شفاه مخملية

Part 48

♛ ♛ ♛ ♛ ♛ ♛ ♛ ♛ ♛ ♛

اسفه ؏ التأخير بَـس صارلي ظرف وهذا بارت طويل لعيونكم الحلوة♥️.

"شفاه مخملية"

بقلم: زهراء السلامي.

لـ هجران
عليج تخبل الحُمرة، وشنو الميلوگ للسـمرة 🥺🔥!

♛ ♛ ♛ ♛ ♛ ♛ ♛ ♛ ♛ ♛

صبيت العشه وبعدني بالمطبخ وسمعت صوت كُلش عالي جاي من بره نززني وزيّد دگات گلبي، ركضن هاديه واديان بره ووياهن ام ثامر يشوفون شكو، چان صوت رجال خشن يعيط..

-عثماااان وينوووو عثماااااان

جفلت من دخلت مرة چبيره ضخمة جندله وكأن جسم رجال وجهها مدگدگ وصاير مكان الدگ اخضر دليل ان الدگ قديم، لكن ملامحها حلوة وبياضها الناصع يجذب، رجعت صاحت بصوت فحولي قوي...

-ول بووووية وينووو حبيب گلبي وينوووو

صفنت او بالاحرى اندهشت!! هذا صوت الرجال طالع منهه؟!! شلون صوتهه بهالخشونه وكأنما رجال؟؟

-هاديه: عمه عُثمان بغرفتو

-يبووو يا وليدييي كان راح من ايدينا يولن

تعدت المطبخ تركض لدرجة خلتني اصفن، رحت وراهه واذا أشوفهه نايمه ؏ عُثمان نيوم بالمعنى الحرفي، فكيت حلگي وهيه حاطهه وجهها بچتفه وتنوح وتبچي وهوه بَـس يمسد ظهرها ويباوعلي..

-عُثمان: خالتي أنَا زين مابيه شي

-يمصگوع اشنو سويت بينه يولوو أنَا گالولي واجيت مثل المجنونه هيك تسوي بخالتك!!

عدل گعدته ودفعته حيل حتى يرجع ينام...

-عُثمان: خاالتيي شَنو شبيكيي

-وَرع ول لا تتعب

-ما اتعب خليني اگعد عدل

-استغفررر الله ربيييي شوفو لهلمعثوور اخذو لحيلي

-عُثمان: خاله حبيبتي أنَا الي مافهتمو منو گالك؟

-شكووووون (شلوون)

-عُثمان: ما اقصد بَـس اجيتي كأن معاده (فاتحة)

-اسكت ول يشوفو خالتو انجنت عليه وگاعد يحكيلي لغوة زايده

ضحك عُثمان وهيه ضربته ؏ چتفه وگامت...

-من يومك تلوبح هينا وهينا ماتگعد يمعثور

-عُثمان: امانة الله أنَا مادخلني خالي اتصل بيه ورحتلو

-اهجب اهجب اشنو كأنك قرد وينطط

-عُثمان: خااله شبيكييي احترمينيي گدام مرتيي يولي

اللتفتت عليه تباوعلي واني فاطسه من الضحك عليهم، ضيگت عيونهه وتقدمت عليه ومركزة عيونهه بعيوني، حچت بفحيح...

-يولي رح تجيبلك الولد

-عُثمان: خاله لخاطر ربِك تعالي هينا وخلي البنت

اللتفتت عليه وتفلت بالگاع وگالت...

-تف عليك ول انته اشنو من ابن اخت هيك تحاكي خالتك!!

-محشومه خاله بَـس خليهه هجران ما تدور هالسوالف

رجعت تباوعلي ولزمت چف ايدي وباوعتله، رجعت ضحكت وگالت..

-امانه الله رح تجيبلِك ولد

-عُثمان: خوووش

-وسَممم اهجب عُثمان لا اجيب البكعه (البقره) وترفس بجرحك ول

-عُثمان: من يومِك عنيفه وسفاحة

-هههههههيييي يروح امك

ياا هاي شبيهه انوب رجعتله تبوس بي وطلعت من الغرفه، صفنت عليه وهوه هم بادلني الصفنه...

-هاي خالتك؟؟؟

-اي

-خالتك يعني اخت امك؟

-اي هجران شبيكي

-مادري شو اسلوبهه غريب

قهقه بخفة وگال بمكر...

-هيه كلهه غريبه ترا خالتي گصابه

-شنوو؟؟؟

-هههه شبيكي

-يعني تشتغل وياهم بالمجزره؟

-لاا بَـس اوقات من تضوج ياخذولهه لحم او بهايم وتذبحهم الهم

-چذاااب

-والحمزة

-عزا يممه تدري اني عبالي رجال اول ماطبت

گلتهه وتندمت، يبوو يلساني لازم يچفص، ضحك وهز راسه وتمدد..

-هجران: اءء اسفه ماقصد احچي هيچ بَـس...

-ماكو داعي تعتذرين اساساً هيه تدحگ لروحهه ؏ انها رجال

-هههههه تتشاقه مو؟

-لا

-بَـس تدري ان كلامهه مينفهم مثلك

-لان لهجتهه خابطه من كثير مناطق

-ليش عود؟

-من يومهه تتنقل وبطبعهه مرحة وتحب تكون صداقات وتتعلم منهم

-مممم زين شسمهه؟

-صافية

-ممم خاله صافيه

-عُثمان: خليكي من خالتي هجراني أنَا كثير جوعان

-ياا شوف صبيتلك ونسيته هسة ثواني اجيبه واجي

-يله حبيبتي انتظرِك

من گال حبيبتي گلبي صار يدگ حيل، طلعت من الغرفه والابتسامه مرسومه ؏ وجهي يبووو هاي شبيه خرب هسه شكو مكيفه اني!!

رحت للمطبخ وصوت خاله صافيه مالي المكان تضحك وتهوس وفرحانه ماعرف شعدهه لو جوز هذا طبعهه ماعرف بعد..

اخذت الصينيه ووگفت بباب الغرفه اجاهد حتى اخفي ابتسامتي الي نرمست من گلي حبيبتي لسه، رجعت ملامحي طبيعيه وطبيتله..

جبت طاوله وحطيتهه گدامه بَـس گال ميگدر يتحرك ليش گال هيچ مادري رغم اني اشوفه يتحرك خفيف..

