمي.. هاج وهاي الخاطر بناتج محد الهن روحي فوري حليب وعسل واشربي
خلي يرجع صوتج وكوميلهن لا تهملين بيتج
وتهملينهن..

-انقهرت كلش واني هاي الفترة كلش حساسه ابجي على اقل شيء نزلت دمعتي مسحتها
وكمت اخذت علاج ورجعت هو ماكو مددت
يم البنات والقهر ذابحني انقهر منه واكول ما اريده بعد خلي هيج احسن بس كلبي الحقير
يحن اله كلش..

-مر شهر وميحجي ويايه ابد اني بمكان وهو
بمكان عمتي كل هاي الفترة بالنجف يم أخوها
وهو ما يقبل يسامحني ولا يسمع مني اعرف
تمارة خبيثة واكيد زيدت وهيج خلته يكرهني
يروح للدوام يبقى ايام صوته ما نسمعه ولا
يتصل بس يدز نورهان ومهاب يجيبون مسواك ويباتون يمي ومن يرجع من الواجب كبل يسبح وينام بدون حتى ما يسلم..

-اهلي منعني اوصل يمهم كل شيء ولا يسمع مني جملة اريد اروح لاهلي وحرمني من الطلعة وحتى عباية لبسني عقاب على طلعاتي من جنت
اكشخ واروح للروضة هاي المرة حاربني حرب نفسيه لو ضاربني احسن من هل عقاب
لان هالعقاب جديد عليه من اسر..

-مرات اشتاق لاهلي اتوسل بي هو يعذبني
بجوابه.. الي يشتاقلج من اهلج يجي يشوفج روحه ماكو افتهمتي الي يريدج يجيج من البيت
ما تطلعين انتي..

-صرت اتعقد من معاملته كلش حتى روحي
كرهتهه ابجي بصوت وادري بي يسمعني
بس ميهتم وكعت كلش مريضة هو احسه يراقب وضعي من انام يشوفني مصخنه العلاج
اشربه اجباري بعدما اترزل منه وصياح.. ما جبته ينشمر اشربي بساع عناد بطلي بعد
شسوي بيج وانتي نفس اعنادج اشربه وما اجاوبه اصلا ما يسمع مني واني كوه احجي صوتي
صح رجع بس اتعب احجي ويا وهو هيج ما مهتم..

-وره كم يوم نورهان اتصلت عليه تهدي
بيه هي تعرف بحالنا شوي وكالت.. ريا عرفت منو جان يوصل كل شيء لتمارة وهاي
الحقيرة تنقل لاسر..

-منو حجيتها هي كالت هاي خطيبة اخوج مخليته كل شيء يحجيلها عنا وتمارة الحقيرة هي
الي طالبة منها هيج وكايلتلها اساعدكم واسوي
عرسكم احلى عرس بس تسوين هيج وتنقلون
الي شيصير بالبيت بغيابي..

-ضحكت بقهر.. هاي تبقى طول عمرها حاقده
وبابا طلع عينها واني اكول اخوج سوه نفسه حنين و يسأل وخطيبته تخابر سرى طلعت وراهم بليه ينقلون بالتفصيل..

-هي كالت خلي يولون طيح حضهم عمر
سرى فتنت عليهم يمه وهو اتعارك ويا ما راضي على تصرف خطيبته وحتى غالط عليها لان
بعدها ما داخله بيتنا وهيج تسوي وتخطط..

-تنهدت.. يلا بلا هو منو الي ما طيح حضي
وطلع عنده ثار وياي منين اتلكاها من اختج
من مرت اخوي الي بعدها ما اجت وطاح حضي
بسببها هي وتمارة لو من هذا الي محاربني
على اقل شيء والله مليت..

-خطية هي ضلت تهدي بيه كالت اتحملي
ميخالف ترى يحبج والله والحمد لله ما عرف
بموضوع الشقة وصديقة سرى جان بس
الله خلصج منه..

-حجيت بخوف.. اي والله جان هالمرة متت
على ايده ربي ستر انتي اسكتي لا تفلتينها يم
احد لا يطيح حضي اكثر من ما هو طايح..

-حجينا شوي بعدها حجت بجدية.. ريا انتي
هم خلي يصير درس الج الي سويتي لا كل شيء ورجعتي عليه وتقهرينه ترى عجبني موقفه
رغم كل الي صار بينكم هو ما انطه بيج يم اي بشر ولا كال هيج سوت من ورايه تصوري حتى لعمتي ماحجه وكاللهم رحت رجعتها زعل حبايب مراد يخلي صورتج تنهز يم احد يموت عليج لحد الان ميحجي ويا خواته وامه زعلانه منه وراحت لااخوها ومهاب لو ما يوكعله توسل علمود يحجي ويا هم يبقى مكاطعة بس يعرف هو شنو بالنسبه لمهاب ومهاب ينتهي اذا خاله
كاطعه متعلق بي كلش
يريد يسويلهم درس محد يدخل بحياته لخاطرج هيج يفكر لا تغثينا فدوه ريا انتي مو تكولين
تعبت اتحملي ترى والله يحبج كم يوم ويرجعج
لحضنه بس انتي صبري عليه وعلى كيفج
ويا نفسج..

