اقدار الزهور

البارت الرابع

#اقدار الزهور

للكاتبة ؛𝓑𝓐𝓝𝓔𝓔𝓝 𝓢𝓐𝓙𝓐𝓓 💭¿

-------------------------------

ومَن سألت الگلب عَنك
گلي كُلشيّ تريد إنسى
لكن على أسمك كتب ارجوّ السماح
گتله إنتَ بحبه مُذنب
گال بالحُب والحرب كُلشيّ مُباح .

-عدة اشهور ورة عرس امجد وفيان كبرت وكامت تمشي

دنية بعدها لحد الان حاسبة نفسها عروس من اجت لهسة وهي متحرك الورد من مكانة  يكولون موزين عليها كالتلها الدكتورة لازم اتنام ومتتحرك

غرفتها بالسبوع يالة تنظفها وبطنها بدت تكبر وبس تتشهة وامجد متخبل عليها

حتى مرة اتعارك وي عمتي لان كالتلة ليش متشتغل اتساعد البت النهار كلة تكرب وحدها اول مرة تحجي حجاية الحق حتى من سمعتها كلت شعجب طلعت منج

امجد: اي بعد ادور اتبالو وي مرتي يعني انتم متدرون بيها حامل ونخاف عالطفل متكدر تتحرك لو انتي اتبال
يتي وياها بعد ادري بيج النهار كلة تحجين عليها موعبالج اني ما ادري ترة يوصلني كلشي

عمتي فكت حلكها وسكتت وبعد ماحاجتة
مرات استغربها مدري تخاف منة مدري هي مينطيها كلبها تحاجي

واكفة بالمطبخ اسوي الغدة واسمع البنات يتعاركن رحت اشوفهن
لكيت الكبار يتعاركن على لعابة فيان الصغيرة من اول ماجبت بيلسان سالم جاان كلما يروح بزيارة لو سفر جان يجيبلها لعابة ومن صارت جيهان كام يجيب اثنين وهسة صارن اتلاثة

وعمتي كل ما اتشوفة تصيح لا تنكل لعاب هسة يسطرن الك بنات اخر مؤة جاب لفيان كالتلة كرت عينك هية راح تجيك الرابعة افرح

هالمرة رد عليها سالم يمة شلج بيها غير اجيبلهن صوغة من السيارة جااا وين يروحن والجاي من الله هلة بي راح نمنعة اذا ما جبنة لعاب

هزت ايدها وكلتلة لا فلحت
سكت عنها
وعمي رد عليها انتي لو بس تعوفين سوالفج هاي يامرة شبلاج متبالية وي هالفريخات شوفيهن انتي بس شوفتهن اترد الروح

اسكت انت اسكت بس احجايتي اتبززك اني كارهتن غير اريدلهن اخو يسند ابوهن ويسندهن باجر عكبة

سكتها من كاللها اي مو امجد هسة ساندني وتردين يسندة الولد

بكل مرة عمي جانت هاي طريقتة اتسكتها
طلعت من غرفتي غرفة امجد اتصير بصفها واكبالها المطبخ

طلعت دنية واجتي اليوم طالعة من غرفتها هي متطلع بس وكت الاكل
هاا روح صار الاكل
باوعتلها وتنهدت اي صار
راحت للمطبخ شفتها صبت ورجعت الغرفتها رحت اني هم صبيت للبنات واجيت اوكلهن من كملت اشوف اماعين الاكلت بيهن دنية بالمطبخ

وصلت حدها هاي شلون بيها يعني حتى اماعينها اني اغسلهن

رحت العمتي حجيت وياها
عمة والله مايصير يعني اني النهار كلة اشتغل وحدي وما حجيت ولا شكيت بس هاي مو حالة حتى اماعينها تريدني اني اغسلهن عمة حبابة احجي وياها

هاا رويحة بدت شكاويجن
عمة الله عليج احجي ببختج من اجت لهسة حجيت شو اطبخ وهي تجي عالحاظر تاكل وتمسح ايدها بالكاع بقت بس غرفتها ما نظفتها انوب الماعين
 
واني احجي صادف الحظ وي دخلت امجد بكل مرة مايجي بهيج وقت اليوم جابة حظي وسمعني وبدون ميفهم عاط بينة

هااا شديتهن سويتن تحالف وشديتهن وياها انس عرفتجن كل يوم اجي الكاها ضايجة ومن اسألها كوة تحجيلي سوالفجن وتالي هاي ما صارلها ايام وهيج انتن شديتن وياها شلون اني ائمن بعد اخليها يمجن كاعدات وتحجن عليها وهي كاعدة بغرفتها

عمتي: بسك اسكت ولك لا تهرجنة بصوتك اجيت متحمل علينة هاي حاطتك النهار كلة وادحي براسك ولك سممتك وياها

لا مو سممتني هاي سوالفجن مو جنتي تكليلي ازوجها مو بسببج اني اخذتها لو لا هسة صارت متعجبج وكمتي تحجين عليها لو انتي الي اتسممتي وباوعلي بخزرة  عرفتة يقصدني

كل هذا واني ماحجيت كلمة مع انو دائما هو لازم يخلي السبب بية ما اعرف ليش يكرهني هلكد اني لو عندي رجل مثل دنية ياخذ حقي مجاان ياهو الاجة وكدر يحجي علية بس شحجي

عمتي؛ يعني اني الخليتك تاخذها ولك مو من سوالفكم تتختلون انت تصيح ما اريدها وكل يوم الكاكم بزوية كل يوم كامزلتنة لمن صخمتوها