-عُثمان: تعالي يمي وحطي الاكل هينا

گعدت بصفه وحطيت الصينيه بحضني وهمس بمكر...

-اذا وكلتيني تنزعجين؟

-لا ابد

-عجل وكليني

ابتسمت وهزيتله براسي، حطيت اول لگمه بحلگه اكلهه وگال بهيام...

-اطيب اكل اكلو بحياتي

-هجران: هاديه وام ثامر طبخو

-لا لا ما هذا السبب

-لعد؟

-لانو من ايديكي الحلوات

نزلت راسي خجلانه وهوه اشرلي ؏ الماعون وگال...

-دحگي يولي أنَا جوعان وكلينيي

-ههههه ماشي

وكلته وكل شويه يگول كلمه ويتغزل، بطني خبطت من التوتر والخجل وگلبي يدگ لدرجة احس انفاسي رح تنگطع..

-اگولك هاي خالتك شنو قصدهه من كالت رح تجيبلك الولد؟

-اححيييي خليهه هجران ماعليكي منهه

-لا حباب گولي اريد اعرف

تنهد ومسد شعره، باوعلي وضحك...

-يُبا والله خالتي ما صاحيه

-ياا ليش هيچ تكوول

-عجل تقره الكف وتقره الشخص من عيونو

-عزااا شگد حلووو عود هاي صدوووك

-يُبا حرااام شَنو صدك ماعرف شَنو هذي خالتي مُنجمة

-اي بَـس حلو هالشي مو؟

-لا ما حلو

-يعني تريد تقنعني مقاريه كف ايدك؟

-لاء

-لتچذب علييييه

-هجرااان خليكي منهه تعالي انتي طالعه حلوة اليوم

-عثمااان لتغير الموضوع گولي حبااب يا الله تحمستتت

-اهوووو هجران ماحكي

-عليك الله اذا تحب زنايب احچي

-خو گولي اذا تحبني

غمزلي واني نصيت راسي وهمست...

-اي يله

-عُثمان: اويليي منِك اي قاريه كف ايدي

-تحمست كُلش: اووووو وشگالت؟؟؟

-كذب كذب حرام التسوي

-ادري والله افتهمت بَـس شنو گالت من قرت ايدك؟

صفن بوجهي ثواني ونزل راسه، گال بصوت ناصي...

-عُثمان: قرت كف بكر هم

جمدت وعيوني يبست مترمش بعد، هوه اردف...

-گالت عنو رح يموت بشبابو

گلبي صار يدگ وانفاسي اضطربت، الدمعه وصلت لجفني ونزلت من گال...

-گالت حكي كثير عنو

-مثل؟

رفع راسه يباوعلي وگال...

-كلو كذب

-لعد شلون عرفت رح يموت شاب؟

-هجران ممكن حزرت لا اكثر

-عُثمان انته تعرف هالناس حقيقين واغلب اليحچو يكون حقيقي لان يسخرون الجن

-لا ما صدگ أنَا

-زين عوفك من بكر انته شگلتلك؟

-گالت رح اتزوج بعمر كبير وذريتي كلو ولد

-صح تزوجت عمرك 35 سنه بَـس يعني يجيك كله ولد؟

-بالضبط

-وبعد؟

-گالت كثير شغلات ماتذكرهم بالضبط

-عليك الله احچي اني متأكده تتذكر بَـس متقبل تگولي

جر حسرة وگال..

-اكو اشخاص ما يحبوني ويتمنوني اطيح حتى يصعدون فوگي

-ومنو ذوله؟

حرك چتافه بمعنى ماعرف، بَـس اكيد عرفتهم اني واضحة قصدهه ؏ غيث وبكر الله يرحمه وعمو خليل..

-وبعد شگالت

-هههه يُبا خلص كافي

-مااا ماااا احچي

-مو اخاف تزعلين

-لا مازعل

-گالت رح اتزوج ثنين

فتحت عيوني مصدومة، هوه اردف بسرعه...

-گلتلِك بَـس حكي معليكي بيهه

گام يريد يروح يغسل وانصدمت من گام وحده ماحتاج مساعده، عرفت سوه هيچ بالعمدني وچذب عليه بَـس حتى اني اوكله..

طلعت اودي الصينيه، رجعت للغرفه گال يريد يگعد بره يم عميد الدين وثامر واسحاق..

طلع ويايه واستلمته خاله صافيه بالهلا والترحيب وتهوسله صراحة تضحك وهيه ضخمة وطويله وتگمز بكل حيلهه، فطست ضحك من اجت رهف تهمسلي...

-خايبه والعباس انخسفت الگاع

-لچ رهففف اسكتي عيب

راح عُثمان وبقينه بَـس احنه البنات بالصاله وبنات خال عُثمان كلهن بالمطبخ بَـس اديان هنا، گعدت خالة صافية بالنص وصاحت...

-تعالي يولي

اشرت لـ اديان وراحتلهه انطتهه ايدهه وگعدت تحچي شگدددد، فصلت البنيه تفصاال واديان بَـس تصيح "اي" "صحح" "اي والله هيچ صار" اللخخ...

جواهر تحمست وگالت...

-جواهر: خاله شدتسوين؟

رفعت عينهه تباوعلهه واشرت بيدهه بمعنى "تعالي"، راحتلهه جواهر وفوراً جرت ايدهه وشهگت من شافتهه...

-جواهر: ها خاله شو شهگتي خير؟؟

-صافيه: ول ول ول ول

-جواهر: خاله شكو ترا خوفتينيي

گعدنه حواليهه وهيه تباوع لأيدين جواهر وساعه ترفع راسهه تباوع لعيونهه، رهف صاحت...

-خايبات شكووو

-صافيه: احااا بويه

-جواهر: خرببب شكو خاله ترا صرت ارجف

-صافيه: ملعووونه

-جواهر: صخاام الصخمنيي

-هجران: عزا خاله شنو يعني دتشوفين شي لو بَـس تردين تخوفينه؟؟

-صافيه: انطو صبررر يولن شبيكمم

سكتنه وهيه تگلب بيدهه وتضحك، يمه شگد خفت ورهف وغزاله هم انخطف لونهن..

