『قٌصص ﺑٱرۅد』

⍅جربت حظي⍆

مسائي انتي وعيناكِ و مساء الخير للدنيا♥️"

كل واحد بينا ينولد ميگدر يختار دينه لو اسمه لو حتى الدولة الي ينولد بيها ... اني هم انولدت مختاريت شكلي ... من بديت اكبر و دخلت بـ المدرسة عرفت اني شكلي الكل يباوع عليه ... حتى بالصور مال الصف ..

چانت المعلمة تخليني بالنص ... شكلي حلو و محبوبه كلش لان فقيرة ... من دخلت المتوسطة واني عمري صغير يعني مو مال زواج .. تقدمولي ثنين و بوكتها ابوية مقبل لان بعدني صغيرة ...

و ما احچي على الي يلحگوني ... يوميه يلحگني واحد ... يوميه... البنات بـ المدرسة يغارون مني ... بس من يتقربون مني يعرفوني اني فطيرة و فقيرة بنفس الوكت يحبوني كلش ...

مع الاسف مرات الناس تاخذ الصورة الخارجية للبشر و حتى اكو بيهم ميحاول يتقرب و يعرف هـ البشر شنو و منو ... و المصيبة اكثر الناس يتوقعون البنية الحلوة مغرورة ..
على شنو وليش ؟؟ ماعرف ..

و بديت اكبر و دخلت اعدادية ... تقدمولي من المنطقة ولد ثنين بس امي حالفة متزوجني الا لأبن خالتي ...

أبن خالتي شخصيته كلش محلوة و بصريح العبارة ماعنده شخصية اصلاً... و شفت هالشي هواي ... و سمعت هم ... اخوتي ميحترموه ابد ... هاي ع الصعيد العائلي .. و ع الصعيد الشخصي الخاص بي ... اصدقاءه نفس الشي .. الولد ماعنده شخصية ابد ... يضحك على كُلشي .. و ماعنده مبدأ بهل الدنيا واصعب شي ع البنية ترتبط بواحد ماعنده مبدأ ..

اني مجنت رايدته .. بس امي الله يسامحها لعبت بعقل ابوية رغم ما ابوية هم ميحبه بس قنعته وخلته ياخذني لأن امكانية ابوه المادية كلش زينة و بذاك الوكت چان حصار واحنى بمنطقة شعبية و حالتنا المادية مو كلش زينة ...

اني بصف خامس اعدادي چنت بوقتها ... بطلني من المدرسة و ابوه اشتراله مشتمل بنفس المنطقة .. الي چنت اشوفة ماعنده شخصية گبال اخوتي و چنت اسمع اصدقائه شلون يحاچوه بـ التلفون لو بره يم الباب لو بالصالة و ميحترموه طلع غير شكل ..

طلع اسد وانگلب وحش عليه... وخصوصاً وره ما بده يمل مني .. لان مدلل .. الي يريده ياخذة و شوية شوية يمل منه .. اصدقائه نايمين براسه .. ومن چنت اگله هـ الشي يغلط عليه و يگلي انتي مو رجال حتى تدخلين نفسچ ...

بداها بشغلات الغلط و نهاها بـ الضرب ... بـ البداية چان يغلط .. و حتى اني وصلت مرحلة گلت ليش ادخل نفسي .. اذا هو مكيف اصدقائه نايمين براسه اني شعليه ..

بس من وصلت يطلع يبات بره و يعوفني وحدي بـ البيت وفوگاها يگلي اذا امي لو ابوية خابرو عليه (ع التلفون الارضي يعني) گُليلهم نايم ... يعني يخاف من امه ومن ابوه بس مني ميخاف .. و صح رغم شخصيته الـ مو حلوة اصلا و رغم عدم اقتناعي بي بس يبقى زوجي شسوي لازم اغار عليه ... مچان يصرفله هـ الحچي و بده يضربني ...

