ضاد و عين

٤٢

ضاد و عـين
Adzzon

💯💯

نزلت تلفون وفتحت مايك .. ضليت اباوع لعمر بعصبيه ..
هو يفرك بوجهه ويزخ عرك ..
البنيه بعدهه تكول ( الو )
اني كلتلهه ..
- نعمممم
منو انتي شرايده !

هي بمياعه كالت ..
- اوي عفيه منو انتي
عموري وين
شعندج بتلفونه
انطيني عموري وينه

رجفت ايدي.. سديت الخط بعصبيه وضليت اباوع لعمر ورافعه تلفون بوجهه ..
هو يأشرلي بيده حتى اهدأ واني بصوت عالي كلتله ..

- منوووو هااااي

هو لزم ايدي ويكولي ..
- بنت عمتي

شمرت تلفون بعصبيه بالكاع وضليت اصيح عليه
..
- بعدك تجذب عليييه
تحجي  وياهاااا
وجاي تحضني !
بكل صلافه تكولي  مصطفى يخااابر

عمر يريد يلزم وجهي ويحاجيني ماخليته
ضليت اضربه على صدره واصيح عليه
..
-  متعوووده عليك
هي متعووده عليييييك
وتكولك عموري
هااي صارلك شهور وياهه وهم تجيني تحلف ماعندي شي وياهه !
لك الله يوووكعك بحلفااانك
ليش تجذب علييييه
حتى اسم الله ماارجف كلبك وخلاك تحجي صدك !

عمر بوس راسي ويكولي ..
- ماجذبت والله والله والله مااعندي شي وياهه
والله ما خنتج
لج حبيبه روحي انتي والله  مياخذ مكانج بشر

ضربته على جتفه وصحت . .
- دتكووولك
عمووري
لك اني ااااني وياك صارلي سنين ماكدرت احجيها
هي شلووون تكولك هييج
شلووون ترضااهه تكول اسمك هييج

هو يمسح بدموعي واني ادفعه .. كرهته هنا كرهته
اريد بس كلبي يطلع من صدري وينشمر وياه يرووح ماشوفه بعد  ولا احس بهيج وجع ..

هو يكولي..
- صدكيني هي هيج لسانهه تتلوك
من تحجي هيج ويه الكل والله
مجلبتلي
امي دزها واني عفت البيت ضليت بالمولد والله
واسالي الولد
يجون يمي كل شويه
وعيونج ماعندي شي وياهه

- تبقى جذااااب
من اكولك عمر  انتو تتخابرون ! تكولي لا
وهسه اول مادك رقمها عرفتهه
وجهك صوفر من دك تلفوونك
ليييش تجذب !
ليييش من مااعندك شي وياهه وهي لازكتلك
تجي تكولي هي تخاابرني واني ماجاوب !
متكدر تحجيها شبيك تخاااف ! 
تخاااف !

عمر اخذ تلفون وكالي ..
- وحق الله ما اخابرهه
اني اعرفه رقمهه جانت من تطلع من الكليه ترمشلي
حتى اعرف واجي اطبك سياره قريب الباب
بس هاااي وعيونج
لا فد يوم خابرتهه ولا حجيت وياهه شي

اليوم عمتي جايه لبيتنا وخابرتني كلتلي تعال اشوفك
وتغدا ويانه
كلتلهه مالحك اجي عندي شغل
عمتي عمتتتي هي خابرتني
اني متفق وياج عفت كلشي واجيتج
بعد هاي شعدهه خابرت مادري

بقيت اباوعله ممصدكه بي .. واريد اتعارك بعد
ماكو كلاام منه يشفي كلبي ..
هو فتح تلفون وكالي ..

- هسه اخابرهه كدامج وشوف شتريد

خابرهه وهي بسرعه فتحت خط ..
هم رجعت كلتله ( عموري )
واني خنزرت عليه .. هو كاللها
..
- خير محتاجه شي

بصوت مايع وناصي كلتله..
- ضل بالي عليك ليش مااجيت

عمر باوعلي واني وجهي يرجف من العصبيه
كاللها ..
-  وانتي شعليج بيه
اجي ما اجي شعليج وتسألين

هي جرت الحجي بمياعه ..
-  موو صار هواي مشايفتك
وامي هناا مشتاقتلك وتسال عليك

هو بصوت عالي كاللها..
- اااامج خااابرت وكلتلها ما اجي
انتي شكو  بعد تخابرين
مره مرتين دكيتي شفتي مافتحت خط شكو تلحين
منين جايبتهه الميانه وتسالين شعندك مااجيت
امج خابرت وخلص بعد هي مووو وصلتلج الحجي!
ترجعين تسالين شكوو !؟

هي كلتله..
- بس ردت اعرف ليش متجي للغده ويانه
والاهل كلهم ملتمين وثواب هذا يوم جمعه

عمر بصوت عالي كاللها..
- مااا الج حق تسألين
انتي منو وتسأليني !
بيهه داعي مخابرتج !!
انتو ملتمين ثواب كملوه واسكتو
متعلمين عليه بينكم !
اني عندي الجمعه  يوووم راااحتي
لا انتي ولا الاهل محسوبين بي

هي ضلت ساكته شويه وصوت باب دينفتح
بعدين كالت ..
- هااا  فهمت انته  يم  هذيج  خطيبتك

عمر باوعلي .. كاللها ..
-  اي  و مع الاسف انتي  كطعتي عليه احلى جو

هي جرت بحجيها ..
- هاااا لعد يلااا امي و امك يسلمون عليكم
اخذوو راحتكم

هو فتح ايده وارتاج بكعدته .. كاللها ..
- سلمييي على امج
وعلى امي
وعلى ابويه
وعلى عمامي
وعلى اخوتي
وعلى اخوتج
وابوج اذا موجود
وخواتي اذا جايات
و اذا سألوو عليه كليلهم
كاعد ويه مرته
يلااا اودعناكم

سد الخط و حط تلفون على الطبله ..
كالي..
-هاي حتى لامي وصلت
ماعندي غيرج
وتضلين بس انتي مرتي

راد يحضني دفعته .. كالي..
- للاي حبيبي
يخربون بينا
والله هاي غايتهم
رادوني اخطبها ومخطبتها  ضلو يعلموهه شلون تلزكلي
يردوهه تسوي مشاكل بينا
لاتنطيهم مجال
اني حافرج بروحي 
تعرفيني شلون احبج

بعصبيه كلتله ..
-  هذا الحجي بزعت منه

هو  ركع التلفون بالطبله ويكولي ..
-  حاااجيتهه كدامج
شتردين بعد
حلفتلج قسم بالله ماااعندي شي وياهه

- عمر انته تعلمت الجذذذب وياااي
تعلمت الجذب
هاي لا مره ولا مرتين انته تجذب عليه

هو ضل يصيح  ( استغفررر الله)
واني كلتله..
- ليش من يصير شي متحجيلي الصدك
كم جذبه صارن !
انته دتخوووفني بجذبك عليه
عمررر
انته دتخربنا انته
من تجذب عليه باااتفه الاشيااء
دتخرب بيناااا

شعبالك بس خابرت البنيه وكلتلهه حجايتين كدامي
بعد راح اسكت واكولك تعال احضني يلا

هو ضل يباوعلي وينفخ نفس ..
كلتله  بعصبيه..
- تتحاااسب على كل جذبه كلتهه

عيب عليك من اسألك منو ديخابر تجذب عليه وانته عينك بعيني
تريد تسكتني ! تمشيهه عليه !
لو مالزمت التلفون اني وشفت الرقم
ماجان ضليت مجذب عليه ومتحجيلي هاااي دتخابرك
وهيج تتموعلك بالحجي

اسألك رقمهه ماعندك ممخابرهه ،  تجذب وتكول ابد ماخابرهه
هسه من صارت صدك
تكولي هاا جانت ترمشلي من تطلع وحفظت رقمهه
..

