اسيرة قدرك

البارت 71

اسيرة قدرك..
بقلمي رسل..
البارت الواحد والسبعون مفاجا..
واتباد rasolaa7

(مرينه بيكم حمد)
بالله شعجب مريتو
(واحنه بقطار الليل)
اي ادري ماحنيتوا
(وسمعنه دك اكهوه )
هذا انه ادك اكهوه
وحتى اكتب اعله الهوا
بنص روحي اكبر جرح
وجبتولي صمة ملح
وفوك الجرح خليتوا..

-دخلت اريد ادخل اسبح نزعت ملابسي وانصدم بجسمي كل مكان بي طكعه جبيرة زركة دم محصور وصاير منظر مرعب خفت
ياربي اكيد هذي من القهر اني مطلعت قهري لا بجي ولا صريخ بقيت كاتمته عيني على جسمي بقهر وخفت على ماما من تشوفه تنهبط
سكتت وصحت على سرى هي اجتي
وبس شافتني ضربت على خدودها..

-ولج هاي شنو جسمج شصاير بيج..

-اش ولج لا تسمع ماما و هي منا مقهورة الي
بيها كافي عليها..

-زين حبابه امشي وياي خلي بس نشوف
شبيج ما يصير هيج تسكتين مو زين والله..

-يمعودة ماكو شيء هاي شوطة من القهر
والهبطة هيج صار..

-شكد توسلت سرى بس جنت قافلة لان
واضح هاي من القهر واني ما الي خلك اطلع
واشوف احد سكتتها ما قبلت تحجي شيء
ما ردت ازيدهم قهر وقلق عليه..

-كم يوم مر على وجودنا يم بيت عمي وريا
مصرة ما تحجي ويا مهاب من وره خواته..

-اليوم رجعنا لبيت اهلي و نتحاشى عمر
يوم عن يوم حالتي النفسية تتعب مهاب طلعته
من فكري ولا صار يعنيلي مستحيل افكر بإنسان خدعني وكذب عليه رغم سمر وناز يتصلون مهاب هيج حالة ويوم عن يوم يتعب ومتندم
على الي سوا بيج بس اتعجب على نفسي
اكره سيرته من يوم الي صدمني هالصدمة..

-مرات افكر لو ناز ما حجت بوقتها وهو مستمر
بالجذب عليه جان بس الله الي يعلم بحالي هسه
واني رجلي صاير لعبة بيد خالاته الما يخافن
الله..

-هالفترة كاطعت ناز وسمر مردت اسمع خبر بمهاب يصدمني ولا اريد اعرف اخبارهم
اريد اتعود اسحب نفسي منهم وحذرتهن هم
اذا حجلي بعد عنه ينتهي كل شيء بيني وبينهن..

-مرت فترة مو جبيرة على  طلاكي وهنا
بديت اشك بنفسي حامل لان عندي اعراض
بس هالمرة خوفي اكبر من فرحتي ما ردت
اكول لاي بشر حتى ماما مردت تعرف لان
اعرفهم كلش زين بس اطلع حامل ويعرفون
بهالشيء راح يزيدون همومي ويكولولي ارجعي ولخاطر الي بطنج وابوه من حقه وخطية
وطلاكم باطل ومن هالحجي الي اكره لان
ينسون كل الظلم وراح يوكفون ويا مهاب..

-كم يوم وشكي زاد بحملي الحالة الي بيها
اني والنار الي بكلبي بس ربي يعلم بيها
خفت لا يكتشفون و يضغطون عليه لهذا
نويت اذبه اسوي اي شي بس حتى ينزل
هالطفل اذا فعلا جان موجود الي ياما ايام وسنين انتظرت فرحته انتظرته ينور ويكمل عائلتنا واخلص من حجي الناس الما يرحم..

-بس سبحان الله اجه بوكت صعب افرح
بي وما اريد شيء يربطني بمهاب اخذت
كم يوم لو اضرب على بطني
لو الدرج انزله واصعده هواي بدون محد
ينتبه عليه مرات اشيل دبة غاز متروسة ابقى شايلتها دقايق وادعي ربي بكلب محروك
اذا بطني شايلة طفل موته ولا يجي ويتمرمر بين ام واب منفصلين ويتعلعل بينا..

-ضميت هل سر وقررت اطلك محكمة بأسرع وقت حتى بعد محد يجبرني ارجع وهم خايفة
لا صدك حامل ويطلع طلاكنا باطل وهالمرة
ما يصدك مهاب هو يريد حجة بس حتى ارجع
واني قافلة عليه لان الثقة الي بينا انتهت..

