اسيرة قدرك

البارت 43

اسيرة_قدرك..
بقلمي  رسل..
البارت الثالث والاربعون..
واتباد rasolaa7

ماذا لو اخبرتك
بأن الحديث معكِ
يشبه الطمأنينة
يشبه احتضان الف غيمة
يشبه حبات المطر..

-شكد صاير احبج شسويتي بيه ريا وعيونج
من اذيج ادعي على نفسي لان ما تستاهلين
اريد اتغير وياج بس بطلي عنادج لا تخليني
اتهور و اتندم..

-رفعت راسي اسر اذا صدك تحبني و تريد
تتغير اريدك تثبت هذا بشيء واحد واني وعد بعدما اعاندك ولا اضوجك..

-هو حجه بلهفة شنو..

-اريدك تسمعني زين و تفهم كلامي وداعتك
هالشيء الك مو الي وانت الي راح ترتاح
اذا مشيت عليه..

-اي يابه احجي و تأمرين امر انتي عيوني
الج..

-اسر اني اتمنى اشوفك من احسن الناس و شوكت
البشر يصير هيج من يتقرب من ربه اريد اشوفك
قريب من رب العالمين
اريد اشوفك وانت راضي ربك قبل امك
و قبلي وقبل اي واحد
اريد افتخر بيك بهذا الشيء
اسر والله ادمر من اشوفك تشرب
ومن ما اشوفك تفرش السجادة و تصلي
اسر انت بعيد عن ربك هواي وهالشيء والله
يأذيني لان اني احبك وما اتمنى اشوف الي
احبه هيج واصل مرحلة بالبعد عن ربه..

-هو صافن عليه و يلعب بشعري.. كملي..

-تستهزئ بيه؟!.. ترى والله احجي صدك..

-ما عاش الي يستهزأ بيج كملي كلامج حلو..

-هو مو كال هيج لو انطاني الضوء الأخضر
ضليت احجي ويا بعدها كتله..  تبطل شرب
اسر و تصلي و وعد والله لا اضوجك و لا
اعاندك حتى اهلك اتحملهم..

-اسر انت جاي دمر نفسك تدري ما جاي نرتاح
بسبب الشرب و هاي الأماكن الي تروحلها
اسر تعرف شكد تغضب الله بهالشيء يمكن
جاي ينذرنا بعقابه وهيج حياتنا ما مرتاحين
ولا مستقرين نطلع من مشكلة نوكع بالثانية..

-وخوفي يا اسر لا ربك يعاقبك باغلى ما عندك
بناتك ساعتها مو بس من كلبي تطلع وجهي
ما تشوفه..

-اسر رب العالمين غفور رحيم
و هم شديد العقاب اذا احد خلا هاي المعادلتين
و مشه صح عليهن والله يرتاح بالاولى لان
دور رضا ربه و يأمن من الثانية لان ربك
يمهل و لا يهمل.. وانت اول شيء تسوي
لازم تصلي اسر والله شوف حياتك شكد راح
تتغير..

-كل الي حجيته ويا حسيت اجه وكته جان
من زمان ابالي هالكلام بس جنت اخاف واخاف
لا اواجهه وهو يعاند و يفهم غلط وساعتها
يزيد..

-بس الحمد لله من شفته متفاعل ويه كلامي
الي توكلت على ربي ونويت بس يرجع
من الواحب احجي بي ويا عسى ولعل يفيد..

-رفع راسي وقربني عليه باس شفتي وراسي..

-اريد كلب يلومني لان اخذتج و عيونج
جنت ناوي على الصلاة بس من تعاندين
لو تصير مشكلة احس راحتي بالشرب وانسى..

-غلط حبيبي والله الراحة بالصلاة السم
هذا مفعولة كم ساعة و اثاره عمر يدمرك
ويكثر مشاكلك..

-انتي منو علمج هيج تغردين شنو هذا اللسان
الي ينكط عسل تدرين ريا بحياتي ما مكابلني
احد وهيج مواجهني استغربت بالبداية كلت
هاي شو شراح تطلب مني بس
طلبج صفني هواي ريا..

-كل شيء اعرف والله بس استحي واخاف
احجي ما عندي الثقة الكاملة اهلي جانوا ما ياخذون رايي انت بداية زواجنا ما تسمع مني بس منهن تعلمت اسكت اني كوه حجيت وياك هسه جنت خايفة لا تفهم مني غلط..

