『قٌصص ﺑٱرۅد』

⍅ام دميعه⍆

مساء القوة والنشاط عليكم 🖤🌟

بـ المدرسة چانت عدنا طالبة صغيرونة شكلاً و عمراً ... فترة داومت و بطلت بعدين مادري انقلت لغير مدرسة او اني الي افتهمته هيچ

الحاصل .. البنية چانت فقيرة بس دائما چانت تبچي .. اني مچنت مفتهم شنو السالفة لان هي بالاول ابتدائي واني بصف ثالث بوقتها ..

بس الي چنت اشوفة تروح يم الادارة وين هاي الرسومات الي ع الحياطين مال زرع و ورد اكو سنادين مال غرفة المعلمات .. هناك تروح تگعد بـ الگاع وتبچي و بعدين تجيها معلمة من المعلمات تاخذها ..

هـ الموقف اني شفته اكثر من مرة و حتى اصدقائي هم شايفي ..
الحاصل بطلت البنية ..
وراحت نسيتها بعد وما شفتها بـ المدرسة .. صدفة فد يوم ابوية اخذني وياه لبيت صديقة زيارة بنفس منطقتنا بس شوية ليگدام .. صديقة بوقتها چان مسوي حادث و رحت وياه..

شفت البنية نفسها هناك و تذكرتها .. سألت ابن صديق ابوية عليها لان جهال بذاك الوقت و ماعدنا شي نسولف بي غير المدرسة لو اللعب ..

گال هاي جوارينا بيتهم هناك و رئساً شمرله حچاية بنص الحچي امها خرسة..
.. گلتله خرسة امها خرسة ..
گال اي و تحچي كله ابااا ابااا ..
گلتله انت شايفها؟
گال اي ..

طبعا بذاك الوقت چنت طفل اني و تفكيري محدود حتى لو چنت صف ثالث ابتدائي .. و تفكيري حالي حال الي بعمري .. بس شوية شوية من كبرت عرفت الدنيا شلون ماشية ..

چنت فضولي يمكن و سخيف .. لان گبل گلتله شلونه شكلها و گمت اضحك ويا ابن صديق ابوية ..

گال تخرب من الضحك تگول كلمات ممفهومة ..
گلتله امشي يم بابهم نشوفها .. گال امشي و دلاني بيتهم .. شوية ليغاد من بيت صديق ابوية ..

رحنى و طبعا بقينا واگفين ومحد ما طلع و بعدين طلع ابويه من بيت صديقة و صاح عليه و رحنى..

.. رجعت لبيتنه و ثاني يوم حچيت لصديقي بـ المدرسة وچانو بعد جهال گاعدين ..

گلتلهم تذكرون هاي ام دميعة الي تگعد يم السنادين وتبچي ..
گالو اي ..
گلتلهم امها خرسة وتحچي كله ابا ابا ..
واحد من الكاعدين ما اعرفه اصلا .. طلع اخوها ..
گمز عليه و خبزني خبز دفرات و جلاليق .. طلعت السالفة شنو ..

البنية چانت تبچي لان اكو طالبات وياها من نفس شارعهم بنفس الصف وياها .. يگعدون يشاقون وياها و يسألوها على امها شلون تحچي وياهم بـ البيت و همه شلون يفتهمون ..

و يتمضحكون عليها مثل ما اني اتمضحكت و ابن صديق ابوية تمضحك ..

وهي تروح تبچي .. زين اخوها ميگدر يكتل البنات و لا يتعارك وياهم .. هي تروح للبيت تحچي لابوها و اخر شي ابوها بطلها سنتين و بعدين رجعها للدوام بغير مدرسة و كملت دراستها البنية ..

طبعا هـ التفاصيل عرفتها بعدين ..
الحاصل و الي صار
وره ما كتلني اخوها صار صديقي .. و السبب بصداقتي هو ست رافدة .. هي چانت المعلمة مال صفهم لان هو بغير صف ..
صالحتنا و خلتنا نتباوس ..

و صار اعز صديق اليه بفترة الابتدائية .. و مشت السنين و كبرنا كلنه ... بس كل واحد راح بـ مكان و بتخصص ..

اني بوقتها انتقلت لغير مدرسة و بعدين داومت متوسطة و اعدادية و السالفة كلش نسيتها .. و هو هم تقريبا نسيته لان ما التقيت بي بعد و ابوية باع بيتنا وگعدنا بالمنطقة بس جوه كلش بالچعب ..

و داومت كلية و تخرجت و توظفت ..
وظيفتي خارج منطقتنا طبعا ..

