Gabi na pero abala parin lahat ng mga tao sa loob ng Unibersidad, dahil sabi nila magkakaroon ng seremonyang pagtatapos, na kung saan tanging ang pinakamagaling lamang ang maitatanghal. Nakabihis na kaming magkakapatid at isang kulay pink na baro't saya ang suot ko, blue ang kay Sylvia at green naman kay Armenia na halata ang pag-iyak sa mga mata nito. Habang naglalakad kaming magkakapatid patungo sa ganapan ng selebrasyon ay may binubulong sa akin si Armenia. "Ikaw na ang bahala kay Felma kapatid, gawin mo ito para sa ating dalawa." tumango na lang ako para tumigil na siya, halatang kinasusuklaman niya talaga si Felma.
Tumingin ako kay Sylvia at nagtanong. "Paano kung malaman mo na merong isang binata ang nagkakagusto sayo?" diretsahang tanong ko, napatingin na din si Armenia sa aming dalawa. Nagulat si Sylvia sa tanong ko at bahagya pa siyang umiling. "Hindi na maaaring may magkagusto pa kay Sylvia dahil naitakda na siyang ipakasal" malungkot na saad ni Armenia, napabuntong hininga na lang din si Sylvia. "Pero bakit? Sino ang nagtakda sa iyo na magpakasal sa taong hindi mo naman kakilala?" nagtatakang tanong ko. "Si Tiyo Jaime ang may desisyon nito, hindi nais ni Ina ang mga ginagawang desisyon ng ating Tiyo para sa atin, kaya madalas silang mag-away na magkapatid." paliwanag ni Armenia.
"E paano ang tatay natin, bakit hindi niya tutulan?" nagtatakang tanong ko, pero automatic na napahinto silang dalawa at tumingin sa akin. Nagtinginan pa silang dalawa at mababakas ang lungkot sa kanilang mukha. "Tila iyong hindi naaalala na wala na tayong Ama" sambit ni Armenia na ikinagulat ko. "Nang maisilang ka ay namatay na ang ating ama, nagkaroon kasi ng kaguluhan noon, at bilang isang pinunong heneral ng hukbo ng ating bayang San Oriente kinailangan siya doon, at nasawi siya." malungkot na litanya ni Sylvia. Teka, so ibig sabihin, bunso ako?
" Teka ilang taon na ba si Amar- este ako? " muntik na ako dun ah. Nagtinginan ulit silang dalawa. At hinawakan ni Sylvia ang kamay ko."Marahil nga ay malala ang pagkawala ng ilan sa iyong mga alaala." malungkot na sambit ni Armenia. "Ikaw ay labing walong taong gulang pa lamang, samantala ako naman ay dalawampung taong gulang at si Sylvia ang pinakamatanda kaya siya ang naunang ipapakasal." Nagulat ako dahil sa narinig ko, si Sylvia ang panganay e napakabata ng mukha niya.
Pagkarating sa isang malawak na hall, mapapansin ang kasiyahan ng mga tao dito. Punung-puno din ng palamuti at pagkain sa loob. Tumingin ako sa adobo at target locked! Nilibot ko ang paningin sa loob at nagulat ako ng may isang binatang napakakisig ang lumalapit sa aming tatlo, para siyang isang Diyos dahil sa ganda ng tindig nito. Nakatulala lang akong nakatingin sa kanya ng makalapit siya pero huminto siya sa harapan ni Sylvia, mahinhin na ngumiti si Sylvia. Jusme, napakagwapo naman pala ang magiging asawa ni Sylvia.
"Magandang gabi sa mga naggagandahang Binibini ng Pamilya Sarmiento" ngiti nito.
"Magandang gabi din sa iyo Ginoong Felipe" magalang at mahinhin na bati ni Armenia.
"Kuya, may naghahanap sa'yo" shocks! kuya niya iyang napakapogi? iba rin tong si Timoteo eh. Tumingin siya sa kuya kuno niya at diretso kay Sylvia na hindi nakatingin sa kanya. Nakangiting isinukbit ni Sylvia ang kamay niya sa braso ni Felipe, yumuko pa sa amin si Felipe bago umalis. Nagkangitian silang magkuya bago sila tuluyang lumisan.
