اسيرة قدرك

بارت 66

اسيرة قدرك..
بقلمي رسل..
البارت السادس والستون ..
واتباد rasolaa7

حتى الضحكتي ستاحشت
عود انه دين  الماضحـك
متخوصر اعلى  أيـامـي
هسه امنريد
امشي اختنك  
مثل  اليضم روحه بجتل
ساتر عليه الثامي..

-واسمع امة تحجي ويا.. يمه اسر ماعدنا احنا بس الله وانت وما نضايقكم خلي نكعد مشتمل انت فوك واحنا جوه وبعد ماجد وراح واحنا نسوان ما نكدر وحدنا..

-هو كالها.. ان شاء الله يمه اشوف وضعي يلا وادبر فلوس لان هسه ماعندي..

-هي بقت تقنع بي اني حسيت الدم صعد لراسي ركضت لغرفتي افكر وين اروح يارب شلون بيه صار تفكيري بس شلون اشرد بعد خلاص
ما اتحمل..

-شوي ودخل للغرفة.. باسني بالهوا.. الحلو شوكت كعد من اروح فدوه لهل وجه
شلونج اليوم يحجي و يتقرب عليه..

-ضغطت على روحي وعفته براحته لان
بس هاي الكم ساعة يمه اريد اشبع شوف
منه اتقربت عليه حسيت وكأنو آخر مرة اشوفه حضنته و بسته هو لمني بحضنه وراسي
على صدره ضيعني بحنيته شكد ما اسر قاسي بس شايل حنية الدنيا كلها وهالشيء ما اكدر انكر
شكد احبه بي..

-حاضني و يحجي بهدوء.. ريا يروحي ليش هيج هاملة نفسج ماتعودت اشوف هالوجه الحلو
هيج ولا متعود عليج هيج حابسه نفسج وين
حبيبتي الي ملكاها  يسوه الدنيا وشوفتها تنسيني
همومي شبيج ابويه انتي؟!..

-كلامه قهرني والي يقهر اكثر انو اني   نفسي ما اعرف الي بيه حتى اكدر احجيله.. ان شاء الله متشوفني بعد..

-حجه بخوف.. ريا كلبي ما مرتاح  اتمنى اعرف شبيج والحسين كل ليلة تمر عليه سنة من التفكير  بيج علتج شنو يا بعد حيلي..

-بعد ما كدرت اتحمل قربه اكثر انتفضت وصوتي تحول وكانو صوت رجال صحت بي.. كافي شبيك تلح دفعته عني ورجلي صارت تهتز
بقوة اريدها بس تثبت ماكو..

-هو كام وثبتها بين ايديه بقوة.. دخيلك ياعلي ريا شببج كافي اصحي.. من قهره و صدمته
ما يعرف شنو يحجي لو شلون يتصرف
ضرب الميز الي يم الجرباية بقوة بيده وهو يردد.. شبيج شصارلج..

-رجع حضني.. ريا عمري انتي شيوجعج
احجي لا تخليني حاير..

-بهاي اللحظات ما نفرته جنت بحضنه وبس
اردد بكلمات مقابر مغيسل بعدها
رفعت راسي اله واحجي بهمه من كل عقلي..

-شفتهم هذول اسر جاي تشوفهم انت..

-شنو شفتي؟!..

-هذول موته ميتين اسر وريحتهم مطيبه
جاي تشتم انت مو..

-رجع راسي لحضنه و يقرا على راسي
ويردد بذكر الله اريد ابتعد عنه بس هو مستمر..

-دك جهازه هو جاوب واسمعه يحجي ويه صديقة  علمود سلاح و مبين شيء مهم من سده رجع يقرا على راسي لما هديت واطمن هو باس راسي.. نامي ارتاحي لا تطلعين من الغرفة اني
شوي وراجعلج..