و يهددني بـ الطلاگ و بصراحة اني اخاف من هـ الشي ... لان هو شخصيته سخيفة و اخاف من لسانه شراح يطلع حچي عليه و المصيبة بمجتمعنا الرجال ينسمع صوته اكثر من المرية ... خفت و سكتت ... وبديت ابلع الـ مر ...

طبعا ولا مرة طلعت وياه بره اذا مصارت مشكلة ... و هو بـ السنة حسنة يطلعني مرة و مرات ميطلعني اصلاً... چنت اخاف اخلف منه بس شسوي خلفت لان مو بيدي ... و مثل مگلت بكل طلعه عركة لان اكو شباب يباعون عليه..

ومرة بسوگ طالعين و السوگ مزدحم .. هو لازم ابني و اني دامشي بصفة ... و وگفت يم بياع مال ملابس اطفال .. هو وگف بصفي بس ابني انهزم منه و راح جابه .. بالرجعة مالته اكو ولد مراهق واگف مقابيل البسطية .. گام يأشرلي برقم تلفونه كاتبه بورقة صغيرة .. رجلي برجعته شاف الموقف .. گالي امشي .. اني انتبهت ع الولد المراهق بس ولا عبالك شفته لان من هـ المواقف شايفة كومة حتى قبل ما اتزوج ... اني مشيت وياه ..

و بالطريق كفخني على راسي گالي امشي سريع .. و هو اصلاً اني چنت امشي على كيفي لان اكو خيسة و ترسبات مالي مي بالگاع (مكرم القارئ) يعني ممتقصدة والله ... و رجعنه للبيت .. خله ابني بالصالة و طلعله ملاعيب يلعب بيهم وشغل التلفزيون و عله الصوت ..

و طببني للغرفة نزع الحزام و ضربني ضرب .. اوف ياربي شگد بچيت بيومها .. يگلي مليون مرة گايلچ لا تخلين مكياج بنت الهيچ و بنت الهيچ.. والله العظيم اني مچنت مخليه مكياج قوي بس حواجبي خفيفة واثخنها بقلم كحله وبس .. متت من البچي بس ابني مسمع شي لان صوت التلفزيون عالي .. بعدين طلع وعافني ابچي... سكتت ورحت حضنت ابني و گعدت بالصالة ...

خابرت امي بيومها حچيتلها ... امي سكتتني و گالت يمه سمعي كلامه رجلچ هذا وانتي هم بعد لاتخلين كحله ... انلصمت من شفت امي هيچ ..

و بديت اسكت على كلشي ..بس بيوم من الايام ... مگدرت اتحمل ... و انفجرت بوجها... گلتله انت اصدقائك يغلطون عليك و يسبوك و تجي عليه تصير رجال .. بصراحة ردته يطلگني لان خلص كرهت كلشي .. كرهت كلشي .. انهانيت هواية و كافي ... كافي يوميه غلط و عدم احترام .. اني مو حيوان اني بشر انسان ...

من گلتله هيچ بيومها ... بقى يدفر بيه و من احاول انهزم منه .. يرجع يدفرني يوگعني .. جرني من شعري بيومها و حتى شعري شوية اتگطع بيده ..

و ضربني بنفاضة مال جگاير بيدي بكل قوته بحيث من قوة الضربة رأساً طگ العظم انكسر... اني من انكسرت ايدي خربت ... هو خاف .. لان السالفة كبرت واني خلص تخربطت ...

وداني للمستشفى بس اني متخربطة و دم بحلگي من الضرب .. صحيت بالمستشفى بس صار بيه صدمة عصبية بيومها ... هو خاف يگول لأهلي و لأهله الجبان عديم الشخصية ... بقى يتوسل بيه بس ما احچي ...

بس اني بس چنت منتظرة فرصة و عفته براحته بس اريد اصير زينة و يرجعني للبيت .. و بس فتت للبيت .. هو بوقتها حصر روحه بـ البيت حتى بس ما اتصل بأهلي .. اني مشيت وياه و خليته يأمن ...

و چان اتصل بأهلي بس شفت الفرصة مناسبة ... حچيت كلشي و بيومها اول مرة امي طبگت وياي ... و جتي هيه وابوية .. واخوتي هم جوي ..