من شفتهه خابرت وانته هيج مخايف وماااعندك شي وياهه ومتفاااجىء لان مخابرتك
ليش مارديت عليهه كدامي وحجيتلهه نفس الحجي
شبيك رجفت و اصفر وجهك !
مجان كلتلي هاي بنت عمتي دتخابر خلي اشوفهه شتريد
خلي اشوف خاف بالبيت احد يريد شي
لووو نيتك صافيه جااان فتحت الخط بسرعه وحجيت
مو بعدين تتندر وتكعد ترزل بيهه

شبيك انته ليش متكدر تحجيهه هيج ليش الاا نتعارك يلا  تبدا السوالف تطلع !

هو فرك وجهه ويكول
..
- ممتقصد شي
وماحب اغثج ويضل بالج هي متسوى
اني من يمي ساد موضوعها 
ميحتاج ادوخج بي

بصوت عالي كلتله..
- متجذذذب عليييه
متجذب
يصير شي تجي تحجيليي
و ااني الاقرر
يسوى لو ميسوى

عمر صار عصبي وضل يلوف الموضوع عليه
ويعاتبني لان تركته فتره عاندت وياه ومحجيت وهو مكدر يحجيلي لان اني ماكو
وحاول ننهي المشكله وينسد موضوع البنيه
بسسس اني عاندت وياه ..
على ان ..

-  سالفه ماتنسد
جذبت عليه تتحمل نتيجة جذبك

هو بقى عصبي ويحجي لامي يريدهه تتفهمه وتقنعني
بس اني اخذت موقف منه
وعفته يحجي و يهوس براحته
سديت باب غرفتي وكعدت ..
هو بقى لليل هنا
مره يحاجيني بعصبيه مره بهدوء
مره يعتذر
وبكلهن اني ما اجاوبه

مصطفى و جلال اجوي  يلا طلعت ..
جلال ديحاول يشاقى وياي اني كلتله ..

- ضم سوالفك بعدين مو بخلك اسمعهه
روحي كارهتهه
وبالذات انته جلال
ضيم كلبي كله منك

ضلو يسألوني باهتمام وهدوء شنو الي اريده وشنو الصاير وغثني
واني كلتلهم ..

-  كارهتكم لان جذابين
انتو حاسبين نفسكم اخوتي وكلبكم عليه !
بعدنا من هسه وتخاربنا
كدامنا عمر طول بعرض  شراح تسوون
تعيشوني بالجذب !
لو اصلا متبقون وياي ؟

جلال يكول ( بس فهميني شكو )
واني رجعت اعاتبه على افكاره وسالفه الفلوس
وطريق الحيله والجذب المشو بي
هو راددني بكل حجايه
ونرفزني خلاني ابجي
اخر شي كلتله ..

- حسبتك اب  وبكل شي احترمتك واخذت شورك
ماشفت فد يوم اب يرخص بنته ويغلي الفلوس
يا حيف عليك
تشوف رجلي يعاشر  غيري كدام عينك وتسكت
و ترضاله يجذب عليه
ترضاااهه اصير مضحكه بينكم وبين اهله
و تجي تعاركني من اعاتب

عمر لزمني من جتوفي ويكولي ..
- وحق الله مااعاشرت غيرج
كل الصار حجيناه الف مره بس داسحب فلوسي منهم
من وصلت للبنات
كفيت عنهم والله والله

صيحت عليه..
- انته جذاااب لا تضل تحلف
كل مره حلفت بيهه وياهه جذبه
حتى حلفانك ما اصدكه
و لا اصدك واحد بيكم بعد
انتو مستصغريني
لو محسبيلي حساااب جان استحى واحدكم يحجي كلمه جذب  وياي
بس انتو خوتكم بينكم
ولد
واحدكم ظهر للثاني
اني زايد مكاني بينكم

مصطفى ضل يحاجيني وعمر يحلفلي
وجلال غير نبرة صوته وياي رجع هادىء ويريدني اعذره
بس اني ما قتنعت بحرف منهم

همه ملتمين يمي بالغرفه وكل واحد يحجي من جهه
اني نمت بفراشي وغطيت كل جسمي ..
طفو الضوا و راحو ..

لنص الليل عطشت و هم تضايقت من ملابسي
كمت بدلت ورحت للمطبخ شربت مي
ولكيت ماعون بي بطيخ و ركي بارد بالثلاجه
اخذته وصرت اكل واني امشي ..

شفت الهول مشتغل بي التلفزيون وضاو مبين من فتحه الباب ..
دفعت الباب بسرعه ودخلت
كعدت على التخم ..
ضليت اكلب بالتلفزيون واكل ..
جان يجيني جلال ..
واخذ الماعون من حضني ..

ماهتميت وضليت اباوع للتلفزيون .. هو كعد بالكاع
و جر رجلي طك اصبع منهه ..
اني اتنرفز ولا واحد يطك اصابع رجليه
بسرعه دفرته وعيطت
وهو حضن رجلي وضل يطك بيهن واحد واحد
ضليت اصيح عليه واعت بشعره
وهو يصيح ..

- اشلعهن والله
حتى اظافرج هسه اشلعهن
هديني

عفت شعره بس ضليت لاويه اذانه وهو يدير وجهه يريد يعض ايدي
كفشني من شعري وجرني من التخم للكاع
ضل حابسني بين رجليه واني اعض برجله
وهو يعض باذني
خرمشته من ايده
وهو كفش شعري وجر ايدي يطك باصابعي
واني اعيط واريد ادفره
صرنا مكافش
اخذنا الهول طول بعرض احنه نتكلب و نتعارك

الا اجتي امي  يلا فاككتنا
هو يشكي لامي مني واني اشكيلهه منه
وهي ترزل بينا
لان هرجنا الدنيا بنص الليل

رحت غسلت ولميت كفشتي وبس سديت باب غرفتي
هو اجه فتحهه وراح كبل نام بفراشي ..
تعاركت وياه حتى يطلع وهو كالي ..

