اقدار الزهور

البارت الثاني

#اقدار الزهور

للكاتبة:𝓑𝓐𝓝𝓔𝓔𝓝 𝓢𝓐𝓙𝓐𝓓

يزعلوني وقبل لآ مني يعتذرون ..
آنسه بدون مآ آعتب ،
( المسآمح مو كريم  .. يحِب )!!

--------------------------------------------
كمت اشوف شنو الموضوع واسمع خالتي تحجي على سالم
فتت لجوة لكيت امجد هذا حماي الصغير صارلة يومين مختفي ماموجود بالبيت وكالعادة مسويلة مشكلة وسالم هو وعمي يحجون علي وعمتي ادافعلة متقبلة علي

اسمع عمي يكللها اي انتي ضلي بهذا دلالج خربتي الفرخ هذا بعد منكدر نكمشة كلة من سوالفج كل يوم جايبلنا مصيبة اكبر من الثانية

امجد: هاا بوية انت متبالي وياي هو اني ادري متحبني وتريدلك حجة علية

سالم :والك عين تحجي ولك صخمت وجهنة كلش بعد شلون نلمها هاي شلون كلي حاجيت امي يلة يمة مو ادافعيلة يلة شوفيلج حل لسوايتة وخليت وطلعت

اباوع لعمي لزم راسة وكعد اشرلي اجيبلة ماي رحت جبتلة واجيت اخذة مني وادي ترجف لحد الان ما اعرف شنو السالفة ابد اكيد هالمرة مصيبة جبيرة
يعني نكول احنا تعودنة على مصايب امجد كل يوم عركة كل يوم سالفة جديدة بس الظاهر هل مرة تختلف

اباوع لامجد ولا هامة يباوع لعمي صفح ويدير وجهه وعمتي هل مرة ساكتة لاتكدر تلوم امجد عزيز كلبها ولا تكدر ادافعلة كدامهم

شوية وعمي كال باجر تروحين تخطبيلة وتخلصينة بعدة ممكمل امجد صاح شنو تخطبلي والله لو تموت ما اخذها اصوم اصوم وافطر على بصلة
كاملة عمي راد يضربة ويكلة فوك شينك ولك انت شتريد ها؟!!  اهلها لو سمعو شيسوون  امجد ماخلا كمش ايدة وراد يدفعة صاحت بي عمتي واخيرا حجت اني اخاف اصير بينهم خاف تجيني دفعة 

اباوع لعمي خطية ضعيف ووحدة كدام امجد وامجد ولا هامة ابوو عادي كلش عندة يضربة اجيت سحبت عمي خطية مبين علي مقهور كوة يحجي

حجت عمتي اسكت خليني اني احجي وانت اكعد لتهوبز باجر اني اروح اخطبلك اياها وتسكت 
امجد والله لو تموتون انتم راح تخبلوني اكلكم ما اريدها
ولك اذا متريدها شعندك جنت وياها مو كتلك من الاول عوفها هسة وعيت بعد مسويت مصيبة مافكرت بالبنيةولك عندك اخوات انت

يمة رحمة للحمزة لتحجين هجي وياي وانتي تدرين هي لازكتلي من الاول شسويلها بعدين اني ما اخذ وحدة تركض ورة الزلم

تاخذها وغصبن عليك حجة عمي وهسة لو مودنية ليل جاان بنفسي هسة رحت وخطبتلك اياها ولك اخوتها اذا سمعو شيسوون بيك لتكلي ماريدها ولو مو الفضيحة جان اني ابد ماهتميت شيسوون بيك بلكت يكتلوك ويخلصوني منك

خنشوف منو كلمتة تنسمع خلة وكام امجد طلع من البيت عمتي صأحت وراى مااهتملها

عمي استلم عمتي كلة من سوالفج دومج ادافعيلة وتستريلة انتي خربتي هااج استلمي هااج وهم راح داح مندري وين ينام هم انشاء الله يجيبلنا بعد مصيبة علمود هالمرة صدك اكتلة واخلص منة ويكولون اب كتل ابنة

حاجاني عمي كومي بوية فرشيلي هد حيلي هذا الحيوان بعد مابية اوكف

كمت فرشتلة وفرشت لعمتي ورجعت لغرفتي اباوع للساعة راح تصير ب٢ باليل وسالم ماهوة لهسة مارجع تأفأفت ونمت بالفراش منتظرتة شوكت يجي شوية وطب مبين علي بعدة ضايج