-لا تخافين مني روحي انتي.. وهسه اسالج سؤال
وجاوبي بدون لف ودوران و لا تخافين خوش..

-هزيتله براسي اي.. هو كال..

-هم ندمانة لان قبلتي بيه واحد بعيد عن ربه
و سكير..

-خليت ايدي على شفايفه.. الصراحة قبل اي
هواي ندمت لان شفت منكم المر بس هسه لا تحجي هيج لان لو ندمانة عليك واحد بالمية
ما تشوفني كبالك..

-وين تروحين حجاها بضحكة..

-اهج من هالدنيا هو حضني.. اهج وراج
وين ما تروحين تلكيني لزم وجهي..

-فكري وسويها وروح ابويه وجهج اعتبري
احترك بتيزاب ملامح وجهج الحلوة اخربها..

-على كيفك شكد تهدد هسه اني هجيت.. زين
شتحب بيه انت؟!..

-كلج احبج..

- اكيد اكو شيء مميز بيه تحبه اكثر جاوب
فدوه..

-ماكو شيء بيج ما احبه  واغار عليج من الهوه
لو مر بيج صرتي روحي باس خشمي..

-تحضري نرجع بعد يومين للشمال..

-ودوامك شلون؟!.. هو جاوبني حبيبتي خليت بديل صاحبي اسبوع وارجع..

-زفرت بقهر.. هم راح ارجع للهبطات والقلق
انت من تروح تاخذ روحي وياك..

-لج باب رزقي هذا وهاي المرة  واجبنا بالانبار
مو كركوك لا تخافين..

-ضجت شنو ما اضوج ترى  بعد اتعس اوضاع الأنبار.. لج ماكو شي يروحي الله يحمينا..

-كام.. اخذتنا السوالف من وراج اروح اجيب شي ناكله.. كمت ويا طلعنا كلها نايمة تعبوا
من الردح يمكن هو راح واني بقيت انتظره..

-من رجع جان جايب لفات وعصير وحلويات طلع لفه قربها على حلكي اكلي اعرفج جوعانه..

-اكل انت حبيبي اني اكل بيدي هو ما قبل ضل يوكلني وياكل كملنا و غسلنا و رجعنا للغرفة
فتح ايده تعالي يمي اجيت يمه..

-منو يرجع ويانه.. هو كال اكيد اهلي وام مهاب وسمر بس ناز تبقى عند ابوها يروحون يم
بيت اخو..

-ريا من هسه اوصيج معليج باحد اذا احد ندك بيج انه اعرف اتصرف ويا بس انتي لخاطري سايسي وغلسي وهي فترة وكل الوضع يتغير ما اريد
مشاكل..

-تدلل حجيتها هو سحبني عليه ونمنا..

-كمت الصبح هو جان بعده نايم عفته و طلعت جانوا كاعدين قررت احاول اتغير وياهم لخاطره هو هم يفرح وهم من يشوف هالشيء بلكي يصلي..

-صبحت عليهم و اتقربت على عمتي..
عمه شنو اسويلج ريوك.. هي كالت وياكم سوه اكل مو وحدي..

-عفتها و رحت للمطبخ كملت الريوك و خليت
الاكل كعدو كلهم اني رحت على اسر اكعده لكيته كاعد بسته بخده.. صباح الخير..

-هو حضني.. شنو هذا الصباح الحلو
ورا الظهر نروح نزور اني وعدتج اعوضج
وان شاء الله من هاليوم نبدي..

-فرحت هواي لان كلام البارحة بعده اباله كملنا ريوك ورحت احضر ملابسة طلب مني دشداشته السودة واليشماغ و رجعت لبناتي هم بدلتلهن..

-ما حبيت اخلي يتاخر لان كال نطلع هسه وهم نتغده بره لبست صايتي و خفت لا وحدة تجي ويايه و يغثني و تالي يروح كل كلامي..

-من طلعت اسر جان معازم وحده ومفهمهن ذاك اليوم الطلعة جانت الهم وهاي النا صعدت يمه وهو يبوس بمهرة الي مخبلته بسوالفها جان
فرحان كلش ومنطلق..

-وصلنا قريب الإمام.. راح ازور ومهرة
وياي وانتي وريا روحوا ومن تكملين اطلعي هنا تلكيني منتظر بهذا المكان..

-دخلت للامام زرت و طلبت منه يحنن كلبه عليه
و دعيت منه انو اسر يتغير و يلتزم بصلاته
هواي بجيت دموع قهر وكانو الامام واكف كبالي واشكيله حالي بقيت فترة ابجي واطلب مرادي
اجني نسوان كعدن يمي المره التفتت عليه..