-رهف بهمس: خايبات ابوي يگول چذب هاي الجاي تسوي

-صافيه بعيطه: وينووو ابوكييي وينووو

-رهف: صوااب سمعتني

خزرتهه بقوه ورهف رجعتلهه الخزره، صافيه ضحكت وكالت...

-صافيه: قووويييه تشبهينووو

-رهف: چا شنهيي انه بنيت شيخ عميد الدين مو ياهو الچان

-صافيه: والنعمممم وهسة ياله اسكتو يولن خلونه ندحگ لهلمزيونه ونحكي

-جواهر: اي خاله لان احس انشلت ايدي

-صافيه: اييييي اشنوو عندناااا

-جواهر: شنووو

-صافيه: احححح كبييره انتيي

-جواهر: منيلي داده كله عمري 25 سنه

-صافيه: الاقصدو كبيرت قدر ومكانه

-هاااا

-صافيه: ايييي يحححح احححح بحححح

-رهف: شنيييي هااااي

-صافيه: اسكتي انتي جاي دورِك

ظلت تباوع لأيدهه وتطلع اصوات بحلگهه وهيه صوتهه خشن كُلش عزا يمه خاف هاي مخبله ورح تسوي شي لـ جواهر صخام شورطهه هاي..

-صافيه: انتي بنت جمييييله كثير

-جواهر: والله معلومة جديده

-صافيه: خليني اكمل يولي، زوجِك يحبِك كثير

-جواهر: اروحله فدوه

-صافيه: اححح كبيير هالرجال مكانه واخلاق

-جواهر: طبعاً

-صافيه: انتم سعيدين بحياتكم بَـس كأن گعد ادحگ لحمل؟؟

-جواهر: عزاا بعيني شلون يعنيي؟؟

رفعت راسهه تباوع لجواهر..

-صافيه: انتي حامل؟؟

-جواهر: لاا شلوون ترا بناتي بعدهن صغار هستوه طلع اربعينهن واخذ مانع!!

-صافيه: حامل يولي

-جواهر: عزاا خاله متأكده؟؟

-اييي وگعد اشوف خلفتِك كلهه بنات

-يعني اجيب بَـس بنات؟

-اي

-ميجيني ولد؟؟

-صافيه: ابددد

-يا الله شنو هااي

صحت حتى اطمنهه...

-هجران: جواهر شبيچ هذا هيچ بَـس حچي لتصدگين

سكتت صافيه واستمرت تباوع لأيدهه...

-صافيه: رجلِك يحبِك ول هايم بيكي بَـس اكو وحدة تغار منِك كثييير راسهه يابس ولسانهه طويل وتريد تقلبو عليكي

-جواهر بعيطه: هاي نرجسسسس الحيييية

-صافيه: احححح اشنو هالبنتتت كثير صرگعانه

-خرب يومهه ايييي

-صافيه: اخذي بالِك منهه

-اي اي هذا هوه

خلصت جواهر وصاحت لـ رهف تجيهه، گعدت مكيفه تربعت گدامهه وصاحت...

-رهف: يلااا خنشووووف

-صافيه: وجععع هاي شبيكي انتيي

-رهف: خاله وابو فاضل متحمسه

-صافيه: تعاي

انطتهه ايدهه وصافيه تدور بيهه ورهف حاطه راسهه ويه راس صافيه وتدور وياهه موتتنه ضحك..

-صافيه: ول هاي شبيهه البنت معثوره؟

-رهف: خاله ددوري شمالچ شنهي مالگيتي شي مناا مناااك

-صافيه: گعد ادور... ايييييي احححح لگييييت

-رهف: شنييي شنييي لگيتيي

-صافيه: تحضري يولي جايلك عريس

-رهف: صخام بوجهي مالگيتي غير هاي چا شنهي الغريب انه يوميه خاطبيني من ابوي

-صافيه: لااا هذا غيييير هذا يحبِك

صفنت رهف وانبلع وجهها، جواهر شهگت ودگت ؏ صدرهه..

-جواهر: عزاا منو هذااا

-غزاله بغمزه: ترا ابد مو ذاك الشسمه

-رهف: انچبييي غزل

-غزاله: وابو فاضل هسه يطلع هوه

-جواهر: منووه

-رهف: محددد شمالچ كيفتي بَـس عوزچ تشدين وصله وتهزين

-جواهر: اي وشكو خلينه نفرح ونهز

-رهف: روحي هزي لأبوي

كفختهه ؏ راسهه ورهف گامت تشرد، اخيراً اجه دوري، ماقبلت تقرالي ماعرف ليش خفت ماريد اعرف شي ولو هذا كله چذب وحرام نصدگ بي بَـس ميمنعنه نفكر بالكلام...

نطيتهه ايدي وهيه عدلت گعدتهه وگالت...

-ممممممم مرت العزيييز

تدور بيدي ومبتسمه، رفعت بَـس عيونهه وتباوعلي ومضيگتهن...

-صافيه: خلفت عُثمان كلهه ولد

-شنو؟

-رح تجيبيلو ولد

بلعت ريگي وحچيت...

-ايي؟؟

-صافيه: ايييي وبعدد خليني ادحگ عدل هاا ايي حلوو دحگي الي ببالِك يمكن يصير

-شنو ببالي؟

-مادري اشنو ببالك انتي؟ مبين عندي عندِك فكرة شاغلتو لهلبال

-ايي؟؟

-اييي مبينه رح تصير واااه كأنه گعد ادحگ لشيي

-شنووو

-مرة!!

-هجران: مرة منو؟

-تجيكي ضُرة يوليي

يبست بمكاني، شلون هيچ ومعقوله كلامهه صحيح؟؟

-صافيه: اوووه حلوووة كثيييير

-هجران: زين اءء شوفي هوه هم رح يحبهه؟

-صافيه: ما يبينلي هيك شي

-هجران: حبابه شوفي عدل

-وانتي شبيكي خايفه؟

-هاااا

-صافيه: هااا مو تگولين عني كذابه وماتصدگين بكلامي؟؟

-خلص خاله رحم الله والديچ هذا هوه

سحبت ايدي منهه ورحت اگعد ؏ القنفه، يربي الشغله الي ببالي حچايه عُثمان من گال خاله صافيه گايلتله يتزوج ثنين وهسه هم تگول تشوف ضُرة تجيني؟! لا لا چذب شنو هالخبزعلات وزين اني شبيه ضايجة ومقهورة؟؟ وليش مانقهر يعني اظل طول عمري مطيح حظي وآكُل تبن!!