-خليته يطلع وانتظرت شوي يمر من الوكت طلعت ام دنو بالغرفة وعمتي متمدده بالصالة
اني طلعت بدون ما ينتبهن عليه بس حبيبتي مهرة  عبالك واحد دزها عليه حست عليه وطلعت ورايه من شافتني طلعت هي بجت وتريد وياي
دفعتها وسديت الباب وطلعت اركض..

-وحدي ولابسه تك نعال والثاني ماكو
ذبيته وبقيت حافيه وكفت و اجرت تكسي
بس خوفني شكله بي بهاق واصلع هو يباوعلي مستغرب.. بيج شيء خويه منين انتي؟!..

-ما بيه شيء.. حجيتها بنتر وهو رجع سأل متزوجة؟!..

-اي حجيتها وصعدت الدنيا غروب
شوارع فارغه وهو يمشي بيا رجعت لوعيي
وخفت كلش شويه ولمحت عالم هنا ارتاحيت..

-هنا نزلني..

-انطيته كروته هو شافهن كال.. هاي مو كروتها راد بعد..

-والله مشايله بعد وناسيه غراضي وهذني
كل الي عندي حجيتها وهو ضاج.. هاي جدوه بس بغير طريقة هز ايده وراح..

-نزلت بسرعة خفت لا يأذيتي ركضت حافية وعباتي على راسي جني مخبله شوي وكفت اريد أتذكر وين بيتهم لان ناسيته وين بالضبط رغم ذوله اهل مو بس جيران نص ساعة افتر
وما اتذكر وين بيتهم شفت ثنين واكفات اجيت
عليهن.. عفيه بس اخابر اهلي تيهت هن
باوعن عليه بخوف ودخلن وسدن الباب
دمعت عيوني ليا درجة واصلة بحيث الناس
تخاف منج يا ريا..

-بقيت ادور على جيرانة قبل وين يلا لكيتهم
فرحت دكيت الباب واني اتمنى بس يفتحون
واخلص لان ضلمت واخاف.. فتحت الباب صديقة اختي سلمت عليها و حضنتها
وهي مستغربة دخلتني و بديت احجيلها
على مأساتي وهي تهدي بيه بقيت يمها ما قبلت  طلعني من بيتها واني بهذا حالي..

-من اجه زوجها هي راحت حجتله عني
وطلبت منهم يودوني لاهلي هم خطية ما قصروا
اخذوني من وصلنا فرعنا تذكرت مهرة
شلون طلعت تبجي وراي نزلت دموعي
اني ليش عفتها هسه سكتت لو لا انتبهوا الها بقيت بحيرة عليها..

-نزلنا يم بيت اهلي شفت سيارة مهاب بالباب
دكوا الباب فتحته امي بس شافتني اخذتني
لحضنها وخواتي طلعن وراها..

-زوج صديقة اختي كالها.. يمه بتكم تعبانه ومريضة ومحد داري عنها انتبهوا عليها..

-امي بجت.. يا يمه كلها قلقانة عليها تشكرت
منهم هم اترخصوا..

-مهاب اتصل على اسر طمنه بس مبين
عصبي صوته يوصلنا واسمعه يكله شلون
تطلع بهذا الوكت..

-نورهان تعاركت ويا مهاب ما تريد  تروح رادت تبقى يمي وهو معاند عفتهم و دخلت
كعدت بالمطبخ تعبانه والي يتعبني اكثر
شيء الاصوات نورهان  بقى صوتها يعلى ويا مهاب واني مامتحملة نفسي الصوت احسه اكثر شيء يستفزني و يطلع خبالي كمت اخذت استكان وركعت نورهان اجتي الضربة على وجهه
بقوة خدها  نشك ويذب دم مهاب ركض عليها ضل يصيح عليهم على شيء يلزم بي الجرح..

-خفت من المنظر و توترت.. مو قصدي اضربج بس انتي ما تسكتين صوتج ضوجني..