-حجيت بقهر.. ولج بس لو يحجي ويايه ما اريد شيء موتني القاسي صرت اسمع أخبار رجلي منكم انتو صرتو اكثر مني تعرفون وين يروح وشنو قراره اتجاه اهله والله احبه ومن انام بعيده عنه ادمر بس هو كلبه قاسي عليه هسه اني
شكد تحملت ما يتعلم مني شوي ويتحمل مو
والله تندمت بس ما يخليني افهمه..

-تهون ويرجعج بحضنه بس اصبري من خوفه وحرصه عاقبج حتى لاتكرريها.. تحجي
وسمعت صوت.. نورهان اجه يلا اروح سديته ركضت سريع ما انتبهت جان اعثر برجل التخم ورجلي لتوت كلش اتأذيت خرب بحضي
حتى عقلي شارد من وراه ياريت يستاهل
حاير بس يعاقب..

-انفتح الباب شافني بالكاع وافرك رجلي
اتقرب يمي كنبص.. شبيج ريا شبيها رجلج؟!..

-من شفت لهفته وخوفه كلت هاي فرصتي علمود يرجع يحجي ويايه وهم اصالحه منا اني مقهورة والدمعة بطارف عيني واريد بس ابجي هو
حجه هيج نزلت دموعي بوجع وصرت اشهك..

-ليش البجي هسه غير افهم توجعج؟!..

-تركت رجلي ورفعت راسي عليه.. اي توجعني..

-هو فركها الي ويحجي عليه اكيد لازم اترزل..ابويه انتي اكو احد راكض وراج حتى مشي متعرفين تمشين تهبدين منا ومنا شبيج
صغيرة انتي غير تنتبهين؟!..

-ضجت كلش حجيت بكلبي كله من وراك
غير ركضت ووكعت كمت اعرج هو كام
وياي لزم ايدي كومني وسندني اخذني للجرباية.. لا تكومين راجعلج..

-من رجع بيده عصارة من عصاراته خلاها على رجلي ويفركها بشكل دائري انقهرت كلش
شلون هيج كدرت استغفله وهو هالكد يحبني
ما ينلام بيه بكل الي سواه..

-نزلت دمعتي و ذبيت نفسي بحضنه حضنته
بقوة..كافي سامحني تعبت والله احس نفسي وحيدة ماعندي احد احجي ويا ما عندي غيرك لا
هيج هيج تقسي وياي كافي عاد سامحني اسر
مو قصدي هيج اسوي واذيك..

-هو ضمني بصدره ضعت بي عبالك مخلي
عصفور صغير بين جف ايده كال.. هذا الي
سويته لان احبج ردت اسويلج درس لان مستاهلته
كل ليله هناك جنت افكر طلعت واحد شافها لو ذب الها كلام خاف عمر ضوجها واحترك من وراج تالي طلعتي داومين ومخليتني وره ضهرج
ولا جن مرة متزوجة ليش هيج سويتي ها ريا ليش بشنو مقصر وياج لو بس تردين تقهريني..

-شد شعري بقوة ويبوس بقسوة..قسم بالله اذا كررتيها ادخل بيج سجن وانهيج اذا فكرتي مرة الثانية تسوين شيء من دون علمي
أخذني لحضنه بكل شوك ولهفة
خله راسي على صدره ونتعاتب وعدته ابد
ما اعيدها واعتذرت منه هو باس راسي وهمس..

-ادبسز جن معاقب نفسي مو معاقبج لج كل
يوم جنت اجي ابوسج وابقى صافن عليج ساعات اريد اخذج بحضني ما اكدر انام اذا مو انتي
هنا ياشر على صدره وراسج يخلي ايدي تنشل من الخدر بس من اتذكر حركة كلبي اطلع
عيديها وشوفي ريا هالمرة اجنزج خاف هسه
رحمت بحالج..

-بسته.. هسه مو صرت حباب شكو تهدد
اعذرني اسر ما تنعاد ابد..

-باجر طالع للنجف اجيب امي صارلها هواي هناك وماخذه على خاطرها مني..