Naiwan naman sa harap ko ang malungkot na Timoteo. Kaya naman pala hahaha, kuya niya ang gusto at ipapakasal kay Sylvia. "Magandang Gabi sa inyo mga Binibini" nakangiting sambit ni Timoteo sa amin at napangiti naman ng todo si Armenia. "Magandang gabi din sa iyo napakakisig na Ginoong Timoteo" ngiti nito. Aba kanina lang ay umiiyak ito tapos ngayon ngingiti ng napakalaki. "Ako'y nalulungkot sa nangyari sa inyo ni Dencio, marahil ay hindi din ginusto iyon ng pinsan ko, Binibining Armenia" sambit nito. Teka? Pinsan niya ang ex bf ni Armenia tapos Kuya niya ang kasintahan at ipapakasal kay Sylvia? Tirador ba ng pamilya nila ang mga kapatid ni Amara? Ibang klase din!
Malungkot na ngumiti si Armenia. "Gaya nga ng sabi ng aking bunsong kapatid, kung talagang mahal niya ako ay gagawa siya ng paraan upang hindi matuloy iyon" malungkot na saad ni Armenia, tumingin naman sa akin si Timoteo na para bang hinahangaan ako. Ako lang to!
Hinawakan ni Armenia ang kamay ko, "Pupunta muna ako sa mga aking kaibigan" paalam nito, teka sinong makakasama k-"Ginoong Timoteo, maaari bang ikaw muna ang makakasama ng aking kapatid?", huli na ng magsasalita pa sana ako dahil ngumiti si Timoteo at tumango, ganun din ang ginawa ni Armenia bago siya umalis at nagpunta sa mga barkada niya.
Nakatitig sa akin si Timoteo, ano bang tinititigan nito, kanina pa ito dun sa garden!
" Alam kong maganda ako kaya huwag mo namang ipahalata masyado" saka ko nilagay ang mga nahulog kong buhok sa likod ng tenga ko. Narinig ko siyang tumawa ng mahina kaya masama akong tumingin sa kanya. "Iisa lang ang nakikita kong maganda" nakangiti nitong sambit. Ouch. Nahurt ako dun sa sinabi niya, mga 80%. Dahil nga sa nahurt ako, nagwalk out na ako. Ang taas taas ng confidence ko na maganda ako at ang mukha ni Amara, tapos ganun ang sasabihin niya?
Bahagya pa siyang natigilan ng umalis ako, paulit ulit niya akong tinawag pero hindi ako huminto, diretso lang ako. Para na din niyang sinabi na pangit ako. Kaya manigas siya! Napahinto ako sa paglalakad ng may sumulpot sa harap ko na isang binata. Pogi din siya pero hindi niya napantayan ang kay Timoteo, teka bakit ko ba sila pinagcocompare? Magsasalita na sana siya pero may humawak sa kamay ko at ipinagtiklop ito. Nagulat ang lalaki dahil sa mga kamay namin ni Timoteo. Lakas din amats nitong Timoteo eh, di pa nga kami hinahawakan na kamay ko. "Ipagpaumanhin niyo po Ginoo at Binibini, hindi ko po alam na kayo'y kasal na pala" yumuko ito saka umalis. Nakakunot naman ang noo kong tumingin kay Timoteo at tinanggal ang kamay niya sa kamay ko.
"Ano ba ang ginagawa mo?" inis na tanong ko. "Paumanhin kung naging marahas at padalos dalos ako sa ginawa ko, binibini" sabi nito. Dahil nga sa naiinis ako sa kanya umalis ulit ako sa harap niya. "Teka binibini, ibinilin ka sa akin ng iyong kapatid" pigil nito sa akin pero hindi ako huminto. "Sinabi mong pangit ako!" pabalik kong sigaw sa kanya. Para kaming timang na nagsisigawan sa gitna ng mga tao. "Wala akong sinabing hindi ka maganda, binibini, ang sinabi ko ay iisa lamang ang maganda" napahinto ako sa sinabi niya at hinarap ko siya, hinihingal na din siya. "Tanga ka ba? Ganon na din yon!" sigaw ko sa harap niya. Nagulat pa siya dahil sa sinabi ko.