صاحت لـ غزاله تجيهه وغزاله معاندة متقبل، بعد اقناعات من رهف حطت ايدهه واول مشافتهه صاحت...

-احححح اكو واحد كبيييير بگلبِك غزاله

-غزاله: شنيي ياهو لاا ماكو هيچ حچي

-صافيه: والحمزة گعد ادحگلو وتردينو كثيير وتا هالشخص يحـ....

بعدهه ممكمله كلامهه وطفرت غزاله من مكانهه وصاحت بتوتر...

-خااله شماالچ شنهي ياهي لزمتيهه وگلتي تحب وماعرف شنهيي ترا چذبب ماكو هيچ حچيي

انتبهت لنظرة جواهر عليهه چانت خازمة عيونهه وتباوعلهه بشك وغزاله تنتفض بمكانهه وتبلع بريگهه طلعت وعافتنه، كُلش انقهرت ؏ صافيه لان ضاجت من اسلوب غزاله الغريب..

-جواهر: صدُك خاله انتي ليش بَـس تحچين بشغلات الحب؟

-صافيه: لان هذا الشي انتم تهتمولو كثير ويبنلي بوضوع فَـہ اركز عليه

-جواهر: ممممم

-رهف: خاله عذريهه غزاله بَـس تعبانه من يوم توفى عمي مرتضى وماردت نفس گبل

هزت راسهه صافيه وهمست...

-شفتو الندم بأيدهه

-جواهر: شنو ندم ؏ شنو؟

-صافيه: مادري بَـس اكو ندم بداخلهه

هزينه روسنه ورجعت كل وحده لمكانهه تفكر بكلام صافيه...

**

"غزاله"
طلعت اهرول من البيت اخاف تلگفني، هاي صافيه داهيه تخوف كللش وحتى جن تسخر، اتذكر مرة قرت لـ بكر چف ايده وگالتله لو تموت ما تاخذ العاشگه ورح تتزوج بت ماتحبهه وحچت حچي مو كله صار بَـس نگدر نگول اغلبه!!

تخبل بكر بوكتهه واجه حچالي شني الگالتله وانه گتله ينسى السالفه لان هاي منجمة وشغلهه تچذب بَـس رديت اخاف منهه من صار الگالته، ماگول غير الله يچفينه شرهه ويحفظلنه عزازنه..

طلعت للحديقه وصرت امشي ليگدام، اعاين للورود والاشجار وريحة حلوة جايه من بعيد چن ريحة حرگ، انه اعشگ ريحة حرگ الخشب وتجذبني..

تقدمت اكثر وشفت زلم ثنين واگفين يحرگون اغصان شجر، درت وجهي وعفتهم ورديت منين ما اجيت لا عميدي يفتهم ويطيح حظي..

ظليت امشي وما ملحگة خرب يومي هاي شكثر ماشيه انه وما حاسه، وصلت للنخله الچبيره الصايره گريبه ؏ بستانهم، احبه هواي وكلما نجي ياخذني عُثمان يفرفرني بي..

طبيتله ؏ امل مابي احد، فتريت شوي وطلعت جهازي وطگيت صور للاشجار والورود، نززني صوت زلمه خشن خلاني اطيح موبايلي...

-منو انتي؟

اللتفتت اعاينله، چان كاظ بيده كرك وكاف بنطرونه وردان قميصه، نزلت شلت موبايلي ورفعت جسمي..

-غزاله: انه اءء انه اخت عُثمان

-هااا غزل؟

-اي

-يولي كبرانه كثير ماعرفتِك

-هااا انته تعرفني؟

-عجل شلون

-انته ياهو؟

-أنَا اسحاق ابن خالتو لـ عُثمان

-انته وليد صافيه؟؟؟

قهقه بخفة وهز راسه بـ "اي"، گلبت وجهي وترخصت من عنده حتى اروح لا يفينون حظي اليوم...

-اسحاق: غزاله اوگفي

اللتفتت اعاينله وتسائلت...

-غزاله: انته شمدريك يصيحولي غزاله؟

-هههه شبيكي اگلِك أنَا اتذكرِك بَـس انتي لا

-وشمعنه؟

-لان كنتي انتيشه كثير واستعبد تذكريني

-اي هوه صدك ماتذكرك

عفته ورديت للبيت، حسيت بي يمشي وراي، اللتفتت اعاينله بَـس چان مطير عيونه يعني مايباوعلي، جريت نفس ارتاحيت خفت منه مادري ليش..

سرعت خطواتي حتى اوصل اسرع وماسمعلكم غير چلب ينبح ويركض بأتجاهي، طگيتهه ركضه ورديت ؏ جهة البستان، اركض چن وحده مخبله لدرجة نعالي انگطع وانزع من رجليه والجلب مستمر يركض..

گلبي يدگ واحس حتى ماكو وكت ابچي من الخوف، لازم انهزم لا يجيلي، صوت اسحاق يعيط وراي واسمعه ينده بأسمي..

صار سيان جدامي وبممم وگعت چفي ؏ وجهي بنص السيان، تلوخت وخشمي طگ دم لان الوگعه قويه وصارت چفت ؏ وجهي...

اجاني اسحاق طاير وكاظ الچلب بيده...

-غزاله: عااااا وخرررر وخرررره عناااييييييي

-اسحاق: يولييي شبيكي تزكحين (تصيحين)

-عااااااا وخرررررر يباااوووو صخاااام بوجههاااايييي

-اسحاق: شبيكييي گاظبو أنَا گاظبو دحگي يولي

طفرت من مچاني ورديت اريد اركض ورجع صاح بيه...

-دحگييي تركتوو رااح دحگي غزاله دحگيلووو

اللتفتت اعاينله صدك راح بعيد عني، وگفت بمچاني اجرن نفس وخشمي چن نافوره دم تطلع من عنده...

-اسحاق: اشتعلوو يابه ؏ كيفِك انجنيتي

-غزاله: عساني ميته ولا هالطلعه

-استغفر الله تعالي هاكي امسحي وجهِك

انطاني كلينسه واحسن بعيونه تعاينلي، هذا شماله مال اسمطه براشدي افرن چهرته..