-ضجت وخفت خاف ترجع عليه وترزلني
ما حجيت شيء شوي وكتله.. اسر ضايجه ومشتاقه لاهلي سوالف بالتليفون متكفيني اشوفهم بعيني اريد..

-ماكو روحة شكلت اني مو كلت اهلج
ممنوع تروحين الهم يردون هم يجونج..

-بسته بشفته وصدره وتوسلت بي بالبداية رفض بعدها كوه قبل.. الصبح اذبج يمهم بس ليلة وحدة تبقين..

-فرحت كلش.. ميخالف بس خلي اشوفهم
كمت ردت احضر حلويات لاهلي هو صاح
وين ولج مو رجلج توجعج؟!..

-ابتسمت.. امشي على كيف وعندي باندج الفها
رحت للمطبخ سويت كيك ومعجنات وعزلتهم
هو دخل حضني.. شنو هالريحه لعد مالي حصه بس اهلج..

-التفتت عليه. حبيبي انت الكل بالكل حصتك عزلتها انت والبنات..

-باس خشمي.. معدلة ام مهرة..

-سويت جاي وكعد ياكل كل شوي بايسني
وهو فرحان اكثر من تصالحنا ردت اكله
لعد ليش هيج عاقبت روحك اذا هالكد مشتاقلي بس خفت لا يرجع يعاقبني ويطيح حضي اسري
واعرفه مو مال شقه كملت شغل ورجعت نمت بين ايديه..

-الصبح حضرت نفسي والبنات ذبني يم اهلي وراح لامه شوي واجه اخوي كال لماما حددت عرسي شهر الجاي امي فرحت وباركتله
اني جنت متجاهلته لان ضايجة منه ومن خطيبته هو باوعلي.. ام مهرة حضري نفسج العرس اخوج..

-ان شاء الله شايف كل الخير حجيتها وكمت
سمعت منهم فارس باجر يطلع خطية علاجه
طول وحتى نفسيته تعبت بس الحمد لله من
بدا يخلص من هالسم الي ادمنه جسمه..

-طرت من الفرح رحت الغرفته نضفتها
واحس الكاع ما واسعتني من الفرحة هواي
انتظرنا هاليوم اليوم الي نشوف فارس بصحته..

-اتصلت على اسر هو جاوبني.. ها ريا خير..

-اسر حباب فارس باجر يطلع واريد اروح
اجيب كم شغلة اله من السوك.. من حجيت
هيج ويا انقهرت من ردت فعله ضل يصيح
عليه ممنوع وابد ماكو طلعة قفل عليه كوه
رديت عليه هو الظاهر حس بيه ضجت
وفعلا كلش ضجت ليش هيج يسوي سديته منه
واني مقهورة..

-ساعة ورجع اتصل.. يلا روحي بس تاخذين امج وياج مو وحدج..

-لا خطيه متكدر على فرة السوك ما اريد
اروح بطلت.. هو حجه بحنية.. ريا حبيبتي
عبالج ما اثق بيج وامنعج لا وعيونج كلي
ثقة بيج وحتى من عاقبتج حرص عليج
لان اخاف عليج وهسه بلا عناد روحي بس
احد يروح وياج..

-فرحت بكلامه كل شيء ولا يشك بيه واني
والله صح طلعت واشتغلت بس مستحيل اباوع
على غيره لو افكر احجي ويا رجال غير اسر
واخلي يشك بيه كتله لعد اخذ ام سجى وسرى
وما اطول..

-هو وصاني عباتج مكياج قطره ماكو وحلفني فعلا مشيت على كلامه طلعنا ودخلت محل ملابس اعرف ذوق فارس اشتريتله هواي شغلات واخذت لاسر هم بعدين دخلت محل عطور بنية جانت بالمحل اختاريتله عطور وساعة
البنية جانت لسانها حلو ولبق ضلت تشاقه
كالت.. اكيد لزوجج لعد شكد تحبينه..

-لا لاخويه.. هي ضحكت الله يحفظكم وبقت تسأل انتي متزوجة وزوجج شيشتغل وهواي
سالت اثناء الحديث سمعتها سلمت على واحد هلو عمور وين هل غيبة..

-التفتت ونشوفه عمر هو بسرعة خزرنه نطلع دفعت الحساب وطلعنا هو اجه ورانا شعدجن تفرفرن هنا؟!..

-ام سجى كالتله.. اهو شنو هو تحقيق غير
هذا سوكنا قابل مين نروح نشتري عفنا ورجعنا وهو عصبي شلون طلعنا مدري لان هاي
البنية تكله عمور هي تاهت عليه..

-ثاني يوم تحضرنا بفرح الجيه فارس حبيبي
شكد مشتاقتله عمر حضر ذبيحة الوجه
الله لسلامة فارس اجه وماما طايره بي طشت جكليت عليه وتهلهل..