طبعا اخوتي مچانو اصلاً يعرفون الي يصير ودائما امي متوصللهم الي يصير .. اخوية الاكبر مني بس حچيتله الي صار .. تخبل و امي شگد حاولت تهدئة ما سكت .. و گام يحچي على امي و يصيح يگلها بعتيها كله من وراچ و ابوية اول مرة بذاك اليوم اشوفه ساكت و ميحاول يگول لأخوية اسكت لاتصيح ..

بقى ابوية گاعد يمي بالبيت و مخلي ايده على راسه .. و اجه رجلي صدفة و بس فات اخوية تلگاه من الباب ... و اخوية الثاني هم ركض شبعو بسط ... و ركض اخوية الچبير جاب القنينة مال غاز جان يگله لاخوية الاصغر مني الزم ايده قوي و اخوية الصغير من كل عقلة لزم ايده يريدون يكسروها بـ القنينة مال الغاز ... عاد اني ركضت بس اصيح لا و امي تصيح وابوية جرهم بالگوه و گام يضرب بأخوتي ...

بس اخوتي ولا يهمهم ضرب ابوية ولا حتى صياحي و صياح امي ... و ماعافوه بس عافو سالفة القنينة مال الغاز ... و هو يبچي و يعيط مثل النسوان ... جرو فوتو جوه لان صياح قوي و اخوتي مرادو يلتمون الجوارين ... حصرو جوه و هو يبچي ..

عافوه و گامو يگولون لك انت مو رجال والله مو رجال و يصيحون على امي هو هذا الي انطيته روى اله .. هو هذا الرجال الي راح يدلل اختكم ...
مو گنالچ هذا زعطوط ديلاا شبعي بي ... و گامو يصيحون طلگها ... طلگها ..

ابوية متدخل و اني چنت اباوع على ابوية ردت اشوف ردة فعله بس شفته موافق على حچي اخوتي لان ما حچه شي .. و الجبان هلگد مو جبان و بلا شخصية رأسا طلگني... حتى ما فكر من الخوف ...

رجعت لبيت اهلي بس رجعت راسي مرفوع و ما فكرت بسالفة حچي الناس .. و رجعت وابني يمي.. حاول هواي يرجعني بس اخوتي مقبلو و گالو عيشتها علينه و طبعاً شوية شوية اخوتي شغلهم صار زين و امكانيتنه صارت زينة .. و ابني كبر بس كبر يكره ابوه كلش ... ميحبه .. مع العلم هو يدزله فلوس هواي بيد امه (خالتي يعني) و كل ميلتقي بي يشتريله كومة ..

و اقسم بالله العظيم اني مربيته هيچ يعني مربيته يكره ابوه بس هو ميجرعه يحب خواله اكثر بهواي ... و بقيت يم اهلي معززة مكرمه و توفى ابوية و اخوتي تزوجو و هسه كُلنه عايشين ببيت واحد بس والله العظيم گلوبنا كُلنه على بعض ..

حتى سالفة الجناين و العركات الي نسمعها مرات من الناس لو نقراها ع الانترنت نگعد نضحك عليها لان صدگ احنى ماعدنا مشاكل .. و اذا اخوتي مرات يتعاركون ويا نسوانهم اني وامي نطبگ وي النسوان على اخوتي .. و طبعاً اني حالفة ما اتزوج ولا راح اتزوج لان ابني كبر و هسه يداوم اعدادية و مرتاحين و مناقصنا شي ..

بس مع الاسف .. تجربتي بالحياة چانت محلوة و مرات انقهر من اشوف ابني بدون اب .. و انقهر اكثر من اشوف شلون لو اسمع النسوان مدلليهم رياجيلهم و اتذكر الي صار وياي .. حرامات اني مچان ناقصني شي و لحد اليوم مناقصني شي .. بس مع الاسف هيه قسمة و قدر .. وهذا ان قدري من هـ الدنيا ...
( جربت حظي )
انتهى