- دتعالي اخذي علج واسكتي
اخذي تعااي شبيج اخذيلج واحد
طيب يفوتج

هو مادلي باكيت العلج واني رحت داخذ سهم واحد منه
بس لزمته انتلت ..
وهو خرب ضحك عليه

بعدين جرني خلاني اكعد يمه وانطاني علج صدكي
و يحلفلي مو ابو النتله ..

اني صرت اعلج وهو يكولي
..
-  لج  بس كليلي وين لاكيتلج واحد 
مره تلوي اذنه ويجي  بيده يخليهه تكعد  تتمعلج
يمه ديرتاح كلبه

باوعتله  وعلجت بصوت عالي .. سويت نفاخه وطكيتهه بوجهه .. وهو ضحك ..
كالي..
- شوفي اني اكبر منج باربع سنين
وانتي من يومج سايكه عليه
منطيج مجال والله
صوجي اني  ماهفيتج راشدي فريت وجهج فر
من كبل
جان استعدلتي وياي
ليش استخطيتج مااادري !؟.

مددت رجلي على تاج الجربايه وكلتله ..
-  ضلت عايزه بس راشديات
هو انته شبقيت ماسويته بيه
مليون مره ضاربني

هو بصوت عالي كال..
-  و ينكدرلج ! 
انطيني مره من المليون فادت بيج

جريت نظارتي وكلتله ..
- اطلبك نظاره  جديده
اريد اطارهه فضي
يلا مو بس تكسر بنظاراتي
عوضني

اخذهه من ايدي وضل يكلب بيهه كالي..
- يعني شكد اصرف عليج
خمسه   ،  سته  ؟

-   لاااا لك اقل شي عشرين
وهم عاجبني اسوي فحص واغير العدسه
يعني حسبة ٣٥  ،  ٤٠

شمرهه عليه وكال ..
- حيييييل
نهيبه
بطلت عمي لا تراضيني ولا اراضيج

ضربته على رجله وكلتله ..
- هوو منو رايد يراضيك
ياهو اليمك انته !
نظارتي انكسسسرت من خبالك
غصبا عليك تصلحهه

هو كعد وكالي ..
- اصرف عليج اربعين الف وهم تتمضيكين براسي
ولج  فوك السهر اصرف وهم معاجبج !
..
سهرااان تعرفين شنووو  سهراان
علمودج
شلعتي شعر راسي وسكتتلج
بعد اذا فكيتي حلكج نوب  وتمضيكتي
الا الزمج واربطج هنااا
هيييج الفج بالحبل والله والعب بيج لعب
ابجيج و روح اخويه
اخليج تبزعين روحج
شكو سالفه ناااقصه اسويهه بيج
حتى صدك نتخارب بعد واطيح حظج اذا حجيتي

تاففت وكلتله ..
- جلااال

هو سد حلكي وكالي ..
-  انجبي واسمعيني
مو عمر اني ابو خلك طويل

خرطتي علينه حجي هواااي ودرتي ظهرج ومشيتي
وعفتج
بس مسلتي زاايد
وينرادلج ضبه لسان

اريد احجي وهو ساد حلكي ..
كالي..
- اول شغله
عمر من كال ماله شغله بالبنات هو من صدك ماله شغله بيهن
واني لو ادري بي حاجي ويه وحده جان كسرته
و اجي اشهره يمج شهيره
واثنينا نطيح حظه
.. اني حلفتلج من ذاك اليوم
اذا اعرفه  لاعب من وره ظهرنا
الا انعل ابووه يابو فلوسه وعشرته
ومن اكول حجايه  ماجذب بيهه لو تنكص ركبتي
اذا اريد اجذب من البدايه اجذب
ماوعد بوجهين

شغلة الثانيه ..
عمر أيس من فلوسه ودينسحب من اهله
حتى مصطفى كاله عوفهم 
وهذاك المشروع عفناه
من يوم ماردنا نبلش بي ماشفنا الخير

ابو عمر ملعب ونايم نووم على الفلس
شاف عمر محتاج و حميد حرجه بالفلوس
كام اشتراله مولد وخلاه يشتغل بيها
في سبيل ميسلمه فلس بيده
والجلب
مسويهه المولد وكاله لعمر بس الاصل هي باسم ابو
هسه ساعة الساعه يسحبهه منه ويطرده

شغلة الثالثه ..
انتي اذا مابيج خير تتحملينا
لا تضلين ويانه
تره بزعانين من الدنيا
واحدنا طالعه روحه
لا اهل بيهم خير
و لا شغل اليسوى التعب
و لاعيشه تشفي الكلب
داكنا الحر والضيم بالشارع
بين المولدات وصوتهن اليسطر والدهن ريحته تكلب المعده
و تصليح السيارت
و دوخه المحل والسوك   .. شعلو اهل اهلنه
والخووف شااايفه الخوف بالشارع شلونه
ساعة الساعه نتذبح بعد متلكينا
احنه دنطلع نشتغل بالويل ندبر اليوم ونرجع
الف مشكله تطلعلنا

مال تضلين انتي كل يوم تتمضيكين براسنا
وانتو وانتو
تره نحطج نجفص بطنج

رجلج عار .. حلي مشاكلج وياه بغرفتج
سدي بابج واكعدي تفاهمي ويا وفضيهه
تردينه
تقبلي عيشته واسكتي
ماتردينه
كليله الله وياك
..
احنه شنو حمالين حطب !
كل مصيبه منه ذبيتيها براسنه !

تفاهمتو تفاهمتو
مادبرت فضوهه وكلمن يولي بدربه
عليمن مبزعته هيج وبزعانه.  !

رجال عايفلج بير ذهب في سبيل مايخسرج
متقدرين !
ميوكف بعينج !
كلشي وكلبتيهه عياط وصياح

والله اكلج
هذول احنه كدامج
تعرفين واحدنا شبر مشبر
لا رجلج غشيمه بي
و لا احنه الغشيمه بينا
وهسه تعتبين علينه وتجذبينا
..
تردينا نضل سوااا  ارجعي  لمينا
و كلب ابن كلب اليكلج لا و يعوفج
مااتردينا وبزعتي من مشاكلنه
كوولي
ومعتب اليشوفج وجهه بعد

دفع وجهي بقوه و راح طلع من الغرفه ..
اني بقيت كاعده للصبح ..
عرفت بامي كعدت .. رحت شفتهه مبدله ودتريد
تطلع لدوامهه
جلال هم كعد ..
سويتلهم ريوك وقبل ميطلع جلال
كلتله ..

-  هسه تسويلي نظارتي لو لاا

هو جر خشمي وكالي ..
-  تحضري العصر اخذج

طلعو واني رحت نمت .. الظهر تغديت وحدي
وافكر بعمر هسه وينه ؟ شديسوي ؟
كلت اخابره بعدين تراجعت

صار العصر وخابرني جلال  من وصل للعماره
نزلتله .. ولكيت الولد كلهم كاعدين بالكيه
جلال يسوق .. مصطفى كاعد بالصدر يمه
رعد اول سره كاعد ..
عمر كاعد قبل الاخير

اني فتحت باب الكيه وكلتلهم ...
- هاي كلكم راح تصلحون نظارتي

جلال صوفر واشرلي باستعجال اصعد ..
صعدت وعمر يأشرلي اكعد يمه ..
اني رحت كعدت يمه هو ديلزم ايدي كلتله ..

