مساءا بعد أن استيقظت نوران وأبدلت ملابسها
توجهت الي جناح ناريمان لتطرق طرقات خفيفه تدل علي رقت صاحبها
دخلت بعد أن سمحت لها ناريمان بالدخول
_مساء الخير
قالت نوران هذه الكلمات لتلك الجالسه بهدوء علي مقعدها
هزت ناريمان رأسها كرد علي تحيتها واردفت : ده مش معاد الدوا بتاعي وبعدين انتي شغلك إبتداءاً من بكره
_عارفه بس مش كل العلاج بيبقي دوا في حجات تانيه
=زي ايه؟!
_شويه تمارين بسيطه
ضحكت ناريمان بسخريه واردفت : أنتِ جايه تهزري صح ..انا مبتحركش من علي الكرسي ،هعمل تمارين؟!
_ لاء طبعا ،انا الي هعمل
نظرت لها ناريمان بإستغراب لثواني وكانت الأخري تقترب منها بتحفذ حتي أصبحت أمامها مباشرةً
وبدأت بتدليك أكتافها ويدها
ثواني وارتخي جسد ناريمان تحت لمسات نوران الحنونه
تحدثت ناريمان بحنين : تعرفي انتي فكرتيني بحركتك دي بواحده غاليه عليا الله يرحمها ..كنت بحبها جدا
توقفت يد نوران عما كانت تفعله وشعرت بالربية لما أغلب من بالقصر قد مات
وعندما طال وقوفها تسألت ناريمان بترقب:
-وقفتي ليه؟
اكملت نوران فعلتها نزولا إلي رجلها وظلت تدلكها برقه وعندما انتهت نظرت لناريمان بتوتر وظلت تفرك يدها بإنتظار تعليقها
شعرت ناريمان بالراحه لهذه الفتاه وكم اعجبها ما فعلته ولكنها لم تظهر ذلك بالطبع واردفت
_ انتِ كنتي بتعملي كده لمامتك صح؟
تذكرت نوران والدتها واخواتها وتحدثت: أيوة ..حضرتك تؤمريني بحاجه تانيه
_لاء
وعندما أصبحت نوران أمام الباب تحدثت ناريمان وقد تذكرت شئ : إنتِ اكلتي حاجه من ساعه ماجيتي
_ انا كان معايا اكل جبته وانا جايه وأكلته
=طيب اندهيلي زُمرد
_حاضر بعد اذنك ناريمان هانم
فور فتحها لباب الجناح اصتدمت بشئ صلب لكنه ليس بجماد أيعقل!! أنه إنسان وعند هذه النقطه نظرت للأعلي قليلا وجدت زوجين من العيون الزرقاء تنظر لها بترقب وعندما التقت أعينهم لثواني ابتعدت سريعا عنه ونظرت أرضا من إحراجها
تحدث هو محاولا أن يبدو طبيعيا بعد أن رأي كل هذا الجمال والبراءه أيضا بشخص واحد : احم...انتِ الشغاله الجديده
بعد أن كانت تنظر أرضا بخجل رفعت عيناها الزرقاء له بحده قائله : نعم!!
