شفاه مخملية

Part 51

♛ ♛ ♛ ♛ ♛ ♛ ♛ ♛ ♛ ♛

بارت طويل لعيونكم الحلوة♥️.

"شفاه مخملية" 💋

بقلم: زهراء السلامي.

هجران وهيَّ تصف عُثمان:
هو مُختلف ، لايشبه شيء ،
رزين،نادر،حنون،يُضيء روحي ،
يحمل بداخله مَزيج رهيب من الطفولة والابوة ..
مِن الدهشّة والحنيّة،
أشعُر معه بالأُلفة ، بالانتماء ، بالامان ..بالطمأنينة
ولك أن تتخيل حجم إختلافه🤎.

♛ ♛ ♛ ♛ ♛ ♛ ♛ ♛ ♛ ♛

گعدت ؏ اثر قُبلات خفيفه مصحوبه بنغزات شاربه، چان حاضني من خصري ولازگني بي گوة دا اتنفس، ضحكت واللتفتتله..

-عثمااان شبيييك

-عُثمان: اخخخ الله

صار يبوسني كل مكان ويدغدغني واني اضحك..

-هجران: اغاار هههه اغااار والله ههههه

-عُثمان: يله گومي وياي

عگدت حاجبي مستغربه..

-وين؟

همس بأذني خلاني اكت عرگ من المستحه، عاندت ومقبلت اگوم وياه..

-گووومي يوليي

-ماااا استحييي

-شَنو هذا المستحه؟ ينوكل ينشرب

-انته بَـس تفكر بالاكل

-ليش اكو شي احلى من الاكل ويله لا تغيرين الموضوع گومي

ضحكت خجلانه وغطيت وجهي وگلت..

-مريومه نايمه ماگدر اعوفهه..

-عُثمان: ناايمه ناايمه يلله

فجأة وماحسيته اله حط وحده من ايديه جوة رجليه والثانيه جوة خصري وشالني واني ملفلفه بالفرشه استحي اوخرهه، اخذني للحمام واني اعيط واضحك..

ربع ساعه واجانه صوت مريم تبچي، طلعت اركض عليهه وشعري يقطر مي..

-هجران: شفت گعدت وچانت تبچي

-عُثمان: حبيبتي عادي هيه طفله اكيد تگعد تبكي

-مو هاي امانه عُثمان

تقرب باسني من راسي وگرص خد مريم خفيف وگال وهوه يباوعلهه..

-عُثمان: اريد منهه

رفعت راسي اباوعله چانت ابتسامه خبيثه مرسومه ؏ ثغره، ضحكت من غمز بعينه ورجع باسني من راسي..

راح للكنتور يبدل ملابسه واني انطيت مريومه مميه ورجعت غفت ونيمتهه بمكانهه، رحت اسشور شعري حتى ينشف، منصيه السشوار اخاف الصوت يگعدهه..

تقدم عُثمان عليه ووگف ورايه وحط ايده ؏ چتافي..

-عُثمان: احسِك تعبانه

-هجران: لا ابد

-اكيييد؟

-اكيدين هههه

ابتسم وهز براسه وطلع من الغرفه، غيرت ملابسي وطلعت وراه، شفته بالمطبخ فاتح الثلاجة ويبحوش بيهه..

-هجران: شنو تحب تتريگ؟

-عُثمان: أي شي

-ماشي انته روح اگعُد يم مريم خاف تگعُد واني اسويلك ريوگ

-ماشي

راح واني اللتهيت بالريوگ، گعدت غزاله والجهال لسه نايمين، اجت تساعدني واني حضرت الاكل ؏ الميز، حسيت بيهه تباوعلي وتضحك ماعرف شبيهه..

-هاا غزل شو تضحكين

-غزاله: لا هيچ

هزيت براسي ورحت حتى اصيح لـ عُثمان، چان گاعد وصافن ؏ مريم، ضحكت ؏ شكله وگلت...

-هيچ تحب الجهال

مجاوبني واكتفى بأبتسامه، گام ويايه وتوجهنه للمطبخ وغزاله ماهيه، عفته گاعد ؏ الكرسي واني رحت اصيحلهه، شفتهه گاعده بغرفتهه وبيدهه لفه وكوب چاي..

-هجران: غزاله ليش گاعده هنا وحدچ؟؟

-غزاله: تريگو سوه انتم انه ماعندي شي بَـس اكل لگمه واگعد اقره

-خو چان اكلتي ويانه

ضحكت خفيف وحچت بغمزة...

-اكلو براحتكم

حسيت الحماوة صعدت بخدودي، عزاا خاف هاي سمعتنه البارحة؟ اووف عُثمان شسوويت لعبت بيه لعب وفضحتنه، عفتهه ورجعت للمطبخ وگعدت ؏ الكرسي البصفه، سأل ؏ غزاله گتله تريد تقره بَـس لسه غاطه بنص هدومي من الفشله..

سوه لگمة وحط بيهه جبن وجوز ومدهه الي، ابتسمت وحطيتهه بحلگي واني سويتله نفس الشي وماقبل اله اني احطهه بحلگه..

-هجران: هههه عثماان ااخخ ليش تعض اصبعيي

ضحك وكملنه ريوگنه وهوه كل شويه متحارش بيه، ساعه يبوسني ساعه يگرصني موتني هههه..

-اگولك اليوم تسوگ للعزيمه ماشي؟

-حاضر

-يعني اكيد يجون اصدقائك ؏ العشه؟

-اي هيك گالو

-ماشي وشنو تحب نسوي؟

-بكيفِك تحبين تطبخين او اجيبو من بره كلو براحتِك

-لا لا اني اطبخ اريد ارفع راسك ويشوفون مرت عُثمان نادره

گلتهه ونزلت راسي خجلانه، گرص خدي وهمسلي..

-قربانِك أنَا

گام يغسل وراح للغرفه يبدل واني كملت ريوگ ووگفت انظف المطبخ وارتبه، شويه وشميت عطره القوي يقترب، وكف ورايه وحضني وحط وجهه برگبتي وشمني، همس...

-محتاجة شي؟

ابتسمت وغسلت ايدي من الشامبو واللتفتت عليه، صرنه وجه بوجه واني رافعه راسي كُلش لانه اطول منيي بهوااي..

-هجران: لا سلامتك

جر ايدي وحاوطت رگبته وباسني ؏ خدودي ونزل لرگبتي وعضهه خفيف..

-ههههه عززاا لا حباااب

ضحك خفيف وحك ارنبة خشمه..

-عُثمان: ما تفتحين الباب لأحد مثل ماوصيتِك

-حاضر

-يله مع السلامه

-الله وياك عمري

همست كلمة "عمري" ماعرف ليش بَـس ماردته يسمعني اگوله هيچ، طلع واني استلمت البيت تنظيف ماخليت غزاله تمد ايدهه ؏ أي شي لان خطيه گاعده تقره للسادس..

گعدو الجهال وريگتهم وگعدتهم بالغرفه يلعبون ومريم هم صارت تبچي شلتهه ادگدگلهه واهز بيهه، للظهر واتصلت بيه جوري..