- لا عبالك تصالحنا
جيب تلفون

هو تأفف وطلع تلفون من جيبه شمره بحضني
اخذته وضليت افتش بي .. واسأله على كلشي
وهو كل مايجاوبني يرجع يكولي ..
( لاتضلين تشكين بيه لو اريد اخابر مخايف منج )

اني اخذت كل الاجوبه الاريدهه بعدين كلتله ..
-   انته بيك طبع متحجيلي
فلازم اني ادور بنفسي واعرف المضموم

نزلوني لدكتور عيون ..
اني جنت اريد اي محل نظارات بس اغير الاطار
وهمه ماقبلو
كالو سوي فحص ونشوف خاف اكو علاج 
او عمليه تخلصج من النظاره
..

الدكتور هنا من فحص عيوني طلعت زايده من درجة ضعفها .. و انطاني قطرات وبدلي العدسه
وكالي اسويلج عمليه بس عمر ما قبل ..
وضل يكولي تخوف ما امن بهيج عمليات ..

جلال ماقبل عمر يدفع فلوس النظاره الجديده
كله ( احنه متفقين اني اسويهه )

مصطفى بالرجعه هو ساق ..
واخذنا لمطعم بالجادريه ..
وكلشي صار على حسابه ..
حتى الصور هو دفع فلوسهن ..

صارت هاي الكعده تفاهم بينا ..
كل واحد فهم شنو اله وشنو عليه ..
و انطوني وعد بعد ماكو شي ينضم عليه
بالمقابل اني اضل الهم المكان الهادىء والمتفهم
و اتقبلهم بكلشي ..

عمر نبهت عليه ..
(  ممنوع رقم بنيه ينكتب بتلفونه  ولاا رقمه تعرفه اي بنيه لا من كرايبه و لا من شغل و لا من اي مكان )

وهو حتى يطمن شكوكي لزم السيمكارت كدامي
كسره وشمره بالشارع..
وكالي باجر اشتري خط جديد و نخلص

ويه الايام ...
اني صرت شكوكيه الى درجه
وضلت بكلبي الخوفه من اهله
صرت ما أمن اعوف عمر ساعه وماعرف هو وين
لو منو يمه
وين راح وين اكل وين نام
اضل افكر ومارتاح الا اعرف ..

اخابره هواي وهو مابزع مني
كل شي يكولي
بس اني اسده منا اروح اخابر رعد واتأكد حجي
عمر صحيح لو لا
ورعد هم كولشي يحجيلي ومخليهه سر بينا
مايكول لعمر اني داتاكد منه 
والشغله اذا ماعرفهه يروح يخابر مصطفى ويجمعني وياه بالمكالمه حتى اسمع واتاكد بنفسي

عمر جانت مشكلته ويه ابوه ..
يخاف لا يسحب منه المولد 
يكول هاي الشي الوحيد الحصلته من فلوسي
ماريد اخسره
و اهله ديضغطون عليه حتى يطلكني
ابوه حالف يمين كدامه اذا سواهه عمر و تزوجني
يتبرى منه كدام العشيره كلهه    .. و ابد ميعترف بي ولا بجهاله
و شكو فلس او حصه لعمر من ورث اجداده او
ورث ابوه و امه  .. مياخذهن .. حتى لو مات ابوه ميلكاهن ولا يشم ريحتهن
..
و عمة عمر .. هم زعلانه منه
ومتعارك ويه حميد لان بطلت تبيعله حصتهه
حتى لا ينطيها لعمر
..
ضل عمر محاصر بقرارات اهله وميكدر يتزوجني

مصطفى..
اجاني وجايب النتائج..
الولد كلهم ناجحين بس درجاتهم خمسين  .. ستين
فرحتلهم ..
وافتخرت بيهم
مهما كان همه من لا شي كدرو يمتحنون وينجحون
بمواد عمرهم مشايفيهه
كل ٣ سنين ديشوفولهم كتاب و يقروه
كولش افتخرت بيهم  ..
مصطفى كالي ..

- احنه فشلنا
صح كل واحد منا ديشتغل ويطلع مصرف جيبه
بس فشلنا نأمن شي لمستقبلنه
ماعدنا شي جوه ايدنا يضمن مستقبلنا ونكون نفسنا عليه
هذا شغلنا اذا وكف يوم يومين نفلس ماعدنا غيره

عندج عمر ساعة الساعه يكعد عطال بطال
..
المحل اني راح ابيعه .. شفت عليه هنا اشكال المصايب والمشاكل ورزقه ابد مامرتاح بي
..
رعد .. يتمنى يزيدله الف من فلوس شغله كل شهر
..
وجلال .. كاره روحه
يشوف ولد عمه واصلين مستوى و هو بعد سايق كيه
ابوه ميقبل يسلمه فلوس
يريد يضغط عليه حتى يرجع يشتغل وياه بالمخازن
وهو حالف ميشتغل ويه ابوه لو يموت من الجوع

واحنه كبار .. الي بعمرنا هسه كلمن بيته وجهاله
و عنده وظيفه و سياره
يولي يحز بكلوبنا هذا الحال

انتي مو كلتي ..
اذا فشلتو لا تخافون 
دلينا .. فهمينا .. وين الفلوس العدنا وماندري بيها
وين الطريق الصح حتى نمشيله لا نضيع عمرنا
بفرص فاشله

رجعت النتائج بحضن مصطفى وكلتله
..
- هذا طريقكم

ضل يباوعلهن و رجع باوعلي .. ابتسمتله . .
كلتله..

- الدراسه مو بس ورقه تتوظف بيهه
الدراسه مهنه
اذا ضبطتها تبدع بيها ..
هي تبقى ضمان لمستقبلك

انتو بالكم بس تحصلون فلوس
بس اني بالي الكم
اريد اخليكم انتو تصيرون الفلوس
انتو تصيرون كبار بشغلكم و الراتب التحلمون بي
تصيرون انتو تنطوه للناس
وهي لا صعبه و لا مستحيله

مصطفى اندار كابلني بكعدته ..
وكالي ..
- يولي
احنه حظ ماعدنا
ندري بروحنا حظ ماااعدنا
بالحرام اني كمت اخاف انويلي شي لا اتعثر بي ويطلع من عيني
وبعد اذا انكسر واهسي حرام بالحرام شربه المي ماخذها

اني اعرف نبرة الصوت الي تأثر بعقل مصطفى
وصرت احجيله بيها حتى يركز وياي ويطمئن..