-هالقلق والتعب يوم عن يوم اثر على نفسيتي تعبت بشكل وصارت عندي جفله من اقل شيء واي شخص يتقرب مني لو اسمع
صوت افز وابجي تعبت حيل امثل القوة
واتظاهر بس لهنا وخلصت طاقتي..

-طلبت من ماما نروح مشيء للامام الكاظم
عليه السلام حتى اذا مسافة نمشي ردت مرادي وحوبتي منه لان تدمرت اخذتني وطلعنا
وصلنا دخلت الضريح ودموعي صارت
تتسابق بالنزول وابجي بحركة كلب اشكي
للامام حالتي وازيد بالبجي من اتذكر شلون
كاعد يمها ومبين فرحان كل صدمتي ومرضي
من هالمنظر الي ما يروح من بالي..

-استمريت ادعي واشهك ما ردت اطلع
منا اذا ما ذابه حملي يم اهل البيت والله داخل الضريح وجان ينشمر عليه جكليته وعلك صغير اخضر اخذتهن وضليت اتلفت بس ما عرفت
منو منهن شمرتهن عليه لان جانت هوسة
بقيت اباوع اريد اشوف منو ديوزع ماكو احد
اخذتهن واردد دخليك سيدي ومولاي برد
كلبي وارشدني للصح..

-طلبت من ربي يتكفل بحياتي وما يصير غير
بس الصالح الي بحق عظمة الامام زرنا
وكملنا وطلعنا قبل لا نرجع رحت للحمامات
اغسل لان تعبت كلش دخلت وانصدم بالدم
الي نازفته ومنا عندي أوجاع بطني بهاي الحضه خفت كلش واستعزيت اذا جان طفل حرام اخسره يمكن هو اليكون الي سند تالي عمري ويمكن ميصير عندي غيره شلون كدرت اني ادعي
على روح بعدها ما شافت النور شلون انطاني
كلبي وردت اذبه واني الي جانت امنية بعمري
انو يصير ويرزقني الله بي..

-غسلت وطلعت واني بحالة شك بين الشهرية وبين الحمل رجعنا للبيت واني منتهيه من تعب بسرعة نمت وهم ما حجيت شيء لاي احد
جانت كل مخاوفي انو حامل ويضغطون عليه
ارجع للي ما قدرني ولا حسب الي حساب..

-ثاني يوم حسيت روحي لهنا وكافي بعد ما اتحمل
اكتم لازم احجي الي بيه واشوفلي حل
اتصلت على صديقتي هاي كلش قريبة عليه واحجيلها كل شيء من جاوبتني حجيتلها
عن كل الي صار بيه وشلون دخلت عليهم
وشلون تخبلت عليهم الا اتطلك ما ضميت
عنها شيء وحتى عن شكي بالحمل كتلها..

-هي رغم انقهرت بس شجعتني على سوايتي وياهم وكل شوي وكالت عاشت ايدج صدكي
الي يسويها مرة يعيدها الف مرة ابد لا تفكرين ترجعيله خليج قوية ما يفيدج هذا والعصر امرلج نروح لطبيبة طلعي عذر وتعالي وياي نتاكد
ما يصير تهملين نفسج..

-من بعدما حجيت وياها كلت الماما راح اروح
الصديقتي مخنوكه هم اغير جو وهم امها تقرأ عليه هي كالت روحي يمه بس منو يوديج؟!..

-هي تجي عليه حجيتها وكمت احضر روحي
للعصر اجتي صديقتي عليه طلعت وياها
رحنا كبل لطبيبة ومن بعد الفحص والتحليل
طلعت حامل وبعده بدايته كلمة حامل هالمرة
من سمعتها صرت بين نارين بين الي فرحت
وانو اخيرا الله رزقني بهالنعمة الي جنت اضن
روحي نحرمت منها هالنعمة الي شكد نذرت
حتى بس احس بطفل بداخلي
وبين الحيرة والخوف من الي جاي من اهلي
قبل الناس بس راح يعرفون راح يضغطون
عليه ارجع واني الي دست حتى على كلبي
في سبيل كرامتي وفي سبيل اخلص من الي
هنت عليه..