-هلووو شلونج حياتيي

-جوري: زينه شلونهم جهالي هجران

تحچي بغصه ومبين گوة حابسه البچيه..

-زينين والله هياتهم يلعبون بالغرفه ومرتاحين الحمد لله ومريم انطيتهه ممه ونيمتهه

-جوري: هجور عليج الله عينچ عليهم حموت اني

-اسم الله يروحي لتگولين هيچ بعدوينچ ان شالله

-جوري: سوده عليه شلون هَلّي اعوفهم واروح

-جوريي كافي بچي حبيبتي ادعي الله يصلح حالكم وترجعيلهم وترجعين تعيشين بسعادة ويه رجلچ

سكتت وصوت بچيهه واضح، انمرد گلبي عليهه.. ودعتني وگالت العصر تفتح كام وياهم وتشوفهم..

ضميت الموبايل ورجعت انظف وانوب رحت اسوي الاكل، ردت كلشي مثالي وكلشي انيق ومرتب، حضرت الصحون والفواكه غسلتهم وحضرتهن ورحت ارتاح..

اذن المغرب وعفت الجهال يحچون ويه جوري ورحت اصلي، كملت صلاتي ورجعت للمطبخ چانت غزاله واگفه ؏ الطباخ تسويلهه گهوة..

-هجران: غزاله برأيچ هذا الاكل كافي؟

-غزاله: شمسويه انتي؟

-هجران: سويت نواشف مليت من التمن والمرگة واحس موطيب بالليل يوغف ؏ الگلب

-غزاله: بَـس حنه متعودين ناكله بالليل

-اي بَـس خلينه نغير شوفي سويت لازانيا وسمبوسه وكُبب وكباب عروگ وزلاطات ومقبلات شتگولين؟ اسوي تمن ومرگة هم؟

-لا خيه خلص ماطول انتي تردين هيچ تسوين هذا هوه ماعليچ بيه

-مو اخاف افشل عُثمان ويه جماعته!!

-لا شني السالفه خير من الله مسويه ويله هم ياله نلحگ نگلي

-اي ماشي

طلعت الطاوات ووگفنه نگلي بالساعتين، مسويه هوااي لان همه سبع نفرات وعثمان وعميد يعني تسعه، گظيت الوكت اگلي وساعه اثرم وساعه اروح اشوف الجهال ومريم تلوع وتبچي ماعرف شبيهه..

حارت بيهه غزاله واني حسيت روحي تحولت روبوت بَـس ميخالف اهمشي اللحگ..

وبين ما اني بهالجحيم واگفه واتصبب عرگ من الحر اجه عُثمان..

-سلام عليكم

-هـلوو عُثمان هاا اجو جماعتك؟؟

-اي بالديوانيه گاعدين

-ماشي انته روحلهم بالاستقبال واني مابقه شي واكمل العشه

گال الله ينطيچ العافيه وطلع، كملت كلشي وصبيت الاكل وهوه اخذه، رجعلي عباله اكو بعد واني بهتت بوجهه وگلت...

-هجران: بَـس هذا سويته

-عُثمان بأستغراب: ما مسويه تشريب لحم؟

-لاا مو شوف اني ماردت الاكل مثل كل عزايمكم وردت فد شي غير

صفن بوجهي ثواني وهز راسه ورجع للاستقبال، متت قهرر وصرت اللوم بروحي اني شبييه ليش من وحدي اتصرف واني اعرف همه بكككل عزيمه لاااازم لحم بيهه لاازم عبالك شي وااجب..

-غزاله: هجران بسچ تلومين برويحتچ هسّ شكوو شصار

-اوووف فشلللته اهمداانيي

-لاا خيه شسالفه وين الفشاله دشوفي الاكل ماشالله

-والله حسيته ضااج من مسويت لحم اني شبييه ومسمعت حچايتچ اووف شگد غببيه

-بسچ يا عيني شني هسّ انگلبت الدنيا خليهم يغيرون وينقشون بالاچل شني بَـس لحم وباچه ومادري شنهي

هزيت براسي واني بالي وياهم اخاف صدُك ميعجبهم ويحچون عليه، كملو وطلع عُثمان يشيل المواعين ويجيبهم للمطبخ، رحتله اركض وهمست بصوت ناصي لان ادري بي يتخبل اذا احد سمع صوتي..

-هاا حبو الاكل؟

-اي عاشت ايدكي

-عليك الله عُثمان لتضحك عليه حبوو يعني ماحچو عليك؟؟

-يُبا شكو يحكون عليه الاكل كثير طيب وعجبهم كلهم

طررت من الفرح وركضت اسوي چاي وگهوة وقررت اكمل ؏ الطريقه الي ببالي، طلعت فناجين صغار ومواعينهن وياهن وچبت استكانات وكُلهن حطيتهن بصينيتين..

حطيت قندول بي شكر وخاشوگه مذهبه حلوة بنصه وجبت اصابع ككو وحطيتهن ؏ مواعين الگهوة، وصبيت الگهوة سويتهه ؏ الطريقه الاحبهه "گهوة وشويه نسكافه وحليب وچكليت"..

حضرت صحن بي شكرات ومعجنات وصحن ثاني بي البقلاوة والزلابيه والباميه..

رتبتهن كلهن وصبيت الچاي بالترمز وصحت لـ عُثمان يجي، من شاف الصينيه ضحك وحط ايده ؏ لحيته..

-عُثمان: شَنو هالترتيب

-هههه اني گتلك ارفع راسك اليوم

ضحك خفيف وهز راسه، اخذهن الهم وراح جوة، تأخر الوقت ياله طلعو واني نيمت الجهال وگظينه الوقت كله اني وغزاله نرتب ونغسل المواعين، اخييراً خلصنه بعد تعب هد حيلنه بَـس طلعنه بنتيجة حلوة..

سمعت اصواتهم بالطرمة ومبين ديتوادعون ويسلمون ؏ بعض، دخل عُثمان للبيت والابتسامه ؏ وجهه، راح لغزاله باسهه ؏ راسهه وتشكر من عندهه واني تشكرني هم بَـس ماسوالي مثل غزاله، نوعاً ما ضجت وحسيت بأحراج..

رحت للغرفه وبوجهي للحمام سبحت ووگفت جوة الدوش اريد ارتاح بالمي الحار، كملت ولفلفت روحي بالبرنص وطلعت، چان عُثمان واگف ؏ الميز وبيده الموبايل يگلب بي..

-هاا محتاج شي؟

-عُثمان: سلامتِك

گالهه وعيونه لسه ؏ الموبايل، اخذت ملابسي وبدلت بالحمام وطلعت لگيته متمدد ؏ الفراش وايده ؏ شواربه يبرم بيهن وسرحان..

گعدت بصفه ؏ السرير وگلت..

-وين بالك؟

دار عيونه يباوعلي ابتسم وحچة بغمزة..