اي اي اقل شي وكلتو اطلعون القديم ان ادري بيكم متردونة لا اني ولا مرتي بس تانوني خل تجيب وخلي نشوف منو يبقالكم بعد هنا وخلة وطلع طرمنة بصوتة

باوعتلي عمتي هاا هسة ارتاحيتي
كبل كمت طلعت ولا تصيرلهم جارة هاي العائلة فد مرة ولا يصير بعينج الزين صدك لا كالو بز البط عوام سالم طالع على عمي وامجد على امة عليمن نستغرب

مرت الايام وبيوم باليل صحينة على صياح دنية تطلك طلع سالم يركض واني لبست حجابي وطلعت وراى اشوف امجد شايلها وهي تصيح ويفتر بيها حاير ميعرف شيسوي راد يطلع للشارع صاحة سالم

وين تريد بيها نص الليل وين تلكي سيارات هسة
امجد ؛ شلون جاا شسوي هسة شسوي جاان مبين علي متوتر وخايف عليها اباوعلة هذا امجد الطنطل منكلب علينة هسة شوف حالتة

صاحني سالم جيبي موبايلي اخابر احمد ماعدنة غيرة هو ياخذها رحت جبتة خابرة مرتين يالة رد جان نايم كالة جايكم حظرو روحكم

دقايق ودكلهم هورن طلعوها سالم راح وياهم وخابرو حنان مرو عليها وراحو

للصبح يالة خرجوها رايحة لبيت اهلها
وللليل يالة رجع امجد من يمها الوجه يضحك مسمي ابنة ادهم

مرت الايام هاي بهدوء امجد منشوفة الا قليل كلة يم مرتة مرتاحين من طلايبة

عدت فترة الاربعين والمفروض دنية ترجع عمتي يطب ويطلع امجد تسألة شوكت ترجع اتريد اتشوف حفيدها

وبيوم اجة امجد باليل جنة كاعدين بغرفة عمتي وعمي كاعدين وبيها جنان وحنان صادف يمنة مسيرات

وامجد فتح وياهم الموضوع
يابة يمة اجيت اريد احاجيكم بموضوع دنية ما تقبل ترجع للبيت تكول مشاكل وامها هم صافة وياها تكول ما ترجعها الا بيت وحدها شوية ساد الصمت وبعدين كالة عمي اي اخذها واطلع مابيها شي

عمتي : شياخذها هو احنا حتى ما شفنة ابنة وبعدين هي وينها هاي المشاكل شو من جانت معززة مكرمة محد يحاجيها النهار كلة بغرفتها هي مرتك مجلوبة ادورلها سوالف تريد تعزل

امجد وحجو على مرتة هم ما احترم لا جبير ولا صغير كاعد اهااا هي هاااي السواالف الاريد اعزل من عدها يمة اني اريد ارتاح اجي تعبان اريد ارتاح مو مال سوالفج والتفرقة مالتج

سالم : احترم نفسك ولتصيح من اتريد تحجي احجي على كيفك علمود نفتهم التريدة مو دومك بس صياح وكلشي ماكو لشوكت اتضل هجي انت مو صرت اب اذا اتريد تطلع اطلع محد يلزمك حتى امي تسكت معليك بيها بس لتخبصنة

ان وافقتو وان لا اني اطلع ما ابقة هنا بس اجيت اكلكم اني اريد ورثي

سالم كمز علي كمشة من ياختة شنو شكلت ولك ماسمعت عيد بلة
اي اي مثل ماسمعت ارييد ورثي

عمي؛ لابارك الله بيك ولك متستحي بعدني عايش وتريد تورثني هذا مو اخوك اكبر منك وعندة اتلاثة وماحجة وكال اريد اطلع انت صار عندك ولد اتخبلت

اني متعود على حجيكم

ولكم اني شسويت والله يعاقبني بهجي جلب ولك من اجيت لهسة ماشفنة منك الراحة

على اساس انتم ماكو منكم هسة انتو شلون اهل حجاها وطلع
والله بي بلة هل امجد ولا يخاف

عدت فترة على هل سالفة وامجد يروح ويرجع يلوب على مرتة ميرجعوها الا بيت وهو ماعندة ويروح ويرجع على الورث بالاخير لزمة سالم توبة من سالفة الورث خلا بعد ميعيدها عاشت ايدة

بعدها بفترة ودنية ايست ورجعت ابنها حلو اجيت اسلم عليها كوة اترد من ورة خشمها والله ما اعرف شمسويتلهم مصيبة هل عائلة كملت رجعت وعمتي طايرة بالولد نكعد على صوت هوساتها للولد

مرة كاعدين عصرية نشرب جاي ودنية اجت اطت ادهم لعمي من اجت وهي مختلفة شوية تحاول ترضيهم الله يهديها

جانن البنات كاعدات يم عمي هم هو يموت عليهن مايكعد الا يمهن اذا شافهن خلى ادهم يمهن ويسولف وياهن يابة هذا اخوجن شوفنة

حسيت بدوخة شوية اني من الصبح على لحم بطني ماماكلة شي عفتهم و كمت غسلت لابت روحي ذبيت من راسي وصدري احس مختنكة شنو اليوم شبية

صفنت

اهو الفرج؟!.

ودقايق واسمع صوت جيهان عاطت وصرخة كلش قوية واسمع عمي صاااح يابوية يارويحتي

شنو الصار...

للحكاية بقية

يتبع
.
.
.
.
.