-طلعت من الدكتورة واني بحيرة ومنا
الحمل مهدد بالأسقاط انطتني علاج استمر عليه صديقتي مرضت ارجع اخذتني وياها البيتهم
كالت غيري جو يمنا دخلنا وامها رحبت
بيه والظاهر تعرف بحالتي لان ضلت
تحجي وياي ورزلتني لان اكتم كالت..

-هذا الي بجسمج كله بسبب صدمتج وكتمانج
صار تخثر بالدم زين ما نجلطتي ومنو يفيدج
لا تكتمين بداخلج ابد ترى تنجلطين وساعتها
محد يفيدج اذا خسرتي صحتج..

-بعدها كالت احجي كل شيء لا تضمين
شيء اعتبريني امج اختج وجايه تشكيلها
فعلا خلتني احجيلها بديت احجي عن كل شيء وهي وياي من اريد اسكت وسالتني سوال
وخلتني اكمل بحيث والله من كملت حسيت براحة عجيبة تقريبا ساعة ونص واني احجي كل همومي الي كاتمتها بداخلي وما يعرف بيها
بس رب العالمين الي اقرب الي من الكل
اني هواي جنت كاتمة ما جنت احب احد يعرف
بمشاكلي ولا ضعفي لهذا جنت اكتم بس اليوم
احس روحي انفجرت الله ينطيها خلتني كل شيء
احجي بحيث هي حست عليه ارتاحيت
اخ يالكتمان شيسوي هالشيء حسيته من بعدما
حسيت بالراحة وره ما فضفضت الها عن همومي.. تشكرت منها وهي خطية كالت شوكت متحسين نفسج تعبانة اتصلي واحجي.. رجعت منهم واحس شيء جان جاثم
على صدري نزاح..

-بقيت ضامة حملي عن الكل ما عدا بس
صديقتي وامها يعرفن وخطية هواي يسال
عليه ويحجن وياي مهاب شكد يدك ويتوسل بس ابد ما اتحمل اسمع صوته احسه يخنكني
ابد ما اجاوبه لان احس شيء بينا نهدم وهو
سبب بكل شيء من استغفلني ورغم هذا
محاولاته مستمرة..

-اتصلت على زيد هو جاوب.. ها خوية
رايدة شيء؟!..

-اريد كل غراضي بلا أمر عليك تجيبهم
الي.. هو كال ادللي بس نورهان ليش هيج
دمرتوا روحكم ما ناوية ترجعين مهاب وندم
وداعتج واحنا هم اشتاقينالج يعز علينا فراكج
عزيزة علينا..

-اسمع وداخلي ما يهتز.. ضحكت بعد اطلكنا
زيد وان شاء الله اتصل بيكم انت والبنات
اخوك الله يوفقة لا تخاف عليه باجر يتزوج
وينسه..

-تنهدت شوكت اخلص اذا عرفوا بحملي
شراح يصير كم ساعة واتصل عليه كال
اني بالباب طلعتله وانصدم بمهاب ويا
سديت الباب بوجهه بس هو دفعه و اترجاني
بس اسمعه اباوع عليه شصاير بحاله
متغير كلش سبحان الله هو وخالاته رادوا يكسروني ويدمروني تالي رجع هالشيء عليهم هو اتقرب مني..

-نورهان اعتذرلتج كافي عاد ساعة
شيطان والله والله انتي النفس وبغيابج مختنك..

-ضليت اصرخ.. اطلع برا اطلع شكو جاي
طلعوا.. هو يحجي واني اصيح طلعوا منا
الجذاب طلعوا التفتت على زيد ليش جبته
وياك مو حجيت وياك ليش هيج..

-زيد اخذه طلعه برا كوه واني دخلت للبيت
وداخلي يفور راح يجلطني يلا يرتاح
شيفيدني ندمه من بعدما سمع كلام خالته
وشمتهن بيا ودمر حياتي وحتى ريا تدمرت
بسببنا هي ورجلها..

-دخلت الغراض وافكر بطلاكي الي طلع طلاك باطل بسبب الحمل بس شوفة مهاب خلتني
اقفل انو اخلي هالشيء سر بداخلي منا
لما الله يفرجها عليه..

-شكد حاولت اطلك محكمة بس جان الرفض قوي من بابا وعمر تالي سكتت اضحك على
روحي طلاك واني حامل ابد ميرهم لهذا
غلست عن موضوع الطلاك وقررت
ادور شغل التهي بي من التفكير..