-وياكيي

گالهه وجرني لحضنه، حط راسي ؏ صدره ويمسد بشعري المبلل..

-هجران: اخاف اضوجك شعري مبلل

-چؤؤ عادي

-عجبك الاكل اليوم؟

-كثيييير عاشت ايديكي الحلوات

رفع ايديه وباسهن، استحيت ونصيت راسي ورجع رفعه..

-عُثمان: تعرفين شَنو گالو جماعتي؟

-شگالو؟

-گالولي هنيالك واضح ام بيتك مرتبه ومنظمه

-صدُك والله هيچ گالو؟؟

-طبعااً خو اللزانيا تخبلو عليهه

-هههه اي شفتهه رجعت خلصانه

-عاشت ايدكي هجر گلبي

ابتسمت ورجعت حطيت راسي ؏ صدره، ضحكت من صار يتحارش بيه ويبوس و.....

(ديلا بيباااي😄👋🏻)

گعدت الصبح وهوه مو بصفي اووف حركته خفيفه وماحس عليه من يگعد ابد، گمت للحمام سبحت وبدلت ملابسي ورحت ؏ المرايه امشط شعري وعطت بكتمه...

-هجران: عزااا بعينييي شمسوي بيييه

اباوع لروحي بالمرايه ولرگبتي واثار حُبه مرسومه عليهه، همزين ربي ماطلعت گدام غزاله وشافتني هيچ..

لفيت ربطه ؏ رگبتي وطلعت چانت غزاله واگفه تغسل مواعين الريوگ..

-صباح الخيير شنو تريگتي ويه عُثمان؟

-غزاله: صباح النور اي گبل شوي طلع

-هجران: ممم

تريگت ورجعت للغرفه وزينب وعلاوي اجوني، ريگتهم وسبحتهم ورحت لمريم جانت بيد غزاله تدگدگ ؏ ظهرهه..

رحت لغرفتي ونمت ؏ بطني ورفعت رجليه واتصلت بي، رن رن رن وجاوب..

-هجران: هلاووو

-عُثمان: يا هـلا بـ گلبي

-شو اليوم محسيت عليك من طلعت

-شسويلِك انتي تنبل مال نوم

-عزاا اني تنبلل

-هههه اي

-لا والله مو تنبل بَـس شفت مريم البارحة كم مرة گعدت وتبچي

-اي اي حبيبي امزح وياكي أنَا

-اممم زين ورگبتي هم تشاقه وياهه

ضحك بقوه لدرجة اجتاحته نوبة سُعال، حچيت متذمرة..

-هجران: عثماان والله عيب من غزل بله شافتني بهالحاله شگول اني

-عُثمان: حبيبتي محد گالِك تصيرين ككو

-يااا اني ككو

-اييي

-هههه شنو هاااي لان سمرة طوخ هيچ تكوول

-الأشياء السمراء فاتنة دوماً كالقهوة والشوكولاتة وأحدهم

-اووويليي هاي شنووو

-احبُكي مخمليتي

گلبي صار يدگ، نصيت راسي وتخيلته گدامي، غمضت عيوني وجريت نفس عميق وقررت لثواني اگوله احبك وخربت اللحظة من گلت..

-هجران: تحبك العافيه

-عُثمان: الله ياخذني

-اسم الله شكوو

-جري يُبا جريي (روحي)

ضحكت بصوت عالي وطبگت الخط، شويه ودزلي رساله مكتوب بيهه..

"💬 أنَا گايلِك من قبل انِك شخصية مُختصة بتعذيب الذات"

ضحكت اقوى من قريت الرساله ومجاوبته، ذبيت موبايلي ورجعت لشغلي تغدينه وكالعادة هوه ميجي، اللتهيت ويه غزاله والجهال تابعنه افلام كارتون وياهم ولعبنه چنه مزعطه هههه..

لليل گمت اسوي العشه وحضرت كلشي ورحت ابدل ملابسي وغزاله هم عشت الجهال وراحت لغرفتهه..

گعدت انتظره وتأخر اليوم، ظل بالي دگيت عليه وهوه رفضه ووره شويه اتصل گال رح يتأخر..

گلبت وجهي ورحت اظم الاكل حتى عشه ماريد ازقنب، متت شنو هاي شمعنه هوه يشتغل هالگد ليش اله يرجع هلكان تعب ياله يرتاح فوگاهه الذبح كله عليه واوقات ياخذ شغل اخوانه هالموضوع كُلش زاعجني بَـس استحي احاچي اخاف يفتهم غير شي..

گعدت اتابع فلم اللتهي بي واباوع للساعه عبرت الـ 12 وهوه ماكو، نعست كُلش وتمددت ؏ القنفه، غمضت عيوني وماحسيت بعد اله ؏ طبگة باب الحوش القويه..

طفرت من مكاني ودرت اباوع للساعه چانت بالـ 1:30 هااي شنوو هسة ياله رجع!!

دخل للصاله وتفاجأ من لگاني گاعده...

-عُثمان: سلام

-هلوو

-عُثمان: مانمتي؟

-نمت وگعدت

هز براسه وراح للغرفه، نزع ملابسه ودخل للحمام.. حظرتله المناشف وحطيتهن بباب الحمام حتى ياخذهن..

تمددت ؏ الفراش واني افكر شلون افاتحه بالموضوع واگوله ديشتغل كُلش هواي وهالشي ممقبلول ابد وبعيد كل البُعد عن العدل!!

طلع من الحمام وراح يمشط بشعره ؏ المرايه، وگفت وراه وحچيت بصوت ناصي..

-تعبان؟

-اي كثير

-احم واخوانك هم يتعبون هيچ؟

اللتفتت يباوعلي وعاگد حاجبه مستغرب...

-عُثمان: مافهمت؟

-اقصد ان هم يشتغلون نفس شغلك؟

-مادري

گالهه وراح للكنتور لبس بَـس ملابس داخليه وراح ؏ الفراش، گعدت بصفه ورجعت گلت..

-شلون متعرف وانتو بنفس المحل؟

-لا أنَا اشتغل بالمحل الجديد

-لعد مو عدكم عمال ليش انتو تشتغلون؟

-اكيد بَـس لازم نشرف عليهم

-لعد شمعنه انته التذبح؟

اندار يباوعلي بَـس واضح ضايج او ماعجبه كلامي...

-عُثمان: هجران لوين تردين توصلين؟

-ليش تشتغل هالگد؟؟ ليش تهلك روحك هيچ منو يستاهل؟؟؟!

رفع تك حاجب وركز نظره عليه، گال بنبره حاده...

-عجل من كنتي تشتغلين ببيت اهلي ليل نهار وتاخذين شغل بقيه البنات المن كنتي تشتغلين؟ منو يستاهل؟

-ايي اني ندمانه ؏ كل هذنيچ الايام

هدأت نبرة صوتي ولزمت ذراعه وهمست...

