#بيوت_الشمس
#البارت_الرابع
#للكاتب _ محمد_ ابو جود
ما غــرني ألمــدح بشفاف المـًحبين
ولا هـمي بشماتـه شمـا حچــو عني
لــ عريان السيد خلف
يوم الخميس صادف يوم الحنة مال زينب و سما نزلت الفجر لكيت سما كاعدة بالصالة و هي صافنة
شمس
" شبيج سما حبيبتي "
ابتسمت بدون ما تباوعلي و كالت
" اني حامل يا شمس حامل "
موبايلي جان بيدي وكع من ايدي و ضليت صافنة عليها متعجبة مستغربة كلامها معقولة حامل كارثة تصير اشلون هيج
شمس بلعت ريكي و كلت
" صدك حامل "
هزت راسها سما و كامت فاتت من يمي و صعدت بدون ما تحجي ولا حرف اني رحت للمطبخ شربت ماي و رجعت كعدت بالصالة حتى النوم طار من عيني شوية و أذن الفجر طلعت بالحوش الهوى عذيبي بارد و خفيف و الأذان صوتة كلش حلو
رفعت راسي و كلت
" ودعتك اهلي و ناسي ودعت سما عندك يا من لا تضيع عنده الودائع ياااا رب "
سمعت صوت وراي درت وجهي شفت امير وراي اشكد اكرهة ضل يباوع علية
امير
" شعندج برة واكفة "
باوعتلة هزيت ايدي و فتت بدون ما ارد عليه سمعت كال
امير
" عفية بيت لام وين ماكو كح** "
درت وجهي عليه و كلتلة
" فعلاً انك واحد عديم غيرة و عديم شرف " عفتة و رحت لغرفة امي حتى اكعدها للصلاة دخلت للغرفة لكيت موبايل امي دا يدك اخذتة مكتوب
" ايان "
أستغربت ليش دا يتصل شلت الموبايل و طلعت من الغرفة رحت للصالة رديت عليه
ايان
" الو ها عمة "
شمس حجيت بصوت ناصي
" اني شمس امي نايمة بعدها ما كاعدة "
ايان
" هلأ شموس اشلونج حبيبتي "
شمس استغربت شنو حبيبتي بس ما اهتميت
" الحمدلله زينة ليش متصل بهل وقت خوما صاير شي عدكم "
ايان
" ها لا لا ما عدنا شي بس امج عزمت امي و مرت عمي للعرس مال زينب على اساس هسة نطلع و نجيكم بس مرت عمي تزحلكت و انكسرت اديها لذلك ما نكدر نجي و ابوي كال خابر عمتك هسة كللها ما نجي خاف تضل بقلق "
شمس
" الحمدلله على سلامتها ما بيها غير العافية "
ايان
" الله يعافيج "
شمس
" مع السلامة "
ايان
" شمس "
شمس
" ها عيني "
إيان
" اريد رقمج اذا ما عندج مانع حتى نضل نتواصل تضلين بنت عمتي و اني ابن خالج "
شمس استحيت ارفض طلبة
" اي ماشي اني ادزلك رقمي برسالة من موبايل امي "
ايان
" ماشي عيني مع السلامة "
شمس
" الله وياك " سديتة من ايان و رحت كعدت امي للصلاة و كلتلها على كلام ايان ما يجون اجت رسالة لامي من ايان مكتوب بيها
" ها وين الرقم " ابتسمت كتبت الرقم و دزيتة الة
رحت كعدت ميسلون للصلاة و اني نزلت صليت بالصالة انتبهت الشمس طلعت من الحمام متوضية و دخلت تصلي بغرفتها قررت اكوم و احجي وياها كمت و رحت للغرفة مالتها دكيت الباب ما ردت علية معناها دا تصلي فتحت الباب و دخلت و فعلاً لكيتها تصلي ضليت كاعدة كملت صلاتها و باوعتلي بطرف عينها
الشمس
" خيرج يا بنت بلقيس "
شمس
" اني بنت ابنج مو بس بنت بلقيس "
باوعتلي بطرف عينها و كالت
" اختصري شرايدة "
شمس بلعت ريكي و قويت نفسي و كلت
" ارجوج أجلي عرس سما و امير لا تسوينا هسة خطية سما "
كامت الشمس بدون ما تحجي شي و طلعت من الغرفة و وكفت بنص الصالة و صاحت
الشمس
" شاكر صابر سارة هدية بلقيس تعالو كلكم حيدر زينب وينكم "
شمس : ضليت صافنة عليها حسيتها راح تنفجر من العصبية الكل نزل كبار و صغار
شاكر
" خيرج يا الشمس صاير شي "
الشمس باوعتلي و رجعت باوعتلهم و كالت
" اليوم زينب و سما يحظرن نفسهن للحنة مالتهن و باجر العرس و انتم من هسة ابدو بالتجهيزات ما اريد شي ناقص "