-بلكت تقرين الزيارة الي يمه.. اي خالة تدللين..

-ليش هالكد بجيتي عيني عليج ما سكتي..

-حجيتلها مختصر على حياتي هي حيل انقهرت ودعتلي براحة البال بست راسها و قريت الها
الزيارة وهي كل شوي و دعتلي براحة البال
انسانة كلش بسيطة وحبابة ودعواتها حلوة
كملت وسلمت عليها وطلعت..

-رحت على نفس المكان ملكيته بقيت ادور عليه بعيوني خفت كلش وارجع اباوع للمكان اي هو
نفسه لعد وينه شوي وشفته واكف بس جانت
هوسه انتبه عليه اجه مبتسم.. زيارة مقبولة حبيبتي اخذ ايدي تعالي وياي..

-مشيت ويا هو كال.. اريد اكابل المناير مال موسى ابن جعفر عليه السلام واوعدج بشيء..

-اوعدج اول شيء راح اصلي وعمري مراح أتركها وبعد ما أذيج واكون سيف على ركبة كل واحد يأذيج اتحملتي وياي واريد اعوضج عن
كل شيء عن القهر و الضرب وكل شيء
شفتي ويانا..

-تنهدت.. اسر دائما توعد بس تخلف هو حلف بلأمام هالمرة صدك كلامه و مراح يخذلني..

-ان شاء الله يروحي حجيتها واني فرحانه
المنظر كبالنا ترتاح النفس اله وكلامه طمني
حسيت بشعور حلو عبالك تحررت من
كل الهموم الي عليه..

- اعشكج وحق هاي المناير ما عندي اعز منج ومخاينج وداعت عيونج خاف عندج خوف بداخلج..

-ابتسمت بفرح.. اني هم احبك ودعيتلك هواي..

-طلعنا مطعم نتغده طلب اكل ضل يجيب ويخلي اكل كدامي وفرحان وفرحتي بي اكبر
كملنا وطلعنا نتمشى هو شاف العبي.. وين عباتج لعد؟!..

-ملختها وصارت وصل هو باوع عليه وضحك .. خبال مو صاحيه..

-دخلني لمحل اشتريت كم شغلة البسها داخل
الغرفة بعدها طلعنا و اسمعه خابر صديقة..

-عاصم المطي راح نوصل لمنطقتكم نشوف ولي العهد موجودين لا و اسمعه يتشاقة ويا..

-من سده كال.. راح نروح لبيت صديقي جايهم ولد..

-لا عفيه استحي رجعني وانت روح عليه
اقنع بي هو ما قبل وصلنه وره شويه اجه الولد سلم وصعد ودانه لبيتهم تلكتنه امه شلون مرة حبابه..

-سلمنا عليهم و تحمدت المرته على السلامة
وعيني على اسر شلون شايل الطفل وفرحان بي
هو خطية كلش يحب يصير عنده ولد بس مع
هذا يحب بناته هواي وما يفرق عنده..

-مهرة راحت يمه تغار عليه لان الولد بيده
هو باسها..

-يرادلج أ خ حبيبة ابوها قرب الطفل عليها تبوسه
ورجعه لابو..

-ترخصنا منهم رغم ما قبلوا نطلع بس اسر
كالهم عندي كم شغلة لان رايد ارجع لاربيل فترة..

-بطريق الرجعة هو باوعلي.. ها حبيبتي تونستي..

-اي حبيبي كلش غيرت جو والله اليوم ارتاحيت
هواي..

-مو تدللين يروحه وكلبه لاسر..

-رجعنا جانت سيارة خالهم بالباب..
خطار اكو يمنا.. هو كال اي ريا ما اريدج تهتمين اي وحده تحجي شيء انتي غلسي..

-نزلنه وسلمت عليهم سماح حجت.. بعد وكت لو انتي وين منطلع لازم تولين.. باثناء كلامها دخل اسر هو سمعها صاح بيها.. سماح شكد دورن طلايب ترى شفت بعيني كله منج تعيلين بيها
وتحجين اذا ندكيتي بيها اكسرج والرضا
كافي ما مليتي من المشاكل..

-هي زعلت وراحت بس فوخ كلبي وعدني بعد ميسكت لاي وحده وفعلا هاي البداية حتى عمتي ما حجت..