فد يوم رحت اني و زوجة اخوية علمود لقاحات بالمستوصف .. و بالمستوصف شفت موظفة حلوة .. و كلش عجبتني البنية ..
ساعدتنه اني وزوجة اخوية .. بس بقت براسي لان تخبل ..

من طلعنه من المستوصف گلت لزوجة اخوية و طبعا هي تصير بنت عمي شك المنشار .. گلتلها شفتيها شگد حلوة؟
گالت ها نويت (و چانت تقصد ع الزواج لان اني الوحيد من بين اخوتي ممتزوج) ..

گلتلها عمي بس گلتلچ شفتيها شگد حلوة مگلتلچ اريد اتزوجها ..
گالت والله حلوة و مبينة مؤدبة ..
گلتلها هو على حظي هسة بس اريدها الگاها متزوجة لو مخطوبة .. گامت تضحك وگالت صدگ تحچي يعني؟

گلتلها والله اذا هاي الحلوة صدگ ..
گالت تدري منو يداوم بالمستوصف هذا بس هسة ماخذه اجازة؟
گلتلها منو؟
گالت فلانة الي بيتهم بظهر بيت عمي فلان ..
گلتلها بالله سأليها على هاي الموظفة الله عليچ ..
و چان تسألها و گالت هاي مرباية و حبابة و ممتزوجة و لا مخطوبة و بيتهم بفلان مكان يعني بمنطقتنا ..

اني بوقتها مربطت و لا جتي بعقلي راح تكون نفسها اخت الي تعاركت وياه والي امها خرسة (يعني نفسها ام دميعة) .. والله العظيم ولا جتي ببالي ..

و چان اسأل عليها وتطلع هي ..
ما اعرف بوقتها شصار وياي .. يعني چانت مفاجأة و گلت سبحان الله معقولة تصير من قسمتي واحچيلها كلشي .. و فوگاها اخوها صديقي چان و اعز صديق بوقت الابتدائية ..

والله سهلها و تقدمتلها و صارت قسمتي بس اخوها تفاجئ گالي لك والله مصيبة هـ الدنيا .. يعني تعرفت عليك بعركة من وره اختي .. و فوگاها صرت صديقي وراها .. و بعدين غطيت سنين و سنين و تاليها طلعت وجيت طلبت ايد اختي هههههههههههههههههه ..
طبعا هـ الحچي ورى الموافقة و تحديد وقت الزواج ..

و تزوجنه و حچيت كلشي الها و هي مچانت تعرف بهل التفاصيل لان اخوها محاچي شي ..
گالت ممعقولة والله .. گلتلها سألي اخوچ عمي اني چذاب سألي اخوچ..
و اخوها حچالها ..

سبحان الله .. يعني بقت براسي قصتها و انكتلت من اخوها وتاليها تروح سنين و تجي سنين وتصير مرتي .. و الحمد لله هسه عايشين ومرتاحين و احلى لقب اگوله الها وهي تخرب من الضحك من تسمعة .. من اگلها ام دميعة

ههههههههههههههههههه تخرب من الضحك و تگول اذا الله رزقنا ببنية سميها دميعة حتى يطبق لقبك الي لازمة عليه من الطفولة لليوم هههههههههه ..

بالمناسبة هي امها عايشة و الله الله الله على گلب امها وروح امها شگد طيبة .. الله على حب ابوها لأمها الي متحچي ولا كلمة ..

ابوها چبير كلش الله يحفظة ... روحه من الدنيا زوجته .. يعني ثنينهم ولا شعرة سودة براسهم بس الي يشوفهم من يگعدون سوية يگول شنو هذولة يمرون بفترة مراهقة متأخرة ..

من نظراتهم مبين مدى حبهم وتعلقهم واحد بالثاني ..

طبعا مرتي حچتلي شلون ابوها يحب امها .. تگول لو شگد ما احچيلك على حب ابوية لأمي اكون مقصرة .. يعشقها يموت بيها مووووت و يفتهمها من نظرة عيونها وحتى احنى بالبيت كُلنا نفتهمها ..

يعني ابد منحس امنه خرسة و ماتنطق .. لان عيونها تحچي مشاعرها تحچي دموعها تحچي ابتسامتها تحچي كلشي بيها يحچي بس لسانها للأسف ميحچي ..

سبحان الله ع القدر .. سبحان الله ع القسمة ..
و اخيراً..
الله يحفظ اخونا هو وزوجته و يحفظ ام زوجته وابو زوجته ..
والله يحفظكم و يرزقكم القسمة الحلوة .. والمتزوج بيكم الله يرزقه كل خير ..
انتهى
ام دميعه