-هجران: عُثمان انته هواي تتعب واني منتبهه تشكي من ظهرك يوجعك اي ليش عميد الدين ميشوفك متأذي يقبلهه هوه؟

-عميد مايدري

-شلون ميدري؟

-لان صارلو فترة مايجي للمحلات ابد

-لان ملتهي بالديوان

-اي

-زين انته حاول ترتب وضعك وشغلو عمال اكثر عُثمان اني كُلش اتأذة من اشوفك بهالحاله، لا تجي ؏ الغده وتجي متأخر تالي الليل تعبان مابيك حتى تحچي، والله مو زين عليك هالأذيه

ابتسم وگرص خدي، جر نفس عميق وحچة بهدوء...

-ماردت اگلِك اله يكمل كلشي

-شتگولي؟

-أنَا وعميد الدين تشاركنه بالمحلات

فتحت عيوني متفاجأة، گلت بفرحة غمرت گلبي...

-صدُك تحچي!!! هاي من شووكت؟؟؟

-ههههه ماتوقعتِك هيك تفرحين

-شلون مافرح عُثمان هالشي كُلش زين ومعناتهه خلصت من الانبار ونقلت كل شغلك وممتلكاتك هنا موو؟؟

-لا لسه عندي كم شغله بَـس كـ شغل اي كلشي هينا وانا هالفترة گعد اشتغل مضاعف تا ارتب كلشي واريدو يكون كلشي مثالي، اوظف عمال جدد واوسع مشروعنه واذا مشى كلشي تمام والله رزقني يمكن اگدر اتشارك ويه عميد الدين بمحلات بغداد تدرين هجران شَنو معناتو هذا؟؟

ضحكت فرحانه وگلت من لا وعي...

-معناتهه ان ظمنت مستقبلنه ومستقبل اطفااالنه

ضحك وهز براسه، جرني گعدت بصفه وحاوط چتفي بذراعه، سندت راسي ؏ چتفه واحتل الهدوء الغرفه لدقايق، حسيته نام وهوه گاعد، رفعت راسي اباوعله ضحكت وندغته بچف ايده ؏ كيف..

فتح عيونه وحرك راسه بمعنى "شنو"..

-هجران: نام عُثمان انته تعبان

هز براسه وجرني، وگع جسمي ؏ الفراش ونام ؏ صدري، ابتسمت وحبيت اللعب بشعره..

همست..

-هجران: عُثمان انته رجال

ماجاوبني عرفته نايم فَـہ استغليت الوضع وكملت...

-انته رجال يعتمد عليه، ما انسى وگفتك ويايه من اخوك چان يأذيني ولا انسى وگفتك من زعلت ورحت لبيت اهلي وچنت تجي لبيتنه وتجيب لحم لان تعرف حالة بابا ضعيفه ولا انسى من احترگ بيتنه وشلت فلوس انطيت بابا..

بالبدايه عبالي بكر انطاه بَـس گالهه بوجهي ان هوه معليه وانته الي تصرفت، احب حنيتك وگلبك الطيب وشلون تعاملني وتحترمني، احب تعاملك ويه زنوبه وشلون صرتلهه ابو اكثر من ابوهه الحقيقي..

تدري عُثمان احس زينب متفطن ان بكر چان ابوهه وعبالهه انته ابوهه ماعرف شيصير بحالهه من تستوعب الموضوع وباچر عگبه من تروح مدرسه وتشوف وره اسمهه اسم "بكر" ويگولون عنهه يتيمه، يجوز تزعل او يجوز تتفهم الموضوع واني متأكده بالحالتين انته رح توگف وياهه وتكونلهه اب وحبيب وسند وظهر..

جريت نفس ودموعي صارت تنزل، شگد حاولت اللزمهن بَـس ماگدرت وخانني، بلعت عبرتي وكملت...

-اتمنى لو عرفتك قبل لا اصير لبكر، اتمنى انته ابو زنايب مو بكر، اتمنى انته اول رجال بحياتي مو هوه..

بكر الله يرحمه اذاني عُثمان اذى مخمليتك هواااي چان مصدر الّم الي واني چنت غبيه ومعمي ؏ عيوني وماشوف غيره واتوقع هذا الصح لان چان زوجي وحرام اباوع لغيره..

بَـس هذا ميمنع ان احافظ ؏ كرامتي واصونهه وماخلي احد يخدشهه حتى لو چان اقرب شخص ؏ گلبي، ياريتك حاضر من زمااان من زماااان عُثمان..

لو چنت زوجي الاول چان حطيتك بنص عيني وماقصر وياك ومتأكده انته تسوي نفس الشي لان گلبك طاهر، كلبك گلب طفل بعده عمره خمس سنوات وفاقد حنان الام..

طفل محتاج ام ومحتاج عطفهه، محتاج كلمه حلوة وهواااي اهتمام، اذو گلبك هواي ادري وتعبوه واستغلوه لمصالحهم وشغلوك گصاب تسلخ وتكسر عظم وانته عمرك ثمن سنوات..

گلتهه وبچيت بحرگة لدرجة شهگتي كُلش عاليه ورغم هذا ماگعد واضح نايم بعمق، استرسلت...

-ورغم هذا كبرت ودرست واجتهدت وتثقفت وطلعت من الاوائل وثبتت نفسك ووجودك وبنيت شخصيتك واضح شگد ولد خالك يحترموك ويهيبوك لاحظت هالشي من چنه بالانبار وشلون يزينون اسمك بـ "السيد" بَـس هم عدكم ميانه ويه بعض وسوالف منا ومنا..

ضحكت خفيف وكملت..

-شگد اني مُعجبة بيك وبشخصيتك وبذكائك وفطنتك، انته داهيه ههههه اي داهيه چنت تعرفني زعلانه من نظرات عيوني بَـس چنت متگولهه بوجهي وتتحجج حتى تطلعنه سوه احنه البنات وتاخذنه تفرفرنه حتى تغيرلي جو، ابد ما انسى من چنت حامل بزنايب وگتلي بالضبط...

"عُثمان: يگولون من الام دائماً زعلانه يطلع الجنين جميل واحس زنايب حَ تكون كثير جميله"

عرفت قصدك من گلتهه چنت تعني ان بكر هواي يزعلني وحبيت تهون عليه بهالكلمات، واي صح شوف زنايب شلون جميله ولا كأنهه بنتي..

اني اعترف چنت اشوفك نفس فاضل وابد ماتغيرت نظرتي اله باليوم الچنه ببغداد وشرحتلي عن سماري وشلون تغزلت بيه، تدري بوكتهه گلبي راد يطلع من صدري من قوة نبضاته..

وشلون چنت لازم ايدي وتتمايزهه كأنهه قطعه ثمينه، لو تعرف من يومهه واني اباوع لروحي بغير نظره، صرت اصفن ؏ روحي بالمرايه وأصف روحي بالمخملية وانته السبب..

جريت نفس عميق وحضنت راسه بين ايديه اكثر وغمضت عيوني واطلب من ربي الراحة لگلبه ولگلبي ويارب يحفظه الي ولزنوبه وميخيب ثقتي بي بيوم...