تدخلت ناريمان في الحديث قائلة: دي نوران المرافقه بتاعتي يا مراد
_اه تمام
لم يعيرها إهتمام وأكمل كلامه متوجها لجدته وهو يدخل الجناح
وعندما شعرت نوران بأن لا يوجد سبب لوجودها هُنا
استأذنت ناريمان
وانصرفت بهدوء وأغلقت خلفها الباب
وظلت تنظر حولها بضياع تحاول أن تجد المطبخ لتنده علي زُمرد
_بتدوري علي حاجه
انتفضت بفزع عندما سمعت صوتاً ما اتيٍ من خلفها ووضعت يدها علي قلبها تهدئ ضرباته واردفت بهدوء بعد أن هدئت
_ اه بدور علي المطبخ علشان انده زُمرد
مد يدهُ لها قائلاً : انا نبيل وانتِ؟
صافحته وحاولت أن تسحب يدها منه بهدوء لكنه كان ممسكاً عليها بإحكام : انا نوران مرافقة ناريمان هانم
_اتشرفت بيكي يا نوران
نظرت له ثم ليدها التي يُمسك بها
فَهم هو ما تُرمي إليه وترك يدها قائلا : اوه اسف بس ملمس إيديكي ناعم جدا
احست بالنفور منه ومن كلماته وإيضاً نظراته التي تتأكلها من أعلاها لأسفلها فأردفت بضيق: ممكن حضرتك تقولي المطبخ فين
_ بما انه أول يوم ليكي في القصر فأكيد مش هعرف اوصفلك وزي ما انتِ شايفه القصر كبير ..تعالي انا هوريهولك
=لاء شكرا
وأثناء حديثهم تأتي فتاه ذات ملامح جميله مرتديه فستان احمر قاني مُطعم بحزام عند منطقه الوسط بالون الاسود قصير يظهر جمال ساقيها ويكمل الفستان جمالا الحذاء الاسود ذو الكعب العالي الذي يدل علي أناقتها
تحدثت موجه حديثها لنوران : انتِ البنت الجديده
_ أيوة انا بعد اذنكم
تركتهم وهبطت علي الدرج للبحث عن المطبخ في هذا القصر العجيب
اردفت مُرجان بأسف بعد أن ذهبت نوران من أمامهم
_خُساره البنت شكلها طيبه
اكمل نبيل بخُبث
=متتخدعيش بالمظاهر
_ياريت تسيبها في حالها البنت شكلها بريئه
=ياريت انتي تخليكي في حالك ولا اقولك ثم اقترب منها وهمس بأُذنيها : خليكي في حبيب القلب الي هتضيعي عمرك كله وأنتِ مستنيه نظره منه
ألقي هذه الكلمات علي مسامعها ثم تركها وعلي وجهُ إبتسامة خبيثة
..
_زُمرد
إلتفتت زُمرد لتلك الواقفه خلفها ويبدو عليها الضيق واردفت: نوران ايه الي منزلك المطبخ
_وفيها إيه لو نزلت؟!
=مفيش بس اصل المطبخ محدش بيخشه غير الخدم بس والجنايني
_ زُمرد حبيبتي علي فكره احنا مش خدامين احنا اسمنا بنشتغل بعدين هو فيه هنا جنينه
=اه في ضهر القصر
_ غريبه مع أني كنت فاكره أن حولين القصر صحراء
= لاء ده فيه جنينه وجميله بس مراد بيه مش بيخلي حد يجي جنبها مفيش غير الجنايني بيسقي الجنينه ما عدا الورد ،مراد بيه هو الي بيسقيه وبيهتم بيه
_ده مراد ده مغرور جدا
= ايه ده أنتِ شوفتيه
_اه شوفته بس هحكيلك بعدين انا جيت علشان اقولك ناريمان هانم عوزاكي
=طيب انا طالعه وأما ارجع ابقي احكيلي
....
سألت نوران فوزيه بحيره
_طنط فوزيه هو حضرتك مجهزه كل وجبه لوحدها ليه؟!
لوت فوزيه فمها وتحدثت بتهكم :والله يا بنتي سكان القصر دول تعبوني كل واحد بياكل لواحده وكل واحد عاوز اكل معين مبلحقش اعمل كل الاكل ده لوحدي علشان كده زُمرد بتبقي معايا في المطبخ اغلبيه الوقت
_وعلشان كده طلبوا مرافقه لنريمان هانم لإن زُمرد مش بتبقي فاضيه ؟!
اكملت نوران بهذه الكلمات بتساءل
= عليكي نور ،مفيش بس غير يوم الجمعه الي بيتجمعوا فيه وياكلوا مع بعض من نفس الاكل الي بتختاره ناريمان هانم ،اما بقا بقيت الايام بنودي لكل واحد فيهم الاكل لحد عنده
_ بجد القصر ده غريب جدا والي عايشين فيه اغرب
تدخلت زُمرد ف الحديث مُردفه بعد أن أتت للتو
_الي عايشين فيه بيحبوكي
_ وأنتِ عرفتي منين بقا؟!