-اجتي سرى اخذتني بالغرفة الثانية وغسلت وجهي تقرأ آيات وتمسح راسي بالقران
و حتى فارس رغم مريض اجه يمي يهون عليه بس يريدون يعرفون علتي ومحد يفتهم الي بيه
لا هم ولا اسر..

-اجه اسر سمعت صوته يعيط سديت اذني
صوته يأذي راسي ضليت اتوسل باهلي.. اطلعوا 
احجوا ويا خلي يسكت فدوه راسي يوجعني
بس سكتوا ما اريد صوت..

-الظاهر فهموا على وضعي لان دخل يمي هادئ حضني و التفت عليهم.. عوفوني وياها..

-باس كل مكان بوجهي ودموعه تتسابق
منو الي تنزل اسرع بس حاضني ويبجي
والله العظيم اول مرة اشوف اسر بهيج حال 
حنيته وخوفه بهاي اللحظات ما اكدر اوصفهم
لان والله اعجز اعبر عنهن بالكلام بحيث
بجه بجي مال واحد محمل هموم..

-صافن عليه خجلت لان شكلي جان يلعب
النفس شعري مامشطه كله مخربط ودشداشتي سوده وكل مكان مليان شعر وعيوني محوطه
بسواد على صفنته رجعت نزلت دمعته دفعته
عني.. وخر مني اختنكت بس وخر
هاي الريحة من خشمي خنكتني..

-زفر بقهر وباس خشمي.. ماكو اي  ريحة حبيبتي يلا وياي اقري اية من القران
هسه ترتاحين..

-كام عني صاح سرى يمي وهو راح توضه
من رجع كالها فرشيلها و انطيني قران هي
فرشت مددني على الفراش وكعد يمي
يقرأ قران بصوت ودموعه تنزل يمسح وحدة
تنزل الثانية وايده يمشيها على راسي لحد ما غفيت..

-فتحت عيوني طالعة الشمس طبعا نومتي قليلة كلش عبالك واحد يكعدني بس اغفه صحيت  وانصدم باسر لحد هاي اللحظه ساند راسه على ايده وكاعد على نفس كعدته وعيونه عبارة عن قطعة حمرة..

-جان صافن من انتبه عليه كعدت تلاشت صفنته ابتسم بتعب.. كعدت حبيبة ابوها وروحه
باس راسي.. شلون صرتي؟!..

-ابتسمت لكلامه بس مستغربة حنيته الزايدة
ليش شبيه اني.. الحمدلله.. حجيتها هو عدل كعدته  خوش لعد خلي افتهم شبيج وشلون اطلعين من بيتج هيج وكت تدرين هاي عليها كوامه طلعتج من البيت بهيج وكت وحدج..

-يا طلعة شتحجي اسر وين طالعة حاولت  اتذكر بس ولا اتذكرت اني طالعة هو باوعلي
باستغراب وعرف من حالتي انو مستحيل امثل عليه لان فعلا ما اعرف شيحجي هو غير
الموضوع.. جوعانه حبيبتي..

-اي جوعانه.. كام فتح الباب طلعنا واشوف
اهلي كاعدين ماما بسرعة اجت علينا هو
كاللها حجيه ريا جوعانه سويلها لكمة تسند نفسها..

-ماما باستني.. شلون صرتي وكعتي كلوبنا
عليج يمه شجاج..

-ليش وكعت كلوبكم شنو صار؟!.. ردت
اعرف بس محد منهم حجه ولا اني اتذكر
اسر رجعني للغرفة وبيده ريكني ويحجي وياي
ويهدي بيه..

-بقيت يومين يم اهلي وكلبي مفرفح على البنات بس اسر ما يقبل يجيبهن يكول مريضة يتعبنج معافني وحدي باله يمي وحتى دوام مراح خطيه مكابلني..

-يوم عن يوم حالتي تزيد غرابه لزمت بيت اهلي وكسرت الغراض وبس اصيح شكو واحد كدامي اضربه مجرد ما اسمع صوت بحيث وصل بيه الحال  ابد ما اتحمل صوت..