- رب العالمين ما نسى الانسان المتعثر
وكال
( و عسى ان تكرهو شيئا وهو خير لكم .. وعسى ان تحبو شيئًا و هو شر لكم .. والله يعلم و انتم لا تعلمون )
..
كلشي رب العالمين يمنعه عنا هو خير النا
والحكمه عنده
احنه باول سنه سنتين مانفهمها
بعدين بلحظه من لحظات عمرنا ننتبه على حكمته
ونكعد نشكر لان هو منعنا من هذاك الشي

مثل هسه لو انتو باقين تشتغلون فيترجيه جان ماصار عدكم محل و مولد وسياره
و لو ما احنه تعاركنا وتزاعلنا فتره
جان ماقتنتعو و قدمتو للسادس ونجحتو بالامتحان

انتو دتملكون اشياء بسيطه .. رب العالمين دياخذها منكم ويعبركم خطوه لشي اكبر من الي جان عدكم
وهي كلها خطوات
بالتدريج توصلون للقمه

اليوم نجحتو بالتمهيدي بعد كم يوم ان شاء الله تنجحون بالبكلوريا
تصيرون خريجين اعداديه
هاي كم خطوه تنحسب عبرتوها ؟.

مصطفى باريحيه حرك راسه متفهم لكلامي ..
واني كلتله
..
- اني هنا اشوفكم تنجحون بحياتكم
من تخلصون سادس
لان انتو ماشاءالله عليكم
اذكياء
و سباع
مكانكم مرموق
ابد ماكدر اشوفكم ناس عاديين
دائمآ اتخيلكم اصحاب اعمال
لان العقل و الإرادة الي عدكم ما ممكن تضيع هيج
لازم تستثمروها بالطريق الصح
و اصح طريق هو ........   الدراسه

مصطفى كالي ..
- ياريت
ياريت الزم بيدي شهاده
حلم حياتي اتخرج والله وحاولت بس الوكت بهذلني

ضحكت وكلتله..
- شووف يعني انته راح تصير اشطر واحد بيهم
لان هذا حلمك
راح تبدددع بي
يعني الدراسه راح تفتحلك باب احلاامك كلهاا
بعد ماكو شي يوكفك
تجيك وظيفه انته مسيطر عندك شهاده
او على دراستك انته تفتحلك مشروع
وتستثمر بي

هو باوعلي وابتسم .. بعدين كالي
..
- شنو تشوفيني وين يرهملي يا مجال

بسرعه ضحكت وكلتله
..
- انته و عمر ايدكم حرفيه
ترهمون مهندسين
ان شاء الله

هو ابتسم بخجل وضل يحك شعره .. بعدين كالي
..
- ايي  هو هذا حلم الطفوله

لميت النتائج ورفعتهن مفتخره بيهن ..
كلتله
..
- صار الحلم قريب

مصطفى ارتاج وضل يباوعلي مرتاح ..
كلتله ..

- اريد اعتمد عليك مصطفى
اذا تعاونا اني وياك
راح نحقق الحلم
وحدي ماكدر عليهم .. احتاجك كولش

هو بصوت عالي كالي
..
- ابشري 

ابتسمتله ..
- تسلم
اريدكم تنظمون وقتكم من اليووم
اجمعهم وخصص من وقتهم اقل شي اربع او خمس ساعات متواصله  نقرا بيها سوه
لازم  نلحك نشرح كولشي ونبقي فتره نراجع  للبكلوريا 

هو تحمس للدراسه .. واني تفائلت وصارت عندي طاقه جبيره لتدريسهم ..
مصطفى  وجوده بينهم مخليني مرتاحه
لان هو الوحيد الي نفسه وعقله بالدراسه
من قبل هو اكثر واحد بيهم يتمنى يحصل شهاده
..

اعتمدت عليه اعتماد تام بكل شي احتاجيته لتدريسهم
وهو جان مندفع بحمااس للدراسه ..
وعصبي عليهم
اذا بهذا اليوم صارتلهم شغله مايخلي يضيع
ينتظرهم يخلصون شغلهم ويجيبهم بالليل
نكعد نقرا لحد صلاة الفجر

اني اشرحلهم و ياويله الي ميركز ويايه
لو يلتهي بتلفون او سوالف
كبل ازعل واكوم
واذب الصوج كوله  بمصطفى
وهو يضل يرزلهم ويخليهم يعتذرون ..
يلا ارجع ونكمل الدرس

امي تكعد ويانه على الواهس تقرا ..
لان هي ماجستير وعدهه هواي دراسه
وهم خلتهم ينضبطون بالهدوء
ودائماً كل فتره استراحه ناخذهه
تحجيلنه هي عن  حياة الجامعه  ..
الاقسام الي تفيدنا
الوظائف
الماجستير
كل شي يشجعنا لمستقبل زين هي تحجي وتحفزنا بي

همه ميعرفون يقرون وحدهم .. اذا انطيهم واجب
يرجعولي بنفس الورقه الفارغه يكعدون هنا يحلوه
واحد يسال الثاني
هاي شلون
وهاي شكلنا عليهه
وذكرني شكالت
ولازم ينطون فد عركه بنص الدرس لو بنص
الامتحان
ونرجع نسوي هدنه  حتى نكمل

عمر كل فتره وكالي
( شلون بالعرس للاي فهميني شسوي اعوفهم واخذج ونطلع من بغداد ؟
اتبرى من اهلي والله مادري حرت بيها )

اني اصبره واكوله
( خلي هسه نركز بالبكلوريا ننجح ان شاء الله
و نشوف شيصير  )

علاقتنا صارت محدوده داخل اطار الدراسه
ما بينا اي شي ثاني كمتزوجين
اني مانعته يلزمني
من اخر  عركه النه  منعته بعد يدور هيج سوالف وياي
لان وصلني حجي من سرى
شلون اهله وخواته يحجون علينه
وضلت هاي الحجايه طابعه بالي
كالن
( هو ضال وياهه على ابو بالحلال ويشبع بيها
شقه فارغه وام مدايره بال
وبنيه على الحاضر كاعده تنتظره
طبعا يجي يشبع بيهه حضن ومباوس وتالي يملها ويرجع لاهله  )

اني كلتها لعمر وهو حلفلي
(  قسم بالله ماضوك غير شفتج ولا تنحسبلي غيرج مره )

بس بقى الخوف بكلبي .. كلت على شنو اجازف
واخلي ياخذ راحته واحنه مصيرنا ممعلوم
..
منعته من كل شي 
صار يجيني بس وكت الي ندرس بي
ومانكعد وحدنا  ابد
كله ويه الولد و امي
نقرا ناكل نسولف كله سوه
..
بس من يريد يرجع لبيتهم
يبوسني من راسي
ويسمع مني كلمة ( احبك )
يلا يروح

اعتنيت بيهم كأنهم طلاب سادس أبتدائي
كل تفصيييل شرحته الهم ..
حتى دفتر الامتحاني انبههم عليه
شلون يكتبون .. شلون يرتبون الاجوبه
شلون يراجعون الاسئله بالتسلسل ..
شلون يحافظون على نظافة الدفتر