كمت حاجيتة هو من عرف بية بنية وهو ضايج واجتة عاي السالفة باوعلي ودنك وراح نزع دشداشتة وعلكها واجة تمدد بالفراش

ماردت احاجي سألني هاا حلوها لو مثل كل مرة امي طمطمتلة
درت علي وكتلة كالو باجر يرحون يخطبوها ضليت اباوعلة مترددة اسألة اخاف يذب ضوجتة بية هو من شافني ابوعلة حجة

شبيج ليش لهسة كاعدة
جنت يمهم وعلما كملت السالفة تانيتك ترجع ماكدرت انام
اتأفأف وحجة تدرين اني لو ماجاية لبوي وشاكيتلة واني جنت يمة لحد الان منعرف
منو هي بس لا دنية؟!!
اي هي اجت بالبداية تبجي من شافها امجد طردها بعدين اجت اتهدد بخوتها تكلهم

وابوي كللها اطينة مهلة ونجيج نخطبج لتحاجيهم هسة وهذا كام يشيل روحة ويلطخها بالكاع شلون تكللها نخطبج اني ما اريدها وسوالنة هوسة بالمحل وجبنة لهنا علمود نتفاهم ويااا وهم ماكو

اني ما اتفاجأت من كال دنية لان هي من البداية مثل ماكال امجد لازكتلة هي تلحك وراى وكلنا نعرف هو ميريدها بس شفاها مطيتة مجال كيف واستغلها بس اظاهر هي مراح تعديها الة جان ببالة بس يتونس وراح يطيح بيها

صبح الصبح وبين الشغل وسالفة امجد وهوستة الماتخلص قررو الخميس اليجي يرحون يخطبوها واليوم ثنين باقي بس اتلث ايام

بهاي التلث ايام امجد ماشفنا ولا لفة للبيت عمي يطب ويطلع يسأل علي ويدردم وعمتي ساكتة متحجي شي

اجة الخميس وراحن حنان وجنان وعمتي يخطبن ورجعن بسرعة منطيها البنية هي الموافقة

سامع امجد واجة للبيت بعد غياب مندري وين جاان واجة يصيح ويهدد ما اتزوجها خطبتوها انتم انتم ازوجوها
طولت فترة الخطوبة لان امجد لحد الان ماقابل وكلما يحجون اتكب العيطة بينهم وكل يوم احنا على هل قوانة والهوسة وعدة هاي شهرين ونص عالسالفة
وبهاي الفترة الراحت جنان جابت وكعدت هم يمنة فترة وراحت

اليوم كعدت من الصبح واني احس بمغص يروح ويجي ماهتمين الوجع مو قوي كلت تقلصات اني ستوني بديت بشهري

للظهر والالم يزيد واني جاي اطبخ بعد ما اتحمل رحت لعمتي بعدة سالم وعمي ماراجعين من الشغلة وكتلها عندي الم عرفت نفسي راح اجيب

كامت عمتي كالت راح اصيحلج لحنان تاخذج اني ما اكدر اروح وياج كلتلها جيبي وياج سفوح اختي الجبيرة هي الربتنا بعد مماتت امي واني ماوعيت على امي هي اعتبرها بمثابة امي راحت عمتي همة بيت عيالها قريبين علينا تقريب فرق اتلث بيوت بيناتنا وبيت اهلي هم قريبين احنا عشيرة تقريب كلها ماخذين المنطقة يعني كرايبنة كلها محاوطتنة

شوية وفاتت سفوح اجت قبل عمتي هاا روح شبيج راح اتجيبين؟
اي احس بوجع قوي كمت ابجي من الالم اجت كعدت يمي وكمشت أيدي يلة هسة نروح وين صارت عمتج كالتلي اروح اجيج واني ما اعرف شلون لبست وشلون وصلت الالم اكلني اكل بعد ما اتحمل وما اكدر اصيح كاعدة بغرفة عمتي ينسمع صوتي كوة كام يطلع صوتي شوية شوية كامت سفوح كالت اشوفهن وين صارن