مرت ايامنه حلوة او بالاحرى عسل، مدللني دلاال يوميه عدنه سهره للصبح وامسيات شعريه وغزليه واوقات يداهرني وينغر بروحه، اني اضوج او امثل الضوجة لان ادري بي يتشاقه وهاي سوالفه حفظتهن...

چان واگف ؏ المرايه ويبرم بشواربه، گلت بحقد ممزوج بضحكة خبيثه...

-اله اگصصصهن من تنااام

-عُثمان: ضاغطينِك شواربي

-ضرتي احسهن افففف انزعج منهن

-عُثمان: تنزعجين وتزحفين عليهم هاي شلون رهمتيهه حبيبتي

-اففف مازحفففف مازحفففف

-عُثمان: اظن حتى خالتي صافيه من قرت كف ايدِك طلعلهه انِك واگعه بغرام شواربي

-هففففففف عثماااان

اندار يباوعلي ونظره خبيثه بعيونه، رفع تك حاجب وغمز بتك عين وگال...

-عُثمان: لازم تتعلمين عليهم لأنهم سر سعادتي

-هلووووو شواربك سر سعادتك!!

ضحك وهز براسه، رجع ؏ المرايه وشال المگص حتى يرتب گصتهن، زم شفايفه ويه بعض وركز عيونه حتى يجيبهن عدلات، ذب المگص وشال مكينه كُلش صغيره هاي خااااصه لشواربه المعقداتني..

صرت احوس صارله فوگ الثلث ساعه واگف ماطلعن شوارب، گبت عندي الحقارة ومادري منين اجت، گمت اتسحب ؏ كيفييي ووگفت بصفه اباوعله وهوه ولا يمه الموضوع حاير بيهن..

وبحركة سريعه ومفاجئه دفعت ايده وشردت لنهاية الغرفه وهوه عاط...

-هااااااييييي شَنوووووووو

-هجران بهمس: يبو يبو شسويت

نظرلي وخزر عيونه، گلبي صار يدگ بَـس ماتنازل لو اني لو شواربه اليوم، رجع للمرايه يباوعلهن ويشوف خاف تأثرن وحرمااات كلشي مصار بيهن..

رجع انظاره عليه ومضيگ عيونه وعاگد حاجبه، عطت...

-هجران: هاااييي شنو مصاار شييي

-عُثمان: شبييكييي وياااهم

-ماااحبهننن

-عُثمان: هجرااان لو صايرلهم شييي اموتتتتتِك

-تموتني علمووود شواربككك

رجع خزرني وانطاني ظهره، حسيته ضاج بَـس شسوي ماگدر اگوله شواربك حلوة وكُلش لايگاتله خصوصاً من يبرمهن برمة بسيطه وصراحة صايره اغار كُلش مادري شبيه تخبلت، همست...

-عُثمان زعلت؟

-عُثمان: جري هجران (روحي هجران)

-ماااا

-عُثمان: يولي اهجبي شوي

-انته هم صير عاقل وبطل هاي السالفه بشواربك

ظل يحرك بحواجبه بطريقه خبيثه عود يستفزني، گلبت وجهي ورحت للمطبخ، اتصلت بـ جوري ومتجاوب وارجع اتصل بـ ندى...

-وييينچننن حرگت الموبايل حرگ ومتجاوبن

-ندى: لچ ديتناقشوون والله وذابين مبايلاتنه

-گوليليي هسه شصااار تصالحوو؟؟

-ندى: لچ جوري متقبل اله يعتذرون وخليل ماات ماات

-هسة ليش متتنازل عاجبهه حالهه وبُعدهه عن جهالهه

-ندى: هجراان مع احترامي الچ بَـس انچبي جوريه تريد ترجع كرامتهه وكرامة اهلي!!!

-افففف مادري ندى ماادري

-ندى: لتدرين احسن وظلي هيچ عوبه

-احترمي نفسچ ندى والله الل....

قاطعتني وصاحت...

-ندى: باااي هجراان باااي رح تدخل جووري

-تعااي وانتي وين موليه؟؟؟

-اروح اشووف

-فتحيلي كامرا عليچ الله

-ندى: ياااء لچ تردين تفضحينه!!

-عليچ الله ندى فدوووه فتحيلي

طبت للاستقبال وقرب صوتهم وصوت عمو خليل كُلش واضح، فتحت كامرا ونزلتهه كُلش گوة مبينين، صحت بصوت عالي...

-هجران: لچ صعدييي الموبااايل خليني اشوووف، لچ لطمممة نددددى لچ صخااام اني اعلمممممچ

واني حايره اگمز واغلط ؏ ندى اجه عُثمان للمطبخ...

-عُثمان: شكو شبيكي يوليي

-عزاا عُثمان ديتصالحوون جوري وفيييصل

-واحنه شعلينه!!

-مااا اريد اشوووف

-يولي كضبي فضولِك شوي واهجبي

-ماگدر عُثمان مااگدررر

طول الوقت احچي ويه عُثمان وساده السماعه خاف صوتنه ينسمع، ظليت اباوع بالموبايل وگامت جوري وگفت گبال عمو خليل وصار يحچي وياهه بعدين جر راسهه وباسه..

اني شفت هيچ لو تخبلت صرت اگمز چني قرد واعيط...

-هجران: عااااااا اعتذرررر اعتذذذذر منهه وراااضااااههه كفووووو سببببعهههه بططططللللهه

عُثمان صافن عليه وطلعت غزاله ؏ اثر عياطي..

-غزاله: هااا شكو شني شصاار

-هجران: جوووري وفيصل تصالحووو وحيرجعوون

صارت غزاله تگمز ويايه فرحانه وتگابلنه وحده گبال الثانيه ونهوس واجو الجهال ويانه وعثمان بَـس يباوعلنه ويضحك، اخير شي فر بيده وطلع من المطبخ..

رجعت ندى اتصلت عليه وشرحتلي الصار بعدين، عمو خليل باس راس جوريه وحچة وياهه حچي حلو وسلمى هم بوستهه وگلتلهه الشيطان دخل بيناتنه وفيصل تگول لعَب لعب، فدييتتهه اختيي القويه النچرة، رجعت حقهه وحق اهلي!!

ذبيت الموبايل ورحت اگلب الگدر ورجعلي عُثمان...

-عُثمان: هجران وبسطالو للحمزة متنه جوع ارحمينا

-هجران: اي اسفه والله تأخر الغده بَـس بالي ويه جوري چان

تنهد وتقرب عليه يريد يشوف شطابخه، دفعته من صدره خفيف وهمست...

-مااا متشوووف

-عُثمان: لييش؟

-لان مسويه فد شي كُلش تحبه

ضيگ عيونه ورفع ايدي حاوطت رگبته، قرب وجهه ؏ وجهي وهمس...

-عُثمان: جوج احمر؟ (دجاج احمر)

-ههههه اييي مسويه دجاج احمر اكلتك المفضله

ضحك فرحان وباسني من شفتي، دفعته وحچيت خجلانه..