و اركز بتوصيل النصيحه الهم
واخليهم يحفظون نفس الجمله الي اكولها
مثلا اذا اريد انبههم  من ينسون شي شيسوون
اكوللهم
( حتى تتذكرون  )
ما خليت بالهم كلمة ( نسيان )
ردت كلشي ايجابي يضل بالهم

مصطفى مشتريلي اوراق ملاحظات صغيره
اني استخدمتها الهم ..
كل يوميه اكتبلهم شي تحفيزي
لكل واحد جملته الخاصه بي
كلمن حسب مزاجه والشي المحبب اله
..
عمر اختارله كل يوم مقطع من فيروز
..
جلال امدح بي وبذكائه هواي .. باشكال وانواع الكلام
..
مصطفى اختارله آيـه  تبعث الامل بنفسه
..
رعد  اذكره ان هو احلى  و اقوى شاب ..
اكتبله مرات شي غزل بجماله .. ومرات اكتبله
( انت فرحي  الاكبر )
هو يردلي بابتسامه يفهم بيها مقصدي

اتخذت هاي الطريقه حيله حتى احببهم بامتحان قبل 
ما نبدي بالدراسه
..
من يجون اني محضرتلهم الاسئله  ..
كل واحد عنده دفتر ابو الستين ..
خاص للامتحانات بدون مراجعه ..
سميناه
( اختبار ذاكره )
..
فكل يوم اني اكتبلهم اسئله عن مواضيع البارحه
واخليلهم ورقه التحفيز بداخل صفحه الاسئله
بحيث همه يقروهه و يضموهه بجيبهم يلا يبدون يمتحنون

ماتعبوني بالفهم ابد .. كلهم اذكياء
وبسرعه يحفظون
عمر من اول مره يلكطهه .. وبين ما اني اعيد شرح الشغله لرعد هو يكون حافظها و اذا سؤال يحله
..
اذكياء ويفهمون بسرعه بالاخص رياضيات و الفيزياء
مشكلتهم بس
الانكليزي

الانكليزي شويه تعبت بي وياهم ..
لان رجعت اقريهم من الحروووف و اللفظ
همه كلشي ناسين عليه
وهنا نحتاج هوايه حفظ للكلمات
قرايه ميعرفون يقرون بي
..
عفت الماده ورجعت للاساسيات
اخذت منا هواي وقت
فخليت درس الانكليزي معزول
ادرسهم بقية المواد .. هذني نمشي بيهن بسرعه
اخليهم يرتاحون ..
وراهه نبدا بساعتين كامله اساسيات انكليزي

همه يقرون ويحلون ويحفظون كله يمي
بس يطلعون الباب
بعد قلم مايلزمون

رغم كل تعبهم بين الشغل والدراسه والطريق
جانو ملتزمين ..
ويحاولون قدر الامكان يوفون وقت حتى يجون يقرون بي

اني جنت اكافىء هذا تعبهم واشجعهم حتى يستمرون
اتفقت وياهم  من نكمل مثلا الفصل الاول من كل المواد
نجيب اكل من بره
كل  واحد  يختار وجبه اكل حسب المطعم الي يحبه ..
..
اني اكتب طلباتهم وادز رعد يشتريهن
ونكعد كلنه بسفره وحده ناكلهن

فلوسهن كلهه مني ..
وهي بالاصل فلوسهم ..
لان همه دائماً ينطوني مصرف ..
عمر كل يومين ينطيني واجمعهن
..
و جلال يقاسمني الخرده العنده
شكو فلوس جديده يعوفهه الي وياخذ القديم
..
مصطفى كل  يوم جمعه  يجي يوزع علينه
خمسه وعشرين لكل واحد بينا
يسميها
( مقسومكم من المحل )

اني كولش حبيت موقفه هذا ومدحته بي هواي
لان هيج هو نفع رعد خطيه مصرفه قليل
و هم يخلي جلال ينتعش
من يشوف الفلوس الحمر

تعاونا شي على شي وماحسينا الا واحنه نراجع قبل ايام الامتحانات ..

التوتر صار مخيم علينه ..
اني متوتره اضعافهم ..
افكر بكل واحد بيهم .. مابنفسي اعوفهم ابد
اريد كون اكعد وياهم بالرحله  واشوف كلشي يكتبوه

ادري بيهم شطار .. وادري بيهم حفظو كلشي
وسهرو هواي ..
راجعو كل المواد
حلو كل اسئله الوزاري
سمعتلهم كل الايات وكل التلخصيات
واحد واحد امتحنته شفهي .. وجاوب
بس بعدني افكر شناقصهم  حتى يجيبون درجة
١٠٠/١٠٠    ؟

قطع تفكيري .. مرض رعد ..
تمرض قبل يومين من الامتحان ..
افلاونزا انتهى بيها ..

هو بنفسه اجاني يكولي
( لبنى مختنك  داريني شوفيلي شي يرجعلي نفس )
..
خشمه مسدود و بلاعيمه ملتهبه
صدره ملتهب
كحته قويه  .. من يكح الا يختمهه بتقيء يلا يرتاح وياخذ نفس

بقى يمنه خليته ينام بغرفتي ..
النهار كله اني كاعده يمه اسويله كمادات
واشربه عصير برتقال
هو تعبان فدمره مابي حيل يشيل راسه من المخده
يون من وجع راسه ..
يوجعه  بين عيونه ..
..
رسلان علمتنا طريقه نفتح خشمه بيها حتى يرتاح
كلتلنا
( انطوه قطرات بالخشم وره خمس دقايق اسحبو شكو شي بخشمه
بهاي الشافطه مال الاطفال )
وصدك سويتهه اله ارتاح عليهه ..
..
خف وجع راسه بقت عنده بس الكحه والحراره
سويتله تشريب عظام  وكل كم ساعه انطي كاسه
بس مي يشربهه ..

ليلة الامتحان  ..
همه كلهم التمو هنا  راجعو و نامو يمنا ..
اني مشتريتلهم قمصان بيض ..
طلعتهن كلهن كويتهن
وطلعت المحفظه بيها اقلام  رصاص جديده
ومساحات ومقطاطات
كلهن جدد ..
علكت القمصان بكنتوري ..
و على الميز خليت حصه كل واحد
( قلمين رصاص و مساحه ومقطاطه و مسطره و قلم جاف ازرك )
وبصفهن جواريب بعدهه جديده . .

همه نامو واني افتر .. كل شويه متذكره شغله ..
مره اروح اطلع الكليجه من الثلاجه دتموع شويه حتى
جلال ياكلهه بالريوك

مره اروح اشوف التانكي بالحمام انترس مي لو بعده
حتى يسبحون الصبح مي يكفيهم لان مرات ينكطع
وماطور العماره  ميشغلوه صبح

مره اتأكد احذيتهم نظيفه لو لا ؟

مره اروح لرعد اتلمس وجهه وكصته خاف حرارته مرتفعه ..
وهو يكعد يحاجيني يطمني عليه يلا اعوفه ..