-رحت للغرفة شوي واجتني ناز وهي مبتسمه بفرح.. عندي حجي وياج يفرحج..

-تعالي فوتي خير..

-لج ريا لو تشوفين بيبي شسوت بسماح
طبعا اذا ما تصدكين حقج بس والله شفتها
بعيني..

-هسه غير تحجي شسوت بيبيتج؟!..

-رزلتها وما رضت عليها و ضلت تندب بحضها
لان مشت وره كلامهن كالتلها.. صرت من
وراجن ظالمة و غاضبة ربي من كد ما تزنن
براسي على البنية وهي ما اذت واحد بينا
و ابني مخليته بعينها..

-بعد ما اسكتلجن على ظلمجن وليدي راح
يكتله القهر من وراجن..

-رفعت راسي للسماء.. الحمد لله تشكرت
من الامام موسى ابن جعفر فدوه لحفيد الرسول
ما قصر وياي شنو اريد بعد اليوم نخيته وهاي عمتي نصفتني لاول مرة..

-طلعت وهي فرحانة طالعة على امها حبابه
فتحت الكنتور اطلع ملابس دخل هو حضني
وراسه بركبتي.. ضوجتج ام المشاكل..

-لا حبيبي ما اهتم الها وعدتك اغلس وهاي
اوفي بوعدي.. باسني.. فدوه للعاقلة المعدلة
ولج شو صاير اشتاقلج كل شوي..

-ضحكت هو كال.. طالع اجيب عشه توصيني شيء..

-سلامتك..

-جاب العشى وبدينه نحضر جان ثواب
لابوه الله يرحمه واكفين و نحضر وما نحس
غير وسن تخربطت عمتي صاحت ولكم
بنتي شبيها.. على صوتها اجوي و اسر سندها
و غسل وجهه لان جانت دايخة كلش شالها
وطلع اخذوها للمستشفى تأخروا و احنا نلوب
وعمتي كطعت روحها على بنتها نهبطت كلش..

-من رجعوا جانوا فرحانيين طلعت حامل رحت باركتلها وامها تبوس بيها صبينه العشه واسر كعدني يمه و سماح بعد ما حجت شيء..

-بقوا يتعللون اني رحت الغرفتي جنت جايبه لامي حرام وسبحه وعطر من اشتريتهن
هو سألني المن كتله لماما خطيه اخذلي عطرين وحرامين وسبحتين الي والها..

-تذكرت كلام ناز و قررت اكسب عمتي
لان هي تحب ابنها كلش بلكي تصير زينه
وياي لان تعبت من المشاكل والحقد..

-عزلت الغراض لامي و لعمتي..

-ضميتهن ورتبت نفسي مكيجت ولبست من الي اشتريتهن اليوم خليت عطر وشعري رتبته
باوعت لروحي حلو واحد ترتاح نفسيته
لان تنعكس على شكله..

-كعدت انتظره شوي ودخل من شافني صوفر
بصوت ناصي.. لك شنو هذا الجمال
اميرة و كبالي شطالعة حبيبتي لو ادري من
زمان اجيبلج ملابس و يغمز.. اروح اسبح
وراجعلج ضحكت عليه هو اخذ منشفة و راح
للحمام..

-حضرتله ملابس هو شوي واجه شعره مبلل ورموشه هم وصايرات حلوات هو رموشة
كثيفه وكفت يمه نزل راسك شويه هو ضحك
ونزله لمستواي بسته برموشه و حركتهن
بيدي.. احبهن احلى من رموشي.. هو ضحك..

-هنه ودنيتي وكلي مسجل باسمج..

-لاتجذب عليه وحبيباتك ابو حمودي..

-اش.. يا زبالة ذني وتاج راسهن عندي يروحن فدوه لتراب رجلج.. حضني خلاني على صدره..

-ما اريد هل لحظات تخلص كد ما حلوة واسر
شخص ثاني وكانو الله عوضني بي كل تعب
شفته ومر عشته بس رغم جماليتها شفته مهموم
ومبين عليه الهم..

-شبيك حبيبي ليش احسك مهموم الصبح
ما جان بيك شيء..

-هو تنهد.. ماجد دمرني ريا تعبت منه هواي وصلت ويا يبيع مخدرات بالسر ويا جماعة متعرف عليهم هناك واذا الدولة لزمته تسجنه
و يطيح حضه بعد اكثر..