-خابرت صديقاتي كلهن وطلبت منهن يشوفلي اي شغلة لان تعيين ما متعينه تالي وحدة منهم عدهم روضة اهلية ومحتاجين موظفات كالت
تعالي ويانا اشتغلي بالروضة ما صدكت
ثاني يوم اخذت اوراقي وطلعنا اني وريا..

ريا..

-من بعد مصيبة نورهان وطلاكها رحت اني هم زعلانة والسبب خواته الي زودنها كلش وطاقتي خلصت وياهن تزوجن وما خلصت منهن
هواي تحملت لخاطر اسر بس هالمرة
زادن عن حدهن بالي سونه ويا نورهان..

-هالفترة اسر شكد يتصل عليه ويريد بس اجاوبه واني رافضه نهائي نفسيتي تعبانه منهم كلش
واعرف بي كم يوم ويرجع بحجة اهلي وخطية
وهم يضيع حقي..

-كم يوم واحنا بييت عمو بس بعد متحملت قباحة مرت عمو كلت النورهان امشي نرجع على شنو متشردين من عمر الي كدرته بس علينا..

-لمينا غراضنا ورجعنا تمارة تلكتنه تتأفف وضايجة من عدنا اتمنيت تفتح حلكها حتى
اذب كل القهر بيها بس هي مدري شعجب
هالمرة ابتعدت عنا من شافت وضعنا..

-شوي ما نسمع غير بس صوت عمر الي
يصيح على امي شلون بناتها وحدة متطلكة
والثانية زعلانه وصايرات صلفات..

-انقهرت من عنده كلش بمكان ما يكون
سند النا ويوكف بوجه الي ياذينه لا جاي
يصيح ومعترض على كعدتنة بيت اهلي
صحت.. شتريد بيت ابويه ومثل ما الك حق بي
النا حق نزعل نطلك بس هالبيت الي يلمنا
لا تصير النوب انت علينا كافي مليت منكم
كلكم والله مليت تفكر بس بروحك وبكلام
الناس وخواتك ما هاماتك هي هاي خوة..

-هو رجع يرعد و اشتدينه بالكلام سرى
اجتي سحبتني ودخلتني.. ضربت على رجليه..

-ولكم كافي مليت وين ما اروح حرب
وحقد وناس تكره ناس وين اولي مو انتهيت
والله بس والي خلق الكون ريا الفقيره بيدي
راح ادفنها واريد اشوف احد يدوس عليه
الا لتخبل عليه كافي ظلم هنا ما ارتاح
وما تردرني هناك نفس الشيء ادري
شمسوية الكم وما ادري..

-خطية سرى بقت مصدومة بس خلتني
افرغ غضبي لان فعلا مليت حياة بس مشاكل
وحقد..

-كم يوم ونورهان قلقتنا عليها صارت
بيها جفله وتصفن هواي ومن احد يحجي وياها تفز فزه قوية ومانشوف غير بس دموعها
خفنا عليها وضعها ابد مو طبيعي رغم نحجي بصوت كلش خفيف بس هم هي تخاف وتفز
خفت عليها كلش لا تصير مثل حالتي
وانقهرنا لان نعرفها قوية بس الظاهر تعبت اختي..

-اسر ماكو يوم يعدي مايتصل وارفض ارجعله كارهته كد ماخله اهله يتمادون عليه
كل ليلة يدز لو شعر حزين لو اغنية حزينة تعبر عن حالته ويجبرني أرفع خط اسمع مرات
نبجي سوا وبس صوت شهكاتنا تنسمع
الظاهر هو هم واصل مرحلة من التعب من اهله..

-نورهان طلعت بسالفة الدوام وكالت خلي
نطلع نشوف العالم نلتهي بالشغل وقررت اداوم وياها بالروضة الي جانت اهلية واني ما صدكت اي شيء اشتغل المهم انشغل واحاول اعتمد
على نفسي..

-وبيوم طلعنا اني ونورهان للسوك جنت محتاجة كم شغلة للبنات من رجعنا للبيت من بعيد اشوف سيارات طابكات يم الباب ونزلوا منها زلم باوعت لنورهان..

-هاي سيارة رجل حماتي والثانية لابو جود
وجان اسر وياهم بهاي الاثناء دكت عليه
سرى رفعته جان تكول..

-ريا اسمعيني لا ترجعن للبيت هسه حجتها
وسدته بدون ما نفهم شيء....

يتبع....

اللهم صل على محمد وال محمد❤️