عفته ورديت اركض للبيت حافيه وهوه اجه وراي، وصلت گريب البيت والحظ المصخم الملطم شفت عميد الدين واگف هناك جاي يدخن بَـس شافني فتح عيونه متفاجئ من حالتي، تقدم عليّ ملهوف...

-عميد الدين: غزاله بويه شماالچ؟؟؟

ظليت متبسمرة بمچاني خصوصاً من عميد خزرلكم اسحاق خزره يا بويه غير ردت اطيح من طولي..

-اسحاق بأرتباك: شيخ البنت ركض وراهه كلب ووگعت

-عميد بنتر: رفعي راسچ

رفعت راسي بعدما چنت منزلته وهذا اسحاق الغبي صاح...

-اسحاق: ارفعي اكثر يولي خلي الدم ينگطع

-عميد بنتره قويه: علووويه طبييي جوه

افلتتت اخوي عامر طگيتهه ركضه جوه البيت، استقبلني رهوفه واديان..

-رهف: عليييي هاي شصايرلچ ولچ غزاله!!

-غزاله: صخااام الصخم وجهيييي ولچ رهف ابوچ رح يگطعني اليوووم

اجت جواهر ؏ صياحنه، عاطت...

-جواهر: هاي شنوو غزل شبيچ؟؟؟

ركضت عليهه وختلت وره ظهرهه اتحامى بيهه لان اجاني صوت عميد الدين اليرعد..

-عميد الدين: يا الله يا الله

-جواهر: تعال حبيبي ماكو احد

طب للمطبخ واديان راحت جوه..

-عميد: تعااااي يميي

-غزاله: والله مادري والعباااس

-عميد: تعااليي غزللل

-جواهر: عزا عميد شبيك تصرخ عليهه

-عميد: لحد يتدخل تعااي

-غزاله: ماااا عليك الله بروح اخوانك انه ماعليه هوه اجاني وسألني انه ياهي وساعدني وكظ الچلب و...

-عميد: انعل يومي تعاااي

رحتله ارجف گلبي طايح بين رجليه واشوفنه يتدعبل جدامي، كظني من ردن الدشاشه قوي ونتر...

-نزلي راسچ وحطي عليه الكلينكس بسااع

نزلت راسي وكل شويه ارفعه اشوفه وهوه ينتر بيه حتى انزله مرة ثانيه...

-عميد: تلووبن ما تهيددن ولچ لووو صايبچ شييي شنسوي احنه!!!

-غزاله: عميدي انه...

-عميد: ولچ نزللييي راسچ

رديت نزلته ورهف واگفه بحدي وتمسد ؏ ظهري بَـس احسن برجيفهه هيه هم خايفه، يا بويه عميد اذا عصب مايعرف امه من ابو..

-جواهر: عميد الدين شبيك هيچ معصب؟؟

-عميد: لان هالفرخخخة طالعه من وحيدددهه وتفتررر چن بيت الخلفوووهه

-جواهر: واذا عادي ضاجت وطلعت تفتر وترا هيه گلتلي قبل لتطلع مو عبالك طلعت وحدهه!!

رفعت راسي مصدومة من چلامهه انه ماگلتلهه ولا گلت لأحد، رجع نتر بهمس...

-عميد: انتييي شلوون ترضييين تطللع وحيدهه شنييي ما تخافييين ؏ البنيااات

-جواهر: خلص گلبي صارت الشغله وانتهت اني اسفه وغزل هم تعتذر كُلش غلط منهه تطلع واني أيدتهه ؏ الطلعه حبيبي لتضوج روحك متستاهل السالفه

-عميد: والعبااس كل البله بيچن انتننن

-جواهر: خلص عميدي اهدأ مصار شي تعال حياتي ويايه مشتاقتلك اني مشفتك من الصبح ولا لعبت التوأم

فكيت حلگي واني اعاينله شني ساح الزلمه وهيه شلون تتماوع وتسوي حركات بوجهها وتلعب بخصلات شعرهه انه بت وصفنت ؏ حركاتهه..

جرته من ايده وتدلل عليه، راح وياهه واكيييييد راحو لغرفتهم ماينرادلهه، رجعت لوعيي بعدما رهف كفختني ؏ راسي...

-رهف: گبووور التطمچ شحصلتيييي هسسسه لوما جوهرة چان ابوي سمطچ بكتله وطيح حظچ

-غزاله: لطام بوجهي ولچ هاي شسوتله؟

-رهف: شوف هاي الفاهيه غير تفر عگله فر

-شلوووون؟؟؟

-رهف: خايبه انه هم مادري بَـس گبل لا نجي هنا تعاركت وطولت لساني وگام راد يكتلني لأول مرة من وره لساني الرشاشه وهيه اجت ونقذت الموقف

-اگلچ خاف ساحرته؟

-لااا خيه يحبهه الحُب يطيح اكبر زلممه اهمده حظچ

-غزاله: اي وعلي

رحت اغسل وشردت للصاله خاف هم يجيلي ويريد يكتلني ولو هوه بحياته ما يمد ايده عليّ بَـس اخافن منه اخاف ؏ ساعه تفلت اعصابه ويسويهه..

چانت هجران گاعده توكل بتهه وزنايب تدلل عليهه ماتريد تاكل...

-غزاله: انطيني خيه انه اوكلهه

-هجران: غزل لا شنو ابتليتي بيهه انتي

-غزاله: شني هالحچي ولچ انه اختچ

-هجران: فديتچ (انطيت الماعون لغزاله توكلهه واني رجعت لغرفتي ارتاح، لليل وگالو تعالو تعشو بَـس مالي نفس، هاللعبان نفس مدا يروح من عندي ماعرف شبيه..

اتصلت بأهلي وتطمنت ؏ بابا امي تگول هواي احسن الف الحمد لله، تمددت ؏ صفحتي وهستوني حسيت بروحي دا اغفى وانفتحت باب الغرفه، عرفته عُثمان من فتحته للباب، ظليت مغمضه عيوني وهوه طب بكل هدوء وراح للحمام..

طلع منه واجه تقدم ؏ الفراش حتى ينام، تمدد بصفي وقبلهه تقدم عليه حسيت بأنفاسه تضرب وجهي يمكن ديتأكد نمت لو بعدني..