-اسر يخليني على صدره بقوة يهديني لان
افحط كلبي تعب من هالحال من ايسوا كلش
اتصل على صديقة يشوفله سيد..

-شوي واتصل عليه صديقة هو كالهم جيبوا عبايتها لبسوني وطلعنا احس رجليه صارت خيوط ما اكدر  احركها بس طلعت من  السيارة وكعت بعد ما كدرت امشي بجيت بضعف
وقلة حيلة.. نشليت ما اكدر اكوم بعد احجي
وابجي اختي وماما يبجن اسر وأخويه الجبير شالوني صعدوني اخذوني لاكثر من سيد ناس تكول مشربه وناس تكول مس مرت ايام واني
على هل الوضع رحنا لغير سيد هاي المرة
راد يخليني اتقيء حضروا  طشت كاللهم راح تتقيء شعر..

-طلعت روحي وما ذبيت لا الشعر ولا اتقيأت
حاروا بيه كلهم بهاي اليلة حسيت روحي انتهيت رحت يم اهلي بوستهم واحد واحد و احجي
وياهم بوداع..  ابروني الذمة هذا هو راح
اموت اني شفت المغيسل والمقابر بعيني بعد اكيد هاي اشاره لموتي..

-اهلي من الصغير لجبير يبجون وهذا
الي يسكتني وذاك الي يكلي لا تحجين هيج
واني مصرة اودعهم لان ايست المغيسل
والمقبرة شفتهم بعيني..

-صرت عبارة عن عظام وجسمي كله آثار جرح ما اعرف مين وضعي خطر لدرجة بهاي ليلة 
فرشولي  وعيونهم تودعني وكانو ينتظرون شوكت روحي تصعد لربها وتودعهم اسر ثواني معافني مكابلني وتارك دوامه واهله وبناتي الي لا اني ولا ابوهن الهن..

-كمت واسر يقرا قران منتبه عليه غافلته وصعدت على الجرباية  وكفت وذبيت نفسي كبل للكاع احس اعظامي تفلشت هو  كام مفزوع ركض عليه يصيح.. شبيج ريا  بقيت اصرخ بكل صوتي.. اتخبلت اني عقلي راح..

-عفته وطلعت يمهم امشي بالبيت كله واعيط وابجي ماما صارت كبالي ضربتها اجت
عيني على عمر الي كاعد على الدرج ولاول
مرة بحياتي اشوف دموع عمر وعلى منو
عليه نزل واخذني لحضنه..

-رغم ضخامته لعمر وطوله بس جانت قوتي اقوى هو يزيد بالحضن ويريد يهديني واني
ادفع بي بقوة حاضني ويبوس بيه.. سلامتج بعد اخوج ريا شبيج خوية دمرتينا بس احجي
ليش هيج سويتي بنفسج..

-اسر طلع مبدل و السويج بيده اجه باس
راسي وحجه ويا اهلي.. امانه الله  مخليها يمكم
عينكم عليها  رايح لابو عبد الله عليه السلام قاضي الحاجات واريد حاجتي منه وادري
بي ما يردني..

-طلع الكربلاء وهذا الليل بطوله اهلي كلهم
لحظة مغفت عيونهم.. واني مستمرة اصرخ
ولا تعبت ولا نعست عمر وفارس ما عافوني محاوطيني ساعة اخنك نفسي وساعة  ابجي
واردد ريحة مطيبه خنكتني الريحة ما تحسون..

-الظهر اجه اسر وجان جايبلي ويا علك من
الامام ومزوره شده على ايدي وكال
العصر اخذها للطبيب..

-امي ردت عليه.. يا طبيب وبنيتي شمسوين
بيها وهيج صار وضعها..