-سوالفه متخلص دمرتني خالي دز عليه
ابنه يضبط وضعه ويطلعه من هل ولاية وبعد
ما ادري شلون راح تخلص ويا تعبني مو صغير
سوالفه تجيب الهم..

-حاولت اهدي.. ماكو شيء على كيفك كون يسمع كلام ابن خالك ويبطل و هم يصحى على
حاله..

-حضنته وهو ضل يسولف عنه و شلون تعب
ويا الى ان نمنا..

-الفجر فزيت على صوت المنبه ضليت اباوع
عليه ومثلت النوم.. كام سبح و لبس تراك فرش السجادة ووكف يصلي كمل وفتح القران ويقرأ..

-ما تحملت بجيت من هالمنظر امنيتي جانت
اشوف هذا المنظر و اسر هيج واكف ويصلي الله حققلياها و اكثر من شفته يقران قران..

-الحمد لله هدايتك يارب كمت بست راسه..

-تقبل الله حبيبي
الله ينولك كل الي بداخلك و يريح بالك ما تدري
شكد فرحانة.. هو ابتسم وما حجه شيء عفته
على راحته صليت ورجعنا مرتاحين بهذا اليوم
احس يوم مختلف بحيث كل دكة من كلبي احسها
تدك بفرح ضليت اتشكر من ربي الي وفقنا
بهذا الشيء..

-ثاني يوم وره الغدة اسر حجه وياهم.. بويه حضرو نفسكم باجر نرجع لاربيل..

-مهاب اعترض.. خالي اني ما اروح عندي شغل..

-نصبوا عليه و كل واحد يشمر كلمه عليه
وهو يضحك.. خوش شغل ضل سخت زين..

-ضحكت عليه الي حلو بمهاب هو كد
كلمته مخلى حبهم يطول و لا سوه مشاكل
جان عند كلمته و ما خذل نورهان رغم هو قبل حب وحده بس دره بيها طلعت ويا صديقة القاضي وهو جزت روحه منها و
نهى كل شيء وياها..

-اسر كعد يم عمتي.. متبقين هنا اريد اوديج طبيب مال مفاصل هناك تعبانه مفاصلج وكدر يقنعها قرروا قسم يروحون ويا اسر وقسم ويه زيد بس ناز وابوها يرجعون لبيت عمها لان هي عدها دراسة..

كمت جبت الهدية.. عمه البارحة ذكرتج بشيء واتمنى متفشليني و تاخذينه مني..

-طلعتهن لها وخليتهن بيدها.. وذكرتج بدعاء من كلبي بست راسها.. هي اخذتهن وخلتهن بصفها
تنهدت همزين ما فشلتني..

-فزيت على صفكه ايد قوية التفتت.. اسر صفك ايده.. وتلوموني من احبها كام باس راسي
كدامهم خجلت وهو حاضني..

-مهاب صاح.. خالي لعد لو شايف الي عندي لسانها مترين حرام اريدها تسكت ماكو عكس ريا هادئه هنيالك عليها..

-اسر ضربه.. خليت عينك ****
اذا تعاركنا اطيح حضك.. تستاهل اجتك حتى تأدبك بقو يتشاقون بعدها باس راسي وباس امه هي كالت..

-الله يرزقكم بالولد واشوفه قبل لا اموت حجت
هيج اسر تخبل كعد يم رجلها.. عمرج طويل
يمه من عمري على عمرج بعد روحي..

-علاقته بامه كلش حلوة متعلق بيها بشكل
اكثر من كل اخوانه وهي هم متعلقه بي..

-باوعتلي.. عفيه عليج بنيتي معزتج من
معزة وليدي الي ما مقصرة ويا ما عندي
شيء وياج يمه صح جنت اضوج منج بس
طلعتي خوش بنية و مترباية..

-ابتسمت على كلامها احس ملكت الدنيا
فرحني هواي والله باوعت لام مهاب.. شكد
احبها الفضل لربي والها من كد ما تمدح بيه
بالكلام يم امها عمتي تغيرت كل نظراتها..

قال رسول الله(ص)..

(الكلمة الطيبة صدقة)..

احذروا من فتن اللسان..
للكلام نتيجتان اما فتنه و شفنا هالشيء
بالكلام الي جانوا يوزون بي اخوات اسر امهم
وهيج حقدت بظلم على مرت ابنها..

-واما صدقة و نعمة مثل ما شفنه ام مهاب
الي من خلال مدحها لينت قلب امها على ريا..

يتبع....

اللهم صل على محمد وال محمد❤️