باسني خفيف ؏ راسي ونام بمكانه، غمضت عيوني اقوى واني استرجع كلام صافيه، معقوله يطلع نفس بكر ويذبني ويتزوج؟ وليش ميطلع نفسه همه مو اخوان وعمو خليل ابوهم يعني كلهم يتشابهون العرق دساس..

غفيت واني افكر، حلمت بكابوس وفزيت من عنده مخروعه، چان هستوه ديأذن الفجر وصوت تكبير عُثمان واضح، گعدت ؏ حيلي وشربت مي من الدولكة البصفي..

باوعتله وهوه يصلي واني افكر ليش ميتچتف نفس خواله وولد خواله؟ هوه مو تربى عدهم ولازم يكون سُني نفسهم؟

كمل صلاه وسوه تسبيح بيده عرفته تسبيح فاطمة الزهراء، اتذكر اني العلمته عليه چان ميعرفله..

گتله الامام الباقر سلام الله عليه يگول (تسبيح الزهراء فاطمة في دبر كل فريضة أحب إليّ من صلاة ألف ركعة في كل يوم) وگلتله شلون الكيفيه كُلش سهل وبسيط هوه نگول "الله اكبر" ٣٤ مرة وبعدهه "الحمدُ لله" ٣٣ مرة و "سُبحان الله" هم ٣٣ مرة وانتهى..

من گلتله گال رح يلتزم ويشوف التوفيق لان گتله بي هواااي فضل وهواي امور بحياتك رح تتغير واحچي عن تجربه، ابتسمت واني اتذكر حديثنه بهاليوم چانت الدنيا تمطر واني حامل بزنوبه..

گام من الكرسي لان ديصلي عليه ميگدر يصلي ؏ الگاع يتوجع، شال السجاده والتربه وحطهن ؏ جهه..

-تقبل الله

-عُثمان: منا ومنكم

گالهه وضحك خفيف، كُلش خجلت لان ماصليت واكيد هوه انتبه، رجع ؏ الكرسي وفتح ضوه خفيف واخذ قرآن يقره..

-والله وطلعت متدين عُثمان

ابتسم وگال..

-لا أنَا ما متدين ليش اكذب بَـس هالعاده متعلم عليهه اقره قرآن واهديلو لأمي واكيد بكر ومرتضى ما انساهم

-الله يرحمهم بالعافيه عليهم

ظل ساكت ورجع يقره، ربع ساعه وسد القرآن وگام رجع ؏ الفراش، تمدد ؏ ظهره واني رجعت انام ؏ صفحتي اليمنه...

-عُثمان اگدر اسألك شي

-ممم

-انته محاولت شي يوم تحسن علاقتك ويه بكر؟

ظل ساكت مجاوب، استمر الهدوء بالغرفه لما يقارب الخمس دقايق واخيراً نطق...

-عُثمان: هوه كان مايريد يسامحني لا هوه ولا ابويه

-بَـس ليش مدا يستوعبون ان انته مالك ذنب بموتت امك!!

-هجران نگدر نسد هالموضوع ماحبو

-اي اي براحتك

سكتنه ورجع الهدوء بالغرفه، همست...

-اگدر اسألك شي ثاني واسفه اذا دا اللح

-لا اسألي

-خالتك صدُك كلامهه مضبوط؟

-خالتي صافيه؟

-اي

-لاء

-مو يگولون كلشي تگوله يصير

-لاء كذب ماكو هيك شي

-يعني الگالته الك ماتحقق؟

-چؤ (لا)

-متأكد؟؟

تنهد وهمس...

-عُثمان: هجران وين تردين توصلين؟

-ولشي ولا لأي مكان بَـس فضول عندي

دار بَـس وجهه يباوعلي وگال...

-اتطمني حبيبتي كلامهه مو حقيقي

-اي اني هم گلت لان گالت جواهر عساس حامل وحللت طلع كلشي ماكو

-تفضلي

-ايي احس ارتاحيت عُثمان

-لا تگوليلي خليتيهه تقره كفِك؟

-اي

-اححيييي هجران ليش يوليي

-عادي يعني هيچ بَـس مال ونسه

-لا هاي مو ونسه رح تظلين تفكرين بحكيهه وتتأذين أنَا اعرفِك

-لا والله هذا هوه نسيت حچيهه اني

تنهد وهمس...

-وين الصرگعانه

-اكيد يم غزاله نايمه

-ماشي تصبحين ؏ خير

-وانته من اهله

مر شهر واحنه هنا ننتظر جرح عُثمان يطيب، عميد واهله كلهم بقو بسبب خال عُثمان كساب لح عليهم كُلش بَـس عميد رجع اسبوع ورتب كم شغله ورجع علمود الگعده الثانيه والحمد لله فضوهه واخذو فصل من عدهم وحلوهه بدون دم ولا فصليه..

علاقتي بـ عُثمان نفسهه يعني ماكو أي جديد هوه يتغزل بيه واني اخجل وماعرف اجاوب كالعاده بَـس بعده هادئ ورزن يعني ميتعده الموضوع قبلة ؏ شفايفي هاي واني حلاله ويحقله يسوي اليريده بَـس هوه ابد ميضغط عليه ويحترمني حييييل..

اخيراً اليوم رح نرجع وبوجهنه نروح لـ بغداد حتى ناخذ جوريه وفيصل ونرجع بيهم للناصريه، اما احمد اخذ الكبار كلهم ورجع بيهم گبل للناصريه..

وصلنه لـ بغداد وبوجهنه لبيت شهد وسلمان لان جوري گالت تروح هناك حتى كلنه نلتم..

-جوري: هلاااا ولچ مشتاقيييين

حضنتهه بكل قوتي وبوستهه ومن فرحتي بيهه ظليت كامشه ايدهه لحدما دخلنه جوة..

-سلمان: حيّ الله من جانه هـلا بالضلوووع

-عُثمان بضحك: گحز يول جرحي لساتو

-سلمان: عااار مو بيدك

-عميد الدين: هههه تعال ولك چا انه اخوك شنهي ما تسلم عليّ

-سلمان: افااا چا انته الروح والريه

تباوسو وتحاضنو وسلمان كل شويه يحشش ؏ عُثمان وساعه يروح ؏ عميد الدين...