بعدها تريد تطلع اجت عمتي هي وحنان سفوح سألت عمتي جااا وين السيارة شلون ناخذها
عمتي علما اجينة مستعجلين وين ماشفنة سيارة باوعتلهن سفوح بتأنيب هاي كلها وماطولتن وراحت كالت اجيب احمد اخوية الجبير واجي راحت بسرعة ماطولت واجتني كومتني

اذكرت بناتي بعدهن نايمات كعدت اوصي عليهن عمتي عمة حبابة ديري بالج عليهن ولتخليهن وحدهن بالغرفة يخافن احجي وابجي واخاف بعد ما ارجعلهن ..
اشش سكتتني سفوح كالت لتحجين هجي يلة كومي راح ترجعيلهن ماكو شي انشاء الله

طلعت ساندتني سفوح كوة امشي شفت احمد واكف يم السيارة اجة اخذني وساعدني اطلع بيها حاجتة سفوح سوق بسرعة خوية راح اجيب علينة رد اي اي بس اخاف عليها من الطسات

اصواتهم تروح وتجي الالم مايخليني اركز وياهم طلعت روحي يالة وصلنا دخلوني كبل لصالة التوليد واجن الممرضات يسألن بجر
حاجتهن حنان لا موبجر شوية واجت الدكتورة تفصحني و بدت تولدني واني احس بروحي تطلع من الالم كمت اصيح والالم يروح ويجي وولادتي تعسرت ماكو مترضة تطلع مع انو جنت اطلك 

الدكتورة حاجت الممرضة تخليلي مغذي شوية شوية وحسيتها طلعت وبعد ماجسيت بروحي

شوية وكعدت اسمع كلام يروح ويجي هذا صوت سالم يحجي وي سفوح الصوت مو واضح شوية شوية بديت استعيد وعيي

سفوح ؛هااا كعدت الحمدلله على سلامتج
رديت الله يسلمج اباوع السالم يباوعلي ادور حاجاني الحمدلله على السلامة رديت الله يسلمك
وين بنتي
سفوح؛ اخذوها ينضفوها وحنان راحت وياها
سالم: يلة اني راح اروح اسوي بيان للبنية علمود نخرجج ادور

سفوح: شنو راح تسموها
باوعلي سالم وسكت
حجيت بنان اسمها
اي حلو الاسم عاشت ايدج
نص ساعة او ساعة واجة سالم هو وحنان شايلة الطفلة اطتني اياها وكالت حلوة بنتج

اباوعلها صدك حلوة خشمها صغيرون وعيونها كبار ملامحة مو انو بعدها صغيرة بس كلش حلوة ابتسمتلها

وطلعنة من المستشفى رجعنة للبيت سالم كلي فوتيها لغرفة امي ابوي يكبر باذنها ويشوفها
دخلتها عمي كاعد جان هو وعمتي اول ماشافنة كام سلم علية واخذها مني وعمتي هم سلمت علية كبر باذنها ونطق اسمها اتلث مرات وانطانياها تتربة بعزكم يابة

اخذتها عمتي وحتى مكالت مبروك هضمتني حجايتها اجتك الثالثة يسألم والرابعة بالطريق مرتك مابيها وليد اطني اياها راح اسميها اسمين علمود متجي الرابعة سمتها بركة وي اسمها

عمي حاجاها وشبيهن البنات احبيبات ابوهن هذني النعمة لتحجين هجي كلة نعمة من ربنة هذا امجد شسوالنا هسة
هيج كدر يسكت عمتي بس سالم ضوجتة بينت علي اتنهدت شبيدي اني

اسم بركة مشة عليها اكثر شي بالبيت صارو يصيحوها بي

مشت الايام وبدت بنتي اتنشنش كبرت ومثل ماكلت جيهان صارت تهتم بيها ودائما اجي الكاها كاعدة يمها ولو بجت هي تكوم تلوليلها

افرح بهذا الشي لان هو بس اني وي شغل البيت والبنات ما الحك لو بجت ومحد يشيلها الي

مرت الايام وبنان بدت تزحف وهستوها تمشي تزكف على رجليها

ومرة خلصت شغلي وكاعدة ارضع ببنان والبنات كاعدات يلعبن سمعت ركضة بالبيت وعمتي صاحت ولك سويتها ....

للحكاية بقية