نمت كم ساعه وكعدت ..
ضليت صافنه وافكر
اكو شي يحتاجوه  قبل الامتحان وبعدني ماسويته ؟

على صفنتي .. اندكت الباب  قوي ..
صوت مصطفى يكول
( الصلاه يابه  الصلاه )

كمت بسرعه طلعت وكلت لمصطفى
(  ميررررسي )
ضحكت  وهو ضل متفاجىء بيه ..
رحت بسرعه توضيت
وفرشت سجادتي بنص الهول ..
حتى همه يدبرون نفسهم يمي ..

مصطفى هو صلى بينا الفجر جماعه
من كملنه.. ماخليتهم يكومون ..
بقو كاعدين واني غمضت ..
لاارداياً  شبكت ايدي بوضع الترجي
و صرت اناجي رب العالمين
بداخلي
شكيتله ..
تعبهم .. قلة حظهم .. املهم . . كبر عمرهم
سجنهم .. مستقبلهم الضاع وتلاحكتله ..
ترجيته   نجاحهم  لما فاضت دموعي ..

من فتحت عيني ورجعت لبست نظارتي
لكيتهم كلهم يباوعولي .. وكلهم سألو بنفس النبره
( شكلتي ؟  )

ابتسمت ومديتلهم ايديه .. لزموهه ..
كلتلهم ..
-  احبكم

كلهم ابتسمولي .. مسحت وجهي وكلتلهم بنبره واثقه ..

- احنه نستاهل النجاح اكثر من كل الطلاب
لان احنه دنشتري الامتحاان بتعب عمرنا
..
انتو اصحاب كفاءات
الامتحان يزيد نجاحكم .. انتو من اصلكم ناجحين
و راح تبقون ناجحين
لان انتو اذكى الولد  و ارادتكم  ميكدر يوكفها شي
..

من انتو صغار اني عندي امل بيكم
واليوم احس املي كبر
وكبر
وكبرررر
صاار بكبر الدنيا
احسه ديتحقق و راح يشوفنياكم شايلين
شهايد التخرج

كلهم كالو ( ان شاء الله نفرحج )
واني واثقه بيهم راح يفرحوني

سويتلهم  ريوك مرتب بين ما همه يسبحون
..
عندي سندانه ورد هنا بشباك المطبخ
اخذت منهه ورده وحده ..
وخليتها بكلاص مي طويل شفاف
وبنص السفره ..

من كعدو ياكلون كل نظرهم  على الورده
واني نظري عليهم ..
همه ورداتي ..
واحدهم ورد مفتح من الصبح
ريحته وجماله وترتيبه ..
كله احلى من الورد

اجوي وياي للغرفه ..
انطيتهم كل واحد قميصه الابيض 
وهمه اخذو حصتهم من القلام والجواريب
وطلعو ..

اني لبست صدريتي الرصاصي و قميصي الوردي
ورفعت شعري بالشريط الابيض
لبست ساعه بيضه
واخذت محفظتي الورديه بيها اقلامي
و طلعتلهم ..

عمر جان واكف بالكليدور ينتظرني ..
اول ماشفني فتحلي ايده ..
وكال ..
- حبيبة روحي
بنيتي  كبرت
هاي اخر ايامهه بالصدريه

حضنته وهو شمني من ركبتي ويكولي بصوت ناصي
- والله خلقوج من روحي

باوعتله وهو كالي ..
-  اذا جاوبت كلشي و رجعت كلتلج
ميه ماتقبل غلط
تخلينا انام سوه الظهريه كلهه
بس حضن ونوم كلشي ماريد بعد

ضحكت وكلتله ..
- اذا ميه تدلل
تسعه وتسعين ماكوووو

هو نفخ صدره وكال
- امشييي انعلج ابو الميه

نزلنه سوه ..  صعدنا بكية جلال ..
وانطلقنا للمدرسه ..
من وزعو الاسئله اني غمضت و دعيتلهم يجاوبون كلشي يصير سهل عليهم ..
بعدين يلا قريت الاسئله ..
وبكل سؤال افكر بيهم هذا يعرفوه ..
هذا راح يذكرون حله ..
جانت الاسئله سهله ..
جاوبتهه بسرعه ..
ماكو شي اني ماقريته بالعشرين خمسين مره وياهم

هالمره طلعت وضليت انتظرهم ..
اني ابد ما واكفه ويه بنات مدرستي ..
اليوم اجني اثنين  ..
سألتني وحده ..
( انتي شعندج مسويه  انتساب شو ممبين عليج مريضه )

مجاوبتهه .. او اصلا معرفت اجاوبهه ..
الثانيه الي وياهه باستهزاء كالتلها ..
( مسويه روحهه مخبله ومريضه نفسيه حتى تكعد بالبيت تقرا وتجي تمتحن على الحاضر
مدرسات شايفاتهه مسكينه ومريضه نفسيتهه
تنهااار
و ينطنهه درجات كامله  )

تعاركت وياهه تعالت اصواتنا ..
وهي ترجع كل حجايتين وكالت
( مريضه نفسيه  ماعتب عليج )

خلتني صدك انهار  واريد اضربهه
بس البنات جرني عنهه ..
اني طلعت للشارع مفوره اعصابي ..
بقيت واكفه يم سياج المدرسه لحد ما وصلو الولد
..

صعدت بالكيه وكلهم يكلولي ( شبيج )
هنا بجيت .. ضليت مخليه راسي على الكشن وابجي

انخبصو عبالهم ممجاوبه واني بعصبيه
سألتهم ..
- ليييش عفتوني انتسااااب
ليش مداومت مثل العالم
شتعذرتو للاداره فهمووني هسه تفهموووني

كلهم سكتو  واحد يباوع للثاني ..
بصوت عالي كلتلهم ..

- كلتولهم مريضه !
مريضه شنووو
منو بيكم رااح وكللهم مريضه
هسه خلي يحجيلي شكااال لمدرساااتي
اني مريضه بشنو

صارو يكلولي ..
( رتبانهه اجازه مزوره وخليناج ترتاحين بالبيت
المدرسه تخوف طريق ميتأمن وبعيد عليج )

واني كلتلهم ..
- لاااا تجذبوووون
جذب مااريد

مصطفى كالي..
- انتي من تمرضتي هذيج المره
و طولتي بيها
تقاريرج واوراق الدكاتره كلها دزيناهه للتربيه
وسوينالج الانتساب حتى متضيع عليج سنه

- اييي و بعدين مو صرت زينه
ليش مارجعت  اداوم !
شكتب دكتور اني مريضه بشنو !
كولولي داعرف مرضي شنو شنوووو

ضلو ساكتين ..
جلال شغل السياره وطلع ..
وهمه كلمن دار وجهه للجامه وبعد ما ردو عليه ..
صيحت عليهم
شمرت محفظتي عليهم
و ردتهم يجاوبوني
ما حجو ..