Dumiretso ako sa mga mesa ng mga pagkain at kumuha ng isang plato at pinuno iyon ng adobo dahil nga favorite ko. "Sige na, maganda ka, binibini" sabi nito sa aking tabi habang kumukuha din ng pagkain. Pinaningkitan ko siya ng mata at tumingin naman siya sa akin. "Hindi ako napipilitan, sadyang maganda ka, binibini, ika'y aking binibiro lamang kanina" sambit nito. Hindi ko alam, pero parang kinilig ako doon ah, mga 70%.
Parang ang FC naman naming dalawa, kakikilala lang namin kanina pero ganito na kami mag-usap at magbiruan!
Agad kong nilantakan ang adobo dahil sobrang gutom na ako, hindi na ako naghanap ng upuan o ano, diretso kain na ako sa harap ng mga maraming pagkain. Gulat namang nakatitig sa akin si Timoteo. Tinaasan ko siya ng isang kilay dahil dapat 'mind your own business' tayo sa mga ganitong pagkakataon. Tumingin siya sa paligid, susubo na sana ulit ako pero hinila niya ang kamay ko! "Saan ba tayo pupunta?" naiinis na tanong ko sa kanya. Kanina pa to ah, hinawakan ang kamay ko tapos ngayon hinihila, hindi ba conservative ang lalaki sa panahong ito.
Doon sa mga binabasa ko sa libro, bawal ang hawakan ng kamay kung hindi mo pa nagiging kasintahan o asawa ang isang babae. Napansin kong dinala niya ako sa isang mesa, malapit sa harapang entablado kung saan may tumutugtog ng piano at violin. "Nakakadalawa ka na ah!" inis na sambit ko sa kanya at diretsahang sumubo.
Tapos na akong kumain pero nakatingin parin siya sa akin na tila ba nakakita siya ng multo. "Kukuha lang ako ng pagkain" ngumunguyang paalam ko sa kanya. Para naman siyang binalaukan sa sinabi ko. "A-ako na, diyan ka na lang" maginoong sambit nito saka tumayo papunta sa mga nakahelerang pagkain. Nagtataka naman akong ngumunguyang nakatingin sa kanya. Nang makarating siya, agad kong nilantakan ang adobo, at wala paring bago sa ekspresyon niya!
Habang kumakain, lumapit na sa amin sina Armenia at si Sylvia kasama si Felipe, napansin kong nagulat si Timoteo sa biglaang pagdating ng presensya ni Sylvia na nakangiti habang kausap si Felipe. Wala akong pake sa mga drama niyo, mas importante ang adobo!
"Dahan dahan sa pagsubo, Amara. Ayusin mo ang iyong nga kilos, hindi kaaya aya ang mga ginagawa mo" bulong na sambit ni Armenia. Napansin kong napatawa ng mahina si Timoteo kaya sinamaan ko siya ng tingin. Dahil may adobo sa pinggan ni Timoteo at hindi niya iyon ginagalaw, agad ko itong kinuha at napatigil ako ng makitang nakatingin na silang lahat sa akin at halata ang gulat sa mga mata nila. Tumingin ako kay Timoteo, at halatang nagpipigil ito ng tawa. Agad akong sinaway ni Armenia at humingi ng paumanhin kay Timoteo at ngumiti lang naman si Timoteo. Tinignan ko ang pinggan ko at ubos na ang pagkain pero gusto ko pa. Tumingin sa akin si Timoteo at napakagat siya sa sarili niyang labi habang tinitignan ang adobo sa pinggan niya at ang akin. Shet! Sa tanang buhay ko, ngayon lang ako nakakita ng lalaking sobrang gwapo kapag kinakagat nila ang mga labi nila. Sa amin kasi, mukha silang mga suso na nastroke. Napatulala ako sa ginagawa niya, nang-aakit ba siya?
God, ako na ata ang maistroke!