-سلمان: خايبين شنهي انه من يوم گلتولي عُثمان متصاوب گلت مايصيبه شي والحسين العار ما يموت

-عُثمان: عجل طمنتني اخاف يصيرلك شي وانته هينا وحدك

-عميد الدين: ههههههه ماتشوفني ما اخافن عليه

-سلمان: اشتعلو مروان وخلفته لازم تلوفوهه عليّ ماتگدرون

-عُثمان: منو گالك اندگ بينه يول

-سلمان: بسكم يله يا چلمة ردي مچانچ

گام وجابلنه عصاير، گمزت من مكاني حتى اخذ من عنده وشهد گالت...

-شهد: لاا هجران معليچ انتي گعدي تعبانه من الطريق

-هجران: خطيه ليش هوه يقدم لعد!

-شهد: عادي احنه متعودين ولان هسة اني خطر عليه الحركة الزايده كله هوه يشتغل بالبيت

-جوري: حتى شغل البيت؟؟؟

-شهد بضحك: كلشي كلشي غسل ملابس غسل مواعين تنظيف الغرف والحمامات كلشي هوه

-جوري: وميضوج؟

-شهد: لا ابد يعني بالبدايه چان يدردم لان اني مصختهه صراحة هههه لدرجة مي ماجيب لروحي بَـس بعدين تعود واصلاً ميخليني اگوم

-جواهر: ولشوكت تظلين هيچ؟

-شهد: لحدما يثبت الحمل تخيلو اگوله انته مو تريد طفل يله تحمل

ضحكنه كلنه ؏ سوالفهه ومن حچتلنه مواقف بيناتهم موتتنه من الضحك، تفرقنه عن الزلم بقو وحدهم واحنه رحنه بالصاله الچبيره نسولف..

لليل وسلمان گال يجيب عشى من بره لو اذا يعجبنه نتعشى بمطعم، اكيد اختارينه نطلع لمطعم وخطيه شهد تتوسل بـ سلمان حتى تجي ويانه وبطلاع الروح قبل..

بدلت لزنوبه واني هم بدلت وجواهر تنگ براسي حتى انزع الاسود بَـس ماگدر استحي منهم، لبست قميص اسود يوصل لنص الفخذ وعفته مفتوح وجواه كيمونه بني ولبست وياه تنوره بينسل سودة طلعت اللبسه كُلش حلوة وهم شي جديد بالنسبه الي لان ممتعوده اللبس تنانير واكيييد جواهر الي اختارتهه الي ورهمتلي..

حطيت مكياج خفيف وبرزته بحمرتي الاعشقهه وطلعت اشوف عُثمان لان اتصل عليه وگال يريدني..

اول ما شافني فتح عيونه وعظ ؏ شفته السفليه، ضحكت وگلت..

-هاا شبيك

-اخخخ هجران اخخخ

-ها عُثمان شمسويه؟؟

-حبيبتي خففي المكياج اكون قربانِك

-حبااب حلو طالع ويه لبسي

-لاا هجران ماگدر وبسطالو للحمزة اشتعلت روحييي

-هففف عثماان حبااب فدووه لخااطري

-استغفر الله استغفر الله

حسيته كُلش ضايج فَـہ اختصرت الموضوع وحتى متصير هوسه رحت خففت مكياجي ومسحت الحمرة، ادري بي كُلش يغار حتى قبل چان هيچ يعني مو شي جديد عليه..

رجعتله چان واگف ومچتف ايده وسارح بالفضاء..

-هاا هسة حلو؟

ابتسم وهز راسه، قربني عليه وباسني بگصتي وهمس...

-كثير حلو

-ههههه وين الحلو لخاطر الله

-اششش معليكي حلو

هزيت راسي وضحكت، طلعنه سوه وزنوبه لازمتهه بيدي، چانت طلعة كبلات وكُلش كُلش تونسنه وطبعاً لا تخلو الطلعه من عناد جواهر وعميد الدين وكل شويه طالع شعر جواهر وعميد يشوط..

-عميد: رحممة لهبلل ظمي شعرررچ

-جواهر: عميدييي ماسيطررر

-عميد: جيبيهه

اخذ منهه زمرد وخطيه شايل التوأم ثنينهن عاد عُثمان اخذ ياقوت من عنده وگعدنه تعشينه بعدين طلعنه لحديقه عامة حتى زينب وعلاوي يلعبون..

-هجران: عُثمان جيب ياقوت تعبت انته

-لاء عادي

شايلهه بيده ويبوسهه ويلعب بيهه، اجت زينب طايره عليه، تخوصرت بمكانهه وگالت وهيه مطنگرة...

-زينب: اييييع

-هجران: يااا هاي شبيچ!!

-زينب: ايييع هذييي

تأشر ؏ ياقوت ومغضبه، عرفتهه غارت منهه..

-عُثمان: لا بابه دحگيلهه شلون حلوة

-زينب: ايييع ايييع موهلووة ايييع

-هجران: زينببب عيب شنو هالتصرفاات

سكتت واجت تقدمت گعدت بصف عُثمان وتباوع لـ ياقوت وعاگده حاجبهه..

-زينب: ماهبهه

-عُثمان: لاا حبيبتي حلوه وتحبيهه دحگيلهه شلون انتيشه

-زينب: ماريييد

-هجران: زينب كاافيي

هدأت بَـس مستمره تباوع لـ ياقوت بحقد حسيتهه رح تاكلهه فَـہ گلت لـ عُثمان ينطينياهه، بعده هستوه ديمدهه الي وماشوف غير زينب لطمتهه لطمه خلت الطفله تنز وتصرخ صريخ خلت عميد الدين يجي طاير..

-عُثمان بصياح: هاااييي لييييش

صارت تبچي وتنشر وتأشر ؏ ياقوت وتگول..

-زينب: مااهبهه ماااهبهه اييييبع

-هجران: اني اعلمچ حسابچ بعدين

اخذوهه عميد الدين وجواهر وماكو الطفله اختنگت من البچي متتت من القهر والفشله، عُثمان معصب كُلش بَـس ماحچة شي واني صرت بنص هدومي منهم..

رجعو عميد وجواهر للبيت لان انوب صارت زمرد تبچي وانهرج المكان واني من القهر ماگدرت اگعد بعد...

-عُثمان فدوه خلينه نرجع

-عُثمان: امشينا

اخذ زينب من ايدهه وهيه بعدهه تبچي، جوري سألتنه وين رايحين گلتلهه نروح لبيتهه فَـہ انطتنه المفتاح الاحتياطي..