-هو تنهد.. يمه هو اني اعرف حتى اكلج
الي بيها بس من رحت منا ذبيت حملي كله
يم ابو عبدالله كتله ما اطلع منا اذا ما تنطيني
امرادي و ترجع عافية مريتي اريد من كراماتك
ترجع ريا لصحتها..

-وغلات ريا يمه كاعد انخه واقرأ دعاء
وجان يكعد يمي رجال كلش جبير بالعمر  لحيته بيضة ولابس غتره سودة مخليها على اكتافه..

-من كملت دعاء هو طبطب على رجلي
وكال.. عندك مريض وهذا المريض  صاحب بخت وانت هواي متاذي عليه..

-والله حجيه نسيت نفسي ويا وكعدت اشكيلة
وكتله ما نعرف شنو علتها من حجيت ويا
هو كال والله مريتك صبورة بس ابني لا تمرضونها اكثر هاي علتها مو يم سادة ولا
هالسوالف اخذها لطبيب نفسي لان هذا لا
سحر ولا شعوذة هاي أثر صدمة وتفكير صار عدها هيج ضاغطة على نفسها اكثر من طاقتها
الله يعينها..

-والله عاد تشكرت  من الامام ومن الرجال
الي الله دزه الي بفضل سيد الشهداء وطلعت بسرعة حتى الحك اخذها العصر..

-واسر خطيه مسوي بحث على طبيب نفسي زين ولاكي اخذوني العصر بس كلش تعبت لان
وصلت حالة ما اكدر اعين نفسي وأسر كل شويه يوكف السيارة يغسلي وجهي ويشربني مي سرى واختي الجبيرة راحو ويايه..

-سوولي رنين وتحاليل وفحص كامل من
بعدها بين عندي عندي اخطر أنواع الأمراض النفسية والي هو ازداوجية الشخصية وكانو اعيش شخصيتين وعقلي الباطن جان يهيئلي كل
التصرفات الي جنت اتصرفها بغرابة..

-بيومها خطيه اسر تعب كلش وخسر هواي
على العلاج والطبيب ما قبل احد يوكف ويا
بالرغم جان بهالفترة متضايق علمود سالفة
مكان اهله و يدبر الهم سكن اخذنا العلاج الي جان مجرد مهدئات وابر مهدئه لان العلاج نفسي لازم النفسية ترتاح..

-مرت ايام واني مستمرة على العلاج
من اخذه بعدما احس بنفسي وانام هواي
ما ادري بالدنيا واسر واهلي هم الفضل الهم
من بعد الله تعبوا هواي وياي بحيث من كاعدة
يخلون البيت عبارة عن كتلة هدوء واصوات عالية ما يسمعوني..

-صرت قليل احجي وبس صافنه اغلب
وقتي هنا ماما كالت لاسر لازم ناخذها لموسى بن جعفر عليه السلام جان يوم أربعاء اخذوني
ازور زيارة المريض..

-مشينا شوي وبعدما كدرت ذبيت عباتي
واركض وابجي هو اجه وراي لبسني
العباية وسندني صوتي من البجي منتهي.. تعبت اسر تعبت والله بعد ماعندي القدرة اعين نفسي..

-اش لا تحجين اقوى من عدنا كلنا انتي
هانت حبيبتي فترة وتعدي والله لايردها..

-وصلنا للامام بقيت ابجي واريد بس عافيتي ما طلبت منه شيء غير بس عافيتي ترجعلي
اريد اعين نفسي اريد اكوم لبناتي ما اريد شيء بعد بس هالمرض اخلص منه ويروح مني..

-من كد ما بجيت حسيت وكانو همومي كلها
ذبيت حملها يم الإمام نخيته بالدموع.. اريدك
انت تتكفلني يا ابو طلبه اريد ارجع لعافيتي
ولبناتي لا تردني فدوه يا سيدي ومولاي.. دعيت
هواي لما حسيت ارتاحيت يلا طلعنا..