-دخل للبيت شبكته وابجي ضعفان هواي
جان بس الحمد لله شكله متعافي وهواي احسن
كام راد يسبح راح الغرفته رجع علينا.. هاي
منو كالب الغرفة وشهالتجديد..

-بمناسبة سلامتك ويوم الي اجهزها العرسك
روح ارتاح حتى نشوفك تكعد يمنا هو باسني
من راسي وراح يسبح..

-عيني وراه شكد فرحانه بي ياربي الف حمد
وشكر الك دك جهازي جان اسر رفعت
خط.. ساعتين واجيج حضري روحج..

-اهلي مسوين عشه بسلامة فارس وعازمينا
نتعشه ونروح فدوه..

-ميخالف جاي سديته منه شوي واجت نورهان ومهاب بعدها اجه اسر سلم على فارس وتحمدله
بالسلامة جان هذا احلى يوم كل احبابنا متجمعين..

-الا سرى موطبيعة وجهه بس يضحك
كل شوي وصفنت جنت مراقبتها وهم خفت
لا عمر يشوفها ويطيح حضها اخذتها للغرفة.. شعندج ولج بس تتمضحكين جنج عاشكه
انتبهي النفسج لو شايفج عمر يطيح حضج..

-شكو هو شنو يطيح حضي شبيج ريا شتحجين انتي..

-تعرفين شحجي سرى شكو ترى منتبهتلج
لا عبالج ضليت احقق بعد ما لحيت عليها
هي كالت ريا احجيلج بس وعد واحلفج
ما تحجين..

-وعدتها بس ردت اعرف اختي شبيها وجنت
خايفه من شيء هي كالت.. ريا حبيته احس
ما ادري ليش بس والله حبيته رغم كل حجينا
من باب تعارف وشيء عادي يسال واجاوب
بس اني حبيته بأسلوبه خلاني انشد اله..

-صحت بيها.. هو منو هذا الي حبيتي
وهو بس يسالج لو كايلج احبج شتصخمين ولج سرى شبيج..

-ضحكت.. ولج الضابط هذا الي دعمته
اوف كون هسه ابوس شهد الي خلتنا نطلع نتراجف وصار هذا كبالنا..

-حتى اشك حلكج بس ترجعين لشهد
لج الله سترج منها وبعدين لا تحلمين هواي
عوفي سوالف الحب كافي مردتي رجله
نوب تردين توكعين مدري توكعين الرجال
انتبهي سرى انتي مو صغيرة لا تثقين بالناس
بسرعة ربج مرة يسترج ومرة ينطيج درس
والله اخاف عليج يريدج يجي يخطبج ماكو
ديري بالج على نفسج..

-بقيت احجي وياها سرى عدنا بسرعة تثق
ومتهورة لهذا نصحتها اخاف عليها وبعد
بلكي تطلع احسن من نورهان وتسمع مني
رغم ذيج شكد حجيت بس ما اخذت بكلامي
دعيت الله يسعدها ويسترها وطلعت لان
اسر صاح عليه نروح..

-لميت غراضي وطلعنا صعدت بسيارة.. امي اجتي واريدج داريها وتخليها بعيونج وجبت سمر يمها ديرن بالجن عليها..

-بدون متوصي بعيوني..

-وصلنا رحت يمها باوستها بس سلامها كلش ثكيل الظاهر جايبها كوه لكيت سمر خطيه تعزل البيت وهاي هم انقهر عليها ما كعد حضها
واحد لعب عليها والثاني دمرها ودمر روحه
وتالي ما عدها غير ابنها الي مونسها ومرات
تجي يم بيبيتها..

-فترة وصار عرس اخويه حضرت بوجود اسر جانت زفه حلوة واهلي فرحانيين بي وهالمرة
فرحتنا غير ما جان اكو مشاكل وفارس بصحته
لهذا احس فرحتنا جبيرة من بعد العرس كم
يوم وسافروا وامي فرحانه الهم..

-مر كم شهر واحنه عيشتنه هاديه مشاكل
ماكو الحمد لله اسمع حجي من عمتي واحسها
تضوج مني بس اغلس لخاطر اسر وكلت اكسبها باي طريقة المهم اخلص من المشاكل وهم اسر
يحبها وهيج يرتاح..

-اسر بين الدوام وبين البيت حياتنا هاديه
لان حمواتي ما يجن علينا مرتاحة من هاي
الناحية لان ماكو قلق ولا افكر بمصيبة من
وراهن كم يوم واندك الباب..

-رحت فتحته وانصدم بشوفة....

يتبع....

اللهم صل على محمد وال محمد❤️