-فشله خاف غزاله تجي

-عُثمان: اووف يله مايهم بالليل اخذ حصتي

ضحكت وهوه اجه ؏ الگدر كشفه ويباوع الي بي، يستنشق البخار اليطلع منه ويگول...

-عُثمان:قربااانو للي تسويلي جوج

-لعد شلون اني ادري بيك تحبه

ضحك بَـس مال واحد فرحان، ابتسمت ؏ فرحته عجيب هالرجال لو اسويله اكله طيبه يطير من الفرح، لهدرجة ناقص حنان واهتمام الي يفرح هيچ فرحة بَـس لان مسويتله تشريب دجاج احمر!!

صبيت الغده وتجمعنه ؏ السفره واكلنه بهدوء مثل كل يوم، كملت لملمت المطبخ اني وغزاله ورحتله للغرفه..

چان بيده الموبايل ونايم ؏ ظهره، تمددت بصفه ونمت ؏ صفحتي اليمنه حتى اگدر اشوفه...

-هجران: عُثمان؟

-عيونو

-اليوم نروح لأهلك؟ اريد اشوف جوريه

-تدللي

-شكراً هواي

اندار يباوعلي وابتسم ولسه الموبايل بيده، ذبه ؏ الميز ورجع نام مقابيلي..

صرنه وجه بوجه وانفاسنه تتخالط من قربنه، همس وهوه يباوع لعيوني...

-عُثمان: ككو اريد ككو

-هههه ماااااا

-وجعاااا جوزي من هالكلمة

ضحكت اقوى وگلت...

-ماااااااا

-انتي ما مال واحد يطلب منِك تعالييي

جرني واني اتصارع بيدي واضحك وياه، وهوه يدغدغني ويگرص بيه تالي ثنينه هدأنه وباسني خفيف وتلت هالبوسه قُبلات اخرى واخرى...

دفعته عني وگلت بمكر...

-شواربك زعجني

-ليش؟

-هجران: ضوجني ينغزني

-عُثمان: كل هذا حتى اگصهم!!

-اي لعد ترضى حبيبتك تنزعج كلما تبوسهه

هز براسه وگال بحزم..

-عُثمان: ابشري بعد ما ابوسِك

-هااااايييي شنوووووو

-عُثمان بضحك: انتي مو تگولين تنزعجيين!!!

-عثماااان گصهنننن

-؏ گولتِك ماااااا

ظل يضحك بهستيريه واني مبوزه وگوة لازمة ضحكتي، جرني عليه مرة ثانيه وهمس بخبث...

-تعاليي مو فلتي انتيي

ضحكت وجرني عليه اكثر وطبخ قُبله ؏ خدودي ورگبتي ووووو.......

(تكرهون الـ "و" مووو يله هاي اطووول "و" 😈😂♥️)

**

-تعالي ولچ

جرني لصدره ويبوس بيه ويحضن شويه ويبچي..

-هههه بابه شني السالفه وين رايحة انه

-چا مو راح تعوفينه شلون يهلچ تعوفين ابوچ وترحين

-رهف: بابه انته مو تريدني اصير طبيبه وناجحة بالمستقبل يله هاا اهاا راح اروحن وارفع راسك وما ارد اله يصيحولي دكتوره رهف بنيت الشيخ عميد الدين

-والنعم منچ بعد ابوچ

-ديلا باباتي بسك شمالك متكّدر والدمعه بعينك

-عميد الدين: خاب دولي شني الدمعه بعيني هذا ياهو يبجي عليج

-رهف: لا لا محد هاي انه راح ابچي لان اشتاگلك

-شحدچ ما تبچين عليّ

-هههههه احبك باباتي

-يا رويحة ابوچ

حضنته وگعدت بحضنه مثل عادتي، لو يصير عمري ميه اظن مابطل هالعادة رغم حبوبه كلما تشوفني هيچ تجيلي بالعوچيه وانه اگوم بَـس گدامهه وارد اگعد بحضنه ونظل نسولف سوه ونتداهر ويه بعض وتجي جواهر كالعاده وتگول...

-جواهر: ايي داده بعد منو يريد جواهر ورهف يمه وتسولف وياه

-عميد الدين: ياا بوويه بدت الغيرة

-جواهر: لاا ابدد ما اغار ترا اني ابدد يعني

-رهف: ابد ابد شسمه هههههههه

ابوي طگ ضحك وانه وياه وهيه گلبت وجهها وراحت للحجرة، ابوي همسلي..

-بابه شمالچ وياهه تراهه حامل وصايره طگة ونص

چن سمعته من گالهه وعاطت...

-جواهر: انيييي عقلييي طگة ونصصصص عميدد الديييين

-عميد: لا بويه ياهو كال هاي جاي احجي ؏ مرجانه

-جواهر: ومرجااانه حامللل؟؟؟

-عميد: شني چا ماتعرفين حبلت هذاك اليوم

مضيگة عيونهه وتباوعله وهوه گوة حاصر ضحكته، گلبت شعرهه بطريقه غرور ورجعت للغرفه..

-رهف بهمس: بابه صدك عگلهه صاير طگه ونص شمالهه

-بويه هاي هرمونات الحبل

-يمماا الله يساعدك

-چا شسوي هاي بعد لازم نتحمل

يضحك ويحچي، گومني من حضنه وراد يروح بحجرته، وگفت وتخصرت وحچيت بخبث...

-رهف: هااا هااا هااا رايح تراضيهه مووو

قهقه بخفه ومسح وجهه..

-عميد الدين: انطمي وولي يله ماعليچ انتي

ضحكت عليهم هاي همه كل يوم هوه يداهرهه وهيه تبوز وتزعل ويروح يراضيهه، علاقتهم حلوة كلش وأي واحد يشوفهم ويشوف سوالفهم ويه بعض يگول هنيالهم ؏ هالعلاقة چن اصدقاء وواحد يخاف ؏ الثاني ويخاف ؏ مشاعر حبيبه..

رحت للمطبخ اشرب ماي واجتني عمه فتوح...

-فتوح: شنهي وينه ابوچ شو ماكو اليوم

-هستونه چنه نسولف وراح لحجرته

-فتوح: ايييي اكيد لجواهرر راااح

-چا وشكو غير مريته

-فتوح: وابو فاضل اكو إن بسالفتهم بَـس يله مابقه شي ويصير الاريده

-ياااء عمه شني شمالچ شتردين رحمة لأبوج

-فتوح: يتزوج نرجس ونخلص من هاي جوهرة الچحـ*** فاتحته بالموضوع واحسنه جاي يقتنع

-انتي من كل عگلچ؟!!!

-انطمي ماعليچ انتي ويله ولي عن چهرتي

همست بصوت ناصي..

-رهف: وعع اكيد اروح هذا ياهو يريد يگابل چهرتچ

-فتوح بعرامة: هاااييي شنييي شگلتيييي ولللچ؟؟؟ عمييييد الديييين وينننك يااا شييييخ عميددد الديييين

-رهف: يااااء هاي شمالهه تسودنت

-وجععععععا عمييييد تعااال شوف رباااية بنيتتتتك

تصيح بعرامة واجت نرجس وعمه دلال وحبوبه وبيبي وابوي لسه ما اجه هه يدري بسوالفهه وبعرامتهه..