صابر
" حاضر أمرج "
رجعت باوعتلي الشمس و أشرت علية و كالت
" صابر اخذها و احبسها بالغرفة الفوك لحد ما ينتهي العرس يلة اطلعها "
شمس : اتفاجئت بكلامها هاي شبيها انتبهت محمد هز ايدة و صعد بسرعة
شمس
" شسويت حتى انحبس "
صابر
" مسوية شي شمس "
ميسلون
" ما الج حق تحبسيها شهل همجية هاي شنو عبيد عندج "
الشمس
" صابر نفذ "
اجة عمو صابر علية جرني من ايدي نترت ايدي و عطت بي
" وخر مني شبيكم انتم "
فوراً ضربني راشدي بكفة ايدة ركعني بالحايط ركضت ميسلون دفعتة و تفلت عليه و كلتلة
" طاح حظك يا كواد تضرب اليتيمة "
هجم صابر على ميسلون و ضل يضرب بيها بقوة ركضوا حيدر و زينب و امي و هدية و سارة يوخرون بي ... وخر من ميسلون و رجع علية جرني من ايدي دفعني بغرفة بصف غرفتي و قفل الباب ضليت كاعدة و الغصة خانكتني ضليت اكابر ما منزلة دموعي كمت شغلت البنكة الغرفة حيل حارة ضليت كاعدة يومين بالغرفة
حور : بعد ما صارت مشكلة الفجر بالبيت بسبب الشمس و زواج سما و امير و انحبست شمس رحنة كلنا اشتغلنا انتبهت لعمة بلقيس كل شويا تنزل دمعتها و تمسحها بسرعة حتى محد يشوفها
جنت اعرف و متفهة تفكير شمس لكن تفكير شمس المسالم ما يمشي عند الشمس العدوانية الكل ضل يشتغل ع السكتاوي خالة سارة جنت احسها مشتعلة نار على سما
اكثر شي قهرني زينب ضاعت كل فرحتها بهذا اليوم كاعدة و ساكتة و القهر واضح عليها رغم هي جانت فرحانة بزواجها اما سما جنت حيل متخوفة من عدها ما اعرف سكوتها حيل مخوفني اجت دخلت للمطبخ كعدت ع الكرسي و كالت
سما
" جوعانة ماكو ريوك "
كلها باوعت لسما و اني متأكدة الكل خايف من سما او على سما لان تصرفاتها كلش طبيعية ما عبالك صاير شي
حور
" اي هسة اسوي "
سما
" يلة اجي اساعدج "
حور
" لا حبيبتي روحي كعدي اني اسوي "
سما
" امشي لج قبل يومين تعاركين وياي منو يغسل مواعين الغدا شهل اخلاق هسة " ضحكت و بوستني بخدي و دخلت للمطبخ الخارجي سوينا ريوك اني وياها باوعت من الشباك للحديقة الخلفية الشمس كاعدة ع الميز البرة
راحت سما جابت صينية صغيرة خلت ماعون بيض و ماعون جبن و كوب جاي و صمونتين
حور
" المن هذا الاكل "
سما
" لحبيبة گلبي الشمس " شالت الصينية و راحت من الباب الخلفية للحديقة و اني اباوعلها من الشباك ما ادري شحجت ويا الشمس و الشمس هزت راسها اتقربت سما باست راس الشمس و دخلت للبيت اول ما دخلت طكتها بهلهولة
طلعت من المطبخ اركض
حور
" ليش تهلهلين "
سما
" ههههه يلة بلة باع العوبة غير اليوم حنتي و باجر عرسي ههههه فديتني احلى عروس بالعالم "
راحت سما صعدت و هي اطك اصبع و تضحك و تردد " انة العروس انة العروس "
ضليت صافنة عليها للعصر صارت حنة البنات و لازم نسوي نفسنا فرحانين و الي يسئل على شمس نكللهم مريضة حيل خلصت الحنة و ثاني يوم الكل مشغول و قبل لا سما و زينب يرحن للصالون اجتني سما صاحتني للغرفة رحنة وحدنا
حور
" هاا شكو "
سما
" باعي لج الي بالبيت كلهم كواويد و كحاب ما عدا شمس و ميسلون المهم ما عندي احد اثق بي غيرج هسة حاولي توصلين هاي الورقتين لشمس ضروري تقراهن "
يتبع...
رأيكم بالبارت و توقعاتكم للقادم
احبكم
اتمنى ما تنسون النجمة و التعليقات و بتفاعلكم الحلو تصعد القصة ♥️🙏
تحياتي
#للكاتب _ محمد_ ابو جود
للتواصل انستا abu_joud17
للتواصل فيس بوك Mohammed Fadhel