طول الطريق واحنه صامتين منحچي شي وزنوبه نامت بالسيارة من البچي تعبت، فجأة وگف عُثمان بنص الطريق گدام محل صغير يبيعون موطه...

-اشتريلِك شي تتبردين؟

-لا شكراً خلينه نرجع للبيت

-عُثمان: اهدي هجران ماصار شي

دمعت عيوني والحسرة صعدت حسيتهه ببلعومي..

-عُثمان: زنايب جاهله وغارت من جاهل ثاني هالشي اكثر من طبيعي هجراني

-لا عُثمان زينب صايره قاسيه وانانيه عفتهه مچانت هيچ

-يولي عمرهه اربع سنوات هالشي طبيعي

-عُثمان اني عفتهه شهر واحد وهيچ انگلبت لعد لو عايفتهه طول العمر شلون چان صارت

گلتهه وحطيت ايدي ؏ وجهي وبچيت، نزلت راسي لحضني وحسيت بي يمسد بظهري..

-عُثمان: كافي هجران لا تبكين حبيبتي تعالي وياي شو تعالي

رفعت راسي وهوه فتح باب السيارة ونزل، فتح الباب الخلفي واخذ زنوبه شالهه ؏ چتفه واشرلي حتى انزل..

طلعت وراهم وهوه راح للمحل الصغير وگعد ؏ الطاوله، كعدت گباله، المحل چان فارغ بَـس احنه لان الوقت متأخر، اجانه الرجال يشوف شنو نريد نطلب..

-عُثمان: أنَا اخذ فستق وانتي علويه؟

-هجران: بكيفك

باوعلي وفتح عيونه واني رأساً اجه ببالي من گلي ابد لتگولين بكيفك، گلت بسرعه..

-اني اخذ نوتيلا

ابتسم وهز براسه وطلبلنه، حسيته تعب شايل زنوبه هيچي هيه صح ناعمه كُلش بَـس هم هوه بعده مريض وميگدر يشيل..

-عُثمان انطيني زنايب اني احطهه بحضني

-لا يُبا خليهه مرتاحة

-مو انته تعبت

-چؤؤ عادي

الشارع هادئ والدنيا ليل والاضواء خفيفه، الاجواء حلوة ونسيم بارد خفيف يداعب وجناتي، اجه الطلب واكلنه وهوه كمل قبلي..

انتظرني لحدما كملت وردت اگوم وهوه گال..

-خلينه شوي

-ماشي

لزم ايدي واني ابتسمت، شابك اصابعنه سوه ويتمايزهن..

-عُثمان: المرأة البيضاء كل الرجال تعشقها لكن المرأة السمراء لايعشقها الأ الرجل الأنيق

-هههه حلووو

جر حسرة وباوعلي وگال...

-معشوقتي السمراء كيف أملها وهي التي في غربتي تسليني

-ملك الفصحى انته

-احبو واحبكي

-هههه هنيالي

ابتسم واني سكتت، صفنت ؏ ايدينه وهمست...

-شلون حبيتني واني موحلوة؟

تنهد وعيونه لسه ؏ ايدينه...

-فَرْقٌ كبير بين أن تحبها لأنها جميلة، وأن تكون جميلة لأنك تحبها

-يعني انته تشوفني حلوة؟

-وكل ما يصدر عن الله جميل، وإن كنا لا نرى الجمال في المصيبة

-ههههه يعني اني مصيبه؟!!

-انتي مصيبتي وبلاء احتل قلبي مخمليتي

-يربي ماعرف شنو اجاوبك يعني حرفياً تصفني بكلامك واسلوبك الفريد والجذاب

ذب نفس وظل يباوعلي، خجلت من نظراته ونزلت راسي، همس...

-انتي حلوة بعيني وبعين كلمن يقدر ابداع الخالق

-تدري تغيرت نظرتي بهواي شعلات من وراك

-مثل شَنو؟

-مثل صايره اباوع لشكلي بالمرايه وما انفر من روحي، اصفن ؏ ملامحي واگول اني مو بشعه اني حلوة بَـس بطريقتي المميزه المخملية

-بَـس اهم شي ماتشوفي نفسِك عليه

-ههههه لا ابد

ضحك خفيف ومسح لحيته، گام گال خلينه نرجع.. رجعنه للبيت وگبل نمت بفراشي وعثمان راح يفرچ اسنانه..

حضنت مخدتي والبسمه شاگه حلگي، احس بفرحة غريبه، اجه عُثمان ونام بصفي وجرني لحضنه بدون سابق انذار..

-عُثمان: تعبنه اليوم

-ايي كُلش

تنهد وظل يباوع لعيوني، اطرافي رجفت وگلبي صار يدگ، باسني ؏ جبيني وحضني لصدره..

غمضت عيوني واني مستعده ؏ ساعه ياخذ اليريده مني واني مراح اعارض لان هذا حقه وهواي زودتهه وياه بَـس فاجأني من مصار شي..

ابتسمت فرحانه وكُبر بعيني اكثر واكثر، گعدت الصبح هوه مو بصفي بَـس زنوبه نايمه، طلعت بسرعه اشوف وينه رحت للمطبخ اشوف يمكن جاي يتريگ بَـس هم ماكو..

رحت لغرفة جوريه دگيت الباب ومحد يجاوب، طلعت للحديقه وماكو احد، رجعت للمطبخ الوب اروح واجي هاي وينهم ذوله؟؟

سمعت صوت جوري جاي من الحديقه الخلفيه وصوت بتهه مريم تبچي، ركضت عليهه وسألت..

-جوريه شفتي عُثمان شو ماهوه؟

صفنت بوجهي ثواني وارتسمت ؏ وجهها ملامح حزينه...

-جوري: رجع للانبار

-لييش؟؟

تنهدت بعمق وحسيت بسيخ نار دخل بگلبي من گالت...

-جوري: راح هناك علمود هاديه

-شنووو؟؟؟

-جوري: خسرتيه هجران خسرتي عُثمان!

يتبع☘️...

♛ ♛ ♛ ♛ ♛ ♛ ♛ ♛ ♛ ♛
لتنسون التصويت والتعليق بين الفقرات شباباتي🌵💋

داريتكم بالقفله اليوم ترا🙂.