-حجية عطيه: خاايباات شنيي شصاااير

-فتوح: هاااي المربااايه تحچي علييّ

-رهف: عمه شني حلمانه انتي

-حجية عطيه: ولچ سلبووحة شنهي حاچيه ؏ عمتچ انتي؟!

-فتوح: اييي اييي انه سمعتهه صايره بلا ادب

-انتصار: فتوووح بسسچ عيييب حاطه بالچ وبال هالفرخة

-نرجس: منيلللهه فرخه مو راح تروح كِلية شنهي مو كبررت

-حجية عطيه: وابو فاضل اذا مانچعمتن گلچن اييب مريانه وتشوف شغلهه وياچن

-نرجس: حبووبه وينه السسيد وييينه احنه چلامنه وياااه هاي لسانهه طوييل وخلي يعيد تربيتهه

فتوح حچت وتصفگ بأيديهه...

-فتوح: السيييد بحضن جوهرررة ايييي خايبه شنهييي يعوف حضنهه ويجييلنه حننه

-نرجس: سااااحرته بت ابليييس بت الگو****

بهالاثناء طبت مرجانه تركض عاد هاي تكيف ؏ المشاكل چن انسان وتفتهم..

-حجية عطيه: اييي اجيتي وجابچ الله تعاي مريانه تعااي

راحتلهه وگفت بصفهه عجييب شلون مدربتهه وهاي تسوي كلشي تگوله حبوبه...

-حجية عطيه: روحي حوسي بأفادهن ذني العرمات يله

-فتوح: عاااااا شنهييي يممماااا تخلييين مريانه تحوس بيه

-نرجس: وابو فاااضل اطيح حظهه اليوووم

هجمت ؏ مرجانه بالنعال تريد تكتلهه وهاي مرجانه ماقصرت تعاي واطفري ؏ نرجس وتملش بشعرهه وهذيچ تعيط مثل المعزاية وانوب فتوح نزعت نعالهه وتضرب ؏ ضهر مرجانه حتى توخر عن نرجس وحبوبه شافت هيج لو تسودنت، شالت عوچيتهه وضربت فتوح ؏ چتفهه حيل وتعيط...

-حجية عطيه: ادبسسسزيااات ما مربااايااات العتببب موش عليچن العتب ؏ السييد الي ملفيچن ببيته طااايحات الحظظظ

اجه ابوي يمشي برهاوة ولا چن الناس متصاخمين هنا وبحده جواهر، ماحتاج يگول شي ولا يتعب نفسه مجرد ما زئر بصوت رج البيت وزرف طبلة اذاناتنه خله المطافر يصير ماله والي...

-عميد الدين: شنهييييي بييييت كاوليييييييه

فطست ضحك بَـس ضميت حلگي حتى مايعصب اكثر، متت من مرجانه طلعت تركض من البيت خرب يومهه ترجف من ابوي تعرف بي يموت منهه..

-عميد الدين: واااحد ماايگدر يرتتاااح بهالبييييت

-فتوح بصياح: بنيييتك تجااااوزت علييييّ شيييخ

خزرني ابوي بقوه وعاط بيه اطب جوة بحجرته، خرب حظي كله من هالحيات فتحو ونرجس الصخمات..

طبيت للحجرة وگعدت ؏ الچربايه مالتهم ادردم وحيدي، دورت عيوني بالغرفه ووگعت عيني ؏ ملابس داخليه مال جواهر مشموره ؏ الچربايه يا بويه غير اختنگت..

اضحك وابوي يعيط بره وفتوح ترده، غصيت وماجاي اگدر اسكت، شلتهن بساع وظميتهن بالكنتور لا تجي جوهرة وتعزيني..

طب ابوي للحجرة وحده ورجع يخزر بيه...

-رهف: بابه وغلاوتك انه ماعليه شو من وحيدهه تسودنت

-عميد (بنترة قوية) : اشششش حسچ ماهيسه ما تستحين تعلين صوتچ ؏ عمتچ انه هيچ ربيتچ رهفف!!!

-رهف: بابه اغديلك فدوه هيه تخبلت من وحيدهه انه همست بيني وبين روحي يعني شاورت روحييي شلووون درت بيه جاي احجي عليهه لو اجتهااد من ذاتهه هذا!!!

جر نفس عميق وگعد ؏ الچربايه، كظ گصته وضغط عليهه بأصابعه..

-رهف: باباتي حبيبي جاي تتوجع

-اي من وره لساناتچن كل وحده شايله رشاشه موش لسان

-اي بابه ليش جديده عليك هوه احنه دلالات

رفع راسه وخزرني بَـس احسه گوة كاظ ضحكته، رديت گلت...

-رهف: انته تعرفني انه ام لسان وماكدر اسكت وترا جوهرة هم هيج فَـہ شنو الجديد عليك

-رهففففف اسكتيييي

-ماسكت تعرف لييش؟؟ لان عمة فتوح ونرجس من يوم يومهن يسون مشاكل وهاي نرجس العوبه تريدك

-انطمييي رهف

-مااا مااااا انه ما ارضى وحدة تعاينلك بنظرة اعجاب وحب غير جوهرة شنييي شمالهه وتريد تزوج نرجس العوبه عليهه

فك عيونه ؏ وسعهن وگام من مكانه، اردفت...

-اييي لا عبالك انه مادري بحچي عمه فتوح من تحچي براسك وتگلك اخذهه ؏ جوهرة والعباس بابه اذا تزوجت ؏ جواهر انه ازاعلك ايي چا شنهيي هاي نرجس الوسخة ام الگمل ما توصل لخصله من شعر جواهر تروحلهه سبع فدوات

-عميد: اوگفي اوگفي شني سالفتچ انتي شو صايره تخربطين!!

-ماخربط بَـس معصبه علييك شلوون تفكر بهيچ تفكير اصلاً!!

-ولچ هوه ياهو مفكرر لا تسودنينييي رهففف

-انتتته تريد تزوج نرجسسسس

-انه اخذ نرجس ؏ جوهرة!!! شنهي انتي تخبلتي بابه؟؟؟

-لاااا هذا الحچي سمعته من عمه فتوووح

-استغفر الله گوة تحچيني بَـس شجاب الثرى ؏ الثريااا يااا مسودن عنده مرية نفس جوهرة ويتزوج عليهه هذا اله الماعنده عگل ومايفكررر

-هااا يعني هيچيي

-هيچي ونصصصص وهذا الچلام اذا انعاد اتصرف غير تصرررف

-چا يله انه اطلع وتجيك جوهرتك اكيد محتاجهه هسة ههههه

-انچبيي رهف ولا تحچين حچي زايد لا حيه ولا مستحه هالبت!!