بس عمر يمي يسكتني و يريد يحضني مارضى
وميقبل يحجي ..
يكولي ما بيج شي لا مريضه ولا شي
بس هيج دبرناهه حتى مداومين
نخاف عليج

هنا حجيتله مشكلتي الصارت ويه البنات
وهو ضل يغلط عليهن 
وكلهم وصوني بعد
اي طالب يحاجيني ما ارد عليه
اسوي نفسي ما اسمعه
وخلي يولي بدون مشاكل

اشترولي ازبري .. وشغلو اغاني غيرو المزاج شويه
و ضلو يسولفولي على الامتحان .. 
كلهم مجاوبين ومتوقعين درجات عاليه

عمر شاورني ..
( ميه حبيبه عمري ميه ماتقبل  غلط )

اني حتى اتاكد منه .. ضليت اسأله عن كل نقطه
وهو يجاوبهن بالتفصيل
حتى الشرح كالي هيج وهيج كتبت
وهيج تركت .. 
شفته صدك مجاوب
يلا خليته ينام بحضني هاي الظهريه

خلصنا ثاني امتحان العربي جان امي ..
يجيها اتصال بوكت العشى  ..
سمعتهه بس كالت
(  قاادر الهي قااادر )
ونزلت تلفون ..

سألتهه شكو .. هي صافنه ..
وراهه كالتلي ..
- خابري عمر خلي يجي يبات هنا
اني راح اطلع

ردت افتهم منها شكو ماحجت .. بس من خابرت عمر
هو كالي لاتخليها تطلع الا اجي ..
وهي بقت على كلامه ..
الا هو اجه وسألهه وين رايحه يلا كالت ..

- اخويه الجبير داز عليه  هو مريض واصل الموت
اريد الحك اشوفه

عافهه تطلع .. وبقى هو يمي ..
استغليت كعدتنا وفتشت بتلفونه ..
كلشي ماعنده ..
حتى محفظته بالختله افتشهه خاف عنده
غير سيمكارت
وكلشي مالكى
..
اشوفه ماعنده شي بس اني شكوكيه صرت ومارتاح اذا مادور  وراه

امي مارجعت  بعد .. جلال من عرف اني وعمر وحدنا بالشقه اجانه . ورجع حاصر عمر
ودز على مصطفى و رعد هم ..
كضيناهه دراسه ..
ماهتمينا لشي ..
همه حتى شغل عافوه هاي الايام ..
صرنا ليل نهار احنه بس
ناكل و نقرا

امي لا يوم ولا يومين هي يم اخوهه ..
كل مانخابرهه كالت بعد مو هسه ارجع ..

خلصنه الامتحانات و بنفس اليوم طلعنه تغدينا
بالجادريه ..
وبالرجعه مرينا للكنيسه ..
عوضنا تعب الامتحانات يلا رجعنا للشقه ..

بالليل خابرتني امي وكالتلي ..
( خلي الولد كلهم يرجعون لبيوتهم من الصبح كون يطلعون  )

اني هم وصيتهم كلت خاف جاي وياهه احد من اهلهه
وهمه تفهمو الموضوع .. ومن الصبح ساعه سبعه
كلهم طلعو ..

عزلت البيت ومسحت .. وطلعت اغسل باب الشقه
سمعت صوت تلفوني يدك ..
رجعت ركض جاوبت امي ..
رادت تتاكد ماكو احد .. وصتني اسوي غده مرتب
..
بس غسلت الباب ورحت طبخت الغده
كلشي كملت وكعدت بالهول اتصفن ..

اندكت الباب .. كمت بسرعه فتحتهه
..
شفت امي وياهه رجال ضعييييف  وجهه اسمر
ومشيب
لابس دشداشه رصاصيه
ومخلي ايده على جتف امي

اني كلتلهم ..
- اهلا عيني
اهلا
تفضلو

وسويتلهم طريق ..
الرجال يمشي بالكوه وامي ساندته ..
اخذته للهول كعدته
واني جبتله مي ..

هو يشرب  ايده ترجف ويباوعلي ..
اخذت الكلاص منه وهو كالي ..

- لبنى

باوعتله وابتسمت ..  هو طلع من جيبه صوره مطبكه
فتحهه وضل رافعه يشوفني ياهه ..
اني عدلت نظارتي وقربت وجهي عليه حتى اشوفهه
..
هاي ماما بالصوره واكف يمها بابا واني و سلمى  لابسين فساتين نفس الشكل و بينهم واكفين

جريتهه من ايده بسرعه وضليت اباوعلهه زين
تمعنت بصورة ابويه
وباوعت للرجال..
مابي شي يشبهه ..

بس هو سوه حركه نفس حركتي ..
اكلب ايدي ارفعهه عدل واخلي اثنين اصابعي على كصتي بالنص واضل اضغط بيهن

اني من خوفي رأسا صحت
( مامااا )

هي الظاهر جانت ورايه .. وماحاسه اني بيهه
رأسا لزمت ايدي وتكولي ..
- ها عيني

اشرتلهه عليه وهي جرت ايدي وخلتهه على وجه الرجال ..
كلتلي ..
-  ابوج  حبيبج هذا

وخرت بسرعه وكلتلهه ..
- لا تجذبين عليه

بقت هي ساكته وتباوعله مبتسمه ..
اني اباوعلهم بخوف ..
مستحيل ابويه شيجيبه هسه !

هي كعدت يمه واخذت ايده باستهه
كلتله ..
- قاسم  حبيبي مرتاح
اجيبلك شي

هو مارد عليهه .. ضل بس يباوعلي ..
واني اباوعله متخوفه ..
هو وكف واجاني..
كال ..

-  سبحان الرجعج  احديثه  ياميااسه
كبرتي بابا
كبرتي  وماشفتج

لزم ايدي واني متردده اريد اوخر بس نظراته
وكفتني
هو رفع ايدي وباسهه من طرف اصبعي الصغير
..
رأسا حضنته
وطكيت بجي بحضنه

تذكرتهه .. ابويه مايبوسني الا هنا بطرف ايدي
يم اصبعي الصغير .. لان هو جرحني بيها
بالمنشار بدون ميدري
ضل كل مايلزمني يبوسني هنا

كعدت بحضنه وشابكته .. ابجي وهو يبجي ويبوس بيه
وامي  جرتني كلتلي .
- علكيفح بنتي لا يوكف كلبج

امسح عيوني واباوعله ممصدكه
ابويه رجع
اني فتحت عيني  على غفله لكيت ابويه راجعلي

ماعرف شسوي .. ماعرف شوصف احساسي
ماعرف حتى احجي وياه

امي هي توجهني .. حطي غده .. جيبي جاي
سولفي .. بوسي ..
اني بس انفذ .. بعدني ممستوعبه كعدتي وياه

امي اخذته لغرفتهه وعافته ينام .. اجتني وصتني
اخابر عمر و اكوله
ابويه رجع وممنوع احد منكم يخابر او يجي
الا احنه ننطي خبر

اني حجيت لعمر هيج وهو تخبل ..
اول حجايه كالها ..
-  ابقى اني ابوج