اكملت زُمرد بتوضيح :
_ناريمان هانم قالتلي اشوفك بتحبي أكل ايه واجبهولك في اوضتك زي اي حد عايش في القصر
تحدثت فوزيه وهي منشغله بتجهيز الطعام:
_يبقي كده شكل ناريمان هانم ارتحتلك فعلا لأنها مكنتش بتعمل كده مع اي بنت اشتغلت عندها
تحدثت زُمرد بسخريه
_قال يعني هما كانوا بيفضلوا موجودين
قبل أن تحذرها فوزيه مردفه: زُمرد متتكلميش في الي ملكيش فيه
واكملت موجهَ حديثها لنوران الواقفه بشرود :قوليلي يا حبيبتي علي الاكل الي بتحبيه علشان اعملهولك
_لاء يا طنط انا هعمل اكلي بنفسي كفايا عليكوا طلبات الناس العجيبه الي في القصر ده
_ وهو انتي بتعرفي تطبخي؟
= اه انا اصلا الي كنت بعمل الاكل عندنا في البيت
_سامعه يا مقصوفه الرقبه...بس يا بنتي اخاف حد يعرف انك أنتِ الي عملتي الاكل ويزعقلي
=وهما هيعرفوا منين ...عرفيني بس أماكن الحاجه وانا هعمل ...ولو لقيت نريمان هانم نايمه ومش عاوزة مني حاجه اجي اساعدك
_ ربنا يخليكي يا حبيبتي
وبالفعل بدأت فوزيه إرشادها وتعريفها أماكن الأشياء ولم يخلو الجو من المرح المتبادل بين زُمرد ونوران
.........
توالت عدة أيام بدون احداث تُذكر عَرفت فيها نوران مواعيد دواء ناريمان وكيفية التعامل معها ومع مرضها وايضا كانت تعمل لها تدليكات مسائية قبل النوم وقد عَرفتها ناريمان علي الجرس الذي وُضع بالجناح ..فإذا احتاجت ناريمان نوران ولم تكن بالجناح تضغط عليه
كانت نوران تتحدث معها وبدأت ناريمان بالتجاوب ومجارتها في الحديث
شعرت نوران وكأن ناريمان ام لها فكانت تسألها علي طعامها وعلي راحتها وعلي إن كان ضايقها أحداً ما وقد استغربت نوران سؤالها هذا لكنها أنكرت
واقتربت أيضا من زُمرد كثيرا وكانت تحكي لها عن عائلتها ،وحاولت بقدر الإمكان عدم التواجد بأي مكان يوجد به نبيل
ولم تري هذا المغرور المُسمي مراد فهو في سفرية عمل مع أخاه عثمان ..أما عن دولت فكانت تنظر لها نظرات لم تستطيع نوران تفسيرها بسبب قلة خبرتها ولكنها تشعر أنها ترسل لها نظرات حقد أو لا اعلم لا يهُم ...ومرجان لا تخرُج من غرفتها فلم تقابلها نوران من ذلك اليوم الذي كانت واقفه به مع نبيل
................
وفي إحدى الليالي بعد أن اطمئنت نوران علي ناريمان ذهبت إلي غرفتها كانت تود النوم وبشده فهي تستيقظ مبكرا لإعطاء الدواء لنريمان
وعندما إقتربت من فراشها وكادت أن تنام لمحت ورقه مطويه
نظرت للورقة بإستغراب فمن سيدخل غرفتها غيرها
علي كل حال فتحت الورقه ورأت ما جعل ضربات قلبها ترتفع بعنف وجحظت عيناها وجلست بتوتر علي الفراش وعيناها علي الورقه بدأ الخوف يتسرب إليها رويدا رويدا
"(اهربي بدل ما يحصلك زي البنات الي قبلك ) ".
......
بقلمي ضحي حت