طلعت اركض بره ومثثثثل ماتوقعت الكل گاعد بالصاله حتى يشهد رزاله ابوي الي، احححح فرحتتتت ونشنشتتت انه حچيت هيچ متعمده هم حتى اخلص من الرزاله وهم حتى ذني الحيايه يسمعن وهم حتى جوهرة تعرف ابوي شكثر يحبهه ومايجي يوم وتزعله لو تكسر گلبه..

راحت جواهر لحجرتهم وقبلهه شمرتلي بوسة بالهوى، ضحكت وباوعت لفتحو ونرجوسه المصخمة واني گلبي يهز خصر من الفرحة..

لليل واجو هجران وعمو عُثمان خاطر يسلمون ؏ جوريه الي عساس تجي هسّ بَـس شو لسه ماهيه..

كظيت غزاله من ايدهه واخذتهه لحجرتي اراويهه ملابس الشتريتهن للجامعه واكيد ابوي مانسى حصتهه وخلاني اشتريلهه نفسي بالضبط...

-غزاله: لچ رهيفه شدعوه هالگد والعباس هواي

-انه ماعليه ابوي گال شتشترين تشترين لغزاله

-غزاله: عاشت ايده

عفتهه ورحت ؏ الميز وجبت علبه وحطيتهه بحضنهه، صحت بحماس...

-رهف: لچ باااعي اشتريت مكيااااج

-چذاااابه ابوچ رضى؟؟؟

-لا بَـس جوهرة اشترتلي

-شني شني؟؟ تشتريلچ من دون علمه؟؟؟

-خايبه لااا گالتله وشرط عليه ممنوع احطن من اروح للكليه يعني بَـس بالمناسبات

-هاا چا شكو تگولين ما يرضى

-اقصد ؏ الدوام مايرضى

-هاا خوش

سولفنه شويه وراوتني موبايلهه الجديد الي اشتراه الهه عمو عُثمان، يمووت لونه ماروني وموديله جديد...

-غزاله: اييي ولچ مدللني دلااال والعباس شنهي اريده ركض يجيب اغديله فدوه

-وانه اگوول هاي شمالهه مچنگله هناك وماتجينه

-غزاله: ههههه لا ولچ مو هيچ بَـس والله هجران خطيه متعذبه ويه فريخات جوري وانه اساعدهه

-اي خطيه والله

وبينما احنه نحچي واجتني بيبي انتصار، اشرتلي بيدهه وهمست..

-انتصار: تعالي

-رهف: ها بيبي؟

-انتصار: تعالي ولچ

كظتني من ايدي وخذتني لحجرتهه، طبگت الباب وگعدتني ؏ الچربايه مالتهه، اللتفتتلي وهيه مبتسمه، گالت بغمزة...

-انتصار: كبرتي وصرتي عروس

-رهف: شنييي يا جاموس بيبي

-انتصار: لعنه الله ؏ بليسچ وكت تحشيش هسّ

-رهف: چا شكو شني شصاير؟

ضحكت خفيف ورجعت راسهه ليوره كردة فعل للضحكة، ردت تقربت وهمستلي چن متريد واحد يسمعهه...

-انتصار: زيود خطبچ من ابوچ

فكيت عيوني وحلگي سوه، اخذتلي صفنه چني ابو الرصاصي وبيبي واگفه جدامي تعاينلي..

نزيت من چفتن جواهر وهجران للحجرة يضحكن وفرحانات...

-جواهر: هااا خاله بشريي؟

-انتصار: حبوبه شني ليش هيه جاوبت

-هجران: هااا رهوفه فرحييينه

بلعت ريگ وراسي صار يدور، شلون زيد يخطبني؟ وحالتي؟ ووضعي؟ شني يردون يفضحوني ذوله؟ صفنت بوجوههم واشوف عيونهم تلمع والفرحة واضحة عليهم، همست بدون صوت "شلون؟" لـ جوهرة يعني بَـس قرت شفايفي، فوراً گالت...

-جواهر: كُلشي يعرف حبيبي والرجال يريدچ وميهمه شي وحتى عمه دلال تگول اصلاً شفايتله ياخذ بنيه نفسچ

انصدمت اكثر وحسيت الحماوة تصعد لراسي، هم مستحية وهم حايره، نزلت راسي ولا ارادي ابتسمت خجلانه، بيبي حضنتني لصدرهه وجواهر وهجران همسن بصوت ناصي...

-الففف الصلاااة والسلاااام عليييك يا رسوول الله محمدددد

**

"هجران"
غمضنه عين فتحنه عين رهوفة گاعده ؏ الكوشه وديعقدولهه ؏ زيد، چانت طالعه اااايه من الجمال، كُتله من الترافه واللطافه والنزاكة وكلشي حلو بالدنيا..

عيون الكل معلگة عليهه وبيبي عطيه تفتر بالحرمل وتقره ايات قرآنيه وخاله انتصار بَـس تبچي..

احنه احتراماً لـ بكر ومرتضى ماسوينالهه حفله يعني بَـس بيناتنه، رغم طلعت سنويتهم من زماااان بَـس خاله انتصار ماقبلت تفرح وتمشي بحياتهه وابنهه الشاب متوفي، هيه الاسود لسه مانزعته وگاظيتهه مناحة كلما يذكرون اسمه..

حسيت بدغة جوري لـ چتفي، اللتفتت اباوعلهه، همستلي وغمزت...

-جوري: رووحي

-مااا جوري عوفيني

-جوري: هجراان لتصيرين فاهيه ورووحي

جرتني من ذراعي شهد من الجهة الثانيه وگالت بحماس...

-شهد: يلله هجران خليهه تصير الفرحة فرحتين اليووم

-هجران: بنااات خايفه شبييكم

-جواهر: ليش تخافين حُبي!!

-هجران: مادري متوتره

-جوري: خايفه تطلعين مو حامل؟

-هجران: اي

-شهد: وليش حبيبتي هذا بعد رزق من الله

-هجران: بنات اريد احمل لخاطر عُثمان متشوفو شلون متلهف ويتمنى يصير عنده طفل انتن متشوفنه شلون يموت ؏ الجهال

-شهد: حبيبي نشوفه شلونه ويه زنايب وعلاوي وبنات جواهر الله يرزقكم حياتي

-جوري: ايي ويله هسة گومي خلينه نتأكد

گوة گومني وصعدنه فوگ بغرفة جوريه، نزعت حذائي العالي وطلعت تحليل الحمل الحاطته بجنطتي..

اخذته ورحت للحمام والبنات واگفات بالباب ينتظرني..

سحبت نفس عميق وسويت التحليل، گلبي يدگ يدگ يدگ واني انتظر الخط الثاني يطلع، عيوني مدمعه وع ساعه تطفر الدمعه، انهضمت حيييل من شفت بَـس خط واحد..

طلعت للبنات وكلهن صاحن بلهفة...

-هااااا بشرييييي

قوست حلگي بزعل وهزيت راسي...

يتبع🍀...

♛ ♛ ♛ ♛ ♛ ♛ ♛ ♛ ♛ ♛
لتنسون التصويت والتعليق بين الفقرات شباباتي 💛✨.