-بقيت فترة طويلة اتعالج ومن اخذ العلاج اروح بغير عالم بس جان بي فائدة ولو نسبة قليلة
بس فرحتنا جبيره لان يوم عن يوم صار اكو
فرق من جهه العلاج و الراحة النفسية
ومن جهه الزيارات الي اروح الها..

-كم يوم واسر صار عنده واجب بالجنوب
اجه يمي كال راح اجيب جنطتي حتى منا
اطلع للدوام..

-كمت بهمه.. فدوه جيب وياك البنات طك كلبي عليهن هو باسني.. مو تدللين..

-من رجع جان جايبهن ويا اني شفتهن لو كلبي  طار عليهم اخذتهن لحضني وابوس بيهم
عبالك صار سنين ما شايفتهن.. لليل نومتهن
يمي وقبلها صليت وهذا اول يوم اصلي بي
من بعد ذيج الفترة الي الله لا يرجعها ولا يشوفها لاحد نومتهن ورجعت يمه.. هو مبتسم وعينه
عليه..

-شبيك؟!..

-فرحان بيج يعافيتي والله احس روحي ردتلي
سحبني عليه وحضني بقوة..

-شبيك ترى ما طايرة على كيفك..

-ما مصدك والله انتي كبالي و بعافيتج
احس هسه يلا تنفست شسويتي بينا بيوم
الي ودعتينا احس الدنيا طلعت من عيني..

-رفعت نفسي و بسته.. تعبتكم.. هو سكتني ما خلاني اكمل.. خلي انام لا تحجين كلها فدوه الج المهم صرتي احسن وان شاء الله ترجع عافيتج
احسن من قبل..

-كعدت الصبح مكانه فارغ كلش ضجت
من وره العلاج قوي ومن انام بعد ما ادري
بروحي حسيت اشتاقيت اله كمت وعيوني
دمعت طلعت اصيح عليهم وين اسر....

يتبع....

نبذه عن ازدواجية الشخصية طبعا هذا
بحث قصير تكدرون تعرفون عن هالمرض
اكثر من خلال البحث بالكوكل وربي
يبعدكم عن الامراض..

إضطراب إزدواجية الشخصية" هو أحد هذه الإضطرابات، التي تصيب شخصية الإنسان حيث تظهر عنده شخصيتان في جسد واحد، وهو حالة اضطرابية ومرضية نادرة جداً في العيادات النفسية..

خصائصُ اضطراب إزدواجية الشخصيّة

• يملك المُصاب هويتين أو شخصيتين وربّما أكثر.

• كل شخصية من هذه الشخصيات تكون معروفةً من المُصاب، أي ربما تكون شخصية أحد الأقارب أو شخصية تأثّر بها نفسيّاً سلباً أو إيجاباً.

• يختلف أسلوب كلّ شخصية عن الشخصية الأخرى، لناحية السلوك والإدراك وطريقة التفكير والعلاقات الشخصية...

أسبابُ هذا الإضطراب؟

• أولاً، معاناة المريض من طفولة كئيبة ومحزِنة، مع إيذاء جنسي وعدوانية جسدية ولفظية وصولاً إلى عدوانية نفسية.

• ثانياً، أكدت دراسة في مركز البحوث King's College London، ما قاله "جانيه"، أي إنّ أحد أسباب ظهور هذا الإضطراب قد يكون صدمةً قوية عايشها المصاب خلال طفولته..

• ثالثاً، عدم التكيّف مع الواقع، والهروب من تجربة مؤلمة وعدم القدرة على حلّ مشكلات استعصت على المريض وعدم تكيّفه مع نفسه يمكن أن تكون أسباباً لإزدواجية الشخصية..

هذه النبذه للي ما مطلع على هالمرض..

لا تنسون التصويت حبايبي وتعليق ع الفقرات

يوزر الانستا نوروا صفحتي حبايبي
_rasolaa7_
الرابط بصفحتي على واتباد..

اللهم صل على محمد وال محمد❤️